CHHUNGKAW CHHEHCHHAWL NULA BY Engtea Fanai (Completed)

[ngaia]

BUNG 36


NUI POV ah kan let leh ang.

U Mami te inneih hun tur kan ruat fel a, keipawh ka dawr tur chu ka luah fel ve tawh a, Zion Street chhukah khian Dawr lian vak lo, ti ila, Bul \an nan chuan duhthusam a ni, tah chuan dawr chu ka luah ve a, Dawr kan hawn ni chuan kan \hianhoin pangngai takin a hawnna te kan nei ve a, kan \hian hnai vai bakah kan chhung hnai te an rawn kal a, Pa Hmuaka chu hunserh hmang turin kan ti a, kan dawr chu Pathian hnena hlanna te min neih sak a, ka phur ngang mai, Refreshment- te pawh kan phak tawka tui chuan kan buatsaih ve a, Dar 3 a rik meuh chuan kan inrem fel ve ta khawp mai a.



Ka Dawr hmingah pawh IG a ka online shoping hming chawi zel chuan Chhehchawl Shoping ti chuan kan la dah tho a, Anu te chuan \hing an ti leh hnuhnawh a, Mahse Online shoping a\anga min hretute tan khan; hriat a awlsam nan ka duh miau si a, min rawn dawrtute pawh ka nei ve nghal nak nak a, U Mami chuan ka thil rem dan chu a lo sawisel ve chhen bawk a, chutiang bawkin Rami leh christy pawn.



Midang an haw darh tak hnu chuan kan \hian thum chuan kan awm a, Sangsangi a rawn lang hlawl a, sawmna chu ka pe vek tho a, Mahse enge emaw shoot laklawh an neih avangin a rawn kal hman loh thu min hrilh a, a rawn lan pawh ka beisei loh tehh lul nen a rawn lang hlawl chu ka lawm hle a, amah chauh a ni lo, a \hiante nen chuan an rawn kal a, a \hen chu film lama lar tak tak an ni a, a \hen chu zai thiam.



Keichuan ka thawmhnaw zawrh zinga an duh thlang tur chuan ka ti a, Rami chu a lo ner nasa lutuk, christy lah chuti bawk, Sangsangi chuan,, awi, angai lo, chutiang beiseia rawn kal pawh kan ni lo, \hiante dawr tiin kan rawn lang zuai mawle, inthlahrun hmel tak chuan a ti a. ah,, chupawh nise,, nangni meuhin ka thawmhnaw zawrh in hak ve chuan ka tan a lawmawm dawn lutuk tiin engmah sawi ngam chiah si lo chuan beisei nei tak chuan ka kawr chu ka thlan tir vel a.



Sangsangi chuan tirawh u, reels vel siam ila, advertisment kan tihsak a ni mai alawm a ti hlauh, aw,, kha kha ka sawi ngam si loh ka beisei ruk reng a ni, ka phur ru tawp a, mahse phur tak ang chuan ka lang duh chuang lo, a ngai kher lo ang, hun inneih dawn loh loh nen te ka han ti vel a, a \hiante lah chu an lo fel phian a, Roaslyn-I phei chu mi tam takin a chapo lutuk an tih \hin kha a nia, Mihring hi \hat leh \hat kan inlawm tawn chuan tumah hi sual leh chapo bik reng reng hi kan lo awm lo, kan in deal tawn danin a zir loh \hin vang mai mai ni ta berin ka hria.



Anmahni ber ber chu a phur phurah \angin video te an siam a, kan dawr location te chu an sawi a, an Ig acountah chuan post in min tag in mention ve zel a, kan nui dar dar a, kan hlim tlang ta phian a, chutih rual chuan Rami leh Christy chu camera men ah \angin an tum leh bar bar \hin, ka hmu reng a, mahse ka ngaihsak duh lo tlat a, an chhuah huna ka tawrh tur zawng zawng pawh ka hre vek, min \im nasa dawn tih ka hria.



Tichuan rei mawi tawk an awm hnu chuan thawmhnaw chu pakhat \heuh an thlang a, an haw ta hlawm a, Rami chuan keini pawh pakhat mah min pe lova a ti nghal, Christy chuan pek chu sawi loh, a man to ho phei chu en tir pawh min phal lo a nia, tunge I tana hlu zawk, Sang ke zungpuii nge, keimahni, kan buaipui tawh lo tawp ang che alo ti ve leh nghal.



Keichuan,, aw,, Nangni te chu a neitu ve tho in nia,, ka ti chiah chu, \awngkam bakin a neitu kan ni lo, a neitu ni ila chu duh te pawh kan thlang ve ang chu an rawn ti leh, Keipawn ka thlan phal loh hi, a neitu dik tak chuan \hahnem ngai takin a \ha pawh inbel phal loin, a hralh theih nan theihtawp a chhuah \hin ka ti chu an ngawi hmak a, I phakar a nih chu, anni kha enge I pek bik kher an la ti hram, ka ning lutuk chuan in van hre thiam lo tak,, Sumdawnna zel a nih kha, Anni chu milar an nia, tikhan an IG ah te min post sak ang a, mi tam takin kan dawr thar an hriat phah dawn alawm, ka ti chu, Christy chuan I thluak hi chu aw,, duhsak takin I pe emaw ka tia a rawn ti..



Ah,, chhete te chuan ka duhsak ve tho alawm, Mahse chhe te tak tak tiin kan nui leh dar dar a, christy chuan dawr lian deuh nei tawh la, keini hi part time te hian rawn thawk vel ila, chuan ram dang ang hian zanah te hian dawr hi in hawng ve \huau tawh ila zirlai tan pawn thawh tur a tam ang a, tiin an duhthusam chu an sawi a, keichuan in that chhe dun awm em mai, in thawh leh in hlawh a inphu lo lutuk ang, ka lo ti chu min melh rum hle, Rami chuan I zak lawmni, kan puihna zawng zawng che hi e,, a man chhiar dawn ila a tam tawh dawn lutuk, a lo tih zawm ve nghal zat a.



Keichuan,, aw,, a nih leh chutia in lawm dawn loh ai chuan zanah kan inhawn hunah in rawn thawng dawn a nia, ka ti chu zanah tumah an inhawn ngai loh hi mawle, in hawng ngai se chuan e,, I dawr loah kan thawk daih ang an rawn ti leh, keichuan thu tak deuhin, tak taka, zanah hnam dang ho ang hian zalen ve ila chu kan la hriat ngai loh tual thihna mak tak tak a thleng hnem lutuk ang, tunah pawh zan chhuah a him tawh lo a nia, ka tih chuan an ni pawh chuan an ngaihtuah uluk ve hmel hle mai a, Dar 6 vel chuan Anu chuan min rawn panin tirawh haw dawn ang in khar rawh u a rwn ti a.



Kan in khar a, kan haw ta rih a, hawn \an ni a ni bawk a, beisei ang chuan customer chu ka nei lem lo, mahse a zia chho ve zel turah ka ngai, U Mami chuan a peih emaw peih lo emaw eirawng a bawl ngei a ngai dawn. A tih \hat peih a chhuah chuan chaw hmeh tui tak a lo siam leh ngei ang a, mahse athatchhiat a chhuah chuan dal kan leh, hmarcha rawt a ni leh mai, nakin lawkah mi mo a ni dawn a, a inzir ve a ngai hrim hrim, kei ka buai tawh dawn bawk si, U mami zawk a han che vel tur tur chu ka ngaihtuah chuan ka hlim tawp, ka nuih a za bawk si, ka inbualna tur kan lum tir ngei ang a. Mahse a tih duh pawh ka ring lo e a.



Mahse,, sawi ve reng rengah ka tir ve dawn hrim hrim; Ani in awm zawk. In kan thleng thla chu eirawng chu a lo bawl ve sat sat a, Anu chu a intifel nghal sawk sawk a, ama tui hman tur chu a chhuang daih, Nu, U Mami hi I chhuan tir ve dawn lo ami ka tih chuan, ANu chuan ani te chu sikulah a hah bawk sia, eirawng a bawl leh bawk sia, a chau ang nui suk pah chuan a ti a, hmm,, Ka plan a flop vek. A hma pawn ka class ban tlai \um pawn min lum tir tho tho zel a, ka hah leh hah loh an care ngai lo reng reng tun atakah.



U Mami chuan Nute, in lum ve mai rawh u, I zahawm viau naa, hei ka bang tlai sia, eirawng ka bawl buai bawk sia, tiin nui var var chuan min rawn fiam a, ka huat tawk chu a tling hle a, Ninawm, a hmaa ka buai tawk lai pawn min lum rawh in ti tho zel a, tunah U mami a nih vang mai a, min en hrang, ka tih chuan Anu chuan aw,, hei ka lum kep thei reng che alawm le, I U Mami te chu kha, a chhuah \ep tawh kha duat a ngai alawm a ti, hmmm, Kum tawp lamah daih a nih kha, mi in a mo dan kan zir tir a ngai alawm ka tih chuan U mami chu a nui suk a. a chet chhunzawm malh malh a.



Tichuan Anu tui lum chu hmang hmasain ka inbual a, U Mami chu ka tir ve chak reng reng asin le, ka tir \hin tho a, Mahse, hei hah zawk leh \angkai zawk ang chi hian ka awm vel chak, Mahse ngaihtuah chian chuan a la hlawh tam zawk tho a, chubakah keimah anga in a awm tawp ang kha a ni lo ve tho bawk sia, han ngaihtuah chian hi chuan ka lo thiam lo leh zawk zel, mahse vawi khat na na na chu, inrinni velah an class kal loh \umin, in a awm zawk chuan tui lum te hi lo neih sa \hin tur alawm hi chu ka la ti ve reng reng ang, Dawrah ka awm char char tawh dawn bawk a.




Mahse,, Dawr bungrua lakna hi An nupa pawisa a ni leh rih tho sia, ah, ka la pawr hlei thei lo chu a ni, ka inbual zawh chuan, ANu pawh chu a inbual ve nghal a, tichuan zan riah chu kan kil ho a, chutia zan riah kan kil mek lai chuan U Mami chu kan chhungkaw zing a tel tawh lo tur angin ka ngaihtuahnaah a rawn lut thut a, ka mittui a parawl hman hial a, inhnial pui tur ka nei tawh lo tur ringawt te, a sawi ang tak takin min hau reng tu tur an han awm tawh lo tur te chu a khawhar thlak dawn hian ka hre lutuk a, chu mai bakah eng emaw buaina nei ila, U Mam, ti a koh tur kan nei lo tur ringawt te chu ka ngaihtuah a, ka insut feih a.



Anu chuan,, enge Nute, a thak emni, a rawn ti, U mami chuan, hmarcha I ngam ber sia, keipawhin thak ka ti lo a nia, inthiam loh hmel tak chuan a rawn ti a, keichuan \ap deuh \uau hian, U Mami pasal neih a, a chhuah hun tur ka ngaihtuah thut a, ka ti chu, an nui dawn emaw ka tia, an hnim ve ruih tho mai, Anu chuan a la hla itih em kha, chutiang ngaihtuah vak vak pawh a \ul loh chu tiin chaw chu a bar mawlh mawlh a. Ngaihtuah vak a \ul lo titu Anu pawh chuan a ngaihtuah ve reng a ni tih ka hrethiam, U mami chuan min ui lo viau emaw ka tia, ka chhuah hma a\angin I mittui a tla nghal a nia, intithei tawk chuan a rawn ti a,



chuan,, Anih enge Nute, min ui na chhan ber a tih chuan insut deuh feih pah hian, aw,, pawisa min petu tur an awm tawh dawn lo asin, ka ti chu, I chhia a nih chu, min ngai leh min ui pawh a ni lo, ka pawisa a nih chu I ui tiin a tum hmak a, chaw chu a bar mawlh mawlh, Anu chu lo nuiin chu bak han ngaih vak na tur I awm hleinem a tih chuan kan nui ho dar dar a.
Ka hun hman chu kan in leh dawr in kar a ni ve tawh a, mahni pual dawr han neih takah chuan ṭhahnem ngaih ana ve duh hle mai a, ṭhen khatin dawr thar tiin min rawn duhsak a. customer pawh Sangsangi te ṭhianho zarah ka nei ṭha ve hle a. ka phur zual lutuk ringawt.



U Mami pawh nitin class kalin a class banah a lo che ve sat sat reng ṭhin a, a changchuan ka khawngaih ve ṭhin reuh lutuk, mahse nakin lawkah min chhuahsan dawn a, a lawina turah te chuan awmpui an nei thlap a, chet vak angai dawn chuang lo.



U Mami pasal neih tur chung chang chu kan sawi ṭha duhvak tawh lo a, kan sawi chhuah chuan kan lung chhe dawn zel a ni ber, Nu ber hi a rawn insut leh feih ṭhin a, Tu ka awt ve tawh alawm, pasal nei tawh rawh tia nawr rengtu ni mahse min han chhuahsan dawn tak tak chuan a ngai hle tih ka hria.



Zan khat chu Anu chu a chaw hmeh lakna vel a buai pui emaw ka ti a, amah chauhin a meng reng a, ka va tho chhuak chu kan Chhugkaw thlalak enin a lo ngawi reng tih ka hmu a, Anu hi ka ngaisang a ni, a khua har ṭhinin, a lung a leng ve ṭhin hle hi a lo nia, mahse kan hmuh laiin a ti lang duh ngai miah lo, a inthup nasat ṭhin zia leh a ruka a lo tuar nasat zia ka hriat hian ka ngaisang a ni. Tichuan ni a liam bek bek a.



U Hriata nen pawn kan inhmuh leh hun thlir reng chungin kan inbe ve reng a, engtik nge a rawn chhoh leh theih ang tih chu ka zantin zawhna a ni a, a chhanna pawh a ngai, office chawlh an neih tam thlah ah bak a rawn chhoh theih loh tur thuin min chhang ve bawk, January thla a ral lam ṭep tawh a, thlasik erawh avanglai dawn chauh emaw tih mai turin zoram chu a la vawt vin tak mai.. zingah hma takah ka tho a,



Dawr ka nghah hnu hian ka in la buai ve deuh a, eirawng bawl tur pawhin ka tho peih vak lo, Mahse, bawlhhlawh paih kher kher hi chu ka kutah a la awm chiang em a, bawlhhlawh paih ni a nih avanga tho hma ka ni, Zing ni rawn chhuak siar siar chu ka thlir a, huin hringnun a herdanglam chak zia te chu ka ngaihtuah a, keipawh tun hma kha chuan eizawnna lam ka ngaihtuah ang tih reng reng ka ngaihtuah thleng lova, mahse, kum a tam a, kan inrin loh karin mawhphurhna tam takin min delh chho a,



U Mami'n pasal neih a tum hnu aṭang phei chuan ka rilru in chhungkaw in nghahna tlak nih chu ka tum ruh ve hle a, ka theihtawpin puitlin pawh ka tum ruh hle a. hma pawh ka sawn ve viau a. tun hma chutiang kan ngaihtuah phak reng reng loh lai, U Hriata Nupui nih tawp kan tum lai te, Footballer hmelṭha leh IG a mipa hmelṭha stalk reng renga hun ka hman lai te ka ngaihtuah a, tunah chuan IG a ka luh ve pawhin sumdawnna chung chang vang a ni deuh ber tawh a, ṭhiante nen pawn kan inhmu tam ta lutuk lo, anni college an ṭan leh tawh a, kei keimahni hna ṭulah ka buai ve hle tawh si a.




chutiang chuan hunin mi hruai danglam nasat zia te ngaihtuah chuan zing ni chhuak chu ka thlir a, bawlhhlawh paih dar ri chuan ka suangtuahna khawvel ata min thing harhin kan in bula kan dah, garbage bag chu lain bawlhhlawh paih tur chuan ka chhuk thla nghal a.



Ka let chho leh vat a, room ah chuan lutin vawiin lama pek chhuah tura ka tih chu ka siam fel a, dawr kal pahin ka sem mai ṭhin a,dawr pawh ka hawn har phah deuh ṭhin reng a. Nitin mai chuan ka hriat loh karin puitlin na lam kawng chu ka zawh chho ve bek bek zel a, a chang chuan a nuam a, a chang chuan a hahthlak ka ti, ka nun engkima ruahmanna neih ngai ta te chu a chang chuan ka ning lek lek ṭhin, a hmaa, ṭhiante an rawn len a, rilru a lo lang hmasa sa han tih ngawt mai lai hun kha nimin lawk ang maia rei lo ni mahse a ngaihawm tih chang ka nei.




Nikhat ka dawr hawng chu customer an ṭha hnem ve hle mai a, Pitar pakhat hi a rawn kal ve hlawl a, Pitar ti ila nu pakhat a ni zawk mah ang chu, awi.. in dawr hi a thar a ni maw kalo hre ngai lo reng reng a, tiin kan dawr a nawm thu te, chu sawiin min rawn fak luam a, keipawh chuan kalo welcome ṭha viau, kan thil zawrh chu a en kual den den a, amah chu branded leh authentic-i hi a ni deuh tawp. a thil en apiangah branded lo, authentic lo de de dei a ti kual reng ka ning tawp, ka Pi, dawr dang ah pawh hetiang tho hi a niang, a puan pawh kha khawih la aman ngaihtuah chuan a ṭha lutuk asin ka tih pawh chuan , hetiang hi chu dawr dangah 450 in ka lei a, 700 em em chuan a to lutuk , tlem talin min hniam rawh a ti tlat bawk si, Pi, hei chu a tlawm theih miah loh, hlep a chhhe lutuk, dawr danga 450 a i lei nen chuan a puan en dun chhin ila, a in ang lo ang ka tih pawhin ka hria alawm mawle a ti tlat, chutia sawi reng chung chuan dawr dang chu pan tum chuang miah si lo.



Ka Ning lutuk chuan a nih Pi 650 in la mai rawh, ka ti chiah chu kha kan tlawm thei miah lo iti bawk sia, a la rawn ti zui, aw,, kha bak kha chuan tlawm ngaihna a awm tawh lo, kan hlep tur kan chhut tel ve lohin ka ti leh a, Api chuan dawr kai te hi chu in phakar mawle, I fel hmel reuh si, I hmel\ha reuh sia, I phakar ve tho sia, khawiah nge a dawr neitu hi a awm hrim hrim a, ala ti zui, he nu hi ka van ning tak, min en hian dawr neitu ka nih a ring lo emaw ni.



Pi Dawr neitu chu keimah ka nia, ka ti leh a, Awi,, an chhawr naupang emaw I nih ka tia, tiin a nui hak hak a, keichu ka nuih a za ve hauh lo, Pi kawr chu I la dawn em ka tih chuan dawr dang ami ka han en phawt ang a, ka rawn kal leh dawn nia, a la ti daih zui, ka ngei lutuk, ka melh rum vak a, awi,, ka nunhlui sual kha ka ngai lutuk, kha kha rawn let leh ngat se chu ka \im nek ang, min dawn rei rei nen. A la lei lo zui.



A khawih darh nasa ropui si, ka thleh \hat tir vek duh \ep a ni, mahse,, heti hian ka chhan a ngai tawh, a harsa ka tih ber te zing ami a ni, aw,, aw le, Pi,, lokal leh ngei ngei rawh aw,, zah lo taka nui lui sang chung chuan ka ti a, aw le,,tiin a chhuak, a chhuak chiah chu, keimah chuan ka phun nghal, in la authentic ropui si, a kawr rawn hak lai pawh kha, keipawn meesho a, 75 in ka hmu, branded chuti kha ti eng ang mahse, amah kha a branded chuang lo tiin ka pi thil chin darh ho chu ka rem \ha mawlh mawlh a.



Tleirawl rual an rawn lut a, awi,, kan rawn zawng nasa lutuk a, Sangsangi te post a\ang khan I dawr awmna hi kan zawng nasa lutuk a, en tehh Sangsangi hak ang chi kha a la awm em an rawn ti, aw awm e,, lo en rawh u, nui sang chuan ka ti a, an en a, an ha chhin vel a, awi,, ka duh tawp, ka inhmeh em, tiin an ri phar phar a, pakhat chuan engzah man nge a rawn ti, 650 a nia, a rawn thleng thar a nih kha, a common lo a, a mawi tehh mai a nia tiin anmahni en ru reng tho, ngaihsak lo hmel tak chuan ka chhang a.



A tawpah chuan, an innek sur sur a, nangman dil rawh tiin an in hnawn niin ka hria, ka va en leh zuk \hin a, an in nam leh dat dat \hin a, an hreh hmel ngang mai a, keichuan enge ni,, nui sang chuan ka ti a, an zinga naupan hmel ber chuan hreh tawk hian, eng lo a nia, thil dang kan rawn lei nasa tawh sia, haw na tur pawisa kan indaih tawh lo tawp a, 600 in min pe thei angem le a rawn ti tham deuh \iak a.



Ka nuih mai a, mihring mizia hi a van lo in ang lo tak, \hen khatin in dawn an han hreh ngang ngang nen \hen khat ve thung an inthlahrung em em a, mahse nichina min dawn hreptu ai kha chuan ka tlawm chak daih zawk, a nih 50 chu ka lo hniam dawn che u a nia, ka tih chuan an nui sen sen a, um kan lawm lutuk, chuan a khaina tur a awm thei angem le, an rawn ti leh awm thei tehhreng mai, lokal leh ziah rawh u aw,, tiin ka pack sak mawlh mawlh a, kan dawr chu thla te la in an chhuak ve leh mai a.



Dawr chu ka hawng rei ve tial tial a, mize chi hrang hrang ka hrawn a, \hen khat chu khirh em em te, \hen khat awlsam em em te, chungho ka tawn chhoh a\ang chuan Nun pawh ka man chho ve telh telhin ka hria, Hun awl ka neih chang a piangin U Hriata nen chuan kan inbia a, Video call ten kan inbe \hin a, Kan peih loh \hin Distance chu kan ni ve ta reng mai si a, a chang chuan a hreawm ka ti \hin, mahse kan ler lo ve ve a, ti ila, keichu ka ler deuh zawk tho na a, ka \hian kawm te avang hian chhe lo ka tih deuh thlir leh vung vung chu hrat ve tho mah ila, Pakhatah hian ka rinawm ve em a ni.



Kan \hian tupawh mai chuan kawng dik kan zawh chho ve bek bek zel a, tin, rilru a puitling chho tial tial a, Rami te pawh zirnaah \hahnem an ngai ta khawp mai, Chutiangin christy pawh, christy leh Kopa pawh an in\hen niin ka hria, Mahse chung pawh amahin a tuar a, \hiante nena inkawm a rilru lak thawven tih vel kha a tum tawh lo, a hma ang te chu nise kan in pan khawm ang a, kan sawiho ang a, kan inhnem leh ang a.



Mahse tunah chuan a dang lam tawh, thil tam tak hi a huho a tuar dam chi a nilo a, mahni a, rilru fim tak nena ngaihtuah neuh neuh va, tuar mai chu puitlinna in a ken tel a ni, chutiang tih nachang chu kan hre chho tawh a, tin, chutiang chuan kan ti zel tawh bawk ni berin ka hria, kan hunawl pawh kan tan tho kan hmang tawh a, len chhuah a, rik dar dar lam kha kan ngaihtuah ta vak lo. a chang chuan a khawhar thlak ka ti, Nia, kan upa telh telh a, nun hi a tak tulh tulh zia kan hria a, hringnun hi a khawhar thlak tulh tulh dawn a nih hi.




Tlai khat chu customer kan nei lo lutuk bawk nen, ka in khar hma a, U Mami pawh a lo bang tawh a, eirawng a lo bawl tur tur a, Ka haw hma a hmuh chuan min lo tir kual nghal zaih zaih a, ka awm hi chuan \ul miah lohah pawh min tirh hi nuam a ti ve hrim hrim, Lalnu chemte kha min lo ban lawk mai, tui min lo suah lawk mai, remote kha min lo pe lawk tehh, ka phone kha min lo lak lawk tehh, tih vel tal hian min tir \hin, mahse ngaiah ka nei a, ka phun vak a, ka tihsak ve leh mai \hin bawk a, kan inhrechiang ve tawh a ni.



Rin loh lutukin tui min lo lum sak ve ngei a, U mami tui lum chuan ka inbual a, ka inbual zawh chuan ka dawr chung chang te kan sawi dun a, ka customer neih ho mize dang hlawm lutuk te chu ka hrilh a, kan nui dun bawk bawk a, chutia dawr chung chang vel ngawt sawi a, kan nuih bawk bawk lai chuan U mami chuan titi rawn thlak thutin thu tak tawk hian tunlai hi I thu deuh tlat I hnathawh nasat vang nge ni, a cher te pawh hi I cherin ka hria a rawn ti chhuak hlawl a.



Keipawh chuan ka in ti ve tho, ka thu bawk sia, ka cher reuh bawk sia, tin, ka chaw ei a tui lo bawk si, Mahse tun hmain rilru leh tihtak zetin hna ka thawk ngai lova chuvang te pawh chu a niang. Sum ka thawk chhuak a, ka hlim tho mai, a aia tam zel thawk chhuak ila, U Mami’n thlamuang takin Pasal nei se, kei chhungkaw innghahna tlak ni chho ve bawk ila tiin ka ngaihtuah \hin, Mahse U Mami ang mai hian ka senior phah ang tih chu ka hlau ang reng viau a, chutih rual chuan Anu ka chhuahsan mai thei dawn lova, ka senior ve chu a ngai hrim hrim.



Nikhat chu dawrah ka awm a, tlangval pali hian kan dawr thil vel chu an rawn en a, kan bulah chuan Nula pakhat hian a en ve bawk a, Nula chu a duhzawng ka en pui a, midang chu an mahni a in en mai turin ka ti a, rei vak lo an en hnu chuan an chhuak a, Nula chuan an thil lak kha a man an pe che emni tiin min zawt, mawh, thil an la ami ka ti nghal ha a, hmanhmawh tawk chuan ka um chhuak a, anni chuan min hmuh rualin an tlan chhe nghal, ringtawkin ka Au va, kha mite kha lo man ru ka thil an ru a nia, ka ti chul a.



Ka dawr pawh ka ngaihsak tawh lo, ka theih tawp chuan ka um a, midang lah chuan min lo en ringawt man pawh chu an tum lo, vai mu\ia pakhat hian a su tlu hlauh a, ka va thleng phei nghal, ka hah lutuk, enge I lak ka ti nghal a, engmah ka la lo tiin ngeng deuh chuan min chhang a, vai pa chu kawng en ta che ka beng mai ang che te chu a la ti zawk zui, ka thinrim lutuk ka hah bawk si, chuan thaw hlawp hlawp hian engmah la lo si, eng vangin nge I tlan chhiat ka ti a, aw ,, min um sia ka tlan chhia a ti leh mai a.



Um vang ngawtin I tlan chhe lo ang, tih leh dap tum chu ka rual a, kut min thlak a tum chu, ka bula tlangval sa\ha zet chuan min lo chhan a, tichuan a dap a, kan phei khawk 3000 man lai chu a lo ru chu niin, I va han zak lo em em, I inchei dan vel a pangngai tehh lul nen tiin ka vin hrep a, chupa pawh chu a zak ve deuh a niang a kun lap a, Ka Pu chuan police ah kan dah dawn emni a tih chuan, ka hre lo, I tih dan dan a ni mai, ka ti a, ngaihdam min dil char char a, ka khawngaih leh reuh lutuk a insawi khawngaihthlak si.



A tawpah chuan ka ngaidam ta ringawt a, a lawm hmel em em mai leh nghal a, Addict niin a dawmdawi mamawh tawhin a ru ta ngawt a ni awm e, ka customer chu ka ngaihtuah em avangin ka let chho leh nghal a, I man hman em tiin min lo nuih var a, hahtak chuan, umm, hei hemi hi a lo la a, I duh zawng I hmu em ka tih zawm nghal zat a. a hmu thua min chhangin a man te ka hrilh a, tichuan min dawr hnu chuan min kalsan ve leh ta a. Dawr ka neih hnu hian thil hrang hrang hi ka tawng hnem ve ta ngawt mai.



Chumi ni vek chuan ka mihriat chian lutuk hi a rawn kal a, ka hriat chian ti ila, fb vela min sawisel nasa deuhtu hi a nia, ka service chhiat zia te, DM ka ngaihsak loh zia te, ka ler zia te thlengin a sawi, chutiang khawpa min reltu chu tiin a thlalak ka en ta vak kha a nia, ka theihnghilh thei lo hi a ni tawp mai. ka hmuh rual chuan ka sa nghal zawk a. ani lah chu a rawn luh rual rual chuan..



Awi,, indawr hi ka zawng nasa lutuk, social media ah alar sia, ka hmu chak tawp che a, tiin min la rawn fak luam zui, A taka a sawi duh leh fb lama a sawi duh chu a in ang lo hle mai, keichuan a rul tawk te te hian ka chhang a, umm.,, a nih chu,, lokal ziah rawh aw,, tiin dam thluam chuan ka chhang a, mahse chhungrilah tak chuan ka ngei a ni tawp mai, amah chu a \hing ve bawk sia, Sangsangi te nena kan reels naah khan a video mi ang hi an nilo a takah chuan an chhe ve lutuk te kha min tia.



Amah hi a nih hi ataka chhe ve chu, ka thawmhnaw zawrh chu a en kual a, ani kher hi chuan lei lo tawp mahse pawi ka ti lo, mahse, Sumdawn ka ninna ka rilru lo ang hlir ka sawi chhuah angai, kawr chu an ha chhin vel a, awi,,, enteh hmun dangah chuan hengte hi 1000 an ti kai vek a nih chu, I van ti tlawm thei bik em em, min han ti ngei a, ka awih em em lo lutuk ah, mahse,, dawt leh dawta kan indawr angai a ni mai,, keichuan,, Nia,, kan discount lai a nia, chu loah kan dawr hi chu a tlawm bik hrim hrim alawm, kan ti ve leh ringawt a.



Darthlalangah chuan in en in, ka inhmeh tawp,, iti ve em ka inhmeh em, a rawn ti zat zat, zahna lah chu a rawn kal dawnin a keng tel lo a niang, amah chu a ri phar phar a, ka ngei lutuk chuan a inhmeh loh ber chu ka fak sak vak a, a inhmeh thu te ka hrilh chiam a, a lei phah ta nge nge a, mahse hmun dangah chuan a to, I ti tlawm tawp min ti chung khan min han dawn leh chiam a, mahse,, ka hralh theih loh zing ami tho a nia, tiin ka tlawm a, phur tak chuan a chhuak ve a. Social media ah dawt tin rengin min sawi chhia a, a takah dawt muhlumin min rawn fak leh a, mihring fake lutuk, khawvela ka mi hlauh ber te zing ami a ni.



Tichuan lungawi tak chuan a chhuah pui ve ta a, tlai lamah chuan customer an awm lo bawk nen inkhar mai ka tum a, Anu chu ka call a, ani pawh haw a tum mek a, Dawrah min rawn lam phei la , kha lama rawn phei hmasak a peih awm loh, scooty park naah kal chho leh chiam a ngai zel tho ka ti a, Anu pawh chu a aw ve mai a, chu mai lai vel chu Nula pakhat hi a rawn lut a, Enteh \hiannu in dawr hi a ni em le hei hi ka lei a, ka tawk leh lova, a rawn ti. Awi,, kan dawr a ni dawn ami,, engtika I lei nge ka tih chuan, Ah,, in dawr ngei hi alawm, Nangmah loin I nghak a, a rawn ti chu.



Awi, |hiannu min hai a niang, keimah loin Dawr an nghak ngai lo hrim hrim, christy leh Rami an rawn kal chang hian coffee leh thingpui vel lain ka chhuahsan lawk lai hian an lo \hu ve a ni mai a, a bak chu keimah bak ka \hu ngai lo, ka tih pawh chuan,, ah in dawr ami ngei alawm, a nghaktu chu Samkir deuh a nia, nu lian ve lam pang a ti leh,, ah,, kan ni lo ang, engtik ni a I lei nge, ka ti leh a, a rei deuh tawh kar hamsa inrinni vel khan a nia, a rawn ti leh, a nih, I ha chhin miah lo emni, engtin nge I tawk loh lutuk chu I lei theih ka tih chuan.



Ha chhin e, a awm bawrah hian ka tawt deuh alawm, a ti, I hnute a lian ve em bawk a nih kha, IG velah mar deuh a, lang lian tawk tura post I duh vangin a tight I thlang ang a, thla I lak pui tawh ang a, I thleng leh duh a niang chu mawle ka ti rilru a, kan dawr ami a nih chu ka ring lo, a chhan chu a rawn kal lai awm ka hre lo reng reng, hriat vek theih chu a ni lo na a, mahse a tshirt rawn ken ang hi, kan kawl ngai pawh ka hre lo.



Mi vin deuh khar khar leh nghal a, ka ning lutuk chuan enrawh hei kan thawmhnaw zawrh ho hi, kha tiang engmah kan zuar lo, ka ti vin ve deuh \hak a, ka lei a nia, ka hre chiang alawm mawle, sumdawngho hi phakar lo reng reng in awm lo, min ti kher chu ka ngei lutuk, phakar leh phakar kan indawr vel a nih chu, ka ti ve sak a. Anu chu a rawn thleng a, enge ni ta Uai uai, Lalnu a rawn ti nghal vat a. Hei,, a thil lei hi a dik lo a, kan dawr ami a ni bawk si lo a, ka tih rual chuan a ni, ka hria alawm mawle, a rawn ti leh,, keichuan a aia chiang chuan a ni lo, ka hre ve tho, ka ti ve leh sak a, kan in melh no lo dun hle a.


Anu chuan aw,, I hre lo palh a niang, mami engtia thleng nge I duh a, a rawn ti dem dem a, a kut zaizir chuan min khap bawk a, ka la sawi chak mawle,, mi hi an zuam hlawm leh lutuk, tunlai phei chu ka thinchhia ka ning tlat, Chu nu chuan a pawisa a rawn thleng ka duh a, a la ti zui, keichuan,, ah,, I lei ni la la a,, I rawn thleng te a nih loh chuan a pawisa phei chuan a theih tawh loh, receitp I nei bawk silo, kan dawr a mi ngei a ni tih pawh fiahna a awm lo, chuvang chuan khami thawmhnaw ang hu khan thleng mai rawh ka ti a, engzah man nge ka zawt bawk.



A ni chuan 1000 man a nia, a la ti zui,, awi,, khatiang 1000 in ka zuar lo hrim hrim, e,, kan dawr ami a ni lo tawp ang, ka tih leh pawhin Anu chuan min lo khap a, keichu ka lungawi thei lo, en la, kan t shirt zawrh reng reng hi mi nawlpuiin min dawr phak tur hisapin kan ti a, kan zawrh to pawl pawh 700 a\anga 850 a ni tlang pui a, 1000 man te chu en ta che, a puan te khi a in an loh zia kha, I duh leh 400 man ho sawn thleng rawh, 1000 man chuan a theih loh ka ti hmak a, Chu nu chuan I chapo reuh hle mai, a ti leh hram, chapo lam a ni lo, dikna a ni zawk, ka ti ve leh sak a. lungawi lo deuh chuan 400 man chu a la a, I la mualpho ve khawp ang in dawr hming hi ka chhin chhiah tih pah chuan a chhuak a, keichuan aw,, chhin chhiah rawh, I dawr kalna hming chhin chhiah zel rawh, tunah pawh I chhinchhiah loh vangin I buai a nih kha, ka ti hrep a.




Anu chuan amak bawrh bawrh lutuk, tunlai hi ho te teah hian I thinrim a, a tih chuan, a ho loh kha, kan dawr ami a ni lo chiang ee alawm ka ti nung nung a, Anu chuan lo ni lo pawh nise \hazai in a sawi theih a ti leh,, awi Nu,, I rawn kal hma khan \ha zai sarih ruk velin ka sawi, amah kha dawtah a \ang tlat a nih kha, lokal lo phei la chu e,, kut bengin a haw mai bakah Amah kha ka beng zui ang mawle, ka ti chu Anu chu a nui suk a, I customer nih hi a chakawm loh awmm a ti sup a, ah,, ka \ha ve lutuk e a,, a over fal ho hi chu ka \im let ve a ni mai, haw ang ka ti a, kan in khar a, kan haw ve ta nghal a.
Zanah chuan U Hriata nen kan in bia a, van a thiang kak a, arsi pawh an lang ve pheuh pheuh a, ka hun tawn te chu ka hrilh a, min zilh ve siam siam a, keipawhin zawm tum em em lo chuan ka um e, liam ve ringawt a,



U Hriata chuan kum lai hawlah june emaw july chho velah chawlh rei deuh a awm thei dawn a, kha lamah interview ka nei mai thei bawk a, tah chuan ka rawn haw ang a tih chuan ka phur hle a, mahse,, tunah february thla chauh a nia, ala hla e,, ka ti a, U Hriata chuan mahse,, Kum tawp ai chuan a hnai fe zawk alawm a ti a, Nia,, ka ngai tawh che a ni ka ti sap a, a thaw halh a, a ngawi vang vang a, keipawn ka ngai tawh che, tunlai phei chu ka ngaihtuah reng che. Thil ka ngaihtuah nasa lutuk a a ti chuai deuh ruih a.



Enge,, ka tih chuan, U Hriata chuan ah,, thil ho mai mai a ti daih a, keichuan a ho lo ang sawi \ha the ka ti vat a, chutia sawi tura ka kar deuh \al avang chuan muang ban charh hian, Eng lo a nia, U Mami’n Pasal a neih dawn chuan, in unau zia ka hre chiang bawk sia, NU mawii hi I kalsan phal ka ring bawk si lo a, kan innei thei har awm , a ti zawi sup a.
Ka nui mai a, aw,, inneih lam maw ilo ngaihtuah, kan la naupang alawm ka tih chuan, ani ringawt lo, keichu hna te ka thawk a, ka lang senior chho hma dawn a nia, ti a a sawi lai chuan a thu tak hmel tawp a, keipawh ka ngaihtuahna a buai ve map mai, ka lo ngaihtuah ruk fo \hin chu a ni ve tho a, makpa chhungkhungin a awm duh angem le tih te ka ngaihtuah \hin a, mahse, an chhungkua ka thlirin makpa chhungkhung em chu a duh bik ka ring bawk si lo, sawi lan pawh ka sawi lang duh lo law law a.




Kan ngawi dun vang vang a, U Hriata zawk chuan bul rawn \an lehin, ka hmangaihna che hi chuan Makpa chhung khung nih pawh a hre hauh lova, Mahse chhungkuaa Fapa awm chhun han nih chuan, thil tih chi ber a ni si lo, Bawihi lah khi, tunah ngaihtuah lo mahse, Pasal nei ve thut thei a ni tho si a, U Ruati leh U Mami pawn an neih chuan ani phei chuan a nei ngei ngeiin ka ring a, chung vel chu ka ngaihtuah \hin a, ka rilru a buai a ni, a ti chuar chuar a.




Keipawh chuan, Nia, A buaithlak ngawt mai, kan kawng te hi a harsa ve reuh e tiraw, U Hriat, mahse, heng chu ngaihtuah lo ang, engtikah emaw kan tan kawng awlsam zawk alo her chhuak ve mai ang, ka tih chuan Nia,, a la rawn inher chhuak ang, thla leh arsi chu eng emaw vangin lang dun lo zeuh mahse, an intawng leh nge nge \hin tiraw, ka arsite, a ti zawi sup a, Um,, Ka thlapui, ka ti a, phone a\ang mah nise, ka lai ru hle a, U hriata chuan tunah tak hian I bulah ka awm chak, kuah pah chein, thil ho tak tak I sawi ngaithla ila, I lungawi lohna min hrilh char char la, lo ngai thla mai mai ila a ti chu,, hmm, ka sawi kha a ho kher ngai lo a, ka ti nghal vat a.




U HRiata chuan a ho ve \hin e, Enteh, Lalchristy rawn be tupa chu a chhe ve sia, tih te.. chu nu \awng thei lutuk chu tih vel leh na tirh nasat zia che te, Rami leh Christy, bena leh sangsangi tih vel kha ka ngaihthlak tam ber \hin kha chu a nia, a tih chuan a dik ka ti ve tho, U Mami te anga, US President tih vel te. INDIA ECONOMY, mizoram state rethei tih vel sawi ai chuan a boring lo fe zawk ka ti kher a, U hriata chuan engpawh sawi la ka bengah chuan a ngaihnawm alawm a rawn ti thum leh dut a, hepa hi thingtlanga a awm hnu hian a zei tlat, an chhaih ler a niang, ka ngaih a ti \ha lo, mahse ka rin loh deuh a, chutia a rawn ti leh zeuh \hin chu ka lawm, tichuan kham lo takin kan inbiak chu kan titawp ta rih a.




Hun chu hriat loh karin a kal ve zel a, Kan dawr pawh mi hriat a ni chho ve mek a, dawr \henawm te nen pawn kan innel viau tawh a, Sumdawng Nui ka ni ve tak tak tawh, U Mami pawh a inneihna tur thil ngaihtuahin a buai chho reng tawh a, U Bawihi nen an inzui ngun hle a, tin a thawhpui te an rawn lang zawk zawk reng bawk, keichu ka dik lo chho tial tial a, ka pum a dik lo ni berin ka hria, engmah hi ka ei tui thei lo. mahse Anu leh U Mami an rilru a hah si a, ka na vel pawh ka sawi ngam lo, tin ka period hi a mumal lo chho a, kar hnih dawn ka period tawh lo leh nghal. \um dangah pawh period timing in thlak zeuh hi chu ka nei tho a, mahse awm nawm loh na em em ka nei ngai lo, kan chhungkua kan buai nen, keima tawka \hahnem ka lo ngai ve nen chu chuan ka taksa a ti chak lo a nih ka ring ber a, keimaha tuar chho ve tawp ka ngai. U mami pawh ama tawka a buai ve hle si a.
Show post links
Top