STORYFB.COM

KA HMANGAIH THINGTLANGPA





CHAPTER 28




SAM POV...

“Ṭhiana kan hmu theilo a nih hi, zawng tawh lo mai ang u" darkar chuang Nunui ṭhi leh zungbun paih kha kan zawng tawha, an tân chuan a ninawm hle reng ang chu. “A bo theilo, in hriat vek kha phunnawi lovin zawng char char rawh u" tiin hnim vêl chu ka ena, ka thil hmuh avâng khân ka thinrim em ema, mahsela a bula Marry ka bialnu anga ka sawi erawh kha chu a thik nân chiah a ni thung.







Kan khua a hmuh ve duh avangin min rawn zui haw mai kha a nia, mi ṭhenkhat lah hian nupui ru angin min lo chhuah leh hmanhmawha, mi hi mi chhungkua leh mi chanchin sawi nân hian an lo hman tlâng a nih hi. A thusawite ka ngaihtuaha, khatiang khawpa na a a awm khân Huni thil min rawn thawn kha a ni vek thei biklo tih min rin tîr a, chuvanga vawiin lama a ina kala sawipui tum leh pawh ka ni.








“Ṭhi chu ka hmu e" Rengpuian a rawn tihchuan ka pan vata, a ṭhi paih ngei chu a lo keng va va mai. Laksakin ka en vang vanga, rilru na leh ṭap chungin a paih a nih kha, thawk la ham hamin ka hum bet vang vanga, “Zungbun kha zawng leh rawh u" tiin hnim kar chu ka keu kual leha, khati maia a paih kha ka beisei heklo, hla ngai thla chunga a ṭap ri lah kha ka bengah a ri nawn tluk tluk lehnghâl.







Khati khawpa a nat chuan sawi ṭhat leh ngei ka duh, keihian ka lo tisual ve reng thei bawk. Hnim dang keua ka en leh chiah chu khuar deuh laia zungbun lo tle ralh chu ka hmu nghal zat mai, chhar vatin ka kutah chuan dahin ka en vang vanga.







“Tikhan lo va haw mai rawh u, a inah kan kal lawk ange" tiin a inluah lam pan chuan ka kal zuia, eng thu nge ka sawi ang tih pawh ka hre teh hrep lo e. A inluah ka thlen chuan a lo inkalh a, ka hnaih nghal vat mai, khawiah nge a kal ang? Nge ni a a ni hi a lo haw reng zawk?








Ka phone chu phawrhin ka call a, a tlang thei hauh lo. WhatsApp a ka text nalah a seen theilo a, a dp lah ka hmu thei hek lo; chiang takin min block tih ka hre nghal.







“Hrep chuan" tiin a kawngkhar chu ka chhir pawpa, ke a na thlâwn mai mai a ni. Zui êm erawh ka tlâwm ala ve tlat, a duh ang ngei chuan han awm teh pauh tehse.






Thinrim ṭun chuan in lam panin ka kala, ka hmuh duhloh ber mai Zosangpuia ka la tâwk zui, “Kan in be lawk dâwn em ni?" kal pelh ka tum laia a rawn tih avâng chuan ding datin ka ena “Enge i sawi duh, biak che ka châk fahran lo ania" ka ti hmuka, a rawn nui nghal hak mai.







“Nunui nen kan chungchang thuthang i hria tih ka hria, chu chu ani ka sawi duh chu" a rawn tihchuan a kawr nghâwngah chuan thinrim zetin ka ṭhamsaka, “A enga chunge i sawi duh, ka bialnu i lo tibuai sek kha i zak miah nange?" tiin ka inseh ruh ṭawlh ṭawlha, hneksawk mai ka duh, keiai upa mahse tûnah tak hi chuan insual ai baka châk ka neilo.








“Chu reng chu sawi ka tum chu ani, in inṭhen tih ka hria, i hmeichhe rawn hruai haw hian a ti chiang viau bawk" a hmaiah chuan ka hnek nghal sawka, a pai nawk bawk. Rawn ding chhuak lehin a hmui chu a tuaia “In inkar tichhe zual turin ka be lo che, Nunui khân a duh thu in min fawp lo, keimah zawkin ka fawp a nihkha. Tin, a duh loh thu che a sawi kha miin a thusawi dang thupin an rawn thawn che a nihkha" tiin kan sira hmun remchâng laiah chuan a ṭhua.









“A tirah chuan inṭhen tîr cheu kha ka duhdan ani a, mahse Nunui khân a duh tawh hauh lo" za lo zet hian a ṭhensaka, a thusawi chu ka lo ngaithla reng thung. “Ka ta ni leh se ka duh em em a, i hria ang a danglam zia chu, kan in ngaihzâwn chhung pawh khan vawikhat mah ka khawih theilo, a in vêng tlat ṭhin. Min duh viau emaw ka tihlai pawhin ka khawih lui thei ngailo, khavang tak khân alakah pawh ka in thlahrunga, mahse mipa hrisel ṭha ta na na chu ka tum loh luatah hmeichhe dang lakah ka phatsan a nih kha, min lo zar buai ve reng bawk nen mipa tân chuan insum a har tihchu i hria ang" a tihchuan ka bu nghata.







“Engvanga chutiang thu chu min hrilh nge i nih? Ila duh viau a ni lo'm ni?" tihmukin a bulah chuan ka ṭhu a, “Duh e, mahse a niin min duh tawh hleinem, keipawhin khatiang khawpa min ngaina ṭhintu leh min âtchilh tu emaw ti a ka lo ngaih ṭhin lo danglam ta lutuk kha mak ka ti a sin, min duh ka la rin avanga khatianga che pawh kha ka ni, mahse alo nilo, Keimah bâk duh nei ngailo tura ka lo ngaih khân a hmangaih thu che min hrilh ania" tiin a nui ro haka.








Kei erawh a thusawi avâng chuan ka inhum ruh ṭawlh ṭawlh mai “Nangmah avangin a rilru ka tina a sin" tihrawkin ka ena, “Ka thiam loh ani, mahse nang pawhin engmah sawi i tum loh kha, nimin piah mai khân keipawhin i thil hmuh chungchang kha kan nu thinrim âng aṭangin ka hre ve chauh a ni. Chuvang a nia ka rawn biak che" a tihchuan ka mit ka chhinga, ka thinrim bakah Nunui lakah chuan ka inthiam lo hle bawk.









“Engvang nge a tirah min hrilh loh, na takin ka siama, nang hian lo hmu kher lo la chuan kan inkar a la ṭha tur. Mahsela, a bul berah chuan keimah ka ni, a thusawi ka lo ring duh lova, ka hmu tui nek tawh lo che" tiin ka tho chhuaka, ka kalsan nghal vang vang bawk.







Nunui ka call leh pawh chuan a ngai ang chiahin a la theilo, ka lu tuai puatin inchhûng lamah ka lut a, “Pi, Aizawl lamah ka chhukthla dâwn?" ka pi ka en chu mak tih hmêl fe hian min rawn ena, “Nunui ka hmuh ngei ngei angai" ka tihchuan ka pi chu a rawn tho chhuaka “A phatsan che a ni lawm ni? Chu pawh a bialpa hlui, mi pasal lakah lehnghâl, an nupa pawh an buai phah an tih kha, hmuh tawh angailo, hei Mary i thawhpui fel lutuk a awma, ani biak biak angailo" a rawn tihchuan ka ding chawta.









“Ka pi dawt vek a nih kha, tin Mary kha ka bialnu angin ka en heklo, Nunui bak hmangaih ka neilo, ka hmanhmawh ania" ka tihleh chuan ka pi chu rawn tho chhuakin khur dar dar chuan min rawn pana “A ṭullo ka tih chu, i kal lui a nih chuan i pi hi min hmu tawh ngai lovang" a tihchuan ka thinrim lutuk chuan chhuak chu ka ṭum ri bura.








“Engvanga Nunui chu duh lo em em nge i nih?" tiin ka ena “Ka sawi tawh kha, mi pasal chhuh hrehlo a nih kha, kha tiang hmeichhia i hnaih ka phallo, i kallui a nih chuan i pi leh pu nangmah enkawltu che hi min zahlo hle ah ka ngai ang, min ko in min hmu thei tawh bawk hek lovang" a tihchuan thinrim zetin ka roomah ka lut a.









Ka pi leh pu hi ka zaha, an thu hnial ka duh ngailo. An duhlohnaah chuan an khirh hle tih pawh ka hria, chuvâng chuan Nunui biak pawhna tur ka zawn a ngai a ni.






Ka ṭhiante chu a be duh dâwn hauh lo tih ka hria, Manuni te ka biak ngei angai dâwn a nih hi.





NUNUI POV...






“Nu ka sawi in awih duh loh chuan a dang sawi pawh ka duhlo, nu Chhingi te khân dâwt bakin min puhna tur an hre lovang, tin tun thlengin ka la thianghlim bawk. Samuela bâk kha ka duh tawh heklo, in fanu ka ni a dawt ka hrilh cheu in hre ngai lovang. Kha in thil hmuh kha nu Chhingi te lo lâk ruk a ni lovang tih pawh a hriat loh hi? Ka duh thu a ni reng reng lo, an mahni avângin in fanu hian a hmangaih chanin a na mek a ni tih te hi hre zawk ta che u" mittui luang zung zung chuan ka sawia.








Ka nu pawhin a hrethiam ta nge min kuahin ka hnungah a chûl hliau hliaua “Ka tihpalh bawihte, i bialpa chu i hrilhfiah lo em ni?" a tihchuan ka ṭap chhuak hawm hawma, nute bulah chuan thla a muang bawk nen engkim chu ka hrilha.







“Nu a hrehawm emai, a ni kha ka hmangaih a sin, mahse min ring duh lo. Mipa dangin min fâwp a hmuh khân a tina lutuka, hmeichhe dang a rawn hruai haw hial a sin. Nu, ka chân phallo a; mahse ka chân mek bawk si" tiin ka ṭap chhuak rawih rawiha, ka naute leh ka pa erawhin engmah sawilo in min en ṭhap thung.








“Mai mai chuan a hmangaih ve tak tak lo che a nih chu, hmangaih che nise chuan a ngaithla em em ang che. Lungngai hauh suh, nakinah chuan a tello in i awm thei em em ang, ka fanu i tuarchhelin i luhlul em em a, i tuarchhuak em em ang" tiin ka hnungah chuam min chûl hliau hliaua, kei erawh ka ṭap reng thung.







Khati maia kan inkar a tawp kha ka hrethiam theilo, mipa dang ka lakluh theih tawh lah ka ringlo. Thinlungah a hming a ziak tawha, thluakah a ruangâm engkim a inkhunga, bengah a aw ri a cham reng tawh anga, mitin a hmel a theihnghilh ngai lovanga, hnar pawhin ama rim kha a hre reng tawh bawk ang. Ka theihnghilh ngai ka ring lo, ka thei dâwn lo tih ka hria a, chuvang chuan tum chhin loh law law ka duh zawk.








Theihnghilh tuma theih tak tak loh tur tum luih phet ai chuan hriatrenga, kha tihlai kha chuan kan hlim ve ṭhin a sin, a ni chu ka hmangaih ber a ni a, tih tal sawi thei tura hriatreng ka duh zawk.





“Theihnghilh ka duhlo, hmalam pan san pawh ka thei lo ang, nu ka hmangaih lutuk a sin. Ani chiah kha ka hmangaih awm chhun a ni, a tir te khan ka lo hrethiam ngailo va, ka lo hel ṭang ṭanga, tûnah bul ka ṭanpuia, ka hlim hman asin, a ni nen hmalam hun ka suangtuaha, ka nuihpui ṭhin. Hetia thawk leh khata an bo ta duak hi ka hrethiam lo, ka ngai a, a lo haw hun ka nghâk ve a sin, mahse ka lo hmuaha rawn haw dân erawh ka rin phakbak a ni si. Khatiang tur tih hria ila chuan ka lo kal tir miah lo ang, ka bulah ka chelh bet reng anga, kut hnathawk a nih pawhin ka pawi tih loh thu ka hrilh tur " tiin ka ṭap hlawp hlawp renga.








“Bawihi a tawk e, ṭhenawm khawvengten mak an ti lutuk ang, puitling i nih tawh kha. Han nghâk phawt la, Pathian in i tana a ruat a nih chuan a rawn kîr leh em em ang" ka pa chuan a rawn ti dam dapa, keipawh chu inhru hulin ka room lamah chuan ka luta.







Thla eng kulh te chuan lung an tilengin rilru an tina zual, tukverh aṭanga dâk chhuak chung chuan ka thlira, chutih lai chuan ṭhenawm aṭanga tlangval rual lunglên rawn zaiin a C.Vansanga sak, DER THIAM MI U tihchu an rawn zai ṭhap ṭhapa, ka mittui a ko chhuak leh chiang hle.




“I tiamthu hretu chhawrthlapui, a êng ruai e piallei mawiin, chhai thar bêlin i liam ta maw? Luaithli nul a min tiam zawng te kha aw, dâwn kîr leh rawh Derthiam mi u" tihlai chu.







Ka ṭap ri leh haka, an in sak tirha an in sak laia mas kan hman dun te, thla eng hnuai ah ngei a nupui ni tura min duhthu a sawi lai te, a ṭhi min awrh tir lai te chu a rawn lang zut zuta, ka in pet fan fan mai. An bo theilo, mitthlaah amah nena kan awmdan zawng zawng an rawn langa, engkim chuan a mah bâk min hriat chhuah tîr theilo, ka awm chu ka dawma, hla ang chiahin tûnah chuan hmeichhe dang tân a awm tawh si.








“Sam, hma hun hi a lo va hriat loh theih em tiraw? Ka kal angem i tih lai khân kallo tur khân lo ti che ila hetiang hi kan thleng ngai awm silo,Sam, nang nen hmahun ka suangtuaha, kan fate pawm chunga hlim taka i nui tur ka suangtuah a sin, mahse chung suangtuahna te chu thliin na taka a chhem angin thawklehkhatah an bo duak ta mai si a, ka tuar thei angem ka hrelo, ka hrelo takzet" ti a phun sap sapin ka khum chu ka pana, he khuma ka mut lohna pawh a rei ve ta hle mai.





Kum hial ka mu tawh lo, ka mut hnu hnun ber khân Sama ka la hre lova, hmangaih lah ka nei heklo, khatih hunlaiah khân kîr thei ila, kha khua a thawh loh theih dân ngawt kha ka zawng tur, a zunah ka uai dâwn tih reng hre lovin ṭhian angin ka ena, ka hmangaih dâwn tih hre hauh lovin mipa dang avangin bul ka ṭan pui bawka, ka lo â takzet a ni e.







Tûnah chuan engkim a tlai zo tawha, siamṭhat leh theih loh khawpin ka thinlungah hmun pawimawh lai ber a luah tawh miau si. Ka hmangaihna a reh ngai dâwn lova, engtin nge ka hmachhawn ang tih lah ka hre heklo, mahsela a lak aṭanga bihruk reng erawh ka tum hauhlo, ka hmachhawn anga kan nih nih kan ni tawh mai a ni ang chu.







A hmuhah erawh ka rilru tihlan tawh ka tum ngai lovang, ka thusawi angai thla duh lova, ka tân pawh biak rengna chhan tur a awm tawhlo. A duh a thlang tawha, a duhthlanna chu ka zahsak bawk ang.





Manuni message ka hmuh avâng chuan ka en a “Samuelan engkim a hre tawha, biak che a duha" a tihchuan ka nui haka “Ka be duh tawh lo tih lo hrilh rawh, engkim ka sawi tum laiin min awih duh hleinem, tûnah chuan an tello in hmalam ka pan thei tih lo hrilh rawh" tiin phone chu ka dah zuia.






Biak a duh a maw? A hma pawhin ka sawi a, a ngaithla duh hleinem. Tunge lo hrilh ang? Thudik chu tu hrilh nge hrelo mah ila kan inkar hrechiang tak tu a ni ngei ang, tûn atân chuan hmuh emaw biak emaw ka tum rihlova, a mi ṭawngkhumna kha theihnghilh tûr chuan ka beih fe a ngai bawk ang.




BZP HLA KAN ZIR LEH THUT SIA KA RAWN DAH TLAIA, MIN HRETHIAM DAWN NIA.