OBEDA BY Natasha Hrahsel (Completed)

[ngaia]

*OBEDA* CH-4





Zankhua in room ah a rawn lut leh tawhlo a,room dangah a riak te pawh ani mahna.Rawngbawl tura ka tho chhuah hnu ah erawh a lut ve leh ani mahna insiam peih sa at in inhnuai a rawn chhuk thla ve leh hlawl tho.Ka be lo a,ani erawh in min biak a tum leh uk uk thin tih min melh leh zeuh zeuh thin dân ah ka hre thung.

Tukthuan ka siam a,midang bulah chuan U Obeda nena kan inkar buaina thil chu tihlan ka duh bik lem chuanglo.Pa Hruaia ngat phei chu Cancer treatment la lai ani a,rilru hah na anei thianglo.




Tukthuan kan eikham chuan thleng ka sil nghal zung zung a,Judy hian thleng sengin kei in ka sil thin thung.


Nu Mapuii hian lo tih ve phet hi a tum thin a,tukin pawh thleng min sil chhawk a tum leh ngat ngat tawh.Nu ber ani a,fanu leh mo anei tawh bawk a thlengsil lam chu a tih ah pawh amawi tawhlo.





"Kimte,kalo nghak che" U Obeda chuan a rawn ti dut a.
Hawilet lemlo hian "nghah ka ngailo,vawin chu kalpui tur ka nei" ka ti deuh nghut.Ka nu leh pa te an awm hnai tawh lo a,biak that vak ka la châk hrihlo.





A kalsawn ve mai dawn emaw tih laiin ka thlengsil zo kan hawi let chu choka biangah alo la ding reng!

"Nghah ka ngailo ka tih kha" ka ti leh deuh nghat a,"ila thinrim reng a? I rilru dam nan enge maw ka tih dawn ni?"a ti dam thlup.





A thusawi chu ngaipawimawh duhlo in "pen kawi na tur ka nei,U Joshua ka inhruaitir dawn min kalsan rawh"ka ti ta zawk.Penkawi na tur ka neih em em pawh ka hrelo a,mahse ani nena motor chuandun ka duh hrihlo hi ani tawp.Ka thinrim zual anga,midang zah tur an awm tawh dawn der silo nen kan buaina a punlun zawk mai mai ang tih ahlauhawm.





"Tlaiah kan inbe dawn nia"ti supin akalsawn ve ta nge nge a,ka thawchhuak ta ham ham.Ka lo ip nasa hle mai!





Insiam tumin inchunglam ah ka chho a,Judy kawngkhar inhawng huau atang âng hlak hlak thawm alo chhuah chuan ka ding leh renrawn phawt.
"Judy, zawn inei em ni?" A room kawngka ah dakin ka ti a,a in hai hnawk nasa ngang mai.





"Uii U Matei, lo kal teh.Nimin piah lawka ka perfume lei thar kha ka dahna ka hrelo pek anih hi" ti hlakin amah leh amah chu a insawh tau nghawng nghawng.
"I dahna thin ho i enkual em?"ka ti a,a enkual vek tawh chu ka ring.




"Enkual vek tawh e,hei ka darthlalang hma ah hian ka dah mai emaw ka tia mahse a awm silo a! Ka zawngkual nasa tawh lutuk ka rawn hawn ngei tih ka chiang a,achhan pawh ka nu kha ka kâp chhin vel a" a tih chuan han zawn pui ngaihna vak pawh chu ka hrelo.

A darthlalang hma ah chuan perfume bottle dangdai zet zet hi a inhung far a,a lei thar nilo se abo tih a hre nghal maiin ka ringlo.Chutiang khawp chuan angah.





"I tlai ange,tlai lamah kan zawng dun leh dawn nia insiam phawt la"ka ti ta daih a,bathrobe nen ala ni rup a,hetiang chuan a tlai thei tak tak ang.






"Nimai,khawiah tak nge maw ka dah ni? E, eng kawr nge ka hak ang?" A ti zui ta daih a,a thawmhnaw hak tur te chu kan thlang dun leh ang lawp lawp a.

Judy hian Vitiligo natna anei ka tih tawh kha,vun natna chikhat niin a vun hian rawng hnih anei ka ti mai,a then lai chu a var vuk a,a thenlai erawh a uk sen deuh kharh bawk a.Chutiang anih vang chuan a taksa lang tam thawmhnaw a inbel khat viau a,kawr bantlawn leh kekawr tluan deuh hlir a inbel thin ani.






Insiam tura room ka luh ve leh meuh chuan alo tlai duai tawh a,ka rilru ah U Sawma te ina kal lang thutin hmanhmawh chuk chuk lo chuan ka insiam ta zawk.
Naupang ho an sport dawn a,chawhnu lam class kan la lo ang.vawin tak hi chawhnu lamah chauh class ka nei dawn nen chawl pawh ni ilang apawi hran lo tur ah ka ngai.






In atang chuan hna kal tur angin ka chhuak ta tho a,taxi stand lam panin kal pah chuan kan principal hnenah ka kal theih loh tur thu ka hrilh pah a,minlo hrethiam khawp mai.
Kan principal hi hmeithai ani a,a fapa nen kan school thlang lawkah hian an awm nghe nghe.A nun thin dan an han sawi tak tak hnuah kei ngei pawh hian ka ngaisangin ka zah khawp.A pasal in aboral hnu ah a fapa a hmeithai pui a,nau pawm chungin a zirna a zawm zel bawk a,a chhungte puihna tel miahlo in Aizawl a school tha ber pawl a rawn din rup bawk! Mi mai mai chu anilo ve chiang khawp mai.






Taxi chuan Ramhlun a ka û te inluahna lam ka pan a,ka û a awmdawn lo tih hre mah ila ka biak duh zawk tak U Zawni a awm dawn a,ani hi rilru hahna deuh ka neih ve chuan ka thlenna ber ani.Û deuh zawk mahse U Thanpuia nupui aiin ka ngaina zawk riau a,ka hma alo ngaih ve em em vang te pawh ani mahna.





Inchhung ka lut chu naupang ho nen anlo ri nak nak mai.




"Mate! Tehhlawl che chuan!"ka lut thut chu min beisei biklo tih a chiang reng mai.
Sangsangi te unau in barbie anlo khalh a,U Zawni'n Jordana chu thawmhnaw alo hak that tir mawlh mawlh bawk.





"Ka û hna ah akal tawh ami?" Thutthlak pah a ka tih chuan akal tawh thu in minlo chhang thuai,"i rawn nang hman lo chiah chiah anih kha,biak duhna i nei ami?" A ti var a, "nei chuanglo nangmah zawk ka be duh che" ka ti ta sap.






"Enge ni?"



"Nakin deuh ah le,ka hmanhmawh lo hna ah ka kal dawnlo a.Vawin chu nilengin naupang ka rawn awmpui dawn che"ka ti deuh hluai.Anui hak hak a,"athat hlauh chu,chhunah alu paratha kan siam dawn nia" a ti ve bawk a,eisiam te hi a thiam riau a,an ina len tawh hi chuan eng eng emaw hi kan hlawhchhuak leh nge nge thin.





A buai bawk nen thleng vel pawh sil loh in alo la awm hnur a,ka sil sak nghal mawlh mawlh.Anau alo la haw thla lo anih ka ring,naupang harh rual pathum ngawt anei a,heti chung hian a dah faiin in leh avel te hi a ti fai thei hle thung.A thu mai mai hmanlo hi ani ber.




"Jordana ka tih mut chhungin Sangsangi te unau hi lo va mutpui ta che.An fel lutuk an mahni pawhin an mu ve thei tawh ania" a tih chuan "ava la hma awm ve" ka lo ti thuai.Tunah dar sawmpakhat chauh ala nia,naupang tih mut nan pawh ala hma mah mah deuh ani.




"Nî an la vui zo chiah lo deuh a,ka mut tlai tir deuh chuan an châng zir tur nen a in nang leh chiah dawn sia,tunlai chu ka mut hma tir tawp zel.Hmanni pawh an châng zirna ah an unau nau in anlo va muthlu ani awm a! An zirtirtu nu in Siamsiami zawk phei hi chu a rawn paw haw tawp alawm" nui hak hak a a tih chuan ka lo nuih pui ve tawp.






Sangsangi te unau chu room lamah ka hruai phei a,thu an awih viau an mutha ve nghal sat sat.Ka ûte tihfuh ka tih deuh chu an fate phone hmanga an in awm tlei tir ngailo hi ani.U Zawni pawh abuai thin dawn lutuk,mahse abuai chhuanlam in a fate phone a en tir ngai chuanglo.Hei tunah pawh phone en miahlo in an unau in an muthilh ve theih mai hi maw.An mitin a tuar lo nge nge bawk anga a that zia an la hre chho zel in ka ring.




Jordana muhil chu U Zawni'n a ûte bulah amuthla ve leh a,an han mu ta vek erawh a reh ta viau mai.






"Alu ka chhum sa tawh a,maida nuai bak angai lo kan siam nghal mai dawn nia" tiin choka lamah kan inzui phei leh.



"Enge min biak duhna i neih chu?" Maida nuai pah chuan a ti sap a,thaw deuh halhin U Obeda chanchin chu hmaih leh thup pawh nei lemlo in ka hrilh fai ta vek.
Midang hnenah a sawichhuak leh tawhdawn lo tih ka chiang a,ka û hnen ah ngei pawh zep tura ka tih chuan a sawi lo ang chuvanga ani kher hi hrilh pawh ka ni.





Thurawn min pe tu tur ka mamawh a,keima thu a thutlukna ka siam anih chuan vawin tlai la la hian kan inlam ah ka let leh duh mai ka ring.





"A tir ah tumahin an hrelo em ni?" ka sawi zawh chuan a ti ta sap.





"Hrelo ang,a chhungte pawhin min hrilh chuanglo" ka ti a,a tirah tiang tur ani dawn tih hria ilang inneih kha ka duh ka ringlo.





"Mate,i dinhmun tur chu ka hrethiam viau a,i bei pawh a dawng viau ang.Mahse i pasal dinhmun atang hian han thlir ve chhin ta la.Nangchuan hmangaih chu sawiloh ngaihzawng pawh i neih loh lai ania,i nu leh pa te hlimna i duh vangin Obeda chu pasal ah inei a,buaina i nei hranlo.Obeda erawh ngaihtuah chian chuan ani ve miahlo ania,nang nei tur che hian a rilru abuai dawn tur zia te i dawn ve em? A hmangaih thi tawh tunthlenga ala thlahliam theihloh lakah inthiamlohna nasa tak anei anga,chutiang bawkin i chungah pawh.A pa damlohna in a nangching ve leh zel bawk a.Nang nei tur che hian rilru hahna leh inthiamlohna nasa tak apaltlang in a tuar dawn tih hriatsak ve bawk la tiraw? Ani chuan apa damnan hmeichhe pahnih ahliam angah a inngai anga,rilru nuam a a awm ka ringlo.In inneih ni te khan i chîk ve em ka hrelo a,mahse ipasal kha ipik ngawih ngawih inbunruahna tur nei silo hi ang ka lo ti asin aw." A ti dap dap a,angaihtuahna hi chu adang thin teh e.Tunah pawh a pasal nau ka nih avanga min tan nghal ringawt lo in ka diklohna lai zawnga min zilh fin a tum zawk a,hei vang tak hi ania a thurawn lak ka duh fo ni.







"Mahse maw U Zawn, nupa ah kan insiam tawh a.Damchhunga anunah hmeichhe dang an awm reng chunga inkawp ve reng kha ka zuamlo ani ber.Ka pasal thinlung ah hmun ka chang ve ngai dawnlo tih ka hre chiang lutuk a,hei hian min ti buai ani ber.Nupa kan nih tawh chuan feelings kan nei chho thei mai turah ka ngai a,mahse anilo" ka ti halh a,bei hi ava dawng ngawih ngawih tak.


"Engtin nge a thinlung ah hmun i chang ve ngai dawnlo ani tih chu i hriat theih?" A tih khauh chuan ka melh thuai a, "a chiang reng alawm" ka ti sep.






"Mate,mihring rilru hi chu amak khawp a.Kan duh leh hmangaih ber te emaw kan tih pawh hi a aia tha zawk Pathian in kan tana a ruat zawk an nih loh chuan midang duh leh hmangaih em em kan tawng leh mai alawm.I hma hun tur i dawn thui lutuk a i buai anih kha.Han tum ve phawt la,thian ang tal a kawm chhoh te tal han tum la maw,a hmangaih hmasa ai pawh khan a thinlungah buk ikhuar nghet zawk maithei asin.Beidawnglo a nghah fan fan i ngai hrih anih kha,dawhtheihna hian rah tha achhuah nge nge thin ania" a ti leh dap dap tawh.


"Chutiang chu thleng lo ta se" ka lo ti ve leh thung.




" Ta se tih ah buai suh, Pathian in inzawm tura a duh phawt cheu chuan in la inhmangaih tawn em em ang.Pathian malsawmna dawng tur te hian nghah peih angai ve thin bawk alawm.Nangin i theihtawp chhuah ve bawk la"






U Zawni nen a kan ti ti na vang nge ka ipik lutuk pawh ka ziaawm phah ta hawk in ka hria a,inngaihtuah chiang mang hlei lo a ka pasal laka ka lo thinrim ve em em ringawt te chu ka inthiamlo hnuhnawh leh kher mai.Mahse mihring rilru hi chu a lo tawi em a,thinrim lai phei chuan thil ngaihtuah pangai hi alo har ve bawk em ani.


Aluparatha kan siam chu ka ei tui phian a,Judy ei ah tiin per hnih chu ka fun haw nghe nghe.






Ka ûte in atang pawh chuan ka chhuak tlai hranlo a,kawngpui pawh chho in taxi stand lam pan tum chuan motor tlan loh lai ka chang ren rawn a.
Ding leh vei ka entawn zak zak hnu ah hmanhmawh deuha kawng chhak lam ka pan chu taxi kawngchhak lam atanga rawn tlan nen kan insu ta chawrh mai!





Lei a ka tlu tur ka inbenkhalh na lamah ka kut chu arawn ri deuh thawt a,a bung emaw ka ti hman tawh hial zawk! A hik mup mup a,ahnu ah a rawn na nghal ngawt ngawt.





"Akhaih! Mami ava han zialo em em ve mawle! Ka rawn tlanthla fimkhur viau asin"taxi driver chu rawn chhuak in pawi a tih hmel kher mai.A sawi dik a rawn tlan thla muang lutuk,keimahzawk hian ka ding leh vei chauh ka lo en a,hmalam ka lo en tel lo a tin ni.
Kan insu na lo a,ka tlu tur inben khalh lo ilang ka kut pawh hi a na kher lo ang.





"Ava han zialo em em ve aw" taxi pu lah chuan a ti vawng vawng.





"In insu ami?" Mipui an rawn pungkhawm nghal nak nak.
Ka ban lah chu an na em em mai khawp a! Tawng pawh a harsa dawn dawn mai!





"Ka pu i rui ami a?" A enga mah hma in nu pakhat hian a rawn ti ngawt pek a! Athiamloh anihloh zia hria in thei leh theilo hian "aih..keimah..keimah zawkin ka su" ka lo ti ngawng ngawng.






Chutia ka tawng ta chu mak min tih hmel let ta daih hlawm a,ke a kal zawk in ka su ka ti bawk nen min en huang huang tawk pawh an awm.






"E, abân hi a sawh na deuh ava ang ve?A duk raih tawh mai damdawiin lama inhruai vat chi aniang"tu emaw ber hian a rawn ti a,an sawi har tawh kalo ti phian.Ana ve thlawt alawm ka ban chu.A tira hik mup mup ang khan awm reng zawk ae tha tur.






Taxi pa bawk chuan hospital hnai ber lam min panpui a,nu pakhat khan min zui ve bawk.





"Nula,i chhungte phone hrim hrim ang"min kalpui tu nu in a rawn tih chuan ka ph ka lo pe thuai.


"Aw ava han buaithlak tak! Tunlai mi hi chu phone hawn mai theihloh hian in dah thin a" tih pahin ka ph chu min rawn pe let leh zat a,ka kut dinglam zawk anat miau vangin veilam chuan thei leh theilo in password kalo chhu.





"Tunge ka biak ang?" A ti ve leh nghal zat.




"Ka nu..."ka ti zet tawh,pasal neiin mi mo ka ni tawh a,ka pasal a chhungten ka chanchin an hriat hmasak zawk chu a dik zawk ringin "Ka nu 2 kha" ka ti deuh tawk.Ka thaw te lam ahah dawn mai! Tinge maw anat em em ni?





"Aw hei in fanu hi a achesual a,damdawiin kan pan pui mek" a ti lang lang a,a tlang tawh anih ka ring.
"Ngaihtuah awm nilo e,mahse hei abân hi ana deuh aniang a then chak chak reng a" a ti leh zui a,a sawi lai reng pawh chuan kalo la then chak chak.




"A Accident na hmun atanga hnai ber LRM hei kan panpui ve tawp mai a,in rawn kal rang dawn nia.Hei kan thleng chu ani mai kan dah ange" A dah ta aniang atawng zui tawhlo.


Damdawiin kan thleng chu nurse ho in minlo buaipui nghal sat sat a,doctor chu min koh sak thuai bawk.




"A tliak a ang ka ti keichu"nurse pakhat in a tih chuan thin a phu ve dawt dawt thei mai.




"Tliak lo ting tangin a awm anga apawi daih zawk ang"pakhat in a ti ve thung a,min sawithaih ni ber hian ka hre tawh.





Doctor alo thleng a,ka ban vel chu a endik hnu ah "nachhawkna pe phawt teh u,chhawk se Xray tih angai.A tliak nge tliak lo ahriat mai theih loh tlat.A tliah chuan zai angai nghal ang."a ti nghal zung zung.
An zuan a zâng hlawm khawp a,nachhawkna te chuan min chiu nghal thuai.





Minute sawm vel ka tawrh leh hnu ah min chhawk tan a, nurse te fel ren rawn a tliak anih ring tu bawk khan "XRay na lamah kan hruai mai ang che aw.Rawn hruaitu che khan i chhungte anlo thleng tep tawh ang a tia,mahse result nghah chhung nen i tuar rei lutuk palh ang" a ti siam siam a,Xray tihna room lamah chuan kan inzui thla zui nghal.



XRay ti tur dang anlo awmlo bawk nen ka lut nghal zat a,a chhung chu avawt mai sia,avawt ka ti ta riau lehnghal.




Kan ti zo kan chhuak erawh pawn lamah ka nu Mapuii leh Pa hruaia an lo awm reng tawh a,nurse chuan thil awmzia sawiin kan nghah hrih a ngaih tur thu a hrilhfiah nghal mawlh mawlh.
ER lama kan chhoh leh hnu ah ka nu leh ka pa an rawn thleng ve leh chiah a,an mangan hmel kher mai.




"Mate,tunge su tu che chu? Ka thin a rim emai?"Ka nu chuan a ti nghal hlak hlak.Kil khatah Taxi pû kha alo ding ve reng sia ka inthlahrung lutuk ka nu chu ka khap nghal thuai.





"Ala na viau em Mambawih?"ka pan a rawn ti ve bawk a,ka lu kalo thing mai thung.




"A zialo emai,Matei chu engtin chiah nge maw i accident dan le?"Pa hruaia'n a tih chuan Taxi pû kha lo tawng ve in "in fanu su tu kha ka nia,kawngpui ka pawhthla tur kha ka hma ah a rawn lang thut a,kan chesual zawm ta anih kha"a rawn ti dap dap.

"Ka pu i duh chuan min hawsan tawh rawh,ka thiamloh zawk ah lehnghal i buai phah hle mai"inthlahrung zet chuan ka lo ti ve sap.Min kalpui tu nu pakhat kha chu ahaw tawh aniang,ka hmu leh tawhlo.




"Mambawihi chu kawng i enlo tihna ani maw?Kawng kân dawn chuan ding leh vei en ngun tur ka tih fo kha"ka pa chuan a rawn ti dap.




"Ding leh vei ka en nasa lutuk a,hmalam ka lo en lo zawk a"nui sak in ka ti a,Pa Hruaia zawkin "in accident na lai chu ka hre ta mai e,saw lai saw chu accident te hi athleng tam ve tawh viau a,lirthei kal phal loh in an dang tawh zawk emaw ka lo tia"a rawn ti ve charh charh.


"Ka hmanhmawh deuhin shortcut ni a ka ngaih lai ka zawh mawle,a zialo hle mai kha in nau in atawrh phah ta sia"Chu taxi pû chu aw! A thiamlohna a awm miah lo asin mawle .






"Ee, kan fanu sawi hmangah athiamlo zawk chu amah ani tih achiang alawm.Inthiamlo duh suh,hei damdawiin thleng thlengin ilo buaipui a,engtin nge lawmthu kan sawi dawn zawk ni?" Ka pa chuan a ti damthluam a,ka thawveng ta huai.





Taxi pû chu Pa Hruaia leh ka pa in pawisa pek an tum pawhin ala duh tlat lo a,lawmthu sawiin kan inthlah ta tawp.Pa fel tak chu ani ngei mai.





"Mate,i û Thanpuia pawh a rawn thleng tep ang aw" ka nu in a tih chuan a ngailo ka ti viau.

"Obeda pawh a rawn haw nghal kha,kan hrilh ve nghal a a rawn hmanhmawh hmel khawp mai" Ka pasal nu zawkin alo ti ve zat a,chu phei chu ngai ka tilo lehzual.Thihna khawp em pawh tawngthu chhelo ah kan tawklo a,an hna kal lai em koh haw na tham aniin ka hrelo.






ER chhungah awm vek an remtihloh vangin mipa te pahnih an chhuak a,ka nu te pahnih in min awmpui thung.
Nachhawkna in min chhawk reng emaw tih laiin ka khur ta der der a,ka tlun chu ani ta nghal zui mai!





Nurse ten min rawn buaipui nghal sawk sawk a,ka pang lah a sa hat hat mai sia."Hlauhawm anilo,a kut na in a thlen anih hi"an ti chungin min hringtunu phei chu aphili ngang tho.
Nachhawkna chuan min jection leh a,ka la khur beuh beuh tho.
Ka nu mapuii shawl bah ka sin hlun a,vawt ka ti bawk nen an hmelhriat hnai vai in ah puanlum min laksak turin a chhuak ta tawp.




"Kimte" khur beuh beuh chung chuan ka hawi chhuak a,ka pasal chu hlauhthawn hmel zetin alo ding reng tawh.





"Cabin lam awl a awmlo em ni? Heta mut tir ringawt zawng atan pawh anuam dawnlo"ti nghauh nghauh in nurse te chu abe nghal sawk sawk.





A nachang kan lo hrelo mai pawh a,U Obeda rawn thlen hnu ah erawh cabin lamah kan insawn thla thuai a,ka nu puan lak te nen chuan tlemin ka zia ta deuh.

Cabin chhungah chuan kan awm tlâng ta vek a,ka bulah ka pasal chu athu ta chawt bawk.





Ka ûte nupa an rawn thleng a,ahnu lawkah U Sawma a rawn lang ve leh hlawl bawk a! Ava inthlahrunawm duh zo zai tak! Ka fimkhurloh vangin kan buai phah ta nuaih chu ania.


Ka result chhuakin ka kutruh alo tliak tak tak a,zai turin min buatsaih ta nghal rum rum bawk.





Ka harh leh chuan cabin ah ka lo awm tawh a,ka chhungte chu an lo la awm thup bawk.
"Mate i tha em??" Ka that leh thatloh min zawt nghal sup sup mai.




"Ka tha ania,inla awm ve reng a? Let tawh ta che u"ka hrawk thip em vangin ka aw chu a ni deuh tuak mai.





"Doctor pawhin i that thu min hrilh a,ilo harh huh ngaichang in kan la awm anih hi"ka pa chuan alo ti leh dap.





"Mambawihi aharh that tawh tho chuan kan awmdan tur kan rel dawn em ni?"ka pa chuan a ti zui a, "ka awmpui ange"ka nu ani.





"Ka awmpui ang"U Obeda chuan alo ti nghet charh mai.





"Pahnih in zanin chu kan riahpui theih tur thu an sawi kha maw"U Thanpuia'n alo ti ve zat a,ka kut chauh ana a,pahnih hnih awmpui ka ngaih ka ringlo viau.
"Obeda hi awm se,hmeichhia pakhat in awmpui tel hrim hrim ila atha ang.Madingi emaw kei kan awm thei a,duh chuan Judy pawh a chah thlak theih tho bawk a"Ka pasal nu chuan alo ti nghal zung zung.






"Zanin chu ala hlimchhawn emai,kan awmpui phawt ange"tiin ka nu in a ti a,U Obeda nen min awmpui dawn anih hmel.





Ka chhungte ho chu an haw ta sap sap a,ka nu in ka pa te a han thlah a,U Obeda nen room khatah kan awm thung.
"Na inei lo takzet em?"ati dut.





"Umm,damdawi in min chhawk aniang"ka ti tha ve mai, ipik hmel zet hian ahmai tuai thuakin "ka thiamloh vek ani"a ti ta sup mai!
"Ka fimkhur tawk loh vang alawm" ka lo ti thuai thung.



"Nilo,rilru fim hmang theilo in ka siam che a,i tawrh phah ta reng bawk a.Kimte,ka inthiamlo hle mai"a ti ril ruih.A aw chuan engtin emaw tak hian min hneh a,ka khawngaih ta hluah hluah bawk.
"U Obeda,ka thiamloh alawm.Ka fimkhur tawk loh vang anih hi.Thiamlohna i nei lo"ka ti fiah fak chung pawhin a nui hul hak tho.A hmel ah chuan a inthiamloh ngawih ngawih tih ahriat a,ka ban na lam chu amelh leh vung vung thin.






Ka nu rawn let lehin eitur a rawn keng lut a,chaw hotel ami ala ani maithei mi pathum ei khawp a rawn chawi lut nawlh mai.

"I nau a rawn vui nasa lutuk a,ka rei phah vek.Rawn kal te a tum ut ut mai a,Zira hi zawng abuaithlak thin ania"ka lo nuih sak a,Zira chuan min ngaihtuah ve dawn lutuk tih ka hria.Ka pa ten inlama lo awm zawk tura an tih pawh a thinrim pui leh viau ngei bawk anga.





Damlo a lut nilo mah ilang ka ka chu a tuilo nghal ringawt a,ka ni chaw rawn lak pawh ka ei lui thei ngang lo.
"Zira'n mutbu a rawn dah dawn a,buhhawp i U Lawmi'n siam se rawn dah tel mai rawh se"ka nu pawhin a ti ta tawp,hnial hman nimiah lo in inlam aphone nghal zat bawk.






Ka bul lawkah ka pasal ngawi rengin a thu reng a,ka ni chaw rawn lak pawh a ei mang biklo.Kamiz te nen ala ni rup vang chuan inthlak tur talin a haw ve ka ring a,mahse haw a tumlo nge a thu ngawi reng ringawt.





"U Obeda,i duh chuan han inthlak la.Ka nu a awm tho a inlamah han haw mahla apawi miahlo ania, mi pahnih riahpui kher pawh ka ngaih loh hi"ka ti zawi sep a, "ka riahpui ang che,ngaihtuah ka ngailo mut hahdam tum zawk la"a ti dam leh thlup tawh.Tawngkam dam thlup a min biak hian achhan hriat siloh in ka rilru alo hahdam ve nghal rawih rawih zel mawle!





Damdawiin min hneh deuh nge ni ka muhil leh thuai a,Zira mutbu rawn dah hun pawh ka nghakthleng zo ta ngang lo.







Ka harh leh chuan khua alo êng ut ta mai! Engtin nge vawikhat pawh harh miah lo a ka mut tlang theih zawk le?



"U Matei, i tha tawh em? Na te ila nei em?"





"Judy?" Ka ti deuh hâ, a lo kal maw? "A tlai tawh em? Engtikin nge ilo thlen a?"ka ti leh hak.





"Ka lo thlenna ala reilo, ka û chu a intifai mek a.Inu kha hmelhriat ahmu nge pawn lamah an inbe bawk a.Nizan khan rawn kal ve ka duh lutuk a ka pa ten an phal bawk silo a,hei tunah ka rawn kal nghal "a tih chuan "dar engzah nge a?" Ka lo ti zat.
"Dar ruk a pel fel awrh ang?" A ti hem mai! Ava rawn kal hma em em bawk ve mawle?






"I chau lo ami? Tinge ilo kal ve kher duh,ngaihtuahawm ka ni hleinem"ka ti hluai.





"Khawvar hma tang ka harh tawh,i eitur ka lo ken che a,ka nu in sangha a siam sak che a,chaw chu hotel ami in la dawn atia"a ti nghal zung zung a,ka lawina ten heti tak maia min ngaihven hi lawmthu sawi mawlh mawlh na tham ani.

"Class kal te ila ngai dawn sia aw"ka ti deuh vawng vawng.





"Ho lutuk,ka attendance atha lawm.Chawhnu lamah chauh ka kal anh"a ti sam et a,In kan hun hma a alo lut thei mai te chu mak ka ti bawk nen a chhan ka zawt ta tawp a.Nui hak hak in athiannu nurse in a rawn hruai thu asawi.





Judy ahaw a,U Obeda a haw ve nghal mai dawn emaw tih laiin hna ah chawlh alak thu asawi ta mauh mai a! Ka nu awmlo se chuan chawlh la lo turin ka hrilh nasa viau ang,ka nu lah chuan "chawlh ilak theih hlauh chuan a that chu"alo ti mai a,ka inthlahrung zual ta khawp mai.






Ka nu inthlak turin ahaw ta zuai a,U Lawmi leh U Zawni pawhin rawn thlak tum viau mahse ka nu berin a duh tlat lo a,min ngaihtuah ve em bawk a tuman an tilui thei lo ang.






"Hna i chawl kher a,angailo asin mawle"ka nu awmloh lai chuhin ka ti nang nang.
"I phu alawm" a tih chuan ka melh deuh vang vang a,han biak nel vak dan ka hrelo khawp mai.Mahni pasal te biak nel tum rikngawt pawh chu midang tan chuan amak viau ang,mahse ka tan chuan angai tlat si.


Ka ner nak a,"i bân ana ami?" Tiin a thutna tang ading nghal hluai.





"Na ve deuh det"ka tih chuan "nurse ka rawn ko ang,lo tuar hram rawh aw" ti supin achhuak nghal thuai.

Nurse rawn lut chuan nachhawkna min rawn pe leh zat a,nurse awmve reng lai pawh chuan U Obeda chu alo vei kual chhen.




"A chhawk har angem? Ana tih reh hmak dan a awm lo em ni?" Tih te alo zawt sek a, nurse in "a zia chho telh telh mai ang"a tih pawh chuan "a rawn na leh angem?"alo la ti hrâm! Nurse pawh chuan nui hak hak in ahlauhawm loh thu leh ala hlimchhawn em vang anih thu asawi a.Khawsik ka neih erawh chuan hrilh thuai turin min ti thung.






Nurse chhuah hnu atang chuan ahma aia hnaiah min rawn thut hnaih in ka chal chu a rawn dek chhen a,ka khawsik leh sik loh a en nimai in ka hre tawh.





"Nizan ah i mu em?" Ka lo ngaihtuah lo a,zing ka harh lahin anlo tho daih tawh bawk sia,an mut that hman ka ringlo ve tawp.
"Umm,keichu ngaihtuah ka ngailo Kimte.I taksa ah danglam deuh a awm chuan min hrilh vat dawn nia"a ti dam leh thluam tawh.





Ka nu rawn let chuan thei tharlam deuh deuh a rawn lei a,ei tin ah erawh ka tin hrihlo.Ka kâ hian a châk hrih hlawllo ani ber.






"Obeda,va mu zâl ve zuai rawh nizan zankhua in ithu tlaivar a i chau lutuk ange"ka nu'n U Obeda hnena a tih chuan ka pasal chu ka melh vak a,achauh loh thu in alo chhang sup thung.Zankhua in a thu tlai var a! Ka pasal rilru ah hian eng tiang chiahin nge maw ka tlaknat ve a zankhua khua a minlo vil tlaivar chu? Ka beisei loh lam daih ani.






Tlai lamah min rawn kan tu an awm nual a,ka thawhpui te haw hnu lawk ah ka class naupang thenkhat an rawn lut ve leh a! Vawin chu min rawn thawng dawt dawt hlawm reng mai ani.Eitur te min rawn ken sak ve ngei a,ka pasal lah chu ngaisang tih hriat zet hian an melh ru leh zawk zawk thin.Nunutei te thian ho ka pasalin an biak phei chuan an han lai ngei a! An lawmawm thei ania.
Ka nu lahin ka naupangte an ni tih hria in alo duat khawp a,kan eitur neih ang ang te chu alo hlui nghal mawlh mawlh.







An haw dawn chuan hawna tur neilo pali an awm a,an taxi chuan man U Obeda chuan pe a tirah la duhlo ve ngei mahse an hnial hneh ta lo.
"Miss,i damloh chuan anuamlo rawn kal leh vat la,lo dam thuai thuai rawh aw"an ti ve sap sap hlawm mai.






In kan hun tawp dawn tep ah ka pa leh Zira an rawn kal ve leh a,vawin tlai chu mut chhuak deuhin ka mu hman lo chu ani ber.






"I accident tih pawh min rawn hrilh ve lo a"Zira chu a lawmlo khawp mai.Ka accident lai in engtin nge maw ka hrilh theih ang ni?
"Zira,i û rilru tinuamlo tur zawngin awm suh aw"ka pan alo ti fiamthu nghal zat.


"Nu-i,zanin chu an nupa in riak ve tawh se,Matei pawh ngaihtuahawm anih tawhloh hi"ka pa chuan a ti a,ka nu ngaihdan alo ni lo nasa mai!




"zanlai ah buai thut se engtin nge an awm ang? Ka riahpui leh phawt ang" a ti nghet hmiah!





"Aw,i pasal hi i tello in ka muhil theilo a min ngaihtuah ve lo a"ka pan nui ruh ruh a a tih chuan ka nu alai ta hle a,ka pa chu a chum deuh tawlh."I mawl thei lutuk" a zak lutuk chuan a ti sep a, midang kanlo nui ruh ruh thung.Kum upat lamah pawh ka pa hi chuan ka nu ala chhaih lai thei tluang zel chu ania!

Ka pan a tihluih tak tlatah chuan ka nu lawhin zui haw ve mai chu pawi a ti talo a,keiin awmpui ka ngaih tawhloh thu ka lo sawi ve chamchi bawk nen ngaihtha zanlo chuan min hawsan ve tak kha.





U Obeda nen chauh chuan a reh leh ta tluk tluk khawp mai.Ka mutna bulah a thu run a,ph min khawihsan bik bawk silo nen kan inmelh leh ralh thin a,awmdan tur thiam ahar thei viau.

"Mu tawh rawh"ka ti leh ringawt thin.Nui mai in ani pawhin amut ala chhuah loh thu in min chhâng leh mai a,kei erawh ka mut a chhuak ru tawh viau thung.






"I chau anih kha,muhil tawh rawh le" a tih chuan ka insum thei nganglo."nangpawh mu ve thuai rawh aw,nizan i tlaivar tawh si" ka ti sep a,lu chu min buk khum ve nghat tho.

Ka mit ka chhiang riai riai a, "Dam thuai rawh aw,i na lai hmuh hi hrehawm ka ti ania" a ti ri te chu ka manghriat ruai ruai tawh.

Story kan chhiar zawh rualin a hnuaia ads hi kan click theuh dawn nia aw, ads kan click hian writer ten hlawh an neih phah ve zel a nia

Show post links
Top