Beisei ang ngeiin nalh taka a inchei a ngai. Ball a a inlan lohna pawh kum sarih chuang a ni ta
A thawmhnaw chu a man a to riau in a hria. Adrienne i thlansak a ni ve tlat bawk si a, designer thawmhnaw a lei dawn lo tih a hriat avangin a rukin a lo tihsak vek a ni. Jared tan a inkhawl nasa em em a, zan khat chauh atana insen vak a tum loh zia a hriatpui a ni
Tun hnaiah Julianne hian thilmak deuh deuh a tawng thei khawp mai. A thawmhnaw manto tak tak te hi Mason a nupui Abi pek a nih loh leh Adrienne-i leisak te an ni deuh nuk mai. Hetia an tihsak chang hian a lawm ve thei lutuk. Lei ngai lovin pawisa a khawl ve theih phah zel a ni
"Wow! Lal fanu i ang lutuk nu!" Jared a'n meng zau kawk in mawi tih hmel deuhin a lo thlir dauh dauh a
"Ka lawm e, bawihte" kun hniamin a chal ah a fawh sak a "Nanny hnenah kal rawh aw, i cousin te nen a lo awmpui ang che u"
"Ka lang nalh ve tho aniang a, naupang te hi an daw lovang" amah in a lo inbe mawlh mawlh a
"An daw lo reng alawm unaunu. Zanin hian nang aia chhelo an vang pharh ang" Gian chu hnung lamah a rawn ding a
"Lalpa le! Chu chu ka thil duh loh ber a ni. Zanin hian inhualna a awm dawn kha i hre tawh lovem ni?" Julianne-i'n a ti a
"Tu nge ni dawn a?"
"Adrienne-i unaupa khan inneih a sawm dawn alawm. An rilru lo lak pen chu ka duh miah lo ania" Julianne-i'n a ti leh a
"Lungngai suh. Chutiang chu a thleng lo tawp ang" Adrienne chu room chhungah a rawn lut ve leh a, a ni pawh chu mawi tak a ni
Zungbun chu mawi ti em em in a thlek deuh vang vang a, Starck thlah kal zelin an in rochun a ni awm si a tih te a ngaihtuah a
A rawn ṭhan len chhoh khan diamond tlereuh hi a ngah ve thei lutuk. A chhungte chenna ah a la awm reng ang. An hnawhchhuah tawh avangin engmah a chhawm thei tawh lova, a mamawh lem lo bawk. A tan chuan Jared hi a pawimawh ber
"Eng pawh nise, ka bengbeh hi i hawh thei reng ania" Adrienne-i'n box tereuhte a rawn phawrh a
"A ngai lo, Adrienne. Thawmhnaw pawh hi a tawk tawh viau asin"
"I inhmeh lehzual sawt dawn alawm"
Adrienne chuan duhthlan tur a siam sak lo. Box chhungah bengbeh chu hawngin a behtir a
"Aw, a nih a ṭha e!" Julianne chuan lehlam a beh chhunzawm a "Party zawhah ka pe leh dawn che nia"
"A ho lutuk"
"Chuan i unaupa chuan zungbun tur pawh chu a en miah lo tihna em ni?" Julianne-i'n a zawt a. Inhlanchhawn ang hi chu ṭha a ti tho a, mahse ama mimal duhdan ah chuan a tan ngeia siam, a pasal tur in a thlansak a nih phawt chuan plastic mai mai pawh nise pawi a ti lo nasa mai. Mahse chu chu a ngaihdan ve mai ania. Chu lo ah a duh ber a hloh tawh tlat si a ni
"Inneih zungbun hi Jin a pi ta ania. Eng pawh nise Vanessa Bernard chuan 'Aih' a tih ka ring lo bur" tiin Adrienne-i'n a hrilhfiah a
"Tinge? I unaupa chuan insiamṭhat tumna a nei lovem ni?" Julianne-i'n a lo fiam a
Gian pawh a lo nui a "A duh chuan a fel thiam viau in ka ring"
"Duhtawk ang u. Jin hmuh chu ka hlau ṭan riau. A hmel a ṭhat bawk chuan pasal ṭha tak a nih theih mai ka ring. Vanessa chuan duhthlanna diktak a siam tih a inhre mai ang" Julianne-i'n a ti a
"Chu chu a pawimawh ber hleinem. Jin hian sumdawnna lam hi kum sawmpariat a tlin hma aṭang hotel zatve deuh thaw a enkawl tawh a, sumdawnna a ko a a tlak lai khan panga na ah kan awm a, tunah chuan pahnihna kan ni der tawh" Adrienne-i'n a ti a
"Nang zawk Adrienne? I mo tur chu i duhzawng a ni em?" Julianne-i'n a zawt a
"Kan inhmu ve zeuh zeuh a....a zia viau chuan ka hria. Sum duh huam huam ang kha a ni lo chuan ka hria. Jin nen an inhmeh ang"
"I unaupa hian a thiltih hi a hrechiang maw?"
"Jin hian neih a tum chhan chu Starck Corp hmakhua a ngaih vang ania. Sumdawnna lam a nih hi chuan a tlangval rei hi ka ring lo ve tawp" Adrienne chu a meng kual ralh a
"Khumpui a kai pui nual dawn a nih chu a! A thawmhnaw a thlak kual zut angin hmangaihna pawh a semzai ngawt ang" Gian a'n a lo ti sup a
"Vanduaithlak takin a dik hmel tlat. Tu mah hmangaih tak tak hi a tum lo bur niin ka hria" Adrienne-i'n a ti chuai raih a
"Vanessa a neih chuan a inthlak ve maithei asin" Julianne-i'n tiin darthlalang ah a inen leh zuai a
Gian chuan a ban a rawn pe a "Kal dawn ila" a ti a
Party chu hotel ballroom zau deuh ah neih a ni a, an cheimawiin a hmuna kal te pawh nalh takin an inchei ṭheuh a. Julianne chuan lehkhabu hralh lawmna ringawt niin a ring thei lo
Adrienne te chhungkua pawh Justin a te chhungkua ang bawka hmelhriat ngah tak an ni. Jin Starck leh Vanessa Bernard an inhual dawn tih an hre lawk bawk ang a, vanessa te chhung pawh an kim khawp ang le
"Mi hmuh laia inhual chu a mak viau lawng maw?" Julianne-i'n a unaupa a hrilh ru ser ser a
"Mak vak lo vang. Anni ho hi chuan an tih ṭhin dan ania" Gian a'n a lo ti ve sup a
"Tuna an tihtur ang hi maw?"
Gian chuan lu a bu nghut a
"Nupui hual lawk i nei ve dawn em G?"
Gian chuan dar a chhin ak a "A ṭul dan a zir a ni ang chu"
"A eng berah chuan?"
"Ka nupui hual tur chu a hmelchhiat lutuk chuan ka duh lo maithei"
Julianne chuan na lo te in a beng a "I â em mai. Justin a chunga thleng ang kha i tawn ve loh hram ka beisei. Thilmak a thleng te a nih tawp loh chuan tihngaihna a awm dawn lo"
"Chu pawh chu a ni tho a, khuanu inrawlh a ngai bawk ang"
"Chutiang chu i tawn hram loh nan ka lo ṭawngṭaipui ang che, unaupa. I hmangaih ngei chu i neih theih nan duhsakna ka hlan a che"
Gian chu rawn nuiin a chal ah a fawh sak a "Ka lawm e, unaunu. I thinlung tak tak aṭanga chhuak a ni tih ka hre mai e"
"A ni reng alawm"
"Engtikah emaw Jared nena hmangaih em em tu che i tawn ngei ka beisei" Gian a'n a ti a
"Min ngaihtuah suh G. Tumah ka tawn loh pawhin ka hlim tho ania. Ka fapa neihchhun ka duat em em pawh inchungah lemziak in a cousin te nen an inkawm mek ang"
Gian chuan room kil lamah a hruai a, Adrienne leh Justin pawh an lo ding reng a
"I mawi lutuk" Justin a'n Julianne chu a rawn fak a
"Ka lawm e, Justin" Gian a'n a lo chhang daih
"Nang ka ti lo che a" Justin chuan mitko a san a, Julianne lam a hawi a "River Jefferson nena in inhmuh dan te chu i va sawi lo ve"
"I hriat ve a ngai lo" Julianne-i'n a ti deuh hmak
"Ti maw?"
"Ti nge i hriat chak em em a?"
"I boss ka nia, ka hriat ngei a ṭul alawm"
"Eng chungchang nge ni a, duhtak?" Adrienne-i'n hriat chak hmel deuhin a pasal a zawt a, Justin a remruat vek tih a chiang kuar mai
"Engmah a ni lo" Justin a'n a lo daw a
"Ian hi a lawm loh em hi. Engmah lo mai mai chu a ni lo tawp ang" Adrienne chuan palzam mai mai a tum lo chiang
"Hrilh rawh Justin" Ian chuan a lo tur sek a "River Jefferson nen sumdawnna thil ah inhmu turin min tir chhuak a nih kha, hmuh ngei ngei ngai angin i sawi tlat lehnghal"
Adrienne chuan ka hau in a lo en a "Suihzawm i..."
"River Jefferson maw?" Gian a'n lawm loh hmel zetin a lo zawt ve a, a unaunu thil lo tawn tawh vang khan venhim a tum a ni ber e. Amah chauhva a zintir vang khan a inthiam thei tawh lo
"Ti teh u a, engmah a nih loh kha. An inhmu ve a ni mai a" Justin a'n pawisawi loh hmel deuhin a han ti a
"Mi pahnih zanriah ei tura suihrem tum hi blind date an ti ṭhin Justin" Adrienne-i'n a pasal chu a hau ti tih a
"Awle, Awle. Nakinah sawi tawh zawk ang u. I chhungte pawh an rawn thleng dawn tawh ang" Justin a'n a tihsual chu a pawm ve ta a
A sawi zawh rual deuh chiahin nu upa lam deuh Adrienne ang tak leh a pasal ni awm tak upa lam tawh la hmelchhe lo tak hi an rawn lang nghal a
"Eng nge in an hlawm a?"
"Kan ṭha e, Mama. Gian hi i la hria em?" Adrienne-i'n a ti a
"Hria e a, eng nge i an Gian?"
"Ka ṭha lutuk e, Madam" Gian chuan Adrienne-i chhungte chu a han chibai a
"Hei hi Ian a ni e" Adrienne-i'n a hmelhriattir ve leh a.
Ariana Starck chuan Julianne a rawn nuih sang a "A tawpah chuan kan inhmu ve ta, bawihi. I fapa hi a duhawm reuh asin aw. A sawi ang chiahin i lo hmelṭha hle mai" a ti a
"Ka fapa in lo duat si a, ka lawm lutuk ania. In chhungkaw chungchang chu a ṭha lam bak sawi tur ka nei meuh lo" Julianne-i'n a ti a
"Mi hi a tihlim thei riau asin" Pierre Starck a'n a lo ti ve a
"Mama, in thil tih dan hi a fuh hle mai" Adrienne-i'n a nu chu a hrilh a
"Ni e Bernard ho tih beidawn kan duh si lova, Vanessa hi a mit a sang ve riau a" Ariana chuan a rawn hrilh ru ve sap bawk
"Khawnge Jin?"
"A rawn thleng ṭep ang. Vanessa Bernard kha minute sawm ah a lo thleng daih tawh a, hmanhmawh turin ka hrilh kha. A tlai chuan tum hmel an inhmuh maithei a ni" Pierre a'n a ti a
Julianne chuan Adrienne meng kual ralh chu a lo hmuh hmaih lo nasa
Adrienne chu mitmeng in a va bia a "In mo chu a khirh dawn hle mai' ti ang deuhin. A ni pawh chuan lu a lo bu nghat a
Adrienne leh Justin chuan Starck vua leh vang te hi an hre bel tawh bawk a, Julianne pawh chu an bulah a tal deuh chawt. A hriat ngai loh hlir an nih bakah an ṭawng hman a thiam ve bawk si lo
Adrienne-i'n ṭawng a thiam ve tawh zia a hmuh chuan Julianne-i'n a lawmpui ve khawp mai. Justin erawh hi chu a tet te aṭanga French hmang ṭhang a ni a, a bel tawh hle a, nakumah Jared a lo zirtir ve se a ti hle a ni
Julianne chuan chibai a sem zat pawh a hre seng tawh lo. Mipa te'n an lo melh hawp te pawh chu a hre lo der tawp
"River Jefferson a elpui tur an tam ania. Chet lak vat a ngai" Adrienne-i'n a rawn fiam sur sur a
"Eng nge a awmzia?"
"Justin nen kan bula rawn kal a, hmelhriat chak che an tam mai. I chhelo in i mawi ve em bawk a ni"
"A tu a mah min hmelhriattir hmain fapa ka neih thu kha lo hrilh hmasa zel la aw, an bo nghal duak mai ang"
"Awmzia a neih vak loh kha! River a pawhin a la beisei reng che a ni lawm ni?" Adrienne chu a meng de sawr sawr a
Julianne chu a thaw halh a, nau a pai thu a hrilh hnu pawha River a'n chhuah dun leh a duh thu a hrilh deuh roh kha a hrechhuak a
"Min chhuahpui an duh chuan ka fapa nen min pawm a ngai. Lak hran theih kan ni lo. Chu chu a tir aṭang an hriat a ngai. Hun khawhral hman ka ni lo"
"Chuan River chu eng nge i ngaihdan ni a?" Adrienne i'n a zawt a
Julianne chuan sam êt hian "A...A ṭha alawm"
"Ṭha ringawt maw? River hi a chhelo in mi hneh theihna te hi a ngah asin. I duhzawng a ni lo tak tak em ni?"
"A chhelo chu ka ti ve reng. Mahse i hriat angin ngaihzawng neih hi ka la inpeih lo a ni e. A felin kawm chu a nuam ka ti. Ṭhian anga en ka duh zawk. Nghah rih phawt ka duh a"
"Jared a pa kha i la hmangaih reng chu a ni em lo maw?" Adrienne-i'n puh deuh lek lek awki in a rawn zawt a
"Ssshhh..." Julianne i'n a ti sap a "I pasal hrilh miah suh. A thinrim leh dawn lutuk. Gian nen khan sawp hrep an chak dawn teh ania"
"Keipawh ka la lawm chiah lo. Mahse tun thlenga i la hmangaih reng a nih chuan mi ṭha tak a nih ka ring. Ka hre chak ve khawp mai"
"Mi ṭha tak a ni asin Yen. Kan inṭhen chhan pawh keimah vang ania. Ka kalsan daih a, chuti ni lo se chu kan la awm dun reng ang" Julianne-i'n a ti chuai raih a, a sawi zawng chuan a thinlung a na thar leh ngut ngut a
An khawvel chu inang lo hle in a cousin leh unaupa anga hausa pawh ni ve lo mahse Jared tan chuan a ding tho ang tih a hria. An khawsak a san vak loh pawhin an hlim dun viau ang
Julianne chu hmeichhe room ah a lut a, mipa ho in biak an chak zia pawh a hria. Mahse a rilru a pe duh lo. Paris a ngaihzawng neih leh chu a tum tawh lo bur
French nazawng zuna a uai chu a inring bik lo. Jas Mathieu kha chu a danglam bik tlat. Theihnghilh pawh har a ti reng a ni
A kut a sil lai chuan hmeichhe sam dun kawrfual rangkachak rawng inbel hi a rawn lut a, a nghawng chu V-line niin a taksa a lang thui reuh tawp
Darthlalang ah an mit a intawng fuh a, Julianne chuan a lo nuih sak a, chu nu chuan mitko rawn san in a inthuam dan chu a rawn thlek vang vang a
Julianne chuan a rilru in 'eng nge maw a buaina le?' ti rilru deuh chungin a hawisawn daih. A hausa dawn tih chu a rin thiam theih mai. Mahse a ni ai chuan Adrienne pawh a hausa daih zawk ang. A nu a hausak mai bakah a pasal Justin a hausa ve bawk a, mahse a chapo phah chuang lo. A zaidamin a ngilnei em em reng a ni
Julianne chuan bathroom a chhuahsan a
"Mademoiselle" Mi pakhat hian French ṭawngin a rawn bia a
Hawihhawm zetin a nuih let a "Tihpalh. French ṭawng ka thiam lova" hmanhmawh zetin a inher a, Adrienne awmna lam panin a tlan vat a
"Kha tah khan i lo awm daih elaw? Mipa hovin an zawng luai luai che a" Adrienne i'n a ti a
"Tak tak em ni?"
"Vanessa Bernard i'n mi mit fukna ber a ni lo tih a inhriat chuan a thik ngawt ang che" Justin a'n chhuan hmel zetin a ti a
"An inhual hunah mi in an en dawn tho alawm" Julianne-i'n a ti a
"Ka unaupa a rawn inlan chauhin a ni ang" Adrienne-i'n ngaihtuah hmel deuh lawm vak chiah lo hian a ti a
"A rilru a thlak aniang a" Justin a'n a lo ti a
"Ka unaupa hi ka hrechiang a, thil tum a neih chuan a kal tlangpui ngei ngei ṭhin. Thih leh dam chungchang te a nih tawp loh chuan! Sumdawnna ah pakhatna nih a duh chuan a rawn lang hrim hrim ang" Adrienne-i'n a ti a
"Vanessa chhungkua te chu eng nge an dinhmun?" Julianne-i'n Adrienne a zawt a
"Parukna aṭanga pariatna an ni a, kan inzawm ṭhat phawt chuan pakhatna kan ni dawn tih Jin a'n a hrechiang lutuk ang"
"Vanessa pawhin a hrechiang ngawt ang. I unaupa la rawn inlan loh vang hian a sa tawh dawn lutuk" Justin a'n a ti a
Julianne phone a rawn ri a
"Min lo hrethiam lawk u, phone pawimawh a ni maithei" Justin leh Adrienne lak aṭang inthiarfihlim in phone chhang turin a chhuak a
"Hi" a aw hriat ṭhan loh deuh hian line lehlam aṭang a rawn ti a
"Tu nge aw?"
"River a"
"Aw, a ni maw? Engtin nge ka number i neih a?"
"Justin a ka dil ti ta ila, i awih ang em?"
"I dil chu ka ring chiah lo. Amah zawkin phal deuhin a be lui che aniang" Julianne chuan thinrim der a tum a, mahse River emaw Justin hi a huat phah lem lo
"Ka dil ah ngai mai ang aw, he pa hi chu a ngaihna a awm lo"
"Ni e, ngai phawt mai ang. A nih tinge ka number chu i dil a?"
"Biak che ka duh a?"
"Tinge min biak chu i duh a?"
"Ṭhian kan nih tawh kha" River a aw zangkhai tak vang chuan Julianne pawhin a tum angin a hau thei lo
A nui ve huah huah a "I nuihzatthlak reuh e, Mister Jefferson. Tihsak theih che ka nei em? Nge ni a Asian lam sumdawnna chu in kalpui tawh zawk?"
"Awlsam deuh chu nise kan zo daih tawh ang"
"Ni e, i zo daih tawh ang. Kan hna hi kan thawk ṭha a, Justin hi a thilphal ania aw"
"Ka tibuai che em le? Thil tih khawmna hmuna kal i ang riau"
"Paris ah ka awm mek. Inhualna a awm dawn a"
"Tak tak maw? Tute nge a?"
"Adrienne-i unaupa ania. Mahse an la ṭan lo. Inhualna party a la ni chiah lo. Darkar khat vel nghah a la ngai aniang"
"A va mak dawn ve! An vaia hmaah Inneih a sawm dawn maw?"
"Za aia tam daih hmaah mawle" Julianne-i'n romantic a ti thei thlawt lo
"Wow. Hmangaihna tellova inhualna a ni dawn a ni maw? Engpawh nise ka be rei lo vang che" River chu a nui huah huah a
"Min rawn bia a, ka lawm e"
"Keipawh le. I ṭhian ber ka nih tawh kha aw!" a ti a. Julianne chuan a nui chhuak hak thawm a hria
"Bye"
"Kan inbe leh dawn nia"
Julianne chuan phone chu a han melh zui vang vang a, nidangah chhuah dun leh a sawm hunah pawh hnar har a ti viau maithei. An nih kher loh pawhin ṭhian anga en chu pawi a ti lem lo
River Jefferson hi Jared a pa theihnghilh nana a mamawh chu a lo ni mai lo maw? Hmangaihna hian zawi zawiin a rawn pan leh tihna a ni thei ang em?
Ballroom ah a let leh a, Adrienne leh tu emaw a hnungchhawn zawnga ding suit manto hmel tak ha hi an lo inbia a, tunge tih a hre mai lo
"Aw saw ta saw a rawn let chiah. Ian ka unaupa Jin Starck hmuh tir che ka duh a" Adrienne-i'n a ti a
Jin Starck rawn hawi Julianne i'n a hmu chiah chu an mit a intawng nghal chat. Hun hi a ding nghal duk ang mai a ni
Julianne chuan thawk harsa a ti khawp mai. An nunhlui te kha mitthla ah a rawn lang zut zut
Kha mipa hmelṭha tak....
Mitmeng mawi tak maiin....
Tu es ravissante....
Mon amour.....
J'adore....a tih lai kha
Jin Starck pawh amah ang bawkin a hamhaih ve vek. Julianne chuan a fapa nena an mitmeng inang chiah chiah chu a han thlir leh ṭhin. Engemaw sawi tumin a ka a ang zuau a, mahse a khaw hmuh a thim nghal sut
Jin chuan a rawn chelh vat a, nikhaw hre lovin a awm nghal
****
End of 6
CHHUNZAWM LEH TUR