STORYFB.COM

KA HMANGAIH THINGTLANGPA






CHAPTER 32






Room aṭanga kan in zui chhuah lai chuan a putea te ho chuan min lo en ṭhapa, nitin kal ve mah ila ka riah ṭhin loh avângin mak an ti tih ka hre mai, nizânah khân an mut luh hnuah room-ah kan awm dûn miau a.





“Nunui chu i riak elo?" a putean a rawn tihchuan ka bu nghata, dik tak chuan nel ve tawh viau mah ila ka zah thar tlat nia. Sam-a bânah chuan vuanin ka hmer ru ngat ngat mai “Pute kan in ru alâwm" a tihchuan a pitei te nen zawng zawng chuan an rawn hawi phâwk hra a, naupang ho lah thil hrethiam rual an ni ve tawh bawk nen an lo au nghal chûl mai.







“Bawiha i ti tak tak em ni?" an rawn tihchuan Sama chuan bu nghatin an ṭhutna lam chu min panpuia, ngawi reng chuan ka zui ve zel bawk. Dik taka sawi chuan ka taksa hi a rawl deuh ṭhum mai; mahse, ka sawi duh lêm lo, ka zahna tur mai mai a ni tih ka hre miaua, an bulah chuan min ṭhut thlak puiin thil awmzia zawng zawng chu a sawia.







Ka chhungte min tih dan erawh a mawi lam deuh zâwngin a sawi thung. Min tuithlar tihchu a sawi duh hauhlo, chu chuan amah min rin tîr zual, a kut hmer chuan ka khalsak niap niapa “Um chutia nu leh pa berin an rem tih miau loh chuan in hmangaih bawk si chuan kawng dang in nei lo a nih chu, engpawh nise i ni te ho pawh ka lo be kual anga, a ranglama palai in tirh angai a nih chu" a tihchuan ka lo ṭang ru ngei mai.








“Hahdam rawh engkim a ṭha leh vek mai ang" Sama chu ka bengbulah a rawn phun sar sara, ka nu leh pa lah kha an thinrim ropui sia an lo chhâwn ṭhat duh ka ring lova. Engkim hi sawisa mai a ṭha in ka hria, mahse Sama lah chuan a rem ti tlat si lo, keipawh chu ka ngawi ve ta tawpa.







“Eng pawh chu nise, i thawmhnawte pawh helaiah a awm vek thova, nakinah pickup nen hian in zu la mai dawn a nia, in sawirem hun kher kan nghah chuan i chhûngte an awm hla bawk nen i inthlakna tur lâk tho a ngai dâwn sia" an tihchuan ka hnial bik lo.







Chaw te chu eiin chaw ei kham chuan ka bungrua la tûr chuan kan chhuak hlawma, Sama chuan min chhaihin kan nui leh hak ṭhin. Tûnah chuan a nun nguai lutuk kha a reh ve ṭan ta in ka hria a, ka lâwm viau bawk.






Ka bungrua ho zawng zawng chu loadin kan thiar chho veka, min hmutu ho chuan thil awmdan an hailo tih hriat takin kan indah fel lai aṭanga thil hrechiang châk a rawn kal chu an awm ta zuta, an rawn kal belh tâk zelah chuan Sama chuan room-ah min tawmpui ta tlata.







“Innei hmu ngai lo ang mai, hawkdak hlawm lutuk. Tihian awm reng mai ang aw" tiin khumah chuan ṭhuin ka hnunglam aṭang chuan min kuaha, keipawhin pawi ka ti em em lo, mi hmuha in lan reng pawh kha inru hlim kan ni ve bawk nen a nuam lo riau.








“Ka nute bulah chuan palai chu tirh in tum ta em ni? Engmah an lo sawi duh pawh ka ringlo" tiin ka phunsapa, ka nu min rawn ânkhum dânte ka ngaihtuah chuan an insawirem theih ka ring lo bur, nu leh pa ka nei vanduai ka ti dâwn nge keimah hi ka vanduai ni zâwk dâwn ni, ka thil hriat theih tirh aṭangin an lakah ka duh ka dil mai mai ngai lova, school ka kal lai pawhin money tur tak ngial pawh ka dil ngailo, an mahniin min pe mai ṭhin.









Tûnah erawh hmangaih ka neia, chu ka hmangaih ngei chu neih ka duhthu a vawikhat nan ka sawi ve a, mahse pawmpui ka hlawh silo. Chumai nilo in an fanu in hmangaih ka neih ve mai avang in min tuithlar duh ania, ngaihtuah chian phei chuan ka zakin hrehawm pawh ka ti. Sama lakah ka inthlahrung bawk, ka chhungte'n an duhloh zia thil tih in an lan tîr miau si a.








“Kan tum chhin angai alâwm, an lo rêl duh lo a nih leh midang pawh kan pun mai ang chu. Keichuan ka iai phah hauh lo che ania, ka hmangaih i ni a, a ṭul chuan kan pahnihin kan fahrah dûn mai tur ani. Keichu fahrah mai ka ni tawha, nang leh zêl fahrah tura ka duhloh vang zawk che a nia, keimah avanga i chhûngte i do ngam ringawt pawh hian ka lakah chuan hmun pawimawh a chantir che tih hria la, ka lakah inthlahrung ngai lo la, sawi hreh nei ngai suh; ka theih phawt chuan engkim tihsak che ka duh" tiin min kuah hlu hlua.








“Ka hria alâwm, keipawhin ka hmangaih che tih i hria, hmangaih kan neih tawh chinah chuan a tawp kan thlen ngam a ngai a lawm, kan chhungte chu pawimawh mahse mahni duhdan kan nei ve in hmangaih kan nei tih an hriatthiam duh miau loh chuan hrehawm huam pawhin kan kal mai tur a lawm, nangpawh in hre reng rawh. Min kalsan ngai lo la, ka neihchhun i ni tih hre rengin ka kiangah awm reng ang che" tiin ka nghêng ar ara.








“Ka nupui i ni tawha, mipa dangin an neih che ka rem ti ngailo vang, MLA fapa an ni emaw? Tu pawh ni sela ka lak aṭangin la sawn thei tur khawp che in eng thuneihna mah ka neih tir lovang, ka neih chhun. Ka damchhan i ni tawh dâwn tih hre reng ang che, mipa dang rawn lang fo hi ka duh lova, chuvang chuan tun aṭang chuan ka nupui i nih thu hi tupawhin hre vek rawh se" a tihchuan ka nuih seih mai.







Ni e hmangaih kan neih tawh chinah chuan ngam loh leh tih hreh kan nei tawh ngailo, hmangaihna a kan tlûk luh rual khân huaisenna leh a ṭul hunah chuan engmah pawisaklohna kan nei nghala, chu chuan hmangaihna kawngah mi â ah min siam ṭhin a ni. Kan chhungte do ngam hial khawpin min siama, chhûngte lak aṭanga awm hran pawi tihlohna kan neih phah bawk.






Hei ngei hi hmangaihna an tihchhan a niin ka hria, hmangaihna a kan tlûk luh rual khân engkim chân kan huam nghala, a hmangaihna ngei pawh haw thei turin a hmangaihna salah min hnûk lût thung si.





Nu leh pa te hian hei hi kan hriat angai, kan fate hian an kawppui tûr âwm mi; an hmangaih an tawn aṭang chiah hian kan ângchhûng aṭanga kal chhuaha an hmangaih ângchhunga awm turin an in peih tawh tih hi.





Mipa emaw hmeichhia emaw an dang lo, kan thunun na in a hneh theih loh khawpin keini min hmangaih ang chiahin an thinlungin a thlan hmangaih an in peih tih hria a, lâwm taka pawmpui mai hi a ṭha tih hi hria se chuan kan fate nun hrehawm tilo in kan awmtir thei tur.







Mahse mi tam tak chuan kan fate duhthlanna tihchhiatsak in an nun hlimna tur ka ûm bo sak fo si, duh thlang thei turin an puitling tawha, an thlan sual leh an duhthlanna a nihnaah nu leh pa demna tur min nei dâwn lova, chuti nilo a kan duhzâwng ringawt neih tir kan tum chuan kan fate nun a chhiat chuan kan fate ngei kha kan hmelma an ni tawh ṭhin.






“Engpawh chu nise, thil a ni tawh sa sa, ka inchhir hauh lo a nia. Nang lo neih ka tumlo hrim hrima, ka nu leh pa chuan ka duhthlanna min pawmpui har an ti animai. Nakinah ni khua a rawn rei anga, min haw reng bik lovang" ka tihchuan ka chhîpah khabe rawn nghatin a thaw zui ham hama.







“Engpawh i chungah thleng se ka kalsan ngai lovang che ka tih tawh kha, tirawh mu hahchawl ang. Tih tur a awm chuan loh hi maw, hetia ṭhut reng zawng; kâwng a kham mai mai" tiin khumah chuan min mutthlak puia.






“Sam kan inhmuh tirh khân engtin nge i awm?" tihchu ka zawt a, ka hre châk miau a lawm. U Sangpuia te nên an rawn leng ho a nihkha, “Umm i hmelṭha ka tia, hmeichhia hi ka ngaihsak ngai miah lova. Mahse i rawn lan chiah kha chuan ka danglama, ka ta ni la ka ti ṭhin; Mahse mipa dang ilo duh daiha" a tihchuan ka nui saka.







A lamah inherin a hmui vêl chu ka khawihsak niap niapa, a hmui nem thep chu khawih a nuam takzet “Kan inhmuh tirh kha chuan i ṭawng duh lo bawk sia, biak che kha ka hreh em em bawk. I nelawm loh ka tia" ka tihchuan a rawn tum deuh hmuka.






“Keiai sual Zosangpuia pawh i duh tho kha" a rawn ti nghal hluk mai, nui hakin “Aw a ni te chu hmuh hlim chuan a mizia kha hmeichhe hip chi a nia, mahse a rei hnu chuan i zûn ngah zia hria in ka hmangaih daih che a nih hi, nang chu i ṭawngtam lo a, chuan a tir kha chuan zêp lo in ka la nel lo cheu bawk nen biak che kha ka hreh alâwm, i bike a ka chuan kha chuan ka nel ve deuh che a, awi i Chakai man in a cheh lai che kha a ngaihawm reuh" tiin ka nui hak haka.





“I ho mai mai, khatiang sawi tawh suh. Nangmah vang vek a nih kha" tiin ka chalah chuan a rawn pen fawka “Tinge min duh si khan i insawi duh ngai miah lova, sawi la chuan u Sangpuia nên pawh khân kan ni miah lo mai theia" ka thusawi avâng chuan a ner sawka.







“I daw zep zuap, i duh zia tilang reng chung khân engtin nge keichuan ka sawi ngam anga, min dem tum reng reng suh. Hmangaihtu pawh hrelo a mipa hmelṭha ngawt i melh de de vang a nih kha" a ti bung vût mai, hepa hi chu aw a va han ngeiawm thiam nget nget tak.








“A hmelṭha tih zawngah chuan i hmelṭha fee aw, in sawi duh lo va i inzep vang a nih kha. Ka bulah ka hming sawi silo in i sawia, ka lo hrethiam ngai silo, ka â emaia, mahse tûnah chuan i ta ka nia, ka ta i ni bawka. Khuanu ruat ṭhelh ṭep, mahse khuanu ruat dik tak kan lo nih hi, in thlawh khum fua fua mah ila duhna mai mai nilovin hmangaihna nen ngei kan in tawn phah si anih hi tiraw?" tiin ka nuih ver vera.








Rawn nui ve sakin a hmui ka hmehna kut chu a rawn man beta, thusawi a tum lai tak chuan kan room kawngka chu an rawn beng ri dawt dawta.






“Nuntluangpuii leh Malsawmkima te kha rawn chhuak rawh u" Valpuia rawn au ri chu kan hre nghal zat bawk. Sama nen chuan in enin kan ner saka, huiham min lim leh erh dawn a nih hi.






Tho chhuakin room aṭang chuan kan chhuaka, kan ṭhiante ho chu an lo awm kim ṭhap mai “In inzui leh chauh emaw tia, engvanga min hrilh lova lo innei ringawt nge in nih?" Valpuia bawk a ni “Kan inzui chauh lo, a rei tawh kum thum a tling tawh" Sama chuan a lo ti liam puata.








“In inṭhenna nen chuan a nilo nasa, a hrim hrimin enge engmah min hrilh ve miah lova, miin rawn sawi lo phei se kan hre nang, ṭhiante hriat lohah thil tih hi a ṭha lo khawp mai aw" a tihchuan midang pawh chuan an lo pawmpui ṭhap lehnghala, mi an inti thlahrung zo.








“In hriat ve kher a ngai hleinem, in ṭawngthei ve sia miin hei ai a hma in an hre nghal ang. Ṭhu phawt teh u, tak takin inruk tum em em pawh kan nilo, kan inru thut anih ber hi" Sama chuan a ti dam dapa.






A putea te ho an awm tawh rih lova, khawiah nge an lo kal dâwn ni? “Enge a awmzia, a rai sa em ni?" Rengpuia chuan a rawn ti khauha, an vai chuan rinhlelh hmel tak hian min en hlawm ngei lehnghala.








“Railo railo, virgin ngeia innei kan nih hi, thildang vang zâwk a ni e" tiin Sama chuan ka chungchang ka chhungte min tih dan nen zawng zawng a sawi tâkah chuan an ni pawh an lo bu nghat nghata, “A ṭhat chu, hmangaih loh neih ai chuan hmangaih ber bulah kal nal nal mai tur, fate in han nei anga i nu leh i pa pawh an la nem duai duai mai ang" an tihchuan ka thaw huaia, chu chu kei pawhin ka beisei.








Titi ho in kan nui leh dar dar ṭhina, kan innei thut chu mak an tih thu an sawi deuh reng bawk. Enge a mak viau na ni dâwn ni, kei erawh chuan Sama nupui ka ni thei ringawt pawh chu ka hlimpui em em bawk si, inṭhen ngailo ila tih hi ka duhthusam a ni.


ZAWMNA...





Tlailamah chaw eikhâwm rawt zuiin ar an talh hmiaha, an phur lutuk chu an ri chel chul mai. Sama nen chuan in nghêng rialin kan ena, engmah kan tih ve an phal lova “Nupa tuak thar te chu lo awm mai mai rawh u" an ti ve ngei lehnghâl, keini pawhin tihluih kan tum bik em em lo.








“Tui deuh khân siam ula, kan pa hian arsa hi a siam thiam lo ei chu a duh miah lo ania, a mît te kha in lo paih lo leh ange" tiin Ṭiau kan kal ṭuma an ar mît paih lo a an awm kha ka sawi chhuak zauha, an rawn ner nasa hlawm viau mai. Nui hak hakin Sam-a chu ka ena, tûnah chuan a hma a a hmel ngui leh ngawi reng ṭhin kha bo leh ṭanin hlim hmelin a rawn luah leh tâkah chuan kei ngei pawh chu ka hlim.








A pi thi a sûn tawh sa nak alaia, a pu a han kal leh khân a nun a tidanglam dawrh ka tilo theilo va, a cool in a ṭawng tlem em em a. Chaw a ei duh lo phei kha chu ka talbuai hle a nih kha, mahse tûnah chuan pangngai takin a awm veleh ta chu keimah chuan ka hlim ve em em ringawt.








A nghâwngah chuan kuahin ka thaw chhuak suai suaia “Hetiang hian nui reng tawh rawh aw; i hlim loh chuan ka hlim thei bik lo tih hria la, midang tâna i nui theilo a nih pawhin ka tân tal chuan nui ṭhin ang che" tichuan ka phun sapa.







Ka ngaihdam avâng hian ka inchhir lo, mi hian chance pêk nawn leh an phu châng a awma, mahse chance pêk phu miah lo an awm bawk. Thil sual an tih pawhin ngaihdam tur chi chu Sam-a ang hi an ni, in ngaihzâwn laia hmeichhe dang lo mutpui te, tin bialnu hlui emaw te hnêna kîr leh mai duh, an nat hun chauha min rawn hrechhuak ṭhinte nunah chuan kan pawimawh loh zia hriata, hun ṭha dang pek loh a ṭha.






Mipa emaw hmeichhia emaw lerh tawh tak tak chu an siamṭhat theih mai mai loh. Hetiang hi chu ngaidam mah ila in ngaihzâwn pui leh tûr chuan ka theih ka ring lo, a nêp thlak ka ti bawk. Keimah ni leh an ngaihzâwng hlui tea duhthlang thei miah lo mi phei chu hnaih tawh loh tawp hi a him zâwk. Kan lakah rilru an pe tak tak tawh lo tihna a ni tlangpui, hmeichhe pakhat erawh ka puia a bialpa in a ni a thlang lo tih hre reng chung leh a phatsan tih hre reng chung khân a hmangaih ziate a la hrilh deuh deuha.







Ka bulah a huatzia sawi reng chunga a pawm leh tho si khan amah kha nêp min tih tîr a ni ber. Puih tlakah ka ngai tawh lo bawk, kan hmangaih avangin kan ngaidam tur chu ani ngei mai; mahsela ngaihdam dâwn pawha bul ṭan ṭhat leh pui tur chi leh chi loh kan thliar thiam loh chuan mahni bawk kan na leh dâwn tih hi hriat a ṭha khawp mai.








“Tirawh movie lo en mai mai tih tur kan nei ve chuanglo, bakah ka taksa hi a na lutuk ka khuate hi a sik dawnin ka hria, eng emaw hian min kam urh mai" ti sa sain a bengbulah chuan ka phun sapa, ka awm dân chu a hrethiam nge min nuihsakin room lamah kan awm tur thu midang chu a hrilh zuia.







An lo “Eeeee" leh nasa mai, phun hluk hian ka nawm loh thu sawiin an rawn chhân lehna pawh nghâk tawh lêm lo chuan min luhpuia, dik tak chuan ka nuam lo tak tak. Keimahah hian na lutuk tih tur ni silo hian ka kawchhûngah hian danglam a awm tlat ten ka hria.






Khumah chuan min mutpuiin laptop chu a la a, kan pahnih chuan en in reelshort ho chu ka duh bawk nen kan en dûna, tûn ang lai chu hetiang lam hi en nuam ka ti riau bawk. A âwma bei than chung chuan ham bai baiin a changtupa chu a hmelṭhat zia thute chu ka sawi mawlh mawlh a.








A lo duh vak lo nge “Make-up vang mai mai anih hi, mipa ve lêm si a hmelṭha lo, hmelṭha chu keimah. Hetiang Chinese ho mai mai hi hmelṭha tisuh, lerh lutuk mai; pasal nei lai i nih kha. Tumah pasal te nilo hmelṭha tih phal i nilo, lerh de daw lutuk mai, ka sawh nawk dâwn zâwk che emaw ni? Lerh lutuk, lerhi i en tawhlo ang" a mah leh a mah ang lo lutuka a ṭawng duah chuan sawi tur min ti hrelo, bâkah ka lerh hmêl ngawih ngawih lutuk chu mak ka ti.






Engtin nge khatiang thu kha a sawi hman ni? lerh satliah pawh nilo in lerh rapthlâk uchuak lutuk ka ang ka inti takzet.Ka âng phuau in ka en tawpa, a nilah a tum bura, kan thil en lam bawk chu melhin a la rauh char char mai. Khatiang khawpa a thik kha ka beisei lo hrim hrim.





“A hmelṭha ka timai mai alawm, bâkah kan inhlat emai kan in hmu ngai dawn pawh a nilo, enge khati vak vaka min tih khera" tiin ka kut chu lasawnin ka mit ka chhin sana, a inthiam leh chiah silo nge Laptop chu dah ṭha in min rawn kuah hlu hlua.






“Tihpalh, keichuan nang bâk hmelṭha tih ka nei ngai lova, nang pawhin keimah bâk hmelṭha tih neilo la ka duh vang a nia, mu tawh rawh. I taksa a nat kha, i tan mut tam a ṭha" a tihchuan nui sakin ka kuah ringawta.