STORYFB.COM

Chapter-36



Zosangzuala POV




Room ah chuan in khung in zu ka in char char a, mipa mah nila ka nep zia ka in hre chiang telh telh a, ka thil tih sual rah ka seng mek pawn ka tuar zo lo chu a nih bety hi, ka tan a mi pawimawh tak pahnih te chu ka thiltih atthlak leh nunrawng zet avangin ka chan chu a ni si a, an bulah khan awm ka duh a sin, an tello in engtinge ka nun hi ka hman tak ang, ni e, ka hmu reng thei awn ngei alawm, mahse chu chauh chu ka duh tawk lo, engtik lai pawh a la bula awm turin ka duh.




Mahse chutiang chu a thleng ngai dawn silo, ka hmangaih te pahnih chu ka hmuh phak ah awm reng mahse ka ta an ni ngai tawh dawn silo, neih let tum in ka bei ve ngei alawm, mahse ka thiltih avang khan na takin ka hmangaih chu a awm a, mahni hmasial takin ka bula awm turin engtinge ka tih theih tehlul ang, ka tello in a hlim zawk dawn tih ka hriat avangin harsa ti tak chungin ka kal tir a tul si a, tumah dem thei ka nilo, hetiang thil thlen chhan chu keimah ka ni si a.




Ka room kawngka chu a rawn in hawng a, ka nau ka hmu nghal zat, ka awmdan a hmuh chuan a chal a chuar nang a, ka nuih suk ringawt, "U Hetiang hian awm mah ta che, i nupui leh i fanu tan chak taka i awm a ngai a sin" a tih chuan ka chhang lo, ka zu no ken lai chu a rawn la sawn a, "Min pe rawh" ka ti nghut, "Teuh lo, i awmdan atang khan i in tam tawk tawh tih pawh a hriat reng alawm, mahni in control theilo khawp khawp a in hi mi fing tih dan a ni ngailo" Ramnghaka chuan a ti leh hluk.




"Mi fing" ka phun sup, Ramnghaka chu mit ti zim san hian ka en a, "Mi fing hmuh in min hmu em ni, ka hmeichhe hmangaih ngei pawh ring zo lo tu mipa ka nih hi, hetiang chung hian engtinge ka fing theih tehlul ang ni" ka ti hrawih, a rawn thu hniam a, "U.. nanghi ka minting hriat tawh ah chuan ka entawn ber leh ka zah ber i ni a sin, ka pa ai mahin ka harsat na te i bulah ka thlen tam zawk thin, ka chhuang em em bawk che, mahse hetianga hmuh che hi hreawm ka ti takzet a ni" a ti sup.




"Ramnghak I u hi khawvel a mipa nep ber ka nih hi, ka nep takzet, a hmeichhe hmangaih hlim na pawh pe zo lo, a hmeichhe hmangaih pawh ring zo lo, hlim na aia natna thlen thin tu, a biang a mittui ti luang thin tu ka nih hi, i u ka ni ni e, mahse nang hi ka tluk lo takzet che a ni, nang chuan i nupui fanau te takin i siam a, tunah chuan chhungkaw hlim tak in ni tawh, khatiang kha keichuan ka ti ve thei ngai dawn lo, chhungkaw hlim leh awh awm ka din ve thei ngai dawn lo, ka chhungkaw tu chhe tu ka nih hi" tiin zu um chu ka ban nghal zat a.




"Nilo.. hetiang hian awm suh, in ti chal ta che, Zorini hi i hmangaih tak tak a nih chuan hetiang hian i awm tur a nilo, nei tawh, i nupui leh i fanu te hi i neih let leh theih nan bei rawh, hetiang a awm lo hian be zawk ta che, Khuanu khian in kawp tura a riat cheu a nih chuan in awm hrang hlen thei tak tak dawn chuang lo, engvanga beidawng hma em em nge i nih, i la hria em, class 12 ka zir laia board exam ka fail tum khan engtinge min fuih kha" tiin a chawl dat a.




"Bei rawh, ka nau i ni a, i beidawng tur a nilo, vawi tamtak tlu sawp mahla hnenah chu a la chang em em ang, he khawvel ah hian hlawhtling reng turin tumah kan piang lo, chuti chung chuan beidawng lova bei tauh tauh te erawh chuan hlawhtlin na an chang leh nge nge thin, chuchu hre reng ang che, Zosangzuala nau i nih chhung chuan i beidawng ngai tur a nilo, tiin min fuih a nihkha, kha i thusawi khan tun thleng hian chak na min pe thar thin a sin" a ti a.




"Ka bei lo angah i ngai em ni, ka nei ve a sin, mahse ka hlawh chham a ni, Ramnghak I u hi ka hlawh chham, ka tlawm ta a ni, Nautei hlim na tur ka duh ber, ka tello in a hlim zawk dawn tih ka hriat vang chauh a thlah zalen tur ka nih hi, a harsa a sin, ka hmangaih te pahnih kal tir hi a harsa takzet" ka lo in tam tawh bawk nen ka tawng chu a nawi nak mai, engmah ei hmasa lovin ka in bawk nen ka pum te hi a saa huam nuam mai.




"Ka U beidawng mai mah ta che, i hmangaih a, a hmangaih bawk che, chuchu in hrechiang ve ve, tunah rih chuan hun in mamawh a nih hi, hun han ral deuh se in in hmangaih na hian a la suih zawm leh em em ang che u, chuchu ka ring tlat a ni, chuvang chuan hetiang hian awm awh suh, in ti chal zawk tur i nih hi, tunah chuan nang leh Zorini mai in ni tawh lo, in fanu a awm tel ve tawh tih hi theihnghilh suh, in fanu vang tal pawh hian in ti chak ang che" tiin ka dar ah chuan a rawn chelh a.




Nautei thusawi te ka ngaihtuah a, kan awm dun leh hi beisei na ka nei tawh lo, ka bula chelh beh tlat tum na lah ka nei tawh hek lo, a thusawi laia a mit atanga natna rawn lang chhuak zut zut kha ka theihnghilh leh tawh ngai lovang, keimah vangin na takin a awm tawh a, hlim turin ka duh, ka tello a a hlim dawn a nih chuan ka kal tir mai tur a ni dawn lawm ni, khatiang khawp khan natna ka pe tawh a, engtinge ka hmangaih ti chung reng in ka hnenah hreawm tuar turin ka chelh beh luih tlat ang ni.




"A tlai tawh, engkim siam that nan a tlai tawh lutuk a ni" Ramnghaka chuan beidawn hmel takin min en a, ka khaw hmuh a fiah lo riai riai a, a hnuah engmah hriat zawm ka nei tawh lo. Ka harh leh chuan khumah ka lo mu fel than tawh a, tumah hmuh tur an awm lo bawk, ka zu in kha ka chat thla tih chiang takin ka hria a, Ramnghaka nen kan in biak na pawh ka hrechiang hle bawk, khum atang chuan lu na urh in ka tho chhuak a, ka pum chu a la sa ham ham mai.




Zu thing rim ka nam huam bawk nen bathroom lamah chuan ka lut vat a, ka in bual zawh hnuah tawn zau leh boxer ha in in hnuai lamah ka chhuk nghal, chokaa ka luh chuan Sangtei a lo che leh mawlh mawlh tawh a, a ni pawh hian Nautei a ngai thin hle tih ka hria, min hmuh chuan a phu deuh zuk a, a in siamtha leh nghal vat thung, "U Ramnghaka khan a chhuah hma in eitur siam sak tur che in min ti a, ka peih a nimai, i ei nghal duh angem?" a ti sap a, "Aw.. lo siam nghal mai rawh" tiin chair ah chuan ka thu thla a.




Tlem te tal tak chauh thil chu ka ei a, room lamah bawk ka chho lehnghal, tunlai chu university ah pawh ka kal ngailo, chawlh ka la tawp a, ka chawl rei tawh viau bawk, mahse tuna ka awmdan nen hi chuan tumah zirtir na pe thei ka ni miau lo, khumah chuan a vang zawng in ka mu a, Nautei leh ka fanu chu ka mitthla ah an rawn lang a, ka nui suk, khatiang teh hrep khan lo che lo ni ila tunah ka bulah he room ah hian ngei ang nui ri te ka hre tur a nia.




Ka phone ri avang chuan phun hluk chungin ka tho chhuak a, Chhuana hnen atangin a lo ni, "Thiana, hna i rawn kal ngai silo a, kha Asawmi hnenah register book lam turin ka rawn tir a nia, a rawn thleng tep tawh ang, i class naupang te pawh i ngaihsak silo a, keiman i ai ka lo awh rih mai ange" a tih chuan ka hnial buai lem lo, test a hun tep tawh bawk nen naupang te tana question paper ka set sa pawh kha pe nghal law law ila a remchang phian ang.




In hnuai lamah chuan register book leh question paper ka siam sa chu la in ka chhuk a, sitting room a ka thut lai chuan doorbell a rawn ri a, Sangtei chuan a hawng vat, chutah Asawmi chu a rawn lut a, midang ang bawk in a in feng chhing leh hle, a ni pawh hi mi hausa fanu a ni a, a duh naah chuan zah a hrelo hle bawk, kei ngei pawh hi min beisei tih a ti lang fo a, mahse ka zirlai naupang ang bak a ka en loh vang hian engah ka ngai lem lo, nupui fanau nei ka ni tawh a, hmeichhe dangin ka mit an la vak lo bawk.




"Professor, ka thil rawn lam tur kha Prof. Chhuana'n a hrilh tawh tho che chu ka ring a" tiin min en kar a, ka lo bu nghut, ka hmaa dawhkan chu ka mitmei zeuh a, "Khatah khan a awm" ka ti nghut, la mai lo chuan thutthleng ah a rawn thu leh te te a, a pawnfen ching zet atanga a bawk lang chiang em em mai chu a khawkherh a, "Ka rawn kal na a hla bawk sia, reilo te chiah chu ka lo thu hahchawl ang chu, a pawi viau lo turah ka ngai a" a ti a, lo hnial thu awm suh, engmah sawi lovin ka phone chu ka hmet eng a, Nautei leh ka fanu thlalak chu ka en vang vang.




"Khakha i fanu kha a ni em?" tih ri ka hriat chuan ka harh chhuak zawk, Asawmi chu engtin laiin nge ka bulah arawn thut ka hre hauh lo, "Aw" ti nghut in ka awm sawn deuh a, "Professor, englo a nia, i nupui nen khan in in then tawh tho bawk sia, hmeichhe dang te hi ngaihsak leh i tum tawh lo em ni, i hmeltha in i pa ropui sia, Mizo hmeichhia te duh rawn i ni tih chu i in hriat ve tho ka ring a" tiin a rawn tawlh hnai a, a mitmeng ah chuan a beisei chu ka hriat hmaih hauh lo bawk.




"I hmuh ang khan keichuan ka hmeichhe hmanngaih tak nen fanu kan nei dun tawh a, hmeichhe dang chu engvangin nge ka melh duh ngawt ang ni, ka hmeichhe hmangaih aia tha hi ka tan chuan an awm leh thei ngai tawh dawn chuang lo tih ka chiang alawm" nui suk chung chuan ka ti a, a ner ru saak chu ka hmuh hmaih lo nasa, "Khatiang hmeichhia te chu, a awmdan leh a in chei dan atang ringawt pawh khan a phu lo ngawih ngawih che, Professor han ngaihtuah chiang teh, Zorini fanu nen khan in an na pakhat mah in neilo a, i fa a nih chiah chu i ring amaw?" a tih chuan ka in hum ruh hle.




Ka zirlai naupang a nih vang chauh in sum pawh ka ni, "Ka fanu nilo se tu fa nge a nih a i rin?" ka ti hrawih a, "Zorini hi ka cousin te nen school an kal ho thin a, a sawi dan chuan school an kal lai pawn mipa hrang hrang a be lawr thin a ti a sin, chutiang hmeichhia chuan a sim mai mai theih i ring em ni, in in neih lai pawh khan mipa dang a hmu lovang tih tunge sawi thei?" a tih leh chuan ka tho chhuak vut a, Asawmi chu ka melh chhuk ngur bawk, a ni pawh chuan ka awmdan kam tih hmel takin min en chho ve kar a.




"Chuzawng i buai na tur a awm lo, engthil pawh sawi mahla ka tan engmah a nilo, chuan heihi hre bawk la, midang thusawi te hi awih nghal diak diak loh tur, i la nau deuh a i hrelo pawh a ni ange, ka nupui hi i cousin i sawi ai khan ka hre hmasa a, ka hrechiang bawk ang, a naupan tet atangin ka hre tawh a, i thusawi te khab ka rilru an ti buai pha vak lem lo a nia" tiin ka nuih suk a, nui mahila ka thinrim zia chu pui tak a ni, Nautei chungchang khatiang khan tuman an sawi ka phal lo.



Zawmna



"Engvanga Zorini ringawt chu ngaihtuah nge i nih zawk a, a mak ka ti, in in then hnuah pawh hetiang khawp hian i la ring thei a nia, mipa dang chu nise.." a tih lai mek chuan ka kut chuan ka lo ti tawp a, "Engmah sawi a ngailo, i buai loh na turah I buai mai mai a ni, hetiang ai chuan i zirlai ah chiah rilru I pe dawn nia, subject hnih lai a nilawm ni ba pawh i neih kha, kei leh ka nupui chungchang buaipui lo hian i subject bat te tha taka i pass chhuah theih na turin lehkha zir zawk la, chuchu i hlawl pui zawk ngei bawk ang" ka ti duah a.




"Professor ka duh che, ka hmuh hmasak ber atang che khan ka duh tawh che, chuvang chuan chance min pe ve rawh, Zorini si ka that loh na a awm bik hleinem, nilo kha hmeichhia khan engah mah min tluk lo, keihi min thlang la i in chhir lovang tih ka tiam a che" a tih chuan ka nui hak a, min duh tih hre tho mahila hetiang em em a a ngam pat hi ka ring ngailo, chuan enge a sawi kha a ni hian Nautei ai a that zawk thu a sawi maw kha, nilo a khawilai mah hian Nautei tluk na a neilo.




Asawmi chu en lawr dan dan in a tawp ah a mitah ka melh ngur a, "I taksa khawilai mah hian Nautei tluk na i neilo, i in chei dan I tawng dan leh i rilru put dan ah pawh ka hmangaih nen chuan in tehkhin duh tawh suh, chuchu hre reng ang che, chuan thil pakhat leh, i la naupang bawk a, hma hun eng tak i nei, heihi ka hrilh ang che tuna i in chei dan avang khan mipa te hian an duh turah che ngai suh, duh ai mah chuan a duh ang ang a khawih theih ah che an ngai zawk ang, mipa ka nih hi, ka sawi sual hauh lo bawk ang" ka ti hniam sut a.




Engmah a sawi tawh lo, ka in her a, "Chuan thil pakhat leh ka mitah chuan Nautei tluk an awm dawn lo tih ka sawi tawh kha, eng ang pawn tluk tum mahla i thei ngai dawn lo, chichu gre reng bawk ang che, i kal thei ang" tiin step ah chuan ka chho a, Asawmi chuan min rawn la ko hram, ka chhang tawh lo thung, room ah ka lut a, Nautei leh ka fanu thlalak bang a la tar chu en vang vang in ka nui suk a, ka tan chuan Nautei tluk hi an awm leh tawh ngai lovang, ka hmangaih a ka hmangaih reng bawk ang.



Zorinsangi POV



"Bawihte lo awm tha teh" ka fanu thawmhnaw ka hak tir tur chu a lo tal sek avangin ka hak tir thei mai lo, thla ruk lai ni ve tawh mahse Nautei khawih vel thiam lo chi ka ni a, tun thleng hian ka la neilo em em mai ni, thla thum a nih thleng khan ka nu hlir in a bual bawk, rei fe ka beih hnuah a thawmhnaw chu ka hak fel tir thei hram, a chang chuan ka nu hian i dim lutuk a, i la ti khawlo zawk ange, naute te chuan khawih nawk nawk hi an dawl a nia a ti mai thin a, mahse ka theilo.




Bawihtei pawh a lian ve tawh bawk nen ka room ngai ah kan in sawn leh tawh a, in hnuai room kha chu a te deuh bawk nen in chung a awm kha a nuam zawk, "Pa Bawihtei hi lo awm rawh aw, ka nu rawng ka va bawl pui ange" tiin ka fanu chu a pu mal chung ah ka nghat a, a pu hmai chu a lo ban ve leh tawk tawk mai, an putu chuan kalsan in ka nu chu ka va chet pui a, kan titi pah mawlh mawlh bawk, ka u pawn nau a pai mek a, thla thum a ni ve tawh, a pasal in a duat em em a, a vannei takzet a ni.




Chaw kan ei kham hnuah sitting room ah kan thu a, tlai lamah khan ka pa in Bawihtei a lo awi mu bawk nen a harh tha vet vet viau mai, doorbell a rawn rik chuan rang takin ka tho chhuak a, kawngka ka hawn chuan Professor te unau an lo ding heu mai, "Lo lut rawh u" tiin ka awm sawn a, Prof. Sangzuala hmel chu ka hmu pawr deuh fap mai, sitting room ah chuan kan in zui phei a, ka nu te chuan an lo be nghal vat, Bawihtei chuan a pa chu a lo ban ve tawk tawk bawk a.




"Thingpui ka va lum ange" tiin choka lamah ka kal a, gas a tui ka chhuang fel chiah tih chuan "In be lawk ang hmiang" ka hnunglam atanga rawn tih ri ah chuan phu zawk in ka in her a, U Ramnghaka a lo ding reng mai, "Min ti phu alawm" ka tih chuan a nui deuh suk, "Ka tihpalh, biak lawk che ka duh a" a ti tha leh a, "Sawi la" tiin chair chu ka mit mei zeuh a, a thu thla nghal, "Nang leh ka u chungchang hi a nia" a tih chuan ka rin sa deuh tho ni mahse sawi ka peih lem lo.




"Enge?" ka ti ta tho a, "In awmdan atang hian in la in hmangaih tawn ve ve tih hi tuman kan hai lova, nangni ngei pawh hian in hrechiang bawk, chuti chunga hetianga awm reng hi a tha dawn em ni, in in ti hreawm tawn mai mai ni hian ka hria" a tih chuan ka nui deuh sak a, "Hetianga awm hi a tha zawk alawm, awm dun leh thei kan ni tawh hleinem, kan chen dun chhung zawng kha a tu mah mah kan hlim tak tak ngailo, kan in hreawm tawn mai mai zawk, chuvang chuan hetianga awm hi kan pahnih taneh midang tan pawh a tha zawk" ka ti leh nghat a.




"I chiang amaw, ka u hi i hmuh ang hian a ni tel in a chhe zel a nih hi, a thil tih sual te khan a vaw let mek a ni, a thiltih kha a dik ber e chu ka ti hauh lo, mahse ka u a ni a, hetianga hmuh hi hreawm ka ti takzet, a nau ka nih na angin hetianga ka u chak lo tak a a awm lai hmel hi hmuh hreawm ka ti takzet a ni, nitin zan tin zu a in a, khap pawn awmzia a awm lo, nang leh a fanu te hi a ngai thei em em cheu a, harh fim a awm a hlau a ni ber" a tih leh chuan ka ngawi reng a.




"Tunah rih chuan i rilru a buai tih ka hria, ka nawr lui hauh lo che a nia, mahse ka u nen hian in rem takin awm dun leh thei ila tih hi ka duh ber a ni" tiin a ding a, choka atang chuan a chhuak nghal, ngawi rengin ka thu a, thil ri deuh sur sur ka hriat rual chuan ka tui chhuak ka hre chhuak a, a lo so tawh chu niin hmanhmawh takin gas chu ka va heth hniam a, thingpui chu ka siam zawm nghal, ka zawh chuan tray ah chawk chhuak in thut khawm na lamah chuan ka va chawi phei a.




Thingpui kan in lai te chuan Prof. Sangzuala chu ka en leh thin, a hmel pawr dap mai te chu hmuh hreawm ka ti ru takzet, mahse engmah ka sawi chuang lo, a hma kha chuan a fai vang a, hmuh a nuam thei em em a nihkha, tunah chuan a bo vek tawh, a khabe hmul ziah ngai loh tih hriat taka hmul to fur te nen chuan amah a tih chak loh hmel ngawih ngawih in ka hria, dar 10 a rik hma hret chuan haw an tum thu an sawi a.




Pawn thleng chuan ka va thlah ve thlap, U Ramnghaka chu a kalsawn nal nal a, Profm Sangzuala nen kan kawngka zawn ah chuan kan ding ran a, "In enkawl tha rawh a, kha i khabe hmul te kha ziat rawh, khatiang kha chuan hmuh i hreawm, Bawihtei pawn a hlau palh ang che" ka tih chuan min chhang lovin a nui suk ringawt a, zanin an rawn len chhung zawng khan vawikhat mah min be lo, min melh leh zawk thin tih erawh ka hre ru kar thung.




"Hna i kal ngailo a mi?" sawi tur a vang bawk nen ka rilru a rawn lang hmasa ber chu ka zawt tawp a, "Kal ngailo" a ti teh tawp a, min chhang tawi bawk si, han sawi leh mai tur pawh ka hre tawh lo, "Ih englo.." ka tih leh lai mek chuan "Naktuk atang ka kal leh tan ang" a rawn ti leh lawi a, "A that nasat chu, thil te ei tha la, i chak loh hmel teh mai a nia, khatiang kha chuan i zirlai naupang te bulah pawh in lan suh, an hlau mai ang che" tiin ka fiam a, kan boruak ni deuh ruih chu tih reh ka tum a ni.




"Ka kal ange" tiin gate lam chu a pan nghal nal nal a, ka en zui reng, ka thinlung hian a la theihnghilh loh zia ka hrechiang ropui si a, tunah lah amah ngaihtuah lo theilo in kin siam leh a, chak lo tak anga a lan na khan min ti na takzet, ka duhthlan na hi a sual tihna em ni, kan pahnih tana tha tur a nih ka rin vanga awm hran rawt pawh ka ni a, mahse U Ramnghaka sawi ang khan kan in ti na tawn mai mai tihna em ni, a lang ah chuan nui ve thin mahila ka thinglung chhungril tak khawhar ruk na hi ka hriat hmaih hauh silo a.




Feli te in neih na tana karkhat chiah in a dang tawh, kan kawr hak tur pawh kan thui tir fel diam tawh a, vawin lamah pheikhawk en leh kan tum a, puan in ang bih kan tum bawk nen chumi en pah chuan chhuah leh kan tum a, Bawihtei hruai ka tum viau nang in ka ni in ka lo awm ang a ti tlat a, amah a fel tho bawk nen a tello a chhuah chu ka hnial ta em em lo, ka in siam zawh hnuah in hnuai lamah ka chhuk a, Bawihtei chu a pi in a lo pua a, min hmuh chuan a lo nui leh sen sen mai.




"Bawihte, ka lo haw har lovang aw, lo sual miah lo la" tiin ka fanu biangah chuan ka chhuk zeuh a, "Nu ka kal dawn a nia aw, ka rawn haw har lovang" tiin scooty chahbi chu ka la a, "Rawn haw hma pawh tum la i thei chuang lovang, in thian hova in chhuah tawh hi chuan in reilo ngailo" tiin a nui hak hak a, ka nui ve tawp, a sawi hi dawt a nilo, kam thian hi hi chuan kan duh dan hi a in ang lo thah hlawm a, vawin pawh kan rei leh khawp in ka ring.




Scooty ka khalh loh na a rei tawh bawk nen vawin chu ka scooty ngei a in khalh chhuah ka chak ve tlat, zingah khan ka sil tawh a, a vai tha ver vut viau bawk, ka thiante chu in atang an chhuah na a rei ve leh deuh tawh bawk nen min lo nghak tawh zawk maithei a ni, mahse min hrethiam leh tho ang, an ni angin nula ka ni ve tawh miah silo a, ka in khalh chhuak a, a hma ang khan ka khalh chak lutuk ngam tawh lo, kum 1 chuang lai ka khalh tawh lo bawk nen a ruk in ka khawr riau in ka hria.




Bazar ka thleng a, ka thiante chuan an scooty park na bulah min lo nghak thap mai, "Min nghak rei awm sia, min ngaidam rawh u" min lo melh rum hlawm em avang chuan ka ti nghal zung zung a, scooty chu ka park tha ve nghal, bazar chhung ah chuan kan lut a, puan kan en hma in pheikhawk en hmasak phawt kan tum a ni, "Ka rei hman lo ka tihkha aw, pheikhawk pawh a in ang vek kan bun dawn chuang lova, puan em kan la ngai bawk nen en kual vak chi a ni lovang" Mary chuan a lo ti a, ka lo pawm pui khawp mai.




Rei han tum em em lo mahila Puipuii leh Chhani ten an pheikhawk duh an la hmuh ve tlat loh avangin dawt dang ah kan han lut leh a, an en kual chung chuan naute pheikhawk an zath tel chu ka en a, Bawihte pheikhawk bun tawk awm ang tur ka hmuh chuan ka la a, "Heihi ka lo la ang aw" thawk tu te bulah chuan ka ti a, counter lamah chuan kan in zui phei nghal, a man te ka pek fel hnuah ka thiante awmna lamah chuan ka va kal leh a, an lo la buai khawp mai.




"Heihi ka la mai ang" Chhani chuan a pheikhawk bun lai mek chu a thlang a, Puipuii pawn a thlang fel ve nghal, tikhan chuan puan chiah en kan ngai ta, kan la reilo viau emaw tih laiin darkar 2 dawn lai a liam leh tawh, "Puan kan en hma in thil ei hmasa phawt ila" Chhani'n a tih takah chuan ei duh tih takah kan pawm tiang leh viau mai, restaurant awmna lamah chuan kan in zui phei tham tham a, mahse dawt pakhat kan kal pelh dawn lai a naute thawmhnaw ka hmuh avang chuan ka peng kawi leh rih, ka thiante chuan kawng an lo kan tawh thung.




"A van nalh em em" ka ti sep a, "Ka pi lo en rawh, heihi rawn thleng thar a nia" tiin ka fanu tana ka awh ruk em em chu a kawk zeuh a, "Zorin lo kal vat rawh" ka thiante chuan min rawn au a, ka en vat, kawng an lo kan fel diam tawh, "Nakin ah ka lo en ang aw, ka thiante saw ka va zui phawt ange" dawr nghak tu bulah chuan tiin ka kalsawn a, motor rawn tlan mai tur a awm a ka hriat loh avang chuan kawng kan tum chuan hmanhmawh zetin ka kal a, thawk leh khat ah ka sir atang motor chak lutuk a rawn tlan ka hmu a, ka zawn ah tak a ni lehnghal, eng ang pawn kal chak ila kawng ka kan fel hman dawn lo, min rawn bi tum hrim hrim a ang ber, min rawn su ngei dawn a nih hi ka tih lai chuan tu emaw hian min rawn pawt sawn a, a ri deuh bur chu ka thil hriat hnuhnun ber a ni.

Cont....

Enge a thlen in rin le, chapter dawt leh hi last a ni ang aw...