CHAPTER 5
“Sam, u Sangpuia te chu an tha angem le? Min rawn be bawk silo, tinge intlansiak kher kher pawh chu a duh tlat le. Valpuia te kha be teh" tiin Samuela chu ka ena, a energy drink ken chu in phawtin a thaw hawka “Ninawm, rawn rim ve em em che a bialpa te chungchang ringawt sawi mai, keimah hi min ngaihsak rawh. I rawn awm hma pawhin a tlan ngun lutuk, tun thlengin a la tlan peih danah a la dam a nih saw" a tih hluk hluk chuan mak ti lutukin ka ena.
A hmel lah chu a tum bur mai bawk si “Eng nge i hriata?" tiin ka beng zawta “Eng mah ka hrelo, enge i hriat zawk? Tlangval angin ka rim che, bialpa a de de dei, a tu tu tut tireng mai. Ngawi hle hle khan awm rawh, min rawn be tawh miah suh games ka khelhsan dawn che" tihlukin a phone chu a en daiha, a thusawi chu mak ka ti deuh deuh, mahse biak ngam pawh a ni tawhlo.
A phone a phawrhte chu a ti deuh sawk sawk mai, hepa hi engvangin nge a thinrim vak le. A game khelh ka en chu mobile legends a khel chu niin, a hmehna te chu an hmet na em em khawpa, a phone hmai chu a ri kauh kauh thei hial mai, a hmelma te lah chu a kill char chara. A tak takah awm phei se an sawm vek thei hial ang.
“Hey Sam, tum bur lo la kha i enemy te kha dim ve rawh, phone khan i eng pawi mah a sawilo" ka va ti dek dek chu “Lo ngawi rawh, Vexana an revamp hma kha i an an nen, bialpa bialpa tireng mai" tihlukin min hnungchhawn hmaka, tih dan tur pawh ka hre tawh lo ka en reng ringawt.
“Thui thui thui, nub lutuk" tiin a vin leh hluka, ka ning lutuk tihngaihna hre silo chuan a tuk khumah chuan ka bensak pawpa, a bu lawp mai. Ka in thiam lo leh deuh, min rawn khawih dawn emaw tiin thinphu dep depa ka lo en lai chuan a rawn inhera, min hnek tawp dawn emaw tihlaiin ka biangah a rawn pawt vak a nihchu, min la thing nawk nawk zui.
“I nghal riau mai, mi thinrim laiin khatiang khan lo ti tawh suh, ka sual hrep mai tur che a sin" tiin min kuah thuka, ka thaw huai mai “Min tihlauthawng a lawm, thinrim tawh reng reng suh.Helaiah chuan ka thiantha ber anga ka en te in nia, in thinrim chuan a nuam lo" ka tihchuan a nui suk suka, a that hi chu a hmeltha mawle, ka thiante la tih pui ila a tha ang.
“Aw le, mahse nang pawhin i bialpa ringawt ngaih ven suh, a tih than ania. A chak leh ngei bawk ang, naktuk zanah a chak lawm nan ar kan lo rawt rawh" a tihchuan ka nui ta hak haka, “Aw le, ka lo bia ang. Keimah pawhin ka thawh anga, nang niin in tur in lei ang" ka tihchuan a bu nghata, a ngawi leh vang vang tawh mai.
Valpuia te ho angin tawng bawrh bawrh hi a nei khata, hei vang hian a niang an khaw nula ten Mr cool an tih thin ni, amah hi a mitmeng hi a cool ruiha, sawifiah dawn chuan mitmeng zawi kan tih ang chi hi; mahse chu chu a inhmeh pui phiana, a nui khat hle a. A tawng tam lo bawk, u Sangpuia nen an in anna pakhat a niin ka hria, thiam thil a ngah zia an sawi ka hre tawha.
Guitar, keyboard tih vel chu a hnehsawh hle bawk. Chu pawh mi sawi atanga ka hriat vek tho, “Hmeichhe duh deuh ka neia" kan ngawih vang vang hnua a rawn tihchuan ka en ha a, “Ka hmuh tirh atangin ka duha, mahse" tiin akiai saka “I hrilh em?" a ni meuhin duh a neih chu ka hre chak riau mai, a thusawi zawh pawh nghak theilo chuan ka lo zawta.
A lu a thing nghal nu nu mai “Midang duh a neia, ka hrilh chuan an inkar tichhe tu ah min ngai ang, chuvang chuan hetia awm tawp hi ka duh, a hlimlai ka hmuh chuan ka duh tawk mai" tiin a then saka, ka lo en reng thung. A thusawi chu a timai mai lo tih a hriat “I hmeltha a, i fel bawka hrilh la a lo duh ve mai thei che a sin" ka lo tihleh chuan ka sam chu a rawn tuai thur chiama.
“Ngai lo mai rawh se, a bialpa chu a duh lutuk hmun ka chang lo, sawi tawh lovang ka sawi peih leh tawhlo" a tihchuan ka ner nanga, hepa hi chu a thawveng lutuk hi a mak zawk, ka kut ka phar chuan a mit a rawn san uka “Ka lo kuah ang che" ka tihchuan a rawn nui hawk mai.
“A tullo" a tihchuan ka kuah lui tho a, “Ka thian inia, i harsatna min hrilh zel rawh. Mipa leh hmeichhia nih avang ngawtin thian kan ni theilo tihna pawh a nilo, keipawhin ka thuruk ka hrilh zel che a, min hrilh ve zel rawh. Ka hnem theihna che a nihchuan ka hnem zel ang che" tiin a hnungah chuan ka bensak thek theka.
Nui hakin nghet zet chuan min rawn kuaha, ka nghawnga hmai a rawn phum chuan ka phu deuh zawk lehnghal. Mahse ka haw duh lem lo, “I sawi dik e thian kan ni" tiin a awmsawn zuia, ka nuih hak hak mai.
“Thiantha chu kan inphatsan ngai lo vang" tiin a kutah chuan ka vawn saka, a rawn hawi chhuaka “A tha a lawm, ka haw phawt ange mu tawh rawh. In ngaihtuah vak vak lo la, i chau ange" tiin a tho chhuaka, ka zui ve nghal zata.
“A nih muttui aw" tiin ka kut chu ka vaia, a kut tang pahnih chu rawn ti che in a kal liam nghal nal nal mai.
Rooma ka luh hnuah u Sangpuia text in ka mu thla hnaka, a one tick avang chuan ala buai anih ka ring.
Samuelan status a rawn neih avang chuan ka view vata, Young fella hla thar ’I hmangaitu' tihchu a chang a duh lai zawng a rawn status a
“Mahse a riang lanu i ni silo, a nei vala chuh leh duh lai ini, theih se a nei vala neih ang kha neih ve ka chak, i duhzawng engpawh leisaktu che kha." tih te mai chu, a hmeichhe duh chu hria ila hetiang khawpa duhtu a neih thu hrilhin ka biak sak ngei ang mawle.
Chu pa chu a hausa viau pawh a ni theia, a tluk lo anga a ngai chu dik ka tilo, ani pawh star tu a nei teuha, in dah hniam lutuk tur a nilo mawle.
“Hrilh mai la Sam, hausakna hi hmeichhiate duh ber a ni biklo ania" tiin ka va bia a, hetianga a duh zia a thup reng chuan amah a na mai mai dawn a sin le “A nih, chu hmeichhia chuan a mipa a duhzia hre ta la, i va tibuai phet ang maw? Mipa ni ta la i thei angem? A duhzia leh a chanchin a ngaihven zia hre reng chungin a tan engmah nilo zawk i ni tih hria la, i la bem duh tho vang maw" a rawn tih let tak ah chuan chhan dan mai tur ka hrelo.
A sawi dik tho bawk si “Mahse...." ka tileh chu “Mu rawh, engtikah emaw chuan ka hmeichhe duh chu ka la hrilh ang che, in pa pawh a chak leh tawh kha. Ar chu lei ngei ngei rawh u" a tihchuan ka nui hak ringawt, u Sangpuia a chak tih hriatna chuan min ti hlim em em ringawt.
Samuela sawi ang chiahin u Sangpuia pawhin min rawn chhang chiaha “In ka thleng chiaha, i mu tawh em?" tih te mai chu, rang zet chuan ka chhanga, “Naktuk zan chu i chak lawm nan ar kang ho ila; chuan keipawhin ka thawh ve bawk anga" ka tihchuan a rawn call zuia, lai zet chuan ka la a, tleirawl bialpa nei thar ang mai hi ka ni in ka inhria.
“I mut a chhuak tawh em?" a rawn tihchuan la chhuah loh thu chuan ka chhanga “Ka lo nghak che a, i haw hma a mut kha ka duh bik lova, chuan maw u Sangpui naktuk zan chu enge i ngaihdan, Valpuia te ho nen ei khawm ila" ka tih leh takah chuan a rawn aw ve mai bawka, thian ho a thil tih nawmzia hrechiang tu ka ni bawka, ka phur viau mai.
Helaiah chuan hmeichhia ka kawm vak lo nen, Valpuia te ho hi ka tan chuan an hlu viau bawk. Bakah an ni ka kawm avangin thilsual kan ti dawn a ni hek lova, chuvang chuan ka zak duh lem lo.
U Sangpuia nen chuan reife kan in bia a, ka hlim leh em em tawh mai. Thu chu a sawi tam lo, mahse amah ka be thei hrim hrim hian ka hlimna chu a siam reng tawh zawk, ka duh tak tak tih ka chianga. A thusawi tawite pawhin min tinui leh thin, hepa hian zûn a ngah takzet, engtin nge min duh ve mai theih tih hi ka hre bik lo.
Duha pa titu tam tak an awm tih ka hria, mahse tunah chuan ka ta a ni tawh miau si a, in tih theihna chen ka neilo theilo, he khua a tlangval fel ber ber an tih ho ka kawm thei ringawt pawh hi ka lawm, hei vang hian khaw nula thenkhat hian min rel nasa hle tih pawh ka hria, mahse engah mah ka ngai duh lo thung, an duh chuan min lo sawisel ve mai mai rawh se.
Ka tan chuan ka nunah hian tu sawiselna mah ngaihven hman ka nilo, mi min sawiselna kan ngaihpawimawh lutukna lamah keimah ni nun kan tichhe mai mai zawk a ni, chuvang chuan tu mah hi va ngaihven lo ila kan bul hnaia awm te erawh kan tan an hlu hle thung, ka mipa kawm avanga min lo haw duh a nihchuan min lo haw ve mai rawh se.
Rei meng tawh lovin ka mu zui thuaia, naktuk lamah Valpuia te ho ar lei tur zawn tir sa an ngai ngei ang le. Keilahin an zawrhna ka la hre der bawk silo.
A tuk lamah Samuela te inah ka kala, a ni pawh a pi leh pu nen an chenga, a nu leh pa in accident avangin an thihsan tih ka hria a, ka lainat viau bawk. Amah hi lehkhathiam thei tak a ni a, BA a zo tawha, a chawl rih a nih hmel, sawrkar hna zawng se a hmu in ka ring, mahse amah lah hian a tum loh hmel nasa mai sia.
“Pi, Sama hi a la mu em ni le?" ka tihchuan “A nihkha, va kai tho rawh. Tlangval hi chu thawh hi an hlau khawpa, an thawh hma hian an thi dawn emaw an in ti a nih ber hi" a tihchuan nui hak hakin Samuela room lam chu ka pana, ka luh chuan a lo in khuh hlun mai.
“Samuel tho rawh, dar 7 a ri tawh a nia, tlangval a pumpa i mu rei lutuk tho vat teh" tiin ka sawi nawk nawka, a rawn in khuh tha leh ngat anihchu. “Hey tho vat teh, ar leina tur chu ka rawn keng a nia,nang ni lo zawng ula school kal ka ngai bawk si" ka tihchuan peih loh hmel zet chuan min rawn ena, ka lo en kar avang chuan in let thukin a rawn thu chhuaka.
“Ninawm, nang te hi i hnawksak ta riau mai, tlangvalin mut ka duh a nimai. Mipa roomah te rawn lut de de suh" a hnungah chuan ka bensak nghal thlawp mai “Kha hei hi, ka haw nghal dawn a nia" tiin khum bul dawhkanah chuan pawisa chu dahin ka chhuahsan zuia.
SAMUELA AW
Zan lamah chuan rin ang ngeiin hma fe ah an rawn kala, ar an rawn pawm thap mai. “Kan thawh belh ve a nih hi, tui chu i lo chhuang em?" Kimbawihan a rawn tihchuan ka lo bu nghat nghata.
“A nihchuan puah vat ang u, chet hmanhmawh angai ania" an tihchuan chawhtawlh vel chu la in an bulah chuan ka chhawp saka, ar chu a nghawngah satin an puah zuia, an bulah thawnthu ngaithla in ka lo pui ve bawk.
“Ninawm ti tawp teh, khatiang mipa sawi tur hre deuh kha play sek a ngailo" Samuela chuan a rawn ti a, ka lo ner nang mai. Hepa hi chuh mi a khap reng mai “Eng nge, tiang bialpa hi ka awh mahnak alai" ka tihchuan a thaw hrawka “I awh viau chuan ig leh fb khawih peih deuh mipa hi ngaizawng rawh, khatiang tawng thei i duh chuan fb ah hian an tam ber, engpawh post la an rawn sawisel char char mai ang" a tihchuan ka nui haka.
A thusawi chu a dik ka ti bawk si, ni e tunlai ah chuan mipa te zawk hian hmeichhe ai an awh tawh emaw tih turin ig leh facebook ah mi pic post, mi thu post hi an pawisawi pawh ni miahlo hian han sawisel reng thei a mawle. A ni tak tak, fb te hi ka luh chang apiangin comment en ila mipa hian mi hi a chhe zawngin an lo sawisel char char peih nia, fakna thu chhak chhuak chu tlem te tak tak, hmeichhia zawk an ngawia mipa comment tawngkam chhe tak tak a tlep thla tuar thin thung.
“Chutiang em em chu ka duh bik lo a lawm, u Sangpuia hi ava rawn kal har em em" tiin thudangah chuan ka pakai ta daiha “In pa te chu a in la puitling tawha, a nuam chinah chiah a rawn lang leh mai ang,lo en reng rawh.Ar puah zawh velah a rawn lang mai ang" Rengpuian a lo ti ve bawk, an va han tawng thei tak.
“Ngawi mai mai teh u, a chak lawm duhtu zawk in nihkha, broiler te chu a hmin hma a lawm, saw a lo thleng" tiin u Sangpuia lamah chuan ka phei vata, a ni pawhin min hmuh rual chuan a lo nui sak mai, Jumper dum a rawn ha a, a lukhum chu a khum ngei bawk, Cargo dum a rawn ha bawka, a va han pa chiang tak.
“I lo kal chu a lawmawm e, kha in nu khan a ngai tawh che a nihkha," Valpuia chuan lo tiin an nui dar dara “Min ngai lovang tih hi a lawm ka hlauh ni, khawi maw ka lo pui ve ang che u" tiin a thu thla a, a pawh pui ve nghal sawk sawk mai. Pahnih lai kan talh bawk nen kan ei seng pawhin ka ringlo, naktuk lamah ei leh a ngai leh ngei ang.
Puah zo thuaiin keiin a kanna tur ka lo buatsaiha, nu Chhingin min pui bawk. Mipa ho erawh pawnah an lo zai thung “Sangpuia nen hian in in hnim hnai riaua ka hriat chu" nu Chhingin a rawn tihchuan ka melh zawka “Nu a fel riau a sin, mi hian a thalo an ti mai maia, mahse tumahin a thatlohna sawi tur an hre tak tak miah lo, a racing hrat hi an sawi peih ve na mai mai niin ka hria, ka chungah an fel hlawm lutuk a sin" ka tihchuan engmah a sawi belh tawh lem lo.
Arsa chu a hmin rualin pawn lamah kan keng chhuaka, no ah kan coke lei vel nen chuan thli in kan eia, a tui lutuk tlat, tualah meipui chhepin kan hual thapa, nu Chhingi erawh tlem eiin a mu lut leh daih thung, mipa hlir ka kawm bawk nen thenkhat chuan min ngai dik lo viau dawn tih ka hria, mahse Pathianin engkim a hria a ka pawi ti lem lo.
“U Sangpui ei teuh rawh aw, i pual ania tlemte te kha i ei ange" tiin ar bawp chu ka pe a, “Ni e ei teuh rawh, kha in tur pawh a la tam a nia" Kimbawiha te pawh chuan lo ti ve bawkin an thlit belh sauh sauha, rin ai kan ei thei hlawm zek. Kei ngei pawh chaw ei puar viau mah ila ka ei hnem lutuk tlat.
“KTP meet kan dawng dawna, kar leh lam chu in puahchah a ngai a, hnatlang an koh kha aw. Samuela chu a luck leh chur chur viau ang" an tihchuan kan en thapa “Timaw?" ka lo tih hu chuan “A ho mai mai" Samuela lah chuan a lo ti tawi tuk mai, hepa hi chu a chungchang sawi vak te hi a duh miahlo, mi mak tak chu a ni ve in ka hria.
“Fellowship naah nula te mit la tu ber a ni leh dawn chiang sa, a hun a rawn thleng anga i hre mai ang" tiin an nui dar dara “Nikuma mite kha an lo kal leh chuan kan zui leh dawn ania, hmeichhe hmeltha lutuk kha chhuah an uihawm" tiin an sawi zui nak naka, u Sangpuia nen erawh kan lo ngaithla ve reng ringawt.
“U Sangpui i tel ve ang tiraw, infiamna te in nei thin a ni lawm ni" nu Chhingin min lo hrilh tawh avangin ka zawta “Nei chiang e, inrinniah nang pawh item i thiam zawng a awm chuan tel tir ngei ngei i ngai, KTP hruaitute kan lo bia ang, inthlahrung deuha awm te kha i tum ange he khaw mi ang chiahin awm ve bawrh bawrh rawh" an tihchuan ka lo nui ringawta.
“Tlangval in an rim ngei dawn che a nihkha, u Sangpuia chu a hlauthawng awm" tiin an nui zui leh dar dara, an uang thei bawk sia. “Mipa dang rim ka phal teuhlo" u Sangpuian a lo tihchuan kut an beng vak vak mai, an puar tawh thu an sawi avang chuan kan thil eina vel chu inchhung lamah dah tha in ka chhuak zui leh thuaia.
Kan zai leh thap thap tawh mai, zanin chu u Sangpuia pawh a zai tui ve rut rut viaua, Samuela erawh games a lo khel leh tawh, mize hran hlak hi a neia. A thiante pawh hian an tibuai duh em em miah lo bawk, KTP meet a hnai tawh tih an sawi chu ka ngaihtuah zui mai maia, ka thiante ka ngai ve riau mai.
Kan phur theih zia te kha, la in be reng mah ila khaw hmuna awm ta lo na na na chu ngaihtuahnaah an rawn thara, lung a leng lo theilo. High school atanga tun hun thleng khan hun ngaihawm tak vek niin ka hria, thianhoa class a bengchheng taka awm lai te, school ban apianga len pah te kha nuam kan ti thin hle a nihkha, tunah erawh hmun hrang hrangah a then ramdangah, a then an khaw lamah pasal neiin an awm bawka, then khat hla hna a vangin hmun hrang hrangah kan awm hlawm bawk nen lung an tileng ve thin.
MUTTUI U LE