STORYFB.COM

Chapter-33



Zorinsangi POV



Thlahnih lai a liam a leh ta, ka chhungte leh thian te chuan min ngaihtuah em em a, ka thiante phei chu nitin kan inah an rawn kal thin, keipawh ka zia chho ve telh telh a, Prof. Sangzuala pawh a reh ta hmak a, bungrua kan lak ni bak kha ka hmu leh tawh lo, kan inah a rawn kal ngai lova, a chhungte inah a kal thin em ka hrelo, keimah hrim hrim pawh hi pawn lamah ka chhuak ngailo tluk a ni a, ka nu te (Prof. Sangzuala nu) erawh an rawn lang reng a, Prof. Sangzuala nen in then tawh mahila kan in kar a danglam phah lo.




Ka nau pai hi thla 7 hmel a hmu ve tawh bawk nen naute puan leh thil dang neuh neuh kan lei nual tawh a, keimah tak phei hi chuan engmah ka lei ngailo, ka chhungte a bikin ka u hian min leisak nasa a, nau puan pawh kan ngah tawh khawp mai, engmah ka ngaihtuah buai a ngai lova, ka hahdam phian, ka pum pawh a puar tha ve tawh hle a, a hma ang in ka che zung zung thei tawh lo, nau ka pai vang nge mawni zun lam hi ka in sum theilo em em a, ka zun a chhuah tawh hlek hi chuan bathroom lamah ka tlan vat zel.




Ka thiante pawh an zir zo ve tep tawh a, keipawh university kal theilo mahila online tal a kal chu ka la tum ruh ve hle, ka thil zir zo zai kha tham ral mai mai atan chuan ka phal lo, nakin ah ka naute hi a rawn lian ve zel anga, naupang dang te angin a duh leh mamawh ka tihsak ve theih nan eng emaw hna tal ka la thawh ve ngei a ngai dawn tih pawh ka hria, kan school lamah pawh ka thawk thei reng tho na in zir zawh hram hram chu ka la duh fan bawk.




Vawin lam chu ka pum hi a na riai riai a, a chang leh a reh a, enge awmzia hrelo mahila ka hlauthawng hran lo, tuar hreawm khawp a na a la ni miau lo, ka pum a len tawh vangin ka room pawh kan sawn a, in hnuai lama room ruak ah ka awm rih a, ka nu duhdan a nih mai piah lamah fimkhur ka ngai tih ka hailo, step kal vel hi naupai lai phei chuan fimkhur a ngai si a, in hnuai lama in sawn pawh ka tan a tha zawk, ka naute hi dam takin rawn piang chhuak se tih hi ka duh ber chu a ni.




Ka pum nuam lo chu ka chhungte bulah pawh ka sawi duh chuang lo, ka nu in hria se chuan kin ngaihtuah leh dawn lutuk tlat, tullo a tih buai reng ka duh lo, ka ti buai tam tawk tawh viau si a, khum ah chuan ka mu hahdam a, mahse ka pum chu a na telh telh mai, ka awmdan chu ka thlak thin a, mahse awmzia a awm chuanglo, ka hlauthawng tan a, ka nau neih a la hun chiah bawk silo nen enge awmzia ni ang, ka thil ei vang han ti dawn ila, nidang ah pawh ka ei fo si a.




A nat tak em avang chuan ka tho chhuak a, ka pum chu ka dawm ran bawk, ka in pet ruh fan fan a, chhuat ah ka for nh fel chiah tih chuan ka kap lam chu a rawn lum pup a, hnuai lam ka melh thla vat, Lalpa leh.. Ka tui bawk a kek, mahse ka nau neih nan thlahnih a la awm si a, ka kal thei tawh lo, ka ke tha te chu a khur dar dar a, "Nu.." ka nu chu a ko a, mahse min chhang tu an awm lo, ka mangang tawh takzet, "Nu" a ai ring chuan kan ko leh a, ka room kawngka chu a rawn in hawng vat.




"Bawihte, engthil nge thleng, nilo i tui bawm a keh a nih kha" tiin min rawn buaipui vat a, "Ka nau neih a la hun silo a, nu ka naute hi a tha angem?" mangang zet chuan ka zawt a, "Lungngai suh, engkim a tha vek mai ang, i naute chu engtin mah a awm dawn lo, min ring rawh, a hun hmaa nau nei an tam alawm" a ti zung zung a, a chiaia vak lem lo, phone a rawn keng lo bawk nen ka phone chu a ban a, kan pahnih chiah in inah kan awm, ka pa a be dawn a ni ngei ang.




"Marin Nghaka nen khan in lo kal hman em, Bawihi nen chiah kan awm bawk si a, hei Bawihi'n nau a vei a" a ti nghal mawlh mawlh a, ka nu a bia tih ka hrethiam nghal mai, "Bawihte hlauthawng suh aw, Marini te an rawn kal anga, damdawi in lam kan pan vat dawn nia" ka nu chuan min thlamuan tum tak chuan a ti a, ka lum na lutuk chu ka tawng hleithei lo, ka in let ruh fan fan a, reilote ah ka nu te chu an rawn thleng a, Prof. Sangzuala a rawn lang ve hlawl bawk, a hmel ah chuan a hlauhthawn zia a lang reng.




"Bawiha, Zorini hi i motor ah lo va pawm lut rawh, keini in mamawh tur ang te kan lo la khawm ang" Ka nu in a tih takah chuan Prof. Sangzuala chuan min rawn pawn nawlh in min chhuah pui nghal a, duh loh pawh a sawi theih tawh loh, ka thlan te chu a bawl tiam tiam a, Prof. Sangzuala pawh a hlauthawng ve hle a niang a tha a khur ve dut dur in ka hria, seat hnungah chuan min mut tir a, ka nu te pawh an rawn lang nghal vat.




A hnung lamah ka nute pahnih chuan min thut pui a, Prof. Sangzuala'n a khalh chak bawk a, damdawi in kan thleng vat, kalkawng ah khan ka nu in chanchin ka pa te a hrilh a, an rawn lan ve vat ka beisei, doctor te chuan min lo check vat a, nau vei na room a min nawr luh dawn chuan Prof. Sangzuala'n ka kut a rawn hum vang vang a, "Pawn lamah kan lo nghak reng dawn che, engmah hlau suh aw" a ti sup, ka chhang lo, chhang tur pawh in ka aw hi a chhuah theih ka ring lo.




Rei fe nau vei na room ah chuan kan awm a, mahse ka nei thei mai lo, doctor chuan naute a la hnaih chiah loh thu a sawi a, pawn lamah kan in nawr chhuak leh rih, kan chhungte pawh an lo awm kim thap tawh, chanchin chu doctor in a lo sawi zung zung a, ward pangai ah chuan kan awm a, ka pum chu a na bawk si, mahse a na reng lo, a chang chuan a rawn zia ve deuh a, ka nu in min chul sak a, ka awmdan pangai reng in ka awm theilo, ka awm sawn sek a, ka tai a na leh riai riai thin a, ka kap lam pawh, a bik in ka mawng lam hi a na lutuk.




A na an chhuah tak tak phei chuan ka tap leh tawp zel, Prof. Sangzuala pawh a awm mai mai thei biklo, ka bulah a rawn kal a, ka kut chu a rawn vuan leh thin, "Ka thiam loh vek a ni" a rawn ti leh sup sup thin a, a thaw leh hawk zel bawk, nau vei chuan hetiang tut ve reng hi a ni a, engmah a thiam lohna a awm loh thu ka nu in a lo hrilh vat a, ka kut chu a la hun reng thung, ka tai chu a rawn na leh a, Prof. Sangzuala kut chu ka vuan nghet hle, "A na" ti sap in ka mittui chu ka bek ah a luangthla ngiai ngiai a.




Zah ah pawh ka la duh lo, a na em a ni, nau vei nat thu an sawi ka hre fo, mahse a taka han tawn meuh chuan ka hre fiah uar uar mai, tawng pawh ka tawng peih lo, au chhuah vak mai te ka duh a, mahse a na lutuk a ka aw hi a chhuak thei reng reng lo, darkar khat chiang a ni leh tawh, doctor a rawn kal a, min rawn check leh, "Nau a la hnai lo, a tui bawm keh ringawt mahse a la nei mai lovang" a ti sup a, thih mai te a nia ka duh rum rum tawh ni.




"Nau vei na damdawi te kan han khai leh anga, kan en leh dawn a nia" a tih leh hnuah drip chu min khai sak a, ka rum chhuak leh tiah tiah zel, drip chu a zo a, a hma ai mahin ka pum chu a na zual, "Min zai mai rawh se, a na emai" ka ti tial ruai a, na tawrh reng ai chuan min zai tawh mai se ka duh, doctor rawn kal leh hnuah min check leh a, "Awle.. nau vei na room ah kan kal vat a tha ang" a tih takah chuan kan chhungte pawh an phul hlut hlawm a.




Darkar thin chuang nau chu ka vei tawh, naute a hnaih tawh thu an sawi a, mahse rei ka ti tawh takzet, ka tha neih zawng zawng hmang in ka sang a, ka chau tawh takzet a ni, "A lu a rawn lang tawh a nia, han tang leh deuh teh le" doctor chuan a ti a, nurse pakhat in ka thlan a rawn hru mawlh mawlh a, a na bawk nen au chu sawi loh aw pawh ka chhuah peih lo, "Hahdam la, a zo tep tawh a nia, han tang leh deuh teh le" nurse pakhat in a rawn ti leh sep sep bawk a.




In ti chal thar in ka sang leh vak a, ka thaw leh kawk kawk a, "Han tang leh teh le, a zo tep e" Doctor in a tih rual chuan ka sang leh vak a, naute tap ngak ngak thawm ka hriat takah chuan ka na zawng zawng kha a dam nghal vek maiin ka hria, naute chu min rawn pe a, ka na te chu engmah ka hre tawh lo hial zawk, ka fa chu ka en a, a hmeltha takzet, "Fanu i nei e, a duhawm takzet a ni, a hmeltha bawk si" Doctor in a ti a, ka nui seih, a sawi dik chiah, ka fanu hi a hmeltha in a duhawm takzet a ni.




Naute chu min laksak a, ka hliam thui ngai te chu doctor in min thui sak zung zung a, nurse in naute chu pawn lamah a pawm chhuak thung, "I vannei takzet, thla sarih a piang naute a tam zawk hi chu up an ngai tlangpui thin a sin, i fanu pawh kha kan up ve hrim hrim chu a ngai ang, nihnih vel fimkhur thu hla ah" a ti a, min thui na lai pawh chu na angin ka hre tawh lo, ka hlim takzet, ka hnuk a ulh tun a, ka harsatna tawh zawng zawng hnuah hetiang tak hian ka hlim leh tawh ngailo.




Darkar chanve tling lo turah chuan pawn lamah min nawr chhuak a, ka fanu kha chu up a la ngai bawk nen ka hmu tawh mai lo, kan chhungte chuan min lo bawr nghal luai luai a, ka chau bawk nen ka chhawn peih vak lo, Prof. Sangzuala pawh chuan min rawn hnaih chilh nghal vat a, midang te chu awm ve lo ang maia ngaiin ka chal ah chuan a rawn fawp vang vang, ka hnial duh lem lo, "Ka lawm e, fanu duhawm tak nangmah ang maia hmeltha min pek avangin" a ti sup a.




Cabin an lo book lawk tawh avangin chumi lam ah chuan min nawr phei a, doctor in in ti harh hram hram tura min tih avangin chau viau mahila ka meng lui hram hram a ni, kan fanu ber a la hmuh theih tak siloh ah chuan cabin chhung ah chuan kan awm thap a, tawng pawh ka la tawng tha peih lo, ka ham leh bai bai thin a, damdawi min pek avang khan mu tlang mai a hlauhawm an tih vangin ka in tih harh hram hram, kan chhungte chu an nui ho leh dar dar thin a, tinu that an nei chu an lawm hmel hlawm viau.




Prof. Sangzuala pawh chu ka bul hnaiah a thu reng a, vawin chu in hnial na hun a nilo tih hria in a thiltih engkim ka en liam mai zel a, mahse chumi avang ringawt chuan hnaih leh ka tum tihna a nilo, kan in kar kha chu tha leh chi zia zang a ni tawh lo tih kan hre ve ve tlat, reilote ah ka thiante pawh an rawn thleng ve thuai a, an hlim hmel hlawm viau, ka that leh that loh thu te min zawm luam hlawm a, nau ka vei tih an hriat tirh khan university lamah thiltih tur pawimawh an neih avangin an lo kal hman mai lo kha a nia, an hman ve leh an rawn kal a ni.




"I fanu chu kan va hmu ve chak ve" Mary chuan a ti a, "Tunah chuan an up rih a, thla kim lo a piang a ni bawk nen doctor ten fimkhur thil ah tiin up tha an tia, nakin ah in la hmu ve vat mai ang" ka lo ti vat, "Hei thla ka la alawm lo en rawh u" ka nu in a tih chuan rang takin phone chu an ban a "Awi.m a hmeltha lutuk, Zorin a chhun miah lo che, a hnar, khabe leh mit te hi Prof. Sangzuala chiah chiah a nimai" Puipuii chuan a ti chul a, Prof. Sangzuala nen chuan kan in melh nghal chawt.




Engtin mah ka chhang lo, keipawh khan ka hmuh tirh khan chuchu ka hre nghal, "Khawi maw ka lo en ve, nichin khan ka chau bawk nen duh angin ka en chiang hman lova" tiin thu dang ka sawi daih a, phone chu an rawn keng hnai vat, "Enteh a hmelthat zia hi, i fanu a nilo emaw tih hial tur alawm" Chhani'n nui hak hak chunga a tih chuan midang pawh chuan an nui ve dur dur a, "Ka fanu a nih vang zawk alawm a hmelthat em em" ka lo ti ve hmak.




Thlalak chu ka en dauh dauh a, ka nuih leh seih thin, a va han hmeltha chiang em, ka kut ngei a ka pawm leh theih hun ka nghakhlel takzet, ka nun ti eng tu, amah vangin dam ka thlakhlelh phah a, chuvang chuan ka tan hian a hmu lutuk, ka dam chhan ka nunna a ni, engpawh lo tawk se ven him tlat ka tum tawh anga, amah aia pawimawh hi ka nun ah an awm ngai lovang tih ka chiang, ka fanu ka engkim ka lei rohlu a ni.



Zawmna


Kan ri laih laih a, keipawh chau viau e tilo chuan ka harh tha phian, doctor in ni hnih khat vel damdawi in lamah la awm turin min ti a, neih pangai in nei mahila hliam neuh neuh ka neilo thei biklo a, keipawn pawi ka ti hran lo, bakah ka fanu an la up bawk a, chumi chhung chu ka awm ve a niang chu, "Zanin chu keiman ka lo riah pui ang che, i riah tur ai chuan, ngaihtuah awm i nilo bawk a, i pa amah chauh a awm a ṭhalo" Chhani chuan a ti a.




"Nia.. a pawi miah lovang" ka lo ti ve sep, "Bawihi chu keiman ka riah pui mai anga, nangni va haw tawh rawh u, in awm rei tawh si a, Marini te in lo awm hlauh a, kan lawm takzet a ni" ka nu chuan a ti zung zung a, "Kan tih ve tur alawm, lawmthu sawi a ngai reng reng lo, kan fanu leh kan tunu te alawm an nih" ka nu chuan a lo ti vat, "Keiman ka lo riah pui ang" Prof. Sangzuala chuan a lo ti sup a, rang lutuk in a lam chu ka hawi nghal.




"A ngailo, nu nangpawh min riah pui kher a ngailo a nia, hei Chhani'n min riah pui thei dawn a, nangni chu lo va haw tawh zawk rawh u, ngaihtuah awm pawh ka nih loh hi" ka lo ti nghal zung zung a, "Chutiang ringawt a chi dawn em ni, Chhani pawh lehkha zirtur te a nei awm si a, a chhungte lakah pawh a in thlahrun awm alawm" ka nu in a tih leh chuan "Nute ka chhungte chu ka hrilh tawh alawm, pawi tihna an neilo, lo va haw zawk rawh u, bakah patea kha i tello chuan mut pawh a muhil thei nang" Chhani'n a tih chuan kan nui ho dar dar a.




Chhani a in huam bawk a, ka chhungte pawh chuan an hnial lui duh ta biklo, an haw dawn chuan Prof. Sangzuala'n min en leh deuh ren rawn a, min kalsan chu harsa a ti hmel hle, "Harsatna i neih chuan min rawn hrilh dawn a nia" a tih sup hnuah a chhuak ve ta chauh a, ka thiante erawh an la awm thung, "Prof. Sangzuala hi keichu ka khawngaih deuh tlat zel, in in then hnu hian a mizia a dang lutuk a, a hma te kha chuan class ah bengchheng pawh a phal ngailo kha a nia, tunah ve" tiin Feli chu a ngawi zui leh daih a.




"Engtinge a lo awm thin a, a hlauhawm zual a mi?" ka tih chuan "Teuh nang, engtin mah min ti ngailo, class a la deuh mawp mawp a, muhil an awm pawn a hau tawh ngailo, a rilru ah a lang lo a ni ber, ka sawi thiam dan ber chuan a nun hi a zuai ngawih ngawih" a tih leh chuan ka ngawi zui ta vang vang a, "I rilru tih buai tum a sawi kan nilo a nia, hreawm tih phah nan hmang suh, in in then na a la reilo em a, bakah in in then chhan te nen a la nghawng ve deuh angah ngai hmiah rawn" Mary'n a lo ti ve leh vat a.




"Nia.. hun hi han kal se mipa alawm a nih, kei ai mahin hmalam a pan chak zawk daih ang, in then tawh mahila kan fanu a hmuh naah dal ka tum chuang lova, mahse kan in kar chu a tha leh mai mai thei tawh dawn lo tih chu in hriat chian tho kha" ka ti ve sap sap a, Puipuii chuan thil dang a rawn sawi ta daih a, kan hlim phian, ka fanu hmelthat thu an sawi te chuan ka lo hlim veng veng mai, ka pai lai khan hun harsa tamtak ka tawk a, tunah dan takin a rawn piang chhuak thei hi ka lawm takzet a ni.




Midang an haw hnuah Chhani nen chiah chuan kan awm a, damdawi in chaw kan ei peih loh avangin pawn lam a mi a pact tir a, kan puar khawp mai, zan lamah pawh chuan kan titi dun reng a, Msa te thian ho pawh in min rawn tlawh ve vat an tum thu a sawi a, kan in biak lohna a rei ve tawh khawp mai, an ngaihawm takzet a ni, an class kal na chungchang vel te a sawi chuan ka lung a leng takzet, kan thian hova valsa tan hmaa kan in nghah khawm lai te kha mit thla ah a cham thar awn awn nimai hian ka hria.




Vawin lam ka chau bawk nen kan mu har lem lo, kan mut fel hnuah pawh chuan chau viau e tilo chuan kan la muhil leh mai lo a, kan titi leh bawrh bawrh, eng ang pawn kan thian ho hi chu in hmu zing ve mahila sawi tur hi kan nei reng zawng a nih hi, "Zorin, Prof. Sangzuala hi ka khawngaihin deuh tlat, a thiltih ka chu engpawh lo nise a mize danglam ta lutuk hian amah min lainat tir, Prof. Chhuana tak ngial pawh in a kawm hlim theilo" Chhani chuan a rawn ti a.




"Keipawh ka khawngaih alawm, diktak chuan ka la hmangaih lutuk a, mahse kan in kar ah hian thil a thleng tam tawh lutuk a, in zawmna siam pui leh hi ka hlau tawh, tunah phei chuan fa hial kan nei tawh a nia, a hma ang khan hmeichhe dang atang buai na kan nei leh ang tih hi ka hlau, chu ai chuan tuna kan awm ang hian awm ila, hreawm chu ti viau mahila a ti mah mah kan in ven thawn a ngailo hi a tha a ni mai" ka ti a.




"I ngaihdan chu ka hriatthiam pui khawp mai che, i harsatna tawh zo zai te avang khan hlauhthawn na chu i neilo theilo, ni e, in in kar hi siam tha leh rawh u ka tilo cheu a, mahse in awmdan hi a hreawm hmel em a, in pahnih hian in la in hmangaih em em a, chuti chunga in awm hran ngai tlat hi ka khawngaihin cheu" a ti leh, ka nui a, engmah ka sawi tawh lo thung, hetiang nun hi ka hmachhawn ang tih ka lo ring pha ngailo kha a nia, mihring te hian kan hma hun hi kan lo van hrelo tak em.




Nihnih a liam leh hnu chuan damdawi in atang kan chhuak dawn ta a, kan chhungte pawh an kim thap, ka fanu pawh ka kut ngeiin ka pawm ve leh thei tawh a, ka hnute tui a hnek hmasak ber khan nu ka ni bik hliah hliah in ka in hre hial, Prof. Sangzuala'n a pawm lai khan mit tla lek lovin ka lo en a nihkha, a mitah khan a fanu a hmangaih zia ka hmuh sak thei, kei mai nilo room ah awm zawng zawng khan an hmuh hmaih bik in ka ringlo.




Ka pa te nen motor khat ah kan chiang ho a, Prof. Sangzuala te chhungkua in kan hnunglam ah min rawn zui bawk, ka thiante erawh class an kal vangin an rawn la tel ve theilo a, class ban ve leh an rawn kawi nghal dawn tih min rawn hrilh thlap tawh, in kan thleng a, an lo chei nual mai, kawngka bulah chuan kan ding thap a, ka fanu in kan in chhung a luh na hmasa ber tur a ni bawk nen kan hlim tlang viau, ka pa chuan pawm in inchhung lamah chuan a tunu chu a luh pui a, a hnung ah kan zui lut ve nghal zat, sitting room ah chuan kan thu khawm a, thawm pawh a tha viau.




Thenawm khawveng te pawh an rawn leng lut sup sup a, kan fanu rawn en te apiangin a hmelthat thu an sawi chamchi a, an sawi hmaih miah loh pakhat chu Prof. Sangzuala a an zia thu a ni, ni e zep rual ni hek lo le, kan fanu hian a pa a ang em lah tak a ni, chhung khat laina hnai te nen chaw kan ei khawm dawn a, rawng an bawl mup mup bawk a, kan thawm chu a tha ham ham viau, "Nu room lamah kan lo va lut mai dawn emaw ni ka ti deuh, Bawihtei hi hnute pak a hun leh tawh a" tiin ka nu bulah chuan ka phun sap a, "Ni e, va lut rawh u, nangpawn hahdam i duh ang" tiin Bawihtei chu a pawm tha a.




Room lama kan luh dawn chuan ka nu chu an rawn ko leh rih, "Ka pi keiman ka fanu chu ka lo pawm ange, an mamawh che a niang" Tiin Prof. Sangzuala chu a rawn kal hnai vat a, ka nu pawh chuan ka fanu chu a lo pe ve vat, room ah chuan kan lut a, ka hliam te a la dang chiang bawk silo nen ka kal rang theilo, khumah chuan dim zetin ka thu a "Bawihtei kha min lo hlan rawh, a dang a ro tawh ang" ka tih chuan dim takin kan fanu chu min rawn pawn tir a, ka kawr hlim mai ka tum chu a la din ve reng avang chuan ka tawp leh rih.




"Pawn lamah lo va chhuak rawh" ka ti sap, "Tikhan pe rawh, ka fanu kha ka la en duh alawm" a ti deuh tlat a, mahse ka tim tlat, "Lo va chhuak rawh ka tih chu, bakah room a kan awm dun reng a nih chuan midang an tam ve bawk si a, ngaihdan dik lo an lo pu ange" ka ti leh hlak, "Chutiang engmah a thleng lovang" a ti liam leh puat a, chhuah chu a tum hmel loh viau mai, eng ang pawn chhuak turin ti mahila a chhuak dawn chuanglo, nuam ti chiah lo chung chuan ka fanu chu hnute ka hnek tir a.




Kan fanu hnute hne dawk dawk chu mit tla lek lovin kan en dun a, hetiang em em hian a hmuhnawm ang tih ka ring pha lo, Prof. Sangzuala ka bula a rawn thut thlak lai pawh ka hrelo hrim hrim, "A hmeltha takzet a ni" tiin a phun sep a, "Ni e, midang pawn an tih vek kha, kan fanu hi a hmeltha in a duhawm takzet a ni" tiin ka nui seih a, "Nangmah a chhun viau che ka ring a nia, mahse mite khan keimah min chhun thu an sawi zel si a" tiin a nui ri suk a.




"A fair lo ngawt mai, keimah vek in ka pai a, chutah na zawng zawng ka tuar bawk a, a khawi laiah mah hian kin chhun ve lo a nia" ka ti nang nang a, "A chhun che alawm, i mitmu rawng ang chiah kan fanu hian a nei" a tih chuan rum zetin amah chu ka melh a, "Nangmah nen pawh kan mitmu rawng te a in ang reng alawm, khatiang khan min bawl tum suh" ka tih hlak chuan a nui chhuak hawk a, a ni tak tak reng bawk a, kan mitmu rawng hi a in ang a, a uk ve ve, min chhun na bik ka hrelo.




"A nulat hunah chuan mipa tamtak in an la zar buai ngei ngei ang, nula chhuanawm tak, a nu leh pate ti hming tha tu a la nih ngei ka beisei" thutak deuh zawk chuan a rawn ti leh a, "Ni e, chumi tur chuan kan pahnih hian kan pawimawh dawn viau a nia, pa tha tak i nih ka beisei, chutiang bawk in keipawh kan fanu tan hian nu tha tak nih ka tum tlat bawk ang" ka lo ti ve sap a.




"Ka mawhphurh na chu ka hlen ngei ang, Naute khawngaih in ka hnenah in rawn let leh thei mai lo em ni, kan fanu hi kan pahnih in kan enkawl dun thei dawn a sin" a rawn tih takah chuan ka harh chhuak zawk, tunah khan kan in kar a tawp tawh tih theihnghilh thak in ka lo tawng tih ka hre chiah, Prof. Sangzuala chu ka en vat a, beisei nei zetin min lo melh ve reng, ka thaw hak a, kan in kar hi sima that emaw a hnena let leh hi a theih tawh loh tih ka chhungril ah chuan ka in hrilh thar mawlh mawlh a.




"Professor kan in kar chu i hriat vek kha, tuna kan awm dan anga kan awm hi kan pahnih tan a tha zawk, fanu kan nei dun pawh a ni mathei, mahse chumi vang ringawt chuan ka lo let leh thei tawh lo tih i hriat chian kha, kan fanu vang hian lo awmdun leh ta tehreng pawh ni ila kan hlim dun thei tak tak tawh dawn chuang lo, chuchu kan hrechiang ve ve, chuvang chuan khatiang thil kha I sawi tawh loh hram ka beisei" ka ti zawi sap a.




"Naute kan fanu vang chauh pawh hi a nilo a sin, ka hmangaih che, in tello chuan ka nun hian engmah awmzia a neilo, ka thil lo tih tawh te avang khan ka in chhir takzet a ni, ka at vang leh ka thikthu chhiat lutuk vangin ka thil hriat ang chauh kha thudik emaw ka lo ti thin a, kha thil kha ka thil tih sual lian ber chu a ni, nang leh ka fanu te hi ka hlat a awm turin ka duh lo cheu, ka bul hnaiah keimah ngeiin enkawl cheu hi ka duh, khawngaihin chance vawikhat chiah min pe rawh" tiin min ngen ngawih ngawih a.




"Professor min hrethiam rawh, ka theilo, chuan kan fanu hi i hlat ah lak bo ka tum lo, a pa i ni a, i hlat a dah theih na dan ka nei hleinem, chuan i duh hun hun ah min rawn tlawh thei reng dawn bawk a, chuchu a tawk viau alawm, khawngaihin khatiang thu kha chu i sawi tawh loh hram ka beisei, chuan min lo va chhuah san tawh mai la, ka chau riau a, mit hahdam ka duh" tiin amah pawh chu ka en duh tawh lo, beidawn hmel taka thaw chhuak hawk in a ding a, room atang chuan a chhuak nghal.

Cont....


Tunlai chu story ziah lam pawh rilru ah lang theilo, a ngaihnawm loh viau ang, min lo hrethiam hram hram mai dawn nia u aw...