CHAPTER 30
Ka phone ri ral ral avâng chuan en zawkin number hriat loh a nih avâng chuan ka la duh mai lova; mahse a rawn tih nawn avang chuan a pawimawh a nih ringin ka la zuia, mahse lehlam aṭanga rawn ṭawng ri ka hriat rualin dah mai ka tuma, a rawn hria nge mawni “Duati dah suh, in bia ang, khawngaihin dah suh" a tih avâng chuan ka tawp data.
“Enge sawi i duh, ka be châk vak lo che a nia" ti chang fakin a thusawi tur ka ngaithla a “Tinge min block?" a rawn tihchuan ka nui hak mai, “Ka duha, ka block che a nimai, chu zawng chu em ni i sawi duh? Ka dah dâwn, hei pawh hi ka lo block leh nghal ang, i aw ri hriat pawh hi ka peihlo" ka tingheka, ka thin a tirim thar leh ṭun mai.
“Nilo, khawngaihin inbia ang, dah suh aw, min block suh, chutilo chu number dangin ka rawn be leh ang che. Nangmah avângin sim ka lei leh a nih hi" a tihchuan ka ner naka, a aw ah chuan ka block leh mai a hlau hle tih ka hria, kha chen in sawifiah ka tum lai khân a ngaithla duh lova, tunah in biak a duh leh si amaw? Zaklo lutuk mai.
“I duh leh lei ṭiah ṭiah la, Sawrkar zem zen te chuan leina tur i nei hle ang chu. Eee i bialnu mawng er zet, ni leh lo i nupui rûk thup kha bia la i hlâwk zâwk ang, ka dah ka be duh lo che ka tih kha. Kha chen insawifiah ka tum chunga ngaithla duh lo tu i nia, i thusawi ka ngaihthlakna chhan tur a awm bik lo, mangṭha" tihmakin phone chu ka dah zuia.
Ka rilru a tihnatna ngaihtuah chuan tuna ka thil tih hi chu nêp tak a ni, la hmangaih viau mah ila a lakah nem tak leh der dep lutuka awm ka tum lo. A tello pawhin ka awm ve thei tih hi hre rawh se, a mi ngenna avâng chuan block duh bik lovin a number erawh chu ka save duh miah lo thunga, ka status hmuh pawh a phu lo.
“Min haw mahla keichuan ka la hmangaih reng che a nia, i thinrim reh hunah ṭha taka kan in biak ngei ka beisei, tûnah rihchuan min haw riha ka hre thiam che. Ka lo nghâk ve char char ang che, nang in kei min nghah ang khân, ka hmangaih che" tiin message chu min rawn thawna, ka chhiar nângin ka chhâng duh lo thung.
Thawk la ham hamin “A tir khân min ngaithla ni la, hetiang dinhmun hi thleng lovin hlim takin kan la awm thei tur, min tina kher in hmeichhe dang kha rawn hruai lo la tûnah pawh khan ka ngaithla thei tur che, mahse engkim hi i thiam loh vek a ni. Chhe te tal pawhin min ring nila chuan hlim takin kan innei tawh tur" tisapin ka ṭhu thla hnaka.
“Nuntluang ka lo lêng" ka ṭhianpa ka kawm thar Duhsaka chu a rawn au lût lâng lâng a, ka lo nuih nghal hak mai. Amah hi mi thawveng lutuk a nih avâng hian ka nel phian bawk “Lo lêng lutuk rawh" tiin ka nui lui sanga, ka chhûngril lamah erawh Sama thusawi chu a ri reng thung.
Min la hmangaih ve tak tak angem? Nge ni a thudik a hriat mai avangin ka lakah inthiamlo in khatiang thu kha a rawn sawi zawk ni ang? Duhsaka pawh chu ka kawm ṭha thei meuhlo, a ni erawh a ṭawng duh chi a ni bawka, a ṭawng bawrh bawrh reng tho, a châng leh a fiamthu thawh chu ka nuih pui leh hak zela.
“Min chhâng duh lo em ni? Kumin krismas chu lo awm rawh aw, in biak ka duh ka tih kha, lo haw miah suh aw" Sama bawk a ni. Thawk la ham ham in ka ena.
Dik tak chuan kan inṭhen dân kha keipawhin ka hrethiam theilo, keiai hmeichhe dang a duhthu min hrilh khân tun thleng min la tina a, mahse ka hmangaih loh phah miahlo. Ka la nghâk renga; mahse tih hi kan inkarah a awm tawh tlat thung. Ni e keichu ka hmelṭha lova, pian nalh tak leh hausakna, duhawmna leh engkim hmeichhia in an neih ṭhin ang hi keimahah a awm velo, tlin a lo har ngang ania nge, khatiang tur kha chuan min lo in hmangaih tîr lo mai sela ṭha tur.
“I va ṭawng duh lo ve i rilru ana em ni?" Duhsakan a rawn tihchuan nui hakin “I ṭawng tui sia ka kian che a lawm, ṭawng bawrh bawrh rawh ka lo ngaithla vek a nia" tiin ka nuih sen sena.
“Keimah chauha ṭawng kha a nuam lo alâwm, mi chhâng ve zel rawh, um aw ee te lo ti ve tal la" a tihchuan ka nui chhuak hak mai.
“Aw le a nih titi leh tawh la, ka lo ngaithla leh ang" tiin phone chu ka en zauha, Sama message bâk ka ngaihtuah thei tak tak lo. Nêp ka inti a, mahse nêp lo theilo in ka hmangaih miau bawk si, chân tak tak tura ka indah phei hi chuan ka ṭah a chhuak sa ṭun mai.
“Zanin chu i chau ania'ng kan haw phawt ange, zan dangah ka lo lêng leh mai dawn a nia aw" Duhsaka chuan tiin a chhuak zuia, ka zui nghal vat “Tinge, ka chau hleinem la awm rawh" ka ti ve tak nangin a kut rawn vaiin a zai zui hlawrh hlawrha, hepa hi chu aw a â thei a ni, au zui tawh bik lêm lo chuan inchhûng lamah ka luhsan zuia.
Kawngka chu kalh ṭha te te in ka mu a, Sama message chu chhan ka châk bawk nen ka chhâng zui ta nge nge a “I duhthlanna a lawm Sam, min rawn ngaihven duh tawh reng reng suh, kha chen biak che tum leh min ring turin ka ngen che a, ka thusawi i ngaithla duh miah lo a nih kha, kumkhat chhûng ka nghâk che a sin, tin, thudik i hriat hnuah pawh min hmu turin Aizawl ah pawh i rawn kal duh hleinem, ih maw? Ka hmangaih lutuk che, nang aia mipa hmangaih hi ka neih leh tawh pawh ka ring lo, nitin khân ka nghak che a, ka status chhan che a; mahse en reng si khân min chhân erawh i tum ngailo a nih kha" tiin ka senda.
Type zawm leh in “Mahsela hmeichhe dang nen in awm dun lai i rawn status fo a, i hlim zia mawlh min hmuhtir ṭhin a nih kha tiraw? Ka na a sin, khâng thil te khân engtiang chiahin nge min tihnat i hre lo ang tiraw? Nang chu mipa i nia, hmeichhe rilru i hrethiam ngai lovang, kan mualpho hmat zia hre reng in ka hmangaih em che avângin ka in hialah i riak a, nang ngei pawhin ka rilru i hria a ni lo'm ni? Mahse min ring chuang lo, ni e keichu ka hmelṭha lova, keimahah duhawmna leh mawina a awm ve miau lo a, keiaia ṭha thlan mai kha a ṭha zawk a lawm tiraw?" tiin mittui parawl ṭeuh chung chuan ka type mawlh mawlha.
Ka thawn rualin a seen a, min rawn chhâng mai lo, min chhan dân tûr a ngaihtuah pawh ani mahna “Ka rilru ana êm a ni, ka tisual tih ka hria, mahse engkim siamṭhat leh ka duh, Mary kha chu ka thawhpui mai a nih kha" a rawn tihchuan ka thaw chhuak ham hama.
“Engmah ka sawi duh tawh lo, a tawk tawh. Nat nawn leh ka duh lo, ka tuar chhuak ṭep tawh e, khawngaih takin min rawn be tawh lo hram rawh. Ka rilru tina thar tur chuan engmah rawn sawi tawh suh" tiin phone chu ka dah zuia, ka mittui bawk chu a rawn tla leh ta.
Mawimawian “Hun hi her danglam thei ila, nang nena bul ṭan ṭha turin, mahse a remlo NANG NENA LENDUN HI" ti a a lo sawi kha a dik zia chu a rawn lang chho zel ni maiin ka hria, kan hmangaih ber te kan nei thei ngailo an tihchu a lo dik nimaiin ka hria, eng emaw buaina hi an nei ngei ngei ṭhin, pakhat zâwkin a hmangaih viau laiin pakhat erawh in alo hmangaih tâwk loh vang a lo ni fo a nih hi.
Ka beiseina neih lai kha chuan ka la hlim ve ṭhin; tun hunah erawh engmah beisei tur ka nei tawhlo. Ka beiseina chu chhem bo va, a mei alh te pawh tih mih a ni tawha, êng chhuak leh tur chuan rei tak nghah a ngai tawh ang. Ka tana par lo tur ka tana par tîr tumin ka huanah ka seng luta, mahse a par lohna hmun tura pâr na na na chuan reiloteah min vuaisanin a bo hlen ta a ni.
Ka mutthilh theih mai loh avâng chuan ka let kual ka let kuala, a message lah ka en duh tawh chiah bawk silo. Mahse rilru a kam ṭun reng tho si, ka ngaihtuahna lamah ka lute hi a na ut ut tawh mai. Christmas awm turin min duh amaw? Nilo, ka awm tawh lo ang, a ni nena inhmuha, khâng a thusawite kha ngaithla leh tûr chuan ka duh tawhlo, a tlai tawh. Tûnah rih chuan a ni hnaih rih loh hi ka duh zâwk, awlsam taka ngaihdam leh mai ka duhlo.
Ka tân eng chen chiah nge a huam tih ka hriat hma chu a lakah eng beiseina mah ka pe hek lo vang. A duha, a chhuak alâwm, ka chhuah tîr reng reng hleinem, amah ngeiin a huan duhloh, a pal hungna pâwna a chhuahsan chu a pal hungna lawn liamin a rawn lût leh mai tur a ni.
A kal chhuah ngam chuan a rawn luh leh dân tûr chu a hna a ni tawh, keiin ka huan pâwna kal chu va hruai leh turin theihna ka neilo, miin an lo chhar tawha. A neitu dik tak bula let leh a tum a nihchuan amahin hma ala mai turah ka ngai, chutah pawh inchhirna dik tak nen ngei a ni tur a ni.
Ka in ngaihtuah reng tâkah chuan hriat loh karin ka lo muhil ve ta hrama, zîngah mit bui lûkin ka la tho zui, ni hman a nuam leh dawnlo hle mai.
ZAWMNA
Kar a ral leha, keipawh ka pângngai chho ve telh telh bawk, ka nun hah ru em em ṭhin pawh a bo ṭan tawh bawk nen ka hlim leh thei viau tawh mai.
“Morning" Sam-a message chu alo awm leh vang tawha, ka chhâng miah lo chungin message min thawn a ṭhulh duh lova, min rawn thawn deuh reng zêl.A âwl viau emaw ni, chhan loh reng chu a mawilo tiin ka chhâng ve maia, bâkah Rengpuia rawn lêngin thil an sawi fiah bawk nen ka thinrim lutuk pawh a reh deuh.
Ka zungbun leh ṭhi paih an zawn rei zia an sawi phei kha chuan ka nui ve lo theilo, kha Mary pawh kha a rawn zinpui mai mai thu an sawia, dawt an sawilo tih ka hria. Hetiang lamah hi chuan an ni ṭhianho hi chu ka ringhlel lo, dawt an sawi ngai ka hre miau lova.
Thudik pawh u Sangpuia ngeiin a lo hrilh tih ka hria, u Sangpuia ka huatna pawh a reh phah ka tilo theilo. Engvanga thudik lo sawi nge a nih ang? Ka lakah a inthiam lo nge ni anga, Sama lakah zawk? Engpawh chu nise thudik a lo sawi hrim hrim chu ka lâwm thung.
“Vawiin chu ka châwl dâwna, in bia ang hmiang" Sama bawk a ni. Runluih ka châk bawk nen “Kan in biak rêng hi" ka lo ti zauha, tum hmuk emoji hi a rawn thawna “Tinge min hnial khân hi i hriat em em a, Duati min ngaidam tawh la, Mary kha chu i thik tur mai mai in a nia ka tih, ih.. ina i rawn kala ka kuah bak kha ka tawk miah lo, dik tak chuan kan awm hrang tur ka huphurh zia i hria, ka ngaih em em lai che a i bialpa hlui nen in infâwp lai hmuh khan ka na em a ni, dik tak chuan keiai i tawn hmasak a ni a, ka awmbo tâkah chuan keiai i thlang leh ah ka ngaia, i thusawi lah kha ka hriatchin chu i hriat kha" tihchu.
A ngaihdan chu a dik tho mai, u Sangpuia ka duh tih ka sawi lai chiah kha a hmu miaua “Ka hria lawm, sawi tawh lo ang. Tunlai hna in buai lo em ni?" ka tihchuan “A lal chin ka ni ve a, ka awl har har a lawm" a rawn tikher chu ka ner sak mai “A nih chu, keichu ka awl ve thei lova, min rawn pui la a ṭha ang, a ngai leh lo. Nula rim rawh" tihchu ka thawna.
“Ka duhlo, nangmah ka rawn rim ang che. Christmas chu lo awm tawh rawh aw, lo bo tawh miah suh" a tihchuan ka thaw ham hama, a thusawi chuan ka ṭah a tichhuak leh riau. “Sam, nang nen chuan a rem tawh lo ka tih kha, nat leh pawh ka duh tawhlo. Tûnah rih chuan tumah hi hnaih tawh rihlo ila ka duh, nakinah chuan ka hre lo le, tûnah chuan khawngaihin khatiang lam kha sawi tawh rih lo ang" ka tihchuan min chhâng lova, a seen thung.
Ka nghah reng hnu pawha a rawn chhan tak lohah chuan keipawh chuan be tawh lem lo in hla play in inchhûng vel chu ka tifaia, ka hla play chu ka zai pui pah rat rat bawk. Hun hi upat pauh leh hian a kal chak nimaiin ka hria, tûnah chuan Ber thla kan chuangkai leh der tawh chu ania, naupan lai kha chuan hun kha kalmuang kan ti em ema.
Mahse kum 20 kan han pêl chiah chu, kum hi a in up dawrh dawrh nimaiin ka hria, kum hi a liam zung zunga, reilote emaw kan tih chhûngin Christmas a rawn her chhuak thut thuta, nghah chhûng rei viau si a mas chhûng lah a tawi leh ṭhin bawk lai hi a ho ka ti ṭhin.
Zanlam thlengin Sam-a chuan min rawn be tawh rihlova, a lungawilo viau pawh a nimaithei, a pawilo a ṭha zawk. Min rawn biak reng kha chuan ka chhâng lo thei silo, alakah nêp tih ka hlawh mai mai, Valpuiate ho leh Manunite chu an rawn lenga, enge an hriat ni.
“Tinge Samuela chu ngaidam ve mai la, thil tisual thei vek kan nia. Nangpawhin ṭhen chu i duh tak tak em ni?" an tihchuan ka en kara “Chutiang ka sawi lo, hun ka duh ka timai a nih kha, vawihnih ka tisual tawha. Alakah tlâwm takin ka sawi chung pawhin khatiang kha a thleng tih in hriat kha, in tawn ve loh avângin in hrethiam lo pawh a niang, tûnah chuan hlauhthâwnna hlirin ka khat tawha, na tuar reng tur chuan ka hriselna pawh hian a tlin tawh lo, min nghâk turin ka timai a ni" tiin ka chhâng a.
“I hmangaih a ni lo'm ni?" an rawn tihchuan ka nui saka “Hmangaih e, hmangaih lutuk tlat, chuvang chuan a lawm ka tihsual ni miahlova ngaihdam dil tuma ka lo nghah ṭâng ṭâng, biak ka tum reng ni. Mahse ka hmangaihna au aw chuan a ko eih zo lo a nih kha, chutah pawh la beidawng lovin a rawn haw hun ka nghâk a, mahse enge ka rawn hmuh in hria, a ṭhian mai mah nise khatih laia ka natzia kha ka theihnghilh theilo" tiin mei chu ka chhawm ṭha a.
Sawi tur an hre tawh bik lo nge an ngawi ṭhapa, “Ti rawh u, spicy chhûm leh ang u. Kan chhum lohna a rei tawh emai, kumthumna a ni tawh, kan inhmu khât tawh riau mai" an tih avâng chuan pawisa chu thawh ve in Kimbawiha te chu an chhuak zuia, hmeichhe ho chuan a chhumna tur tui kan lo chhuang sa a.
“Samuela chu ka khawngaih reuh e, ngaidam nghal lo mahla keichuan in ngaizawng leh ngei ula ka ti, tûnah phei chuan kan khaw nula ah pawh hian ngaizawngtu a ngah lehzual a nia, i chân hlauh ange, hna a nei tawh lehnghâl" Manunin a rawn tihchuan ka nui saka.
“A pawi hleinem, hmeichhe hmelṭha deuh a hmuha a danglam nghal zel theih chuan min hmangaih tak tak lo tihna a nimai; tin, a hna neih mai avânga min iai a nihchuan keipawhin hna ka neia a ni neihloh laia ka iai loh ang kha ka lakah rilru a pu ve lo a ni ang. Min hmangaih tâwk lo tihna a ni daih ang" ka tihchuan an nui hak haka.
“Lehkhathiam nge nge hi chuan tehkhin tur pawh in hre deuh alâwm, mahse mak deuh chu zirsang pui puiah pawh hian mâwl tak tak, midang lehkhathiam lo zâwk te hmuhsit chîng, an thiamna chhuang lutuk an awm tlat nia, hman niah pawh hetah dictionary leh thil dang rawn zuar hmeichhia leh mipa an rawn kala, a eng a mah hma in kan awmna hi ramri a ni bawk nen ‘Mizo in ni nange?' te a rawn tia, bâkah kan English thiam leh thiam loh min zâwt a, kan thiam lo kan tih kha ‘English in thiam lo amaw? In va han ṭhing tak' te a tia, (HEI HI A TAK TAK A MI AW
KHAW MIPUI HO IN A THIL ZAWRH PAWH AN LEISAK LOH PHAH) a ṭhing tak tak ani" an tihchuan ka nui haka.“Khatiang kha an awm ve alâwm, an class a sân vang maiin lehkha thiam emaw an in tia, khatiang kha chu a mâwl tâwka zirsang ah ngai tawp rawh u, tirawh u chu mipa ho thawm a rawn awm ania," tiin mei chu ka chhêm a, gas nei tho mah ila zân lamah hi chuan meilum han ai te hi nuam ka ti bawk nen rawng ka bâwl te a nihloh chuan thingpui vêl lum nan pawh ka hmang mai zel.
“Kha a tui chu in lo chhuang tawh em? Chhûm vat teh ang u, ka ril a ṭam tawh a nia" Valpuian a tihchuan nui hak hakin kan siam nghal zung zunga, an ni erawh phone enin ṭhutthleng leh chhuatah chuan an ṭhu hlawma. Hmeichhe ho chuan kan thil chhum chu a bâwl hlo nen chuan pawlh kualin kan siam zawh chuan fian chu la in vaia ei theih tur chuan kan chhawp tawpa.
Sting nen chuan hmehin a souce kan telh zo vek bawk nen a thak ṭha ngei mai, kan insut ri leh hlup ṭhin. Wipes chu keng ṭhapin kan inhru pah paha, ka hmai phih peih loh chânga ka hruk nâna ka lo lei chu a fuh phian mai.
“A thak lutuk" Valpuia phei chu a hnap tui a lang tle ralh mai, nui hak hlawmin eizawh loh a uiawm bawk nen kan ei lui ngar ngara, a tâwp lamah phei chuan mipa ho chu kham hmakin hmeichhe pathum te chuan kan ei lui a, a tâwpah chuan si hluam leh hnar ping vek chuan kan ei zo thei hram a, spicy hi chu pum lam tina lem lo hian ka chhûngah hian a thak tawpa, a ṭhat ve na tak niin ka hria.
Kan ei zawh tâkah chuan seng felin mipa ho erawh chhuat daiah chuan an mu pheng phung mai, an va han buaithlak thei tak.
Sama lah chuan min rawn be duh tawh lova, biak hmasak lah ka tum der lo. A duh chen chen min be lo sela engmah va sawi ka tum lem lo.
ZANTIN DAH KAN TUM CHHIN ANG AW, MAHSE BUAI ANAT CHUAN KA THEI KHER LOVANG A, IN HRIATTHIAM AH KAN TI ANG CHU.