KA LALPA BY MAWITEI BAWITLUNG (Completed)

[mawitei bawihtlung]

KA LALPA




CHAPTER 6



Hna kan ngah avangin zân lam thlengin office ah kan awma, chuti chung pawhin tih tur a tam ngei mai. Thanpuia lah kut inthlak chungchângah khân station lamah a kal a ngai bawk si, ka mut chhuak lutuk chu ka muthlu leh lawp lawp ṭhin. Ka nau pai vâng nge ka hrelo hetiang em em a ka mut a chhuah ni.




Thawk la ham hamin ka zi mar leh ṭhin, mahsela a sâwt lo ngei mai. “I la thawk animaw?" Thanpuia rawn let chuan a rawn ti supa, ka dar vel chu min rawn hmehsak nghal zat bawk. “Ka chau lutuk, Te ka haw tawh mai dawn ka menglui thei tawhlo" ka tihchuan a bu nghata.





Pâwnlam pan chuan inzui chhuakin a cara luh mai ka tum chu hmeichhe lo ṭhu avang chuan ka tawp chata “Tunge?" ka tih lai chuan min rawn en zawkin “Lawmteii a nih hi i rawn lut dawn em?" a tihchuan ka tawlh hnung nghal dat mai.



A bialnu a ni ang tih ka ring nghal, chuan riahpui a tum ngei bawk ang chu. “Aih keimahin ka haw mai ang, ka kal ange" tiin kal mai ka tuma. Ka kut chu a rawn vuan nghal chat “Tinge i danglam riaua ka hriat chu le, ka ṭhianpa nau ania ka thlah haw lawk dâwn a nih hi" a tih pawh chuan engmah ka sawi tawh lo.




An hmel ka en hian a hmeichhe awmdân saw ka ngeih miah lo bawk, Thanpuia a enna mit chu a hmeichhiatpui ka nihna angin ka hrethiam vek. “Kan riak dûn dâwn ti law law zawk rawh, ka kal dawn" tiin a kut chu ka thingthla lui leh ngata “Ni e, a u a awm rih lova. Ka inah chuan a rawn awm dâwn ngei alawm, i duh chuan min zui haw ve thei ang" a mi tihdan chu ka lâwm hauh lo.




“I nupui emaw i bialnu pawh ka ni chiah em tih pawh ka hriat loh lai hian zui haw che chu ka tum tawh ngai lovang, mangṭha" tihmakin taxi lo din ṭhupna lam chu ka pana “Khati khân min mangṭha ringawt suh" engvanga min rawn umzui leh zel nge maw a nih le.




“Ka be peih lo che, a duh chuan chhungte an nei ve ang. Chhûngte neilo tur a nilo, riahpui i châk vang a nih kha, i tan te chuan hmeichhia hi engmah kan ni reng nâng, kei office ah buai em ema ka awm laiin nangin hmeichhe dang ilo phur mai mai thei ania" tiin ka namsawn dawrha, taxi ah chuan lûtin driver chu tlan chhuak turin ka hrilh zuia.




Thanpuia pawh chuan min ûmzui a tum tawh bik lo, ka thinrim lutuk chu ka inseh ruh ṭun mai. Alaka ka thikthu chhe ta lutuk pawh chu ka inhrethiam;  ni e,ka lo duh tawh mah mah ani e.




A tuk lamah pawh be duh miah lo in ka hna ka khawih char chara, min be reng mahse vawikhatmah ka chhâng lo. “I lungawi loh chuan min hrilh mai la, khatianga awm kha a ngailo, i boss ka nih hi" ka bulah rawn dingin a rawn tihchuan ka nuihsak ringawt, ka phone chu enin min rawn betu mipa ho chu ka chhâng lui ve ngata.





Amah ka melh duh miau loh avangin a thinrim hle bawk “Miriam Lalrosang" dawhkân chu a rawn beng ri ṭhuaia, ka phu nasa bawk nen ka lung chu a rawn ri nghal dawt dawt mai. Chutah mit sulhin engmah ka hre zawm tawh lo.




“A naupai lai a nia a lung lam ti buai thei chiin thawm siam loh hram in tum dawn ania. A taksa hi a chak ṭha heklo, thisen a neilo viau bawka, i enkawl ṭha dawn ania" chu aw ka hriat rual chuan muangchangin ka meng chhuaka, Thanpuia leh Doctor lo in be mawlh mawlh chu ka hmu nghal.




Khuh kharhin ka ṭhu chhuaka, Thanpuia chuan a hriat rualin min rawn hnaih nghal ruak mai. A hmêlah chuan hlim hmêl emaw, lâwm lo hmel pawh a lang chuang lo, a pângngai thlup reng ringawt.




“Nau i pai tih i inhria em?" a rawn tihchuan ka lo bu nghata, chutah a thin a rim leh thut nge “I zêp amaw?" dawhkân chu a beng ṭhuaia, ka phu nasa lutuk chu ka thlawk lo chauh ani. A inthiam lo leh si nge thawk la suai suaiin a chairah chuan a ṭhu thla a “Innei turin lo in ring ang che" ka mengphawk ngei mai. Ka nei thei dâwn em ni? Lungphu chawlin ka thi lovang tih pawh a sawi theihloh.





“Ka duh lo boss" min rawn melh rum ṭha fia fia viau mai, bomb chu ni se a puak dur tawh ang. “Engvang chuan maw i duhloh a?" tiin min melh runa, ka nui sak mai “A tam mai, i thinchhe si, i thinur apiangin kei leh ka naute hi kan thi nawn awn awn ang tih pawh a hlauhawm, bâkah i induh si, i luhlul bawk. Sual awi a chhe lam zawng zawng i nei kim vek, chuvang chuan neih che ka duhlo" tiin ka en lêt kara. Nidang ang chu nise ka en ngam kher pawh ka ringlo, mahse tûnah chuan ka naute tân tih hria in ka inti huaisen lui tlat thung.




“Ka in siam ṭha ang, naute chu i hring ngei tûr ani" a tihchuan mak ka ti viau, miin nupui neih chu sawiloh fa tak ngial pawh a neih duh an rin loh thu an sawi ṭhin kha dawt vek em ni zawk? Engpawh nise tûnah chuan ka pawm phawt mai angai ani, kalna tur dang ka neilo tlat.





“Hmeichhe dang i hmuh reng dâwn ai chuan tih tlâk pawh ka duh zawk" ti tla duh lo mah ila amah vau nâna ka hman loh chuan hmeichhe dang hmu reng turin ka duh lo, bâkah nupa nih hi thil awlsam leh namai lo tak a ni a. A hnu leh thil tur nên ka ngaihtuah tel lo thei lo.





“Nizan a mi kha chu ka ṭhianpa nau a ni ka tih tawh kha, khawih pawh ka khawih lo tih hre rawh. Nang nen kan mut dun hnu aṭangin tu hmeichhia mah ka mutpui lo nangmahah ka lungawi ka ti che a ni lo'm ni?" a thusawi zawm tur chu a hmui ka hup sak vata, Doctor a awm ve reng si engvanga frank lutuka sawi phawng phawng nge maw a nih le? Mawl lutuk mai.





“Insum ve rawh, mi zawng zawng hriata kan mut dun thu kha sawi kher a ngai lo" ka tihchuan a kut chu la sawnin a khabe chu a tuai zauha, “A ho lutuk, Doctor ania i rai tih a hre reng a lawm. Tin, kan inneia i pum a rawn lang a nih chuan kan mu dûn tih chu an hre vek tho tho dawn, zêp tum mah la i zêp thei chuang lo ang" a rawn ti hmuka.





Fiamthu thawh miah lova ngeiawm lutuka ṭawng hi engtin nge a thiam zawk ni? Hetiang em ema ngeiawm mai, chhang duh tawh lo chuan khum aṭang chuan thawh chhuah ka tuma, a ni nena inhnial reng pawh hi ka peih lo.





“Enge tih i tum? Khawiah mah kal tum hlek suh ang che" a tih leh chuan ning zet hian ka ena, vuak vak ka châk lutuk “Ka duh duhnaah my thute lo ziang" ka pawih ṭawng thiam ve chhun chu ka hman ve ngei kha, a thiam lo tih ka hre ve kur bawk “Mipa lerh deuhte bulah hian ka awm ve peihlo a, chuvang chuan ka inthiarfihlim dâwn a nih hi, an lerh hri te ka kai ve palh ange" tiin ka in siamṭha sat sata.





“Nangmah avanga damdawiin awm ka ni bawka, pawisa chu lo pe mai rawh bye bye" tiin ka kut vai chuan rang zetin ka chhuaka, kawngka ka hawng ka chhuak fel chiah tihah “Ding rawh" a rawn tih tuar avâng chuan chak zetin ka tlân zuia, ka au phei tuar tuar bawk.




Hmelchhe lutuk, a duh duhin min ti tawh nguar ang, min rawn ûmzui lo tih ka hriat chuan ka thaw huai mai. Mi kârah mawl lutuka awm a duh dâwn lo tih ka hre ve kur bawka, nui var varin thawveng zet chuan ka kal hah haha, damdawiin pawh hi mi hausate tân chuan an fel a nih hi, retheite tân erawh tun angah kan Mizoram damdawiin hi chu a thawktute avâng in a khât tawk hian hming chhiatna an nei deuh reng chu a nih hi.




Inzai hlum tam ta lutuk te hian Mizoramah chuan inzai tur kher kher chuan ka ngam pawh ka ring lo e a.


THANPUIA POV..TI LAWK ANG A NGAI TLAT.



“I bialnu chu a dangdai zek zek hle mai" ka dara rawn ben thuk thuk paha ka ṭhianpa in a tihchuan ka tum hmuka, Lalrosangi awmdân dangdai ṭhin lutuk hian min tih lâwm loh châng a tam, thil hrilhfiah ve pawhin a awih duh der silo.





Ka ṭhianpa nau kha a thik tlat tih lah ka hailo, khatiang naupang mai mai kha engvanga ka duh ring tlat nge maw anih ni. “Engpawh nise naupai lai chuan hmeichhia chu duat an ngai a nia, i bialnu phei chu kha enkawl thiam a ngai dâwn a nih kha, amah kha a thawven hmêl nasa sia, mi nau an pai chuan inneih loh chuan an rilrute a hah a ni ngai a, i bialnu ve thung te kha chu a naupai khân amahah nghawng a neih hmel loh" a rawn tihleh chuan chhâng lo mah ila ka ngaihdân chiah a ni.




Rilru hahna emaw min han tlawn tumna lah a nei hek lo, hmeichhe dang ang chu nise min neih theihna tur hmanruaah an hmang duh hial ang chu. Hmeichhia ka lo kawp ve nual tawha, Mira-i anga dangdai leh mi pak huam lo hmeichhia ka la hmu in ka la tawng ngai lo, a dangdai leh lutuk hi a mak zâwk.





Ka fa hial a pai chungin tûn thleng min hrilh lo ania, thidang lo phei se chuan ka hre tawp nang. Engpawh nise a tlân haw ringawt pawh chu mak tihchi a ni, natna khum aṭanga tho chhuak chiaha thawveng lutuka tlân vâwk vâwk an vâng viau ang chu.




Pawisa chu pe in ka chhuak zuia, tûnah chuan enkawl hi ka tih tur a ni. Nupuia neih ka lo tum rilrûk lai taka ka fa a pai chu ka thaw huai bawk, min hnialna tur a nei hauh lovang le? Ka thinchhiat thu a sawi erawh a dik ka ti ve tho, insûm hman lo hian ka lo vin leh ṭhin.




A chhan pawh he dinhmun thleng tura ka beihna kawngah hian buaina ka tâwk nasa bawk nen ngaiah ka nei a ni ber mai. Tûn aṭang chuan ka insûm ve deuh tawh chu a ngai ang, fa ka nei dâwn a nih chuan tih fahrah ka duh hauhlo bawk.




Ka tello in a enkawl thei dâwn tihchu ka hria, mahse he hmeichhia hi hmeichhe dang ka endan nen a inang lova; chu tak chu ka kal tîr phallohna chhan a ni bawk. Ka hnêna a thawh tirh kha chuan a lan dân bawr chhawr zet avâng khan hnaih tumna ka nei ngailo; mahse kha zân rui zeta ka khuma a taksa lang var phak nêna a lo mu ka hmuh aṭang khân min ti danglam nghal a nih kha.





A sam ro hmêl zet ang aiin a taksa nem thep leh a hmui fawh nuam zet avângin tûn thlengin ka la thlah thei lo. Ka mutpui nawn fo reng a nih kha, a nilah min hnar tum mahse kan in mamawh tawnna a hai thei bîk lova, kan chesual leh nge nge ṭhin.



A in lam pan chuan ka inkhalh chhuaka, a naupai vang em em pawh nilo in ka ngaihtuah riau mai. A thisen a tlêm an ti bawk nen dawrah pêng kawiin thisen siam thei chi thei leh in tur lam chu ka lei saka, duat taka enkawl a mamawh chuan theih tâwp ka chhuah ve mai ang chu.

End of Thanpuia pov...




Veng dang aṭangin ka mi biak pa a rawn lêng bawk nen in ka thlen hnu lawkah a rawn thleng ve kha ania, thingpui vêl chu siamin ka chhang leisa nen chuan ka chhawpa, kan titi pah mawlh mawlh bawk. Thanpuian min rawn ûmzui loh dânah a fa ka pai chu a ngaipawimawh tak tak ka ring lo.




Bialpa ka neih leh neih lohte chu min zâwt a, ka chhâng lem lo. Nau ka pai thu hrilh ila chuan min tlânsan nghal nal nal duh ang chu, ka kawngkhar a rawn rik karh karh avâng chuan tho chhuakin ka va hawnga, tu tak chu ni ang maw? ti a ka ngaihtuah laiin Lalthanpuia chu a lo ding run a nih chu!





Eitur eng emaw ni hi ala khai ṭeuh zui “Enge i rawn tih dâwn?" ka rin loh lutuka a rawn lan avâng chuan ka hamhaih ngei mai. Nilo inlêng ka nei bawk si, mipa dangin min en ringawt pawha a awmdân ka hria a, buaina a chhuak ngei dâwn anih hi.





“Ka rawn kal anih hi i hmu ve reng lo em ni? Saw saw tunge? Mipa ilo awmpui vêl amaw?" a ti leh ta renga. Ka en nghal kar chu a thinrim hmêl ka hmuh avâng chuan ka khur ru leh der der tawh “Kan inhriatna a la reilo, min hmuh a chaka a rawn lêng a nih saw, lo lût rawh" tiin kawng chu ka kiana.





Ka in luah a te bawk si nuamlo ka tiru takzet “Miriam hei hi tunge a? In lêng i neih belh dâwn a nimaw?" Aldrin an a rawn tihchuan ka lo bu nghata, ka chhâng dâwn chiah tihah “In lêng mai nilo a bialpa ka nih hi, kan innei ṭep tawh bawk" Thanpuia chuan a lo ti nghal hmiah mai.





Aldrina hawi hai lutuk chu ka khawngaih zâwk, tinge hepa hi a hun lo ah a rawn lan reng mai le? Mahse a rawn lan hun hi atân chuan a hun mah mah zawk a ni, dawite hi a thiam te a ni hial lo maw?




“Bialpa a, Miriam min va hrilh lo ve?" min dem hmêl lek leka a rawn tihchuan ka dar ka sân aka, “Min zâwt hleinem" ka lo ti liam puat a. “Ka lo va in thiar fihlîm ange" a tihchuan dan pawh ka tumlo, a chhan chu hepa hian a insualpui leh duh mai ang.




Engmah sawi tawh lo chuan a chhuak zuia, keipawh chu ngawi rengin ka che nghal mawlh mawlh a. Kan thil eina vêl chu sengin thleng silna ah chuan ka daha, “Dah rawh, i châwl hahdam ang chu tihlaiin engvanga in leng te lo nei nge i nih?" lâwm lo zeta a rawn tihchuan ka thaw haka.





“Nula ka nia ka nei ve bawk ang chu, nangpawh i ina riahchilh tu hial i neih si, a nuam hawr hawr bawk em?" ti ve sakin ka en chho ve haha, zâm ka tum bik der lo. “Nula ini lo, ka fa i pai tih i hria em? Ka fa kha i pum chhûngah khân a awm tih i hre lo em ni? Kha thil kha sawi reng suh, a khawih pawh ka khawih lo, a chhûngte an awm loh avangin ka riah tîr mai a nih kha" tiin ka dar tawn tawnah chuan a rawn vuana.





Huh. Chhuanlam leh bawk, awm sawn ka tum lah chuan a phal bawk silo “Kan innei ang ka tih kha hre reng ang che, dan khatna kan tlin lo tihchu i hriat kha. I ṭhiannu kha lo sâwm la, ka inah kan innei ang. Engmah sawi buai hlek suh, mi hriat chiam pawh a ngailo, ka fa tih fahrah ka duh loh avâng chauh a ni tih hria ang che" a tih duah chuan ka lâwm lo takzet.





“A ṭhat chu, i tello pawhin ka enkawl thei, rawn in rawlh chu tum lo mai teh. Chutiang lek turin ka duh lo, ka fa hi ka bulah a awm ngei bawk ang, haw rawh; ka hmu peih lo che" tiin kalsawn ka tuma, min rawn chawi lâwpin a malah chuan min ṭhut tira.





“Mi hriat tam ka duh loh mai avangin inneihna holam lutuk ka duh turah ngai suh, ka nupui i ni tihchu tupawh in an hria ang. Mahsela, a hun hma a mi hriat vak ka duh lo tih hre bawk la, in enkawl ṭha ang che, i hahdam a ngai tih hria la. Khatianga i awm reng chuan i luhlulna hi kan fa in a chhawm ka duh hauh lo ania" dam deuh zâwk chuan a rawn ti a.




Doctor thusawi te kha zawm ve a tum pawh a niang “Keipawhin i thinchhiatna hi chhûn se ka ti hauh lo tih kha hre mai rawh, i hmel ka hmuh ringawt pawh hian min ti luakchhuak hlui thei. Min thlah rawh, keichuan ka hmangaih leh min hmangaih tu chiah neih ka tum" tiin ka tal fat fata.





Min duh vâng pawh nilo va naute avâng chauha min nei tur anga a insawi chuan min ti lâwm hauh lo. Ka thin a tirim mah zawk, kha chen kha kan inzui ve a ka taksa bâk a lo duh miah lo a nih dâwn hi.





“Khatiang in ngai kawi zêl suh, duh lo che ila hei chen ka thlenpui lovang che. Neih che pawh ka tum kher nâng, hmeichhia ka nupui nih duh chu an tam alâwm, chûng chu duh ila nang hi ka nei kher lovang che. Ka duh che avângin hei chen ka thlenpui che tih hria la, khatiang ngaihdan maksak lutuk kha nei tawh hauh suh ang che " tiin ka chalah chuan a rawn fawp vang vanga.





Engmah ka sawi tawh lêm lo, thinrim khum reng ka duh bik lo nen ka ngawi ta tawpa.



“Ei tur ka lo ken che hi i ei dâwn ania aw; lo ei ngei ngei ang che. Inneihna ka lo buaipui ang, ina in kutsuih ka tihna chhan pawh i tân tih hria la, hmelhriat zawng zawng kan sâwm khân i mualpho theia, dan hnihna a innei kan ni tih an hre vek dawna. Inneih ni a an sawi sêp sêp tur che i ngaihthlâk duh ka ringlo" tiin ka hnungah chuan a chûl hauh hauha.





A sawi chu a dik ve tho, la hre tho dâwn mahsela inneihnia awm nuam lo rawih khawpa min lo sawi duh an awm leh ngei dâwn si a, chuvang chuan a ruahmanna chu ka pawm phawt mai ang chu.




“In uiresan tih vêl ka duh ve hauh lo ania, inṭhen pawh. Ka dinhmun i hria, inṭhen leh mai mai tura inneih ka duhlo, i rinawm ka phût bawk. Hmeichhe dang kan inneih hnuah i hnaiha ka hriat chuan ka fa hi min chuh theilo ang tih hre reng ang che" tiin ka sawi chhuak fak faka.





Ni e, innei pawh ni ila a chhiatloh bâkah a hausakna avâng ringawt pawh hian hmeichhe tam tak tûn ang laia mi pasal chhuhsak mai hrehlo an tam tawh si a, pasal pawh hi neih fimkhur angai rêng a ni.




“Ka tiam a che, mu leh phawt teh. Tin, midang hmaah khatiangin tlân vak tawh suh, nau a la te a, i chhiat mai ang tih te ka hlau a nia" a tihchuan ka nui saka “An sawi dân che chuan nupui leh fa tih lam i ngaihsak ngai loh thu an sawi si a" tiin ka en chho a, a khabe kual nalh zet te chuan a ti pa hliah hliah mai.





“Tûn hma kha chuan hlawhtlin tuma ka beihna avâng khan ka ngaihtuah ngailo reng a ni. Ngaihtuah hman lah ka ni heklo, engkimah ka chhûngkua ka dah hmasak a ngai tih ka hria a, mahsela tûnah chuan a hun ve tawh pawh a nimahna. Rin loh ber zunah ka uai ta lawp lawp chu a nih hi" a tihchuan ka lei ka chhuah zauha.




A thusawi dân chuan sawi tur min ti hre mai lo, mahsela ka hlim em em tho. A âwmah chuan bei chialin ka thaw hle hle a, a kut ṭang sei thlurh leh hlai hlap maia ka pum zâwna a rawn khawih chuan ka phu zawka, ka awmdan chu min lo en reng thung.





“Helaiah hian ka fa tetakte mai chu a awm mek a ni si a, ka awih lo lek lek mai. Tihian a rawn ṭhanglian ngei dâwn sia" tiin a nui suk suka, chu chuan kan fa chu a duh ve tak tak angin min ngaih tîr bawk. A tîrah khân hrilh ka hreh em em kha a nia, tum loh lamah hre chhuakin ka rin dan loh ang deuhin ala awm zui.





“Tihian Pathian zarah a rawn ṭhang zel anga, ka dul hi a rawn tawn lian zêl dâwn a lawm, a ṭhanglian lai i hmu châk em?" ka tihchuan bu nghatin ka khum lamah chuan min phei puia.





“Muhil ang, keipawh nizân lam ka mu ṭha lo riau, ka biakna i chhâng duh bawk silova ka awm a nuamlo zankhua a nia, tihian mut dun ka duh" tiin min kuah nghet sauh sauha, engvanga ka biak loh mai avanga mu theilo kher nge maw a nih ni.





“I ti mak e a, engvângin nge i mut theih loh ngawta? Ka tello pawhin i mut ziah kha, hna kal i tum tawh lo em ni?" tiin ka zâwt zuia, “Sana kha en la, ban a hun tawh. Bâkah hnathawktu an awma, an lo buaipui mai ang muhil hle hle teh" a rawn tih leh takah chuan engmah ka sawi duh tawh biklo.





A neitu ber a ni bawk nên a hah ṭhin viau ang, engtin nge a tlin zawk ni? Bank dang nen thawk ho mahse a mah chauh pawh hian a hlawhtling lutuk tho tho.




Insiam rem sat satin ka khan zui thaka, mut hi chu a hahthlâk loh êm bawka. Englai pawhin ka muhil thei reng ang tih tur a ni, rit chawi tur awm hek lo le, a ni phei chu keiai a muhil hmasa zâwk. Nizân a mengrei tak tak a ni ngei ang.





Kei erawh ka mutthilh theih mai loh avangin amah en chuan a hmai vel chu ka chûl sak riak riaka, a hnar ngul sâng lam mah chuan a ti hmelṭha zual hle bawk, min duh ve tak tak angem tih chu hrelo mah ila keichuan thinlung takin ka duh tawh.




Amah ban kham chung chuan nui ver ver chungin ka mit ka chhing zuia, a bula ka awm hi chuan in hau reng ṭhin mah ila ka hlim riau zêl. In ngeih lo deuh hi an han awm hran chiah hian an in ngai duh an tih hi keini pahnih nunah hian a dik chiahin ka hria.




Ka bula a awm loh leh ka ngaia, ka hmuh lahin ka thin a tirim leh em em ṭhin si. Engpawh chu nise engkim hi siamtu remruat dânah pawm tawh mai ang.




“Engkim lo buatsaih ang che, tin, ka pa leh ka unaute hruai tûrin mi lo tir bawk la. Kan inneihnaah hian awm vek se ka duh a ni" chu mipa aw aṭang chuan tunge a nih ka hailo, kan inneihna tur a buaipui tih nen lam ka hre thei.





Mengchhuak riai riaiin amah chu ka en a, ka mit ka nuai chat chat bawk. Phone ah message in mi a be mual muala, ka harh tih pawh a hre kher lovang “Tunge i biaka?" min rawn en vutin ka biangah chuan a rawn chûl zauha.




“Inneihna tur lam mawle, mo kawr vel kha ka duhzâwng ngei ha la ka duhsia, nge nangmahin thlan i duh em?" tiin min rawn râwn ve leh ngeia, engkim a buaipui tawh miau chuan keichuan sawi buai em em pawh ka tumlo, bâkah thil nalh a hre thei riau.





“Nangmahin thlang mai rawh, keichuan tih tur vak ka hrelo. Bâkah heti zawng hi ka nih hi, duh thlang thei pawh ka ni hleinem" tisapin ka ṭhu chhuaka, rawn ṭhut chhuah ve paha min rawn kuahin “Chutiangin in ngai ngai suh, ka tân chuan i ṭha ber tih hria la, mahni in hmuh hniam hi chin hauh loh tur, i nihna ang ang hian keichuan ka pawm che" a thusawi avâng chuan ka hahdam sawng sawng mai.





In ngeih lo in inhnial reng mahila a bulah ka hlim leh ber bawk si lai hi a ni mak chu ni.