STORYFB.COM

Nun tihlimtu Lalnunhlimi
By CVL.Awmpuii



Last Chapter



Zîng ka harh chuan keimah chiahin ka lo mu leh tawh a, kan mo thar hi ka thawh khalh thei meuh lo chu a ni. Nizàn kan boruak ka ngaihtuah lêt a, lawm lohin ka nui nghal vur vur ringawt a. Thawh hlim phat aṭanga ngaihtuah zui atân chuan hlimawm tak a ni.




Kan room kawngkhar rawn ri khap lam chu ka hawi nghal vat a, "E...i lo harh tawh maw? I mu rei reuh lutuk a, ka lo ngaihven che a" room chhûng rawn luh pah chuan Nunhlimi'n a rawn ti nghal zung zung a. "Tinge min thawh san a" ka lo ti thung a. "I thawh hun ka nghah chuan kan tho tlãi lutuk dâwn asin" a lo ti ve vat a. "Ka bulah hian lo kal teh" ka tih leh chuan a lo kal hnai ve mai bawk a. Mahse ka rilru a lo hria nge ni ka bula mu tùra a kut ka ban chiah chu a lo ṭang nghal ṭung a.




"A hun tawhlo aw...thawh a hun tawh" tiin a kut ka chelhna chu a kut lehlam in min lo ben sak thak a. "Hnuailam in hun leh hun lo a hrelo" ka tih chuan a lo ṭeu hlar mai. "I ninawm, khatiang lam ringawt kha ngaihtuah suh aw..." min kaihthawh tum pah chuan a lo ti nang nang a. "Anih leh min fawp tal rawh" ka ti leh hrâm a, mipa naupang thuawih hmêl zeta ka hmêl ka'n siam kual vêl chu "Tenawm miah suh" a lo ti nghat a. Ka nui ta hawk hawk ringawt, pangchan luih a har ngang mai.




Mahse ka chhaih luih sek tâk ah chuan tihngaihna a hre ta vak bîk lo aniang, "Min fawp phawt rawh" tiin ka ṭang lui tlat bawk si. A ni hmanhmawh ta reng reng chu ka thû ang chuan a rawn ti ve mai bawk a. Min rawn fawp zeuh a, inlakhran nghal a tum chu duh lovin ka lo man bet a. Duhthawh zet hian ka fawp zui ta ngawng ngawng a, a ṭan rei ang aiin min lo chhâng lêt ṭha angreng khawp mai.



Khumah chuan lehthalin ka bawhbet nghal a, ka la fawp reng a. Ka ngaihtuahna a ti nu leh bulh tawh. A kekawr ka pawt tùr chiah chu min lo dang vat a, "Hey...a chî loh" a rawn ti sep a. Mahse a thâwk dàn aṭang chuan a danglam ve reng tih ka hai lo. "Nupa kan nih tawh hi, thiang lo a awm lo" ka lo ti khur hluk a. Mahse a thu rawn sawi leh avang chuan insûm ṭeuh chungin ka inlahrang thei hrâm a ni. A period anih chu! "Tûkin aṭang khan ania, pawi tawp" tiin min nuih rah rah a, ka va han ngei reuh mai mai tak! "Min tem vir tîr ting tang a" ka lo ti hmuk a, mahse keipawh ka nui veleh tho.



Kan inneih aṭanga kâr khat chhûng vêl chu chawei a sàwmtu kan nei indawt ve zut a. Keini nupa tehlul min lo ngâihlu thiam hlawm lutuk chu kan phû lo takzet a ni. Ka thawhpuite bâkah Nunhlimi hian hmêlhriat ṭha a lo ngah zek a. A ṭawngduhin a ngainatawm em em a, mak pawh ka ti hran lo. Keima lam aṭanga min sàwmtu ai mah chuan a lam aṭanga min sàwmtu kan ngah zawkin ka hre hial a ni. Innei thar hlim hlawt ni mah ila nupui ka thlang sual lo tih hrilh chawp ka ngai lo. Ka lungawi ṭhin vet vet khawp mai.



"Vawiinah Remi ka hmù asin" Nunhlimi chuan min rawn melh chho kar a. Kan mutna a rei tawh viau nâ in muthilh lam a la lang meuh lo. Heti hian zantin kan titi ṭhin a, nupa inkawmngeih tak chu kan ni phawt mai. "Khawiah?" ka lo ti sup a, Remi chungchâng hi kan inneih hnù aṭang khan vawikhat mah kan sawi chhuak leh tawh lo va. Hmuh pawh ka hmu leh tawh lo hrim hrim. Ka lo ngaihtuah chang tawhlo hrim hrim zawk a, a rawn sawi tâkah chuan ka hrechhuak veleh chauh zawk a ni.



"Lalnuni rawn lêng kha ka va thlah a, ka haw lamah ka hmù...kan vêng kàwnah sáwn ania. Dàwr ah ka lo kal kãwi kher kher bawk nen kan inhmufuh lutuk a. Mahse kan inbe lo, biak hmasak chu ka duh lutuk. Ṭha deuh a biak a, pangngai taka awm zui mai ka duh a. Mahse ka tilui thei thlawt lo" a ti duah a. "A pawi loh tawp chu" ka lo ti tàwi tâk ringawt a. A mitmeng fiah zet chuan min rawn melh leh kiau a. Ka lo kuah nghet sauh thung a.



"Kha chen kan lo inkawm ve tawh a, heti maia kan inṭhian ṭhatna a chhe ta mai hi chu pawi ka la ti reng. Siam ṭhat leh theih ni se, siam ṭhat leh ngei pawh ka duh. Mahse tlàwm harsa ka ti a, khang zawng zawng kan chunga a tih tawh hnù kha chuan ka be ṭha leh thei tawh thlawt lo. Thil ṭhenkhat ah kha chuan ka ngaidam thei lutuk, mahse ka chungchanga dawt a lo tel kher kher kha chu ka ngaidam thei thlawt lo a ni. Huat loh luih ka tum ngial pawhin ka thei lo" a lo ti leh duah a. A mizia ngaihtuah chuan a rilru tùr hi ka hriatthiam pui khawp mai. Midang huat leh enghelh neih vêl hi amah nen a inhmeh lo va. Remi hi a vawikhatna liau liau anih ka ring.



"Tumah hi kan fel famkim lo va, inthiamlo bîk lutuk duh suh. I thiam lohna ni miah lovah phei chuan hrehawm ti duh miah suh. Mahse ngaihdamna hi a hlu a, ngaihdam ngai, hriatthiam ngai vek kan nia. Ngaidamtu nih phei chu hlu tak a ni. Chutihrual chuan rilru tak taka kan ngaihdam theih lohte laka lemchan kher hi a ngai miah lo. Kan inti hrehawm tawn mai mai. Chuvangin i rilru leh tih takzeta i ngaihdam theih hunah chiah nangmaha a thawh dàn dàn khan i che tawh mai zawk dâwn ania. Inbiak chhiat reng erawh a ṭha chuang lo va, mahse lemchanna nena nun hman chu a ṭha chuang miah lo ania" ka lo ti ve duah a. A dàrah chuan hnem tum tak hian ka chûl hauh hauh zui bawk a. A rilru hrehawm dàn tùr hi ka hrethiam ve lutuk.




"Mahse kan Pathian thû chuan 'A theih phawt chuan nangmahni lam tal mi zawng zawng nen inrem in awm rawh u' a ti si a. Remi chuan min lo mil lo viau pawh nise ṭhat chhuah zawk tur ka niin ka hria. Amah ang ka nih loh zia lantirna tùr niin ka hre bawk a" a lo ti veleh halh a. A Pathian thu rawn sawi chhuah ber kher chu a rilru thianghlim tak aṭanga rawn chhuak a ni tih ka hai lo. Mahse heti hian ka fuih ta zawk a - "Mi zawng zawng nen inrem turin min ti ngawt lo va, 'A theih phawt chuan' a ti tel alawm. Theih ngang loh a awm tih a hrethiam ve a ni chêk ang chu! Mi zawng zawng rem kan tumna lamah hian mahni nun ti hrehawm khawp a awm tùr a ni ngai lo. I rilru thianghlim zet tih kawih ka tum vâng ni miah lovin thil nihphung ka sawi zawk anih chu aw. Inrem theih ngang loh hi a awm ve a. Nang pawh ngaihtuah chiang la. In ṭhian dùn hetia in han awm ta hi in pahnih tana ṭha tùr ve ve a ni zawk ang em? Remi pawh kawm leh ṭalh tumin be ṭha ngar ngar la, ani'n chutiang lam chu lo hawi ve si lo se tùn ai mah hian in inngeihlo zawk mai thei asin. In in intina tawn belhchhah thei ve tlat. Chuvangin tuna in awm dàn pawh hi a ṭha zawk mai thei asin" ka ti leh duah a. Ka ngaihtuahna min ṭawmpui tih hriat tak chuan a lo bu ve ta nghat nghat a.




"A hma khan engtin chiah nge ka tih min zawt dâwn lo em ni?" a rawn tih leh hluai a. A sawi awmzia ka hriat loh avang chuan mitko ka lo sàn uk a, "Aww...kha kan inneih dâwn vela thu diklo a lo phuah chawp vak vak vêl kha mawle. Khami ṭum khan ka insum zo lo va, ka va hau ve ta hrep alawm. A ngawi chiang asin aw. Min rawn tihbuai zui ngam tawh miah loh hi. Kan chungchang phei chu a sawi zui ngam tawh teuhlo mai" a lo ti tán tán a. Remi lakah khan a inthiamlo rilru ve deuh emaw ka tih laiin tunah chuan a huat leh hmêl viau tawh. "Ni tak e...kha thil kha engtin nge i lo bawhzui tak le?" ka lo ti ve hluai a. Mahse a sawi zui leh duh chuang miah lo. "Ka chungchâng a hriat hnem tluk zetin a chungchâng pawh ka hre hnem ve alawm. Mahse kha chu kan ṭhian dùn inkarah tàwp rawh se. Ka pasal ni tawh tho mah ila i hriat ve kher ka remti lo" a lo ti leh lawi a. Ka nupui pawh hi hriatthiam a har ve khawp mai.




Remi a lo tih dàn pawh chu zawh zui ka tum tawh bîk chuang lo. A sawi ang khan an ṭhian dùn inkâr a ni tawh a. A sawi chhuak duh miahlo te hlei hlei chuan min hneh. A lo chinfel chuan a ṭha a ni mai. Hetia Remi a reh zui hmak theih dànah hian engtin emaw tak chuan a ti ani phawt ang a. Ka nupui hi ka ring ve tâwk a, ngaihtuah buai vak a ngai pawhin ka hrelo.




"Nonoi hi..." a rawn ti leh hluai a, a ngawi leh daih lawi a. Zanin kan topic chu a rawn her danglam bawih bawih mai. "Sawi la..." ka lo ti sup a, a dàr ruak kângah chuan ka fawp zeuh bawk a. Dik tak chuan ka rilru ah thil dang a awm leh daih tawh. Mahse a taksa a chau lutuk ang tih ka hlau ve tho si a, chêt lâk nawn ka tum tawh hran lo. Ka insûm tlang thei lo anih leh a nih nih kan ni leh tawh mai aniang chu!



"Kan inneih hnù hian a lo la lêng miah lo tiraw? Nge ni a ka awm loh lai hian a lo kal ṭhin zawk?" tiin chîk zet hian min rawn melh a. "Ka hrelo le" ka lo ti ringawt chu rum zet hian min rawn melh ringawt a. Amah ai hian inah ka awm tlêm zawk a, nilengin ka office san a, a awm loh laia lo kal chu thil theih loh a ni zawk reng sia. Rawn kal ni ngat sela chu kei aiin a hre daih zawk dâwn.



Nunhlimi chu a inlahrang nghal ringawt pek a, nui hawk hawk chungin ka va kuah lehnghal vat a. "Kal teh...ka ning tlat che" ti hlar in ka kuahna kut chu min phelh sak a lo tum nghal zat a. Eng nge maw a hriat reuh ni? A rawn sawi chhuak tu zawk ania thinrim zawkah min ṭan san leh daih a. "Ka nupui duhawm tîk têk nu...i tau nget nget em ni?" nuihza insûm zet a ka tih chuan a lo rum chhar chhar a. A âwm bâwr ka khawih rual chuan ka kut a lo man bet leh vat tawh. Thawmhnaw kan hâk miau loh avangin awmze nei zet hian a hnunglam aṭang chuan ka che a, kan taksa pawh ngialngan takin a la insi tihna anih chu!



"I sual emai" a thaw hak a, a taksa ka thunun si, a la titau deuh reuh bawk si. A awm dàn chu lawmawm tak a ni. "I rawn sawi chhuak a, i titau leh daih a" ka tih chuan "Min chhâng ṭha lo anih kha" a lo ti bak hlar a. "Umm...anih chuan a lo lêng ngai lo aniang engmah ka hrelo" tiin a nghawng ah chuan ka hmui ka nawr zui vang vang a. Ka insumna ka hloh leh vek tawh. Chêt ka lâk zui leh tâkah chuan min lo hnar tawh bîk lo.




Dam chuan hun te hi a lo kal chak khawp a, Nunhlimi nen pawh thla thum lai chu kan innei ve ta reng mai. Kan inneihna a la rei lo bawk nen kan in ngai em em a. Ka office kal te hi ṭum danga phone khawih ngai mang hlei lo kha ka hnathawh pah te'n kan inbe ngat ngat ta ṭhin a. Ka thawhpuite fiam pawh ka hlawh nasa viau, mahse ka nui liam mai zel a. Ka hlimna hi eng thil mah in dan tîr ka tum lo.



Nupa in hnê tih vêl phei chu hlat tak kan la ni. Kan innei rei ve telh telh a, kan inngai telh telh emaw tih mai turin kan khawsa a. Ka beisei phâk bâkin Nunhlimi pawh ka tán nupui ṭha tak a ni, a la nih zel pawh ka ring. Ṭhianpa Msa te nupa in min fiam ziah ṭhinna pawh kha a lo dik bîk hauh lo. Thaibawih turah min han ngai nghal ringawt kha ania. Mahse Nunhlimi hi khatiang mizia kha a lo ni reng reng lo. Ri phawr phawr in min han vin ve ṭhak ṭhak ṭhin mah se ka thû a zah in ka ngaihdan te hi a ngai pawimawh em em a. A pasal ka nihna angin eng emaw ti hlek dawn sela min râwn ve zel a. Min dah thû thiam lutuk ringawt.





Ka chhûngte nen lah an inmil in an inkawmngeih nghal em em a. Ka Nu nen phei chuan inchhunga che tam ber an ni bawk nen an thû a inrual em em a, nufa ni àwm hliah hliah hi an ni. Nunhlimi che pawlawh lutuk erawh ka Nu hian a sawi ve fo a. Mahse a rûka inrel tih vêl kha a awm ve lo, tlang takin a hrilh mai a. Nunhlimi lah thu hrilh nuam chî a lo ni bawk nen a insiamṭha zung zung a. Ka Nu thil tih sual zeuh lah hi a lo hmu thei ve tho si a, "I che pawlawh lutuk" tiin a fiam zui ve ta ṭhin a. Kan hlimpui ṭhin khawp mai.



Kimtei nen pawh an inmil zêk a, an titi duh záwng a in angin an ṭawng tui laklawh lai phei chuan tih buai chî an ni lo rêng rêng. Midang an awm ve miah lo emaw tih tùr khawpin an inkawm thei. A ṭawng tam lo ber ka pa lah nise Nunhlimi hian a fiam peih em em a. A zîng thingpui pe tùrte hi "I monu cial thingpui lum hi in leh phawt mai teh" a ti kher zel a. Mo fel leh ṭha tih buai a ngai lo rêng rêng, amah hian 'Monu cial' tiin a lo inphuah ve tawp a. A nuihza ber berah a ṭang ṭhin bawk si, ka nupui chuan kan chhûngkua ah hlimna tam tak a rawn keng lût ti ila ka sawi sual hauh lo vang.




"Mo fel chuan chhûngkua a hui khâwm " tih zawng zawng hi a rawn keng lût a. Kan chhûng lam hnai vak lote pawh Nunhlimi chuan a hriat fuh tawh laklawh chu a nêl nghal em em vek a. Nupui ka neih hma khan inlêng neuh neuh nei ve fo mah ila nupuia Nunhlimi ka neih tâk hnù phei chuan lût chhuak hi kan awm reng a tih theih ang. Chhûngte'n min rawn ngam tlâkin a hma zawng ai khan min rawn pawh a. "In pui tak tak kan ni ve ta" ka pa pawh hian a ti ve ta fo mai.



Kan chhungkhat laina te hian a hma khan min rawn pawh lo ni lovin heti em em hian an rawn lêng lût tam ngai lo va. Ṭawngkam thiam tak chhûngkua kan lo ni lo bawk nen midang te hi kan lawm thiam lo em em a. Kan inkharkhip vâng erawh a ni hauh si lo, tih vak ngaihna kan hriat loh vâng ni berin ka hria. Mahse chung zawng zawng chu Nunhlimi hian a rawn thlâk ta vek a ni ber. A awm dànin a zir bawk nen kan thû a awih ṭhin lutuk hi a châng phei chuan a thuhnuaiah kan awm vek ni zawk te'n ka hre hial ṭhin.




"Vawiinah lo che hah lutuk lo la, tih tùr i hria a nih pawhin midang an awm tih kha hre reng la, Kimtei lo tîr hreh suh aw. I lo chesual palh hlauh ange, i fîmkhur dâwn ania" ka office kal tùr chuan thu ṭha chi tinreng ka fah mawlh mawlh a. Kâr kal ta aṭang khan fîmkhur turin kan intchah mawlh mawlh reng mai. Eng dang vang ni lovin tunah hian nau kan pai ve mêk a. Thla hnih a tling ve ṭep tawh a, a lo pian hma hauhin chhûngkua min tihlim nghal cher cher khawp mai. Ṭhenkhatte'n rei ngial an nghah hnú leh an beih fat fat hnù pawh a an harsat laiin keini chuan Pathian malsawmna nasa tak kan dawng a. Kan inneih aṭanga thla nga êm pawh a la tlin hma in kan pai zui ve nghal mai ania. Làwmthu sawi mawlh mawlh tùr hi chu kan ni chiang alawm.





Ka kal tùr chu Nunhlimi chuan pâwn thleng min thlah a, a dul hi la puar êm lo mah se hmuhnawm ka ti nghal em em a, ka lo en leh vawng vawng ṭhin. "Lo haw vat la, pakora min lo hawn rawh aw" pangchang zeta a tih chuan fawh nek mai ka duh. "A dang duh i la nei em?" ka ti sup a, a lu a lo thing nak nak a. Hei ai hian la pangchang se ka duh, duat sual vek ka châk. Ka ngaihtuahna avang chuan ka nui hawk a, a ngaihna hrelo fe a min lo melh chuan "I hmelṭha ngawt mai" ka lo ti daih a. A hmui a lo tipawrh tarh a, insûm hman lovin ka va fawp zeuh a. A hawi kual nghal ruai mai. Mahse midangin min hmu lo tih a hriat tâkah chuan thaw huai hmêl hi a pu reuh a. A châng hi chuan a awm dân lawmawm lutuk hi thin hrep ka châk ṭhin, ka hâ a ti ziau tlat zel anih chu!



Office ka thleng chiah a, phone-in ka be zui leh nghal zat a. Midang ngaihah chuan ka over ngawt ta ve ang. Kei ngei pawhin ka awm dàn hi midang awm dàn nise over ka ti ngawt ang. Mahse pawi ka ti lo nasa, midang pawi kan va sawi pawh a ni chuang lo va. Nupa hlim tak kan ni ve a ni mai a, chu tluka hlu chu a awm bîk lo. Nunhlimi hi chuan ka office kal lai na nâ nâ hi chuan rilru pe turin min duh a, inbiak vak pawh hi a duh lo ṭhin a. Mahse keimah zawk hian ka tilui tlat zel a, ka hnathawh tibuai khawpin ka be dâwn lo tih ka inhrechiang ve tlat a ni.




Office bàn veleh a thil min chah lei tùr chuan canteen lam ka pan nghal a. Kan office pakora hi tui a ti tlat pek a. A raino aṭang phei kha chuan a duh zual a, ka tán lei a lo harsat loh bâkah a duh zawng tihsak chu ka nuam tih zawng tak a lo ni bawk si. Tlãi tin ka lei ta ṭhin a, hnathawkte paw'n an hre tawh ngang mai kan bàn dâwn hnaih hi chuan a thar min lo kan sak a, min lo pack fel sak lâwk vek zel a. Pawisa pe in ka zuk la tawh mai ṭhin.



Ka haw tùr car awmna ka pan lai chuan min lo ko tu an awm avangin ka ding leh rih a. John-a te ṭhian dùn ka hmu nghal pang mai. "In bâng chiah em ni? Nunhlimi a dam ṭha em?" John-a chuan a lo ti nghal zung zung a. "Aw hei ka haw dâwn chiah a, Nunhlimi chu a dam ṭha e" ka lo ti ṭha ve mai a. A bula ngêng zeta Apuia lo ding chu ka hmu lo der hmiah. "Nau in pai mêk tihte ka lo hria a, ka lawmpui lutuk che u. Lalnunhlimi inla nutling nghal lutuk erawh chhîp thlâk hrep ka châk ania" nui hawk hawk chungin John-a chuan a lo ti veleh a. "Kan lâwm khawp mai. Nakinah lo la lêng rawh u, in lo lêng duh lo lutuk a, a lungawi lo teh ania" nui chung chuan ka lo ti veleh vat a. Remchânga an lo lèn tùr thû a sawi hnú chuan kan in mangṭha zui a. Apuia awm dàn vêl chu menah ka thlâk thei tawh viau mai.




Kan inneih ni pawh khan a lo kal ve ngei a, mahse ngeiawm tak khan a awm hranpa tawh lêm lo. John-a hian a kaihruai hneh ka ti dawn nge ni heti hian a la kàwm ve reng chu ania. Nunhlimi hnen aṭanga ka hriat dàn chuan John-a hi mi fel tak a ni a, mak tak maiin Apuia hian a thlah hlei thei bîk lo tlat a. John-a thû hi ngêng viau e ti lo chuan a awih ve viau a ni àwm e. Kan inhmuh chânga min melh rum erawh a bansan hlei thei lo va. Nunhlimi ber ka ta a ni tawh miau a, ka ngai pawimawh tawh lêm lo.




In ka thleng a, ka pakora lei ka'n pe chiah chu nidang ang bawkin lâwmthu min hrilh mawlh mawlh a. Engtik lai pawha a phûr reng thei hi chu a awhawm a ni. Nidangah pawh ka hawn fo sia, a làwm thiam em em zel tho.



"Vawiin chu Kimtei te ṭhianho an lo lêng a, inhlawhna tùr min dil a. 'I û ka lo sawipui ang' ka ti a" pakora ṭhial ṭalh ṭalh pah chuan a lo ti a. "Eng inhlawhna nge an duh a?" ka tih chuan " Ka hre bîk lo, an ṭhianho a Reiek tlâng kal an duh a. Chumi tùr chuan inhlawh hmasak a, intuak an duh ve a. Ka Nu nen tih tir tur kan lo hre mai si lo va, in office lamah puih theihna che u an nei zawk ang em te kan lo tia" a lo ti veleh luam a. Ka ngaihtuah ren rawn hnù chuan "Office lamah chuan tih tùr vak a awm lo va, in hi tifai se a ṭha zawk mai thei. Naktukah lo ko khâwm la, a ṭul ṭul tiin kan inah hian lo hnatlâng tawp mai se" ka ti ta a.




"Nia, a ṭha tak ang. Mahse ka Nu nen tih tùr kan va nei àwm lo ve" a tih chuan "I chêt vak kha ka duh lo hrim hrim tih chu i hria alawm. Ka Nu tán pawh a ṭha zawk dâwn a" ka lo ti vat a. Nihlawh intih hmêl deuh hian a lo bu ve ta nghat nghat a.


Zanriah kan ei laiin Kimtei bulah chuan ka sawi a, a lawm khawp mai. "Ka ṭhiante pawh an lâwm ve ngawt ang" phûr deuh hian a ti a. "Mahse in thawh ṭhat loh vaih chuan hlawh in hmu ṭha dâwn miah lo ania. I u Nunhlimi lo chhawk zângkhai hle ula, a thu lo awih hle bawk ula" ka ti tel kher a. "Lo lungngai lo phawt rawh" Kimtei chuan a lo ti zâng vah a. Ka duatna hi ka chhûngte hriat ah pawh ka tilang hreh lêm lo va. Nunhlimi hi chu a tîm ve deuh ṭhin tih ka hre reng, mahse ka chhûngte hian a kàwi zawngin an ngai dâwn lo tih ka hrechiang a. Chuvanga tilang pawp pawp ngam pawh ka ni. Duat ngawih ngawih tura min fuih reng tu an ni zawk a. An monu rangkachak kha a ni tlat a. A châng phei chuan an makpa zawkte hi ka ang ṭhin in ka hria.




"U...ka lo lût lawk dâwn?" kan room kawngkhar bul aṭang chuan Kimtei a rawn au lauh lauh a. "Lo lût rawh" Nunhlimi zawkin a lo chhâwn a. Mu tùra kan intintuah lai mêk a ni a, khumah ka ṭhu mu a, Nunhlimi chuan hmai hnawih a la inhnawih thung a. Kimtei lo lût chu kan lo chhâwn vat a. "Naktuk kha...Nonoi lo kal ve se pawi in ti em?" a tih chuan Nunhlimi nen kan inmelh nghal vat a. Kimtei chu a inthlahrun hmêl angreng khawp mai.




"I u Nunhlimi zawt chhin la" ka ti sup a, kei chauh ka ni tawh lo tlat a. A thîk thu chhiat zia ka hrechiang bawk nen keimaha thû tih tlukna chi a ni tlat lo a ni. "Aw...lo kal ve rawh se. Tinge min rawn dil kher? In ṭhianho inhlawhna tur alawm le" Nunhlimi chuan a lo ti zung zung a. Chîk zetin ka lo melh reng a, thîkna lam a lang lovin ka hria. Kimtei hmêl chu a danglam nghal dawrh a, a inthlahrung hmêl kha lawmna in a rawn thlâk a. "Yes...dik tak chuan Nonoi hi in inneih aṭang khan a lo kal hreh tawh tlat a. A tirah kha chuan a lâk nat vang ania. Mahse tunah chuan a zah vang zawk a ni tawh a. Ka û hi a ngaizâwng tawh miah lo ania, 'Nupui a nei chiah kha ka tawrh tùr ang zawng zawng ka tuar fel a, thla khat a liam meuh kha chuan ka dam hmak' a tia lawm. Lo lêng leh tùr êm kha chuan a inring tâwk lo va, U Nunhlimi mitmei hi a vêng ve lutuk a. Mahse naktuk chu, kan zinga lo tel a châk ve tawh sia, a hreh tho bawk sia. A rilru a inkhap buai nasa lutuk a. Hetia buai reng ai chuan tiin ka lo zawt tawp mai che u" a ti ta duah a. Nonoi rilru danglam ta chu ka tán chuan thâwk huaina tham a ni, ka lawmpui hle bawk.



Kimtei min chhuahsan hnú chuan Nunhlimi chu ka sawipui leh hram a. "Ka thîk tawh hlei nem" a tih chuan ka ring thlap. Thîk chu nise tlang takin a sawi ang a, a ṭeu leh hlar dâwn tih ka hria. Mize inthup cheih chawih ang kha a ni miau lo a ni. John-a te ṭhian dùn ka hmuh thû pawh ka sawi tel hram a, "Apuia chu i hnek châk leh àwm " nui rah rah chunga min tih chuan "Min tluk chuang lo bawk a, ka thîk peih tawh bîk lo" mit siai zeuh chung hian ka lo ti a. Kan nui dùn nasa mai.




Kimtei te ṭhianho chu an lo inhlawh ta ngei a, ka office bân hnù thleng pawh chuan an lo la awm a. Nonoi nen pawh hun rei tak hnù ah kan inhmu veleh ta hram e. A tirah chuan a lài deuh a, mahse a puitling zawk chan changin ka be lui sak a. A lài chuih chuih rei bîk lo. Inpawh tlâng takin kan awm a, kan boruak chu a zângkhai phian mai. Nunhlimi'n chawei ah a sâwm vek ta law law a. Nonoi ber chuan chhuanlam siamin a hman loh tùr thû a sawi tlat a. Mahse Nunhlimi'n "A ṭul phawt chuan i chhûngte kan be dâwn ania. Nang berin i lo ei loh te'n i ṭhiante'n nuam an ti nang. I lo lêng duhlo ropui si, i ngaihawm alawm" a tih tâk tlatah chuan a hnial lui thei ta bîk lo.




An zavai mai chuan ṭhian leh nau ang tak hian a be hlawm a. Nonoi nen pawh an titi thei ta fu mai. A fiamthu thawh ah a chhaih nui reng hlawm a. Ka Nu pawh hi Nunhlimi hian a chhuah uang zo vek tawh a ni chêk ang chu ka beisei loh lutukin a uang ve reng a. An eirawngbawlna bulah chuan ka awm ve ta reng a, ka nui ka nui ve mai. Ka pa pawh a insûm zo ta lo aniang ṭhutkhawmna lama a lehkhabu chhiar chu dahin a rawn phei ve a. Kan choka zau ve thawkhat tak emaw kan tih kha mi sàwm vêl zet kan awm tâkah chuan ka hre zim ta kher mai. Mahse kan hlim tlâng êm a, rilru eng thâwl takin kan awm hlawm in ka hria.




Zanriah kan ei kham chuan Kimtei te ṭhianho chu an hlawh ka pe nghal a, chêng 5000 ka pe chu an lâwm ve ngang aniang lâwmthu min hrilh sap sap hlawm a. "Awi a tam mah mah, eng vak mah kan thawk si lo a inthlahrunawm e" Nonoi chuan a lo ti niah niah a. "I û Nunhlimi in lo duat man anih kha" ka lo ti mai a. An lo ehhh dual a, Nunhlimi chu a lo lài ngang mai.



An in thleng ka thlah leh hlawm a, ka haw leh chuan Nunhlimi'n Nonoi chungchâng min lo sawipui nghal a. "Engtin nge i duh loh theih zawk a? A fel in a hmêlṭha reuh si. Hmeichhia mah ni ila zùn a nei tih ka hre nghal, kei aiin a duhawm daih zawk sia. A Innocent reuh bawk sia" a lo ti mawlh mawlh a. "Ka duh êm che alawm" ka lo ti daih thung a. "I nupui chu ni tawh tho mah ila Nonoi kha ka lo ui pui che" a tih chuan ka nui huk a, ani pawhin a thusawi atthlak zet chu a nuih pui veleh tho.




"Hmangaihna hi chu a mak khawp a, han sawifiah vak ngaihna pawh ka hrelo. Ka hmangaih hlê che tih erawh hmangaihna ka sawifiah thiam loh tluk zetin ka hrechiang. Engvanga hmangaih che nge ka nih pawh ka hre lo va, nang hmangaih tùr che hian hmangaih chhan tùr che ka mamawh pawh ka hre chuang lo. I hming tluk zet hian ka nun i tihlim a, ka lungngaihna thlentu lo ni dâwn ta pawh ni la lungngaihna hlimawm ber min thlentu i la ni cheu ang" ka ti duah a. Ka thusawi zet chu ka kâ aṭanga chhuak lo va mâwi a ni e. Lungawi hmêl zeta min lo en reng tu ka nupui lah chuan min han ti lungáwi em em khawp a!





December thlà kan chuangkai a, Nunhlimi dul pawh a puar ve al tawh a. A che reng rengte hi hmuhnawm ka tiin ka lo thlîr leh vung vung ṭhin a. Rai a inhmeh zia chu pui tak ani. Ka theihtawpin ka duat a, ka chhungte lahin an duat. Eitur ṭha leh hrisel kan hriat apiang kan ei tir mawlh mawlh a. A rai chu thuhran, a thau vei hman reuh a, lawmawm tak a ni. Ka nupui niin ka ta ni mah se ka ît a reh thei dêr lo. A rai vanga a âwm bâwr lo lian zual leh a mawngbawr vawng lah te chu ka ha ziai hian ka ṭham leh tâwk zel a, kan pàwr thei hlar hlar viau mai.




"U Hluzual..." mittui tling pam a min lo melh tu ka nupui kut chu ka hum vang vang a. Tukin aṭang khan nau a vei a, damdawiinah kan indah lût rum rum a. Mahse tun thlengin a la nei thei lo. Doctor te chuan nghah deuh a ngaih thû min hrilh a, mahse a hrehawm ti hmel ka khawngaih lutuk hian zai mai pawh ka pawiti tawh lo. "A na lutuk" a ti leh ṭiau a, "Ka duatte, tuar fan fan rawh aw...i tawrh ai hi tuar thei ila aw" hrehawm ti lutuk hian ka ti hawk a. Ka duatna âw a hre chiah chu pangchang zual sauhin a mittui a rawn luang ngiai ngiai a. Nurse an rawn luh zui tâk ah chuan insûm in a hmui a pet fan fan a, ka khawngaih reuh tak tak ani. Mahse Nurse te'n an han en chu "A nei dawn hnai e...inbuatsaih ang ule" an ti ta hlauh a. Nau neihna room-ah chuan an innawr lût nghal a. Ka lût ve thei si lo, pawnah chuan kan chhûng dangte nen kan lo nghak ren rawn a.




An luh aṭanga Minute tam pawh a liam hma chuan naute ṭap ngak ngak ri kan hre ta. Ka chhûngte chu an khek nghal raih a, kei erawh lawm luatah ka ngawng deuh chhû a, awmngaihna ka hrelo. Ka lungphu lah chu a rawn puak chhuak dâwn emaw tih tùr khawpa rangin a rawn phu dawt dawt a.



Nurse pahnih an rawn inzui chhuak a, "Fapa i nei e, a lian bawk si a hmelṭha lutuk" ti a min rawn pawm tir lai te chuan mumang rama chêng ang mai hian ka la awm. Ka fapa hmêl ka'n hmu chiah chu mipa ah pawh pà inti ve tak mai kha ka mittui ka dang zo lo pek a. Ka biang a rawn lum thla nghal pap a, naute piang hlim a ni tih hriat miahin hian ka fapa lah chuan mitmeng fiah zet hian min lo melh kiau pek a! Ka lâwm a ni tawp mai.




"A Nu a ṭha em?" nurse te bulah chuan ka ti chhuak thei hram a, "Aw ṭha e...an lo nawr chhuak ang aw" a tih rual deuh thaw chuan ka nupui chu nurse pakhatin a rawn nawr chhuak ta nghal a. Kan fapa nena kan inpawm min rawn hmuh chuan a mittui a dang zo bîk lo, lawmna mittui luang nen min lo nuih a. A bulah chuan zuk ṭhingṭhiin kan fapa chu ka entir a, "Ka lâwm lutuk, ka hmangaih che" tiin a chal ah chuan ka fawp zui vang vang a. Kan chhûngte dang reng reng chu ka ngaihsak thei tawh lo.



"Keipaw'n ka hmangaih che" lo ti ve sep tu ka nupui, ka nun tihlim em em tu Lalnunhlimi leh kan fapa duhawm lutuk chuan ka rilru leh ngaihtuahna an luahkhat vek. Hei ai hian ka hlim thei tawh pawhin ka ring lo. Ka bula Lalnunhlimi a awm chhûng chu!




A TÀWP TA.


Sawi duah lo vang, dawhthei taka ka ziah zawh hun min lo nghak ṭang ṭang tute, ka regular lo chung chung pawh a feedback ṭha leh ngaihnawm tak tak min pe reng tute ka tán in hlu. A tàwp zàn a nihna angin thû eng emaw tak chu min hnutchhiah ve ula tir'u



Show post links
Top