ALL THE WRONG PLACES 17 ONGOING

[B.laltlanhlui]

Chapter 5

Julianne chu Adam's limo aṭang hmanhmawh lutuk in a chhuak a, meeting tur hian a tlai ngai lova mahse vawiin hi chuan tihngaihna a awm thlawt lo. An chhung buai a ni ber e. Adam's inchhunga cheng zawng zawng te chu Paris a kal tumin an insiam mawlh mawlh hlawm a, a ni pawh a bang chuang lo. A hma khan Adrienne hnenah kal ve ngei a intiam tawh avangin Jared pawh a phur sarh mai. A fapa leh a cousin te ho tih beidawn a tum tawh lo

Amaherawhchu Justin a'n hun tep ter deuh ah engemaw tihsak turin a ngen tlat si a, 'Aih' ti a chhan hleihtheih pawh a ni lo. Vawiin ni ber kher hian River Jefferson nen thawh ho na chungchang an sawi dun a ngai a, Paris an thlen hunah hna vanga a buai sek Adrienne-i'n a phal lo bur mai. Mister Jefferson nen tlaiah an inhmuh loh chuan Justin a'n tlaiah chauh rawn thleng tur khan a sawi a, zanriah a kilpui nghal mai a ngai ang

"Mister Jefferson a hauh lawk kha" tiin khualchhawn nula chu a han bia a

Chu nu te chu a lo nui sen sen a "Tehreng mai. A lo nghak reng tawh che alawm"

"Awi leh" a ti sap a

"Ṭhiannu i sam kha i siam ṭhat duh deuh ka ring" Chu nu chuan a rawn hrilh ru zeuh a

"Tihpalh lutuk. Thli a thaw nasa lutuk a, ka lawm e" Julianne-i'n a ti a

Darthlalang ah chuan a han inen a, a sam chu a lo phir sung mai. Nidanga a felfai theih nen. A hunah engkim a ti chat chat ṭhin kha ania. A kut chuan a han chul thuak thuak a

Restaurant a VIP awmna lamah chu nu chuan a hruai phei a, dawhkan pakhat ah chuan sam thim lam deuh buang thak mai hi a lo ṭhu a, phone bihin engemaw chhiar lai a nei a

"Mister Jefferson?"

Chu pa chuan mitmeng hring nalh tak hian a rawn melh a, a lo beisei loh lutuk vang nge a mit a khap deuh sawk a, rawn inthing harh vatin a ding a, ṭhutna a pawh chhuah sak a

"Tihpalh. Ian, Justin a VP Corporate Strategy i ni ang maw?"

"Aw, Julianne Sanders ka ni e"

"River Jefferson" tiin a ban a rawn phar chhuak a

An inchibai hnu chuan inhmachhawn in an ṭhu a

"Tihpalh. Midang daih ka lo beisei a" River a'n inthiamlo deuhin a han ti a

"Justin a'n engtin nge a hrilh che?"

"Eng vak mah a sawi lo. Mahse zanin ngei hian Corporate Strategy a hotu ber hmu turin min duh a"

"Naktukah Paris kan pan dawn a, chuvang aniang. Tun kar chu hun kan nei lo lutuk a, chuti ni lo se chu kar leh lamah pawh inhmuh a rem viau dawn asin le"

"Kar leh ah chuan Italy ka pan ang. Thla tawp lamah lo chuan ka lo let hman ka ring lo" River a'n a ti a

"Justin a'n zanin kher a thlan chhan a nih ka ring" River chuan Julianne melh in a lu a thing a, a nuih a zat hmel riau bawk

"Min lo hrethiam la, dik lo a awm em ni?" Julianne chu a lawm vak lo. A sam fuh lo deuh kha a lo hmu a nih pawhin Corporate Strategy a ni a, sumdawnna lam chauh sawi a tum tih Jefferson chu hriattir a tum deuh bur mai

River chuan a lu a thing a "Dik lo chu awm love" a ti a

"Tak tak in min hrilh tawp mai rawh"

River chu a nui leh sun sun a, eng tin pawh ti se a mood a chhiat theih pawh a ring lo. A ni erawh a thutak ngul mai

"Julianne Sanders i ti em ni kha? Gian Sanders nen inzawmna in nei mial lo maw?" River a'n a zawh hnu chuan lu a lo bu nghat a

"Ka phirpui a nih kha"

"Justin nen in inhnaih viau a ni maw"

"Aw, cousin kan nia lawm"

River a hmel chu a phur lehzual sawt

"Nuihzatthlak a awm em ni, Mister Jefferson?"

A lu a thing a "Ka hre mai bik lo. Mahse kan hre chho zel turah ngai ang" laptop hawngin a inbuatsaih dan chu a han chhawp chhuak a

Julianne chu lawm chiah lo mahse uluk zetin a lo ngaithla a, mipa ṭhenkhat hi chuan tlang takin amah an duh thu an sawi phawng ṭhin a, River erawh chu a ni ve lem lo. Ama fiamthu hi a hlimpui ber niin a lang

A inbuatsaih te a sawi zawhin River Jefferson a'n Asian lama thawn chhuah tur kum tawp lamah chauh an peih thei ang tih a lam rik khan Julianne chu a ti beidawng riau mai. Thil thawnna tur Container Europe ah a awm ṭhat em em laiin Asia lamah chuan a vang pharh mai dawn tihna a ni si a

Engtin nge Justin chuan a hmuh lawk thiam miah loh le? A hun khawhralna mai mai a nih hi

River a'n a zo fel diam tawh tih a hrechhuak leh hnuhnawh a. Ngaihtuah hmel deuhin a lo en reng a, a inthing harh kawk a

"Justin hian Asian lamah sumdawnna in la kalpui chiah lo tih a hria em?"

"Hre tehreng e a" River nuih a zat hmel lutuk

"Chu mi ber chu endik tura rawn kal ka ni asin"

"Chutiang engmah a awm lo tih ka tiam a che" River chu a nui leh sang a

"Ka va hrethiam lo em! Tinge Justin hian i company engmah la fel lo chu hmu tura min duh em em nge a nih le?"

"Kan inang chiah a nih chu. Justin hian Corporate Strategy VP hmu turin min nawr sek a, Europe a contract kum hnih hnua tawp chauh tur ania, a la hmanhmawh thlak loh tiin ka hrilh a, EU contract chu ka nei a, mahse Asia chu tunah rih chuan ka nei lo"

"A nih chuan kan meeting hian awmzia a nei lo tihna a nih chu"

River chuan a dar a chhin ak a "Eng pawh chu nise Justin a'n Ian Sanders chu hmeichhia a ni tih a sawi lang miah lova"

Julianne chuan River Jefferson chu a melh leh kawk a, a ai a upat vak a ring lo. Justin nen an inrual maithei. A sam chu a thim lam deuh niin a mit a hring ralh mai a, a pian te chu hmeichhe duh chi tak tur a ni. Chhungkaw pangngai tak aṭanga chawr chhuakin sumdawnna a kalpui thei chu a ni awm si a, chu veleh Justin a'n heta a tirh chhan hi a hrethiam ta. Sumdawnna lam ni lovin tihpui a lo tum lek zawk a ni

"Chu pa mai mai chuh! A chak lo ngawt ang" a ti deuh hluk a

River Jefferson chuan bang bo zetin a lo en reng a, a hnuah a rawn nui chhuak hawk hawk

"I nuih a za viau a maw? Tinge?"

River chuan a aw a thian kharh a "Diktak chuan ka lawm zawk a nih hi. Justin hi ka hrechiang a, chhungkua a dah pawimawhzia ka hre bawk. A chhungte zinga mi nen min suihzawm a tum danah hian min ring tawk hle tih a hriat mai"

"Hawihhawm lo deuh ah min lo ngai mah la, ka kal phawt mai ang e" a bungrua chu a thun mawlh mawlh a, mahse River a'n zawimuanga rawn pan in dimte in a ban a rawn vuan a

"Ti teh Ian, a hmun kan thlen tawh rau rau chuan nilengin i buai hmel si a, zanriah tal chu ka lo tum ang"

Julianne chuan mitko sanin hnawl a tum nghal

River chuan sam êt hian "I rilru nawmna tur a nih phawt chuan duh leh Justin a ka rel pui dawn che nia"

Cham kha a tum miah lo. Chhuah dun sawmna a dawn hian a tlangpuiin a hnawl nghal thuai ṭhin. Mahse darkar sawmpahnih chhung hah taka a lo thawh avangin hahdam chu phu a inti ve deuh. Chu lo ah River hi mi sual tak chu a ni lo phawt ang. Justin a'n a ring ngam a nih chuan a ṭha vek mai ang. Amaherawhchu a thinlung a hawng em em chuang lo

"Awle, a ṭha e. Eitur chah phawt ang"

"Awle"

Julianne chuan steak, lobster leh vegetable salad a chah a, waiter a biak laiin River chuan a lo thlir reng a

"Buaina a awm em ni?"

River chuan a lu a thing a, waiter lam hawiin "A ei ang hi ka lo ei ve ang e" Julianne lam a rawn hawi a "Tihpalh. I hun hlu tak ka laksak che a, eitur tala ka rulh che a ngai alawm"

"Ka hun min khawhral sak lo, Mister Jefferson. Justin a'n alawm. Nang pawh i buai phah dawn tih a chiang reng"

"Sawp hrep kan chak dun hle a nih hi"

"In inpawh hmel hle mai" Julianne-i'n River chu chiang zetin a melh a

"Harvard ah kan kal in kan in roommate a, ni e kan inpawh ve angreng"

"Justin hian mi rin a nei vak lova, kan chhuah dun theih nana tha a sen nasat dan ah a ring che tih a hriat mai"

River chu a nui huk a "Tun ṭum chiah hi min ring sual maithei a ni" a mit a rawn siai zak a "Misual tualthah hmang te hi ka lo ni reng thei ania. A hriat miah loh"

Julianne chuan a rawn melh rawl rawl a "Nangma tan hian a pawi zawk viau maithei a ni. Mi â dahna aṭang ka chhuahna a rei lo tih a hrilh hmaih che a ni maw?"

"Chuti chu ka tana hmeichhe dik tak tur zawk i nih chu"

Julianne-i'n mitko sanin River chu a melh a "I fiamthu a ni ang. Justin hian tualthah hmang bulah chuan min thawn tawp lo vang"

River chu a nui a "Ka fiamthu a nih kha. Nang pawh mi â dahna ah chuan i awm tak tak lo vang"

Julianne chuan dar chhin ak in a lu a thing a, wine a lem zeuh bawk "Thudik a ni alawm. Justin pawhin min sawi lan ngai miah loh chhan te kha i hre lovem ni? Chhungkaw thlalak ah leh thil lawmna hmunah pawh ka tel ngai miah loh hi"

River chuan mit a khap sawk a "Engtia rei nge i awm?" tiin a zawt a

"Kum sarih vel chu a ni ang" thutak hmel zetin a chhang a

River chuan a ngaihtuah deuh vung vung a, chutah a rawn phun sup a "Mi â dahna a awm te hi an sawisa ṭhin an ti a, a dik reng em?"

Julianne chuan a rawn melh kawr a "Fing deuha lut te pawh hi an chhuah meuh chuan an chiang tawh lo ṭhin"

"Nang chu i va ṭhat hmel si ve"

"Ka ṭha alawm...a chang chuan ka chiang lo thut ṭhin"

"I chian lohin engtin nge i awm?"

Julianne chuan sam êt hian "Ka hre lo. Nikhua te ka hre lo tawp zel" chimawm zetin mit a siai zak a

A rin aiin River chuan a dawngsawng thiam no a chawi kang a "Ian Sanders tan. Ka hmeichhe duhzawng tak a ni" a ti a

Eitur an rawn chhawp chu ngawi rengin an ei dun mawp mawp a, Julianne pawhin eitur tui tak a ei theih avangin a lawm ve viau mai

A phone a rawn ri a, In lam aṭang a ni

"Hello"

"Nu, ka insiam vek tawh" Jared a'n line lehlam aṭang a rawn bia a

"I ti ṭha lutuk e, bawihte. Nanny khan thawmhnaw a khung ṭeuh em? Lehkha a ka ziah ho kha hmaih a nei em?"

Jared chuan amah awmtu chu a va zawt a "Aw, engkim a khung vek. Nu, i la insiam ve si lova"

"Ka rawn thlen veleh ka insiam ve mai dawn alawm bawihte"

"Kawr mawi deuh i keng dawn em? Kei chu party a mi tur suit mawi deuh ka keng"

"Aw, bawihte. Ka keng dawn alawm. Lungngai suh"

"Engtik nge i lo haw ang? Thlawhna kan nang hman lo ang e"

"Hun a la tam alawm. Kan nang hman em em ang"

"Lo haw vat rawh aw, nu"

"I nu hian zanriah ka ei mek a, ka lo haw vat ang"

"Awle, muttui"

"Muttui le, bawihte"

Phone a dah hnu chuan River a'n a lo en reng a "I fapa maw?"

Julianne chuan lu a bu nghat a "Ka fapa hmangaih em em a ni e"

"Kum engzat?"

"Kum ruk. Thlawhna ka nan hman loh a hlau lutuk a"

"Ka lo chelh vang che a ni maw?"

"Ni love. Eitur ka duh ve tho vang a ni e"

"Ni tak e, keipawh wine vang hi alawm" tiin a in leh zeuh a, chutah a rawn en leh a "Naute pa nen in inṭhen tawh vangin Justin hian min suihzawm a tum a ni maw?"

Julianne chuan lu a bu nghat a, wine chu a lem ve mai. A kai ve deuh. A dose a hniam si a, duh aiin a tak hlek a ni

"A dik chiah alawm" a ti a

"A chhan ka zawt thei ang che ngem?"

"A chhan i hriat duh chhan zawk hi ka hre thei ang em?" a ti let khauh a

River chuan sam êt hian "Zanriah kil paha titi hi nuam ka ti zawk pawh a ni maithei asin"

"Ka hmelhriat ṭhan vak lo hi chu ka hrilh ngai lo. Mahse zanin bak chu kan inhmuh hmel si lova, ka hrilh maithei che a ni" wine chu a han in belh a

"Wine kha i zo chiah a maw?" Ngaihtuah tih hriat zetin River a'n a zawt a

"Zo e a, mi â dahna aṭanga chhuak ka ni tih ka hrilh tawh che kha. I theihnghilh hman em ni?"

"Chu chu ka hlauh vang zawk ania ka tih ni...." tih pahin River chuan hlau deuh angin a han khur der vel a

Julianne chu a lo nui ker ker a "I fiamthu duhzawng hi a mak e, Mister Jefferson" a ti a

"Nang pawh mawle" River chu a nui a "Eng pawh nise naute pa chanchin min hrilh i tum kha"

"Hmm? A kal tawh. A awmna pawh ka hre lo"

"A kalsan che em ni?"

"Aih" Julianne chuan lu a thing a "Paris ah kan intawng a, midang angin ka inhmelhriattir a, zan hun danglam tak kan hman hnu zingah ka chhuahsan daih a"

River chuan a rawn en vang vang a "Tak tak in hming lem i hmang maw?"

Julianne chuan lu bu nghat in wine chu a in a

"Hming lem hman chu a fuh vak lo vang"

"Ni reng e. Ka unaupa leh Justin hian sawisak an chak zek zek lehnghal. Min kalsan emaw an ti a, kum liam ta thleng khan zawn chhuah a, hremna pek an tum a, mahse a tihsual ni lo pui ah tawrh tir ka remti thei lo"

"Tinge nangman i zawnchhuah a, fapa in neih thu i hrilh mai loh?"

Julianne chuan lu a thing a "Ka ngaihtuah ve fo alawm. Mahse ka dawih em a ni. Ka sawi awmzia chu eng nge ka hrilh ang a? 'Hi, ka hming diktak chu Julianne Sanders ania. Hming lem ka hrilh vang che khan min ngaidam dawn nia. Chuan fapa kan nei a' ka ti ang maw?"

"Aw, chutiang deuh chu" River a'n a ti khawlh a

"Ka thei lo vang. Ka thiltih zahthlak zia kha e, mahse duhthlan tur ka nei miau si lo a ni. Pasal hual kha ka nei a, ka nun kha a buai nuaih a ni ber e. A ni lah kha a hma hun atana bei mek mipa pangngai ve mai kha a ni si a"

"A hmangaih che chuan a hrethiam em em ang"

"Hmalam hun atan khan a thawk nasa asin. Fapa kan neih thu hrilh a, a rilru tih hah belh ka duh lo. Chu lo ah ka chhungten min hnawtchhuak bawk a, ka fapa nen hian min pawm thei lo ta se, ka tawrh theih ka inring lo"

"I hre bik hleinem"

"Ka hre ngai dawn lo a nih hi" Julianne chu a thaw halh a "Social media ah ka zawng a, ka hmu zo si lo. Ka duhtawk tawp alawm"

"I fapa hian a pa ai a awh zo ngawtin ka ring"

"Awh zo tak a ni. Ka fapa hi ka neihchhun a ni e"

River chu a nui hak a "Ka hrethiam e. Justin hnenah chuan min tihpui tawh lo turin ka hrilh dawn nia"

Julianne chuan a rawn nuih a, a thawveng huai mai. River Jefferson chu biak nuam a ti ve reng. An blind date nuam lo lutuk tur pawh a zia sawt mai. Zanriah ei a sawm nghal dan leh Jared a pa chungchang awlsam taka a sawipui dan te chu thiam ve tak chu a ni

"Therapist tur awm tak i nih hi" Julianne chuan a sawi chhuak phawng a

"Nih ka chak thei lutuk. Mahse ka pa nen kan inkar a chhiat phah ka hlau a

"Tinge a?"

"Hmangaihna vanga piang ka ni lova, high school ka kal hma kha chu ka pa hi ka hre ngai lo. A nupui leh fapa accident a, a chan hnu khan rochun tur nei lo ang khan a inngai reng a, a hnu deuh ah min hrechhuak alawm"

"Engtin nge ni zel?"

"Min thlithlai phawt a, ka fing tih a hriat hnuah ka nu pawisa tam tham tak pein a hnena cheng turin min hruai daih alawm"

"I nun a inthlak hlawk a ni maw?"

"Min rawn zawn hmuh hmaa ka khawsak dan kha a thlak thei tawh chuang hleinem"

"I pa chungah i la lawm lo reng a ni maw?" Julianne-i'n a zawt a

"Lawm lo, love. Mi kaihhruai chu a thiam a, pa nihdan erawh a hre chiah lo"

"Keipawh ka pa nen kum sarih chhung chu kan inbe tawh lo. A thusawi hnuhnung ber chu maw 'Golf ka khel dawn a, ka lo let leh hun chuan i lo chhuak fel tawh tur a ni' tih hi" Julianne chuan a hun tawn hrehawm tak kha a hrechhuak leh a, a awm a nuam lo riai riai mai

A mittui a tling deuh pam a, River hmuh hmaa khap per sawk a tum a, mahse khawngaih hmel zetin a lo en reng tawh. A tlai deuh hret a ni

"Ka chungah hian eng nge maw i tih le? Mister Jefferson. Kan inhmu ve chauh a ni si a" Julianne chuan phun deuh sap in a hmai a zap a

River pawh a nui ve tawp. A vawikhat tawnna a ni lo tih a hriat nghal mai

"Han en la, ṭhian ṭha tak kan ni nghal mai alawm" tiin a nui sang a

A pa nen an inkar ṭha bik vak lo mahse River chu a nguai phah chuang lo. Chuveleh Justin a'n inhmuhttir a tum chhan a hrechhuak leh a, a nunah hian biak nuam tak leh mi hriatthiamna ngah deuh a tawn chuan a mize hlui kha a lo kir leh a beisei vang a ni

"Mak i ti viau maithei a, mahse i chhiat vak loh kha a, Mister Jefferson. Justin a'n a rintawk zia che pawh ka hrethiam nghal mai e" Julianne chuan wine a tlak pap a "Mahse ka kal a ngai tlat. Ka fapa in min nghak a, ka tlai bakah zu rim ka nam chuan a lungawi dawn lo lutuk"

"Zu a in ve ṭhin te a nih ngawt loh chuan a hre awm lo e"

"Ka beisei. Mahse ka fapa hi a fing reuh lutuk a, risk ka la ngam lo" Julianne chuan waiter ko in ei man pek a tum a

"Keiman ka lo pe ang"

"Teuh lo mai. I ei man kha pe la, keiin ka ei man ka pe ang" pawisa chu ngah viau lo mahse a man chu pek ve ngei a tum tlat

"Tlangval hawihhawm in nula ei man an pek tir ngai lo"

"Chhuak dun kan nih loh hi, Mister Jefferson"

"Chelh tu che ka ni hrim hrim a, chu lo ah dawhkan ka kilpui nula te hi ei man ka pek tir ngai lo" River chuan a ti lui ve tlat

"A nih leh i tih tlat si chuan pawi lo mai" Julianne chuan a ti chuai raih a

"Ka duh tlat si alawm"

Minute rei vak lo hnuah River a'n pawn thleng a thlah a

"Ka hruai haw thei ang che ngem?"

"A ngai love, ka lawm e. Justin a limo in ka lo kal a, rin aiin ka tlai sia, chuvang mawle"

"A hrechiang hle che a ni"

"Ni e, rilṭam viau lo ila chu ka kal daih tawh ang"

"Chhunah engmah i ei loh avangin zanriah kan kil dun thei a, a lawmawm hle mai, Julianne Sanders"

"Nang pawh kawm i nuam reuh em mai River Jefferson"

Limo chu an hmaah tak a rawn ding a, River chuan kawngka a hawnsak a

"Lehpek ah chuan Justin a inrawlh ngai lovin zanriah kan la kil leh ngei dawn nia" River a'n a ti a

Julianne chuan chhuah dun leh a sawm tih a man thiam mai. Mahse pawi a ti em em lo

Chhan loh zawk ṭha in a hria a, a nui mai mai "Muttui le, Mister Jefferson"

Limo chhung tukverh thim deuh khuih kar aṭang River Jefferson chu chiang kek kawkin a han en a, a hmel chu ṭha a ti ve reng. A zaidam hmel ngawih ngawih. Hmai tlang hriam deuh kha a duhzawng a ni a, Jas Mathieu kha chutiang chiah chiah chu a ni. Hremhmun lal ang maia chhelo a ni. River nen chuan dang tak an ni

River nen hian lo inngaizawng dawn pawh nise buaina chhete a awm

Chu chu Jared a pa kha a la hmangaih tlat mai a ni

****

End of 5