By CVL.Awmpuii
Chapter 4
Rilru phili leh chiai ru deuh chuan ka insiam ve nghal a, phone ka ban zui zat bawk a. Inkhawm bân aṭang khan ka khawih leh ta miah lo ka tih tawh kha. Nunhlimi message a lo awm vá mai, "Zanin-a i kamisz hâk kha i inhmeh" tih tê mai hi ania. A rawn thawn hun aṭanga chhût chuan an chhiat tawh hma lawk anih hmêl. Rilru hrehawm deuh leh amah hnem tum tak chuan "In chanchin ka lo hria a, mangang miah suh aw...a pawi hle mai" ka va ti ve a. Ka hnêm thiam vak lo, mahse ka rilru a luah ve miau mai si a. Ka thiam ang chhunin ka va hnem ve a ni ber.
Kimtei nen mitthi in lamah chuan kan inzui phei ta nghal a. Mihring an lo ṭhahnem tawh ngang mai. Pâwn a kan la awm lai reng chuan inchhung aṭanga ṭap rawng rawng thâwm te chu kan hre pha a. Kimtei chu hmeichhia tih takah a hnuk a ulh ve deuh in ka hria. "Ka khawngaih reuh e a" a ti leh hliai ṭhin a. A ṭhiante nen an inhmuh tâk ah chuan an kal hrang a. Keipawh tlangval dangte chêt rual chuan ka che ve nghal sawk sawk a. Ruang chu damdawiin lamah a la awm a, khatia motor-in a su kha damdawiin chu an kalpui hman ngei a. Mahse a lo boral tawh ani awm e. A hmun thlen phei ve tâk ah chuan thu chiang deuh zawkte pawh kan hre ve zel a. A lo sutu kha zu a rui chu lo niin! Kawngsira kal reng Nu Chámi chu a fimkhur loh leh a zu ruih zarah a su ta mai a nih hmêl. Mitthi chhungte rilru nat dân tur ka ngaihtuah a, mipa mah ni ila ka lainat kher mai.
Ruang chu rei vak lovah a rawn thleng ta nghal a, Nunhlimi pawh ambulance aṭang chuan a rawn chhuak ve tharh a. Inkhawm thawmhnaw nen a la ni deuh ap mai a. An hamhaih dân turte ka ngaihtuah a, an beisei lâwk dâwn der si lo. A nî te ho chuan an lo ṭah khum rawng rawng a, an inkuah a, an ṭap chuah chuah mai. Nunhlimi pawh a Nu meuh a boral ta mai chu a ni si a, hlim reng theih ni hek lo le. Amah nena inrem lo takin a ṭap ve hawm hawm a, ka lainat lutuk ringawt. A ṭap hmêlte lah chuan engtin emaw riau hian min fan a, lainatna mai chu a ni hauh lovin ka hria. Kha chen kan lo inbe ve tawh a, ka ngaihtuahna a lo la pêng in ka lo ngaina ve takzet tawh pawh a ni mahna. Ka Nu in chanchin hrilh ve tura min chah avangin whatsapp message kaltlang chuan ruang a lo thlen tawh thû leh a boral dân kimchang zawk an sawite chu ka va hrilh ve a. "An lainatawm reuh emai, ṭawngṭaipui an ngai nasa khawp ang. I nau kha ngaihven deuh la aw...nangni pawh fimkhur rawh u" rawn ti lêt nghal in accident a hlauhawm thû te chu a rawn sawi zui luam a. Heihi chu Nu te dân a ni a, ka ngai neih tawh.
Ruang a lo thleng ta bawk a, kan zai zui ta tluk tluk a. Nunhlimi chu a ṭap bâng thei mawlh lo a ni e, a unau dangte chuan kuah in an hnêm mawlh mawlh reng a, mahse anni pawh an ṭap fur hlawm mai. An monu Akimi pawh a ṭap rawng rawng a, Nunhlimi pianpui unau dangte pawh an lo thleng chawpchilh nghal a. Mipa rual an ni bawk a, an insum thei khawp mai. An nupuite erawh an rawn ṭap lût nghal tawng rawng a. Inhnem tur chuang bîk pawh an awm lo a ni ber e. An inchhung chu zai ri leh ṭap ri in a khat a, thâwk a pik ve ṭun thei. Heti hian zaninah kan lumen ang a, naktukah kan vui liam dâwn a ni.
Zanlai sawhchiar kan ei zawh hnu aṭanga rei vak lovah Kimtei chu a rawn kal a. A hmêl lan dân aṭang chuan a sawi tur ka hrethiam ruak mai. Ka rin ang ngeiin a mut a chhuah thû leh haw mai a duh thû a rawn sawi a. Ṭhian dangte bulah chuan sawiin "Ka nau ka va thlah lawk ang a, ka lo lêt leh ang" ka ti a. Kan kal hma in Nunhlimi chu ka va en leh hram a, a Nu ruang chu kuah in a mittui a la sur zung zung mai.
Tawi khawmuang tawh lovin Kimtei nen chuan kan inzui chhuak ta nghal a. Haw kawngtluanin thil dang a ngaihtuah thei lo. A châng leh an chan chu kan chanah a dah a, "Ka ngaihtuah thui ngam lo" a ti leh hliai ṭhin a, a vei zui hle ni ngei tur a ni. In thleng ka thlah hnu chuan ka lêt leh nghal a. Ka ṭhutna ngai kha a lo la ãwl hlauh a, ka va ṭhu leh a. Dár 2 tlâng a ri tawh a, ṭhalai rual kan zai dap dap a, chau hmêl rêng kan la pu hlawm lo. Tunlai ṭhalai te hi chuan men kan thei tlâng tawh a, tlaivar pawh thil harsa a ni hran lo. Nunhlimi rualpawl thiam tak anih vang nge ni tlaivar chu kan ṭhahnem fú mai a. Kan kal chhan ber chu duhawm tak ni lĕm lo mah se hetiang huna Mizo tlawmngaihna lo lang chhuak ṭhin hmuh hi nuam ka ti a, a ngaihṭhat thlak ṭhin.
Nunhlimi chu a ṭap tlaivar ṭhak a tih theih ang! Ruang chu vawikhat mah a kalsan lo va, a mittui a sur zung zung reng a. A phun leh sep sep ṭhin bawk a, ka kawchhung a fan rawih rawih mai. Ka lainat bawk si, tih theih lah ka nei der si lo. A chau viau in ka ring. Kan zai chawlh lai chuan kan titi veleh zeuh ṭhin a. A hrechiang deuhte chuan Nunhlimi te nufa inlaichinna te chu an sawi melh melh reng a. Msa chuan "Chawhnu inkhawm bàn khan an nufa chungchang ringawt mai kha kan sawi a, min ãi ve deuh emawni ka ti hial mai. Hetiang thil hi a thleng zui leh ta mai si a" a ti a. Kan titi te kha ka ngaihtuah lêt a, Nunhlimi te nufa inlaichinna ṭhat zia mawlh mai kha kan sawi anih kha! A tawrh dân tur chu ka ngaihtuah phâk bâk hi a ni ngei ang. A ṭap bâng thei lo rêng bawk a.
Zing dár 5:30 velah kan lumen pawh chu kan ṭin ta hlawm a. Ka va haw chuan ka Nu a lo tho leh der tawh, chanchin min zawh ang angte chu ka chhâng ve zung zung a. A lainat thû a sawi leh hliai ṭhin a, "I office dâwn nge i kal leh ang?" min tih chuan inngaihtuah buai eih lovin ka kal leh tur thû ka sawi a. Min lo pawmpui khawp mai. Reilotê ka muhil ve zuai a, dár 10 velah chuan ka Nu in min rawn kaitho leh a "I kal leh dâwn chuan kal a hun leh tawh viau ania. I pa leh Kimtei pawh an kal tawh" a ti a. Thawh phan awm lêm lovin ka tho chhuak nghal a, ka inbual sawk sawk a, châw ka ei zui nghal zat bawk a. Rin ai takin ka harh ṭha pangngai a, mahse rilruah Nunhlimi erawh a awm ve reng thung. Ka message kha a la hmù ta miah lo va, phone khawih thei dinhmunah a ding lo ve êm a ni.
Ka Nu nen chuan kan va inzui phei veleh a, kan thlen phei aṭanga rei vak lovah thlãn lai turin ka chhuak zui veleh nghal a. Mipa nih chuan thlãn laih te hi kan tih tur a ni a. Tunlaiah tlawmngaihna tur hranpa takin a awm em em tawh lo va, thlãn laih hi kan tlawmngaihna kan tih lan theihna pawimawh ber a ni hial àwm e. Thlãn laih lai te chuan rual û zawkte'n fiamthu thawh in kan nui leh huk ṭhin a. Mahse ka ngaihtuahna kil khatah chuan Nunhlimi a awm reng a, ka va lan leh zuai pawh khan a la ṭap reng a. A Nu ruang a lo la kuah reng kha ania. Ka rilru a ti ipik vek thei hial a ni.
Chawhnu dár khat velah chuan an rawn in vui liam fel ta a. Nunhlimi ṭap rawng rawng ri chuan ka thinlung a lo ti nâ. Thlanmualah kan in vui liam zo a, mahse a kalsawn thei lawk lo "Nu..." tiin a ṭap rawng rawng a. Thlãn chhunga a Nu kuang awm chu a zuk bih ṭawk ṭawk a. Midangho chuan lo kuahbetin an ṭah pui leh hawm hawm bawk a. Ka lainat tih piahlam a ni e.
Nu Chámi kan vui liam aṭangin kar khat a liam ta! Nunhlimi a reh zui vang vang a, phone-ah min lo be tawh ngai lo va. Ka message pawh kha tun thlengin a awm ang ang khan a la awm. Khawhar in in lên pui chhung zawngin ka va lang ve ziah a. Heti taka kan chhungte hnai vai ni lo chhiat tâwk ngaihven hi ka la nei ngai lo. Va kal ve ziah ta chu Nunhlimi pawh ka hmù ve fo a, nui hmêl put a la harsa ani mahna, a nui hmêl ka hmù ngai lo. A nî te ho bulah a tap chawt ṭhin a, han biakna hun pawh ka nei lo anih ber chu!
A Nu thih aṭanga kar hnih a liam hma hret chuan ka message chu min lo chhâng lêt ve ta hram a. Min rawn chhâng lêt tih lĕm ah, love var hian a rawn react a. Ka inring hman lo, a phone number-ah chuan dial-in ka va call ringawt pek a! A ring rei lo, a lo la nghal vat a. "Hello" a rawn ti sep a. "I ṭha em?" ka ti nghal tawng a, "Ṭha lutuk" a rawn ti zâng vah reuh a. Ka beisei ai daihin a âw chu a pangngai tlat. "I Nu chu a zialo hle mai tiraw...mahse Pathianin a thlamuan ngei ang che u" ka ti veleh a. Engvanga call ta thut nge ka nih pawh ka hre mai lo. Ka message a hmuh tâk ah khan ka ngaihven nghal hlut ni berin ka hria.
Ka thiam ang tâwk chuan ka hnêm ve mawlh mawlh a, pangngai taka min chhang in "Nia..." a lo ti ve zel a. A dawnsawn thiam hmêl fú mai. Kan inbiak tâwp dâwn lamah chuan amah zawk chuan "Lei hrehawm ah a awm tawh lo va, vanramah nuam deuhin a awm tawh tih ka hria alawm. Thihna hi chu kan la tawh vek tur tho ania, a kal hmasa apiang te hi an nihlawh a ni mai" a rawn ti reuh a. A ngaihdan chu puitling ka tiin a rîk ang huat huat hi chu a lo ni bîk hauh lo tih ka hre chhawm nghal mai e. "Lei hrehawm te i ti ve a, nuam i ti viau emaw ka tia" tiin ka fiam zui ta daih a. Kan boruak tih zângkhai ka tum vang a ni pakhat. Nunhlimi chu a rawn nui ta hak hak a, "Khawvel te chu a nuam ve e, Kristian nih avanga kulmuk reng tur tihna pawh a ni lova. Mahni hlimna in thlen thiam poh leh kan tán bawk ania. Leiah hian vanram nun kan tem lâwk tihna a ni mai" a rawn ti veleh zung zung a.
"Thih hi i hlau àwm, khawvel nuam i ti bawk si" tiin ka lo fiam leh pek a, a rawn nui nasa mai. "Thi thut dâwn pawh ni ila ka inpeih reng, mahse khawvel hi chu nuam ka ti tho tho. Eng helh nei lêm lo hian awm ila, khawvel chu a nuam a ni mai. Lungngaihna tur tam tak kara hlimna tur tam si zia te hi. Kei chu ka vanneih a, ka hlim thei zel mai" a rawn ti leh bawrh bawrh a. A rilru ipik tih ziaawm tuma fiam zuk zuk ka ni na in amah zawk chuan min ti hahdam ta daih mai. A Nu thihna vang khan a na lo tihna a ni lo va, mahse kan Lalnunhlimi nge nge chu, Lalnunhlimi a lo la ni reng e. Nun awhawm tak a nei niin ka hria.
Darkar chanve vêl zet kan inbia a, mak tak maiin sawi tur kan hre dûn ngang mai a. "I chau ang, mu hahdam tawh rawh" ka tih chuan "Ka chau ve ngai lo" a rawn ti sam thên a. "Nangmah zawk kha naktuk hnathawh i ngai àwm si a, mu tawh rawh. Min rawn ngaihven a, ka lawm lutuk e. A sarhu lai kha chuan hrehawm ti viau mah ila tunah chuan ka ṭha tawh lutuk ania" a rawn ti leh zung zung a. Min ti hahdam huai huai mai. Ui ru tak chungin kan in mangṭha ta a. Ka awmdan hi ka hrethiam lo, ka ngaihven ru riau anih chu! Kha chen kan lo inbiak ve tawh vangah khan ka ngai mai a. Ka ngaihzawn vang chu a ni thei lo vang.
Pangngai takin kan nung chho ve mawp mawp a, Nunhlimi nen chuan kan inbe leh tawh lem lo. Va biak tumna em em nei lo mah ila engtin emaw riau hian a ngaihawm a, mak tak maiin ka lo ngaihtuah leh veng veng ṭhin. A hmaa kan lo inbiak ṭhinna te khan ka rilru a lo la pêng hneh hman hlê aniang. Ka hna ah ka buai chho leh mawlh mawlh a, office lamah hnathawh tur a tam bawk nen phone pawh ka chelek lo khawp mai. In lamah lah nise Computer hma ah ṭhu in hna ka thawk leh mawlh mawlh zel a. Kan hna a kan buai zual lai ber kan tawng chho a ni hawt e.
Tlai khat ka office bâng ka haw tur phone ka en chiah chu Helen-i missed call a lo tam ngang mai a. Kan inbiak tawpna ber kha ka hrechhuak chawpchilh nghal zat bawk. Boruak dangin min chiah hneh ta lutuk a, ka lo buaipui zui leh ta miah lo kha ania. Tin, mak ka tih deuh chu amah pawh hian min rawn be leh ta miah lo va, a reh zui ta daih kha ania. Ka ngaihtuahna ah a lo awm tawh lo hrim hrim a, a missed call ka hmuh chuan ka hre chhuak leh chiah a ni. Call back lem lovin ka phone chu ka ak ṭha a, in lam panin ka inkhalh haw zui ta daih a. Hna a kan buai lai tak a ni bawk nen ani ngaihsakna hun hi ka nei rih tlat lo a ni. Mahse zana ka mut dâwn chuan message min lo hnutchhiah chu ka hmù a, zan tir lam ami daih a ni. "I buai àwm hle mai, inhmuh te kha kan sawi si a, engmah kan sawi zui leh ta si lo. Hluzual, mipa dik takah ka ngai che a, chuvanga i laka insawifiah tum tlat pawh hi ka ni. Ka thusawi duhte hi khawngaih takin min ngaihthlak sak ve rawh. I rin ang kha thil thlen dân a ni vek bîk lo ania. I rin dân kha kal thui pui lutuk suh. Ka thusawi ngaihthlak pawh i remti vek tawh a, i sut loh hram ka beisei" a rawn ti duah a, min cho chhuah a tum ni berin ka hria.
A message chu chhâng ta mai lo chuan ka chhiar nawn sek a, henu hi engtia tih chî nge pawh ka hrethiam tawh lo. Engpawh nise a sawi ang khan inhmuh ka lo remti tawh a, kan inhmu ngei tur a ni. Mahse eng thû pawh lo sawiin insawifiah eng ang mah sela ka rilru a sáwi danglam thei tawh chuang lo vang. Chhân lêt ka tum lai mêk chuan min rawn call leh a, ka lâk rual chuan "Naktuk i hman ang tiraw?" a rawn ti nghal thawr a. Office lamah buai viau mah se chinfel vat ka duh avangin "Hun ka lo insiam ang" ka ti ve ta nge nge a. "Tunlai i va buai àwm ve a, ka call pawh i pick up thei lo va. Mahse nikumah pawh hian tun ang hunah khan in buai ṭhin sia, ka lo hrethiam hlauh zawk a" tiin a rawn nui zui har har a. Kan hun kal tawh a rawn sawi ngam zawkte chu mak ka ti. Ka lung a ti lêng pha eih si lo, ka thin a tirim leh ṭep tawh zawk a ni. Ka Nu min fuihna te kha hre reng lo phei ila chu tunah pawh hian ka be lo vang.
"Hna ka thawk laklawh a, naktuk hun chu rawn siam rem la, hun ka lo insiam dâwn ania" tiin kan inbiakna chu ka ti tawp zui nghal daih a. Hetiang taka mipa tawhkhirh leh sual, tihmawh leh luhlul ka ni tih hi ka lo la inhre ngai miah lo va. Mahse tun hnu hian ka inhre thar nasa khawp mai. Tih tawh loh chin chu ti lo ve tak, lemchan kual vêl peih lo ang tawp hi ka ni ve a. A ṭhatna leh ṭhat lohna phei chu ka hrethiam chiah lo. Mahse Helen-i chungchang ah kher hi chuan nèm ka tum lo a ni tawp mai.
Thawh ka hai khàt tehlul nen zingah chuan thawh ka hai ve teh khiah a, nizan lamah hna ka thawk rei deuh a, ka lo mutui leh mah mah a ni. Ka Nu in tukṭhuan ei dâwn ah min rawn kai tho chauh a, "Office lam hna hi chu in lamah chuan khawih tam tawh suh. Zanah in mengrei a, in tho tlai leh a, a buaithlak. I hriselna atân pawh a ṭha lo, taksa hian hahdam te hi a mamawh ve ania. Nitin office in kal a, in lamah lehzel pawh hna i thawh zawm a, hun ãwl insiam tam ve deuh rawh" a ti zui barh barh a. Tunlai bîk tê hi hna ka thawk nasa bawk nen hahdam ve deuh turin min ti fo a. Min ngaihtuah luatah min hau titih a sawi ṭum pawh a nei hial ṭhin. Min ngaihtuahtu Nu ka la nei hlauh hi a lawmawm lamah ka ngai zel mai, mahse ka hnathawh chungchangah kher chuan a thû hi ka zawm hlei thei lo a ni.
Office ka thlen hnù chuan hna ka ṭan tak tak hma in ka phone chu ka check veleh zuai a, Helen-i message a lo awm leh tawh. Vawiina kan inhmuh dân tur a rawn sawi dâwn tih ka hriat avangin ka hawng a, "In chhun chawlh hun àwm velah in office bula restaurant-ah khan ka lo nghak ang che" a rawn ti a. Chhan pawh chhang lohin a message chu kutzungpui in ka react ringawt a. Kan chhun chawlh hun inti hre taka a rawn sawi kher te chu ka duh vak lo. Kan nunhlui hmanga min biak lunglên a lo tum vêl te anih chuan sim nghal sela a ṭha ang. Engti kawng zawng mahin ka rilru hi a lêt tawh dâwn si lo va. Vawiina ka hmuh chhan tur pawh hi a tawp nan, a beidawn nan a ni.
Ka phone chu en rei tawh lovin hna ka thawk zui ta mawlh mawlh a, ka buai bawk nen chhun dár 12 chu a ri har lo khawp mai. Ka thiltih lai chu a awm dân ang anga dah tawpin Helen-i hmù tur chuan ka chhuak ta nghal a. Ka va thlen chuan a lo awm vâng tawh mai, a kut rawn vaiin min lo nuih var var a. Ka hmelah danglamna awm tir eih lovin ka va pan ve mai bawk a. "Ka rin aiin i lo chhuak hma a, dár 1 rîk dâwn ah i lo thlen leh ka ring a" lo ti nghal bawrh bawrh a. Kan hun kal tawh bawk a rawn sawi leh ta, min hrechiang lutuk anga a ṭawng te chu ka ngai thei dêr lo. "I sawi duh chu sawi la, hun i ngah lo" ngainat awm lo zet hian ka lo ti hmuk a, ka sana chu ka bih zeuh bawk a. Darkar khat dâwn chu hun a la awm a, mahse a bulah hian ka awm rei peih lo.
Helen-i chuan min melh ta kal a, "Hluzual, i danglam chak zia hi i inhria em? A hmaa ka hriat ṭhin kha i ang tawhlo" a lo ti sep a, a beidawng hmêl ka hmù ve ta nge nge e. Tin, a thusawi hi ka pawm thlap bawk, kei ngei pawhin danglam ka inti. Mahse hetianga awm tur hian min siam a, ka thiam lohna ka hre bîk lo. "Chuan..." ngeiawm deuh hian ka lo ti duh lêk chauh a, tunah tak hi chuan beidawng tâwp a siam bâk ka rilru ah a lang tawh lo. Helen-i chu a lo thaw chhuak halh a, "Tuna min melh dân te, i awm dân te, engkim khan i rilru a ti lang chiang vek alawm. Tunah hi chuan eng thû pawh sawi ila min awih sak lo vang. Ngaihdan i siam fel vek tawh tih a chiang reng alawm" ṭap âw ṭiau hian a lo ti zung zung a. "I hre dik chiah anih chu" ka lo ti hmak mai. Hmeichhe âwm nêm zawkte mittui ti tla tu nih hi ka duh bîk lo va, an rilru tina tu nih lah ka duh hek lo. Mahse Helen-i hi chuan a cho chhuak tlat a ni. A mitmeng buai nak aṭang chuan a beisei loh deuhin ka chhâng tih ka hrethiam mai e.
"Ka lo hrechiang hle che emaw ka ti a, mahse mipa nunrawng tak i ni tih hi tunah ka hre chiah" thîp zeta min melh chung hian a rawn ti leh a, ka lo nui hawk mai. A mitmeng inthlak danglam chak lutuk te leh a awki a thlak danglam hnehsawh lutuk te chu mak ka ti hial zawk. "Keipaw'n ka lo hrechiang che emaw ka ti ṭhin a" awmze nei zet hian ka ti ve sup a, ka ner nawk bawk a. A meng buai deuh nak mai, mahse a rei lo, thîp zet hian min melh zui leh nghal a. Hmeichhe khin lêt ur ur chu ka duh miah lo va, mahse a ṭul anih chuan ka duhzawng te chu ka sawi ve bawk ang chu.
"U Hluzual" ngenngawl zeta rawn tichhuak leh hapin ka kut chu rawn chelh a tum a, ka lo la sawn nghal vat thung a. "Tikhan sawi rawh" ka ti leh hmak mai, a hmêl hmuh pawh ka duh tawh loh laia a taksa sik leh phei chu ka duh eih lo. "Khami nî a thil thleng kha i hmuh dân kha a ni vek lo asin. Kima khan min khawih lui alawm, ka duh lo chung min sual lui a. Ka Nu te awm loh kha remchângah la in a lo kal a, kei ka lo dam ṭha lo bawk nen khatianga min rawn sual khan ka lo bei lêt thei lo va. Khami zan khan ka damlo tih pawh i hriat vek kha, remchângah a la alawm. Min rawn hmuh chiah khan ka thlà a lo muang huai zawk asin. Mahse nang chuan ngaih loh lamah ngaiin i thinrim luatah min puh chhe ta zawk a. Ka rilru nat zia kha, a tirah phei chuan ka nunna lâk ka tum hial a. Mahse ka intichak lui hram hram a, chân che hi ka duh lo. Chuvanga min hnuchhawn hnu pawha rawn umzui zel che hi ka nia sin" a ti duah a. A thusawi chu rinna pakhatmah ka nei miah lo nia mawle! Rin chhan tur ka nei lo bawk.
A ṭawng leh dâwn lai mêk chuan "Ka rawn hmuh chin chauh aṭanga ngaihdan siam ka ni hlei nem. Ka rawn hmuh hmâ che u khan in thâwm ka hre vek, phatna tur dangte i la nei em?" lo tih khalh in ka nui ro hawk a. A meng buai nasa a, a pha nghal dui bawk a. Mahse lemchan lamah hian a lo bawn viau aniang khawngaih thlala hmêl a pu leh nghal tawh. A thusawi leh tur chu ka lo ngaichâng ran a, phatna tur chu a vâng ve tawh khawp ang. "Sawi zel rawh" ngeiawm zet hian ka lo ti leh kher a, "In ṭe thâwm kha a ngaihnawm viau loh, kawngkhar tal kalh nachang kha lo hria ula ṭha tur ania. Mahse min bum rei loh phah ta zawk a, ka tán chuan vanneihna a ni lawi si" ka ti leh a. Sawi tur a hre tawh lo aniang a ngawi ta reng a. A vawikhat nan hrehawm ti hmel tak tak a pu ve ta in ka hria.
Chutia a ngawih tâk rengah chuan hun ka khawhral mai mai niin ka hre ta a. "Office lamah ka'n lêt leh tawh ang e, pangngai takin i nun i hmang chho dâwn ania" tiin ka thawhsan ta daih a. Ka chêt dân chu nunrawng ka ti hnuhnawh viau na in a lak aṭanga inthiarfihlimna tur awmchhun ni ah ka ngai bawk si a, pawi ka ti viau duh ta lo law law mai.
Office bàn veleh haw tlang mai ka tum laiin ka Nu in min rawn call a, Bazarah a thil chah a lo thleng a, chu chu lam kawi nghal turin min rawn ti a. "A ho leh àwm si" ka tih ri chu a lo hre pha aniang, "A ho lo, inchhung cheimawina tur alawm. Inchhung a mawi chuan kan lang zahawm a, in lêng neihte pawhin mahni inrintawk a awl bîk alawm. Kan lan mawina vek tur anih hi" a rawn ti duah a. Ka thusawi a lo hre pha kher kher chu pawi ka ti tak tak ani. A thil chah pawimawh zia chu a rawn sawi zui luam a. "Aw ka lo hawn ang" uar deuha ka tih tâk charhah chuan a duh tâwk ve ta hram e. Ṭawng sual zawng zawngah Nu te bula ṭawng sual hi a pawi ta berin ka hria. Min zilh zuina tur lah hi an hre thei si, an bulah chuan thusawi tur pawhin uluk taka inngaihtuah fe hi a ṭha ber ang.
Ka Nu thil min chah pawh chu ka lam kawi ta ngei a, polythene lian ṭha tâwk tak hi a lo nia. Mahse a len ang hu in a rit lo, a zàng zek mai a, eng tak chu ni ang maw? In ka thlen veleh ka Nu chu pêk pahin ka zawt ta nghal a. A lo nghakhlel ngang aniang, a hawng nghal sawk sawk a. "Krismas huna kan in cheina tur anih hi" a ti a. Puan sen, a hringa râng, krismas rawng kan tih ṭhin ang mai kha rawn la chhuakin Krismas Tree cheina thil neuh neuh te chu a rawn la chhuak ta zung zung a. Krismas rim pawh a la nam ṭan ík si lo va, a inbuatsaih hma ka lo ti khawp mai. Room aṭanga Kimtei rawn chhuak pawh chuan "Awi i va han che advance tak " a rawn ti hluai a. Ka Nu lah chuan "An discount lai ania, Krismas dâwn hnaih tak tak ah te chuan a to leh vek dâwn a. A tlâwm laia lo lei hi a fin thlak, sum leh pai senso a tlêm zawk bâk ah a dâwn hnaiha buai chûk chûk a ngai lo bawk a" a lo ti zung zung a. Nu te berin an sawi hi chu a lo dik leh thliam zel. Mahse Kimtei chuan chhaih kawlh a châk a ni chêk ang chu "Krismas thlen hma hawtin kan lo hnê hman vek dâwn anih hi" a lo ti zeuh pek a. Ka Nu chuan a sermon khum zui chiam mai. Nui suk suk chungin room-ah ka luhsan ta daih a. Hmeichhia leh hmeichhia an ni bawk a, an inkhing tawk ṭhin khawp mai.
Zanah chuan computer ṭhut chilh in hna ka khawih zawm leh mawlh mawlh a, ka duh tâwk tawh dâwn lamah ka phone a rawn ri a, number hlang aṭangin a ni. Thil pawimawh anih ring in ka lo pick up vat a, mahse Helen-i ṭap ri ka hre zui nghal zat mai. Ngaihdam min rawn dil mawlh mawlh in a ṭap pur mai a, "Dik tak chuan khatianga khawsak kha ka tum miah lo, mahse ka hun tawn in a zir êm a ni. Min ngaidam rawh, ka theihnghilh thei lo che, chân che ka duh lo, bul ṭan ṭha leh ang" a rawn ti nawk nawk a. A harhfim lo tlatin ka hre lehnghal, a rawn ṭawng nawk nawk a. A thusawi te chu hriat pawh ka hre ṭha thei hlawm lo. "Helen i ṭha em?" ka ti ve ta nge nge a, mahse ka zawhna pawh chu a chhâng lo. Ngaihdam min dil mawlh mawlh a, a ṭap rawng rawng bawk a, a harhfim lo takzet in ka hria. Thil ri rawk rawk thâwm chu ka hre zui a, kan inbiakna chu a rawn ti tawp zui ta daih a. A hrilhai thlâk duh kher mai.
Ka ngaih a ṭhat chiah loh avangin ka call back ta tawp a. Rei fê a ring hnu ah hmeichhe pakhat hian lo la in Helen-i chu a ruih lutuk thû a rawn sawi ta mai! Zu a in ngai àwm ka hre bawk si lo, "Zanin chu a rui deuh hlek a, zan dangah hetiang em em hian a awm ngai lo asin le" lehlam ami chuan a rawn ti mawlh mawlh a. A vawikhat tihna chu a nih hmel loh tawp mai. "Min lo hrethiam rawh aw, a rui lungpuamin a lo call che anih kha" ti leh zung zung in kan inbiakna chu a ti tawp zui daih a. Helen-i awmdan chuan min ṭhawng zual kher mai, vawiina ka ṭawngkam hman te ka ngaihtuah lêt a. Ka ti mah mah deuh em aw? tihna chen chu ka nei veleh deuh.
Rilru nuam zan lo chuan mu turin ka intintuah ta nghal a. Ka fel e, ka ṭha e ka tihna lam ni miah lovin ṭawngkam eng emaw taka midang ka ṭawngkhum hian a hnu ah min ṭhîng lêt ziah a, ka awm a nuam lo zui ziah. Chutiang chiah chuan vawiin Helen-i ka ṭawngkhum dân te pawh khan awm nuam lovin min siam zui a. Khatiang khan min lo call kher lo sela chu ngaihtuah zui nachang pawh ka hre kher lo vang. Mahse a lo rui lehzel tih ka hriatna chuan inthiam lohna min neih tir ta tlat a. Keimah vang chu ka ti duh bîk miah lo na in a nihna chen a awm ve thei tlat a ni. Muhil thei lova ka inleh tâk sekah chuan ka phone chu ka ban leh ta nge nge a, ka beisei loh thil ka hmù ta tlat mai.
Whatsapp-a ka luh chuan Nunhlimi message a lo awm vang mai a. Inngaihtuah buai eih lovin ka en nghal zat a. Mahse a thu rawn sawi chuan min ti bangbo khawp mai. "Bialnu i la nei reng sia, tinge dawt min hrilh?" a rawn ti a. A message chu ka chhiar nawn a, ka ngaihtuah ṭhin a, eng a sawi tumna nge ka hre hauh lo mai. "Eng nge i sawi awmzia?" ka va ti ta ngei a. Min rawn chhanglet rang khawp mai. "Vawiin ah khan i bialnu Helen-i nen in inhmuh kha aw" a rawn ti hlawl mai. Ka man thiam ta chiah e, mahse engtin nge a hriat? Hmeichhe dang nen ti satliah se chu ka hrethiam deuh ang a. Helen-i a rawn hre chat mai chu mak ka ti. A hmaa kan ina Helen-i a lo kal ṭum pawh khan a lo hre ngei a, mahse amah a hre miah lo kha ania. Tin, ka bialnu hlui a ni tih pawh a hre tawp si lo. Min rawn zawh khan "Helen-i" tih ringawt in ka chhâng ta kha ania. "Bialnu nei reng chungin nei lo angin i lo insawi a, vawikhat mai ni lo, ka zawh chiam hnu ah che pawh nei lo angin i la insawi zel a. I lo mak khawp mai, U Hluzual " a rawn ti leh zung zung a. Eng rilru pu a ka bialnu neih leh neih lohah chuan lo buai viau nge anih ka hre lo. Mahse ka rilruah thil dang a rawn lût zawk a, a rilru tihbuai ka châk tlat pek anih chu!
"I thîk chiang" ka va ti a, a hmù har lo, mahse chhanna ka hmù ta tlat lo. A reh zui ta vang vang a. Tihbuai châkna in ka la khat tlat a, "I thîk chuan sawi ṭha ve mai la" ka va ti leh kher a, keimah chuan ka khi suk suk mai. He nau awm dân hi ka hrethiam ta deuhin ka hria. Min ngaizâwng tlata hriatna ka nei. Mipa chuan hetiang hriat theihna riau hi kan nei ve tlat ṭhin a. Chu chu Nunhlimi ah hian ka hmù a, ka hre tlat. Chuti chu lo nise min lo biak reng chhan tur hi a awm bîk lovin ka hria. Ka lo ngaihtuah lai mêk chuan min rawn chhâng lêt a, "Mipa lerh hi ka ngaina lo che u" a lo ti hmak mai. Ka nui chhuak hawk a, ka rilru a chhaih châkna awm hi ka thunun thei tlat lo.
"Thîk duh suh, ka bialnu a ni miah lo ania" ka va ti a, engtin tin emaw a rawn inpuan theih mai ka rin vang ani. Mahse Nunhlimi chuan "Chutiang ah ka buai lo" a rawn ti leh lawi a, "I thîk anih kha" ka va ti leh hram a. A reh vang vang hnu chuan "I lerh" tih tê mai hian min rawn chhâng anih chu! Kan in dâwp chhuak dâwn lo anih hmêl. Mak deuh maiin engtin emaw riau hian Nunhlimi chuan min tihlim ru riau a, ka chhaih châk a, biak zui ka châk a, engtin emaw riau a bawhzui ka châk tlat pek anih chu!
"Tunlai i va reh ve" ka va ti ta daih a, biak zui ka duh vang a ni. "Tunah pawh ka reh lehnghal dâwn" a rawn ti a, a mut hman hlau lutukin ka chhang lêt vat a. "Ngaihawm deuha awm i tum ve deuh em ni?" ka va tih leh chuan "Min ngaih vang mai mai anih chu" a rawn ti khauh mai. He nau tê hian mi chhan dân a hre riau, amah hi chuan a zeihawi tih a inhre lo mai thei. Mahse a biak mêk hian ka man pha tlat, läwm lohin ka nui leh vur vur a. A chhan lêt dân tura buai lo zawk tur ka nih laiin ka buai a, "I ngaihawm ve reng" ka va ti ta nge nge a. Mahse min seen zone hmak anih chu, va biak zui leh ka tum ut ut a, message pawh ka type leh ngei a. Mahse ka thawn ta lo law law mai, a àwm tâwk a awm ve ka ti tlat a. A laka rilru ṭha lo ka put vang ni hauh lovin Lalnunhlimi ka chhaih buai dâwn khawp mai. Min chawk phûr pha tlat.
_________*_________*_________*_________
(He thawnthu hian in duh thû a sam kher lo mai thei a, mahse min lo chhiar sak avangin ka lâwm. In ngaihdan te lo sawi veleh liam liam ula aw. Chapter dawt leh aṭang chuan kan dawk chhuak deuh zawt zawt tawh ang. In beisei anga ka regular thei lo erawh pawi ka ti, mahse ka ti beidawng miah lo vang che u
)Show post links
Top