STORYFB.COM

DEAR JOHN




CHAPTER 5




U Cindy te chu ka dil ta ngeia, an lo rem ti viau lehnghal, lawm zetin ka ṭhiante chu ka hrilha, ka bialpa ve deuh reuh pawh chu a rawn kal nghal tur thu sawiin phone chu a dah zuia. Ka thaw hak thung, in ngaizawng chu la ni chiah lo mah ila amah hian mi a bem reng bawk nen tihian kan la in be ve zel chu a nia.







Ka lakah chuan a danglam em em lo thunga. A rawn thlen rual chuan rawn call in kalna tur vel chu ka hrilh mawlh mawlha, pawnah ka lo va hmuak bawk. A rawn lang har lo, in nuihin kan in chibai a, kan vawikhat inhmuhna a ni bawk nen a zâm awm ve rum rum mai.





Inchhung lamah chuan inzui lutin u John-a te nen chuan ka in hmelhriattir a, u Cindy pawh chuan a lo be nghal bawrh bawrha.U John-a hmel erawh a nelawm tehchiam lo hle, a mengrum lutuk chu ka inthlahrung takzet. An inah mipa ka hruailut chu a lawm lo viau pawh a ni mai thei.







Inthlahrung dâk chuan thingpui la turin choka lamah chuan ka kala, ka lêt leh chuan an pathumin an lo ṭhu ṭhapa, keimah hi ka zam lutuk tlat. “Kha aw thingpui, Remrem i awm rei angem?" ka tihchuan a lo bu nghata “In phal ang chu maw? Kan vawikhat in hmuhna a nisia inkawm ve deuh hlek loh chuan, a nilah a rawn lêng ve hman bawk siloa" a tihzawm zata.








U Cindy pawh chuan a rem thu chu lo sawi ve in a nui har hara, midang kiangah hi chuan a nelawmin a fel mawle, u John-a nen an inkar fel vek ang maiin a awm thei ṭhin hi ka ngaisang let ling phian mai. Tute tân pawh hian a nelawm nghal surh zêl maia.





U John-a chu tho vutin hna kal tûr chuan a chhuak zuia, u Cindy erawh a la awm thung. Puipuii pawm pah chuan Remrema nen chuan kan titi mawlh mawlha “A takah pawh ilo hmelṭha hle mai, ka duhzawng tak ini" tiin ka kut chu a rawn vuana. Laksawn pah chuan ka nui sak ringawt.








“Um nia, i va ti lawmawm ve" tiin Puipuii chu ka be pah mawlh mawlha, amah pawh chu ka en chuang lo. Dik tak chuan ka bialpa atân chuan ka duh lo ni berin ka hria, a mah phei chu a chhe miahlo. Mahse min hip lo ve tawp ringawt, “In ngaizawng tawh ila, a theih phei chuan inneih ka duha, hetia mi ina awm kher lo hian kan inneih chuan i chhûngte pawh kan châwm mai dawn a lawm" a tihleh chuan ka melh zawka.








“Ni love,tunah chuan bialpa neih chu ka la peih chiahlo, pasal nei tûr phei chuan ka la nau deuh, bakah nangin min enkawlpuiin mi in min ngai khawlo dâwn lutuk a sin, hetia ka thawh theih ṭek ṭek chuan a ṭha mai a lawm.Ka naute an puitlin deuh hma chu pasal neih mai mai ka tumlo, min hrethiam rawh" tisapin hmun dang chu ka en lui ngar ngara.








A nersak chu ka mitsir chuan ka hmu reng mai, “A ho e, mi sawi mai mai te chu sawi tûr an hre reng dâwn a lawm. Keichuan nupui tur ka duha, min nei la i hrehawm ngai hauh lo vang"tiin min thlem leh sur sura, a mizia chu ka huat chi tak a ni. Ka tawlh hla hreta, a mitmeng te chu ka nel hauhlo.







“Min hre thiam rawh, pasal neih ka la duhlo, bakah kan inhmu ve chauha, kan in hre chiang heklo, ṭhian anga awm ka duh zawk" ka tihchuah a lawm loh hmel ta viau, pawi pawh ka ti lem lo. Kan in be zen zen pawh a nilo, heta ka awm hnu hian min hmuh a tum ngun em avanga vawiinah pawh hian rem ti mai ka nia, hetianga a rawn awm hi ka ring lo hrim hrim.







“Um a nihchuan ka haw phawt ange, kal na tur dang ka la neia" a tihchuan ka hnial lem lo. “Tluang deuhin i haw dawn ania" tiin Puipuii pawm chuan pawn thleng chuan kan va thlaha, step a a chhuhthlak tâkah chuan inchhung lamah chuan ka lut leh vata.








“I ṭhianpa chu ava haw hma leh si ve, nga ti tut tut nge a" u Cindy in a rawn tihchuan ka lo nui hak haka, “A peih leh lo a niang, bakah a ṭha zawk." tiin inchhung bal lai ni a ka hriat ho chu ti faiin ka che mawlh mawlha. A ni pawh chuan engmah sawi tawh lo in roomah a lût a.







Chhuat ka nawh mawlh mawlh lai chuan inchei taka rawn chhuakin “Ka chhuak leh lawk dawna, ka rawn haw har lo ang" tiin a chhuak zuia, ka en liam ringawta. Puipuii chu amahte in a lo tla ve mial miala, a nu chhuak tur hi a ngên ngai hauh lo, chhuat ka nawh zawh chuan darthlalang vel te chu hru fai leh in ka châwl zuia.







Puipuii mut a chhuah avâng chuan pawm pahin phone chu ka en paha, a ni pawh rei meng lovin a muhil zui ve mai bawk. Chutia naute ber a mut leh takah chuan phone ah chuan movie te in in ka hriat loh kar chuan ka lo muhil vea, ka harh leh meuh chuan a lo tlai leh duai tawh mai.







Thawk la zui ham hamin ka in thing harha, Puipuii erawh a la mutui viau mai. U Cindy pawh a la rawn let leh lo a nih hmel, toilet lamah kalin ka inthiar zawka, chutih lai chuan ka phone a rawn ti ve zat bawk.






U John-a a nih avâng chuan mak ka ti ru viau mai, phone ka lak rual chuan “I buai em?" a rawn ti a, ka buai loh thua ka chhan rual chuan thawk a la ri chu ka hre zui zat bawk. Chutah “I bialpa tehkha a la lêng em?" a rawn tihleh avang chuan ka nui haka.







“Leng lo, a haw leh nghal a lawm.Chubakah ka bialpa pawh a ni lo e a, pawimawh a awm em ni?" tiin intleuh faiin toilet chu ka chhuahsan zuia “Awm em em love, i u Cindy a chhuak leh em ka hre duha, ka call ala thei silo va" a rawn tihleh takah chuan thudik ka hrilh ang nge hrilh lovang tihchu ka ngaihtuaha.








Thudik hrilh ila an buai leh ka hlau bawk si, mahsela thudik ka hrilh loh chuan a hriat leh hunah ka chungah a thinrim zâwk ang tih ka hlau tho bawk nen a chhuah zawk thu chuan ka chhânga.







“Ok a ṭha e, Puipuii teh a muhil em ni?" a rawn tihleh chuan a mutthilh thu chu hrilhin sana chu ka en zauhva, an chhûn chawlh lai a nih ka ring. “Um i u Cindy chu a rawn haw veleh min rawn be turin ilo hrilh dawn nia,ka dah phawt ange" tiin phone chu a dahzuia.







Buaina a awm tawh êm lovang chu maw?


U Cindy lah chu a rawn haw theih loh avâng chuan hrilh tur a awm der silo, a tâwpah chuan u John-a zâwk chu a rawn haw ta ngei a, inchhung a rawn luh rual chuan min rawn melhin a hawikuala.





“Ka nupui chu a la rawn haw lo em ni?" a tihchuan ka bu nghat ringawt, a hmêl chu a thinrim hmel bawk nen ka en rei ngamlo, ka khura ka tim dai ringawt, ka lama a rawn kal hnaia min rawn khawih rual chuan ka lo phu zawk zuia.







“I va hlauhthâwn hmel ve" a tihchuan ka en chho ha a, amah a sâng bawk nen a awm pawh ka chen ṭha meuhlo, ft 5'1 chiah tan chuan ani ft 6 chuang chu sang tak a ni ringawt, thawk la ham hamin “Hlauthawng love, u Cindy chu a rawn haw ṭep tawh ang" tiin Puipuii rawn kal phei mek chu lo banin ka pawma, a ni pawh chuan engmah a sawi tawh lo.







Zanriah pawh u Cindy chu kan eisan ta tawpa, Puipuii ka tih mut hnu lawkah rawn haw in a enga mah hma chuan u John-a chuan a beng sawk mai “Ka dawh tam tawk tawh che, nang hi i uire vêl a maw?" a tihchuan u Cindy chuan phâwk zetin a ena, a sam chu a thurin amah lah chu a pawr fap lehnghal.







Engmah sawilo chuan ka lo en ve reng ringawt “Chhuak ang che, Bawihtei tello in thil i sawi buai a nihchuan finfiahna tur ka nei ṭha tawk a nia, i chhûngte pawh engkim ka rawn hrilh ang. Kha chen ka en liam hrâm hrâm che a, i fanu i hmangaih a nihchuan i tuar ve ṭang ṭang tur zawk a sin, i duh angin ka ngaihsak lo che tih ka hria a. Mahse hetiang khawpa nasa hi ilo ni ang tih ka ring phalo" a tihchuan ka lo ngawi ve kar mai.









U John-a chet dan chuan u Cindy mai nilo keimah pawh min ṭhawng tel. “John khawngaihin min ngaidam rawh, nang leh Puipuii tello chuan ka awm thei lovang" a tihchuan u John-a chu a nui ro hawka.







“I uire lai kha chuan engmah i sawi loh kha tiraw? Nang hian min ngaihtuahna chhe te mah i neilo, va insiam rawh. In inah ka va dah ang che" ti bung nghut in u Cindy chu a melh run a, “Ka duh lo, ka chhuak dawn lo" u Cindy hmai chu a ri lehnghâl sawk mai.







“I chhuak khawp ang, i video hi mi zawng zawng hmaa ka pholan kher ngai suh se" a tihleh tâkah chuan u Cindy chu room lamah a lût hnak hnaka, a uire chu mak ti viau mah ila a chhuah dawn meuh chuan ka khawngaih hnuhnawh. Puipuii lah a la te bawk si.






A rawn chhuah leh chuan ngawi rengin u John-a chuan a hruai chhuaka, an reh zui ta vang vang mai. Ka awm a nuam lo takzet, miina ka awm vawi khatnaah phone vêlah chiah ka lo hmuh leh hriat ṭhin in uiresan tih vel ka tawng ta mai chu ania, mak ka ti takzet.






Sofaah chuan ṭhu in ka phone chu ka ena, engtik laiin nge ka lo mutthilh ka hre hauh lo. Ka hmai lum thar thar avang chuan harh zawkin u John-a nen chuan kan in melh ta chata, min rawn nuih suk mai.







“I va mutui âwm ve?" tiin ka bulah chuan a rawn ṭhu thla a, ṭhu chhuak zawkin ka in tuaimam nghal sawk sawka “U Cindy chu i va thlah ta em ni?" tiin ka zâwt sapa, a bu nghata, a mit a chhing vang vang bawk.







“Ka enkawl dânah hian thiamlohna ka nei nge, ka theihtawp in ka fa nu a nihna angin hmangaih pawh ka tum ve a, mahse atan chuan a tâwk zo lo pawh a nimahna" tiin a nui leh haka, ka lo en reng thung. A hmêlah chuan a lungngai ve hle tih ka hria.






“Nang i rawn awma, ka fanu lah i duat hle tih ka hria. A ngaina bawk che, mahse Cindy-i hi chuan naupang han chhawn chhaih leh tih dem dem hi a peih ve lova, ka hriatna a rei tawh" tiin a ngawi zui vang vanga, sawi ve tûr vak ka hrelo an nupa inkar a nia, keiin ka lo sawi ve vak kha a mawi ber lo.






“Ka kuah thei che angem?" a rawn tih thut avang chuan ka melh haa, min lo en reng bawk nen tihngaihna ka hrelo chuan ka lo bu nghat ringawt. Chutah a taksa lianpui leh lum thur thur chuan min rawn kuahin a thaw chhuak suai suaia, hahdam tumte pawh a ang.






Ngawi reng chuan a dara khabe nghatin a hnungah chuan ka beng thek thek ringawt. Keimaha danglamna eng emaw awm leh chuan mak ka inti viau mai.







“Mu tawh rawh ka ti buai lutuk palh ang che, tûnah phei chuan i buai zual sauh dâwn a nih hmel, ka ngen duh che chu min chhuahsan mai lo la ka duha, Puipuii bakah kei hian ka la mamawh dâwn chauh che a nih hi" tiin a kut ṭang sei thlurh chuan ka kut a rawn chelha, a thusawi awmzia chu ka hre chiang viau mai.







Ni e, a ni lah hnathawka chhuah reng a ngai dawna. Puipuii enkawl tur an awm dâwn hauhlo, a pite bula dah reng chi lah a ni dâwn bawk silo.






“Aw le, a pawilo a nia, muttui le" tiin room lamah chuan ka luhsana.


ZAWMNA.




A tuk lamah chuan u John-a nu leh pa chu thil chinchang hre chiang turin an rawn kala, tun hi an ina ka awm hnua ka vawikhat hmuhna an ni. Mi an fak lutuk chu ka lai zâwk lek lek mai, Puipuii lahin min nel bawk nen a nu leh pa chu an thaw huai tih a hriat.






U John-a chuan an nupa inṭhen chhan engkim chu a nu leh pa a hrilha, hrilh loh theih hek loh le. A nu leh pa pawh an chek tlak tlak mai, “Cindy chu a va mak ve aw, bawihtei lah a la te bawk si, engpawh nise hnute a nghei tho a. A ngaihtuahawm lutuk lo turah ngai ang, hei Feli nula fel tak in lo awm pui chu a vânneihthlâk mange" tiin keichu min fak luama.








“Ni e, nu zâwk ang mai a nih hi maw. Ka fanu pawh hian a ngaina viau a nia, a duat tu chu keiai mahin a duh zawk anih hi" nuisuk chung hian u John-a pawh chuan a lo ti ve bawka, ngawi rengin ka zak chu Puipuii pawm chung chuan ka kalsawn puia, inchung lamah infiam puiin kan nui dun hak haka.







Darkar chanve dâwn lai kan awm hnuah u John-a pawh a rawn chho nawlh mai, “In va hlim ve" tiin kan bulah chuan a rawn ṭhua, Puipuii pawh lo ding in a pa hmai leh a mit vel chu a kut te reuh te chuan chulin a pa mit chu a ṭham fuh bawk nen u John-a chu a ner deuh nanga, keiin chiang zetin ka lo en reng thung.






A hmelṭha zet chu hnamdang movie a a changtupa te ang mai niin ka hria, chutia ka lo en reng lai chuan rawn meng chhuakin ka mitah tak chuan a melh fuh ta chata, hnuailam ka melh va thung.






“Ka lawm e" a rawn tihchuan a ngaihna hrelo zet in ka ena, Puipuii chuan a pa sam velah chuan lo kek in a ni erawhin keimah chiah min en thung. “Kan pafa bula i la awm duh avâng hian ania ka tih, i pasal chu a vannei hle ngei ang. Nang ang hmeichhe fel chu tu mipa tân pawh neih chakawm hliah hliah i ni tlat" a tihchuan ka chhâng lo nangin ka lung erawh a phu dat dat mai.







“I zak em ni? Zah a ngai reng reng lo a nia, nang ang nula hmelṭha leh fel hi chuan pasal ṭha tak i la hmu ngei ang" a rawn tihchuan ka nui saka “Iti awm lo emai, bakah mipa hi hnaih mai ka tum rih lo, ka duhtak ka tawng te a nih loh chuan" tiin ka lo chhâng ve sapa, a laka ka rilru put dan erawh a dik loh zia hria in tihlan ka tum lo bur.







Keimahte chu ka inten lam lam, an nu in a uiresan chiaha, hmeichhia a ten viau mai thei tihlah ka hre ve reng bawk si. Ka kutah a rawn vawn avâng chuan phu zawkin ka hawi chhuaka “I mipa duh chu mi vânnei tak a ni ngei ang le, tûnah chuan nang pawh he inchhung a nu ber chan i chan rih a ngai a nih hi maw" tiin a nui hawk hawka, keipawh chu ka lo nui ve hak mai.









“Tiru i chhuk tawh ang u, khua a vawt dâwn ta riau mai. Ruah a sur hnai a nih hi, Puipuii a damlo palh hlauh a nge" ka tihchuan aniin pawmin kei in hma ka hruai thunga, ka hnungah chuan an pafa in an rawn inchhaih nui hak hak mai.







U John-a hna a kal loh avangin aniin Puipuii lo awmin keiin rawng ka bâwl mawlh mawlha, hla ka ngaithla pah bawk. An pafa chuan an thawm ve renga, a rei hnuah erawh Puipuii chu muhil in u John-a chuan eng zu nge pawh ka hriat loh hi a in mial miala, ka en reng ringawt.








Tam erawh a in hauh lo, “Phatsan ni ve ta la engtin nge i awm ang?" a rawn tih thut avang chuan in herin ka ena “Keichuan hmalam pan ka tum zâwk ang, min duh loa min kalsan tu chuan min phulo tihna a nimaia, an aia ṭha kan phu tihna. Mi pakhat avanga kan nun kan tihchhiat vek chuan kan lakah hnehna an chang tihna a ni dawna, chutiang tur te chuan ka duh teuhlo keichuan, hmalam pan tûrin ka in fuih sauh sauh zâwk ang" ka tihchuan nui hakin min rawn pan a.







A rui bawk nen eng thil nge tih a tum dawn ni, a ruih hi chuan ka nello riau , ka hmaa a rawn din lai chuan hlauthâwng zetin ka lo ena, a hrethiam nge ni “Min hlau suh ka tina dâwn lo che" ka hmai rawn khawih pah chuan a ti a “I hmelṭha takzet, ka nupui ni zawk la a ṭha tur" tiin min nuih leh a, sawi tur pawh ka hre ve lem lo.








Amah bawk chuan “Ka hmangaih miah lo ka lo nei hi ka inchhir reng dâwn chu a nih hi, Felfel min hlau em ni? Engtin mah tih che ka tum lo, mipa nep tak a nupui pawh ti lawm zolo ka nih hi, ka hmelṭha tawk lova, ka hausa tawk hek lo" ti a chhuatah chuan ṭhu in a ngawi zui vung vunga.








“U John chutiang in ngai suh, i hmelchhe hleinem chuan hna ṭha tak i neia, tluk lo tu che tam tak an awm ve bawk a sin. Hna nei miah loa chhûngte chawmhlawm tam tak an awma, chûngte chuan an thawh chhuah pawh nilo hmangin an in ti liana, nang erawhin nangma thawhrimna ngei hmangin tun dinhmun i thleng ania, mahni in sit lutuk tur a nilo. Kan tâna Pathianin a ruat zêl in a lawm thil hi thleng ṭhin, harsatna leh phatsanna te pawh hi a hnua kan hlimna a lo ni zawk fo a sin" ti ve sapin chaw hmeh chu ka suan zuia.








Ka inher leh tûr chu ka hmaa a lo din avang chuan phawk hra in ka en chho va, rawn kun hniamin min kuah ta thut nen ka awn deuh dawrha, amah lah a rit bawk si. “I hmelṭha lutuk" ti nuah nuahin a muhil zui nge a che in a ṭawng tawh lo hrim hrim, namsawn deuhin ka ena, a lo chatthla chu niin.







A rit bawk nen sofa lamah chuan ka theih tawp chuan ka phei puia, kal sawt lo tak chu kan ni, ka hah lutuk chu ka thaw hlawp hlawp tawh mai. A nilah a rit in a lian bawk nen ka tlu ṭep ṭep mai, a tawpah chuan sofa ah chuan mutthla hnawkin a ke vel chu ka hlan chho a, puan sin tirin ka en vang vanga, a nupui phatsanna chuan a tina ve hle pawh a niang, tûn hi ka awm hnua a vawikhat zu in ka hmuhna a ni.









A in tam hauh lova, a in ṭhang lo tih a hriatna chu a ruih hma danah hian a lang reng mai, ka pa kha zu in ṭhin a ni a, chuvang chuan keichuan hetiang lam in ṭhin emaw hi hnaih ka duh ngailo. Ka pa thih chhan pawh ani renga, zu avangin ka nu chu hmeithaiin hrehawm tak leh hah taka min châwm a ngaih phaha, keichuan zu hi in emaw zu in mi emaw neih ka tum lo bur thung.