KA HMANGAIH THINGTLANGPA BY MAWITEI BAWITLUNG (Completed)

[mawitei bawihtlung]

KA HMANGAIH THINGTLANGPA





CHAPTER 33





“Duati..Duati" Sam-a chuan min koh pahin min sawi nawk nawka, ka rum chhuak ṭiah ṭiaha. “Umm...enge ni ta? A tlai tawh em ni?"tiin inherin a nghâwngah chuan ka kuaha, ka ham bai bai bawk.







“Chaw ei a hun tawha, tho tawh ang hmiang. Valrawlringa te rawn au hma in, i thawh vat loh chuan an rak leh tuar tuar mai ang" a tihchuan ka nui tham chhâla, ham bai bai pah chuan a taksa kuah chunga ṭhu chhuakin ka hawikuala, khua a thim ṭep tih ka hmuh chuan ka mu rei tâwk hle tih ka hre mai.







“A va tlai tawh êm êm ve, min kaih thawh vat tur che a lawm. Hetiang te chuan ka tho chhuak ngam dâwn em ni?" tiin ka en ha a, duat taka ka sam chul hliau hliau chung chuan ka chalah a fawp vang vanga “Ka duatnu i nia, hnathawh i ngai hleinem. Keimahin ka awm chhûng chuan ka awl ang che, ka duat em em i nih hi, bâkah naute nei vat vat ang" tiin ka dul chu a rawn khawiha.






Nui suk hian “He dul thêp ṭang hi puar lah se ka duh, chutiang tur chuan ka awm chhûnga ṭan ka lâk a ngai a nih hi" tiin a phun supa, hepa tak hi chu aw. Nui ve hakin a awmah chuan ka beng ringawta, mi a ti zak lek lek mai.






“I mak emai, awlsam lutukin a pai zung zung theihloh. Kum tawpah chauh i rawn haw phei chuan ka pai mai lo ang" tiin ka nui haka, a ner nawk mai. “Zaninah bul kan ṭan leh ang" a hmui ka hup sak rang ngei mai.






“I mak lutuk Samuel, khatiang sawi phawng phawng chi a ni hleinem; midangten an hria ang. Chhuak vat ang mawl thei lutuk" tiin ka chhuahpuia, ala nui vur vur leh ta nghal. Nupui a nei chu a inchhuan hmêl hluah hluah mai, a lehlamah chuan an awmdân chuan min ti hlim ve tho bawk si, kei min nei a inchhîr hmêl ka hmuh loh avâng chuan ka thaw huai bawk.









“In rawn chhuak thei maw, hei rawn kil ve nghal mai rawh u, zanlamah inkhawm kan duh sia ei zung zung angai ania" Manuni chuan lo ti in keini pawh chuan kan kil zui ve mai a. Ka ril pawh a ṭam chiah lo, ka nuam lo bawk nen ka luak te hi a chhuak hlui mai.






Chaw chu tlêm eiin ka kham zui a, Saman thawh chhuah a phalloh avâng chuan ka ṭhutpuia, a ni erawh a ei tam ta viau mai. Hmuhnawm ti zet chuan ka en renga, ka nui ver ver bawk, chaw a ei duh ta chuan min tihlim hle bawk, dawhkana kut nghat chuan ka en renga.







“Ei ṭeuh rawh, ka lo nghâk char char che ania" tiin a kam sira kai chu tissue chuan ka hruksaka “In la ngai reng a nih hi, in duat khu chuk rawh u, in innei ber alâwm. Keini chu kan la innei hleinem" Valpuia chuan sa ruh khel pah chuan a rawn ti bul bula, kan lo nuih ringawta.






“In inṭhen ve a, inṭhen rei thei tak tak silo. Inṭhen ve tawh reng reng suh ang cheu, in ṭhiante zawng zawngin kan tuara, a hrehawm pakhat phei hi chu Police nih sa nen mi a vawrh nawlh nawlh ang tih a hlauhawm si" Rengpuia chuan a rawn ti ve thunga, Sama chu chutiang chuan alo awm reng reng emaw ni.






“Ka ṭhen hleinem, amah teh dek hian alâwm min ring lo lutuk anih kha" ti hlakin Sama chu ka melha, a chaw bar chu tâwpin min rawn en haw a, ka lo chhiat khum vak thung. “Nangmah a nih kha bialpa hluite lo hmu daw daw ni" tiin a hmui chu liak zauhin chaw chu a eizawma, ala sawi ve ziah lehnghâl.







U Sangpuian thudik sawilo se chuan amah pui hi chuan min be leh tawp nâng. A chaw eikham rual chuan thleng chu seng puiin ka sil erawh an phal hauh lo thunga, ṭhian nih an tlin ka ti ngei mai. Kei hian an ṭhian nih hi ka tlin lo zawk a nih ber mai hi, kan tân hian an hlu in an lakah thinrim ngam tur pawh kan ni hek lo. Sama nen hian an ni vâng liau liaua intawng hi kan ni ka tilo theilo bawk.







Thleng an sil zawh chuan inkhâwm an tum bawk nen an haw zui thuaia, kei erawh innei hlim kan ni a, mi min en dân tûr nen ka la inkhâwm ngam lo ani ber mai. Ṭhiante an haw tâkah chuan Sama chuan a putea te ho chu bia in room lamah min luhpuia.







“Ka nupui duh tak, ka tân fa min hrin sak tûrin i inpeih em?" tiin min zâwt thawp sata, chutah min pawm nawlhin khumah chuan min mut tira “Sam ka duh a lawm, fa tam tak hrinsak che ka duh" tiin ka lamah chuan ka kuah hnaia, insûm pawh ka tumlo. Ani nena fa neiha, tumah dang ngai lova chhûngkua din ve ka duh ani.







Kan pahnih mamawh hrechiang tak chuan chêt a lak zawma, kei chuan dan chu sawiloh a tâna rem thei ang ber tur chuan ka lo awm ve zel bawk, ka hmangaiha ka pasal a ni bawk. A tân ui ka nei tûr a nilo, ka in nghahna tur a ni a, ka neih chhun liau liau a ni bawk.







“Sam i tân chuan engpawh ka huam, ka engkim hi i ta a ni alawm" tiin ka nghawng vela a rawn fawh lai chuan ka lo phun sap sapa, chutah rawn insiam remin kan tumram thleng tur chuan khawvel dangah min hruai leh ta delh delha, thawk la ham hamin thâwm ka chhuah leh ṭhina, insum tum viau mahila ka laka mi danglam bik a nihna chuan min insûm tir thei meuhlo.







Ka taksa khurh dar dar thleng chuan min kuahin a ni pawh a zawh takah chuan ka sirah a rawn mu thla a “Ka nu te chu in be ta em?" ka tihchuan min rawn en phawtin min kuah nghet sauha, a hmel awmdan chuan thil ṭhalam an dawng dâwn lo tih min hriattir chiang viau, ni e ka nu leh ka pa khân an lo biak ṭhat ka ring lo tawp mai.







“Midang hetah kan bia anga, pawi iti em? Khulama kan chhûngte kha va len an tuma; mahse i nu leh i pa chuan i man an rêl duh ta tlat silo a, engmah an lo sawi duh loh miau kha chuan tih theih a awm silova" a tihchuan ka thaw chhuak ham hama.







“Min iai phah em? Hetiang nu leh pa ka nei hi mak i ti em?" tiin hrehawm ti ru deuh tak chung chuan ka zawta, dik tak chuan ka nu leh pa awmdan chuan an fanu hi an ti zakin hrehawmna min siam tih lah an hre duh der silo, ka pasal chhûngte lakah pawh ka inthlahrung takzet.






A hma khân an sawisel ngai hauh silova, engvanga MLA fapa in a biak vang maia an rilru thlâk nge an nih le? Rem tiin engkim kha sawi buai lo se chu keipawhin dân khatna ngeia inneih kha ka duh ve tho a sin, ka bulah dingin awm duh se chuan Biak in hawng ngei a inneih ai baka duh ka neilo.







Mahse engkim an tibuai zo ta vek chu a nih hi, ka unau te pasal neihah an sawi buai hauh silo, kei hetianga min ti hi chu an fa ka ni tak tak lo em ni aw tihte chenin ka ngaihtuaha, chu chuan ka rilru tina zualin ka mittui chu ka dan hman lohin a rawn luang zung zunga.








Saman a hmuh rual chuan a rawn hru nghal vat mai. “Shhh... iai phahna tur che ka neilo ka tih tawh kha, kei fahrah nu leh pa pawh nei tawhlo, chhûngte tih tham nei tawh lo min nei duh zâwk hi ka lâwm asin, keichuan hrehawm taka i awm hi ka phal ngai hauh lovang, ka tân chuan ka nunna i ni a, ka neih hlu ber i ni. I natna chu ka natna, i hlimna pawh ka hlimna a ni a, hmusit thei che ka ni love, keimah avanga a chhûngte kalsan huamtu hmeichhia chu iai thei ka nilova, iai ngam tur lah ka ni heklo. Ka hmeichhe hmangaih ber ala ni zui" tiin ka chalah chuan a rawn fawp vang vanga.








Ka tawng lo ang tih ka hlau, a thusawi te hian min hneh in ka hlim phah ṭhina, ka dam huai zel bawk. Thingtlâng mipa a nihna hi ka iai phah lova, kuthnathawk mi a nihna hi ka zah chhan a ni zawk, tûnah hian officer ni tawh mahse a seilenna a hrechianga, a induh hek lo. Dik ni a a hriat chu a timaia, tumah en hran bik lah a nei hek lo.








“Keipawhin ka hmangaih che Sam, ni e nupa kan ni tawha, in hmusit tur chuang kan awm loh hi. Kan pahnih hian fate kan la neih ve ngai chuan, kan pahnih anga an nun an hman loh nan theihtawp kan chhuah dûn dâwn a lawm, engkim kan zirtir anga, an mahni ke ngeia an din theih nân i zirtir ṭha dâwn tih ka hria alâwm" tiin a âwmah chuan ka bei thana.








A chhuh leh hun tur ka ngaihtuah erawh hi chuan ka lung a lêng sa em em ringawt, zui duh viau kah ila helaia ka hna ka kalsan thei silo. Bâkah a fuh ber lo bawk, vawt ka tih deuh tâkah chuan puan chu sin in kan mu ṭha zuia, tunge ka nu leh pa angah chuan ṭang ta ang? Mi hriatchian tak ka neilova, Sama te kutah engkim ka dah mai aniang chu.




ZAWMNA





Sama sawi angin kan hnampui an hriatchian deuh chu nu leh pa ah zawngin an lo fel bawk nen ka man pawh chu an mahni chu an hlâna, keipawhin ka lo hriat ve ṭhin an ni bawk nen an bulah pawh ka tlangnel nghal maia, ka nu leh pa lakah beisei tur ka nei tawh lo bawk nen an ni pawh an fate chen chuan ka lakah an ṭha em ema, ka tan pawh nel nghal mai an awl phah a, Sama te chungah ka lâwm hle bawk.








Chaw te eikhâwm nghalin kan ri nak naka, Sama chhuh a hun ṭêp tawh nen chulam te chu sawiin an ri nak nak mai, kei erawh engmah sawi lêm lo vin chaw chu ka bar mawlh mawlha, Sama chuan a ti ṭha ṭha chu min rawn pe zung zunga, ka nui sak sak mai. Mi a duhsakna chuan min ti lâwm takzet.






Chaw chu nidang ai ka ei tam daih bawk, ka kham vata, Sama pawh a ei rei lo. Kan pahnih chuan pawnlamah kan awma, nula pali an awm ve a. Fatu tura an tih vang nge ka chet ve an phal lova, thingtlâng mite lo tlawmngaih zia ka hriat belh leh ṭhin. Midang an ring mai ngailova an mahni ngeiin phût ngai miah lovin an che zung zunga, chu chuan hna an awlsam phah ni ber in ka hria.






Mitthi an awmin a khawpumin an lêng khâwm dial diala, nula leh tlangvâl lah mut hahchawlh hun nei miah lo in an tlaivâr pawhin a tukah thingpui lum leh thlân laiin an buai nghal char chara, zan lamah châwl bik ni duh lovin khawhar inah an zaikhawm leha, an fakawm ka ti takzet. Kei ni ila ka tlin ka ring lo.






Zânah chuan ka chungchang vel te chu sawiin an titi zuia, an fanu ang tak taka min en tur thu an sawite chuan ka mittui an ti tla lo chauh a ni. Ka nu leh pa chuan min be duh tawh lova, ka naute ho aṭang erawh chuan chanchin ka hre ve reng thunga, an thinrim zia hria in kei pawhin biak luih phêt ka tum tawh bik lo.







Haw kawngah chuan Sama nen chauh chuan kan haw duna “Zanin chu inchung aṭangin thla êng kan thlir dun dâwn em ni? I duh em?" a rawn tihchuan ka phur zâwng tak a lo ni bawk nen ka aw rang viau mai.Thla bial tur in ṭan chho mêk chu a mawi bawk nen kan pahniha hun hman ai a thlakhlelh tur dang ka nei biklo.








In chhûngah lutin puan kan la chhuaka, chutah inchung chhohna step-ah chuan chho in min kai a, ka zui ve zel bawk. Inchunga ṭhutthleng sei an dahah chuan ṭhu mu in a mal chungah chuan min ṭhuttira, ka hnunglam aṭanga min kuahin thla chu kan thlir duna, a engmawi em em mai lehnghâl.








“Hun hi liam theilo se, ka kiangah hian awm reng mai la" tiin ka phun sapa, a kal tûr chu zêp loh chuan ka huphurh ani. A hma in kan in kalsan khân kan inṭhen phaha, tûnah pawh hian khatiang kha kan thleng leh mai ang tih ka hlau ru bawk, a tello hian ka awm thei tawh dâwn der silo.








“Pathianin rem a tihchuan helamah te pawh min la rawn dah mai thei a sin. Hnathawh ve ngei i duh si a, mahse nau kan neih hnuah chuan ka bulah in awm ngei ka phût tawh dâwn a nia. Hna ka thawk anga, ka châwm mai ang che u, nangin i thawh ve kher pawh a ngailo, kan fate nen chawmna tur cheu chu ka nei em em ang" tiin ka biangah chuan a rawn fawp zauha.








Ni e tûnah pawh a pi leh puten ro zawng zawng a kutah an daha; an sawhthing hralhna ringawt pawh a tam tih ka hria. Tûnah pawh bank ah an dah veka, Police ni kher lo pawh hian min châwm zo dâwn tihchu ka hria, mahse hna ka thawh theih chhûng hi chuan thawha, inkhawl ve ka duh. A ni ringawt inchawm tîr kha ka duh bik lo.








“Hma hun kan hre silova, tûnah rih chuan kan la thawh angai a lawm, engpawh nise rinawmla hmeichhe dang melh lo la a nimai, i rawn haw har ṭhin dawn si a, engtikah nge kan inhmuh leh theih ang hrelo mah ila keichuan rinawm takin i nupui ka nihna hi ka lo vuan reng ang" ti a phun sap sap chungin a kut ka dula insuih run mai chu ka vuana, ka nui ver ver bawk.








“Hre reng rawh,nang lo an awm ngailo ang ka nupui i ni a, i ni reng dawn bawk. Chawlh ka neih apiangin lo haw ka tum ang, nang hmuloa rei tak ka awm theih i ring reng reng emaw ni" tiin ka biangah chuan fawpin min hmer salha, ka nui hak hak mai. A engkim a rimte chen hian ka ngaia, ka thlahlel bawk, eng buaina mah tawng tawh lova kan pahniha hlim taka awm ai baka thlakhlelh dang ka nei tawh lo.








Ka chhûngte chuan min hriatthiampui duh loh miau avângin va biak buai ka tum tawh bik lovang, Sama nena kan inkar a ṭhat phawt chuan ka duh tawk mai; an ni chuan mi hausa tak nêna inzawmna an duha, keichuan ka hmangaih ber neih ka duh zawk a ni maia, a kiangah ka hlim bawk.







Thla eng hnuaiah chuan inkuah chialin kan titi duna, hmalam hun kan suangtuah dûn a ni ber mai. An hna lam te kan sawia, Police a nih aṭang pawha Mizote pawh kan lo sual tawh zia a hriatchian leh zual thu a sawi te chu ka ring hlel lo, zu leh drugs a hluar em em a, midangte ngaihpawimawh lohna nen, nundan holam lutuka awm pawisak lohna a thlen bawk nen kan ram pawh a khât tawkin kan buai reng chu a nih hi.






Pâwnlam ringtu, chhûnglam sihal rilru pu lah kan tam tawh si.





Zân lam chu am takin kan hmang duna, reiloteah kan inṭhen tawh dawn bawk nen hun kan am dun a ni ber mai, a taksa nghêng chuan ka phun sap sap renga. Zanin chu kan ṭhiante ho pawh an rawn lang lo teh khiah a, engtak ti hlawm ang maw?







“Lo in enkawl ṭha ang che, ka rawn be ziah ang che anga, chaw te kha i lo ei ṭha lo ange, naute neih vat vat kan tum ang" a Bolero a a luh hma chuan min kuahin ka chalah chuan a fawp vang vanga, kei erawh thusawi mai harsa ka ti. Ka la thlahlel em em si a.







“Aw le, fimkhur deuhin khalh rawh aw. I mutthluk dâwn chuan in thing harh hmasa zêl phawt la, i thlen veleh min lo hrilh dawn ania, tluang deuhin kal ang che" tiin a awmah chuan hmai ka phûm vang vanga, a rim chu duhthawh zetin ka hip a, ka mittui chu a hnam sawk mai.







“Ka lo nghak reng ang che, lo haw leh vat i tum dawn ania" tilehin ka inthing harha, ka mittui pawh chu hru hul thuaiin amah chu ka ena, Valpuia te ho chuan engmah sawi lovin min lo en ṭhap bawk. Thu lo sawi hun anilo tih an hria te pawh a niang.







A tâwp nan nghet zeta min kuah chung chuan Bolero ah chuan a lût zuia, ka kut vaiin ka en reng bawk. A kut chu rawn dahchhuak in a tlân zuia, a lan theih chhûng chu ka thlir reng bawk “Tluang takin aw ka hmangaih, Lalpa min vênhim sak ang che" ti a phun sapin inchhûng lamah chuan ka lut zuia.





A TÂWP LAM KAN HNAIH VE TAWH E AW, NAKTUK ZÂNAH CHAPTER THAR