Re: CHHUNGKAW CHHEHCHHAWL NULA BY Engtea Fanai (Completed)
Posted: January 18th, 2026, 3:48 pm
BUNG 35
Dar 7 vel chuan ka harh a. U Mami leh Anu chu an lo tho tawh a, Christmas ni a ni bawk a, an che buai ngang mai a, kei chu ka men rei deuh avangin min lo kai tho inthlahrung ve ngei hi a lo nia, a mak ka ti zawk hial. An tih a nih loh hmel tawp a, Nizan lama ka awm dan chu hria se min \im nasa dawn lutuk, Nizan hun chu ka ngaihtuah let a, ka zakin ka inthlahrung tak zet a ni, U hriata pawh chu ka be ngam lo. u Hriata lahin min rawn be bawk si lo, Ani hi hmeichhe laka sulhnu hnut chhiah a, kalsan daih \hin mipa ang hi a ni ve angem le tih ten ka ngaihtuah a, Nizan chu siam \hat ka chak, U mami thu kha zawmin lo chhuak daw daw lo ila a \ha tur hi a nia. Mahse hun kal tawh avanga inchhir leh indawm kun reng chuan awm zia a awm lo.
Ka phone chu ka en a, U Hriata msg alo la awm bawk si lo, ka hrilh hai hle a, ka ngaih a \ha lo bawk, Mahse Nun chu a ngaiin ka hman a ngai, Inthlahrung deuh chuan ka tho chhuak a, ka lu chu a na bur mai a, ka ni luk mai, U Mami hnaihah pawh chuan ka awm ngam lo, U Mami chuan nizan I va rawn haw har awm em em ve, tlangval emaw hi I inti emni, Puitlin lam hi hnaih deuh tehh a lo ti nghal, ka ngawi reng a, Anu chuan dar eng zah velin nge I rawn haw a, I rawn haw lai awm ka hre lo reng reng, chet sut sut pah chuan a ti a.
U Mami chuan dar 12 vel pawn a la rawn haw lo, a rawn haw har lutuk a, ka nghak peih tawh lova ka mut san a nih kha a tih takah chuan Dar 1 vela ka haw thu chuan ka chhang a, inbual nghal ka duh, ka tih chuan U Mami chuan a vawh vawh nen a lo ti vat a, min hre chhuak ang tih ka hlau lutuk, Mahse engmah min zawt zui lo hlauh a, Nizan a ka awm ang kha chuan ka awm leh tawh lo ang ti rilru neuh neuh chungin Bathroom lam chu ka pan a. ka phone ah chuan zai ka play pah bawk a.
Ka inbual \ep tihah chuan U Hriata chuan min rawn call a, ka la hreh ang reng hle a, Mahse min rawn call chu ka lawm lutuk, hreh ru tak chuan ka la a, U Hriata chuan ka tho ve chiah, I tho tawh em a rawn ti, Um,, tho ve chiah ka ti pha deuh dai a, U Hriata chuan vawiin I inkhawm dawn em tiin min rawn zawt leh a, inkhawm ve ang chu a, nang I inkhawm dawn em ka ti ve leh nghal a, an chhungkuaa an inkhawm tur thu te sawiin, Bathroom ah chuan rei fe kan in bia a, Nizan lam thil engmah min sawi pui lova, ka thaw huai mai, inbual ka tum thu ka hrilh chuan Inkhawm banah kan rawn leng ang tiin phone chu a dah a. keipawh nichin ai chua ka mood pawh a dik tawh zawk a.
Phur sur chuan ka inbual a, Anu chu rawn auin, Lalnu, I inbual tawh em ka ek a chhuak a nia, tun angah I inbual ngai mang si lo, mi inthiar timing I tibuai alawm a rawn ti leh tawh, ka inbual dawn chiah lo ip mai rawh ka tih chuan,, lo chhuak leh lawk mai rawh a rawn ti, ka in laih tawh alawm le ka rawn chhuak peih tawh lo tiin ka hnial lui tlat a, ka inbual lui a. U mami pawh chuan che ve vat vat rawh, inkhawm te kan tlai ang e, chhungkaw thlalak neih tur a nia a rawn ti ve bawk a, min rawn tur hmanhmawh dun tawp a.
Ka inbual sawk sawk a, ka inbual zova, lotion vel te inhnawihin ka zai rat rat a, U Mami chu ka room ah rawn lutin. Lalnu, enge I sumdawnna chu a an dawn, I tui zawng te a ni tak tak em a rawn ti leh a.
Kei chuan phur zet hian tehh reng mai, 2nd Sem hi ka kal tawh lo ang a, Dawr siam tumin \an ka la zawk dawn emaw ni ka tih chuan U Mami chuan I thei tak tak ang maw a rawn ti siam siam a, Sum a awm chuan thei tehh reng mai, chu loah lehkha zir ngawt ai chuan ka ti mi zawk ka tih chuan a bu nghauh nghauh a, Nakum lamah I dawr tur kan ngaihtuah dawn nia atih chuan ka phur lutuk, ka kuah ringawt a, U mami chuan kal tehh,, I mak chung chung lutuk, Tukin chu kan tho hma tlang bawk a, chhuat saw lo va nawt tehh a ti leh nghal daih. Hmm,,, a mak, min tir zawm leh nghal zat a.
Chhuat nawhna Min present ngei mai chuan phur hmel tak chuan chhuat chu ka nawt leh tur tur tawh a, Anu chuan Bathroom a\ang chuan Lalnu, ka chaw hmeh chhuan kha lo sem tehh a rawn ti leh, A ninawm, uMami awm ve reng a, Lalnu rawn ti leh tawh,, awm lo ila chu an buai dun nufa ve ngawt ang. Inthiar vat vat la a ni mai tih pah chuan gas chu ka va sem a, Anu a rawn chhuah hnu chuan U Mami pawh va intifai vein ani chu a rei leh dawn.
Ka Ig vel chu ka check a, Mahse ni 28 a\anga order kan lak leh chauh tur thute ka post a, Christmas chawlh kan nei ve zuai dawn a ni, min rawn bia erawh an awm nak nak a, ka reply zel a, a \henin fel min tih em em laiin \henkhatin induh min ti em em bawk a, ka hrethiam lo, ka chhang \ha hle chuan ka hre bawk sia, a \hen hi. IG message Generalah hian a lo lut \hin a, chung ho chu kalo hmuh hmaih \hin a, chung tih loh chu ka hmuh ang ang chu ka reply \ha viau zel mawle. Ah,, mi zawng zawng tih lawm hi an har a ni.
U Mami a inpeih chuan chaw ei ka siam a, Chaw ei hmunah chuan Anu\n \awng\aina hmangin chumi zawh chuan chaw chu kan ei a, kan chaw ei pah chuan kan titi mawlh mawlh a, Anu chuan ka awm dan \ha lo \hen khat te min zilh siam siam a, A tawpah U Mami ah let lehin Pasal nei tur chuan a tur leh tawh a, Nangmah ang rual chuan fa an nei sup sup tawh a, tu pawh an nei lo chauh tawh a nih hi a tih chuan , U Mami chuan a awih awm em em loh, ka inleng ho zingah ka Upat thu insawi vak vak zel a, tiang te chuan hmuh a har ve tho alawm a rawn ti ve khauh a.
A Nu chuan nangma rawn beisei in leng nei ngai hek lo che, a lo ti ve leh bawk, U mami pawhin \um dang angin a hnial tawh lem lo va, kan ngawih vang vang hnu chuan A nu chuan, hei tuna I inlengpa hi a fel ve riauin ka hria a, tin, midang rawn leng ang ngawt chu a ni lo ve deuhin ka hria a, heihi I chhuah leh a nih chuan an vang tawh dawn tehh mai a nia, a rawn ti leh, ka insum thei tawh lo ka nui chhuak hial a, U Mmai chuan lo nui suh, min nawr chhuah hi in chak sia nui suk chuan a ti a.
Anu chuan innawr chhuah lam a ni lo, tun ami phei chu veng khat te kan la ni zui, hei bak bak a awm lo, tu hmu lova thih te pawh hi ka hlau ve alawm, tiin a thu tak viau, Kan ngawi vang vang a, keichuan thil ngaihtuah chhuak thutin e,, Nu, U Mami hian naute a la nei thei dawn emni ka ti chu, U Mami a ter at a, in va zak lo nufa tak em, Pitar treat hian min treat suh u, Fa chu e,, duh zat zat ka la nei thei a rawn ti, kan nui hak hak a.
Anu chuan I neih theih chuan nei ta che, nakinah a ping mai ange a rawn ti leh, U Mmai chuan khatiang Lalnui bulah sawi ziah suh a rawn ti leh, kan insum thei lo, kan nui a, kan chaw ei chu kan hlim hle hi a ni tawp, Mi chhungkua ang lo takin inhnialin, in hau tawn reng mah ila, kan inpawhin kan innel em em a, heihi kan chhungkuaah chuan nuam ka tih ve em em a ni, tin, A pang ber ka nihnaah hian min chhehchhawl viau mahse, min hmangaihin min duat em em a, hengte mawlh hi a ni nuam ka tih chu.
Inkhawm tur chuan kan chhungkua chuan kan in zui chhuak a, A Pi Saii chuan Nute min lo nghak tehh, hei I Pu hi a muang chhe chhu lutuk a, kan rawn kal thei \ep a ti a, Anu te chu lova kal mai rawh u, A Pi Saii hi kan nghak leh ange, tiin A Pi te in ah chuan ka lut a, An lo mawi ve ngang mai a, Ka va lut chiah chu Api chuan Nute,, ka kawr thar hi a mawi em a lo ti var a, Awi,, mawi lutuk, A Pu lei che a ni maw ka tih chuan a tum deuh bar a.
A teuh lo lutuk, I Pu ve hi chuan engmah min lei na chang pawh hi a hre lo tiin A pu chu ava melh ralh a, A pu chuan Gauhati a kan kal \umin a rawn ti chiah, A pi chuan kha kha rawn sawi ziah suh, kan inngaihzawn laia min lei a nih kha, a rei tawh lutuk, tu pawh I nei duah tawh, tun thlengin engmah min la lei belh lo, a ti a, a tum deuh bar bar a, A pi titau vel chu cute ka ti reuh tawp a. A Pu chuan, Nute, ka thil lei tawh a ka tihfuh ber chu maw a ti dek dek a, A Pi chuan engmah lei fuh hi I nei ngai lo a ti leh, A Pu chu a ngawi dat a, ,A Pu chu enin, engnge Pu I lei fuh ber chu tiin ka zawt let a, A Pu chuan nui deuh sun sun pah hian, I pi 420 a ka lei kha ka la tifuh berin ka hria a ti chu A Pi pawh a nui ve suk a.
Tichuan kan pathum chuan Biak In lam pan chuan kan kal ta a ni, Biak In kan thleng a, ,mi an lo \hahnem tawh viau a, kan Biak In kawt vel chu an chei mawi ngang mai a,, photo booth ah te chuan thla kan han la ve a, inkhawm ban chuan rei pawh awm loin Kan in lam ka pan nghal a, U Hriata te rawn len an tum a, christmas ni hian \hen khat chuan ruai an \heh dawn a, keini chuan a tukah kan \heh dawn thung a, U Hriata te pawhin Christmas ni ah an \heh dawnin ka hria. Ruai \heh zawhah rawn kal a tum tho a. in a lo va awm hahdam mai mai chu ka duh a ni, nizan lam effect nge ni ka lu a la na deuh a. mi zinga awm chu nuam ka ti vak lo.
Mahse,, rei vak loah U mami te \hianho an rawn thleng a, thingpui an rawn ti leh a, awm awl tak tak hi a theih lo, ka ning \hin a nia, min hlau lo si, ka thinrim poh leh nuam hi an tia, thingpui ka siam mawlh mawlh lai chuan Christyn min rawn call a, len puiah min rawn sawm a, Mahse nizan lam vanga ka la inthlahrun deuh avangin ka len hman loh thuin ka chhang a, nizan an awm dan te ka zawt a, kan lennaah khan an lo riak chu niin, An chhungten an hau nasa dawn tih ka chiang a ni, chhuanlam tur an ngaihtuah nasa ve ngawt ang le, mahse tunah chuan an insawifel ta a niang. A thaw veng leh tawh em mai.
Hun leh ni a liam a, christmas boruak pawh chelh din reng theih ni hek lo le, a liam ve leh mai a, hun pui a liam a, hun thar kan chuangkai dawn a, engtin nge kan nun chhoh zel ang, Anu te chu chiang takin ka hrilh tawh a, college ka kal chhunzawm dawn loh thu ka sawi tirh chuan min hnial ve deuh a, mahse, U Mami’n tun \um chu min lo support avangin, Anu pawhin min hnial lui lem lova, Ka sumdawnna atan chuan theih tawp ka chhuah ta a ni. U Hriata pawh Thingtlang lam pana a haw a hun leh \ep tawh a, Bena pawh seasin \an leh tawh turin Naktuk maiah a chhuk leh tawh dawn a, India club lian tak, East bengal in lei an tum a, chung velah chuan a kal hma a ngai leh thut a ni.
An haw hmaa inhmuh khawm leh kan tum pawh Bena a kal leh thut dawn avangin kan hman ta lo a ni, Mahse, zanah chuan ka rawn leng tho ang chu a ti a, a ngaihawm leh vung vung dawn khawp mai, Mahse tunah chuan Bena tan chuan a hmasa ber ka ni tawh lova, a chang chuan ka hre thiam lo leh thut \hin a, Mahse Bialnu a neih miau avangin ka thikn ka ti lang ngai lo, a changchuan ka \hian chan ang mai hian ka inhre \hin. Zani pawh Sangsangi te in ah a leng phawt ang a, chumi zawhah a rawn kal ve dawn chauh a ni.
Zan dar 10 vel chuan Bena chu a rawn lang ve hlawl a, ka lo titau deuh a, Bena chuan Sangsangi ka pui lawk a, kan rei ta phian a nih kha a tih chuan inngaihtuah harh thutin thik tur ka ni lo tiin ka rilru ka siam vat a, pangngai tak chuan kan inkawm a, ka ngai dawn vung vung hle, engtik ah nge I rawn haw leh ang ka tih chuan hre lo le,, Season chawlh a ni leh tawh mai ang chu, a ti a, \ha taka khel tur chuan duhsakna te ka hlan a, rei mawi tawk a awm hnu chuan a haw ve leh ta a ni.
Fb ah ka lut a, ka ig account chu group lun ve tak pakhatah hian an lo post a, ka hmu thut chu enge maw ni le tiin ka hlau thawng ru hle a, mahse ka han en chiang a, min fakna thu hlir hi a lo nia, Tin a neitunu hmel\hat thu te an sawi luam a, ka van lawm, ka chhiar nui var var a, ka chhehchhawl Online shoping pawhin kawng dik a zawh chho \an e. Kum tharah chuan hei aia hlawk zawka kal pui dan te ngaihtuah zel a ngai a ni tiin ka thlalak leh ka onlineshoping page an post chu ka en vang vang a.
Mahse, comment kan han check chu min hre \hin emaw tih mai turin min lo rel a, an rin thu mai mai te chu an sawi chhuak a, \hen khat chuan Sangsangi vangin an thil zawrh ka va chah ve a, mahse a lo induh reuh tawp, te an lo tia, \hen khat chu ka hria, an rawn chah pawh a ni em em lo, min zawt vak a, awi,, midangah 2000 in chah tur ka hmu tho sia an rawn ti ngawng ngawng a, ka ning lutukin, 2000 zawka in hmuhnaah chuan chah mai ula tih te ka nei a, chungho te chu an ni hlawm a, an ngaihdan phuah belhin min lo rel chiam chu niin, ka beng sawk chak hlawm tawp, kan inbiak dan hi ka post ve vak dawn nge ni, mahse sumdawng zawk kan nia, kan ngawih rih mai a ngai a ni,
Hun a kal ve leh hret a, U Hriata pawh an khaw lam ti tawh mai ang min pan san leh tawh dawn a, nileng deuh thaw a rawn leng a, hun kan hmang dun a, kan inngaiin \um dang zawng aiin min thlahlel emaw tih mai tur hi a nia, a haw tur te chu a hreh em em a, keimah zawkin ka hnem a ngai hial a, kan inhmuh leh vat tur thute chu ka sawi ve luam a, hreh tak khan a haw ta kha a nia, Zanah rawn leng lehin pawnah chuan kan pahnihin kan \hu dun a, kan hma lam hun chu kan sawi dun sep sep reng a.
U Hriata chuan hna \ha zawk te ka neih chuan I duhthusam ang khawvel ka din pui thei lo che a nih pawhin, kan khawvel neih sa hi hlimawm taka hmang dun turin theihtawp ka chhuah ang tiin ka kut khal niah niah pah chuan a \awng siam siam a, kei chu ka lo bu nghauh nghauh ringawt a, sawi tur ka hre lo a ni, ka ngai dawn bawk si, Mahse ka ngaih tur thu ka sawi chuan tun \um a kal tur hi min ngai zualin a pangchang tlat sia, kal lo tura ka duh thu leh ka thlakhlelh thu pawh ka sawi zui ve vak ngam lo.
U hriata chuan engtin nge kha I duhthsuam in kha a ti leh a, U hriata pang lum ngheng a, a kut vuan reng chung chuan,, Hmun zawl nuam tak ah, phul hring dup hmun ni se, pangpar chi hrang hrang vulnaah, a bulah chuan tuikhuah mawi tak awm se, Thing In nuam leh fel fai tak din ila, tah chuan kan fate nen awm ila tia ka sawi lai chuan, a ngawi vang vang a, chutiang hmuna kan awm theih nan chuan theih tawp ka chhuah ang tiin a thaw halh a.
Engkim mai chu a tihtak em em vek mai a, mak te pawh ka ti zawk hial, U Hriat, chung hmun zawng zawng aia awm ka duhna leh ka thlakhlelh hmun chu I kianga awm leh I bula awm reng hi a nia, chu hmun chu ka nei thei lo a nih pawhin ka vui lo a, ka rilru a na hek lo ang, Mahse nang ka nei thei lo che a nih erawh chuan ka tuar zo lo ang, khawvela hmun nuam ber chu I bul hi a ni ka tih chuan min nuih sak a, min kuah vawng vawng a, chu zan thlasik vawt raih hnuaiah chuan U hriata chuan a pang lumin min tuam lum a ni ber a, he panglum hi ka la ngai fo dawn a ni.
Dar 10 vel chuan Naktuka A hnathawhna lam pan leh tawh tur chuan min haw san leh ta a ni, ka ngai ngawt ang le, a tuk khua alo var a, zing dang ang lo takin hma takah ka tho va, thlasik ni rawn chhuak suar suar chuan ka hmangaihna nena kan in hlatna tur ni thar a rawn her chhuah pui mek chu a ni si a, Anu pawh hma takah a rawn tho ve a, Anu chuan min hmu chu ehe,, Lalnu I va tho hma ve, thawh I hai a ni maw nui var var chuan a rawn ti a, zing dangah pawh ka tho hma ziah alawm ka tih khum mai a.
U Hriata msg chu ka dawn rual chuan phur takin ka reply a, hei counter ah kan awm a, ka chhuak dawn chiah e, ka thlen ve leh ka rawn bia ang che tih hi a ni a, ka reply lai te chuan ka hnuk a ulh \euh mai, Anu chuan Nute, vawiin lamah tuisem a nih dawn kha zing kar a\ang hian insu la a rawn ti, ninawm e,, lunglen leh thlasik laia tui khawih inrem lo lutuk, Mawng pawh tui lumin kan sil lo chauh a nia, Chhun ni sat hunah ka su hman vek, chu loah suk tur a tam lutuk lo ka ti hmak a.
Thingpui vel ka chhuan zawh chuan Anu in tur chu ka siam a, room ah chuan ka luh san leh daih a, ka DM vel chu ka check a, thil order ka pe chhuak leh \an tawh a, U Mami scooty hi ka hmang deuh ngar ngar a ni mai, a tam zawk hi chu keiman ka deliver a, a hahthlak ve thei lutuk , Mahse mahni ngeiin peih chuan a hlawk ber bawk sia, a tam lutuk \um hi chuan Rami hi hlawh chhe te nei hian ka chhawr ve \hin a, a hlawh zata lungawi lo deuh chung hian a rawn kal ve leh nge nge \hin. A chhungte lahin a thlawna len tawp ai chuan an lo phal ve zawk bawk sia,, len chhuan lamah hian a duh ve hrim hrim a ni.
Tichuan order vel khawih chuan ka buai ve nak nak a, class pawh an \an leh dawn hnai tawh a, mahse keichu kal ka tum tawh lo law law a, sumdawn chu full time a tih ka tum tawh zawk a, Rami chuan a \ul lo tiin kal zel tur chuan min tur viau mahse, awm zia ka nei vak dawnin ka hre lova, chu vang chuan chhungte phalna thlapin kumin a\angin college chu ban ka tum ta a ni.
Chaw kan ei lai chuan U Mami chu a khuh leh kharh \hin a, Anu nen chuan kan en leh zuk \hin a, engemaw sawi duh, sawi hreh si hi a ang ber a, a ngawi leh daih zel bawk sia, a rawn khuh leh takah chuan Anu chuan enge maw, I aw chu I then reng le sawi duh I nei ami a ti bung deuh nghut a, U Mami chuan, ahhh,, ihh, eng lo a nia, Peka hian a tih lai chuan uluk takin kalo en a, a ngawi vang vang a, Anu chuan enge,, sawi ava huphurhawm awm ngar ngar ve,, a lo ti.
U mami chu a sen deuh awp awp ni maiin ka hria, eng lo a nia, a ti leh chu, keichuan eng,, chuti taka sawi hreawm chu enge, a kawp ve khang lang che emni ka beng spin a ni mai, kalo ti nghal vat a, U Mami chuan chutiang lam a ni lo, palai rawn tirh a duhthu a sawi a, tih pah chuan lehlam hawiin Antui a hawp thut a, Fiana an tui hawp a phal loh theih theih nen ka hawp palh chang pawn min vin hrep zel a nia, a lai chhe ve hle a ni.
Anu chuan,, awi,, rawn kal rawh se, kan va leng zawk dawn emaw ni, tiin a phur lutuk, Keichuan Nu,, Palai chu hmeichhia in an tir ve \hin tho emni, a nih chuan tirh khalh ila, innei vat vat turin va dil ila, ka ti chu U mami chuan in mawl dun lutuk, mi te hi inva ui lo tak tiin a thu tak hle a, Anu chuan Aw,,, tu mawng beng lo mawlh hian kan thi ang tih hi a hlauhawm alawm nui huah huah chuan a lo ti a.
U mami chu a ngawi leh dat a, lokal rawh u, chu kalo ti ve tawp a, mahse ka ngaihtuah che u a ni, in pahnih chauha inawm tur hi ka ngaingam thlawt lo, a ti zuai raih a, Anu pawh a thu tak ve tawh lutuk, I tleirawl hun lai a\angin chhungkaw tan ti reng rengin hun I hmang a, kei leh I nau min ngaihtuah reng rengin I tan hun pawh I insiam ve hman ngai lo va, I duh angin khawsa ve tawh la, hahdam ve tawh rawh, kan bula I awm reng chuan I hahdam thei tak tak dawn chuang lo, tin, mihring chu engtin tin emaw kan awm ve thei mai zel.
I pa boral hlim te kha ngaihtuah la, ka buai vek a, engtin nge I nau nen ka chawm ang chu tih ngaihtuah reng reng khan ka mu thei lova, mahse hun a her a,tihian puitling takin nang I chhuak a, kan dama kan hrisel na na na hi chuan kan ei tur tawk hi chu kan thawk chhuak ve zel a nia, tin, hla taka kal bo ngai lova, veng chhungah ngei I nei thei tur te chu a lawmawm ngawt zawk a lawm, hei tunah phei chuan in luah man chawi ngai loin min siam tawh a, a hahdam thlak tawh tehh asin, nang ang fanu ka nei hi ka inchhuang \hin asin tia a sawi lai chuan U mami chu a mittui a parawl kiang a, a insut feih feih a, Anu pawh a mittui a dang zo lo.
Keichuan,, Na,, chaw ei mood in tichhia, vai film a, changtunu pasal nei tur ang mai, Nu, U Mami ang fanu I neih avangin I lawm a, keimah I neih avang hian I lawm ve lo ami ka tih chuan, aw,, nangmah ka neih avang hian ka buai thei lutuk a nih hi, a tih chuan,, hmm,, In nufa ve hi chu,, ka chaw ei pawh a tui lo e a, tiin ka kham daih a, ka puar tawh hrim hrim a, kan titau der vel chak hrim hrim a.
U mami pawh rei lo teah a kham ve a, Lalnui pawh puitling takin nun tum la, Ka Nu hi engkimah buai pui reng ang che, a tih chuan,, Hmmm, naktuka chhuak nghal tur ang mai, U Peka chuan Nula pangngai a hmu leh thut ang a, an la \hulh leh thut thei ka tih chuan, U Mami chuan rang lutuk hian enge ka pangngai lohna a rawn ti, nui suk hian, nang te chu I nulat hun a tawp tawh a, I nulat laia pasal neih tum mang si lo, tunah I tar dawna ruaiah ka tih chuan pillow throw chuan min vawm chawrh a, hneawm lutuk.
I U Peka nen ruahmanna kan siam a, thla thar a\angin dawr pangngai hawng ve la kan tia, I U Peka’n pawisa chu a tum ang a, 30% vel I rulh let theih chuan a ngaidam dawn che a nih chu, chuan, kum 5 chhungin a ti leh nghal, dawr luah man pawh thla thum chhung a tum sak dawn che a tih chuan ka lawm lutuk, U Mami chu ka va kuah chung chung a, Anu hi U Mami hi I nei fuh e, vawk vulh aiin a hlawk daih , U Mami vulh hi ka tih chuan U mami chuan, I A siah,, Nang vulh hi broiler vulh ai pawn a hlawk lo.
I sumdawnna tur chu engtin nge ka tih len zel theih ang a, engtin nge sum tam tawk, kan chhungkaw tan ka thawh chhuah theih ang tih ngawt ngaihtuah ang che min ti a, ka lawm a ni tawp mai, Anu pawh chuan Ni e,, Nute, rilru nei taka I awm angai dawn a nia tiin min lo fuih ve bawk a, keichuan ka \hiante hrilh hlan mawlh chu a ni ka nghahhlelh ni. Ka dawr awmna hmun te chu sawiin tun thla chhung ngeia ka luah luh hman tur thu te chu an sawi a, christy leh Rami rilruah an rawn lang nghal a, ka lawm tluk zet hian an lawm ve dawn tih ka hria a ni.
Zanah chuan U Peka chu rawn lengin thil tam tak kan sawiho a, ani pawh chhungkaw mi ang maiin a \awng tawh a, Anu pawn amakpa chei tawh khawp mai, keipawh a nau ang tak takin min en tawh niin ka hria, a ruahmanna te chu a sawi siam siam a, kalo bu nghauh nghauh a, Anu erawh chuan avan zahthlak awm ve, Mi’n an hriat chuan min sawi dan tur te lah chu sum um lutukah min ngai ngei awm sia a ti chuar chuar a. U Mami pawh chuan ni e mawle,, a lo ti ve leh U Peka chuan U Mami melh pah chuan nang kha NI e mawle lo titawh suh, kan sawi fel vek tawh kha tiin a va khap, U mami chu lai deuh chuan a nui ringawt a, karleh lamah palai rawn tirh chu an tum a, chungte chu sawiin Anu pawn chutiang a nih dawn chuan I Pu pawh kan han hrilh ve ngei angai dawn a nih chu tiin kan hma lam hun ngawt mai chu kan sawi a, kan titi pawh a khun khan rih hle mai.
PI SAWMI POV NUI NU-
Hun hi a her dang lam chak khawp mai, Tunah chuan Nui pawh amaha ka beisei ngai reng reng loh college a kal tawh a, tunah sumdawnna lam a ti chho leh a, sumdawng tur phei chuan ka dah chhin ngai lo, amah hi a A buang mai si a, Ka fate pahnih awm dan tur ngaihtuah reng reng hian hun ka hmang a, A bikin Mami ani hian engtik lai pawhin kan chhungkua ngawt hi a ngaihtuah a, buaina leh harsatna tam tak paltlangin hetiang dinhmun hi min thlen pui a, ngaihzawng neihna chang hre lo khawpin ti ila, nei hman lo khawpin a ni zawk mah ang chu, chhungkaw tan a hun a hlan ral \hak a ni ber.
Pasal te nei ve se, chhungkua din vein, ama tan nung ve se tiin ka ngaihtuah \hin a, Mahse chutianga ka sawi chang chuan, min nawr chhuah \al intum hi ati mai \hin a, Fiamthu deuhin asawi \hin tak naa, chutianga ngaihna chu a nei tak tak ang tih ka hlauh avangin ka rilru zawng zawng pawh ka sawi pui ngam ngai lo, Nui lah hian pasal neih chung chang han sawi hi chuan A U Mami fiam hi nuam a ti \hin sia, an in hnial phah leh rap rap \hin reng a.
Hun rei tak hnuah ngaihzawng ve deuh reuh hi a nei niin ka hria a, mahse an awm dan ah chuan an inngaizawng nge ngaizawng lo tih pawh hriat thiam har tak a ni, Nikhat chu Nui ka dawp deuh ti tih a, Mami leh Peka chu an lo inngaizawng ngei mai a, chutia kan fanu rangkachak ber maiin Bialpa tih ve tak tak tur a nei chu ka lawm hle a, kei hi kan vengah hian ka chhuak tam lova, Bazar leh kan inkawng hi a ni deuh ber mai a, ka hun hmanna tam zawk, Sunday a ka inkhawm leh hi a ni deuh mai a. Peka chu sawrkar hna thawk hausa ve pangngai tak a ni tih chu hre mah ila an chhungkua eng ang nge an nih kan hre si lova.
Nutei ka sawm a, a rukin Peka te in leh an chhungkua chu kan va thli thlai a, kan hmel inchei dang lamin an in ah chuan chaw hmeh kan va zuar a, Mami’n hria se min ngei dawn lutuk tih ka hria, Mahse kan fanu duat, kan engkim hi chhungkaw sual tak hnenah a mo palh ang tih ka hlau em a ni, kha chen chhungkhat nu leh Pa ni fawmin hah reng rengin a awm a, a pasal neihnaah leh zel, hah takin a awm ang tih ka hlau a ni tawp mai. An in a chaw hmeh kan va zuar chu an lo fel hle mai a, an \awngkam a\ang chuan mi \ha chhungkua an ni tih a hriat theih mai.
Nu ber lah chu a hawihhawmin a \awngkam a fel thlap a, An awmpui pawh an duat thiam tih ka va hmu thiam nghal mai a, Tin, chhungkaw inrelbawlna felfai tak nei, Pathian \ih tak chhungkua an ni tih an bang vela an thil tar a\ang chuan a hriat theih a ni, Kan chaw hmeh zawrh pawh chu min lei sak a, tichuan an in a\ang chuan kan chhuak a, Peka kan tawk thut mai, kei ka biru a, Nui lah a in hup, Peka chuan min hriat hmel tak hian min en leh vung vung \hin a, kan in pel fel ta maw tihah chuan chak takin kan in lam pan chuan kan kal nghal a, mami’n hria se chu,, min be duh tawh lo hialin ka ring, mahse tunah chuan a Mona tur chhungkuaah chuan ngaihngam takin ka kal tir ngam tawh tih ka chiang a ni.
Nikhat chu palai an rawn kal tur thu chu inthlahrung takin a sawi chhuak ta nge nge a, Nui nen chuan kan fiam nasa khawp a, Mami pawh a sen ve ap ap mai , Tu neih a, mahni tu te ngei han pawm ve te han chak viau mah ila, ka fanu in min kalsan a, pasal a nei tak tak tur anga ka han ngaihtuah meuh chuan a tellova awm ka la inpeih loh zia ka hre chhuak uai uai a, ka hnuk te a ulh lek lek a ni,mahse chung chu ka ti lang tur a ni lo tiin ka insum hram hram a.
Mahse kan han titi tak takah chuan ka insum zo ngang lo a ni, Zanah chuan Peka chu rawn kalin a thil duh dan te, Nui tana dawr hawn a duh thu te,loan min lo vawm hlum sak vek thu te chu an sawi kai a, Mami chu ba nei ṭun angah ka ngai nghal ngawt a, a i thlahrunawm hi ka ti a ni, tin, min sum um lutuk angah min ngai ngei ang a, chungte ka ngaihtuah chuan Mami an dem mawlh chu ka hlau a ni.
Mahse Peka chu mifel leh rilru tluang tak, mifing tak a ni a, kan mualpho loh nan engkim ruahmanna alo nei diam tawh a, Mami awm loh hnua eizawnna kan neih ve theih nan tiin Nui dawr pawh tih len dan tur te an lo ngaihtuah fel diam tawh a, a inthlahrunawm ka tih rualin chhungkaw ngaihsak tak ve ve an innei dawn a ni a, ka thla erawh a muang viau thung, karleh maia Palai an rawn len tur thu a sawi chuan chhuak nghal mai tur angin ka ngai a, ka lung a leng lawk lutuk ringawt, Lalnui lah hi heti ve mai hi a ni bawk si.
Chutianga Palai rawn kal hun tur te an sawi takah chuan Ka Pa pawh a rawn kal theih chuan rawn kal ngei se ka duh a, Tin, khi lama kan chhungte , kan colony ho te, nen engkim ruahmanna siam tlan chu a fuh berin ka ring a ni, thingtlang lama kan chhungte erawh inneih tak tak hunah ni mai se, lam te a hla bawk nen helam a\anga engkim tihfel chu a awlsam dan leh senso tlem dan ber ni a ka hriat avangin, tiang chuan ruahmanna ka siam ta ngawt mai a ni.
Lalnui chu thil a deliver pahin A Pu chu hrilh turin ka ti a, chuan ka phone lawk bawk a, Rini teho nena kar leh lama rawn inthurual a rem chan thu te chu ka sawi luam a, Nutei rawn leng reng reng rawh se, a ngaih te pawh kan ngai alawm a tih tlat avangin Nutei chu han tlawh turin ka ti a, Nui hian APu te lakah hian A U hi a thik deuh \hin a, A U hi an duat bik lutuk ni hian a ngai a, tlawh pawh hi a tlawh tlem reng a. Mahse, Mami hian a Pu te hi chu a ti thiam ve em a, Nui tan han el chi zia zang a ni lo bawk a ni, thisena inzawmna nei lo mah ila, an fa ang tak takin min en a, Ka fate pawh an tu tak tak nen an en dan a dang lo tih ka hria. Min hmangaihin min ngaihtuah hle bawk a, awmna te a dan takah chuan kan in kal pawh tam ta lova, a lawm pawh an lawm lo tih ka hria, Mami’n Pasal neih a tum ve a ni tih ka hriat rual rual khan rilru ah a Pu te khi an lo lang nghal reng kha a nia.
Hun a kal hret a, Nui pawn a dawr chu a hawng ve \an ta, dawr a hawn dawn zan chuan kan chhungkaw inhnial hi a ni tawp, Mami chuan a dawr tur changkan vel la ngaihtuah suh, I thil zawrh tur chauh kha ngaihtuah rawh a ti, Nui lahin a hmun a changkan chuan customer a hip dawn a ti bawk si, Thlalakna hmun \ha tih vel an \hianho chuan an ngaihtuah nghal nasa. Huiham,, Nui hi zawng en liam chin hi neih angai a ni. Mami nen chuan an \hianho khan an titihin han ti ve phawt tehh se kan ti ta ngawt a.
Mami palai te rawn len zan chu a rawn her chhuak a, ka huphurh ngang mai a, Mahse Ka Pi Saii te NUpa chuan hma takah min lo awm puiin, dar 7 vel chuan Rini te ho ,, kan colony ho an rawn thleng bawk a. Ka pa a rawn lang bawk, ka zam lutuk pawh chu min rawn thlamuan hle mai, Dar riat vel chuan Palai hmel chu kan hmu ta, Ka Pa chuan lo dawng sawng berin mizo dan te an sawi kai a, tichuan rawn kal nawn leh pawh ngai loin muang changa kan lo inbuatsaih tawn theih nan Kumin september thla velah hian boruak nawm hun lai chuhin kan ti mai dawn emni tiin ka pa chuan palai te chu a han rawn a.
Anni pawh an lo bu nghauh nghauh a, eng eng emaw an sawi hnu chuan a ni tak chu nakinah ruat turin september thlaa inneih chu kan tin zawn ve ta rup mai a ni, Mami chu kan hralh ve dawn ta ngei e, a ngaihawmin a lunglen thlak dawn, chutih rual chuan hun a la tam a, theih tawpa inbuatsaih ka duh a, Mami ni ropui ber a nih dawn avangin ka theihna zawng zawng hlan ka duh a, mawi taka a lan ka duh a ni.
Show post links
Top
Dar 7 vel chuan ka harh a. U Mami leh Anu chu an lo tho tawh a, Christmas ni a ni bawk a, an che buai ngang mai a, kei chu ka men rei deuh avangin min lo kai tho inthlahrung ve ngei hi a lo nia, a mak ka ti zawk hial. An tih a nih loh hmel tawp a, Nizan lama ka awm dan chu hria se min \im nasa dawn lutuk, Nizan hun chu ka ngaihtuah let a, ka zakin ka inthlahrung tak zet a ni, U hriata pawh chu ka be ngam lo. u Hriata lahin min rawn be bawk si lo, Ani hi hmeichhe laka sulhnu hnut chhiah a, kalsan daih \hin mipa ang hi a ni ve angem le tih ten ka ngaihtuah a, Nizan chu siam \hat ka chak, U mami thu kha zawmin lo chhuak daw daw lo ila a \ha tur hi a nia. Mahse hun kal tawh avanga inchhir leh indawm kun reng chuan awm zia a awm lo.
Ka phone chu ka en a, U Hriata msg alo la awm bawk si lo, ka hrilh hai hle a, ka ngaih a \ha lo bawk, Mahse Nun chu a ngaiin ka hman a ngai, Inthlahrung deuh chuan ka tho chhuak a, ka lu chu a na bur mai a, ka ni luk mai, U Mami hnaihah pawh chuan ka awm ngam lo, U Mami chuan nizan I va rawn haw har awm em em ve, tlangval emaw hi I inti emni, Puitlin lam hi hnaih deuh tehh a lo ti nghal, ka ngawi reng a, Anu chuan dar eng zah velin nge I rawn haw a, I rawn haw lai awm ka hre lo reng reng, chet sut sut pah chuan a ti a.
U Mami chuan dar 12 vel pawn a la rawn haw lo, a rawn haw har lutuk a, ka nghak peih tawh lova ka mut san a nih kha a tih takah chuan Dar 1 vela ka haw thu chuan ka chhang a, inbual nghal ka duh, ka tih chuan U Mami chuan a vawh vawh nen a lo ti vat a, min hre chhuak ang tih ka hlau lutuk, Mahse engmah min zawt zui lo hlauh a, Nizan a ka awm ang kha chuan ka awm leh tawh lo ang ti rilru neuh neuh chungin Bathroom lam chu ka pan a. ka phone ah chuan zai ka play pah bawk a.
Ka inbual \ep tihah chuan U Hriata chuan min rawn call a, ka la hreh ang reng hle a, Mahse min rawn call chu ka lawm lutuk, hreh ru tak chuan ka la a, U Hriata chuan ka tho ve chiah, I tho tawh em a rawn ti, Um,, tho ve chiah ka ti pha deuh dai a, U Hriata chuan vawiin I inkhawm dawn em tiin min rawn zawt leh a, inkhawm ve ang chu a, nang I inkhawm dawn em ka ti ve leh nghal a, an chhungkuaa an inkhawm tur thu te sawiin, Bathroom ah chuan rei fe kan in bia a, Nizan lam thil engmah min sawi pui lova, ka thaw huai mai, inbual ka tum thu ka hrilh chuan Inkhawm banah kan rawn leng ang tiin phone chu a dah a. keipawh nichin ai chua ka mood pawh a dik tawh zawk a.
Phur sur chuan ka inbual a, Anu chu rawn auin, Lalnu, I inbual tawh em ka ek a chhuak a nia, tun angah I inbual ngai mang si lo, mi inthiar timing I tibuai alawm a rawn ti leh tawh, ka inbual dawn chiah lo ip mai rawh ka tih chuan,, lo chhuak leh lawk mai rawh a rawn ti, ka in laih tawh alawm le ka rawn chhuak peih tawh lo tiin ka hnial lui tlat a, ka inbual lui a. U mami pawh chuan che ve vat vat rawh, inkhawm te kan tlai ang e, chhungkaw thlalak neih tur a nia a rawn ti ve bawk a, min rawn tur hmanhmawh dun tawp a.
Ka inbual sawk sawk a, ka inbual zova, lotion vel te inhnawihin ka zai rat rat a, U Mami chu ka room ah rawn lutin. Lalnu, enge I sumdawnna chu a an dawn, I tui zawng te a ni tak tak em a rawn ti leh a.
Kei chuan phur zet hian tehh reng mai, 2nd Sem hi ka kal tawh lo ang a, Dawr siam tumin \an ka la zawk dawn emaw ni ka tih chuan U Mami chuan I thei tak tak ang maw a rawn ti siam siam a, Sum a awm chuan thei tehh reng mai, chu loah lehkha zir ngawt ai chuan ka ti mi zawk ka tih chuan a bu nghauh nghauh a, Nakum lamah I dawr tur kan ngaihtuah dawn nia atih chuan ka phur lutuk, ka kuah ringawt a, U mami chuan kal tehh,, I mak chung chung lutuk, Tukin chu kan tho hma tlang bawk a, chhuat saw lo va nawt tehh a ti leh nghal daih. Hmm,,, a mak, min tir zawm leh nghal zat a.
Chhuat nawhna Min present ngei mai chuan phur hmel tak chuan chhuat chu ka nawt leh tur tur tawh a, Anu chuan Bathroom a\ang chuan Lalnu, ka chaw hmeh chhuan kha lo sem tehh a rawn ti leh, A ninawm, uMami awm ve reng a, Lalnu rawn ti leh tawh,, awm lo ila chu an buai dun nufa ve ngawt ang. Inthiar vat vat la a ni mai tih pah chuan gas chu ka va sem a, Anu a rawn chhuah hnu chuan U Mami pawh va intifai vein ani chu a rei leh dawn.
Ka Ig vel chu ka check a, Mahse ni 28 a\anga order kan lak leh chauh tur thute ka post a, Christmas chawlh kan nei ve zuai dawn a ni, min rawn bia erawh an awm nak nak a, ka reply zel a, a \henin fel min tih em em laiin \henkhatin induh min ti em em bawk a, ka hrethiam lo, ka chhang \ha hle chuan ka hre bawk sia, a \hen hi. IG message Generalah hian a lo lut \hin a, chung ho chu kalo hmuh hmaih \hin a, chung tih loh chu ka hmuh ang ang chu ka reply \ha viau zel mawle. Ah,, mi zawng zawng tih lawm hi an har a ni.
U Mami a inpeih chuan chaw ei ka siam a, Chaw ei hmunah chuan Anu\n \awng\aina hmangin chumi zawh chuan chaw chu kan ei a, kan chaw ei pah chuan kan titi mawlh mawlh a, Anu chuan ka awm dan \ha lo \hen khat te min zilh siam siam a, A tawpah U Mami ah let lehin Pasal nei tur chuan a tur leh tawh a, Nangmah ang rual chuan fa an nei sup sup tawh a, tu pawh an nei lo chauh tawh a nih hi a tih chuan , U Mami chuan a awih awm em em loh, ka inleng ho zingah ka Upat thu insawi vak vak zel a, tiang te chuan hmuh a har ve tho alawm a rawn ti ve khauh a.
A Nu chuan nangma rawn beisei in leng nei ngai hek lo che, a lo ti ve leh bawk, U mami pawhin \um dang angin a hnial tawh lem lo va, kan ngawih vang vang hnu chuan A nu chuan, hei tuna I inlengpa hi a fel ve riauin ka hria a, tin, midang rawn leng ang ngawt chu a ni lo ve deuhin ka hria a, heihi I chhuah leh a nih chuan an vang tawh dawn tehh mai a nia, a rawn ti leh, ka insum thei tawh lo ka nui chhuak hial a, U Mmai chuan lo nui suh, min nawr chhuah hi in chak sia nui suk chuan a ti a.
Anu chuan innawr chhuah lam a ni lo, tun ami phei chu veng khat te kan la ni zui, hei bak bak a awm lo, tu hmu lova thih te pawh hi ka hlau ve alawm, tiin a thu tak viau, Kan ngawi vang vang a, keichuan thil ngaihtuah chhuak thutin e,, Nu, U Mami hian naute a la nei thei dawn emni ka ti chu, U Mami a ter at a, in va zak lo nufa tak em, Pitar treat hian min treat suh u, Fa chu e,, duh zat zat ka la nei thei a rawn ti, kan nui hak hak a.
Anu chuan I neih theih chuan nei ta che, nakinah a ping mai ange a rawn ti leh, U Mmai chuan khatiang Lalnui bulah sawi ziah suh a rawn ti leh, kan insum thei lo, kan nui a, kan chaw ei chu kan hlim hle hi a ni tawp, Mi chhungkua ang lo takin inhnialin, in hau tawn reng mah ila, kan inpawhin kan innel em em a, heihi kan chhungkuaah chuan nuam ka tih ve em em a ni, tin, A pang ber ka nihnaah hian min chhehchhawl viau mahse, min hmangaihin min duat em em a, hengte mawlh hi a ni nuam ka tih chu.
Inkhawm tur chuan kan chhungkua chuan kan in zui chhuak a, A Pi Saii chuan Nute min lo nghak tehh, hei I Pu hi a muang chhe chhu lutuk a, kan rawn kal thei \ep a ti a, Anu te chu lova kal mai rawh u, A Pi Saii hi kan nghak leh ange, tiin A Pi te in ah chuan ka lut a, An lo mawi ve ngang mai a, Ka va lut chiah chu Api chuan Nute,, ka kawr thar hi a mawi em a lo ti var a, Awi,, mawi lutuk, A Pu lei che a ni maw ka tih chuan a tum deuh bar a.
A teuh lo lutuk, I Pu ve hi chuan engmah min lei na chang pawh hi a hre lo tiin A pu chu ava melh ralh a, A pu chuan Gauhati a kan kal \umin a rawn ti chiah, A pi chuan kha kha rawn sawi ziah suh, kan inngaihzawn laia min lei a nih kha, a rei tawh lutuk, tu pawh I nei duah tawh, tun thlengin engmah min la lei belh lo, a ti a, a tum deuh bar bar a, A pi titau vel chu cute ka ti reuh tawp a. A Pu chuan, Nute, ka thil lei tawh a ka tihfuh ber chu maw a ti dek dek a, A Pi chuan engmah lei fuh hi I nei ngai lo a ti leh, A Pu chu a ngawi dat a, ,A Pu chu enin, engnge Pu I lei fuh ber chu tiin ka zawt let a, A Pu chuan nui deuh sun sun pah hian, I pi 420 a ka lei kha ka la tifuh berin ka hria a ti chu A Pi pawh a nui ve suk a.
Tichuan kan pathum chuan Biak In lam pan chuan kan kal ta a ni, Biak In kan thleng a, ,mi an lo \hahnem tawh viau a, kan Biak In kawt vel chu an chei mawi ngang mai a,, photo booth ah te chuan thla kan han la ve a, inkhawm ban chuan rei pawh awm loin Kan in lam ka pan nghal a, U Hriata te rawn len an tum a, christmas ni hian \hen khat chuan ruai an \heh dawn a, keini chuan a tukah kan \heh dawn thung a, U Hriata te pawhin Christmas ni ah an \heh dawnin ka hria. Ruai \heh zawhah rawn kal a tum tho a. in a lo va awm hahdam mai mai chu ka duh a ni, nizan lam effect nge ni ka lu a la na deuh a. mi zinga awm chu nuam ka ti vak lo.
Mahse,, rei vak loah U mami te \hianho an rawn thleng a, thingpui an rawn ti leh a, awm awl tak tak hi a theih lo, ka ning \hin a nia, min hlau lo si, ka thinrim poh leh nuam hi an tia, thingpui ka siam mawlh mawlh lai chuan Christyn min rawn call a, len puiah min rawn sawm a, Mahse nizan lam vanga ka la inthlahrun deuh avangin ka len hman loh thuin ka chhang a, nizan an awm dan te ka zawt a, kan lennaah khan an lo riak chu niin, An chhungten an hau nasa dawn tih ka chiang a ni, chhuanlam tur an ngaihtuah nasa ve ngawt ang le, mahse tunah chuan an insawifel ta a niang. A thaw veng leh tawh em mai.
Hun leh ni a liam a, christmas boruak pawh chelh din reng theih ni hek lo le, a liam ve leh mai a, hun pui a liam a, hun thar kan chuangkai dawn a, engtin nge kan nun chhoh zel ang, Anu te chu chiang takin ka hrilh tawh a, college ka kal chhunzawm dawn loh thu ka sawi tirh chuan min hnial ve deuh a, mahse, U Mami’n tun \um chu min lo support avangin, Anu pawhin min hnial lui lem lova, Ka sumdawnna atan chuan theih tawp ka chhuah ta a ni. U Hriata pawh Thingtlang lam pana a haw a hun leh \ep tawh a, Bena pawh seasin \an leh tawh turin Naktuk maiah a chhuk leh tawh dawn a, India club lian tak, East bengal in lei an tum a, chung velah chuan a kal hma a ngai leh thut a ni.
An haw hmaa inhmuh khawm leh kan tum pawh Bena a kal leh thut dawn avangin kan hman ta lo a ni, Mahse, zanah chuan ka rawn leng tho ang chu a ti a, a ngaihawm leh vung vung dawn khawp mai, Mahse tunah chuan Bena tan chuan a hmasa ber ka ni tawh lova, a chang chuan ka hre thiam lo leh thut \hin a, Mahse Bialnu a neih miau avangin ka thikn ka ti lang ngai lo, a changchuan ka \hian chan ang mai hian ka inhre \hin. Zani pawh Sangsangi te in ah a leng phawt ang a, chumi zawhah a rawn kal ve dawn chauh a ni.
Zan dar 10 vel chuan Bena chu a rawn lang ve hlawl a, ka lo titau deuh a, Bena chuan Sangsangi ka pui lawk a, kan rei ta phian a nih kha a tih chuan inngaihtuah harh thutin thik tur ka ni lo tiin ka rilru ka siam vat a, pangngai tak chuan kan inkawm a, ka ngai dawn vung vung hle, engtik ah nge I rawn haw leh ang ka tih chuan hre lo le,, Season chawlh a ni leh tawh mai ang chu, a ti a, \ha taka khel tur chuan duhsakna te ka hlan a, rei mawi tawk a awm hnu chuan a haw ve leh ta a ni.
Fb ah ka lut a, ka ig account chu group lun ve tak pakhatah hian an lo post a, ka hmu thut chu enge maw ni le tiin ka hlau thawng ru hle a, mahse ka han en chiang a, min fakna thu hlir hi a lo nia, Tin a neitunu hmel\hat thu te an sawi luam a, ka van lawm, ka chhiar nui var var a, ka chhehchhawl Online shoping pawhin kawng dik a zawh chho \an e. Kum tharah chuan hei aia hlawk zawka kal pui dan te ngaihtuah zel a ngai a ni tiin ka thlalak leh ka onlineshoping page an post chu ka en vang vang a.
Mahse, comment kan han check chu min hre \hin emaw tih mai turin min lo rel a, an rin thu mai mai te chu an sawi chhuak a, \hen khat chuan Sangsangi vangin an thil zawrh ka va chah ve a, mahse a lo induh reuh tawp, te an lo tia, \hen khat chu ka hria, an rawn chah pawh a ni em em lo, min zawt vak a, awi,, midangah 2000 in chah tur ka hmu tho sia an rawn ti ngawng ngawng a, ka ning lutukin, 2000 zawka in hmuhnaah chuan chah mai ula tih te ka nei a, chungho te chu an ni hlawm a, an ngaihdan phuah belhin min lo rel chiam chu niin, ka beng sawk chak hlawm tawp, kan inbiak dan hi ka post ve vak dawn nge ni, mahse sumdawng zawk kan nia, kan ngawih rih mai a ngai a ni,
Hun a kal ve leh hret a, U Hriata pawh an khaw lam ti tawh mai ang min pan san leh tawh dawn a, nileng deuh thaw a rawn leng a, hun kan hmang dun a, kan inngaiin \um dang zawng aiin min thlahlel emaw tih mai tur hi a nia, a haw tur te chu a hreh em em a, keimah zawkin ka hnem a ngai hial a, kan inhmuh leh vat tur thute chu ka sawi ve luam a, hreh tak khan a haw ta kha a nia, Zanah rawn leng lehin pawnah chuan kan pahnihin kan \hu dun a, kan hma lam hun chu kan sawi dun sep sep reng a.
U Hriata chuan hna \ha zawk te ka neih chuan I duhthusam ang khawvel ka din pui thei lo che a nih pawhin, kan khawvel neih sa hi hlimawm taka hmang dun turin theihtawp ka chhuah ang tiin ka kut khal niah niah pah chuan a \awng siam siam a, kei chu ka lo bu nghauh nghauh ringawt a, sawi tur ka hre lo a ni, ka ngai dawn bawk si, Mahse ka ngaih tur thu ka sawi chuan tun \um a kal tur hi min ngai zualin a pangchang tlat sia, kal lo tura ka duh thu leh ka thlakhlelh thu pawh ka sawi zui ve vak ngam lo.
U hriata chuan engtin nge kha I duhthsuam in kha a ti leh a, U hriata pang lum ngheng a, a kut vuan reng chung chuan,, Hmun zawl nuam tak ah, phul hring dup hmun ni se, pangpar chi hrang hrang vulnaah, a bulah chuan tuikhuah mawi tak awm se, Thing In nuam leh fel fai tak din ila, tah chuan kan fate nen awm ila tia ka sawi lai chuan, a ngawi vang vang a, chutiang hmuna kan awm theih nan chuan theih tawp ka chhuah ang tiin a thaw halh a.
Engkim mai chu a tihtak em em vek mai a, mak te pawh ka ti zawk hial, U Hriat, chung hmun zawng zawng aia awm ka duhna leh ka thlakhlelh hmun chu I kianga awm leh I bula awm reng hi a nia, chu hmun chu ka nei thei lo a nih pawhin ka vui lo a, ka rilru a na hek lo ang, Mahse nang ka nei thei lo che a nih erawh chuan ka tuar zo lo ang, khawvela hmun nuam ber chu I bul hi a ni ka tih chuan min nuih sak a, min kuah vawng vawng a, chu zan thlasik vawt raih hnuaiah chuan U hriata chuan a pang lumin min tuam lum a ni ber a, he panglum hi ka la ngai fo dawn a ni.
Dar 10 vel chuan Naktuka A hnathawhna lam pan leh tawh tur chuan min haw san leh ta a ni, ka ngai ngawt ang le, a tuk khua alo var a, zing dang ang lo takin hma takah ka tho va, thlasik ni rawn chhuak suar suar chuan ka hmangaihna nena kan in hlatna tur ni thar a rawn her chhuah pui mek chu a ni si a, Anu pawh hma takah a rawn tho ve a, Anu chuan min hmu chu ehe,, Lalnu I va tho hma ve, thawh I hai a ni maw nui var var chuan a rawn ti a, zing dangah pawh ka tho hma ziah alawm ka tih khum mai a.
U Hriata msg chu ka dawn rual chuan phur takin ka reply a, hei counter ah kan awm a, ka chhuak dawn chiah e, ka thlen ve leh ka rawn bia ang che tih hi a ni a, ka reply lai te chuan ka hnuk a ulh \euh mai, Anu chuan Nute, vawiin lamah tuisem a nih dawn kha zing kar a\ang hian insu la a rawn ti, ninawm e,, lunglen leh thlasik laia tui khawih inrem lo lutuk, Mawng pawh tui lumin kan sil lo chauh a nia, Chhun ni sat hunah ka su hman vek, chu loah suk tur a tam lutuk lo ka ti hmak a.
Thingpui vel ka chhuan zawh chuan Anu in tur chu ka siam a, room ah chuan ka luh san leh daih a, ka DM vel chu ka check a, thil order ka pe chhuak leh \an tawh a, U Mami scooty hi ka hmang deuh ngar ngar a ni mai, a tam zawk hi chu keiman ka deliver a, a hahthlak ve thei lutuk , Mahse mahni ngeiin peih chuan a hlawk ber bawk sia, a tam lutuk \um hi chuan Rami hi hlawh chhe te nei hian ka chhawr ve \hin a, a hlawh zata lungawi lo deuh chung hian a rawn kal ve leh nge nge \hin. A chhungte lahin a thlawna len tawp ai chuan an lo phal ve zawk bawk sia,, len chhuan lamah hian a duh ve hrim hrim a ni.
Tichuan order vel khawih chuan ka buai ve nak nak a, class pawh an \an leh dawn hnai tawh a, mahse keichu kal ka tum tawh lo law law a, sumdawn chu full time a tih ka tum tawh zawk a, Rami chuan a \ul lo tiin kal zel tur chuan min tur viau mahse, awm zia ka nei vak dawnin ka hre lova, chu vang chuan chhungte phalna thlapin kumin a\angin college chu ban ka tum ta a ni.
Chaw kan ei lai chuan U Mami chu a khuh leh kharh \hin a, Anu nen chuan kan en leh zuk \hin a, engemaw sawi duh, sawi hreh si hi a ang ber a, a ngawi leh daih zel bawk sia, a rawn khuh leh takah chuan Anu chuan enge maw, I aw chu I then reng le sawi duh I nei ami a ti bung deuh nghut a, U Mami chuan, ahhh,, ihh, eng lo a nia, Peka hian a tih lai chuan uluk takin kalo en a, a ngawi vang vang a, Anu chuan enge,, sawi ava huphurhawm awm ngar ngar ve,, a lo ti.
U mami chu a sen deuh awp awp ni maiin ka hria, eng lo a nia, a ti leh chu, keichuan eng,, chuti taka sawi hreawm chu enge, a kawp ve khang lang che emni ka beng spin a ni mai, kalo ti nghal vat a, U Mami chuan chutiang lam a ni lo, palai rawn tirh a duhthu a sawi a, tih pah chuan lehlam hawiin Antui a hawp thut a, Fiana an tui hawp a phal loh theih theih nen ka hawp palh chang pawn min vin hrep zel a nia, a lai chhe ve hle a ni.
Anu chuan,, awi,, rawn kal rawh se, kan va leng zawk dawn emaw ni, tiin a phur lutuk, Keichuan Nu,, Palai chu hmeichhia in an tir ve \hin tho emni, a nih chuan tirh khalh ila, innei vat vat turin va dil ila, ka ti chu U mami chuan in mawl dun lutuk, mi te hi inva ui lo tak tiin a thu tak hle a, Anu chuan Aw,,, tu mawng beng lo mawlh hian kan thi ang tih hi a hlauhawm alawm nui huah huah chuan a lo ti a.
U mami chu a ngawi leh dat a, lokal rawh u, chu kalo ti ve tawp a, mahse ka ngaihtuah che u a ni, in pahnih chauha inawm tur hi ka ngaingam thlawt lo, a ti zuai raih a, Anu pawh a thu tak ve tawh lutuk, I tleirawl hun lai a\angin chhungkaw tan ti reng rengin hun I hmang a, kei leh I nau min ngaihtuah reng rengin I tan hun pawh I insiam ve hman ngai lo va, I duh angin khawsa ve tawh la, hahdam ve tawh rawh, kan bula I awm reng chuan I hahdam thei tak tak dawn chuang lo, tin, mihring chu engtin tin emaw kan awm ve thei mai zel.
I pa boral hlim te kha ngaihtuah la, ka buai vek a, engtin nge I nau nen ka chawm ang chu tih ngaihtuah reng reng khan ka mu thei lova, mahse hun a her a,tihian puitling takin nang I chhuak a, kan dama kan hrisel na na na hi chuan kan ei tur tawk hi chu kan thawk chhuak ve zel a nia, tin, hla taka kal bo ngai lova, veng chhungah ngei I nei thei tur te chu a lawmawm ngawt zawk a lawm, hei tunah phei chuan in luah man chawi ngai loin min siam tawh a, a hahdam thlak tawh tehh asin, nang ang fanu ka nei hi ka inchhuang \hin asin tia a sawi lai chuan U mami chu a mittui a parawl kiang a, a insut feih feih a, Anu pawh a mittui a dang zo lo.
Keichuan,, Na,, chaw ei mood in tichhia, vai film a, changtunu pasal nei tur ang mai, Nu, U Mami ang fanu I neih avangin I lawm a, keimah I neih avang hian I lawm ve lo ami ka tih chuan, aw,, nangmah ka neih avang hian ka buai thei lutuk a nih hi, a tih chuan,, hmm,, In nufa ve hi chu,, ka chaw ei pawh a tui lo e a, tiin ka kham daih a, ka puar tawh hrim hrim a, kan titau der vel chak hrim hrim a.
U mami pawh rei lo teah a kham ve a, Lalnui pawh puitling takin nun tum la, Ka Nu hi engkimah buai pui reng ang che, a tih chuan,, Hmmm, naktuka chhuak nghal tur ang mai, U Peka chuan Nula pangngai a hmu leh thut ang a, an la \hulh leh thut thei ka tih chuan, U Mami chuan rang lutuk hian enge ka pangngai lohna a rawn ti, nui suk hian, nang te chu I nulat hun a tawp tawh a, I nulat laia pasal neih tum mang si lo, tunah I tar dawna ruaiah ka tih chuan pillow throw chuan min vawm chawrh a, hneawm lutuk.
I U Peka nen ruahmanna kan siam a, thla thar a\angin dawr pangngai hawng ve la kan tia, I U Peka’n pawisa chu a tum ang a, 30% vel I rulh let theih chuan a ngaidam dawn che a nih chu, chuan, kum 5 chhungin a ti leh nghal, dawr luah man pawh thla thum chhung a tum sak dawn che a tih chuan ka lawm lutuk, U Mami chu ka va kuah chung chung a, Anu hi U Mami hi I nei fuh e, vawk vulh aiin a hlawk daih , U Mami vulh hi ka tih chuan U mami chuan, I A siah,, Nang vulh hi broiler vulh ai pawn a hlawk lo.
I sumdawnna tur chu engtin nge ka tih len zel theih ang a, engtin nge sum tam tawk, kan chhungkaw tan ka thawh chhuah theih ang tih ngawt ngaihtuah ang che min ti a, ka lawm a ni tawp mai, Anu pawh chuan Ni e,, Nute, rilru nei taka I awm angai dawn a nia tiin min lo fuih ve bawk a, keichuan ka \hiante hrilh hlan mawlh chu a ni ka nghahhlelh ni. Ka dawr awmna hmun te chu sawiin tun thla chhung ngeia ka luah luh hman tur thu te chu an sawi a, christy leh Rami rilruah an rawn lang nghal a, ka lawm tluk zet hian an lawm ve dawn tih ka hria a ni.
Zanah chuan U Peka chu rawn lengin thil tam tak kan sawiho a, ani pawh chhungkaw mi ang maiin a \awng tawh a, Anu pawn amakpa chei tawh khawp mai, keipawh a nau ang tak takin min en tawh niin ka hria, a ruahmanna te chu a sawi siam siam a, kalo bu nghauh nghauh a, Anu erawh chuan avan zahthlak awm ve, Mi’n an hriat chuan min sawi dan tur te lah chu sum um lutukah min ngai ngei awm sia a ti chuar chuar a. U Mami pawh chuan ni e mawle,, a lo ti ve leh U Peka chuan U Mami melh pah chuan nang kha NI e mawle lo titawh suh, kan sawi fel vek tawh kha tiin a va khap, U mami chu lai deuh chuan a nui ringawt a, karleh lamah palai rawn tirh chu an tum a, chungte chu sawiin Anu pawn chutiang a nih dawn chuan I Pu pawh kan han hrilh ve ngei angai dawn a nih chu tiin kan hma lam hun ngawt mai chu kan sawi a, kan titi pawh a khun khan rih hle mai.
PI SAWMI POV NUI NU-
Hun hi a her dang lam chak khawp mai, Tunah chuan Nui pawh amaha ka beisei ngai reng reng loh college a kal tawh a, tunah sumdawnna lam a ti chho leh a, sumdawng tur phei chuan ka dah chhin ngai lo, amah hi a A buang mai si a, Ka fate pahnih awm dan tur ngaihtuah reng reng hian hun ka hmang a, A bikin Mami ani hian engtik lai pawhin kan chhungkua ngawt hi a ngaihtuah a, buaina leh harsatna tam tak paltlangin hetiang dinhmun hi min thlen pui a, ngaihzawng neihna chang hre lo khawpin ti ila, nei hman lo khawpin a ni zawk mah ang chu, chhungkaw tan a hun a hlan ral \hak a ni ber.
Pasal te nei ve se, chhungkua din vein, ama tan nung ve se tiin ka ngaihtuah \hin a, Mahse chutianga ka sawi chang chuan, min nawr chhuah \al intum hi ati mai \hin a, Fiamthu deuhin asawi \hin tak naa, chutianga ngaihna chu a nei tak tak ang tih ka hlauh avangin ka rilru zawng zawng pawh ka sawi pui ngam ngai lo, Nui lah hian pasal neih chung chang han sawi hi chuan A U Mami fiam hi nuam a ti \hin sia, an in hnial phah leh rap rap \hin reng a.
Hun rei tak hnuah ngaihzawng ve deuh reuh hi a nei niin ka hria a, mahse an awm dan ah chuan an inngaizawng nge ngaizawng lo tih pawh hriat thiam har tak a ni, Nikhat chu Nui ka dawp deuh ti tih a, Mami leh Peka chu an lo inngaizawng ngei mai a, chutia kan fanu rangkachak ber maiin Bialpa tih ve tak tak tur a nei chu ka lawm hle a, kei hi kan vengah hian ka chhuak tam lova, Bazar leh kan inkawng hi a ni deuh ber mai a, ka hun hmanna tam zawk, Sunday a ka inkhawm leh hi a ni deuh mai a. Peka chu sawrkar hna thawk hausa ve pangngai tak a ni tih chu hre mah ila an chhungkua eng ang nge an nih kan hre si lova.
Nutei ka sawm a, a rukin Peka te in leh an chhungkua chu kan va thli thlai a, kan hmel inchei dang lamin an in ah chuan chaw hmeh kan va zuar a, Mami’n hria se min ngei dawn lutuk tih ka hria, Mahse kan fanu duat, kan engkim hi chhungkaw sual tak hnenah a mo palh ang tih ka hlau em a ni, kha chen chhungkhat nu leh Pa ni fawmin hah reng rengin a awm a, a pasal neihnaah leh zel, hah takin a awm ang tih ka hlau a ni tawp mai. An in a chaw hmeh kan va zuar chu an lo fel hle mai a, an \awngkam a\ang chuan mi \ha chhungkua an ni tih a hriat theih mai.
Nu ber lah chu a hawihhawmin a \awngkam a fel thlap a, An awmpui pawh an duat thiam tih ka va hmu thiam nghal mai a, Tin, chhungkaw inrelbawlna felfai tak nei, Pathian \ih tak chhungkua an ni tih an bang vela an thil tar a\ang chuan a hriat theih a ni, Kan chaw hmeh zawrh pawh chu min lei sak a, tichuan an in a\ang chuan kan chhuak a, Peka kan tawk thut mai, kei ka biru a, Nui lah a in hup, Peka chuan min hriat hmel tak hian min en leh vung vung \hin a, kan in pel fel ta maw tihah chuan chak takin kan in lam pan chuan kan kal nghal a, mami’n hria se chu,, min be duh tawh lo hialin ka ring, mahse tunah chuan a Mona tur chhungkuaah chuan ngaihngam takin ka kal tir ngam tawh tih ka chiang a ni.
Nikhat chu palai an rawn kal tur thu chu inthlahrung takin a sawi chhuak ta nge nge a, Nui nen chuan kan fiam nasa khawp a, Mami pawh a sen ve ap ap mai , Tu neih a, mahni tu te ngei han pawm ve te han chak viau mah ila, ka fanu in min kalsan a, pasal a nei tak tak tur anga ka han ngaihtuah meuh chuan a tellova awm ka la inpeih loh zia ka hre chhuak uai uai a, ka hnuk te a ulh lek lek a ni,mahse chung chu ka ti lang tur a ni lo tiin ka insum hram hram a.
Mahse kan han titi tak takah chuan ka insum zo ngang lo a ni, Zanah chuan Peka chu rawn kalin a thil duh dan te, Nui tana dawr hawn a duh thu te,loan min lo vawm hlum sak vek thu te chu an sawi kai a, Mami chu ba nei ṭun angah ka ngai nghal ngawt a, a i thlahrunawm hi ka ti a ni, tin, min sum um lutuk angah min ngai ngei ang a, chungte ka ngaihtuah chuan Mami an dem mawlh chu ka hlau a ni.
Mahse Peka chu mifel leh rilru tluang tak, mifing tak a ni a, kan mualpho loh nan engkim ruahmanna alo nei diam tawh a, Mami awm loh hnua eizawnna kan neih ve theih nan tiin Nui dawr pawh tih len dan tur te an lo ngaihtuah fel diam tawh a, a inthlahrunawm ka tih rualin chhungkaw ngaihsak tak ve ve an innei dawn a ni a, ka thla erawh a muang viau thung, karleh maia Palai an rawn len tur thu a sawi chuan chhuak nghal mai tur angin ka ngai a, ka lung a leng lawk lutuk ringawt, Lalnui lah hi heti ve mai hi a ni bawk si.
Chutianga Palai rawn kal hun tur te an sawi takah chuan Ka Pa pawh a rawn kal theih chuan rawn kal ngei se ka duh a, Tin, khi lama kan chhungte , kan colony ho te, nen engkim ruahmanna siam tlan chu a fuh berin ka ring a ni, thingtlang lama kan chhungte erawh inneih tak tak hunah ni mai se, lam te a hla bawk nen helam a\anga engkim tihfel chu a awlsam dan leh senso tlem dan ber ni a ka hriat avangin, tiang chuan ruahmanna ka siam ta ngawt mai a ni.
Lalnui chu thil a deliver pahin A Pu chu hrilh turin ka ti a, chuan ka phone lawk bawk a, Rini teho nena kar leh lama rawn inthurual a rem chan thu te chu ka sawi luam a, Nutei rawn leng reng reng rawh se, a ngaih te pawh kan ngai alawm a tih tlat avangin Nutei chu han tlawh turin ka ti a, Nui hian APu te lakah hian A U hi a thik deuh \hin a, A U hi an duat bik lutuk ni hian a ngai a, tlawh pawh hi a tlawh tlem reng a. Mahse, Mami hian a Pu te hi chu a ti thiam ve em a, Nui tan han el chi zia zang a ni lo bawk a ni, thisena inzawmna nei lo mah ila, an fa ang tak takin min en a, Ka fate pawh an tu tak tak nen an en dan a dang lo tih ka hria. Min hmangaihin min ngaihtuah hle bawk a, awmna te a dan takah chuan kan in kal pawh tam ta lova, a lawm pawh an lawm lo tih ka hria, Mami’n Pasal neih a tum ve a ni tih ka hriat rual rual khan rilru ah a Pu te khi an lo lang nghal reng kha a nia.
Hun a kal hret a, Nui pawn a dawr chu a hawng ve \an ta, dawr a hawn dawn zan chuan kan chhungkaw inhnial hi a ni tawp, Mami chuan a dawr tur changkan vel la ngaihtuah suh, I thil zawrh tur chauh kha ngaihtuah rawh a ti, Nui lahin a hmun a changkan chuan customer a hip dawn a ti bawk si, Thlalakna hmun \ha tih vel an \hianho chuan an ngaihtuah nghal nasa. Huiham,, Nui hi zawng en liam chin hi neih angai a ni. Mami nen chuan an \hianho khan an titihin han ti ve phawt tehh se kan ti ta ngawt a.
Mami palai te rawn len zan chu a rawn her chhuak a, ka huphurh ngang mai a, Mahse Ka Pi Saii te NUpa chuan hma takah min lo awm puiin, dar 7 vel chuan Rini te ho ,, kan colony ho an rawn thleng bawk a. Ka pa a rawn lang bawk, ka zam lutuk pawh chu min rawn thlamuan hle mai, Dar riat vel chuan Palai hmel chu kan hmu ta, Ka Pa chuan lo dawng sawng berin mizo dan te an sawi kai a, tichuan rawn kal nawn leh pawh ngai loin muang changa kan lo inbuatsaih tawn theih nan Kumin september thla velah hian boruak nawm hun lai chuhin kan ti mai dawn emni tiin ka pa chuan palai te chu a han rawn a.
Anni pawh an lo bu nghauh nghauh a, eng eng emaw an sawi hnu chuan a ni tak chu nakinah ruat turin september thlaa inneih chu kan tin zawn ve ta rup mai a ni, Mami chu kan hralh ve dawn ta ngei e, a ngaihawmin a lunglen thlak dawn, chutih rual chuan hun a la tam a, theih tawpa inbuatsaih ka duh a, Mami ni ropui ber a nih dawn avangin ka theihna zawng zawng hlan ka duh a, mawi taka a lan ka duh a ni.
Show post links
Top