STORYFB.COM

LET's LOVE AGAIN


By Ziki nu


BONUS chapter


Pasal ka neih tak avangin ka hna chu ka bansan ngawt thei lo a, phal pawh ka phal biklo. Rintea chhungte lamin ka hna chungchangah engmah sawisel emaw ngaihdan dang an nei chuanglo bawk a, nitin school kal turin ka chhuak a, Rintea leh ka pa erawhin ka nu an buaipui chawt thung a, inchhung chet nen keipawh ka indaihlo ve thin khawp mai.



Ka nu dinhmun chuan changkan lam a pan lo a,a thluak lam thlenga a chianloh tak avangin a hriatna te pawh zawi zawiin a hloh tan a, a chang chuan keipawh min hrelo leh thin.



Zirtawp ni tlaiah chuan school banah damdawi in lam ka pan ve nghal a, kartluana ka buai avangin kartawpah chiah ka tlawh ve hman thin a, damdawi lei ngai leh ei tur eng eng emaw an rawn sawite pawh ka lei kawi a, ka bawr ve khawp mai.



Dan pangngaiin ka han thlen chuan min lo hre leh pek tawh lo va, ka pa chuan doctor in a damdawi ei lai a thlaksak thu leh a taksa a chhe zual zel tih a sawite pawh min lo hrilh ve sup sup a, a chaih hmelin a rilru a hah tih a hmelah a lang chhuak nasa mai si a, ka pasal nen pawh han duat tumin chhawk zangkhai deuh tum viau thin mah ila amah hian ka nu hmuh phak loha awm hi a duh tlat bawk silo nen, a buaithlak tlang khawp mai.



Chumi tlai chuan ka awm ve ta reng a, chaw dah tura Rintea rawn kalin ka pa chu tih luihna in a hruai haw a, keipawhin tum lawk loh deuhin ka riahpui dawn a nih hmel.




"Zanah ka lo thlak leh mai dawn che em ni? I chau lutuk ang, lo haw ve phawt la" Rintea'n a tih chuan ka hnial ve tlat a, "Zanin chauh chu ka riahpui ve thei mai ang, ka pa kha ngaihven deuh a tha hrim hrim, duh leh zingah min lo thlak dawn nia" ka ti a, min hnial zui ta biklo.




Ka nu chu ka thlen hlima a lo harh bak kha a mu leh ta char char rih a, a taksa lah a cherin a chhe nasa tawh bawk nen, hmuh a nuam mawlhlo a ni.



Zan dar 7 vela a rawn harh chuan ei tur a lam a, thil a ei tlem em avangin chutia ei tur a rawn lam ta chu phur deuhin ka lo pe ve thuai thuai a, tam tak phei chu a ei lo. Nurse in min rawn endik leh lai chuan damdawi te pawh kan in ei tir nghal vek a, rei lo te ah a muhil zui ve leh ta mai bawk.



Zunram thiar tura ka thawhsan zawk lai chuan ka kalna bathroom piaha nula leh tlangval lo ding khawm tuau te chuan ka mit an la deuh a, ka en chian takah chuan ka hmuh sual a nilo tih ka hre zui ta bawk.


"Ehe... U Mazar" ka han ti hluai a, an vai chuan ka dinna lam an rawn hawi thup mai.


"E.. Hetah engnge i tih ve a?" tiin tha tak chuan min lo be ve a, a thiante chu kalsanin min rawn pan hnai zui bawk.


"Ka nu a awm reng alawm, engnge in tih ve zawk?" ka tih chuan an thiannu pa damlo an lo kan zawk thu in min chhang a, a hma angin kan intitha vak tawh bawk silo nen, sawi tur a vang riau tawh.



"In inneih ni ah lah khan kan rawn lang ve thei ta si lo a, nau te in keng ve tawh em?" tiin min zawt leh khauh a, nui chunga lu ka thin chuan chîk zeta min en in "Nau pai vat tum rawh u, hei keini pawh kan senior tawh lutuka kan mangan em hi, pasal chhungte lakah lah inthlahrun a na bawk si" a ti niah niah a, a rilru tur chu ka hriatthiampui khawp mai.


"Nia.. Hei thla khat awrh chauh kan la innei a, Pathianin rem a tih hunah chuan min la pe ve mai ang" ka ti a, bu nghat nghatin "I u Dintei pawhin pasal dang a lo ûm leh tawh kha, ka nu leh pate lahin an enkawl zo lo chu a ni ber a, unau zingah pawh hetiang hi chu an awm lo thei lo, thu tha kan hrilh reng reng a, chhia leh tha hre rual a nih tawh hnua hetiang a ti duh a nih leh ama thu a ni tawh mai" a ti leh duah a, U Dintei te chungchang chu engmah hriat ka lo nei miahlo.


"Tunge a pasal chu?" Tim angreng taka ka zawh chuan "ZuMuani fapa Sangkawia mawle.. An ropui lo khawp ang" a ti a, ka rinloh lam lutuk a ni.



Nu Muani chu kan khaw zu zuar langsar ber pawl a ni a, ZuMuani tih hlirin kan khaw ho chuan an hria ang, a fapa U Sangkawia lah zu ngawl vei a ni bawk a, ka haw hnuhnun ber khan U Sangkawia chu ka hmu a, a zu in vangin a hmaite pawh a puam ûl tawh a, a landan maiah pawh han duhna tur a awmloh tehlul nen engtinnge U Dintei nen chuan an lo in chhai thluk theih zawk ni.



"A va mak ve" ka ti halh chu beidawn hmel deuha min en chung hian "A awm awmin awm se la, harsatna an tawhte chuan kan enliam thei kherlo ang, mahse hrehawm chu tuar ve rawh se" a ti a, kan inkar boruak tha vaklo pawh ka lo theihnghilh hman lek lek a ni.



A thianten an rawn koh tak avangin ka nu pawh chu min rawn hmuhpui ve ta lo va, pangngai taka kan inthlah thei chu a lawmawm takzet.



Ka let leh lai chuan ka phone êng zak zak chu a lo tawp ve chiah a, ka en chuan ka pasal missed call vawi hnih lai a lo awm hman a, ka call let thuai bawk.





"Bathroom ah ka kal lawk a" a lo chhan rual chuan ka ti nghal vat a, "Imm, ka nu engnge a an?" a ti sup a, a mutthilh leh tawh thu hrilhin ka pa a mut tawh leh tawhloh ka zawt nghal zat a, "La mu lo e,hei TV kan en rih" a ti mai a, mu harlo tura ka hrilh hnuah rei pawh inbe lovin kan dah a, ka nu muhil lai chu ka en ngawih ngawih ringawt mai a ni.




Min hringtu ka nu kha hetiang chiah hian damdawi in khumah rei tak damlo in a mu ve a, tihian pasal ka neih hnuah ka pasala nu ka han awmpui leh chu a nia, an natna tawrh mek hi a na in a khirh em em a, mahse ka Nu Zampuii hi chu ka nu tak ai kha chuan vannei ka la ti zawk tho mai!



A ni chu a natna tak an hre chhuak thei tal a, natna khirh tak pawh ni mah se a natna an hriat miau avangin enkawl dan pawh an thiam tawh zawk a, ka nu erawh kha chu a thih dawn darkar leh thih hnu thleng pawhin a natna an hrechhuak zo lo a, na tak tuarin a kal ringawt mai a ni.




Ka mittui rawn luang ngiai ngiai chu insût hraih chungin ka tuai hul a, ka nu chu a la mutui tho bawka tiin pawn boruak thiang dawn tum chuan ka chhuak leh ta rih a.



Hmun reh lai ka thlen chuan van lam chu ka hawi chho vang vang a,arsi pakhatmah hmuh tur a awmlo, van thim chhah tak ngawt bak chu engmah hmuh tur a awm lo a, mahse tunah hian ka nu khan min lo la thlir ve rengin ka ring a ni.



A fanu hi engtiangin nge min la hmuh ve ang aw... Ka dinhmunah hian min lawmpui ang em..?


Aw... Min lawmpui hle ang tih ka hria, ka nu chuan ka mipa hmangaih em em pasal atan ka nei tih hria se la, dan thianghlimin Pathian duh dan ang thlapin kan innei tih hre bawk se la chuan min lawmpuiin a hlim viau ang.




Nu.. Tunah chuan i fanu hian nunkawng dang ka la zawh ngailohte ka zawh ve mek zel a, a chang chuan ka tlu lek lek fo mai thei, mahse tho chhuak leh thei turin min lo tichak tlat zel ang che aw..
Aw Pathian, fahrah mai ka ni emaw ka tih laiin nang chuan fahraha ka awm i lo phal miahlo a, hmangaihtu neilo ang hiala ka inngaih lai pawhin i thlamuannaa min chenchilh tlat thin vangin ka lawm e..
Ka hmabak hun zawng zawng i hnenah ka hlan a, I hnena ka hlan hnua thik thleng apiang chu i remruat a ni tih pawm thiam thei turin min pui mawlh ang che....




Ni a ral zel a, thla hnih dawn kan inneih tak hnu chuan thu lawmawm tak maiin kan chhungkua chu min rawn thawng a, nau ka pai a ni!



Ka thlabi neih hun ka âwl bakah zingkar luakchhuak ka neih fo vanga intest kha ka ni a, vawi 3 lai ka test that hnuah pawh rin sen pahnih zel a lang a, Rintea ka hrilh tum pawh chuan a hlim pgang mai.



Ka pa pawh phone in kan hrilh ve nghal a, "A va lawmawm ve aw... I nu pawh a lo harh velah ka lo hrilh ve anga a hlim khawp ang" a ti a, chumi ni chu holiday a nih vangin keipawh inah ka awm a, ka pasal chhuah tum zet tawh pawhin a thulh leh ringawt mai.




"Vawiin chu ka awm nileng ang che, naute pawhin min ngai ang" a tia, phili deuhin a tei kual sek a, awm dan tur a la thiamlo a ni ber mai.



"Engtinnge ni ang aw... Tunah chuan jam room leh karaoke te pawh kan hawng leh tawh tho bawk a, I hna hi i chawlhsan mai dawn em ni?" a tih chuan ka tang nasa mai a, ka hna hi chu duh taka ka thlan ve a nih bakah ka innghah ve na a ni a, chutianga nau pai vang ngawt han chawlhsan chu ka duh biklo.



"Nakinah nau neih chawlhte chu a hranpa in a lak theih tho alawm, min ngaihtuah lutuk suh" ka ti ve tlat a, insuk ka pho tur mai mai te chu phallo in amahin a ti vek a, a thawng ve rih ema ka hriat avangin ka khap buai duhlo.




U Mama te ka han hrilh ve chuan min lo lawmpui thiam khawp mai a, "I nu duhthusam tak pawh a nih chu, inenkawl uluk la, naute hrisel deuh neih i tum dawn nia" U Mama chuan a ti ve sup sup a, ka tak pawh chu ka hlim lutuka ka awm thiam meuhlo a ni.




A tukah pawh school kal lovin kan in check up a, ka naute chu kar thum laia upa a lo ni ve tawh a, inenkawl that chuan hlauhthawnna tur engmah a awm loh thu min hrilh vangin ngaihtha deuhin kan haw a, ka nu pawh a hlim khawp mai.






Nitinin kan hun hman dan chu a ngai reng a, ka pa erawh a taksa chakloh deuh vangin damdawi in lama kal zen chu kan phal ta lo va, ka nu chhungte lam atangin nula pakhat Kimi, zuanzang deuh mai hi ka nu damlo min enkawlpui tur chuan a rawn awm thei hlauh a, a ni nen Rintea chu an inkal chhawk thin a, kei chu in lamah ka awm chawt thung a, Pathian ni tlaiah ka kal ve hman chauh thin.




Pathian zarah ka naute pawh chu a hrisel viauin ka hria a, rai no luakchhuak a pelh chinah ka chaw ei a tui in mut ka duh thar em em bawk a, thla ruk a tlin meuh chuan ka pum pawh keima tawkah a lian tawh viau a ni.



Christmas a hnaih tawh avangin Aizawl khawpui chu a lûn leh hle tawh a, khua erawh a la lum viau a ni.


Ka nu dinhmum a tha lo hle a, ni hnih lai chu ICU ah kan awm tawh, Rintea leh kan nula Kimi chuan an awmchilh a ni ber a, kan chhungkaw boruak chu a hahdamthlak loh hle rih a ni.




Ka pa in kal ve a duh thu a sawi fo avangin Zirtawp tlaiah taxi la in kan han kal ve a, ka nu leh pate awmdan chuan lung a tichhia in an inhmangaihna chu hmuh a nuam viau lawi si a, Kimi nen chuan kan inhru ru leh zauh zauh thin.




Chumi zan chuan a zual viau a, kan inrin thiam hma hauhin zing dar 2:30 am ah ka nu chuan min kalsan ve leh ta a, ngaihtuahna a mang duh kher mai.




Ka pa chu aw rawl chhuah meuhin a tap a, kei leh Kimi lah kan bang heklo, Richarda leh Rintea thiantha midang an rawn thleng hma hlauh a, an nin chhungkhat laina deuhte an lo be zung zung a, ka pasal ber chu buaipui ngai a ni rihin ka hria.




Ka nu thihna chu a tuar em em a, kam khat mah tawngkam a la nei lo chungin a natzia erawh ka hmu thei a, han hnem dan tur lah ka hre der si lo.




A banah nghet deuhin ka hmer ngawt ngawt a, ka nu ruang an sawngbawl lai te chu chechang duh hauh lovin a thlir reng bawk nen a awmdan chuan min tilungchhe lehzual a, thihna meuh han tawh hi chuan mihringte hi mahni maia kan lo famkim theihlohzia kan hre nawn leh thin a nih hi.





Ka nu chu ngai leh ui tak chungin kan vui liam a, thenrual leh thiantha ten min lenpui zantin bawk a, kar khat lai a liam takah erawh chuan khual khua atanga lo kalte chu an haw zo leh tawh a, U Mama'n min la champui thei chu mimal tak pawhin ka lawm khawp mai.



Ka pa a chaklo zual si a, ka ni te lam awm tho mah se inthlahrunna chin ka nei lo thei si lo, ka dul lah chuan min tirit ve hle tawh a, school pawh Christmas chawlhin min nang ta bawk nen ka chawl tlang a ni ber.




Rintea chu a tira a tuar thiamloh ang aiin a puitling a, "Pathian rem ruat a nih hi" tia lungdam zanlo chunga a tih chang chuan chîk deuh hian ka lo en thin a, "Ka nu natna te kha Vanah chuan a awm tawh dawn hleinem, Rinte.. Keipawhin ka nu leh pate ka chân tawh a, mahse Pathian hnenah hian ka vui ngai miahlo asin, khawvelah hian dam hlen tur kan awm lo a, kan dam phawt chuan nakinah kan la thi vek ang, ka nu chu thlamuang takin pa âng chhungah a chawl tawh a, keini pawhin hmalam pan tum zel ang aw" ka tih chuan tawi te a min nuihin ka kut chu a hmer vang vang a, "Ka nei che hi chu ka lawm ngawt mai" ti supin ka dul chu a chul a, sawi chhuaklo mah ila kan ngaihtuahna erawh a inangin ka ring.






Ka nu boral hnu kar hnih lekah Christmas kan thleng a,khawhar ru tak chungin hunpui chu kan hmang liam a, ka pa chu kan ngaihtuah em em a, a khawhar hlauin amah chauha dah chu kan duh lo a, Rintea nena kan chhuah ve ve chang chuan Rinfeli te nufa tal rawn lengphei turin kan ti thin.





Ka nau paiin thla riat a tlin chuan nau neih chawlh ka la zui a, in lamah ka awm chawrh chawrh a, ka pasalin min duat bawk nen rilru hahna em em neilo ta chu ka hriselna pawh a tha a, Pathian malsawmna chu kan dawng nasa hle ka ti lo thei lo.





March thla chawhnu lamah fanu ka hring a, ka pa chuan Pathian thilpek hlu tak a ni tiin a hmingah "Lalpekhlui" tih a sa a, Rintea'n a hming bulah "Gracy" tih a belh bawk a, kan fanu hming chu Gracy Lalpekhlui a ni, a mawi ka ti kher mai.




Ni hnih chauh damdawi ina kan awm hnuah in lamah kan inhruai haw a, ka chhungte lam an rawn zin theihloh avangin ka nau neih buai chhung zawng Rinfeli leh Riny ten min buaipui a, an awm chu ka tan tak pawh a lawmawm takzet.



Kan fanu lah chu a fel em em a, zanreia han buai pawh kan nei meuhlo, ka pa chuan a pawm change apiangin "I pi chuan tha a va han ti dawn che em" a ti thin a, ka pasal nen chuan in enin kan innuih ringawt thin.



Ka nu khan han hmu ve hman se tiin kan sawi dun fo thin a, thla tlemte chauh kha chu lo la tuar hram hram thei se ni tur.




Ka thawhpui te leh thiantha te hnen atangin nau enna thilpek kan dawng awl lo a, Richarda te nupa pawhin an naute hak loh thenkhat min ep reng bawk a, hmeichhia ve ve an ni bawk nen an la Inkawmngeih ve viau mai thei a ni.




Mihringte hian keimahni mihrinna rilru in kan hma hun suangtuah leh tum lawk dante kan lo nei ve thin a, mahse tun hnua ka hriatchhuah tak chu Pathiana innghat nun neitute nun hi a lo tlo bik hle tih hi a ni.



Tute pawhin harsatna leh dinhmun hrehawm tak chu kan paltlang theuh a, paltlang ngam ta lova mahni nunna la ta lah an tam.

Thenkhat chuan Pathian demin tuarna phena malsawmna awm chu an hmuh hmaih ta thin a, an damchhung nun chu Pathian mamawh lo anga inngaiin an hmang liam a, hlimna tak tak an hmu zo chuang si lo, chutiang chuan khawvelah hlimna tluantling hmu si lova Chantuan nunna chang zo ta silo mi tam tak an awm a, keia lo khawngaih phak rual ni hlawm lo mah se an lainatawm ka ti!



Keini chu Pathian in kan hrehawmna atangin ama hmel min hmuhfiah tir tawh a, pensan thei kan ni tawh lo.

A malsawmna tam takin min vur a, fanu duhawm tak min pe bawk a, Rintea nen pawh kan sawi dun fo thin.




Kan fanu chuan nakin lawkah baptisma a la chang ve anga, a lo puitlin hma zawng Pathian hriatna kawnga hruai kan intiam ve ngei ang, kan thutiam anga kan enkawl seilen theih nan chuan tanrual a ngai hle dawn a, kan nupa inkar a that phawt chuan kan thei ngei ang tih pawh ka ring.



Hma bak tam tak kan la nei a, kan hma hunah eng nge lo thleng dawn hre lawk lo mah ila a tha ber beisei chungin hma lam kan pan dun anga, Pathian malsawm tlaka kan nun phawt chuan kan Pathian hian mal min sawm ngei ang tih ka ring a, a hnena inhlanthar fo chu kan tihmakmawh pawh niin ka hria....



Tunah chuan chhungkaw thar ka nei tawh a, ka hmangaih tluk zetin ka pasalin min hmangaih bawk a, a pawimawh ber Pathian kan nei bawk a, hma hun lungkhama buai chu thil tul ber a nilo tih ka hria.



"Bawihtei nu... "
"Shhh" ka kutzungchala ka hmui nawr si meuhin bengchheng lo turin ka lo ti a, hlim hmel taka min lo nuihin a lamah min kuah hnai zui sawt sawt bawk a, ka hnar rawn fawp zauh pahin "Bawihtei nu, ka hmangaih lutuk che" a ti sup a, zantina a tihziah dan anih vangin mak pawh ka ti tawhlo.

"Keipawn ka hmangaih lutuk che Bawihtei pa" ka ti let ve zat a, kei aia nupui vannei hi an awm bik dawn em mawni le...









A TAWP TAK TAK TAWH..

Last nan comment pakhat tal lo hnutchhiah ve rawh u aw..

Ka regular lo chung chunga min lo chhiarsaka duhsak taka min lo comment sak thin tute in van hlu tak êm!
In zavaia chunga ka lawm em em a ni, KA LAWM E..
Show post links
Top