HIS REVENGE BY MAWITEI BAWITLUNG (Completed)

[mawitei bawihtlung]

HIS REVENGE




CHAPTER 4





“Min tawk hlek suh, nang nena in hnimhnaih hi ka duh lo a nia. Min khawih tawh hlek suh" tiin ka vin hlaka, mahse hepa hian ka rawngbawl hi min ti buai reng bawk nen ka che tha theilo. Ka kawngah rawn kuahin ka nghawngah chuan a hmuia rawn nawr tawk a ruala, ka awmsawn tur chu min chelh bet tlat bawk nen ka thei der lo.








“Enge i hriat,min thlah rawh; min thlah nghal rawh" tiin ka tal nawk nawka, mahsela ka tal chhuak thei der lo. Hepa hian engvanga min tilui tlat nge a nih ni “Khati khan che rawh, chuan inhau reng lo hian awm ve teh ang. Inhauh reng zawng a nuamlo" a tihchuan ka thaw ham hama.







Alamah in herin a kut chu ka dahsawn saka “Nangmahin alawm bul tan, haw tur che a min siam tu i nih hi. Keichuan nang nena inhnim hnaih hi ka duhlo, min hnaih tum buai lo mai rawh. Chuan he in hi ka chhuahsan vat dawn tih hre bawk ang che" tiin ka rawngbawl lai chu suanin ka kalsawn zui daiha, min biak pawh a tum tawh bik lo, chu chuan min ti thaw huai mai.









Pawnlamah chuan chhuakin ni rawn lang tan chu ka thlir dauh dauh va, ka zu in lah khan ka lu chu a la tihai deuh chhu ten ka hria. Thutthlengah chuan thu thla in ka phone chu ka enkual mai maia, min be tu pawh an awm leh nuk tawh, mahsela pasal neihchunga mipa dang lo biak vak kha ka tum lo, in ngeih lo viau mah ila hetiang lam hi chu ka duh loh tak thil a ni.








Reife ka awm hnuah a ril a tam thu a rawn sawi takah chuan muangchangin inchhung lamah chuan ka lut zuia. Chaw ei chu siam nghal zung zungin a ni erawh chuan chaw ei dawhkana a kiu nghatin min lo en leh reng tawh mai, en duh miah lo chuan chaw chu khawrhin ka bar nghal zung zunga.






“Ka treat dan che avangin i lawm lo tih ka hria, mahsela ka sawi ang khan in rem tak hian a awm theiha. Thinrim reng zawng kan hriselna atan pawh a thalo"a thu rawn sawi leh avang chuan ka nui haka,“Min be lo la kan inhau lo a nimai. In thusawi kha ka hre vek tih i hriat kha, kha ti chung khan nangnena in ngeih taka awm ka duh in i ring em ni? A teuhlo lutuk mai, kha nu bula i fa pai tur bakin min duhlo tih i sawi kha ka hre vek" tiin chaw chu ka bar zui tawn tawna.








“Duhtawk rawh thudik i hriat loh chuan khang kha sawi tawh hauh suh" a rawn tih chuan ka nui leh ringawta. Chaw chu kham in ka kalsawn san zui leh daih bawk.





Zan mut dawnah chuan kan la inhnial lehzuia, ka hmuiah rawn fawp nawk nawkin khumah chuan min nam hmu hnawka. Rawn mu ve nghalin kuah ka duhlo tal kual vel chu min bawhbet hmakin a mit a chhing zui hmiaha, ka tal ve ngar ngar chung pawhin a inthlahdul duh lo bawk nen ka chau chu ka mu ve ta hle hle a.







“Ka haw lutuk che, nang a fa hi ka pai ngai hauh lovang chu chu ka sawi sa a nihchu" tisapin ka mit chu ka chhing zuia. “Sual lam ringawt ngaihtuah lo khan muhil rawh. Ka nupui i ni a ka fa chu i pai ngei tur a ni, keichuan fa neih ngei pawh ka tum" tiin ka nghawngah chuan a rawn fawp zauh va.







“Khanu kha i duh leh va nei la i fa chu pai tir rawh, keichuan i fa hi ka pai ngai dawn lo. Pai pawh ka duh heklo, ramhuaifa ka pai ai chuan tihtlak pawh ka duh zawk" ka thusawi avang chuan a thinrim ta hle tih hriat takin min kuai her nawkin ka hmaiah chuan a hmer chawta, a kut leh lam chuan ka nghawngah a rek bawk nen ka tal nghal phat chu min melh runa.








“He i ka tetakte hi i chip loh chuan ka that duh tak tak mai ang che. Ka fa i pai lo a nihchuan maw i pa zawk saw ka that ang" a tihchuan ka mengkawk kawk a, “Ka...hua...che" ti tiauin ka hmui rawn fawh a tum chu ka thle sawn thei hrama. Min thlah rual chuan a awm lohna lamah inherin amah hlat zet chuan ka mu a.







Min rawn khawih tawh biklo, a mutthilh hun chang ran chuan ka mengkara.




Zan lai a nihchuan tap faih faih chunga tho chhuakin room pawnlam chu ka pana, kawngka pui ka hawng tur chu thawm rawn awm avang chuan hawi letin Danis chu ka hmu nghal zata, chuveleh tlan chhuak thutin kawngpui lam chu ka pana, kawng kana ka tlan tur chiah chu bike chak lutuka rawn tlan avang chuan au thawtin ka mit ka hupa, ka taksa chu rawn che dawtin tu emaw awmah hian ka bei thlawpa.










Bike pawh chu a tlan tlang daih bawk, lungphu dawt dawt ri ka hriat chuan a hlauthawng hle tih ka hre thei. Chutah ka hawi chhuak chuan Danisan min lo melh chhuk run ka hmuh chuan ka tal leh phata “Duhtawk rawh, thih i duh em ni? Kha thil hlauhawm zia kha i hria em?" tihrawkin min thing nawka.








In lam pan chuan min hnuk phei dawr dawr bawk “Min thlah rawh a pawi ka tilo, ka hua che. Nangin min thah i duh a ni lo'm ni engvanga min chhan leh si nge i nih? Min thih tir ta che" ka au khum tuar lai chuan rawn hawi let thutin min fawp tawn tawna, a chet dan reng reng chu ana in a thinrim hle tih a hriat.







Ka mawngah chuan tham tawn tawnin min fawp duhthawh sauha, ka dawh tawp ringawt. “Thi turin ka duh lo che, chu chu i hrechiang em? I thih ka phal reng reng lo, min tih hlauhthawn zia kha i hria em?" tihrawkin min melh runa, ka nui hak hak ringawt.







“Engvangin nge i duhloh? Min hua a ni lawm ni? Engvangin nge ka thih chu i hlauh em em? I hlim zawk dawn lo vem ni a, nge min tihhrehawm i la kham lo. I nupui chu a rawn kir tawh dawn lo, chuvang chuan i phuba lakna chu hlenla min that rawh Zoliansang, i hmangaih phuba chu la in min that rawh" a taksa ah chuan min kuah beta, ka tawng tur chu a dang tlat bawk.








A taksa khur der der chuan a hlauthawng ve tih a tilang chiang viau bawk. Tinge min ngaihtuah em em anga ka hriat tlat le? Heng a lungphu rang zet te, a taksa khur te hian min ngaihtuahzia a tilang chiang viau si “Khatiang thil ti tawh suh, i hria em? Mahni nunna lak tum zawng kha che tawh suh, Baby ka..ka.. " tiin a ngawi deta “That tur che in min tisuh ka thei ngai lovang" tiin ka nghawngah chuan a rawn nawr zui tawka.









“Engvang chuan in nge i theihloh? Ka pa pawh i that dawn a nihchuan keimah pawh hi min that ve rawh. Danis khawvela ka chhungkaw neih chhun i that dawn a nihchuan keipawh min that ve rawh, mal taka awm ka duhlo. Ka pa hi ka neihchhun a ni a sin, chuvang chuan ani i tihnat dawn ai chuan keimah hi min that mai rawh. I duhna leh hmangaihna nei ngai dawn lo turin nupuiah min nei luia, hrehawmna min pek zawng zawng hi i duh tawk thei silo" tiin a awmah chuan hmai nawrin ka tahkhum dar dara.







Ka mittui chu a luang zung zunga “Ka tihpalh, tap tawh suh le. In ngeih takin awm tum ang aw, ka sawi tawh kha in hauh ka peihlo" tiin min pawmkang nawlha. Ka hnial tawh bik lo, in hnit faih faih chung chuan a mi pawm ang ang chuan ka awma.







Khumah chuan min mutthla in duat zet hian ka lu ah chuan a chûla, a chet dan chu ka en kiau ringawt. Ka bulah chuan rawn muthla in nghet zet chuan min kuah beta, engmah sawilo mahse a thawk danah chuan ala pangngai bik hauh lo tih ka hre thei. Ka chalah chuan rawn fawpin ka hmui vel chu a chul zai zaia, ka en reng ringawt.







“Muhil rawh, chuan ka mutthilh hlanin min kalsan tum tawh suh. I tello te chuan ka khua a har lutuk dawn a sin, i sawi ang khan ka tan pawh ka neihchhun i ni tih hre reng rawh" a tihchuan ka thaw haka “Aih, min tih hrehawm nuam i tih em kha. Ka ring duh lo che, Danis ka duh che tih i hriat avang khan min bum i tum mai mai a nihkha, ka hua che" tiin ka mit chu ka chhing daiha.







He nun hrehawm lutuk atanga chhuah hi ka chak ber, chu erawh ka thei der silo va. “Muhil rawh, ka sawi tawh kha i mi duhna avanga hetianga awm ka nilo, keimaha danglamna awm avanga che ka nimai zawk. Min ring dawn lo tih ka hria, mahsela nang haw tur che hian min nawr lui tawh suh.Nang lo ka nei tawh dawn lo tih hre bawk la, nau anga ka en nei tur phei chuan ka rilru la seng ngai dawn lo tih hria ang che" tiin a ke chuan min khanin ka mit chu a hup zuia.







Ka thusawi hi a ngaipawimawh der silo, khawvel pasal ah hian a ni ang em em hi an awm theih tawh pawh ka ring lo. Min tina chunga alaka feelings ka nei tlat reng hi ka inhaw ut ut thin bawk, ka mut rawn chhuak tan avang chuan inhnit faih faihin ka muhil ta daiha.







Zinga ka harh chuan Danis ka hmu hauh lo, mahsela ka intihfai zawh hnua choka lam ka phei in a lo che mawlh mawlh ka hmuh chuan ka mak ti lutuk chuan ka hau in ka en reng ringawt. A rawngbawl hnehsawh lutuk chu a hmuhnawm let ling zawk, hla a ngaithla a a changin a zawmpui bawk.






Chutia ka lo en reng lai chuan rawn hawi thutin min hmuh rual chuan a nui suka. “Morning i mutui bawk maw? Ka peih tep e, lo thu rawh vawiin chu kan leng chhuak dawn a nia" a tihchuan ka chhang lo nangin ka mak ti chuan ka melh ngawt ngawta, a nungchang inthlak thut chuan min thawng lo theilo.







A rawngbawl a zawh rual chuan rawn chhawp nghal mawlh mawlhin min kai pheia, chaira min thut tir pah chuan ka hmuiah chuan a fawp leh te te phawta.Ka la tawng chuang lo, he mihring hi ka hrethiam ngai pawhin ka ring love.






A sawi ang tak takin min lenkual puia, khawpui chhung chu kan fangkual a ni ber mai. Keipawh chu ka rilru hahna leh natna te chu dah tha in ka nui leh var var thina. Restaurant changkang tak takah min chawlhpuiin thil tui tak tak chu min eipuia, min ngaihsak hle bawk. Chungte chuan min ti â deuh hui mai, a awmdan reng reng chu ka la hmuh ngai loh vek a ni.







Tunah hi chuan mipa fel leh ngaihawm tak mizia a neiin a bula awm chu a nuam hle.Keipawh chu ka nui ve leh hak thin a, mi hmuha min ngaihsak lutuk chuan a lehlam zawng chuan ka lawmna a siam thung, hmeichhe thenkhatin an en vawng vawng thin lah ka hmu ru renga. A ni lahin keimah bak min ngaihsak der lo.







Ka ar bawp keih tan tan lai chuan rawn nui hakin ka lamah a rawn awm hnaia, tissue chuan ka kamsir chu rawn hru in ka hmaiah chuan a piai pah zauh va.“Tam deuhin ei rawh, i cher mah maha miin chaw ka pe tha lo che emaw an ti palh hlauh ange. Thau kung mah la a pawilo" tiin a nui var vara, chu a nui hmel pawh chu ka tan thil thar a ni, a hmeltha zual takzet bawk.








Restaurant atanga kan chhuahlai chuan mipa pakhat hian a lo au va, chulam kan hawi chuan nupa hmeltha dun zet hi kan lam panin an rawn pheia, an in kai rial bawk nen hmuh an nuam phian mai “Hey u Ramdin nang nimaw? Bawihi u ang maia ka en Ramdinpuia leh a nupui Lucy te an nih hi, ka nupui Baby-i" a tihchuan hmeichhe pahnih chu kan inchibai zuia.








Mipa pahnih pawh chu in be mawlh mawlha, keini pawh chu u Lucy nen chuan inkawmin kan nui dun hak haka. A fel hle tih ka hre mai, ka ngainat zawng tak a ni bawk, an ni pawh an leng chhuak ve a nih hmel.






Kan inthen hnu chuan keini pawh chu in lam pan chuan kan inkhalh haw a “U Ramdinate nupa kha an ngainat thu che leh nupui ka neih hmelthat thu min hrilha" a rawn tihchuan ka nui saka “An fel takzet, nupa in hmangaih tak an nih dawn kha" ka tihchuan a then ve saka. “Ni e a tirah chuan an induh bik lova, mahse kha nupa hlim tak chu an nihkha" tiin a ngawi zui daiha.









Keini erawh engtikah mah an ni ang khan kan awm ka ring lo. Mite ang a in ngainat ruk na kan inkarah a awm miau silo, keichuan ka duha. Mahse a ni tan chuan phuba lakna mai ka ni si, kawngpui sir vel bakah lirtheia in ngaizawng rawn inphur te chu ka ena. An hlim hmel takzet, ka kuta Danisan a rawn vawn avang chuan ama lam chu hawiin ka inher a.







“Fa chu hrinsak che ila min then angem?" ka zawhna avang chuan min rawn en vata “A teuhlo mai, then leh tur che in ka neilo che, ka neih dan che a fuh lo tih ka hria. Mahse then che erawh ka tum hauh lo" a tihchuan ka ngawi rauh rauhva, a thusawi chu a timai mai lo tih ka hre chiang viau thung.







In kan thlen chuan a thil min lei ho chu amah chuan a keng luta, teddy bear lianpui min lei erawh keimahin ka pawm thung. Vawiin lam kan in eipuar bawk nen tlaichaw kan ei peih lo ve ve a nih hmel, zanah chuan movie kan en duna. Vawiin chu a mah lo ang takin min ngaihsakin ka duhzawng a hre hle lehnghala, ka pa a zawt emaw ni dawn ni.







A dar chu min nghen tirin kan chips ei chu amah chuan a keng bawka. Puitling pahnih in cartoon hmuhnawm titakin kan en chu ani sia le, nuih te lam lam a tiza, “Engtikah emaw zin chhuah ve i duh em?" a tihchuan ka lu ka thing nak naka. “Ka chaklo, chu ai chuan ramhnuaiah tent nen riah chhuah mai mai ka chak. Hnam dang ho ang hian ruah sur cherh cherhse, sa vel nen hem hminin mu mai mai ila ka chak" ka tihchuan a nui haka.









“Reiek tlang velah kan pahnih in kan la camp dawn a nia, a nuam viau ang chu. I hlauh dawn loh phawt chuan kan kal dawn a nia" a tihchuan ka phur nghal hle. A hma atanga ka lo chak tawh a ni nen ka duh loh thu ka sawilo hrim hrim.






Zan a rei takah chuan tv chu off in kan mu zuia, zandang ang lo takin in si rial hian kan mu duna. Zan dangah kha chuan min kuah thin mahse a mutthilh hnuah ka awmsawn ziah a nih kha, zanin erawh vawiin lam kan boruak nen inhauhna tan hmasa tu zawk nihchu ka duhtawh biklo, a kuahna hnuaiah chuan nuam ti takin ka mu zuia.







“Bawiha nupui dang i nei hi kan lawm lo hle ania, chutah kan fanu nunna la tute ngei lehnghal" tawng thawm avang chuan harh zawkin pawnlamah chuan ka tlanchhuak zuia. Chutah nu upa lam tawh kum 50 chho tur awm velin min lo hmuh rual chuan “Tenawm nu, nang hian ka fanu hmun luah i tum amaw" ti a min rawn khawih a tum chu an lo dang vata.







“Roomah lova lut rawh," Danis an a tihchuan ka duh bik lo “Ka pi i fanu kha duh reng vanga that kan nilo, tin keini pawh kan inhliam ve tho a sin" ka tihchuan a thinrim zual sauh tih hriat takin a rawn au tuar tuar a “Zonunhlu ka sawi chu i hria em roomah lo va lut rawh" Danis-a bawkin a rawn tih leh chuan ka lo phu zawka.







A nupui duhtak nu nge nge chu a lo tan hle a nih hi, room ah chuan tlanlutin bathroomah chuan ka inkalh khum zuia.Chunu la au tuar tuar leh tualthattu a tih te, Danis-an beng daih a tum ri zawng zawng te chuan ka beng luahin ka inhup chawih chawiha. Bathtub ah chuan in chiah in ka tap bawk, ka benga car horn ri tuar tuar te chu rawn tharin ka au vak vaka.








A hrehawm lutuk chu thih daih mai te ka duh, ka taksa chu bathtubah chuan hnim pilin ka khur hlak hlaka. Tualthattu fanu tih ri chuan min ti khawng vek mai, thawk harsa tizet chuan ka thaw leh kawk thina, bathroom kawngkhar rawn ri dawt dawt leh Danis-a min au ri te chu an hla vuai vuai bawk, ka khaw hmuh chu thim riai riaiin ka ri hriatna chu a tawp zui ta hmuka.





ZAWMNA...





Ka harh leh chuan damdawiinah bawk ka lo awm leh ran a, ka kut hum tlat tu an awm avang chuan ka en nghal vat. Danis-a hmel ka hmuh rualin thinrim zetin ka kut chu laksawn tumin ka che a, chuveleh a kun ngur chu rawn hawi chhuakin min en a, a tho chhuak nghal zawk mai.





“Ilo harh tawh maw? Min tihlauthawng lutuk" tiin ka chalah chuan a chal a rawn nghata, chutih lai chuan ka pa a rawn lut ve bawka “Bawihte i tha em? Engvanga i nunna lak tum mai nge i nih?" tiin ngaihtuah zet hian min rawn ena, sawi mai ka duh ut ut mai.






“Ka che sual palh alawm pa, keima nunna lak ka duh bik hlelnem, ka tha a nia haw tawh rawh" tiin Danis lo ngawi run lam chu ka ena, ka kuta a la vawn reng avang chuan ka melh deuh hraka. Min la en duh miah lo zui, ka pa pawh chuan zawhna dang min zawt tawh lovin a chhuak zuia, kan inkar hi hriat tir kher ka tum lo.






“In then ang" ka lam chu a rawn hawi rang hle a, ka thusawi chuan a thawng hle pawh a niang lawm loh hmel zet hian min ena. “Kha thu kha sawi tawh suh ka tihkha," tiin ka bulah chuan a rawn thu thla a “Ka sawi ang, nang mahni avanga hrehawm tawrh reng ka peihlo, i nupui chhungte min tawngkhumna te, min hmuhsitna zawng zawngte kha tawrh reng ai chuan thih pawh ka duh zawk" ka ti leh chu ka lamah a rawn awm hnai ruaka.






“Kha thu kha sawi tawh suh ka tihkha, ka phallo, Baby ka duh che" a thusawi avang chuan mak tizet chuan ka ena, tunah khan min duh thu a sawi a maw, hepa hian min duh tih a sawi chu ka hriat sual a nih loh hram ka beisei, mahse ka ring mai tur a nilo, a hmel chu ka en rana, dawtsawi hmel erawh a pu hauh lo.







“Dawt min bum i tumna a nihkha, dawt vek min duh ngai hauh lo. Ka duh che tih i hriat avang leh thihna lam thu ka sawi vang mai mai a nihkha" tiin mittui nen ka ena.






Chutah ka biang tawn tawnah chuan rawn vuanin hnai zetah chuan min ena “Ka fiamthu lo, ni e a tirah kha chuan phuba mai niin duhna pawh awm lovin neih che kha ka tum a lawm, mahse keihian ka huat vang mai mai che in ka neilo che. Ngaihtuah chiang rawh, engtin nge ka mihuat em em chu ka neih duh kher ang, tih chhiat ka duh daih zawk ang chu, mahse ka hmuh hmasak ber che khan ka duh tawh che tih ka hria a ni, nizana Jane-i chhungte thusawi kha chu engah mah ngaih loh tum rawh" a tihchuan ka tal chhuaka.







Thu chhuak nghalin "Teuhlo lutuk, khatianga tawngkhumna kha ka tawh ka ring ngai lo asin, ka thlavang i hoh ngam lo a nihkha, khang khan min rawn tileh pawh nise a hma ang bawkin i tan ang. A chhan chu keimah vangin i hmangaih i chan a lawm, ka lakah that chhuah der tawh suh. Min ngaihpawimawh lohzia chu nizan khan i tilang vek tawh, ka thei tawhlo Danis, ka nunna i la lo a nihpawhin min kaltir rawh. Mipa dang laka ka kal phal rawh" tiin ka ngen ta tawpa.








A lu a thing nawk nawk mai “Aih khatiang kha a thleng leh tawh lovang, ka tiam a che. Baby, chance min pe rawh huatna nilo in ka khawharna hi nangmah ngeiin min tihrehsak tq che" ka hmuiah chuan a rawn fawpa, ka mittui a luang ngiai ngiai ringawt. Enga tinge hetiang hringnun tehrep hi ka tawn bik le, ka nun hi ka kham takzet.







“Zonunhlu, i nuna mipa tha ber nihtheihna hun min siamsak ta che" a thusawi leh avang chuan ka tap hlap hlapa. Ka mittui chu a hru nghal bawk “Khatiang khan awm tawh suh aw, i thih ve ka phallo min ti hlauthawng tawh suh" tiin a awmah chuan min kuah beta, ka ngawi kara, ka insut faih faih ringawt.




INKHAWMA, CHU MI ZAWHAH MINISTER TYPE LEH KA DUH SIA, A TI FAMKIM TUAH KA TYPE MAI MAI AW, NAKTUK ZANAH A AWM LEH ANG.