KA HMANGAIH THINGTLANGPA BY MAWITEI BAWITLUNG (Completed)

[mawitei bawihtlung]

KA HMANGAIH THINGTLANGPA







CHAPTER 29






“Bawihte, tluang deuhin in kal dawn ania, ka sawi kha hre reng la. Min ring lo tu chuan min hmangaih tak tak ngailo" tiin ka nu chuan min kuah vang vanga, Sam-a te khuaah ka lêt leh tawh dâwna, Aizawl lamah a rawn chhuk dâwn tih ka hriat vang a ni.







A ni a rawn chhuk anga, kei ka chho ve thung ang. A theihna apiangah pehhel hrâm hrâm ka tum tawh ang tih hi ka thutlukna a ni, ka theihnghilh tihna a nilo va, ka hmangaih tawhlo tihna lah a ni heklo, nat leh ka duh tawh lo mai zawk. Mipa pahnih ka nunah ka seng lût sual tawha, tihsual nawn leh ka tum tawhlo.






Ka tuar anga, ka tuarchhuak em em ang, engtikah emaw ka tana ruat dik tak chu Pathian in min la pe ve mai ang, chutih rual erawhin hmalam pansan erawh harsa ka ti. Ka hmuh leh phei chuan ka insum zawh loh mai ka hlau, a laka ka rilru put hmang ka hre chianga, hmu leh chiah ila chuan ka hnar theih tak tak ka ring lo.









Chuvang chuan hmuh lohva; pehhêl hrâm hrâm ka duh zawk. Hmuh châk viau mah ila ka insûm hrâm hrâm tawh ang, kha hmeichhia kha a rawn hruai hawa, keichu ṭawngkam ngeiawm taka biak bak ka hlawh lo a nih kha. Thawk la ham hamin sumo ah chuan ka luta, tukverh bulah ka ṭhu bawk nen ka chhûngte chu ban vaiin ka thlah liama.







Tûnah chuan ka natna hmun ngei ka pan leh dawn chu a nisia, phûrna pawh ka nei tawhlo. Sam-a ka ngaia, chutih rual erawhin biak erawh ka tum tawhlo, ka blockna pawh ka la phelh hek lo, hetiang khawpa min tina theitu hi ka la tawnglo, ka ṭhiante'n engkim a hriat tawh thu mi hrilha, a inchhîrna lam thlengin, mahse ka be duh chuang lo. A ni pawhin min be duh tak tak chu nise Aizawlah ka awm tih a hriaa, rawn kal pawh a tum hleinem..







Chumai bâkah kha a hmeichhe rawn hruai haw nu nen khân an in ngeihin an hlimzia thu min hrilh tu an awm ve reng bawk nen kîr mai mai ka tum tawhlo, engtikah emaw chuan hlim takin ka la hmachhawn thei zawk mahna.







Khanu kha Mary a ti a nih kha, a tâna a inphal zia thu min sawi khum lai te chu a rawn lang uar uara, ka inhum ruh fan fan bawk. Engtikah emaw a ṭawngkhumnate kha tuar damin nui chungin ka hmachhawn ve maithei asin.







Kawng tluan chuan ka chuanpuite chu ka be lutuk lem lova, ear phone ngaithla in ka mit ka chhing char char a, midang pawhin kan chawl te a nih loh chuan an titi lutuk lem lo, a ṭhen an muthlua, driver bulah nu pakhat erawh driver nen an titi nasa mai, a ṭha phian. Motor khalh hi chu mutthluk a awla, driver te hi biak harh ve reng an ngai bawk nen driver bulah hi chuan mi muthlu mai mailo, ṭawng duh ve takte hi ṭhu theise duhthusam.








Accident tam tak pawh hi driver mutthluk vâng te hi a ni ve theia, chutia kawm theitu an awm chu a hahdam thlak phian mai.






Ka hla ngaihthlak chu mitchhingin ka feel vang vanga, C.Vansanga hla A REM TAWHLO tihchu ka ngaithla a, “Rai rah riangin ka tum zo lul lo maw?..Kha chen ka chhai, di an ka thlan, D a rem lo maw?" tihlai te chu ngaithla in midang hmuh hlau tak chuan ka mittui chu ka hru zauh zauha, tukverh lam chu ka hawi tlat bawk.







A thunawn “Engvang nge maw nang kher ka lo tawn che, lung min hersan mai tura" tihlaite chuan ṭah hawm hawm mai min tichak, hla hi ka ngaithla ngai em em lova, ka nu leh pa te hian hranghlui lam hla an ngaihthlâk ṭhin avang hian ka hre ve nual thunga, mahsela tûnah chuan khang hlate kha min hnemtu ber an ni tawh a nih hi.







Hrang hlui ho hla lo ril ruk zia ka hrethiam kuar kuar bawk, a ni kha lo tawng kher lo ila hetiang hian ka awm âwm silo, min kalsan leh mai mai tur ka lo hmangaiha, suangtuahna hial ka dinpui bawk. Ka hmangaih avangin mipa dang lakah tih ka duh ngai miah loh mut dun thleng khân ka phalsaka, ka thianghlimna min vawnhim puitu a nih avâng khân ka ngaisang bawk, mahse khâng kha min hmangaih avâng emaw ka lo ti a, hmeichhe dang min thlan san ta chu a nih hi.










Midang kârah chuan mualpho hlau si, rilru na bawk si chuan thaw pik ṭûnin ka ṭhu a, ṭah ka ngam bawk silo. A hrehawm tih piahlam a ni, tûnah tak hian hmuha au khum vak vak mai ka châk, mahse keimah ka inti mualpho mai mai dawn a ni bawk si.





Tlai dar 3 velah khua kan thlenga, ka inluah chu thlir vang vangin ka nui saka. He in ngeiah hian an ṭhianho khân min insawn luhpui a nih kha, tunah erawh hnaih vak ka duh tawhlo nên midang pawh ka be duh ta vaklo, ṭhian an ni a, ka tâna a ṭhiante lo biak reng khan a mi hmuhsit zualna tur mai mai ani.






Chahbi chu phawrhin ngawi reng chuan in chhûngah ka lut a, ka awm lohna a rei ve tawh bawk nen sazu ek leh Chawngzawng ek te chu chhuatah a lo awm ve nuala, ka bag chu dah felin ka tifai nghal zung zung a, rawng chu ka bâwl pah bawk.







Kalkawngah chawhmeh tur ka lei sa bawk nen siam rei angai lo viau mai. “Nunu, kan lo lêng" Siamtei leh Manuni chu an rawn lang zuia, ka lo chiau au vat mai. “In va rang ve, in lo dam maw?" tiin kan in chibai zuia, an thusawi avâng chuan ka nui zui hak hak bawk.







“Samuel-a nen chuan in in be lo em ni? Dik tak chuan biak che a duh lutuka, keimah pawh vawitam min rawn ngen tawh a, i rawn haw hun a nghak deuh reng nan an hnalam kal a hun tawh bawk nen phur lo zetin a kal liam a lawm" Manunin a tihchuan ka nui saka.







“Ka sawi tawh kha, tûn atân chuan ka hmu duh rihlo, ka be duh hek lo. Ka tân a nat tur zia in hriat kha, khuareiah te chuan ka la be thei leh mahna, tûn atân chuan keimah in tihchak phawt ka duh. Ka nat leh na tur thil tih lah ka duh tawh heklo, engpawh nise chutiang lam sawi tawh lovang u, thil ka rawn hawn cheu ania" tiin ka zin bag chu hawngin an inkhawmna tur bagte ka leisak chu ka pe zuia.







An au nghal chul mai, min kuahin lâwmthu min hrilh mawlh mawlha “Christmas present a nih kha, lei tûr ka hre mai siloa a inang ka lei tawp cheu a nih kha" ka tihchuan an duhzâwng tak a nih thute chu an sawi ve a, keipawh ka thaw huai mai.







Chaw ei ve nghal tura ka tih avang chuan an ni pawhin min hnial lem lo in rawngbawl chu min pui zuia, an Christmas hman nawm loh thu chu an sawi mawlh mawlh mai. A chhan pawh Samuel-a an bulah a tel peih loh bâkah midang pawhin vah chhuah vêl an lo peih lo a nih hmel, Sam-a chuan Mary kalsan a hreh ngang a niang chu, tenawm hian ka lo be lo kha ka lâwm zawk.








“Kumin chu dam chuan hmang ve tawh rawh aw" an tihchuan ka en ha a “Nilo e, khulamah ka hmang leh ang, ka nu leh pa in hmun danga hman an rem ti vak tawh lova, keipawhin ka tum tawh lêm lo. Hun te han liam leh sela, engtikah emaw la hman te pawh kan tum ang chu. Tûn atân chuan mahni khaw lamah ngei chhûngte nena hman te hi a nuam ve a" tiin ka nui hak haka.







An ner nasa mai “A tân nuih theihna tûr che i insiam mai mai alawm, hmachhawn pawp la, a tello a i awm theih zia hmuh tîr zawk tur che a nia. Tlanchhiat kher a ngai hleinem, hmachhawn tawp la, a ni pawh a inchhuang thei nang, a telloa i awm theih zia a hmuh chuan a lâwm bik hauh lovang" an tihleh chuan ka nuih hak hak ringawta.








An ngaihdan chu a dik tho, Sam-a chuan ka hmuh duh loh vang tih a hre ngei dawna, ka laka a thawh natzia pawh a hre ngei ang. Mahse pawi ka ti lêm lo, ka hmuh loh miau chuan ka hlim a nimai.







A theih chhûng chu ka pehhêl bawk ang, a ni kha hmuh rih loh hi ka tân a ṭha ber, a zungbun leh ṭhi min pek ka paih pawh kha a ngaipawimawh tawp nang, khanu khân a lo nghak renga, a ngaihven in ka ring hek lo.







“Chaw ei phawt ang u, nu leh pa bulah chuan thla te a muang ve a, bâkah helam chu chhûngte an awm lo bawk nen nuam ka ti chiahlo. Bakah mite min sawidan in hriat kha" tiin chaw ei chu ka siam zuia, an ni pawhin min rawn pui veleh nghal mai bawk.






Chaw eikham chuan reife kan titi hlawma, khaw mipui pawhin ka dikna an lo hre tawh a nih hmel, a hma kha chuan mi pasal chhuhsak tum thanin ka thang nasa hle a nihkha. Ka nu leh pa beng hial a thlenga; mahsela engkim ka hrilh hnuah erawh chuan nu Chhingi te pawh an be zui tawh lo kha a nia.








Ka nu leh pa berin min rin takah kha chuan a bâk engmah ka mamawh belh lo, tin, ka nihna ni miahlo a min hmehbel avanga ka hna bansan lah ka duh heklo, chuvanga he khua ah pawh kal leh ngat ka ni rênga.







An haw hnu chuan mutna te chu siam felin ka mu zuia, tûn ah chuan nun thar nen bul ka ṭan ve tawh ang chu, ka hna leh zirlaite bâk engmah ka ngaihtuah tawh hek lo ang.







Hun a liam ve zela, zirlaite nen pawh kan inpawhin min tihlim ve ta viau mai, “Miss ka tlangvâl hunah chuan nangmah ang a hmelṭha bialnu neih ka tum ang" Rintea chuan a rawn ti a, ka nui har har mai. An la naupang bawka, a lehlam takah chuan an thusawi te hi ka lâwm ṭhin.





A bikin pâwl ruk ho hi ka ngaina zual, an felin thulah an awih, exam naah reng reng fail an awm ngai heklo. Hei vang te pawh hian an class a luh hi nuam ka ti ṭhin, naupang an fel miau hi chuan hauhna tur an awm lova, chutih rualin naupang enkawl har tak tak, hauh ve ruala nu leh pa bula zualko ching an tama, nu leh pa leh zirtirtute inkârah thil ṭha lo a hring chhuak ziah bawk.





Nu leh pa te hian kan fate hi sikulah engtin nge an awma, zirtirtute thu an awih em? tihte hi ngaihtuaha en ve ṭhin tur ania, nu leh pa tam tak hi chuan kan fate thlavang hi an sual leh sual loh pawh ngaihtuah miahlo in kan hauh leh lutuka, thiamna leh finna duhin kan fate School kan kal tira, zirtirtuin theih tâwp chhuahin aia upa zahna leh kawng hrang hrang an zir tel tira, naupang ṭhenkhat in la ngeng leh zirtirtute zah miah lo hi an tam tawh lutuk tlat.







Tuna kan School ah ngei pawh hian an tam, lehkha an zir ṭha duh lova, hau ila engah mah an ngai lova. Hrem ve hlek lahin nu leh pa bulah a leila thei ang bera zualko an thiam leh em ema, hetiang naupang sual hi chu zirtirtu tân pawh enkawl an hahthlâk. Kan fate hi inlama an nungchang ang ringawt hian an awm lo tih hi kan hriat tlân a ṭha khawp mai.






Zirtirtu tam zawk hi chuan kan fate hmakhua an ngaih avang leh thiam ngei tura an duh avang zawkin an zilhin an hau ṭhin. Thiamna neih tir duha school kal tîr na na na chu a engamah hmaa zirtirtu dem ringawt hi chin loh a ṭha, kan fate nungchang bihchiang chung zela thil kan tih hian kan fate hmahun atân vek ani.







Kan hmangaih loh kan zilhhau ngai lova, nu leh pa tih lohah naupang enkawltu chu zirtirtute hi kan ni bawk. Chutih rual erawhin a zirtirtute ngei pawh hi zirlaite nel theiha kan awm hi a pawimawh khawp mai.





Kei ngei pawh hian hrem châk châng ka ngah ṭhin, mahse ka la insûm ṭang ṭang chu ania. He ka insumna rah hi ṭhenkhat te nunah chuan a lang ṭan tihlah ka hailo.






“In rawn ṭhang lian zêl anga, khawvel hi ala changkang telh telh dâwna, tuna lehkha in zir ṭhat hi a pawimawh ania, in chhûngkua chawmtu tur in ni dawna, mipa phei chu nupui fanau la enkawltu tur in ni tih hre reng ula, ruihhlo lam hi timiah lo turin ka duh bawk che u, nakinah hna neilo nih hi a zahthlâk lam nilo in a hrehawm in ti ang, tûnah pawh mi in inlianpui pui an sak theihna chhan hi an thawhrimna avang tih hre reng ula, lehkha ṭha takin zir ula hna ṭha tak in nei anga, tuna in awh te nun ang hi in nei ve thei tih hre reng ang che u, tawrhchhel angai ania" tiin ka thiam tâwk chuan ka fuih ve sauh sauha.









“Miss kei chu meizial leh zu vel pawh ka in in ka zu ve ngailo ang tih ka tiam e" mipa naupang pakhatin a rawn tihchuan midang pawh chuan n rawn intiam ve sap sap hlawma, nui sak chuan fak hlawmin ka chhuahsan zuia.








Tûn ang renga an awm chuan nakinah chuan mi ropui tak an la nih ngei ka ring, tuna kan pawl riat te ah erawh beisei a vang khawp mai. Hauh in awmzia an awm tawh lova, hauh dâwnin an nu leh pa an thinrim zel bawk nen kan head pawhin an awm ang anga en tawp turin min ti kha a nia, kei erawhin ka theih tawpin ka zirtir a, an ngaihthlâk ṭhat peih leh peihlohah ka buai lem lo, an nun ania an zir ṭhat peihloh leh a tuar tur bawk an ni.






High School an han rah ve theih hlauh chuan an la insiam ṭha ve em em ang. Engkim a danglam ve ṭalh tawh dâwn si a.



TI THLENG HI NI PHAWT RAWH SE, PEIH LEH NAKTUK ZÂNAH ZAWMNA DAH KAN TUM ANG.