STORYFB.COM

Nun tihlimtu Lalnunhlimi
By CVL.Awmpuii



Chapter 27




"Ṭhiana, tùn kâr chu hun remchâng lo insiam rawh aw...bazar tùrin lo inring rawh" Msa message ka chhiar rual chuan ka chhâng lêt vat a. A nupui neih nî chu ka dinpui dâwn a, a phûr surh surh viau mai. Rilruah inneih lam ringawt a awm a, thil dang a leng meuh lo chu a ni.




"Heihi eng nge a awmzia?" Nunhlimi message ve thung a ni. A thlalak min rawn thawn chu ka en vat a, ka phun nghal hluk. Nimin khan kan inah ka naute ṭhian hovin châw an rawn eikhawm a, an eirawngbawlna bulah chuan ka lo awm chilh ve a. Nunhlimi thlalak min rawn thawn ber kher chu Nonoi nen kan indinchilh lâi a ni a, engtin nge maw a lo neih reng reng ni? "Ngaih kawih tùr a awm miah lo" ka va ti thâwr a, insawifiah thui vak ngaihna ka hrelo. Ka message chu a hmu reng a, min chhâng lêt tawh lo chiang asin.




"I hriat kha...naupang mai alawm a la nih. Nangmah chiah ka duh che, thlalak khi chu ngaih kawih tùr a awm lo. Nimin tlãi khan kan inah châw an eikhawm a, an eirawngbawlna bulah awm ve in kan indinchilh lai tak an lo la fuh mai mai anih khi" ka ti leh duah a. Hmaichhanah lo chuan kan sawifel leh thei tak tak chuang paw'n ka ring lo. Hlauhthawn ai mahin ka thin a rim nghal ṭun a, Msa vâng vek a ni. Ka ngaihtuah lai mêk chuan a hnen aṭangin phone call ka la dawng zui a.



"Hello" pawh ti lo chuan "Eng nge?" ka ti nghal hluk a, "Eheu, i pawi ka sawi em ni? Kan va lungawi loh hmêl ve" nui huk huk chung hian a rawn ti zâng vuh a. Nunhlimi thlalak min rawn thawn leh a tihtauh thû te chu sawiin "Nangmah vang vek anih hi" ka ti hluk hluk a. A ni lah tak bawk a, Msa hian Nunhlimi fiam nan Nonoi'n min ngaihzawn em em thû hi a lo sawi pek a. "Ṭhianpa hi i tih lungawi loh vaih chuan substitute a nei ṭha teh ania aw" tiin a sawi ṭhaih ve khanglang a. Nunhlimi thîk thu chhiat zia chu hria se a fiam nek lo vang mawle. Keimahah a ṭuan zui a, a titau nasa viau nghe nghe. Kan in thlêm lungawi ṭan chiah tihah heti hi kan ni leh ta sia. Msa chu ka mawhpuh lo thei lo a ni.




"I lo hrilh khanglang a, a la lungawi famkim lo. Nonoi lah ka naute nen an inkawm ve reng a, ka tán pumpelh theih a ni bîk si lo va. Kan inah an tãl hnem si, Nunhlimi chuan thîk tùr a hmu hnem dâwn ania aw. Hrelo tawp se ṭha zawk tùr ania. Fiam chintawk i hrelo a, a thikthuchhiat zia i hrelo a ni" ka ti leh nghut nghut a. Min lo nuih duh lêk chauh a. An inneihna tùr lampang min sawipui zui ta daih a. Thinrim reng theih pawh a ni lo.




Msa nen kan inbiak zawh chuan Nunhlimi chu ka call nghal a, vawili ka call na ah pawh a ring ral ṭhak ṭhak mai. Ka message thawn hnuhnung ber chu a hmu reng a, a haider lui hmiah niin ka hria. Thaw chhuak hawk in ka file en lai chu ka nawr sawn a, ka hmai ka tuai nghal puat a. Hnathawh leh ngaihzawngte titau thlêm chu a inrem hlawl lo alawm. "Titau suh" ka va ti leh ringawt a. Awmzia a awm dâwn chuang lo tih hre tho mah ila a lungawi loh ka hlauh zia hi hria se ka duh a ni.



Office ban veleh khawiah mah pêng kawi lovin inah ka haw tlang nghal a. Nunhlimi titau chu ka ngaihtuah rùn duh tawh lo, zaninah an inah ka kal ang a, a fel leh vek turah ka ngai nghal hmiah mai.



Ka room-a ka luh rualin Kimtei'n min lo zui lût ve nghal a. "U...naktuk zingah tih tur pawimawh i nei em?" a tih chuan " Nei em em nang, eng nge ni?" ka lo ti sup a. Ka kamisz hak lai chu ka hlip zui mual mual bawk a. Kimtei chu ka khumah lo ṭhu nghal tharh in "Yes, anih chuan college-ah min thlah rawh aw...field trip kan nei dâwn a, ken tur neuh neuh kan ngah sia Taxi hman mai chu ṭha tho mah se kan bawr dâwn lutuk a mahni motor-a kal kha ṭha in kan hria a " a lo ti zung zung a. "Ka thlah dâwn che ania" ka lo ti ve mai bawk a. "Ok, anih chuan ka ring ang che aw" ti a chhuah mai a tum chu ka thil hriatchhuah avang chuan ka lo ko ding leh rih a. Ka phone chu phawrh in Nonoi nen kan thlalak, Nunhlimi min lo thawn chu ka hmuh ta a. "Heihi tu lo lâk nge?" ka ti nghet churh a, a ngaihna a hriat loh hmêl kher mai.




"Awi kei chu ka ni lo rêng rêng, tinge? Khawi ami nge?" a lo ti zung zung a, chîk zeta ka en pawh chuan a ngaihna a hriat loh hmêl tak tak. "I ṭhiante chawei a i sàwm dawnin fimkhur tawh ang che" ka ti ta ringawt a. Ka âw chu a rum mah mah mai thei. A ngaihdan a lo ni vak bîk lo aniang "Eng nge? Engtin vak nge ka fimkhur ang a" a lo ti ve nghat a. Ka tih dàn teh ngawt kha a lungawi thlak loh ve bawk a ni. Mahse sut leh ka tum chuang lo.




"Khatiang thlalak vang mai mai a han lungawi loh, a ho emai" a lo tih leh chuan " Ho nang, i u Nunhlimi min lo thawn anih kha. Engtin nge a neih chu ka hre bîk lo. Mahse a neih ngawt theihna chu i ṭhiante zing ami an ni ngei ang" ka ti a. "A thîk a, i chungah a ṭuan tihna em ni?" a tih chuan ka ngawi reng a. "A rilru têt thlâk emai a. Nonoi i duh tihna pawh ni hlei lo" a lo ti leh nghat a. "Chutiang ngawt a ni lo" ka lo ti ve nghut a. Han sawi zui chiam dân erawh ka hre chuang lo.



Kimtei chuan "Nonoi chu ka ṭhiannu ania, a duh che a, a vei em em bawk che. Mahse khami vang ngawt khan U Nunhlimi hian a haw tur tihna a ni bîk hlei nem. I lakah zahpuiawm takin a khawsa ṭhin a, in inkar a rawn tibuai ta viau pawh ni hlei lo. A rilru a tê ve mah mah anih kha. Nonoi te chuan khati zawng khan a ngai teuh lo mai. A inthlahrung thei ropui si, a bulah phei chuan engtin mah awm miah suh ang che" a ti ta duah a. Nunhlimi rilru té lutuk anga a chhuah daih chu ka lâwm viau lo. "Nunhlimi hian a hua a ni reng reng lo. I ṭhiante kha lo hrilh la a nimai, khatiang thlalak kha Nunhlimi hmuh theih turin dah chhuah lo chîng tawh suh se" thupe aw zet chuan ka ti ve churh a. Min melh ren rawn hnu ah lungawi loh hmêl zet hian min chhuahsan ta daih a. Ka room kawngkhar lah chu a rawn khar ri zui bur lehnghal a. A ṭhiante thlavang a hauh chu ka hrethiam ve lutuk, mahse anni vang kha ni lo sela Nunhlimi'n khatiang thlalak a lo hmuh ngawt tur thû a awm lo.



Zàna lèn tum viau si kha kan pu te lam aṭangin hna hmanhmawh thlakah phone call ka dawng leh a, zanina file en fel ngai ngei ngei min lo thawn a. Ka lêng hman leh ta ngang lo. Nunhlimi chu ṭha takin ka va hrilh ta tho a, insawifiah tawh lêm lovin ka lèn hman loh tur thû chauh chu ka sawi tawh a. Ka message chu a en ve ngei a, min chhâng lêt lehpek chuang lo.



Ka mut dâwn chuan Msa hnen aṭangin message ka dawng ve thung a. "I bialnu leh i hmelma ka hmù" tih tê mai hi min rawn thawn a, "I hmelma" a rawn tih chu Apuia ani tih ka hrethiam mai. "Khawiah?" ka lo ti nghal a, "Kàwnah Bike-in an inphur, i la thlêm lungawi lo zo a ni maw" tiin nui lem min rawn thawn tel a, ka chhâng lêt tawh lo. Hepa pawh hi a lo hmu fuh thei si, min rawn hrilh zel ṭhin bawk si a. Min la nuihsawh thei em em zui a, ka ngei tak tak a ni.




Nunhlimi lungawi lohna chu ka hrethiam lutuk a, mahse eng emaw hleka Apuia a lo tel ve hman zel hi chu ka haw takzet. Ka tán pawh a lawmawm loh, kan sawi zin tawh tehlul nen a sim thei dêr lo chu anih hi. Ka va be zui duh ta bîk rih lo va, hmaichhana inbiak ngei ngei kan ngai zawk a ni.




Zingkarah ka Nu in min rawn kai tho a, "I nau chu i thlah dâwn lo em ni? A inpeih tawh ania" a rawn tih chuan ka tho ve nghal mai bawk a. Mipa mah ni ila ka muhil hi kaihthawh ka awlsam ang reng a, hun ka duh rei lo ṭhin khawp mai. Hmanhmawh deuha inphih faiin ṭhutkhawmna lamah chuan ka va phei ve nghal a. Kimtei chuan phone a lo hmang mêk a, "Min lo sâwm phei mai r'u aw...aw ka lo nghak ang che u" a ti sawk sawk a. A ṭhiante nen an inbia niin ka hria.



Phone a hman zawh chuan a bungrua chu khai sak mai ka tum a, "A ngailo, ka ṭhiante nen kan kal rual dawn" a lo ti deuh hmak a. Nizana kan inbakkaih deuh avang khan a la lungawi lo reng niin ka hria. "Ka thlah ang che" ka ti sup a, mahse a lo duhlo nasa mai. "Nonoi'n min lo sâwm dâwn, an motor-in a kal dâwn a, a rualin ka kal dâwn" a lo ti nghat a. "Midang tihbuai a ngai lo, ka thlah thei che" ka lo ti ve nghut a. "Nonoi" a ti sek pawh hi ṭul ka ti viau lo. Kimtei chuan "Ka tibuai bawk lo, i thlah ka duh lo bawk" a lo ti leh fak a. A hmêl awm dàn leh a mitmeng aṭang chuan tih luih chi niin ka hre ta lo. A awm dân khawlhkham zet chuan ka dawhtheihna a ti pan viau bawk a, "Ni teh se" tiin ka room-ah ka lêt san leh hmak a. Ka Nu leh Pa te hrilhai hmêl chu ka hmu lo der hmiah. Duh leh Kimtei chuan lo hrilh ve tawh mai rawh se.



Tukṭhuan kan ei laiin ka Nu chuan thil awmzia min zâwt ta tho a. "Ka lakah a lungawi vak lo va, a titau anih kha" tih ringawt in ka chhang a. Mahse ka Nu chuan "A sawi dàn nen a va inang lo ve. 'A bialnu a ṭan lutuk anih kha' a ti a, ka zawh chian lah khan a sawi buai deuh nuaih a. I sawi ṭha duh bîk bawk si lo, in hahthlak tlat" a ti mawlh mawlh a. Kimtei chuan chutiang zawng ber khera a lo sawi chu ka beisei lo asin mawle. "Nunhlimi thlavang ka hauh vang lam a ni lo, a ṭhiante vang anih kha" ka ti ta ringawt a. Insawifiah vak hi ka thiam zawng a ni thlawt lo a ni e.



Ka pa chuan kan thubuai chu rawn khaikhawm in "In buaina chhungril tak chu hrelo mah ila a upa zawk i nihna ah i nau chu tih lungawi vat tum la, sawifel vat ang che u. Ngaihzâwng tih vêl vanga unau intihbuai phei kha chu ka ngaihdan a ni hauh lo ania. Chhungkua hi dah pawimawh hmasak ber tùr a ni ngai. Nunhlimi hi i nupui chu ni sela ka hrethiam a, mahse i ngaihzawng mai chauh a la ni a. I nau nen intihbuai phah nana lo hman chu a ho viau ania. I nau pawh ka lo be ṭha ang a, in buai thui hma ib sawifel vat ang che u" a ti duah a. Nunhlimi an puh chhe dâwn riau a ka hriat avang chuan ṭul lo deuhin Nonoi chungchângte chu ka hrilh ta vek ringawt a. Chutia an hriat tâk ah chuan min hrethiam hnuhnawh viau mai.



"Inneih lamte hi in sawi ve tawh em?" ka Pa chuan a lo ti hluai a, rilruah awm ve rauh rauh tawh mah se chutia ka pa meuhin min zawh tâk thut ah chuan a zamawm ve duh khawp mai. Ka âw thian hmasa tê tê in "Msa te hian an zo fel phawt sela, ka sawi ṭhat pui ang" ka ti a. "A ṭhat chu, nupui nei lo rual i ni tawh lo bawk a neih tùr hmuh chuan neih hmiah mai tur" ka pa chuan a lo ti leh hluai a. Ka kawppui atân Nunhlimi an pawm thlap tih hriat chu a thlamuanthlak khawp mai.



"Taka....Helen-i te inneih pawh kha karleh mai hi a ni tawh a, engtia tih chi nge mawnle? Min rawn sâwm urhsun ve si a, han kal loh ngawt kha ni theiin ka hre bawk si lo" ka Nu chuan a lo ti ve hluai a, "Kan kal ve ngei ang chu" ka Pa chuan a ti tak na in kei chu kal ve pawh ka tum lêm lo. Ka lawmpui loh vang leh ka rilru nat vang lampang ni lovin ṭul ka tih loh vang a ni ber. Duh leh ka nu leh pa te chu kan chhungkaw aiawh in kal mai sela, ka duh tâwk viau mai.



Nilengin Nunhlimi nen kan inbe ta lo, ka buai chu thuhran nise nizana Apuia nen an lo inphur kher khan min ti hnual a, hmaichhanah law law sawipui ila a ṭha zawk ang. A ni pawh a reh zui hmiah a, a la lungawi lo viau ni tur a ni. Ka theihtawpin ka insawifiah tawh a, kha bâk bâk chu tih vak ngaihna ka hre tawh bîk lo.


Zanah chuan hna ka khawih hma in ka va call ta hram a, a la dâwn lo emaw ka tih tawh hnu ah a lo la ve ta hram a. "A tàwp a tàwp ah chuan min chhâng ve ta hram alawm" ka ti nghal hluai a. "I hmelchhia" a rawn ti ringawt a, "I hmelṭha anih mai chu a" ka lo ti mai a. "Titau ngît ngêt peih si" ka tih leh chuan "Nang pawh i lawm miah lo vang aw" a rawn ti bak nghal hlar a. A la lungawi lo hle anih ka ring. "Keipawh ka lawm bîk miah lo ania aw" ka ti ve ta nghut a, hmaichhana sawi ah ka khek viau na in ka insum duh ta bîk lo.



"Engvang ngawt chuan maw? I zak theilo e a" a rawn ti nghat a. "Apuia nen in inphur tih hrelo pawh ka ni bîk lo a" ka lo ti ve hmuk a, ka insehruh nghal ṭeuh mai. "Chutiang eng nge..." ti a insawifiah a rawn tum lai mêk chuan lo pawt chat in "Ka rawn lêng dâwn ania" ka ti thâwr a, "I buai lo em ni?" a rawn tih leh chuan " Sawifel tùr kan neih kha, ka lo phei" tiin phone chu ka dah ta daih a. Dik tak chuan hna khawih tur ka ngah lutuk, mahse Nunhlimi a pawimawh zawk tlat a ni.



An in ka va thlen chuan a chhûngte an lo awm miah lo va. "Khawnge?" ka tih chuan "U Akimi pà a dam lo va, an va kan anih kha. Keiin in ka lo nghak thung a" a lo ti ṭha ve mai a. Ṭhutkhawmna lamah chuan kan inzui phei nghal a, a rawn ṭhu ve mai dâwn emaw ka tih laiin "Thingpui ka'n lum ang aw" ti a a kalsawn tùr chu ka lo pawt ding a, "A ngai lo, sawifel phawt ang" ka lo ti tlang tawp a. A ner deuh nang nang mai. Ka bulah chuan ka pawt ṭhu a, thuawih tak chuan a awm ve mai bawk a.



"Le...insawifiah rawh" tiin ka melh nghal khui a, thil serious tak chu a nih ka ring lem lo na in ka hauh nat zia hi inhre hrim hrim sela ka duh a ni. "I zaklo e...min puh lêt daih suh aw" a lo ti bak hlar a. "Sawi tlang mai rawh aw Lalnunhlim...khatia phat buai vêl kha a ngai lo" ka ti hmuk a. "Ka hmingpum in min ko suh" a lo ti bak leh hlar mai. A thinrim te lah hi a vin ve ṭhak ṭhak ṭhin sia. "Anih chuan sawi rawh, Apuia nen chuan engvangin maw in lo chhuah dun a?" ngeiawm rawngkai lek lek hian ka ti a. "I sawi awmzia hi ka hre miah lo ania aw...khawiah mah Apuia nen khan kan inhmu lo e a" a vin ṭha leh ṭhak ṭhak viau.




"Sawi ṭha mai rawh...ka hre vek ania" ka tih leh pawh chuan ka thusawi awmzia chu a hriat loh hmêl tak tak a. "I tihsual vang mai khan min puh lêt tum suh aw...Apuia ka hnaih tawh ngai lo hrim hrim. Khati zawng kha chuan min ti miah suh" a ti fiah ta fak a. "Anih chuan tinge Msa khan a hmuh thû che u a sawi si?" ka ti ta nge nge a. Nunhlimi chuan "Awi...a zak thei lo e...khawiah nge min lo hmuh a?" uar zet hian a lo ti hluai a. "Kàwnah Bike-a in inphur lai a hmù che u, nizanah a rawn sawi vek alawm le" sawi fuh inti zet hian ka lo ti vat a. "Awi....a awihawm loh lutuk. Nizanah ka chhuak lo hrim hrim, kàwn chu sawi loh kan inkawt pawh ka pêl lo aw. U Msa chuan a hmu sual hle anih chu, keimah ka ni lo vang" a ti tán tán a. "Ni lo la a sawi lo vang" tiin ka lo ṭang ve tlat si. Kan inhnial bap bap reng a, a pha nasa mai sia. "U Msa chu bia ila a nimai lawm" min cho zet hian a lo ti nghat a. Chuti na nâ nâ chu tiin kan be ta poh a.



"Aw Hello" a rawn tih rual chuan " U Ms, nizanah kàwnah Apuia nen min lo hmù em ni? Hei U Hluzuala hian min puh chhe teh mai ania aw ka lâwm lo khawp mai" Nunhlimi chuan a lo ti nghal tán tán a. Rum zet hian min lo melh khai zui a, ka ṭawng ve hma hauhin Msa chu a be nghal zawt zawt a ni ber. Chutah Msa chu a rawn nui chhuak ta hawk hawk a, "A va han ã tak e aw...a lo awih elo?" a rawn ti hlawl mai. "Malsawmtluang...zawnga" ka ti nghal ṭhawt a, a nuih a lo za zual sauh mai. "Ka chhaih thinrim mai mai a, a lo awih anih dâwn kha. A a va han chhah mep mep tak e aw i bialpa hi chu" tiin Nunhlimi bawk chu a rawn be leh daih a. Phone chu ka hmet tàwp nghal hmak.




Nunhlimi, mahni inringtawk taka min melh ram ram tu chu ka nuih tlawn ta ringawt a, sawi tur a vâng duh kher mai. "Bum awlpa" min tih chuan "Tihpalh" ka lo ti ve nghal vat a. "Ka lungawi loh sa nen dawt thû hmangin i rawn lungawi lo ve khanglang a, min puh chhiatna tùr te chu i la zawng ve ngat ngat a. Nang anga lerh ka ni lo aw hmêlpawng " a lo ti leh zat zat a, a la lungawi lo ngang aniang min melh rum ṭha khep khep khawp mai. A bulah chuan ka va insawn ta ringawt a, chesawn a tum rual chuan lo kuahbet nghal vatin "Ka âtchilh lutuk vang vek che" tiin a nghawng ah chuan ka hmui ka nawr nghal vang vang a, a lo thaw chhuak hak mai.




Chutia rei tâwk fang kan awm hnù chuan "Ka la ngaidam miah lo che ania aw" a rawn ti hram a, mahse a thinrim lutuk tawh bîk lo tih chu ka hrethiam ve tho. "Insawifiah vak ka thiam tawh lo, mahse ka rinawm ve tâwk " tih ringawt in ka lo chhâng a. "Ka ning tlat, tinge hmeichheho hian an zuam em em che a" a lo ti ve ta thlawt a. Keipawh heihi ka zawhna chiah a ni. "Engtin mah ka awm ngai chuang lo, min zuam ve em em tawp ni berin ka hria" ka ti ringawt a. Ka inkharkhip ve nasat nen min zuam em em chhan hi ka hre miau lo a ni. "Hmeichhe zak theilo ah i tla nâ anih hi" a rawn tih chuan ka lo rum nghut a, mahse thinrim a lâk ngam chi pawh a ni rih lo. "Ka thiam loh a nih chu" ka lo ti ringawt a. A thinrim rei hlei thei ta bîk lo.



"Engtin nge thlalak kha i neih theih reng reng a?" ka tih chuan " I nau ṭhiante zingah khan hmêlhriat pakhat ka nei ve alawm, a status ka hmù a. Caption-ah 'Inhmeh tawp' tiin a lo hmang khanglang bawk sia. Ka tán i rinawm reng tih hre tho mah ila chhaih theiha i lo awm hrim hrim kha ka lâwm lo êm a ni" a ti ta duah a. A insawi thinrim leh dâwn a ka hriat avang chuan thil dang ka sawi pui ta daih a. Minute tam a liam hma in ka chhaih nui leh kar kar tawh.




Ka haw veleh Kimtei chu ka be ta ngat a, zîng lama ka pa thusawi kha ka la hre reng a. Chutihrual chuan a ṭhiante chungchangah pawh sawi ṭhat pui tùr a awm tlat. Ka biak tirh chuan min be ṭha duh vak lo va, mahse min hnuchhawn rei thei bîk lo. "Nunhlimi thlavang ka hauh lutuka i ngaihna kha chu ka thiam loh a ni. Mahse i ṭhiante pawh lo hrilh ṭha la, tun hnu ah chuan chin tâwk lo hre tawh rawh se aw. I thian kawm ṭhinte hi sawisel ka tum a ni miah lo. Mahse Nonoi'n ka laka a rilru puthmang in hre tlâng vek a, ngaihzawng nghet nei ka ni tih in hre vek bawkin ka ring a. Ngaihbel theih tùra awm ka duh hauh lo ania. I ṭhiante pawh status leh eng ilo vela fimkhur turin lo hrilh la. 'Kawm suh, kawm rawh' tih lamah chuan engmah sawi buai ka tum lo. In ṭhianho inkara rawn inrawlh lah ka tum hek lo. Mahse la nula chho ṭan tur chauh in ni a, tuna in rilru puthmang hi Nula puitling in nih hunah chuan in pu reng bîk dâwn lo va. Nakina in zah loh nan tun aṭang hian in inkawm danah pawh fimkhur rawh u" ka ti ta duah a. Chutia ṭha taka ka hrilh tâk ah chuan a lo haw tawh bîk lo.



"Ka lo hrilh ṭha dâwn ania. U Nunhlimi'n a status a hmuh theih kha chu Veni anih ka ring. An inhre ṭha ve pangngaiin ka hria a, Veni hian a sawi veleh zeuh ṭhin a. A status khan hetiang in a lo ngai dâwn tih a ring pha bîk lo aniang" a ti ve ta nge nge a. "Nizan lama ka ṭawngkam avang khan ka thiam lo a ni, titau tawh suh aw" ka ti dam leh thluam a. A bu deuh nghat nghat mai. Kan unau hi kan intibuai khât khawp mai a, kan inhnial buai ve chhunah pawh ka thlêm thiam ngai lo. Ngaihdam dil pawh ka tum ngai lêm chuang lo va. Hun a kal deuh a, kan inngeih veleh mai zel a. Mahse tun ṭum chu hetia sawifel hi a ngai ve tlat a ni.




"Keipawh U Nunhlimi chungchanga ka ṭawngkam avang khan ka thiam lo a ni. A dinhmunah khan ding ta ila, ka awm ve dàn tùr tho a ni" Kimtei chuan a lo ti ve ta nge nge a. Ṭha deuha ka sawipui meuh chuan kan buai thui ta bîk lo e. Social Media kan hman danah erawh chuan ka ngaihtuahna a kal thui khawp mai. Status ka update kawngah te hian fîmkhur a lo ngai khawp mai ka ti ta. Tuna kan buaina ang hi chu a la fel mai thei zawk a. Mahse fimkhur phah nana hman erawh a ṭha khawp ang.




Msa nen kan inhmuh leh hmasak ber chuan ka hau nghal pang a. "Fiamthu ah pawh chin tâwk a awm a, khati zawng kher kha chuan min fiam tawh miah suh. Tlem a tlem ah kan buai thui ṭep alawm" ka ti hluk hluk a, a nui leh ringawt chu duh lovin "Nui ringawt zel suh. Khati zawng khan min han fiam leh na teh i châk lo viau ang aw" ka ti leh hluk a. "Chhaih kual hi i nuam ve êm alawm, i awih hma thei ropui si" la nui ṭeuh chung chuan a ti leh hram a. "Hetianga i awm reng dâwn chuan in inneih hunah dinpui tùr dang zawng rawh" ka lo ti hmuk a. A nuih a la za zual sauh mai. Mahse a hnù deuhah chuan ngaihdam min dil leh hnuhnawh a.




"Tak taka khatiang em em khan i lo ngaih serious ka ring lo va ka thiam lo a ni. Uang peih ta reng reng chu chhaih thinrim che kha ka châk tlat pek alawm mawle. Ka ti tawh lo vang, in inṭhen tak takte chu a hlau ber pâwl alawm ka nih le" a ti ve ta nge nge a. Rilru té leh zau lo nih hi ka duh miah lo, mahse min fiam dân kher kher kha chu a zawngchhang tlâk viau lo a ni. Nunhlimi nen kan inkarah chuan thil engkim hi a lo sensitive tawh ṭhin si a. Kan thîk thû a chhe dunin kan inhauh na ve ropui si, khati zawnga fiam chi kha kan ni vak lo. Kan pahnih inkara kan han inchhaih zeuh hi chu thuhran ania.



Helen-i te inneih ni chuan ka Nu leh Pa te'n an va telpui ve hram a. Tukṭhuan kan ei laia an sawi kha chuan ṭul lo ka tih thû ka sawi chhuak nghe nghe a. Mahse ka pa in "Min lo sâwm ve si a, an zahawm alawm. Chuloah kha chen in lo inkawp ve tawh a, in inṭhen tâk avanga inhuat zui kher a ṭul lo. Min lo sâwm miah si a, kan va kal ve aniang chu" a ti bur mai a. "Inbiak ṭhat zui zel pawh a ngai chuang hlei nem" ka lo ti ve nghut a. Ka huat em em chhan an hrechiang bawk a, kan tàwp chhan lah khati kha a ni a. Min dem em em hran bîk lo vang.




Office ka ban veleh ka Nu chuan an inneihna kalna chungchang te chu min lo hrilh zung zung a. "A pasal kha an sawi kalhmangah an khawsa thei hle a ni àwm a. Helen-i chuan a thur chhuak ṭha khawp mai an ti nghe nghe asin. Sum hi chu a ber ni lo mah se tunlai chhanah chuan inneihna ah pawh hian hmun pawimawh tak a lo chang tawh anih hi. Helen-i Nu nen pawh kan inhmu a, a hlim khawp mai. An duhtak an nei a ni chêk ang chu, an lawmpuiawm " a lo ti duah a. Ka bulah chuan a rêl duh chiah si lo va, mahse a ei ta vak bîk lo niin ka hria. "U...a pasal ai khan i chhelo daih zawk" Kimtei'n a rawn ti ve thung a. "Engtin nge i hriat a?" ka Nu in a lo tih chuan "Awww...thlalakah ka hmù...khatiang patling deuh tawh lehnghal engtin nge a duh theih le aw ka lo tia. Mahse i sawi kalhmangah sum vang aniang" Kimtei chuan a lo ti vat a. A inthiamlo leh deuh nge ni "Aaa...inhmangaihna vang bâk chu a ni thei lovang" a rawn ti leh hnuhnawh a.




Sum hi a pawimawh a, tunlai chhanah hmeichhe ding phei chuan mipa innghahna tlâk lo chu an nei duh tawh lo tih ka hria. Va dem ngawt theih pawh an ni lo, an dinhmun aṭang chuan a àwm hliah hliah. Mahse mipa khawsa thei deuh hlek, hmel leh pianphunga chhuan tùr nei miah lo an han nei a, "Sum vang aniang" an lo ti nghal ringawt hi chu ṭha ka ti chuang lo. Chutihrual chuan sum vang ngawr ngawr a nupui pasal a insiam hi chu an awm ve tih hai rual a ni lo. Helen-i te pawh chutiang chu an ni ka tihna kher ni lo in a nu mizia aṭang hian ka tinzawn thei mai.




Ka Nu chuan "A inneia te ber an hlim chuan a ṭha a ni mai a, kan lo sawi phâk a awm ve tawh si lo a le. An lawmpuiawm khawp mai" a lo ti vat a. "Kei chu chhelo bawk si, hausa bawk si, ka hmangaih ngei, min hmangaihtu ni bawk ka la nei ang" Kimtei chuan a lo ti veleh hram a. "I duhâm emai a" ka pa in a lo fiam zuk a. A ṭawng tikal tâwk lekin a fiam fuh a ni chêk ang chu a duhthusàm ang mipa a sawi zui zat zat a. A tàwp ah chuan "A û ang hi ka duh, mahse boring lo" a lo ti kher a. "Ka boring lo" ka lo ti vat tak na in a lo ṭang na khawp mai. "Hnaah i bur chawt a, i hlimawm loh emai, i zei loh hmel ropui si" min ti erh a. Ka lo nui ringawt. Ka bialnu a ni miau lo va, a hrelo mai mai a ni.




"Eng nge a awmzia?" ka kuta chêng hnih a rawn hmehbel rual chuan ka lo ti hu a. "Ka ràlna che anih kha" nui rah rah chung hian a lo ti a. A va han nghal mai mai tak. "Sual thiam si" tiin a bengkâwmah chuan ka seh zeuh a, a zà ti chu a lo tãl nghal nghek mai. "Duh tâwk teh" nuih chhuah hlau zet hian a lo ti ṭawk ṭawk a, ka duh tâwk ve ta hram. A chhûngte tih harh palh hlau lo ila ka duh tâwk miah lo vang mawle.




"I theihtâwp hi chuan i nghal ve alawm tiraw?" ka ti a, a kut no zet chu ka khalh pah bawk a. Mitmei vèn tùr an awm lo bawk nen inhnaih fe hian kan ṭhu dùn a, a chhûngte mu hma ṭhin hi chu kan vanneih pui ve ngawt mai. "I rilru engtin emaw tal a na ve tho em?" a rawn tih chuan ka lo rum nghut a. "Sawi tlang tawp rawh, ka rilru a na miah lo vang" tiin min rawn en chho ta deuh deuh a. "Na teuhlo" ka lo ti hmuk tak na in "Ka awih lo e" uar zet hian a lo ti vak a. Rilru na tlat tùra min ngai chu ka duhlo kher mai.




"A na lo tak tak alawm mawle aw...chuloah rilru nat chhan tur pawh a awm tawh hlei nem. Ka ngaihzawng pawh a ni lo va, ka ngaihzawng hlui mai chauh ania. Duh reng chunga inṭhen lah kan ni hek lo va, rilru natna chhan tur pakhatmah ka hrelo e a" ngaihsam zet hian ka lo ti zung zung a. Ka rilru hriat tum ni âwm taka chîk chuan min lo melh kar a. "Min en char char rawh, rilru natna engmah i hmu tawp lo vang" ka lo ti nghet leh churh a. A ngaih a ṭhat hmêl ta kher mai.




"Zêp miah lohin Helen-i kha nupui atân i ngaihtuah ve ṭhin tho em?" a tih chuan " Ngaihtuah ngai meuh lo" ka lo ti vat a. Ka chhâng rang mah mah a ti deuh nge min lo en leh ha a, ka tán zawhna harsa a ni miau lo a ni. Thudik takin ka chhâng bawk, mak deuh mai chu kha chen lo inzui ve si kha nupui atân tak tak hian ka lo suangtuah ngai miah lo va. Mahse hunlai kha chuan ka iai miah lo tih tun hnu hian ka hre hnuhnawh mai chauh a ni. Min bum kher lo phei sela chuan ka rinna zawng zawng ka nghat ang mawle. A nungchang ṭawp ru zet kha a lo thup hneh êm bawk a ni.




"Zanin aṭang chuan midang ta dik tak ani tawh dâwn sia, i rilru a na miah lo maw?" a rawn ti leh hram a. "Ka ta i nih hun tùr ka nghakhlel tawh zawk" ka lo ti daih a, a lài ngang mai. "Kei chu inneih hi ka zak e a" a tih chuan "Timaw?" ka lo ti vat a. A chhan a rawn sawi chiah chu ka nui lo thei lo. "Saruak vekin min han hmu dâwn ania, ka ngaihtuah zawng ringawt pawhin ka rãp. Kei chu mahni chauha ka awm a, ka inbualte pawh hian ka taksa hi ka en ṭha ngam ngai lo ka zak tlat. Mipa hmaa saruak veka awm phei chu ka rãp lutuk ka zak dâwn emai" a lo ti duah a. Ka ngaihtuah loh lam daih anih avang chuan ka lo nui hawk hawk a.




"I va han ngaihtuah thui tak" ka tih chuan "Ania lawm, a zahthlak dâwn em asin saruak a min han hmu tur chu" a lo ti leh vat a. A mitthla a ni chêk ang chu, a rawn mur chuaih chuaih a. A inthing nak nak mai, "Min hisap a nimaw" ka lo ti fiam a, ka bân puam a ti nghal ṭawk mai. "I ngaihtuah nasa mai mai anih kha. Nupa nih hunah te chuan a zahthlak tawh dâwn hlei nem. Pumkhat kan ni tawh dâwn a, zahna tùr engmah a awm tawh lo vang" thutak deuh zawk hian ka lo ti sup a. A engamah hmaa a huphurh lutuk chu a khawngaih thlak zawk. "Ka tihpui ve miah lo ang che" a rawn ti leh deuh deuh a. "Ka zei alawm, i insum thei lo vang" ka tih chuan ka bân a rawn ri leh ṭawk mai.




Sawi hreh sit set hi a nei lêm lo va, a zakzum ru viau lawi a. Hei takte hi a duhawm rûk riauna a ni tlat lawi si. Ka nupui ah ka nei lo anih chuan a mak viau ang.



____________*__________*___________*_________

(A hmâwr kan va han bâwk teuh tawh êm!)
Show post links
Top