CHAPTER 5
“Haw tawh ang hmiang" Danis chuan min kaiin kan awmna cabin chu chhuahsanin damdawi in pawnlam chu kan pan dat data. A thianpa te damdawi inah kha chuan kan awm tawh lo a nih hmel, kha nurse nu te khan a hauh a hlau nge maw ni dawn ni. Ngawi reng chuan ka zui ve zela, ka kut nghet zeta a humna chuan min thlah mai mai dawn lo tih a tichiang viau mai.
Bill chu pe leh te te in pawnah chuan min chhuahpuia “I thilsawi ramhnuaia camp kha i la duh em?" ka lam rawn hawi chunga a rawn tihchuan rang zetin ka lo bu a, a nui nghal suk chu a hmeltha leh hle tawh mai. “Awle vawiin kan hahchawl anga naktuk ah kan kal dawn a nia aw, kan ken tur te pawh leisa a ngai ang khua a luh mai mai ka peih dawn silo va, kan pahnih chiaha awm reng ka duh" a tihchuan ka zak chu ka sen tan tana.
Car kawngkhar chu hawngin min thutluh tira, kan bul vela mipui zi nuaih nuaih nen chuan khaw chhia nen a ninawm lam a ni. Ruah a sur pawh hian veivak hi chu kan tlem phah lo chu a nih hi, Danis chuan min tlan chhuah pui vata, ka laka a tha ta lutuk chu mak ka ti fo mai. Bazar ah pengkawiin kan camp naa eitui bakah mamawh ho chu kan lamkhawm paha, nithum vel awm a tih avang chuan ka hnial em em bik lo.
“Hnathawh i ngai lovem ni?" ka tihchuan a rawn nuisaka “Hnathawk ka ruai a lawm, ka tello pawhin an buaipui thei alawm" tiin car hnungah chuan kan thil lei chu a dah lut mawlh mawlha. Ka chet ve a rem tilo bawk nen ngawi rengin a che vel chu ka en ringawta, damdawi in kan chhuahsan chiah bawk nen min ngaihtuah ve te pawh a niang, a nupui chhungte lam kha an rawn la lang leh ta miah lova. An in biak awm lah ka hrelo, nge ni ka hriat loh laiin an in bia nge ni ang?
In kan thlenga a mah chuan kan thil lei chu thiar lut zung zungin kei erawh room lama hahchawl tur chuan min ti a, ka ril a tam bawk nen lut mai lovin fridge a ei tur chu ka zawng rak raka, “Kha hei hi ei rawh" ti a KFC min rawn pek avang chuan ka en hawa, engtik laiin nge a lo lei hman ni. Lawmthu hrilh chuan roomah ka lut zuia, khumah chuan thu in ka ei tur chu hawngin ka einghal mawlh mawlha, ava han tui tak.
Rei vak lo hnuah a ni pawh rawn lutin ka bulah a rawn thu a, ka thil ei lai chu a rawn ban ve nghal zat mai. “Awmpui lak ka tuma, nangmah i chet ngai lovin kan haw ve atangin a rawn thawk tawh ang" a tihchuan ka bu nghat tawpa, thil lo sawi belh ve vak kha ka tum lem lo. Amahin a duh a nihchuan a thu chu lo hnial kha ka tumlo, ka hahdam deuh dawn tihna a nimaia.
Hna lah ka thawh a phal der silo va, ka kut chu rawn hum chatin ka darah chuan a lu chu a rawn nghata.Ka lo phu zawk mai, ka tha lah chu a khur dar dar lehnghal, eng emaw hian min ti zam in ka che tha ngam der lo, ka thil ken lai chu thu kawng awt chung chuan ka eizawma.
“Inthlah dul rawh, ka chau viau a nia. Mi i ti hlauthawng ngun lutuka tunlai chu ka mu tha meuhlo" tiin a nui haka. Ka la chhang chuang lo, a awmdan engkim hian mak min tih tira, tawng tur min ti hrelo. Min ti ngawi deuh deuh mai “Min hlau em ni?" a rawn ti ta renga, ka lu ka thing nghal nawk nawk mai.
“I awm dan hi a mak ka ti, a changin min ngaihsak em em a a changin min huat hmel leh hle bawk si, ka hrethiam theilo che" tisapin ka thil eizawhna chu paih tumin ka chesawn dawna, min man beh chawt avang chuan ka hawi let rang hle. “Khum sirah khan dah rawh, mut a hun tlai lam ei tur chu kan chah leh mai dawn a nia, thenawm lawkah sawn chaw nen a lam theih a lawm" tiin min mutpui nghala.
“Tihian awm ang" tiin ka nghawng vel chu a fawp dan dana, chu chuan min ti thaw hak mai “U Danis " ka tihchuan rawn dak chhuakin min ena “Min hua a ni lo'm ni? Tinge hetianga ka laka i awm tlat, ka thinlung hi infiamna tur a ni bik lo a nia. Duhna i ti lang dawn a nihchuan dawt tello in ni rawh se, mihring thinlung hi infiamna tur a ni miah lo a nia, i rilru tak tak min pe thei dawn lo a nihchuan ka lakah beisei awmin awm tawh suh" ka thusawi avang chuan a khi saka.
Ka khabe ah chuan rawn vuanin min kuai dak salha, a rawn tho kang zui bawk nen enge a tih tum en chuan ka ngaichang rana “En teh, mipa mahni tawka pa in ti ve tak ka ni a, tu thinlung mah hi infiam nan hman ka duh ngai lova. Ka tum bawk heklo, ka sawi fo kha ka duh che a chu duhna chu ngaihtuah chiang lo va tui so liam puat anga sawi mai mai mah ka ni hek lo, he ka thusawi hi khi ni en thulh ngailo leh mihringte bum ve ngai lo tu ang khian a rintlakin a thutiamah a ding nghet dawn tih hre reng rawh" ka hmuiah chuan a rawn fawp zauh va.
Chutah “Ka huatna che chu duhna in i thlak te pawh a niang, hma hun ka sawi puiin ka tiam thei lo che. Mahse tun hun hi kan pahnih hian hlim takin kan hmang thei a sin, a tira ka bul tan dan a fuh lo a nimahna, a laihawl atanga her remin a tawp a inkawp fuh tak ni turin bul tan ang hmiang, Baby ka ta ni la ka fate nu ni ta che" rilruiha a rawn tihchuan chhan dan tur pawh ka hrelo, ka hlim bawk si tah nuih hak chuan ka bu nghat nghat ringawt.
“He kan bul thar tanna hi hlim takin hmang dun ang hmiang,ka ta i ni anga i ta ka ni bawk ang. Hmana keimah chu kalsanin duhna thar ka neihna thinlungah hian ka lut dawn a ni" tiin min fawp zuia, ka lo chhang let ve nghal vat. Zei zet chuan a chet zawma,a kut ti che a ka taksa tihphur tuma a chet lakna chuan hna a thawk chiang hle bawk, ka nuna hlimna thleng thar chuan ka taksa pawh chu a ti phur sarh mai.
Duhthawh zeta che dunin Angel te dai ngailoh ramah chuan kan thlawk dun ta delh delha. Ka mut chu rawn chhuakin min kuahtu taksa kuah let chial chung chuan ka muhil zuia, he thil hi mumang mai aniha ka natpui tawh loh hram ka beisei.
“Harh tawh rawh, i mutui mah mah dawn tlat. Thil ei phawt ang" ti a ka biang vela rawn phun sar sar leh a hmuia min nawr dan dan tu avang chuan peih lo zeta mengin ka enkara, min nuihsakin min pawm tho nghal nawlh chu ka rak thata “Thawmhnaw ha ang, u Danis thawmhnaw" tiin ka rak nghal chula.
Nui hawk hawka min dahthla in ka panty leh bra vel chu min rawn pe a, rang zet chuan ka ha nghal sawk sawk mai. A shirt chu ha tura min tih tlat avangin ka ha a, ka mal a khuh thei vek nia. Kan in upat hleih bakah amah a lian in a sang bawk nen ka tan hak tawk ngaihna a awm lo.
“I inhmeh lutuk, tirawh le eitur chu ka be tawha an rawn dah vatin ka ring" tiin room atang chuan min chhuahpuia. A sawi ang tak takin reiloteah kan chaw eitur vel chu chaw hmeh tui hmel tak tak nen chuan an rawn daha, a rim ringawt pawhin ril a ti tam nghal rawih rawih mai.Tho phang e tilo chuan ka ei teuh nghe nghe a, u Danis pawh chuan keimah zawk chu chawhmeh chu min pe mawlh mawlha.
A ni erawhin muangchang hian a ei thung, ka thil ei hmanhmawh lutuk chu ka haka, ka khuh nghal bawrh bawrh chu tui chu min pe in ka hnungah chuan a rawn beng dat data, ka sir lam chhuatah chuan ka thil ei ho chu ka khuh zawng chuan an chhuak fai veka, tui min pek takah chuan a ziaawm ta chauh mai.
“I hmanhmawh lutuk a nihkha muangchangin ei rawh, khatiang chuan i hak hlum mai dawn a sin" tiin ka chalah chuan dawmin ka hnungah chuan ala chul hauh hauha “Ka ril a tam a lawm" ka tihchuan nui sukin “Um kha chawhmeh pawh ala tam kha, mahse muangchangin ka tihkha" tiin a thutnaah chuan a thu zui leha, keipawh chuan muang deuh zawk chuan eiin sa kan hmarcha vel nen tui nei deuh a an siam chu chawmin ka si hlak hlaka.
He dawr neitute hian ei siam an thiam viau anih ka ring. A tui emai dawr thenkhatah hi chuan a hming mai hian an siama, sum hmu tho si hian a tuina a awm ngai miah lo.
Chaw eikham chuan kan thawmhnaw ken tur ang ang chu inkhungin kan buai ve hlea, anilahin a thawmhnaw chu ka duh min thlan tir tlat lehnghal. Khua a chhe bawk nen thawmhnaw lum lam chu ka thlan saka, June thla leh July thla hi chu ruah hi a sur reng emaw tih theih a ni, leimin vel in min dan loh hram ka beisei.
Kan insiam zawh chuan pawnlamah chhuak leh in room pakhatah hian a lut zawka. A rawn chhuah leh chuan zungbun bawm emaw ni chu rawn keng chhuakin min rawn pana, a hawn chuan zungbun nilo vin thi a ni tih ka hre nghal.
“He thil hi ka nu ta a nia, ka hriatrengna awm chhun a nih avangin ka dah tha reng thin. Ka pa hi ka pian tirh atangin ka hrelo hrim hrima, ka nu khan min enkawl lian thak bawk. Thlaite zuarin a theih ang angin a inhlawha, he thi hi ka pa laka a hriatrengna neihchhun tiin min hrilh thin, ka pa hi Aizawl mi hausa fapa a nih thu chu min hrilh ngeia, mahsela zawn ka tum ngailo. Ka nu nena min kalsan duhtu khan zawn a phu in ka hrelo a ni, ka nu khan rethei takin lehkha min zirtir tang tanga, amah avanga tun hun hi thleng ka ni bawk" a thusawi chu ngun zet chuan ka lo ngaithla a.
“Tunah hian he thi hi nangmahin kawl la ka duh a ni" a tihchuan ka en chho ha a “Ka thei lovang, dah tha zawk rawh. I nu i hriatrengna lehnghal" ti a hnar ka tum chu min hnawn luih tlat avang chuan ka rem ti ta nge ngea. Amah ngei chuan ka nghawngah chuan min awrhtirin min en vang vanga, ahmel thutak ranah chuan eng nge a ngaihtuah ang ka hre hauh lo thung.
“I inhmeh lutuk, ka nu hmel nangmahah hian ka hmu thei a ni" a tihchuan ka nuih seih ringawt.
A tuk lamah chuan kan camp na tur Reiek tlang lam pan chuan kan kala, khua a chhe bawk nen tlai lamah a tlang thlengin thinghnuai ni se mahsela tlema fai deuh laiah chuan tifaiin tent chu kan zar mawlh mawlha, raincoat kan ha bawk nen kan huh lem lo.
Kan tent hi tlemin a changkang deuha, kan hman thin pangngai ai a lian bawk. Danis chu pui ve zelin kan kilh ngheh zawh chuan kan bag vel nen chuan a chhungah kan luta, silpaulin in kan tuam vek bawk nen an ni pawh an huh hoh lo. In phawrh mawlh mawlhin kan inrem thaa, Danis-a erawhin a raincoat chu ha lehin silpaulin nen chuan kan tent nen rawngbawlna tur hmun zar zawmin a che leh mawlh mawlha.
Gas thuk te chi kan kenga, kan inkeng chikim viau mai. A zawh hnu chuan rawn lut in a inthlaka, mutna tur chu kan phahsa thlap bawk. Ruah chu a sur reng bawk nen engmah tih theih heklo card dengin kan nui dun hak haka. Kan peih tawh loh hnu chuan mu lumin a taksa ah chuan min kuah beta, ruah sur chuan a ti nuam zual.
Reiloteah ka muhil zui ta sak saka, ruah a sur tawh hi chuan mut hi a tui duh a nih hi.
Ka taksa rawn za chiai chiai avang chuan harh chhuakin ka mengchhuak vata “Danis" sexy zet chuan rawn nuiin ka kut chu ka lu chunglamah chuan a nawr beta, kan tawpna tur chu ka hrechiang leh ta viau mai “Ka duh lutuk che" thaw hlap hlapa ka mut hle hle lai chuan a rawn tia, nuisakin a kawngah chuan ka kut rawlh lutin a thinkhuar laiah chuan ka bei vang vanga.
Movie te en dunin kan pahnih chiaha awm kan nih avang pawh chuan kan boruak a nuamin kan in ngainatna pawh a zual tih ka hailo. In hau lo leh in ti thinrim miah lova awm chu a lo nuam takzet, rawng te chu bawl dunin kan sir vela rannung leh sava hram chiah chiah te. A khat tawka ramsa tenau deuh rawn hram hriat tur awm te chuan a eng emaw tih hahdamthlak phian mai.
Kan awmna hi chhum a zing deuh mapa, keimah chuan awm ila ramhuai awm duhna chi tiin ka hlau viau ngei ang. Mahse Danis nen kan nih tlat avangin ka hlau lo mai chauh zawk a ni, “Enge i thil ngainat ber" a tihchuan “Sa" ka lo tirang lutuk chu a rawn nui hawk a.
“A nih ka ring niminah khan i ei hnem emai, naktuk chu khua a that deuh leh kan chheh vel hi kan fang ang chu. Ruah a sur reng bawk c chaw ei thuai ila kan mu leh mai dawn a nia, mu tluk tluk mai ang aw" a tihchuan ka nui ve hak haka. Hetia a awm hian a ngainatawmin a bula awm anuam ka ti, chuan amah hi a hmeltha zual sawt te hian ka hria.
Mipa dang te anga min tlawn hluak hluak te a ti ve lem lova, mahni in fak chiam a tum hek lo. Hengte hian amah hi a tipa zual in ka hria, kan tunlai khawvel en phei chuan a tha mah mah zawk. Kan tunlai media ah chuan hmeichhia aiin mipa hi kan lang tama, chutah pawh mi chanchin a chhe zawnga sawi leh mi fakna nilo a relna thu post hlir an ni, tuai ang lek an ni ta ber in ka hria..
U Danis erawh chuan social media a khawih awm ka hrelo va, whatsapp erawh hi chu a khawih vea, Chu pawh a lut ngai zen zen lo tih ka hria. Hei pawh hi mipa dang laka a danglam lehna pakhat a niin ka hria, mipa thenkhat tuai in ti haw em em te hian an ngaihnep em em tuai ai pawha tawng thei leh neih hlauhawm khawpin social media ah an zia an pholang tih hre lek lovin hmeichhia chu ti khati tih an hmang hi chu inhmuhchhuah a hun tawh hle a ni.
Hmeichhia te pawh chuti bawk lar loh kan hlau lutuk hian mi anglo ah min chhuah thin tih hre miah lo in kan live in lar chak reng reng in video pic mak pui pui kan nei renga. Ringtu ram inti thiltih atan chuan a rapthlak ta mah mahin ka hria, keipawhin ka khawih tam duh ngailo. Social media hi min ti chhe tu leh kan rilru hruai khawlo tu a ni ka tilo theilo.
“Naute nei vat turin chet la reng mai ang aw" u Danis-a aw rawn chhuak thut avang chuan ka nui haka “I mak emai" tiin ei tur chu ka inbarh tan tana, indanna ka ei tawh lem lova. Ka dah bo vek a nihkha, u Danis-a hian ka ei tih a hre hauh lova. Hria se chuan a thinrim ngei ang le.
A tuk zingah chuan hma takah tho in ruah sur hma chuan a tlang zawl lam pan chuan kan pheia. Chhum chu kan chung zawnah chuan lei hrula zam silo in a inhlawm tapa, a nalh dang dai phian. A kham chung sanglaiah chuan dingin u Danisa chu thla ka in lak tira, thli a tam bawk nen a vawt vur mai.
Mahse thlalak nan chuan duhthusamin a mawi dangdai riau, kan piahah chuan a tlangsang laiah chhum hi tuiluang ang maiin a awm bawk nen ka hnunglam a ti mawi tu a a tang chuan ka thlalak pawh a tifuh viaua, kan pahnih chuan kan selfie bawka, u Danisa min ngaihsakna chuan min tihlim lo theilo.
Hnim vel an huh avang chuan kan thawmhnaw pawh chu a huh thlara. U Danis-a chu a maha dintirin ka lak sak bawka, Instagram lamah kan pahnih thlalak chu post in kut inkai rial chuan kan awmna lam chu kan pan duna, ruahsur hnuaia camp chu a nuam dang dai phian mai.
“Ehe hei artui" tiin hnim buk kara lo awm artui tiat a lian lo awm chu ka kawk va a “A va tha ve, chawhmeh ah la ila a that kha. A dang an tui leh mai ang chu maw? Artui nilo in ramar tui a nihkha" a tihchuan mak ka ti ngei mai. Keipawh chu hetiangah ar an rawn tlat phak ka ring pawh nisi lo, ka nui haka “Miin min man a nge aw" ka tihchuan nui hakin “Min hmuh loh hi bakah hetiang tui pakhat vang mai mai chuan an mang lo turah ngai ang" tiin a la zuia.
Kan awmna kan thlen chuan sava an lo chiar leh nak nak tawh mai. Kawrte tui luanna bulah kan awm bawk nen tui kan har em em lova, bakah ruahtui dawhna a siam chu a tangkai phian mai. Ei tur chu siamin kan ramar tui lak pawh chu kan kang a, ram mi kan ang riau in ka hria. Ka ngaihtuahna avang chuan ka nui haka “Hnammawl kan ang e" ka tihchuan a rawn nui ve haka.
A thir bel chhuan chu her remin “Hnam hmawlah pawh a hmeltha chi kan ni mai, kha le hei lo chan teh" tiin tomato leh purunsen chu min rawn pe a “I phakar e a, mit ti thip thei hlir hi min tih tir ziah suh" tihlak hlakin kan thing phel siam chawpah chuan ka chan mawlh mawlha, hmarcha hring kan ken leh spicy souce nen chuan tih pawlhin ka tem hlak hlaka, a thak tha tak tak hle mai.
Bawngsa ti chu kan hem hmin leh tawpa, chaw ei kan peih meuh chuan a tlai leh duai tawh mai. Ruah lah chu a la rawn tla phuar phuar zuia, “Kan camp chu a fuh nge fuh lutuk zawk pawh hriat a har, a vahchhuah theih der silo va. Mu tluk tluk mai ang aw" a rawn tihchuan ka lo nuih ringawta.
Chaw chu eiin kan hmehin a zir bawka kan thil siam zawng zawng chu keimahin ka eizo vek ti ila a dik ang. “I pumpui ava lian ve" u Danis-an a rawn tihchuan mit siai zauhin “Ka hetih vang hian a lawm ka chak em em, chaw hi a hrisela heh em em tur" ka thusawi avang chuan za tak mai hian a nui hawk hawka.
Chaw eikham chuan a phone hmangin tunge a biak ni a chang in a vin leh hluk thina, mu chung chuan ka lo en reng ringawt. A hna lam a ni ngei ang ngaihven tha tura a tih tuar chuan ka lo phu zawka, ka kut chu rawn vuanin a mitmeng chuan hahdam tur chuan min hrilhin a phone chu a dah zuia.
“Tinge a" ti a ka zawh chuan thawk la hakin “Kan hotel ah buaina chhuakin kan sum kawl thenkhat a bo a nihchu, in vennan bank ah dah vek lo in ka kawl tha thina" a tihchuan ka thu chhuaka “A va zia lo ve, a bo tam viau em?Kan haw a ngai a nihchu" ka tihchuan a lu thingin min kuai mu leha.
“An la let tawh, a ru tu pawh man a ni tawh bawk. Ka assistant in alo chingfel mai ang, ka sawi ang khan ni thum tal kan awm ang chu" tiin min rawn fawp zauh va. Chutia a sawi takah chuan ka thaw ve huai mai, a laptop ah chuan movie en dunin kan titi pah sap sapa, a naupan lai chanchin vel an retheih thin zia a sawi te chuan ka lo tahpui hlap hlap mai.
Amah zawk in min la thlem zawk zuia, engtin nge hetiang dinhmun a thlen theih ni. A ropui takzet, a rangkachak thi min awrh tir chu ka khawih zauh va, ka nunna chan pawh huamin ka venghim ngei ang. He thil hi a tana a hlutzia a chanchin a sawi hian ka hrechianga, chuvang chuan tibo mai mai lo turin ka veng tlat bawk ang.
“Nang ve le, i chanchin ka la hre tam hauh lo" a tihchuan ngawi rauh rauhin “Um kum 9 ka nih thleng khan helamah school ka kala, chuan kum 10 ka nih atanga nikum thleng kha chuan Pune lamah ka zir thunga, ka nu hian kum 16 ka nihin min boral sana, ka pa hian min enkawlin min tihhlim a tum hram hram thina. Buai chung chung khan ka tan hun a insiam ziah thin, a ni anga pa tha hi an awm tawh kher lovang, a fanu hlim nan khan a theih tawp a chhuah a ni ber" tiin ka nui haka.
“U Danis in chunga thil thleng kha kan tihluih a ni bik miah lo a sin, kha zan khan ka pa nen kan intihlima, kan haw tlai bawk nen ka pa kha a lo fimkhur lo deuha. Ka tihpalh takzet, keimah avangin i hmangaih i chana, ka pa hi ngaidam rawh aw" tiin a tawp lam chu ka tap titiha.
“Shhh engkim a tha vek, inthiamlo tawh suh. Jane chu a thi tawh, a rawn kir tawh dawn lo a ai ah nang ka nei thung che a lawm, ka kalsan ngai lovang che" a tihchuan ka nui haka, hepa hian a ti mai mai nge ni anga thu dik tak a sawi? Chu erawh hun in a la hril ang chu.
COMMENT HI MIN TAIHMAK PUI ZEL TEH U, HAH TAKA TYPE MAN KAN HLAWKPUI VE NA BER CHU IN COMMENT THA TAK TAK MIN FUIH TU ZEL HI A NIA
