TE DOY 15K BY Abbra Reo Ririni Khiangte (Pitartei) (Completed)

[ngaia]

"Apa,Chips ka ei duh.."

"A u Mami kan hrilh a nge."


Jayden țawng ri leh lang lang vang in mit ka meng a,Awihawm loh khawp in ka taksa chu a rawl țhum mai,Nichin khan Zothana zawk in washroom ah min pawm lut a,Tui lum in kan intleuh dun thuak a,A chetdan mawlh kha!

Ngaihtuah zawm duh lo in ka ip zui chawih a! Khum ah chuan ka inlet thak a,Zothana leh Jayden chu khum ah an lo țhu ve reng a,Jayden chuan ngaihngam zet in Zothana taksa chu a ngheng ve ran a,Zothana chuan a phone games a khelh tir leh ani mai thei!

"Games an lo inkhelh tir leh ta e. " ka țawngri an hriat rual chuan an rawn hawi dun dawrh a! An hmel landan a la in ang chiah leh nghal,Ka fapa cute zet ang chiah in Zothana chu a meng ve dawrh a,Mahse a rawn nuih suk rual chuan ka hmai a sa nghal țawn țawn mai!

"Mum,Long time i sleep tawh.." Jayden rawn ţawng dan vang chuan ka nui hak a,Zothana chuan zo zet a rawn pawm nawlh in ka bulah a rawn mut tir a,Jayden chu a khek chul a,Pawm nawlh te hi nuam a ti miau a lawm..

Kan in karah Jayden chu a mu kak a,Zothana chuan a ban chu ka nghawngah a rawn rawlh lut a.
"I ziaawm deuh tawh em?" A rawn ti sup bawk,Ka ngaih bel nge ka hre loa,amah pawh chu a lai ru ve tho in ka hria,Chu tih rual erawh chuan a mitmengah min ngaihtuah hluah hluahna ka hmu tel zel tho.

"Umm.."
A kutțang in ka beng a rawn khawih a,Min melhna vang ringawt chuan ka khur ru der der thei!

"22 tur a lawm.." Jayden a number sawi sual zauh chu a correct sak a.Jayden lah a buai phah vek a,A kut vai lap lap chung in 1,2,3 aţang bawk a sawi ţha leh a,Zothana chu nui huk pahin a rawn inbeng kang a.
"I naupan lai nen in danglam miah lo ania.." a rawn ti sup bawk,Ner nawng chung in ka melh rawm rawm a.
"I țawnglai tihbuai kha i duh ngai lo a,En la,Jayden pawh hi,a țawnglai a kan lo țawng chuan a kut nen meuh anih hi a țan ve țang țang!" Nuihza insum zet in ka fapa sam ah a tuai zauh a,Ka nui ta hak thung! He mipa hi chuan ka inhriatchian aia nasa in min hrechiang zel dawn zawng chu anih hi!

Lalat Park a kal turin kan inkhalh chhuak a,Zothana pawh tuesday hian Mumbai lamah a kal lawk dawn a,A awmlo tur chu thih hreh hian ka lo hreh ve țung ringawt a.

Khaw dul ruih nena inrem zet in fullsleeve dum a ha a,a chungah wind breaker jacket ban neilo a ha leh thung,Jayden pawh Zothana ngaisang ngang ani a,Apa inchei dan ang zel a inchei ve a duh tawh mai!

"Kan hnung a car khian min la zui char char!" Ka ti sep a,Zothana chuan front glass chu herh zeuh in a thlek ve a.Jayden erawh in chips a ei mial mial thung.

"Kan kalna tur a in ang vang ani mai thei.." a ti sup a.Ka ţhutna lam side glass aţang chuan ka melh leh ta hram a! In aţang kan inkhalh chhuah hnu lawk khan kan hnungah a rawn tlan tawh a.

"Bawihi..?"

"Umm?"

"Ka rual chuan Mumbai ah in rawn kal ve mai dawn mi?" A ti sup a,Hneh zet in steering a herh kual a,A wind breaker jacket hak puar deuh chuan ati lang lian zual vek mai bawk.

"Jayden te school kal ber hi.." ka ti nang nang a! Naupangchhia zet in zui ve mai ka duh tak tak bawk.

"Nithum lek chawlh chu a pawi dawn mi?"

"Ka hrelo,A hnufual hi ka hlau ve a.."

"Ok..I tih dan dan,Kan pathum in chawlh hmang a kan la zin hrim hrim chu a ngai ang " a ti leh sup a.Ka bu zauh a.

Zothana chuan steering hum reng chung chuan music system chu a rawn ban zauh a,Kenny Rogers aw pa zet mai leh cool raih hi a rawn zai a.

"He pa nen hian ka tehkhin deuh ţhin che.." nui pah in ka ti a,A ţhen suk a.
"Chu pa min ti viau ani maw?" A rawn ti sup a,Min rawn en chuan min fiam tih ka hria,mahse ka lo bu nghat a! A nui chhuak ta huk bawk! A pa reng a lawm le.Kenny Rogers pawh hi a aw mai nilo a pian te hi a pa a,sa țha țung ni silo hian a pianphung hi hmeichhe tan chuan innghahna khawp a nghet leh hrawl tham ani ve tho bawk! Chu tih rual chuan khawvel milar a ka mipa ngaihsan ber ani tel leh cheu bawk a.Ka bula ţhu mek pa lah hi ka nuna mi pawimawh ber leh hlu ber ani bawk.

Park kan thlen rual chuan Jayden chu a ri nghal chul a,Zothana'n zo zet in a kal duhna piang ah a pawm kual nghal nawlh nawlh zel a.

Ka awmdan diklo vang chuan ka hawi kual thuak reng a! Kan chevel min thlir reng tu an awm hian ka hre tlat a,Ka hawi kual vel pawh chuan chutiang awm tur chu hmuh ka nei chuang lo,mahse khawi emaw lai aţang keini pathum min thlithlai ru reng tu an awm tih erawh ka hria!

Zothana chuan Jayden chu dim vak lo hian a darah a pu nawlh a,Jayden a nui hawk hawk reng a,Ka lam pan in a rawn pen pui pawk pawk a,A khattawk in Jayden mawng ah chuan a ben sak leh thuk zel bawk a.

"A thil tih i hria em?" Ka bula Jayden rawn nghah thlak pah chuan a rawn ti a.

"Saw lai hmeichhe naupang biang ah sawn a fawh sak anih chu.." ti hluai pah in Jayden sam ah a tuai leh thuak a! Kei erawh phawk zet in ka meng awk thung!

"Jayden,i ti tak tak a maw?" Ka ti hluai a,Zothana lah chuan nuihza insum si,Nui chhuak hreh bawk si hian a lo en ve reng a.Jayden lah biak loh ang hmak in a ngawi hmiah a..

An rawn kalsan tak hmeichhe naupang chu ka en a! A sam a țawng kak leuh a,Jayden nen an inrual mai thei!

"I va han mak reuh tak.." a biang ah ka piai ta vak ringawt.

"Mummy a na ...." a ti ve chul a.
Zothana chu a țhu hniam a,A biang ka piai sen sak tek ah chuan a tuai sak zauh a!

" I rilțam tawh em?" A ti leh nghal daih.Jayden rang zet a buk nghat rual chuan a pawm kang nawlh a.

"Bawihi cafe ah kan chawl dawn mi?"
"I hauh ve ka ring a.." ka ti hlak a.
"Khatiang in hauhna chi anih loh kha..I naupanlai pawn ka fawp ngun che e mai.." Nuih suk paha a rawn tih rual chuan rum zet hian ka melh a.

Ka darah a rawn kuah ve thuk a,A rim pa zet chuan min fan nghal veng veng bawk!

Mipui ni nuaih nuaih kar aţang mipa pakhat hian min rawn su nawk a,Zothana'n min kuah lo phei se chuan ka tlu hial ang.

"Ka tihpalh.." a ti vat a,Mahse chu thu a sawi pah a chiang zet a Zothana a enna chu ka hmu chiang kher mai!

"Fimkhur tawh ang che.." Zothana chuan a lam a min pawh hnai salh pah chuan a ti sup a.Chu pa chu a bu zeuh a,A kal sawn a.

"I na em?"
"Aih...."
"Vawiin chu mipui kan ţhahnem deuh a,Fimkhur lo deuh an awm nawk mai." A ti hluk a.Ka dar ah chuan nghet leh zual a min kuah in min pen sawnpui a.

Ka hawi let leh hram a!

Min su tu pa khan hlalo te ațangin min lo en zui reng anih chu! Mipui kar ațang chuan ka hawi let tih a hriat rual in rang zet in a inher vut a.A bibo ta nghal hmiah a!