STORYFB.COM

Ziaktu : Engtea Fanai
BUNG 5

Engmah hre lo ang maiin ka lut a, tikhan naupang mai ka ni lo tih chu a hre ve tawh ang chu, ka insiam sawk sawk a, inchei hi ka thiam lo , ka phak tawk leh thiam tawkin ka va inchei ve mawlh mawlh a, inchei vak hi ka ti thei lo, kekawr tight deuh hak te hi ka hne a, kawr te hi over size lam hi ka ngaina a, chutiang hlir chu tshirt ka nei, Hmeichhe kamis tih vel hi ka ngaina miah lo bawk. Google leh Youtube velah what to wear first date women tiin ka search a, ka inthuam duh zawng a awm loh mai bakah an dress ang chu ka nei lo hrim hrim. How To U hriata duh chi tia search mai ka duh.


Thawmhnaw hrang hrang ka phawrh hnuah ka dress \hin dan ngai bawkin ka chhuak leh a, Mahse hetianga chhuah hi a thawveng zawk a lawm, U hriata chuan min lo en vung vungin, I rei rei nen a ti sup, a duh angin ka inchei lo a nih ka ring, kan chhuah dawn chuan college ah I tom boy zuk ange aw atih chuan ka beng hrep, ka rawn kal peih lo tiin ka titau a, U hriata chuan ka uang mai mai a nih kha, hmuh I nuam daih zawk tiin ka banah a vuan a, ka kut chu a khur der der thei.
Ka duh tawka ka inchei tawh hi chuan ka Nu hian Patil i ang hi min ti chawk zel a, mahse a nuam ka ti zawk miau si a ni, nu hnâp an tih ang hi chu ka ni lo, pa hrâk nih lah ka duh chuang lo, ka nu lo va ka pa lo a ni mai.
U hriata nena kan chhuak tur chu ka phur rualin ka huphurh, date ang kha a ni ve tawh dawn a, A scooty a la chhuak a, kan inphur a, keimah bawk hian kan inhmeh ka ti, U Hriata nupui atan hian ka induhpui a ni ber mai.
Bazarah chuan kan lut dawn a, parking kan zawng a, lirthei an lo dah tlar put a, a chep ang reng hle a, beidawn tawpah a awl kan hmu hlauh a, tah chuan kan dah ve ta nghal a.


U Ruati Gift tur chu kan en kual a, a duh tur kan hre lo ve ve a, keilahin kalo hre bik bawk si lo, U Hriata phei chuan a hre lo leh zual, min han rawn ve ṭhin a, sawi mai tur ka hre bawk si lo, Puan lei sak tawp mai rawh, Nu a nia nga a inkhawmna vela a bih tur tiin puan chu kan zawng leh a, An puan neih zing a ato pawl tak chu lei sakin kan tih tur ber kan zo tawh bawk a, kan leng khawthawng mai mai a, Restaurant ah te chawlin thil kan ei a, thla kan la dun chhen bawk a, mi in date ang em chuan zei dun lo mah ila, kan induh tawnin kan thiam ang tawkin kan in hmangaih ve a, chu chuan hlimna nasa tak min pe a ni.


ka thil tur min leisak a tum erawh ka duh lo va, nakinah ka ti tlat a, a titau ve bur bur a, a inhmeh reuh phian , a titau ka vawi khat hmuhna, pa deuha a han titau chu ka lawm phian mai, dar 2 vel chuan in lam panin kan chhuak a, a scooty khalh lai chu kuahin a hnungah chuan ka bei hle hle a, vawiin hian hlimna tih thumal hlut zia leh chu hlimna hlimawm zia chu ka tem chiang khawp mai, hmangaihna mawi zia leh hlut zia te hi ka hre chiang uar uar a,.. Kan in kawng chu thui tak ni thut se ka ti ngawih ngawih, mahse kan veng kawn kan thleng a, Nu Rini min hmuh loh nan kan inthup leh nghal angai.. kan in lam chu pan thla in, i nu a lo haw vat dawn loh chuan ka rawn leng ang tiin an in ah chuan min luh san a, keipawh kan in ah chuan ka lut ve nghal a.


vawiin lam ka hun hman dan chu ngaihtuah letin tikhan ka lo awm zawk lo a ni tiin ka chek leh tlak tlak ṭhin..
Hun a her leh hret a, U Ruati pasal neih hun a hnai a, Mo Hruai pawh an rawn kal ta, U mami leh Anu pawh an kal a, keichu motor ruih ka hrat avangin U Mami'n scooty in ka phur ang che min ti a, ka lawm viau a, Mahse Nu Rini'n Zanah a lo be leh a, Motor ah ka chuang thei lo a ti tlat a, peih lo zetin sumo ah ka chuan angai dawn. Mahse U Hriata Nau chuan ka sumo chuang tur chu min rawn hmu a, Ehe.. Nu-i motor i rui nasa ṭhin an ti emaw ka tia, i chuang thei dawn emni , i umami nen in kal mai lo a nih kha a rawn ti lar lar a, christi chuan Nu Rini khan ka chuang thei lo, nangni chu in la ṭhalai zawk a rawn ti tlat a nih kha, a lo ti vat.


‘Aw, ani lah hi a,, nizanah U Hriata scooty a rawn chuan a beisei a, ka chuang dawn kalo ti tlat a, min rawn beisei ngam tawh lo a, nangmahni ah a ṭuan a nih chu, seling a an inkhawmpui pawn a zai tluan ṭhak a, a rui lo hrim hrim, a ti nghal bawrh bawrh a, lokal rawh, U Hriata nen inphur mai rawh u a ti chiah chu christi chuan weinch a lo ti nghal, christi sih zawk pah chuan a ngai lo, ka chuang thei mai ang ka ti nghal vat a, lalchristi lah chuan i chak em kha chuang mai mai rawh,ka buai pui peih lo che a nia a lo ti ve bawk a, U Hriata chu rawn kalin Bawihi kan kal dawn emni, sumo ho hi chhuah khalh ang a rawn tih chuan U Bawihi chuan hei,, Nui hi phur zawk rawh, a rui nasa ṭhin sia, sumo ah ka rawn chuang mai ang a tih lai chuan ka thinlung hi a nui ver ver a ni mai, u hriata pawh chu a lawm tih ka hria.


U Hriata chuan lo chuang se la ni mai lawm , kal nghal ila a tih zawm zat a, peih loh hmel tak chuan ka tho ṭuah ṭuah a, christi bawk chuan kal mai mai teh, i za zek zek tih ka hria, zuk che sual lo ula tiin min la fiam zui.
Tichuan ka va phei a, ka chuang ve mai a, Kawrtethawveng lam pan chuan kan chhuk thla ta a, kan chhuah tirh a, ni sa ut kha khua a rawn thim leh deuh khuih a, April thla lai hawl a ni a, ṭau thla thla laihawl a ni tawh avangin khaw chin hi hriat thiam a har a, zing lama khua a ṭhat ut pawh hian chhunah te a rawn baw leh huka chuvanga kal zung zung duh pawh kan ni reng a. Hunthar kan thlen thlak chuan U Hriata chuan ei tur eng eng emaw lei thla la” a tih avangin dawrah rei lo te kan ding a, tichuan kan tlan zui nghal ta vang vang a, kawng a nuamin U hriata nen kan ni kher bawk nen engkim mai chu a mawi vek mai hian ka hria.


Phunchawng kan tlan lai te chuan kawng kama April par vul tir te chu an mawi em em vek a, U Hriata chu en ve turin ka ti sek a, ani lah chuan pangpar mipa in an thlir dauh dauh ngai lo tiin a en ṭha duh mang lova. kan tlan thla zel a, kham pangah te chuan farṭuah leh vau an lo vul chuk a, Ka nu leh Pa te chu thingtlang chhuak ni mah se, ka U leh kei chu naupan tet aṭanga khawpuia awm kan ni a, kei phei chu Civil Hospitalah ka piang a Aizawl lo chu khua sawi tur ka nei lo. Thingtlangah hian ka la zin ngai lova, ka phur tak zet a ni.


Kawngah chuan ruah a hmi seng seng a, Lengpui kan chhuah san dawn chuan a rawn tam deuh tak avangin Rawpuichhip peng a bazar ah chuan kan chawl a, midang an lo la thleng lo a, a vawt ka tih deuh avang chuan U hriata chuan min rawn kuah a, ka melh zeuh a, kan nui dun sak a, tihian zin reng mai ila a nawm dawn hi tiraw a ti sup a, Um tiin kalo bu ve nghut a, kan thlenna tur te ka zawt a, IB ah thlen vek tur an ti a ni awm e, an hmun hma a rem lutuk kan pahnihin kan fang dun dawn nia a tih chuan , chak tak anga lang duh silo in ka phur ru hle.


Rei fe ruah kan nghah hnu chuan a h^n ta deuh a, kan inkhalh chhuak leh ta a, ruah a bang a khua a rawn thiang chho a, chhum karah ni zung a rawn in kham chhuak riak te chu hmuhnawm a tling a, khuarel mawina ngaizawng \hin tan chuan thlir dauh dauh tham khawp thil mawi a tling a ni, U hriata chuan min rawn kuah rawh tiin ka kut chu a kawngah chuan a rawn dah a, nui var var chung chuan ka kuah hle hle a, zin kawng hlimawm tak a ni.


Tlai lam dar 5 vel chuan Kawrtethawveng chu kan thleng a, rin ang ngeiin a khua chu a thawvengin a nuam viau mai a, tlak lamah zampui tlang dung a lang ut a, chhuah lamah Reiek tlang alo toh lur bawk a, a khua a faiin kal nawn fo chakawm tak a ni, an khaw luh tirh ah chuan U Ruati pasal tur chhungte leh a \hiante chuan min lo hmuak a, khaw luh chiah a, vei lam chho chu Forest IB chu niin chu lam chu kan pan a, min rawn zuitu te pawh an rawn thleng ve \ep a, kan in be reng bawk.
A hmun kan han thleng chho chu thing lian tak tak lo dingin a hring dup a, sava an chiar niah niah a, Aizawl khawpui motor ri leh khawl ri hrang hrang beng ti kiu vawng vawng thei ning taka kan ngaihthlak leh kan hriat reng laia chutiang rannung leh sava te chiar niah niah han hriat chu thaw a vengin a hahdam thlak hle a.


U Hriata te chu room hranah an thleng a, keini hmeichhe ho room hranah kan thleng dawn bawk a, kan intihfai ve ve hnu chuan pawna \hutnaah chuan kan \hu dun a, kan titi melh melh a, engtik niah emaw chuan hetiang hian kan pahnih avangin hmun hran hrana kan chhungte an la rawn kal khawm ve ang a, Biak In hawng ngeiin kan han inkutsuih ang a, Mo kawr nena ka lam I rawn pan tur te ka mitthla lawk, a tih lai chuan ka lo nui ver ver a, suangtuahna ramah ka cheng a, keipawh ka mitthlaah a rawn lang uar uar mai. suangtuahnaah ka cheng rei a ni mahna U hriata chuan “hey,,, I chak velo mi, min chhang ta che a tih chuan, chak e, ka mitthlaah ka hmu zui a, mahse I coat hak a \hing tawp ka tih chuan lawm loh hmel zetin nangma min thlan sak a niang chu a ti sup a.



chutia kan ti ti melh melh lai chuan Midang pawh chu thim hlimah chuan an rawn thleng ve ta a, sumo pahnihin an rawn in zui a, kan colony ho chu sumo pakhatah rawn chuangin an chhungte dangho sumo khatah an rawn chuang bawk a, kan ri chel chul a, christy chu ka va pan nghal a, a plan a rawn sawi leh nghal zung zung tawh a, Nu Rini leh U Mami pawh a hnung berah an rawn thleng, Nu Rini'n a phone a lo theihnghilh leh pek chu niin a han let leh lawk a, an muan phah ta ber a ni. U Mami chuan a ning hian kan ring khawp a.


Nu Rini chu a rawn ṭawng leh nghal phiar phiar a, midangin an khaw thleng nawm zia leh a hmun rem zia te a thawven zia te an rawn sawi nak nak laiin ani ve chuan kawng chhiat zia leh a mawng kham zia thu te, zin mai mai chi a nih loh thu te chu a rawn sawi leh par par a, christy nen chuan kan in en a, kan nui ringawt.


Moneitu lam te an rawn lang zeuh zeuh a, U Ruati chu a pa zawn tur te in ah thlengin keini chu kan zuk kal ve peih lo va, Ka Nu te leh ka U te ho chu an zuk chhuk a, eirawng te min lo bawl sak diam avangin a hman hman in chaw chu kan ei a, christy chuan enge kawng chanchin nui sak chuan a ti a, kei chuan rang zet hian a ṭha khaw luh dawn Darlak leh Tuidam in kar vel kha a chhia a ni mai ka tih chuan Mawli chu lam ka zawt lo che, U Hriata nen chuan a nuam em ka tia lawm a tih chuan ka nui suk a, e.. a nuam a ni mai, kawng kha a tawi mah mah a ni. film vela changtunu leh changtupa hi kan ang ber ka ti nghal zung zung a, ka sawi tui leh mah mah a niang, christy chuan a tawk, chu film chu ka en peih loh zawng tak a niang tiin za lo tih hriat tak chuan a nui lui a. enge min zawh teh vei tiin ka lo chhang mai a.


Chhungteho an rawn thleng khawm \ak \ak a, an rawn ri leh chul a, chaw te an ei nghal sawk sawk a, tih tur a awm lo nghal hle, mahni phone \heuh chu kan khawih malh malh a, msg a rawn ri tleng a, U hriata a ni, lo chhuak teh tih chauh a ni, a chi loh Anu te nen kan awmho vek , a ho em mai, ka zung dawn ti la lo chhuak lawk rawh a tih chuan chhuanlam siamin ka chhuak a, Building thlang \hutna an siamah chuan a lo \hu a, ka zuk \hu ve a, Enteh Arsi mawi zia khi, a lo ti nghal vat a, va \hu vein nia, a hahdam thlak tiraw, ka tih chuan , Um, tah chuan chhehchhawl bik kan awm lo a, a ti kher chu ka nuih a za bawk sia, ka ngei ru hle. Ka chum deuh taih a, ka kut lo man in a darah chuan min bei tir a, enteh,, hetiang renghian kan inngaihzawnna hi nuamin hlimawm se a ti zawi sap a.


Aw,, hetiang reng hi a niang chu ka lo ti ve mai a, Ni lo, nun hi a tluang ngai lo, tin inngaihzawnna phei chu a tluang reng ngai lo, Ka U te hi ngaihtuah la, kum thum chuang an in ngaizawng a, inrem hle tawh tur an nih laiin an inbiak tawh chuan an inhnial reng a, an in hau reng a, tichung chuan an inngaizawng ve reng tho a, a nawm loh hmel ka tih thei lutuk a tih chuan, Nia, kan thinrimna te kan inthunawn tawn anga, kan hlim reng thei em em ang, kan ngawi dun vang vang a. thingtlangah hian awm ve daih chi a nih hi tiraw, lehkha zir zo vat vat ila, hna dil ila thingtlangah min post se tah chuan innei daih ila.


Ka lo nui sak a, nia, ka chak, inhmun nuam tawk nei ila, kawt zawl zau tawk nen pangpar khawi \euh ila, kan kawt laiah chuan phul hring dup bawk se la, I office kal tur thlah chein, I haw lam lo hmuak ziah che ila, a nuam ngawt ang. Chuan U hriata’n a rawn tih chuan ih,, I rawn haw ve leh eirawng I bawl ang a, kalo mu ang a, kalo en char char ang che nga, ka tih chuan eheu,, ka va’n rethei dawn a ti sup a.


Aw,, min neih te chuan a ngai alawm, tiin ka nui ar ar a, U hriata chu a ngawi vang vang a nih chuan awmpui hlawh nangman min pek ve angai ang, tihpah chuan min rawn melh a, Aw,, pe dawn che e, nangman I hlawh ka kutah I chhung zel ang a, chuta \ang chuan ka pe leh mai dawn che a lawm kati chu a nui tawp hmuk a, Pasal a min neih pawh I tum lo, Sal a tan min duh a nih chu a ti deuh hmuk.


A titau ,a tum deuh hmuk a, ka va dek zeuh zeuh a, tichuan min lo dangin kan kut chu a insual tawn a, kut chauh chu a tawk tawh lo, inpawmin van arsi de sep sep hnuai, chu zan boruak thiang takah chuan duh thawh em em in kan infawp ta vawng vawng a. kan chhak a\ang chuan khuh kharh ri kan hria a, kan inthlah vat a, Christy chuan Lalnu I nu’n I va rei tawh ve rawn chho tawh rawh a ti , nui vur vur chung chuan a rawn ti a, U hriata chu hawi chhoh pawh a hawi chho duh lo. kan lai dun tak zet, christy lah chuan hmu fuh intih hmel tak hian nuam awm bik \hin a la rawn ti zui.
U hriata chuan lo han chho rawh nakin deuhah ka rawn chho ang, aw lawi deuh rat hian a ti a, I lai a ni maw , a ho lutuk christy a nih khi, lokal rawh chho ang tiin kan chho dun a, christy chu a nui tet tet a, hmeli I ninawm tiin ka nam sawk a, tlan chhiat pah chuan CPR in in pe ami a ti a, ka um nghal a, hmeli \awng thei suh tihpahin ka um a, U Hriata chu a lu tuai sut sut pah chuan a lo nui var var.


Ka nu chuan nangni pahnih lah hi awm hlei reng mai, mu rawh u, midang pawh an mut deuh vek tawh hi a lo ti leh khur khur tawh, Christy nen chuan khumah kan mu a, ka nu te ho chuan chhuatah mutna an phah a, kan titi char char a, U Mami chu rawn tho \uah \uahin in ninawm mu rawh u, in hmu ngai lo pawh ni hlei lo, tlaivara inkawm in tum emni a rawn ti vin hlar a.


Christy nen chuan kan nui ru tet tet a, kan inkhuh daih a, rei vak loah christy chu a muhil mai a, kei erawh ka mutna ka sawn hian ka muthilh mai theih ṭhin loh avangin ka mu meng kar reng a, chhuat lam lah an thlawk chhuak dawn ta emaw tih mai tur khawpin thawm a rawn chhuak a, a rawn nghawr leh dawr dawr ṭhin helicopter te nau hi a ni ringawt. muthilh luih tumin ka han chhing vang vang ṭhin a, mahse ka muhil thei chuang lo.
Chutia khuma ka mut men kar lai chuan phone vibrate ri ka hria a, rizai chu ka keu a, ka u chu a tho ṭuah ṭuah a, pawnah chuan a chhuak daih a, ani hi bialpa a nei ve tawh emaw ni le tiin an inbiakna ngaihthlak chu ka chak tlat a.. kan riahna building sir zawlah chuan ava ṭhu a, ka zui ru a, an inbiakna chu ka va ngaithla ta a, a aw ki aṭang chuan khawilam ngaihzawng mah a ni lo tih ka hre thei nghal.


Ka pu, ka din sak dawn lo che ka tih kha, engah nge kei kher min thlan, ka din sak lo ang che nga, chuan nangmah tibuai zawngin ka ding lo bawk ang a ti vin ṭhak a. lehlam aṭang chuan eng emaw an rawn sawi a, chu erawh ka hre thei lo,
“ kei leh ka chhungte hi min tibuai lo la a ni mai, khawngaihin ka inrawlh duh lo, a sumdawnna luh chilh ngat phei chu , ka Pu ka zah lohna che pakhat mah a awm loh kha, min rawn biak danin a zir lo a nih kha tih vel a ni, an ṭawng chu chiangin ka hre thei lo, Ka U chu tunlai a thil tawn hian a tibuai ru hle tih ka hria, hmanni lawk khan Heroin man a ni, hawng 50 vel a ni, an man sak chu Khawchhak lam mi chinzaLal tih a ni a, a hmel en reng rengin ka U vo khar khar ngam tur a ni lo, tu emaw lian tak an awm tih ka hria. chu chuan ka U hi chinzaLal tana ding tur chuan a duh a, ani kher a duh chhan hi ka hre lo na a, Ka U hi a hna a thawh ṭhat avanga an dahsan leh an ngaihsan, tin, mi dik an tih zing ami a ni ve a. chu mi avanga rawn thlang pawh an ni mai thei. eng pawh nise an thil man neitu chu mihausa tak chu a ni phawt mai. Ka U chuan vin fiah ṭhak hian, kan Inbei anga a ni mai lawm, dik lohna hi a chak ngai lo ang, i sum nge thil tithei dikna tiin phone chu a dah hmak a.


A rawn phei leh hma chuan ka tlan lut sawk sawk a, christy bulah chuan ka va inthawlh nghal vat a, christy chu a lo muhil tui hle, ka u chu rawn lutin a bula a chhawp tui chu a han lem khalh a, tichuan a ṭawngṭai a, a mu ta a ni.
Keipawh chu engtin tin emaw hriat loh karin ka muhil ve mai bawk a, ka harh leh meuh chuan kan mutna bul tukverh aṭang chuan ni a lo lut ut tawh a. Anu te leh midangho chu pawnah an lo che suau suau tawh 11 inneih programe a ni a, hmanhmawh vak ngai ka tih loh nen an hmanhmawh hlawm mai sia, Mahse kan awmna hmun boruak chu a thiangin zing kar boruak chu a mawi hle a, chawngzawng chu ka hmuh phak maiah chuan an sawt leh euh euh ṭhin a, sava hming ka hriat loh chi hrang hrangin ri hrang hrang an chhuah a, a mawi a ngaihthlak a hahdamthlak tak zet. Christy chu a meng reng tawh a, phone a khawih mawlh mawlh a.


lokal rawh a nula zawk kan mu mai mai a, saw tlangval leh nu leh Paho an che sup sup a ka tih chuan, ka tel loin tho ve mai la a la tiham ham zui. pawn aṭang chuan ka U aw ṭeng pawr chhakin a rawn au leh tawh, Laldinkim, rawn tho rawh u a rawn ti leh lar lar tawh.


Thawh angai a ni mai, ham bai bai chuan kan tho chhuak a, pawnah chuan U hriata te ho an lo ṭhu khawm laih a, Nui sang hian morning a rawn ti deuh dut, Christy chuan nizan kha a tih rual chuan a ka ka hup ngahl. henu hi nghal dawn tlat.. Nu Rini a chhun zo tawh a ni.


Hmai te kan phih a, kan intihfai zawh hnu chuan Pawn lama an che sang sang chu kan pui ve nghal a, U hriata te leh Paho pawh an che nasa hle, kum kha leh chen colony khatah lo awm ho tawh mah ila, hetiang em em hian kan awm khawm ngai lo a, Tuisem vel leh eng emaw a kan in len pawh leh kan inhmu tih loh hi chu a huho hian kan awm ngai meuh lo a, a nuam kan ti tlang ngang mai.


Chaw ei kham chuan reilo te kan awm hahdam leh lawk a, Chhak lam tukverh a\ang hian Nui rawn ti thawm ka hria a, ka hawi phei vat a, U Hriata’n mi hriat hlau tak hian min lo au mawlh mawlh chu niin, phur tak chuan ka chhuak a, a hmun vel hi fangkual ang, an sawi dan khan zaninah haw leh mai te kha an tia, a nih phei chuan hun kan nei vak dawn lo a nia a ti sur sur a.


IB leh a chheh vel ho chu kan fang kual ta a, Tlang pawnga awm a ni a, avel chu thing lian pui pui leh herhse upa tawh tak takin a hual vel a ni a, tlanga awm tih taka a khaw hawi a nuam hle nghe nghe a, insiam nan a la hma deuh hlek bawk a, kan chhak lawka saron par lo par vul chuk mai bulah chuan kan \hu dun a, kan titi dun sep sep a, eng eng emaw chhungkaw chungchang te kan sawi kai zel a, kei chuan tunlai U Mami awm dan mak ka tih thu te, a nun chu a hlim lo a, mahnia awm a duh ber ni maia ka hriat thu te chu ka hrilh ve mawlh mawlh a, A hna vanga buaina a tawh chung chang pawh chu chiang taka sawi loin ka hrilh thawi bawk a, U Hriata chuan theih tawpin kalo pui dawn nia, Mahse I U mami hi chu engmah buaina te sawi chhuak lo chi hi a ni ve a, Amaha paltlang vek tum chi hi a nia, a harsatna pawh min hrilh duh pawhin ka ring lo, mahse theih tawp chu kalo chhuah ang a, titi pui kalo tum ang a ti a,


Kan awmna zawnah chuan zo thlifim a rawn thaw seng seng a, khua chu a lum viauna a kan awmna boruak erawh thli a tamin a nuam tawk viau tho mai. Kan chhak lawk khiang kungah chuan Nauban eng hi a lo par bawk a, keichuan hawn ka duh thu ka hrilh chuan U hriata chuan a ho mai mai, tikhian a par na tur hmun dik takah khian par se la a mawi zawk, mihring pawh hi kan awmna tur hmun taka kan awm hian kan mawi mai , chu vang chuan Nangpawh hmun danga vul chuk tum loin, ka thinlungah hian par mawi ber ni reng la, ka mit hmuhah chauh vul la a tawk tiin a thusawi ngaihtuah zui awm ang pawha awm lo chuan a kal nul nul a. hepa hi chu a mak leh thut \hin.


Room kan zuk lut a, Christy te ho chu an lo insiam \an tawh a, keini pawh kan insiam ve nghal a, kan inthlak fel hnu chuan Biak In lam pan chuan kan chhuak ta a, Mo Neitu tur chu an khaw mi awm thei fapa a ni bawk a, Mipui pawh an tam khawp mai, khaw chhung hi kan la luh thlak pangngai loh avangin ka hmuh tum aiin a lo chang kang a, a mi chengte an polite em em mai bawk nen, khaw nuam leh inlungrual tak an nih dawn hi tiin ka phun sap a.


Kawrethawveng Presbeteryan Biak In ah chuan in neiin, U Ruati pawh a hmel\ha in an chei thiam bawk a, kan colony ho chuan kan hai dawn lek lek mai, Nu Rini pek chuan sawtianga Ruati pawh a chhuak thei a nih chuan Lalram nang phei chu I hmel\ha dawn lutuk pasal nei ve rawh a rawn ti chhuak hlawl, U Mami chu a nui suk a, Nu Rini hi ah a ti sup a, midang pawh chu nuih in sum tak chuan kan nui chhuak ve hak hlawm a.


Inneih prog. Chu a zo ve mai a, an khaw tlangval \hen khat chuan A U number chu an lo dil a, Christy nen chuan kan en a, kan nuih tet tet a, ama hrechiang lo tu te kiangah chuan a luck ve lutuk tiin ka U chuan kan sawi sa a, kan hlim pui phian mai, chutia kan titi mawlh mawlh lai chuan kil khatah hian Nula hmel\ha, thingtlang nula chu sawi loh khawpui nula hmel\ha karah pawh ding se a langsar nalh ang tih tur hian U Hriata chu alo be mawlh mawlh a, ka va hmu chiah chu ka \ek chhawk hi a ni mai.


ka thik nghal em em a, Christy chuan ka awm dan chu a lo hrethiam a niang, min nuih suk a, a hmelhriat te pawh a ni mai thei asin a tih chuan kawrteah hmelhriat ka nei lo a ti vek tawh ka lo ti bung nghut a, ka kut chu ka hum chawt chawt bawk a, U Hriata phone chu phawrhin number chu an la in pe zui, U Hriata lah chu a nui var var a, sehchilh deuh nuai hian Sawpa in lak nuih mawi zia saw, ka bulah saw tiang pawh sawn a nui ngai lo. ka ten lutuk, U hriata lam pan chuan ka phei nghal a, kal ang zaninah haw kan ngai engmah kan la insiam loh kha tiin ka va kai nghal. Chu nula hmelṭha zet chuan a hriatthiam loh hmel hle, U Hriata en pah hmel hlim sang chuan i nau emni a rawn ti zawi sap a,kei chuan tih el aw deuh hian A nau emni lo.. ka ti nghal vat a, U Hriata chu nui sukin, um ka nau a nih hi, ka han chhoh pui ang e, zanina kan haw loh chuan rawn leng chho ula, a la ti zui. ka kal ka ti hmak a, U Hriata chuan kan zui ang e, tiin min rawn um nghal a, christy chu a zah hmel ltk, ngawi rengin ka bulah chuan a rawn kal ve tawp.


U Hriata lakah chuan ka titau a, ka be duh miah lova, ani lah chuan min thlem a tum hek lo, kan driver lah chuan kawng a nuam lo sia, Naktukah muang marin haw zawk ang u a ti si a, keichuan haw vat vat kha ka duh tawh a, U Hriata lah chuan min tihel emaw tih mai turin nia, Scooty phei chuan zan tlan a peih awm loh alo ti ve bawk, U Mami chuan keichu zan haw intih chuan ka duh tho a nia, a lo ti ve thung a, Nu Rini pek chuan, Mopa chhung ten Zaninah rawn leng ula, thlai leh eng eng emawni hawn tur a awm ang an tia, keichu in lam khawm ka duh, naktukah eng mah kan ti hman tak tak dawn pawh a ni chuang lo, muang changin i haw zawk ang u a lo ti ve nghal phar phar bawk a, naktuk lama haw duh chu an tam zawk avangin thutlukna chu an siam fel a ni der mai.


U Mami chuan phone call a dawng leh a, phur zet hian a chhang a, aw.. rawn kal rawh u², zan lam pawh a rawn len theih dawn a nih chu ti a, a chhan chuan tlangvalin an rawn hmu ve dawn a nih ka ring kalo lawm hle, engtin tak inkawm ve ang maw, christy bulah chuan U Mami hi in leng a neih laiin a scooty dil ila, khua fang ang ka tih chuan , a phal dawn ami, a lo ti vat, ka dil chuan ka khalh thiam lo tih a hria, chuloah license min dil ang a, kum ka tlin loh avangin ka khalh theih loh thu vel a sawi vak ang a, a phal dawn lo lutuk, mahse nangman i dil chuan in leng a nei ve bawk nen , phal loh tawp kha nuam lo a tia nga.. chahbi a pe mai ang che. ka hre chiang ve tawk ka ti a. Christy chuan aw.. kan kal dawn nia,mahse inthlak vat ang, tiin kan pindan lam chu kan pan a.


u hriata chuan min rawn text in, vawiin chu khua kan fang dawn lo emni a rawn ti, Mahni U te ka len pui peih lo ka lo ti hmak a, i titau a ni maw a rawn tih chuan , i duh leh nula hmelṭha deuh kha len pui rawh tiin reply pawh ka reply zawm duh tawh lo va u Mami ṭhiante chu an rawn thleng chho ṭak ṭak a, an rawn smart hlawm viau mai, U Mami chuan alo chhawn vat a, ka rin ai daihin a zei, rimtu leh betu a neih ngai loh loh nen, IB chhungah an luh hnu rei vak loah chuan Kha Nula hmelṭhai leh a ṭhiannu pakhat chu an rawn lang ve leh ta, U Hriata chuan alo chhawn ve vat a, an nui dun var var a, a hmel chu a ṭha a ni, U Hriata nen pawh chuan an inhmeh tak zet, chhechhawl chu a ni ve lo tawp ang. thingtlang nula tih a han hmuhsit ve ngawt lah kei aiin a vun pawh a nalh zawk daih leh nghal.


Tlai lam ruai ṭheh a nih dawn avangin U Hriata chu chumi hma len pui tur chuan a rawn sawm a, an khua te fan pui a duh thu chu a rawn sawi siam siam a, keichuan ei loh hmel zet hian ka lo en reng a.
Christy chuan lokal rawh kan va dil tawh dawn emni a rawn ti vat a, kan hma lawka awm U Hriata te ho rum tawka melh chung chuan U Mami te lam chu kan pan a, christy-i chuan scooty chu va dilin, U Mami hmelah chuan a phal vak lo tih a hriat, mahse in leng te a nei ve a, khirh deuh nih kha a tan a mawi lo, fimkhur hle ang che u tiin chahbi chu a pe ve mai a, tichuan kan pahnih chuan kan in khalh chhuak ve ta a.


kan hlim dun ngang mai, an khuaa hmun mawi an sawi hrang hrangah chuan kan kal kual a, IB hlui lam pang te, High school ah te chuan kan kal zel a, mizoram a school compound ah chuan a mawi ber mai anga tih tur khawpin sikul hmun te lah chu an nei mawi a, U Hriata nena len dun ka chak hle, kha nu ching cheng khan engkim a ti bom vek..
Thla te kan la chuai chuai a, U Hriata chauh hmuh tur te chuan ka status a, ani lah chuan ka status lam reng reng a en lo, Chu-nu nena April par buk laih hnua an thlalak na chu a la rawn status ve zui, hepa hian inṭhen a ngam a nih hi ka ti deuh hmak a, ka insawh tau nghawng nghawng a ni ber mai.

TYPING chhiar a harsa deuh a nih pawhin min lo hrethiam ula chutih rual chuan tihsual lian tham te a awm a nih chuan min hrilh hreh lo bawk dawn a nia.
Show post links
Top