STORYFB.COM

Chapter-35



Zorinsangi POV




"Enge i hriat a, I va han hmanhmawh em em" ka thiante chu pawn lamah ka lo nghak a, "Engmah a nilo, Bawihtei hi in lamah haw pui vat ka duh a, chuvang mai mai mawle, a tlai hma in haw tawh mai ang u, tlang hri leng a kai palh ang tih a hlauhawm tlat" tiin chhuanlam ka siam a, Prof. Sangzuala te pahnih kha an hmu ve lo tih ka hria, sawi kher pawh ka tum chuang lo, Chhani nen chuan kan in phur haw a, Bawihtei erawh a la muhil tui khawp mai.




"In duh ang in hmu maw?" inchhung ka luh rual chuan ka nu in a lo ti vat a, "Aw.. mahse thui turin kan la dah lo, a la hla tho a, a hmanhmawh thlak loh kan ti a nihkha, nu Bawihtei hi lo paw lawk mai la, ka in bual duh" ka ti a, "Awle, a va muhil tui ve mawle, a chhuak ngai silo a, nuam a ti em?" Naute kan in hlan lai chuan a ti a, "Aw.. nuam a ti lutuk, mahse a chhuak vak ngai silo a, a chau ve deuh in ka hria" tiin room lamah ka lut nghal.




Ka in bual lai te chuan Prof. Sangzuala leh hmeichhia ka hmuh dun kha ka ngaihtuah reng a, tunge ni ang le, a hmeichhe hmel kha ka hmu chiah bawk silo a, a bialnu thar pawh a ni maithei, aa.. enge maw ka lo buai ve vak le, a duh duh a hmu thei alawm, ka buai na tur a awm lo tiin ka rilru chuan ka in hau a, mahse ka ngaihtuah loh phah der silo, keimah zawk in in then ka duh a, mahse hmeichhe dang nen ka hmuh in ka rilru a na leh em em tho sia.




A awm ve tho, Prof. Sangzuala hi ka la hmangaih miau alawm, hmangaih na hi awlsam taka tih reh theih a ni miau silo a, tu hmeichhia in nge an mipa hmangaih tak te hmeichhe dang nen an awm dun tih hria a thik lovang ni, hmangaih na hi chu mak tak a ni, ka mipa hmangaih tak nen kan awm dun theilo tih ka hre reng chung in ka hmangaih na erawh a ni tel in a zual zel emaw tih mai tur a ni a, nitin kan in hmu bawk nen ka thlakhlelh na hi a zual lo theilo a ni.




Zanah chuan Prof. Sangzuala chu a rawn lang hma leh tawh khawp mai, zan dangah kha chuan tha takin ka lo be ve mai thin a, mahse zanin chu biak pawh ka tum lo, a awm ve tih pawh hrelo ang hmak in ka awm a, a lakah ka in veng ru reng a tih theih ang, kan in then tawh bawk a, in hnaih taka kan awm hi a tul tawh lo, kan fanu a rawn hmu duh a nih chuan hmu se dan tumna ka neilo, mahse kei nen hi chuan in hnaih vak lo ila ka duh.




Chutiang a nih loh chuan hmalam ka pan thei dawn lo, tunah pawh ka hriat loh laiin kan lo in hnaih leh tawh hle tih vawin khan ka ngaihtuah chhuak a, a hma ang khan kan awm leh thei tawh dawn lo tih ka hrechiang bawk nen a ni tel a hlat hi ka tan chuan a tha ber, engtik ah emaw chuan ka hmangaih na hian chuai hun a la nei ve mial mahna, a ni pawh in hmalam a la pan ngei anga, chutih hunah chuan kei hi engtinge ka awm ve tak ang, tun atang hian ka in ven a ngai a ni.




Prof. Sangzuala pawh chuan min rawn en leh zawk zel tih ka hmuh hmaih lo mahse ka hrelo der tlat thung, a lakah hian in ven ka ngai ka tih tawh kha, zan dangah kha chuan Bawihtei'n nileng a a hun a hman dan te phur takin ka lo hrilh thin kha a nia, mahse zanin chu vawikhat mah ka la be lo hrim hrim, dar 9 a rik meuh chuan ka nu te chu room ah mu turin an lut a, kan fanu erawh a la harh tha viau mai, chawhnu lama a mu kha tlai dar 5 dawn ah a harh chiah a, a mut a la chhuak mai lovang.




"Vawin in chhuak chu a nuam maw?" Kan ngawih reng hnu chuan a ti a, tv ka melh na atang chuan ka mit chu la sawn in amah chu ka va en a, ka hmazawn thutthleng ah chuan a thu bawk nen kan in melh chiang khawp mai, "Nuam a nimai" ka ti ringawt, "I awmdan a danglam riau in ka hria, enge thleng, thil diklo a awm em ni?" a tih leh sup chuan lu ka thing a, "Engmah chutiang a awmlo, vawin kan chhuah na avang khan ka chau deuh mai mai mawle" ka ti leh tawp a.




Tv chu ka en chhunzawm lehnghal, hmuhnawm ka tih zawng a chhuak pawh a ni chuang lo, "Ramhuai film i en ngai silo a, i hlau lo em ni?" a rawn tih leh chuan ramhuai film ka en tih ka hre ve chiah, diktak chuan ka melh mawl ve tawp a, enge chhuak tih reng reng ka lo ngaihven lo, "Hlau lo, nu ka ni tawh hi, khitiang film mai mai hlau rual ka ni tawh hleinem" ka hlau reng mahse ka en ta sa sa hlau lo ang chuan ka awm lui tlat a.




"Zanah i mi theilo ange, a hmaa thil thleng kha I la hria em?" tiin a nui ri suk a, kan hun kal tawh te chu ka ngaihtuah chhuak a, kan in ngaihzawn lai khan ramhuai film kan en dun ve ngei tawh, chupawh kan inah hian a nia, ka nu leh pa te erawh an mu tawh thung, ka hlau chung chung khan min en pui tlat a, a tawp thleng ka en zo vek thak kha a nia, mahse zanah ka muhil theilo a, ka hlau bawk nen Prof. Sangzuala hi ka va be tawp kha a nia.




"Hun liam tawh a nihkha, a pawimawh tawh lo emai" ka lo ti liam puat a, "Hun liam tawh ni mahse ka tan chuan a hlu takzet a ni, kan pahnih a hun kan hman dun tawh zawng zawng te kha ka tan chuan hun chhinchhiah tlak leh ka nun a hun hlimawm ber lai a ni a, a ni reng bawk ang" a ti thawp sut a, ka thaw hak, "Professor hun liam tawh kha chu koh kir leh theih a ni tawh chiang hleinem, chuvang chuan theihnghilh a tha zawk" ka ti sap.




"Nilo e,ka theihnghilh tawh ngai lovang, khang kan hun hman dun te kha nimin ang mai a chiang in ka la hre vek a ni, engtik ah mah ka theihnghilh tawh ngai lovang" a tih chuan ka ngawi ta reng, tv chu ka en char char a, ka in hum ruh khawp mai, ka thlan fim dawn chhuak tiam tiam te chu a hmuh loh hram ka beisei takzet, chutah le a ramhuai a ber a rawn lang thut a, ka phu nasa bawk nen ka te deuh that a, Bawihtei chu phu zawk in a tap nghal, rang lutuk in tv chu ka hmet tawp nghal a.




Bawihtei ngaihven tum an pafa thut na lam ka ve melh chuan a pa in a lo awi durh durh a, a tap rei lem lo, a pa awm a bei chung chuan keichu min rawn en kiau a, "Ka hlau lo kha i ti sia, i fanu i vel tap ringawt a nia, i hlauh te chuan en luih loh mai tur che alawm" tiin a nui suk suk a, "Ka hlau lo, a rawn lang thut bawk sia ka phu mai mai a nih kha" ka la ti ve tang tang a, Bawihtei lah chuan a pa awm a bei chu nuam tih hmel lutuk hian a nui zui sen sen a.




"Professor haw rawh mai la, ka mut a chhuak tawh reuh lutuk, naktuk ah I lo kal leh mai dawn nia, Bawihtei pawh kha a muhil tep tawh ang" ka ti ta sep a, ka mut a chhuak tawh tak tak, "A tha alawm, i hmel ah pawh khan i chauh hmel riau, ka fanu naktuk nileng in ka rawn awm ang che aw" tiin a fanu chua din chhuah pui a, kawngkhar lam pan a an in pawm chhuak chu ka zui ve nghal vat, naktuk chawlh a nih tak kha mawle.




"Bawihte lo kal rawh le, apa kha a haw a ngai tawh a" tia ka fanu ban mai ka tum chu a lo duh der lo, a pa awm ah chuan a ei tlat a, lak luih ka tum a, a men zui puai mai, hetiang hian a la awm ngai hauh silo a, "Lo kal rawh le, tete ka pe dawn che a nia" tiin ka la ta tho a, chutah uar em em mai hian Bawihtei chu a rawn tap ta mai, "Bawihte tinge hetianga i awm a, na i nei em ni?" ka ti a, keimah lam a ngaihtuah lo, a pa chu a ban tawk tawk a, Prof. Sangzuala pawh chuan a fanu chu a lo en ve reng.




"Khawi ka lo pawm mai ang" tiin Professor chuan min rawn laksak a, Bawihtei pawh a bang hmak mai, a pa hi hetiang em em hian a ngai tih ka hre hauh lo, bakah thlaruk chiah a la nia, hetiang em em hian kei tak ngial pawh hi min la ngen ngailo, "A va buaithlak e aw, tinge hetiang hian a awm tlat le?" Bawihtei en chung chuan ka ti sap a, Prof. Sangzuala erawh a hlim hmel viau thung, a fanu chu en in a in suk pui a, a nui leh suk suk thin bawk.




"Khawi ka lo la tawh ang, nangpawh haw tawh rawh, a tlai zel a nia" tiin Bawihtei chu ka la lui leh a, a tal ve bat bat mai, ka nu pawh Bawihtei tap ri hria in a rawn chhuak a, "Ngatinge Bawihtei chu ni a?" tiin a tunu chu a rawn en a, a ni lah chuan apa lam haw in a lo ban ve tawk tawk thung a, "Engmah a nilo, zanin chu a sual ve deuh a nih hi" ka lo ti vat, "A tap nasa bawk sia, ka hlauthawng hman alawm, Bawihte apa chu i va ngai awm ve a?" tiin rawn pawm a tum ve a, a lo duh lo nasa mai.




"Zanin chu a zia hi a dang riau a, a buaithlak tak tak a ni" ka nu hnenah chuan ka ti sap a, "A pa a ngai viau a nih dawn kha, zanin chu hetah riak ve mai rawh se, kha Bawihtei pawh a khawngaih thlak alawm" ka nu chuan a rawn ti ta mai, chutiang a chi hian a chi loh reng reng, midang ten an lo hre lovang tih pawh hriat loh, bakah mawi pawh a mawilo hrim hrim, nupa pawh kan ni tawh lova, in fiah chilh kha thil nih phung a nilo.




"Ni chutiang a chi ngawt hleinem mawle, i hriat ve vek kha" lungawi lo tak chuan ka ti a, "Bawihtei kha a tap nasa bawk sia, ka ngaihtuah alawm, bakah a fanu ve tho a nia, a bula mut te chu a thiang alawm" ka nu lah chuan a lo ti awlsam leh et, va han buaithlak tak aw, room khat a mut dun nilo awm dun pawh ka duh loh laia chutiang thu lo sawi te chu, Bawihtei chu ka in sawi pui a, a la bang duh der bawk silo, ka thinrim lek lek tawh.




"Bawihte awm tha rawh le, a pa chu naktuk ah a lo kal leh dawn" ka ti a, a in hnit faih faih tawh mai, "Lo in buaipui rawh u aw, i pa in damdawi a la ei lo bawk nen tui ka va pe ange" tiin ka nu chu a kalsawn a, "Nangpawh kal tawh rawh, Bawihtei chu a bang ve mai ang" Prof. Sangzuala en pah chuan ka ti a, a ni erawh in a fanu ngawt chu a lo melh a, a khawngaih hmel hle, Bawihtei lah chuan a pa chu a en ve tawk tawk bawk a.




"Naute zanin chu ka lo riak ve mai ang, Bawihtei kha a khawngaih thlak alawm" a rawn ti chhuak ta hlawl a, "Aa ngailo, chutiang thil tih chi pawh a nih loh chu, va haw zawk rawh, heta lo riah ve ngawt kha mawi pawh a mawi lo, kan in kar chu a tawp fel vek tawh tih i hriat kha" ka lo ti vat a, "Mahse kan fanu" a tih lai mek chuan "Aa.. va haw tawh phawt rawn, Bawihtei pawh a bang ve vat mai dawn alawm, nakin ah kan in be tha dawn nia" ka tieh zung zung a.




Prof. Sangzuala pawh chu hreh hmel takin a kalsawn hna hna a, kawngka chu kalh in Bawihtei chu room ah ka luh pui vat a, a tap tawh lo, mahse a tap nasa hman lutuk a, a la in hnit ve faih faih a, "Ka naute hi ka khawngaih emai, ka pua ang che aw, tah tawh miah loh tur, naute fel i nih kha" tiin hma thlak in ka pua a, room ah chuan ka kal kual a, reilote ah Bawihtei pawh a chhing ta diar diar a, a muhil har tawh lem lo.




Khumah chuan Bawihtei chu ka mut tir a, bathroom ah hmanhmawh rilru takin ka lut nghal, ka hmai te phih leh te te in Bawihtei himan chuan ka va mu thla a, a muhil hmel chu ka en reng, khatiang taka a pa a ngen kha ka la awih theilo, a pa kha a lo ngai ve hle a nih dawn kha, a pa pawm duh a a ban tawk tawk lai te kha ka ngaihtuah let a, ka mittui chu a rawn hnam tiam tiam a, khatiang thil kha thleng lo nise chuan Bawihtei hi nu leh pa kar ah hlim takin a piang mai tur a nia.




Kan hun tawn ah hian min dem tawk chu an awm ngei ang, Prof. Sangzuala hi in chhir hle mahse bul ṭanpui leh hi ka hlau a ni, hmangaih reng chung siin bul i ṭanpui ngam lova i hmangaih tak tak lo a nihkha min ti pawh a ni thei, mahse ka thil hmachhawn ang kha hmeichhe dang in hmachhawn tase ka tih ang tho hian an tih ve ngei ka ring, ka chhungril ah hian hlauh na in bu a khuar hneh tawh lutuk a, chuchu tih danglam dan emaw lak kian dan lah ka thiam der silo.




Zing lamah chuan ka tho hma hle a, Bawihtei erawh zing thawh a thei lem lo bawk a dar 8 dawn ah bak a rawn harh leh lovang, in phih faiin room atang chuan ka chhuak vat a, ka nu pawh a lo tho tawh, rawng a lo bawl tan mek a, chawhmeh ka siam pui ve nghal char char, "Nizan kha enge in chanchin Bawihtei kha a muhil thei maw?" tomato ka zai mek lai chuan ka nu in a rawn ti a, ka thil tih lai chu ka tawp deuh chawt a.




"Aw.. Prof. Sangzuala a haw hnu khan a muhil zui nghal a nimai" tiin ka thil zai lai chu ka tih zawm leh mawlh mawlh a, "Bawihi i pa nen kan lo sawi dun a, Zosanga nen hian in nei leh mai ula kan duh a ni, kar ah fa hial a lo awm tawh bawk nen in in kar ah buaina tamtak lo awm tawh mahse nupa kar ah chuan buaina a awm lo theilo tih i hriat kha, in la in hmangaih em em a, Zosanga lah a inchhir tih hmuh hmaih rual a nilo, chuvang chuan in rem leh mai hi a tha lawng maw?" a ti leh sap a.




"A.. nu chutiang lam chu ka ngaihtuah duh lo, hmalam kan pan ve telh telh alawm, hetiang kan thleng tawh a, in neih leh kha a tul na ka hrelo, bakah ka chhungril ah hian min dang tu a awm tlat, Prof. Sangzuala pawh hmeichhe dang nen an in zui leh tawh alawm" ka tih chuan mak tih hmel zetin min rawn en a, "Hmeichhia maw?" a tih haw chuan ka lo bu nghat nghat a, nimin khan ka hmu miau a, mahse a bialnu a ni em tih erawh ka hre hauh lo thung.




"I hriat sual a niang, Zosanga'n ti hmeichhia mah zui a nei lovang" a ti talh a, engvanga Prof. Sangzuala pawh chu tan em em nge maw a nih le, "Ka mit ngeiin ka hmu alawm, nimin ah khan restaurant kan chawlh naah hmeichhe pakhat nen thil an ei dun lai pawh ka hmu, an in huat loh hmel khawp bawk" ka ti leh hlak a, "A thian pawh a lo ni thei a, a bialnu a ni ngei tih finfiah na i nei em ni?" a tih leh chuan ka ngawi zung vang vang.




"I neilo a ni tiraw, Bawihi Zosanga hmeichhe dang nen i hmuh khan i thil tih tuna i tawngkam atang khan ka hrechiang a nia, i thil vang a ni lawm ni a bialnu anga i sawi nachhan pawh kha, engpawh chu nise kan nawr lui chuang lo che a, mahse lo ngaihtuah zui ve hrim hrim rawh aw, in fanu tan pawh hian" a ti leh a, ngaihtuah zui vak ngai pawn ka hrelo, kan in kar chu a tawp tawh a, let leh tumna lah ka neilo, tuna ka awmdan hi ka tan chuan a tha ber.




Rawng kan bawl zo a, Bawihtei harh a hun tep tawh bawk nen room lamah ka va lut vat a, Bawihtei chu khumah mu chungin a lo meng kar a, nau fel hi chu a van ni ve chiang tak em aw, a muhil lai a harh te hian a tap ngai miah lo, ti hian lo awm lo pawh ni ila ngawi rengin a lo mu ve char char zel, "Ka fanu hmeltha I lo harh tawh maw?" tiin ka pawm nawlh a, a ke chu a leng bat bat mai, "Nimin lamah i in bual tawh silo a, vawin chu ka bual dawn che a nia" tiin a chal ah chuan ka fawp a, room atang ka pawm chhuak nghal bawk.




Ka pa bulah chuan ka va pawm phei a, "Ka tunu duat chu a lo harh ve tawh maw, lo kal rawh le, apu hian ka lo pawm ang che aw" tiin ka va chuan lak a tum a, Bawihtei pawh chuan a lo ban ve vat, "Pa chaw ei kan peih tawh a nia aw, ei i duh hunah kan ei thei nghal reng" ka ti a, "Chawlh a ni bawk a, hmanhmawh lutuk a ngai hleinem" tiin a tunu chu a chhaih zawm mawlh mawlh a, ka nu pawh chu choka atanga rawn chhuak in Bawihtei chu a rawn chhaih ve nghal.




Dar 10 dawn ah chaw kan ei a, Bawihtei pawh thlaruk a pum ve tawh bawk nen chaw kan rawt sawm a, chuchu kan pe ve tawh a, tam erawh a la ei thei lo, a ha hmai pahnih a ti ve tawh a, a nuih hian a lang chiang thin bawk nen hei hian a ti lang duhawm leh zual, chhun ah chuan Bawihtei nen sitting room ah kan in awm a, ka nu leh pate erawh damlo kan turin an chhuak thung, Bawihtei pawh a thu ve thei tawh a, thin rik chu keng in a thing ri rak rak thin a, a nui leh hak hak thin a.




Door bell a rawn rik takah chuan Bawihtei chu kalsawn lawk in kawngka chu ka va hawng a, Prof. Sangzuala ka hmu nghal zat, ka lo kal ang a tih tak kha, "Lo lut rawh" tiin ka awm sawn a, a lo lut ve vat, sitting room ah chuan a kal tlang a, Bawihtei'n a pa a hmuh rual chuan a lo khek ve raih raih a, a kut chuan a lo hui ve bawk, Prof. Sangzuala pawh chuan a pawm kang nghal lawp a, "Ka naute hian min lo va ngai tawh awm ve" tiin a pawm kang a, Bawihtei pawh a lo nui ve ar ar mai.




"Nizan kha a muhil thei maw?" A tih chuan ka bu nghauh a, "A sual a chhuak ve mai mai a nihkha" ka ti mai a, "Ka ngaihtuah reng a, ka muhil theilo" a tih chuan ka thaw hak a, "Professor thil sawi dun ila ka duh a, kan fanu chungchang ah hian chulo pawh kan pahnih in kar pawh hi" ka ti hap a, "Aw.. han sawi la" tiin min en ngur a, mahse a fanu a rawn te deuh that that takah chuan a en zui leh vat a, "A chhun mut a hun tawh a, khawi ka lo ti muhil ang" tia va laksak mai ka tum chuan min lo dang vat a.




"Keiman ka lo ti ang" tiin a in sawi nghal dar dar a, ka lo en reng, an pafa in pawm lai hi chu an hmuhnawm ve ngawt mai, Bawihtei pawh chu reilote ah a muhil nghal ta reng a, "Thutthleng ah khan mut mai rawh, a muhil nghet thik tho a, a harh mai lovang" a muhil nghet a ka hriat hnu chuan ka ti a, dim zetin a fanu chu thutthleng ah chuan a mut a, amah a zei fahran lo bawk nen hun a duh rei khawp mai, "Pa nih tawh hnu chuan zei a lo ngai hle mai" a ti sup a, ka lo nui hak thung.




"Chuan i sawi duh chu han sawi la" a tih chuan "Ih.. kan in kar hi a nia, mi tupawh hian kan in then tih an hre vek tawh a, chuvang chuan mi mit mei hi veng ve deuh ila ka duh, mite hian min sawi duh lutuk palh ang tih pawh a hlauhawm a, Bawihtei hmu tura i rawn kal hi chu a pawina a awm lova, i fanu ve tho a ni a, dan che ka tum lo, mahse kan pahnih hi chuan in hnaih lutuk lo ila ka duh, ka sawi awmzia chu i hriatthiam ka ring" ka ti a, engmah sawi lo min min en ngur ringawt.




"Midang ven thawn a ngaihna ka hre hauh lo, fanu kan nei tawh a, tupawn engpawh lo sawi se chuchu kan ngaih pawimawh ber tur niin ka hrelo, a pawimawh ber chu kan fanu hi a ni" a tih nghut chuan "Chuchu ka hria lawm, ka sawi tawh kha i fanu rawn hmuh i tum na ah hian dal che ka tumlo ka tih tawh kha, ka ngaih ang chiah hian i ngai ve tih pawh ka hria a, ka sawi awmzia tak zawk ah chuan kan pahnih hian in hnaih lutuk lo ila ka ti mai a nia" ka ti leh sap a.




"Naute ka sawi tawh kha, ka hmangaih che a, keichuan in then hlen hi ka duh lo" a tih chuan ka melh ngawt ngawt a, "Tinge engmah hi i hriatthiam theih miah lova, kan pahnih hian awmdun thei kan ni tawh hleinem, kan in kar ah hian in rin tawn na a awm tak tak loh zia chu kan hriat chian kha" ka tih chuan "Ka ring che, khathil ka tih chhan kha chu ka at em vang leh ka thu ka duh vang a ni, ka thiltih te avang khan ka in chhir takzet a sin, khawngaihin vawikhat chiah chance min pe leh tawh aw, ka ring tlat tawh ang che, midang thusawi aiin i thusawi ka ring zel tawh ang" a ti a, ka nui seih.




"Keimah hian ka ring thei tawh miau silo che a ni, khatiang thil kha lo thleng leh tase khatiang bawk khan nang hian min ring lo leh anga, tunah min rin tlat tur thu sawi mahla awih harsa ka ti tawh, i hriatthiam ka ring" ka tih chuan "Nilo ka sawi mai mai lo a sin, Naute ka thusawi te kha ka thinlung taka sawi ka ni, vawikhat chiah i fiah chhin theilo em ni? I in chhir na tur engthil mah ka ti tawh ngai lovang tih ka tiam a che" A tih chuan ka ngawi vang vang a.




"Nilo e, ka theilo ang, khatiang thil kha lo thleng leh tase, nilo, khatiang kher lo pawh, diktak chuan rin che hi ka tan chuan thil har tak a ni tawh miau a ni, min tih nat nan hmeichhia i hnaih a, khang thil avang khan ka rin na che hi a chhe vek tawh, siam that leh mai mai theih lah ka a ni tawh hek lo" ka tih chuan beidawn hmel zetin a thaw chhuak hak a, na a ti ang tih a hria alawm, mahse thudik a ni miau si a, lo in rem leh ta tehreng pawh ni ila in tih thiam loh hun kan neilo thei dawn lo, chutih hunah chuan hmeichhe dang a hnaih leh lovang tih ka chiang ngam miau lo a ni.




"Ka sawi ang khan i fanu hi engtik lai pawn i rawn hmu thei reng a nia, dan che ka tum lo, dang tur che in eng dikna mah ka nei biklo, i fanu a ni miau a, mahse kei nen hi chuan in hnim hnai lutuk tawh lovang, ka tan chiah a nilo, i tan pawh a ni, nakin ah hmalam pan hun te pawh kan la nei ve ngei anga, chutih hunah chuan a ti emaw zawk zawk hi kan na mai mai ang, chu ai chuan tun atanga kan lo in siam rem hi a tha, kan na lo ve ve zawk bawk ang" ka ti leh sap sap a, ka thusawi chu a hriatthiam ngei ka beisei.




A ngawi ta reng a, a hrethiam ta te pawh a ni mahna, nimin lamah hmeichhe dang nen thil an ei dun lai ka hmu fuh bawk nen kei ai mahin hmalam a pan chak ka ring, chuvang chuan ka hmalam hun ka ngaihtuah ve tho a ngai a ni, "Naute i rilru ka hneh theih nan enge ka tih ngai ang, I thinlung ka neih leh leh theih nan enge ka tih ang min hrilh rawh, hetiang reng chuan ka awm theilo ang, in tello chuan ka awm theilo ka tihkha" a hnu fe ah a rawn ti leh.




"Professor ka sawi hi hriatthiam tum rawh, nimin lamah khan ka hmu che a sin, hmeichhe dang nen a thil in ei dun lai kha ka hmu che, ka hriat chuan tak em em chu kei ai mahin nang hian hmalam i pan chak dawn tih hi a ni, khawngaihin ka tan tal pawh a harsa zawng in awm tawh suh" ka ti a, "A harsa ber zawk chu nang hlat tur che a min ti hi a ni" a ti zuai raih a, hnuai lam a bih na atang chuan a rawn hawi chhuak ruai ruai a, ka mit ah tak chuan a rawn melh fu ta chat.




"Nimin a ka hmeichhe hmuh kha ka tan engmah a nilo, a hmel kha chiang takin i hmu em?" A tih chuan lu a thing a, ka hmu chiang miau lo a tin ni, "Naute a ni kha ka nupui hlui Lalnunpuii kha a ni" a tih chuan mak ka ti hle, "Pasal a nei dawn a, Mizoram lama a awm lai a ni bawk nen min rawn hrilh hre ve a nihkha, ka tan engmah a ni tawh lo, chutiang bawk in a ni tan pawh, nimin lama thil kan ei chhuah dun na chhan pawh in thlah nan a tih vang chauh a ni, nang lo chu tu hmeichhe dang mah hnaih tumna ka neilo" a ti leh sup sup a.




"Engpawh chu nise i duh dan ang chuan kan kal dawn nia, ni e ka thu ka duh lutuk na lamah na takin ka siam tawh che a, tunah chuan i duh dan ka zah sak che a hun ve tawh a ni e, engpawh chu nise ka hmangaih che tih hi hre reng ang che, kumkhua leh chatuan thleng pawh in chuchu a danglam lovang" ti leh sup in a tho chhuak hluai a, hawi pawh rawn hawi let tawh lovin a chhuak nghal nal nal, ka en zui reng a, tunah chuan a tawp ta tak tak e, hlim tur ka nih laiin tinge ka chhungril hi a nat em em si le...

Cont....

Tunlai chu han dah thui viau pawh tum ila, type tur hi ka van riau zel a, heti chin hi ni leh phawt mai rawh se aw...