CHAPTER 6
Zîng ka harh chu u Remruata a lo awm tawh hauh loa, ka hawihai lutuk chu ṭhu chhuak zawkin rang zet hian ka ding zuia. Room chhûng ka en lah chuan ka hmu hauhlo, nidangah kha chuan min thawh khalh ngai hauh siloa, chutia a lo bo daih chu mak ka ti.
Hrilhhai taka ka awm lai chuan pâwnlamah thâwm ka hria a, bungbêl ri ka hriat avâng chuan ka thaw ta haka. A ni hi rawng a lo bawl nge ni dâwn ni? Muangchanga ka chhuak chuan chawhmeh siama a lo buai mawlh mawlh chu ka hmu zuia, ka meng kâwk mai.
Ka rin loh lutuk dâna a awm chuan min ṭhawng ve bawk êm ani. Ka pan hnai vata, a chawhmeh siam ka va en chu a tui hmêl lêm vak loh, mahsela ka sawisêl sak duhlo, a vawikhat rawngbawl ka hmuhna a ni a, a chêt dân chu ka en reng ringawt.
“Tinge ilo tih duha? Keimahin ka bâwl thei a lawm, dah rawh ka lo siam zawm ang” ka tihchuan “Ka duhlo, ka zo ṭep tukin chu ka rawngbawl ei mai rawh” a rawn ti teh tawpa, chhuhluih ka tum chu a phal hauh lo.
Keipawhin dang duh tawh bik lo chuan a rawngbawl chu ka enpui ta tawpa, a bawl zawh meuh chuan a tlai duai tawha, a chawhmeh siam ho lah chu an ut titih lehnghâl. “Le chaw ei ang hmiang, thing i phur leh dâwn A ni lo'm ni? Khati khân min en reng lo in chaw ei siam rawh” tiin a ze ngai bawk chu a chhuah leha,fel deuh hian a awm rei thei thlâwt lo a nih hi.
A mahah hian minung pali chu an awm tak tak chiang a lawm, thinrim peih deuh, fel deuh, hlim thei deuh leh mi nelawm loh tak.
Khâng nuthlawi kha chu a kawm tawh loh hrâm ka beisei, ka hmusit nilo in miin keimah min ngaih diklohna tur kha ka duhlo, Mizo te ah phei chuan hmeichhe dinhmun a hniam si a, mipa uire pawh a nupuiin a tilâwm tâwk lo aniang, a pasal mamawh a pe thei lo aniang chuti khati an ti a, hmeichhia uire ve chu thah châk zet zetin kan ṭawng khuma, a pasal zâwkin a tilâwm lo aniang tih lêt chu a awm lo, mipa thil tisual chuan dem an hlawh ve loa, hmeichhe thil tisual erawh chuan tlâng kawh rawn kan tâwk ṭhin si, hei vâng hian ka theih tâwpa kan inneih chhûng chuan inven ve ka duh.
Tûnah pawh hmeichhe hnamdang nei avângin Mizo hmeichhia zawng zawng an ti leh tawha, hnamdang neih hi ka ngaihtuah ve ngailoa. Neih pawh ka tumlo, a neia te pawh ka demloa, mahsela hmeichhia in hnamdang kan neih chuan kan pasal te hnam ṭawm mai ila, tih Mizo phêt tum kha kan hnam ralna tur chu a ni meuh mai.
Chutih rualin mipa te pawh ruihhlo leh hnathawh peihloh leh tuaia chhuah phêt tum lo hian mipa tak hian awm sela, tunge pasal thi hma deuh tur chu nei peih bik ang. Chuta karah hnathawk peihlo pasal phei chuan damchhungin salah min siam a ni ringawt dawna, kan tuai ho lah an thlavang hmeichhia in kan hauh avângin tuai nih châk an pung thur thur bawk nên Mizoram hi chu kan ni nuaih reng mai a nih hi.
“Kha ei zo vek ang che” a chawhmeh siam tuilo lutuk chu ka chhâk chhuak lo chauh ani. A kha ang fuka, a al em em bawk nên ei luih chi pawh a nilo, a han tem chiah chu a ner suk suka, a luak a chhuah hmêl em em mai lehnghâl.
“Chhak miah suh ang che, ka bâwl ang ka tih laiin i phalloa, tikhan ei zo vek rawh” tiin keipawh chuan ka ei lui ṭang ṭang a ni ber mai. Tui chu ka hmeh ta tawpa, a chawhmeh kan a al êm a, in loh chi pawh a ni tawh lo.
Ka awr a puar ang tih te pawh ka hlau rum rum, a lehlamah ka nuih a za tlat. Ka ei kham rual chuan tui chu ka in nawn leh ngata, ka engkim hi a al thla huamin ka hria.
“A tui lo hle tak mai a” nuihza aw zeta a rawn ti chu kan nui dûn ta kar kara, “Taka vawiin chu ka nu te'n kan Vawk vulh tur kha an rawn dah tir dawna, lo en pui pah rawh aw. Inhnuaiah khuan kan dah dawna, a in dang sak lehkha a hautak mai mai, ka kal dâwn ania” tiin ka insiam zui mawlh mawlha.
“Keimaha awm reng ka peih hleinem, ka rawn tel ve ang” a ti chu ka hnial vata “I rawn kal ve leh zêlin dâwr nghâk tu an awm nâng” ka ti chu a tûm hmuka “Hmelhriat pawh ka neih loh hi, ka rawn tel tho ang. I naute school kallo an awm kha kan nghah tir thei tho a lawm” a rawn ti leh hrâma.
A awm peih lo ngang a nih ringin ka hnial duh ta loa, ka phone chu phawrhin ka nute chu ka be zuia. An ni pawhin an lo hnial lêm lo “A hriat chhun i nia, hruai ve mai rawh i naute'n an lo nghâk mai ang, puitling an nih ve tawh hi. Nakinah phei chuan hna thawh te pawh in la ngai dâwn si a, tûn aṭanga an lo tih ve angai alawm. In pa pawh i bulah awm tam sela in in nêl hma zâwk ang” ka nu pawh chuan a rawn ti ve duaha.
A sawi dik ve tho mai, awm dûn tam ila hetiang reng hi kan nih bîk chu ka ring lo. “Insiamla ka nau te kan lo nghah pahin a nimai, i thawmhnaw chhe deuh kha ha la” ka tihchuan min hnial buai bik lo in pindanah chuan a va lût zuia, tûnah hi chuan pasal zâwk ka ang ka inti, ka ngaihtuah chian phei chuan ka ang tak tak.
Thingtlanga la awm ngailo tih takah engmah hriat leh tih thiam vak a neiloa. A hriat chhun pawh engtia han tih tur nge a hre hauhlo, ka nau te pawh an rawn thleng har lo. Dâwr chahbi chu pe in ṭha taka nghâk tur chuan ka hrilh mawlh mawlha, lehkha a kan thil zawrh man kan ziah sa dâwrah a awm bawk nên chutiang te chu hrilh in kan kalsan zuia.
Ka hnungah a ni pawh min zui ve hnak hnaka, hnathawh pheikhawk kan la nei lo ve ve a. Nakinah la lei ngei chu angai ang, a ni phei chu a vun a no bawk si a ser a ngah lutuk ang tih pawh a hlauhawm. Bâkah a zia ka hre bawk nên chhungkaw duat rawn a nia, hna a thawh tak tak hunah a nat lutuk loh nân pheikhawk chu lei vat kan ngai ani.
Lo an hal ṭep tawha, ka nu leh pa te pawhin min phel dâwn tih ka hre tawh bawk nên zîm tê pawh nimahsela midangte dil ngailoa thlai leh sum tlêm a zâwng a lo awm ve pawh kha kan tan chuan a hlu lutuk dâwn tho, chubâkah thingtlâng mite a ngaihdan hi a thlâk nân hrim hrim thingtlâng mite hnathawh hi hre chiang sela ka duh.
Ka thing phurhna kan thlen rual chuan a hawi kual vut vuta, a la ngaw ṭha bawk nên ni zung chu thingkung kâr aṭangin a rawn in kâp lût tih loh chu a daihlim nuam viau mai. Ka Em chu dahthla in hrei leh Chempui chu ka la zuia “Hetah hian ilo awm dâwn nge, kan chhaka ka thing nimina ka kih tlûk sa khi ka han tan ange” ka tihchuan a ngawi leh vung vung phawta.
“Ka rawn zui ve ang che, ala ngaw ropui si Sakei leh Savawm te an awm hial lo maw?” a ti nuah nuaha, dai hnai ah chutiang ramsa an awm ngam a ring reng reng emaw ni. Awm vaih sela chuan ramvak mite'n an kâp hlum leh daih tawh ang, ka thing dahsa lam pan chuan kan inzui chho a.
Hreipui chuan tan nghal mawlh mawlhin a ni erawh chuan a ṭang chu Chempui chuan a lo sat ve charh charha, a zeilo lutuk chu a hmuh loh lamah ka nuih ka nuiha. Nakinah hian a rawn aiah ṭhat a, ka en rual chuan a kut chu lo hupin a kut kâr aṭang chuan thisen a rawn pût zaih zaiha.
Ka hnaih nghal vat mai, “Khawi maw i sât em ni?” tiin a kut chu ka en saka, a lo sat thûk lutuk lo nângin thisen chu a rawn chhuak ṭha duh viau mai. Ka kutah pawh chuan a thisen chu an kai nual tawha, amah lah chuan na a tih hmêl em em mai lehnghâl.
“Tikhan lo awm lawk rawh aw” tiin ka hawi kual thuak thuaka, Tlangsam kûng ka hmuh rual chuan pan vatin a hnah chu ka bal nghal mawlh mawlha. Ani pawh chu lo ṭhu tawpin ka che vêl chu min lo en renga, hnaih lehnghâl rawk rawkin tlangsam hnah chu ka nuai zui mawlh mawlha.
A tui chu far tirin a hnah chu a kut ah chuan ka belsak zuia, ka chhêm sak pah bawk. Amah lah chu ana ti chu a ner sak saka, “Engtin nge i insah rêng rêng a? Ana viau em?” tiin a kut ringawt chu ka en saka, ka lu khuhna puan chu la thla in ka pawtthler kâwk kâwk a, a kut chu ka tuam sak nghal mawlh mawlha.
Ka tuam zo hawi chhuakin min lo en reng avâng chuan ka tâwp deuh chata, uluk zetin ani min lo en ni. A hmêlah thinrim hmêl a lang lova, lungawi lo hmêl pawh a lang hek lo, a hmêl chu a dam dapa. A mitmeng chuan engtin emaw tak hian min ti danglam bawk, miin induh mitmeng an sawi ṭhin ang mai hian min melh ni berin ka hria.
Ka lâi bawk nên ka aw thian kharh kharh chung chuan “A zo e, phur awmna ah khân lo zuk awm mai rawh. Engmah i ti thei tawh dâwn chuang lo, keimahin ka ti thei alawm” ka tih pawh chu min chhâng lova, phur awmna lama chhuh pawh a tum chuang lo. Ngawi reng chuan a awmna ngaiah chuan a awma, keipawhin ka tilui duh bik lo.
Ka thing la tan zawh loh chu tan leh mawlh mawlhin ka zawh rual chuan phur awmna lamah chuan ka khawh thla a, chu erawh min lo pui ve leh ta thoa. Phur hmun kan thlen thlâk rual chuan rem khâwm zung zungin ka tui ken chu ka in zui khawlh khawkha, u Remruata ka pe ve chu a lu a thing ringawta.
Nichin aṭang khân ala ṭawng hauh lova, eng tak chu ngaihtuah ang maw? Hmalam ena a ṭhu chu a bulah chuan ṭhu in a kut bawk chu ka melh leha “Ala na em?” ka tihchuan a lu thingin “Na tawh lo, hetia thing phur kher lo hian current thuk ang te hi lei mai ila a ṭha i ti lo em ni? A hahthlâk ropui si a, bâkah ramhnuaiah kal reng angaia, a ṭha ka ti vak lo. Tawhsual te pawh a tawh palh theih” tiin keimah chu chiang tak hian min rawn en leha.
“Hetianga hmuna kal phei chu keichuan ṭha ka ti vak lo, ka nu leh pa bia ila hetia hah taka thing i phurh kher angai hleinem” a ti chu dik ka ti ve tho a, mahsela mi tâna phurrit nih kha ka duh biklo. Bâkah hetia keima fawm ngei mai han hmuha han tuah hi nuam ka ti, current thuk chu electrict bill an rawn ti sâng tawh bawk nên ka thlawp duh vak lo.
Thingtlâng mi tân phei chuan sum a vâng bawk nên Sawrkar lam lah hian thingtlâng mite ngaituah lêk lo hian thil engkim an rawn ti to emaw tih turin tih neuh neuh an ngah si. Chuta kârah dân thar an han siam belha, chawi tur leh sum hman chhuah ngai chi vek an rawn ti bawk nên a châng hi chuan ka ning lek lek zela, kan ram hi chuan hruaitu ram mipuite hmangaih tak aiin ram mipuite sum ei ral sak duh hlir hruaitu kan nei nimai hian ka hre ṭhin.
“I chau ve miah lo em ni?” a rawn ti chu ka nui saka, “Chau pawh ni ila rim taka kan thawh tho a ngai si alawm, chutilo chu kan nghei mai dawn a sin. Thawh tâwp tih hi kan dam chhûng chuan a awm dâwn lo, mi hausa fa tân lo phei chuan nitin rim taka kan thawh hi a ngai si alawm, mahse ka vui ngailo. Hetia ka thawh hian ka tân pawh a ṭha a, ka chak phah sawt zêlin ka hria, bâkah awm mai mai chuan kan thauin kan hrisêlna atân pawh a ṭha hleinem“ tiin ka nui hak haka.
A ni erawh a nui veleh hauhlo, ka lam rawn hawiin “I sawi dik a lawm, mahsela hahdam zâwka thawh dân a awm reng alawm. Hetiang em em chuan i upa chak lutuk ang” a ti chu ka nui lo theilo, min ngaihtuah vanga sawi chu a nih ve hmêl bawk sia.
ZAWMNA...
“Tikhan lo ṭhu la kan ek a nge aw, chuan kan haw vat dâwn a nia” tiin naupang chhe biak tak chuan ka bia a. Tûna a awm dân hian a ti ang ve bawk êm a ni, a ṭhu tûm hmak bawk sia ramhnuai hi a ning tih ka hre reng.
Thawh chhuaha ka Hreipui ban mai ka tum lai chuan ka bânah rawn vuanin min pawt ṭhu leh riha, mak ti leh a ngaihna hrelo tak chunga a lam ka hawi lai chuan ka lamah rawn tawlh hnaiin ka hmai bul chêtah chuan min rawn biha.
Ka thaw tawh mang pawhin ka hrelo, ka in ip vak a. A awmdân teh thut chuan min ti zâm chhia va a ni “Eng....eng..thil nge tih....i tum?” ka ti bah deuh niaha. Min chhâng hauhlo, chiang zet hian ka mit, ka hnar leh hmui vêl chu a enkuala, ka âwm a en rual chuan ka inhup vat ringawt.
Hepa awmdân hi ka ngaih a ti ṭha miahlo, min pawngsual te hi a tum nge mawni? “I hmelchhiat lêm loh hi” a rawn ti buka, hmmp. Ka hmelchhe ngai reng reng, “Ka hmelchhe ngailo, ka vun a thim deuh mai alawm” ka ti nghal phat chu a nui saka.
Ka bân langlai chu a en leh dun duna, hepa hian min belhchian a tum nge maw ni dâwn ni? Hetianga min en hian ka awm a nuam miahlo “Tikhan min en reng suh” tiin ka inkhuh ṭha sawk sawka, dik tak chuan khawpui tlangvâl tih takah keiai a vun a ngo daiha. A no zâwk bawk, mahsela ka in sit phah chuang hauhlo, mihring hian pianpui kan nei veka, kan pianpui vun leh taksa hi iai thei kan niin ka hrelo, Pathianin kan tâna a siam leh min pêk a ni a, ngona hmanga in tih ngo chawp lah ka tum hek lo.
Ka khabe ah rawn dawmin min fâwp thuta, ka lei ka la seh zui. A na zawk mai, mahsela min thlah miau loh avângin chutiang pawh sawi theih a nilo, ka thâwk a chham zo dâwnin ka hria.
Ka dâr tawn tawnah chuan vuanin leiah chuan min bawhtlu a, a chêt dân chu a dam raiha. A vawihnih min fawhna chiah a ni, nidangah kha chuan min tawk duh ngai hauhlo a nih kha, tûna a chêt dân erawh hi chu nidang a ang hauhlo.
A nghâwngah chuan ka kut zen in ka kuaha, ka chhâng lêt ve ta nge nge bawk. Tumah ka la fâwp loa, ka zei lêm lo mahse a chêt dân hian min ti danglam hneh êm a, chêt ka la ve lo theilo, a duhthawh ta lutuk chuan ka thâwk a ti chham dâwn hial mai.
Ka namsawn ta vata, ka thaw nghal kâwk kâwk chu min enin a nui deuh haka. Ka sama hnahthel kai te chu rawn thian mawlh mawlhin “I thing chu ek vat la kan haw dawn ania, vawiin chu phur tam lo mai rawh” tiin amah zâwk chu a insiam ṭha mawlh mawlha, kei erawh ka la pângngai thei meuhlo.
Khatianga kan vawikhat awmna a ni bawk nên ka lâi deuh ṭut mai, a mah pawh ka en ṭha ngam chuanglo. A ni erawh a pângngai thlup renga, lâi hmêl emaw put chu khawi lam, a hawi valh valh mai. Khawi hmunah mah hian zâmna tur hi a neilo pawh a nimahna.
Kei erawh ka thing eh te chu ka ek dik hleitheilo, ka mitthla ah kan infawh lai ringawt kha a awma. Ka hriat miah lohin ka hmui ka lo pet leh ṭhin nge “I awmdân chu fawh leh i châk deuhin ka hria, lungngai suh in fawh mai mai te chuan kan ral thei hleinem, ka fâwp char char thei che a nia” a rawn ti phei chuan min ti lâi zual.
Engmah pawh sawi lo in ka sa pup pup ringawt, thing chu ka ek deuh sawk sawka. Ka awmdân maksak kual lutuk chuan a nuih a tiza tih ka hria, ka awmdân chu keipawhin ka tum dân a nilo, mahsela ka che chhe leh ṭhin. Keimah ka inthunun theilo a ni ber mai, a tâwp a tâwpah chuan ka ek zo ta hrâm a.
Inthawn zui sawk sawkin rinloh takin ka phur chu min rawn chelh sak ve tehkhiaha, mahnia inphurh a har ṭhin bawk nên ka awlsam phah khawp mai. Muangchanga inzui haw in ka ngawi renga, tûnah chuan biak lam pawh rilru ah a lang lo, ka ngaihtuahna ah hian infawh ringawt kha a awm peka, ka ti chu a za leh vak ṭhin a, ka au vak vak lo chauh a ni.
In kan thlen dâwn hnaihah chuan a ni pawh a phûr thar nge a kal turh turha. Kan dawr zawn kan thlen chuan ka naute pahnih chuan kan Vawk pawh ka nu leh pa te'n an rawn dah tir tawh thu leh an khungfel tawh thu an rawn sawi chuan ka thaw huai mai, vawiin chu phurh nawn leh chi a ni dâwn lo tih ka hria.
Vawk chaw laka chhum vat loh chuan a tlai ei tur kan nei lo nghal pang ania. Ka ngaihtuahna ka lo sêng tlêm lutuka keima tân buaina tur bawk a ni, a la len lêm loh avâng erawh chuan chhum tam sak lutuk angaih ka ringlo.
Tualah chuan keuhin ka rem zui mawlh mawlha, u Remruata erawh chuan chahbi nên kawngkhâr kalhna chu a lo hawng thunga.
Vân lam chu ka en vang vanga, ni a sa bawk nên a lum lutuk tlat. Inchhungah chuan rang zeta lûtin chemtê ka ban zuia, hualah Dawl hnah leh kawlbahra hnah vêl an la awm ve bawk a hei hian hun eng emaw chen chu min daih ka ring.
“Vawk chaw ka la dawn a nia aw, i duh leh lo inbual fai la” ka tihchuan a bu nghata, thildang sawi tawh lo chuan chhuakin kawmthlang lam chu ka pan zuia. Ṭhal lâi a ni nangin tui a tam bawk nên chutiangin hnim pawh an ro lutuk hauh lova, dawl hnah vêl pawh an lo ṭha viau mai.
Hmanhmawh zeta la zuiin ka in pawm chho lûk lûk a, “Nunu kha Vawk chaw ila a nimaw? Khawiah nge in pa teh” kan ṭhenawm nu chu a rawn lang hlawla, a hawi nghal ha ha mai.
“A intifaia, nia hei Vawk kan vulh ve dawna a chaw ka la a nih hi“ ti ringawtin ka chhâng a, thildang sawi tûr vak ka hrelo. “I vânnei hle mai, tihian pasal ṭha tak i neia, i pasal nu leh pa lah an fel. Ti hian dâwr nên in han nei nghal rup ania, i vânnei ngawt mai khawpui awm man i nei a nih hi” a rawn tihchuan fiamthu mah nise nuih har ka ti.
Ka nui lui hrâm hrâm a ni, a hma a kan chhûngkaw dinhmun nên chuan tûn hun te chu a danglam tawh reng a lawm. “In pa lah i bum nge mawni a hmelṭha em em mai lehnghâl, i vânnei ngawt mai khawpui awm man chu i hmuh khawp hi” a rawn ti leh chu ka inseh ruh vaka.
Chhân tuma ka ân zuau lai chuan “Ka pi ka nupui bum theih ka nih i ring em ni? Chutiang tur khawpa mipa â ka nilo, bum ka ngailo, nang chu nula leh pawh nila kei ang chu i hmu ve chuang lo ang, i kuh fir fer emai” kawngka bul aṭanga rawn ti tu avâng chuan rang zetin u Remruata chu ka ena.
A kut kuangkuahin kawisawi zet hian a lo dinga, pi Thangpuii chu a ner nasa mai. “Ka nupui te chu a hmêlṭha êm, nanga tluk mai mai chi a nih loh hi, mi anglo ka niloa min bum chu ring lo phawt rawh, lo lût la khatiang mi kah fek fek hmang kha hnaih suh, an hri ṭha lo i kai ve palh ang” tiin min hui zuk zuka, keipawh ka lût zui ve mai bawk.
Ka nuih a za ta riau, a rêl nihchu a nuamlo aniang ṭhenawmnu pawh a ngawi hmak mai a lawm. Ka nui lo theilo, Vawk chaw tur chu chhuatah dahthla in ka chan ta zung zunga, ani pawhin min lo pui ve bawk.
Tûnlai chu a zia hi a inthlâk thut thut bawk nên hriatthiam a har ṭhin. “Favai pawh kan la nei silo, mahsela a pawilo chaw nên pe tawp mai ang” tiin a chhum chu ka siam nghal zung zunga “Vawk chaw te chu an zuar ve a ni lo'm ni? Khawpuiah pawh an lei mai a lawm” a tihchuan ka lu ka thing nar nara.
“Khatiang lei chawp kan pe ve ngailo, pawisa a hek. Bâkah hetia mahni ngeiin kan laka kan pêk hi an tui bik ania, khatiang siamchawp thil nêna enkawl kha chu ṭhang duh in ngeih ve viau mahsela a sa a tui tâwk lo ṭhin” tiin tap ah chuan ka chhuang zuia.
“Chu, a sa ei turin em ni i vulha? I va vir ve” a rawn ti chu ka nui lo theilo. “Nangpawhin i ei duh reng kha aw, nu Ahlimin a lei apiangin a ti i heh ber zel” ka ti chu ka biangah a rawn piai deuh nawka. A na lutuk chu a kutah chuan ka bensak vaka.
“Tunlai hi enge i hriata? I â thut em ni?” ka tihchuan a nui ringawta, thildang sawi tawh lo in rawngbawl pahin Vawk chaw chu ka vila, mei ka tuah na bawka a hmin har lêm lo, ṭinah chuan siamsa in u Remruata chu ka ena “Lo zuk pe mai ta che, ka buai rih si a, hetiang chuan a buaithlâk emai, kan chawhmeh hi a ut leh palh hlauh a nge” ka tihchuan min hnial miahlo hian a inkhai chhuak ve nul nula.
A chêt dânah erawh chuan a zeilo hle tih a hriat theih mai, a pai deuh khat khat chu ngaihtuah deuh hian ka en zuia. Pâwnah chuan chhuakin inhnuai lam pana a chhuk thla chu ka ena, a pe thei mai dawn emaw tih lai chuan inhnuai a lût chiah tihah lung rap hrualin a ṭhu ta tual mai, a ke a la vawr suau zui.
Vanneihthlak lutukin a thil khai erawh a baw lo hlauh thunga, ka nuih a za tho bawk si nuih chi a ni bawk silo. Rang zet chuan pan hnaiin a tho chhuak tur chu ka pui vata “Ka ning, engah nge ka chetsual sek le? Thingtlâng hi ka ning” a ti leh hluk hluka, lâwm lo zet hian in lam hawia inherin a kal zui nghal nul nul chu a hnunglam aṭang chuan ka nuih zui haka.
Keimah chuan Vawk chaw chu pe vatin ka chho zui leh ta thuaia, ka luh chuan ṭhutthlengah lo ṭhu in a phone a lo hmanga “Ka awm peih tawh lo, min rawn hruai rawh u. Engmah ka ti thiamlo, hetiang hnathawh ngaiah ka awm peihlo min rawn hruai zung zung rawh u” a ti hluk hluka.
Pa Muana te a be ngei a nih hmêl, rawngbawl pah chuan an in bia chu ka ngaithla a. Ka lo nui leh hak ṭhin “Thlakhat pawh ila awm lo ania, engtin nge a nawm leh nawm loh chu i hriat theih ang? Tikhan i awm rei anga i hre ve zel mai dawn a lawm, tumahin reilote chhungin thil an thiam zung zung ngailo. Phun reng lo la, i nupui a hmeichhia zâwk mahin a theih chuan nang mipa in ti ve si chuan i thei ve tur a ni, khatianga engkim ah i tuarzuau viau chuan i hlawhtling theilo ang, i nupui ang khân engkim thiam tum ang che” tiin call chu an dah aniang u Remruata chu a phun bul bula.
“Ka chhuak dawn” tiin biak pawh biak hman loh chuan a chhuak zui vuta, engtak chu ti leh ang maw. Zu a rawn ruih haw tawh loh hrâm ka beisei, chaw ei san leh ngei a ngai dâwn a nih kha.
Tinge hetianga a awm leh mai zel le? A fel viau dawn emaw tih pawh hian a ngai ang bawk hian a awm leh ṭhin, chaw chu ka ei san leh ta ngeia, a ṭha ange maw chu. Thinrim chung khân a chhuak si a, thil ṭha lo tak a ti ang tih pawh ka hlau hlel love.
Mu tura pindana luh ka tum chiah chu kawngka rawn inhawng rawk avâng chuan rang zet hian chu lam chu ka hawia, ka thil hmuh avâng chuan ka meng kâwk a, hlauhthâwnna in min rawn tuam zui hlawp hlawp bawk.
Pan hnai ruakin a hmai lo duk deuh leh a hmui bul vêl thi ser ser chu chiang tak hian ka ena “Enga tinge in insual em ni?” ka tihchuan min chhâng hauh lova, ṭhutthlengah chuan ṭhu in a hmui chu a chip hmaka, thawk la hakin choka lama dettol leh lapua vêl kan dah chu va hai rawk rawkin alam ka pan zui leha.
A hmaah chuan ṭhu thla in a hmai khawih ka tum chu a lo hawi sawn hmak lehnghâl. “Khawi teh awm ṭha rawh, damdawi ka hnawih dâwn che a nih hi. Khatianga luhlul kha a hun lo, tinge i va insual reng renga, amak ṭhin emai. Fel deuhin i awm dâwn emaw tih laiin hetiang bawk hian i rawn kîr leh a, fimkhur ve ta che, tûn ang laiah insualnaa hriam hman chîng leh mi thah pawisa miahlo an tam tawh ania, nang phei chu hetah hian mikhual ang ila ni leh nghala, zân te hi vâk chhuak fo lo la ka duh” tiin a biang tawn tawnah chuan vuanin ka inhma chhawn tira.
A lu chu a her tawh loh nân ka hmer deuh vak bawk, a luhlul si a thinrima tih ve zel angai ṭhin. La pua nên chuan an hmui sir pilh vêl chu ka hruk saka, a thip bawk aniang a ner sawk sawk mai. A hmai chu ka rin ai takin a duk nasa lo hlauha, amah a ngo hrim hrima a langsar chauh zâwk a ni ber mai.
“Insual tawh miah suh aw, mi hi tihbuai miah loh tur. Min tibuai hmasa te a nih loh chuan, i nunna i chân ve ang tihte ka hlau teh ania. I nunna i chân a nihchuan ka hrilhhai dân tur leh i nu leh pa rilru nat tur zia hre reng rawh, tûnlai mi chuan tleirawl te pawhin tualthah an pawisa tawhlo, Mizo te pawh kan rapthlâk tawh lutuk, chuvang chuan mi tibuai tawh lo hrâm la ka duh” tiin a mitbul kak vêl chu damdawi ka hnawih mawlh mawlha.
Min chhâng loa, thinrim hmêl pawh a pu chuanglo, ka hruk zawh chuan ka tuam sak leh thlapa. “Chaw i ei duh em? Ka siam ang che aw” tiin chaw ei siamtur a kal mai ka tum lai chuan ka dulah a kut rawn rawlh lûtin min kuah bet ta tlata.
Ka hnungah chuan a bei hmak bawk nên keipawh ka ding chiang ngei mai. Ngawi reng chuan a ngaihna hrelo zetin ka hawi kual ringawta, tûnlai a awm dân hi a mak ka ti tak tak ani. A châng leh hian a nupui tak tak, a chauh leh rilru hah chânga chhâwk zâng ṭhin tu ang maiin min ena, a châng leh hian a hmêlma ang maiin min ngai leh bawk si.
“U Remruat” ka ti sapa, hetianga a awm hian min ti danglam a, kan inneih chhan theihnghilhin ka rilru a dang ṭep ṭhin. Mahsela kan inneih hma a a thusawi ka hria a, kei hian hmangaih emaw duhna emaw ka nei thiangloa. Ka nei tur a ni bawk heklo, chutilo chu min hmuhsit belh dâwn lutuk tlat.
“Nunu tinge kei kher hi min neih? Engvanga min ngaihsak tlat nge i nih? Engvanga hetianga min ngaihtuah taka thusawi ṭhin nge i nih le, kei hian engmah ka tihsak ngai lo che tih i hre reng si a” tiin ka kâwng zâwnah chuan a rawn thaw lum ham hama.
Ka taksa chu a mur nghal er er bawk, hetiang hian awm fo lo sela ka duh a sin le, a chhan chu alakah beiseina ka neihsana, keimah ka nat leh ka hlau a ni. Hetianga ka chunga a ṭhat hian hrehawm ka ti ṭhin, a chhan chu mipa ngaihawm tak a ni si a, a zûnah hian ka uai mai ka hlau a ni.
“A chhan chu ka pasal i nia lawm, nupui ka nihna anga ka tih tur ka hlen mai ania. Ka pasal ka ngaihsak loh chuan tunge ka ngaihsak chuan ang? Mi nunrawng leh pasalte thlahthlam ṭhin hmeichhia chu ka ni bik lo ania, chaw chu ei vat la a ṭha ang. Ka va siam tawh ange“ tiin a kut chu ka dah sawn saka, min lo dan bik loh avâng chuan rang zetin choka lam chu ka pan zuia.
Chaw a ei lai te chuan a hmui avâng chuan a chaw ei a harsa a ni ngei ang a ner leh sak sak ṭhin a, tute nên nge an intihbuai ang tih chu ka ngaihtuah ve reng thung. Kan khawvêl a changkang in hmasâwnna in mihringte min nghawng ve zela, thingtlangah meuh pawh chutiang chu a thleng ve vek tawha.
Chumi in a ken tel sualna pawhin a bawhkan hek lo, tûnah pawh hian tlangvâl awm ṭha duh lo leh zu in ve tho nên an intibuai a nih ka ring bera. Mahsela zâwt ringawt ila min chhân ka rin loh êm avângin ka zâwt lui duh biklo, naktuk lamah ka hriat leh tho ka ring, a chhan chu thil hote pawh thingtlangah chuan a tlâng thang zung zung ṭhin miaua.
Mu turin pindan lamah kan in kuah lût a, a mut a chhuak tawh viau a nih ka ring a meng peih chang chang chauh a ni. Khuma ka mutthlak rual chuan a mit a chhing zui hmaka, a pheikhawk vêl chu phelhsakin a kawr zu rim nam huam mai chu ka phelhsak bawka.
Engtin mah a awm tawh loh dânah a chatthla fel a nih ka ring, a bulah chuan ṭhu in a hmêl pawisawi lo em em mahsela a rilru luhlulna a khat si chu ka ena. Hetiang a nung tur chuan a inhmeh mawlh lo a ni e, a nungchang hi a hmêl nên hian a inmil thei hauhlo, mipa fel leh ṭha tak ni sela a hmelṭha bawk nên hmeichhiate duhthusam zawng zawng kha amahah a kim dâwn tih ka chiang.
Chutiang erawh chu a thleng ngai pawhin ka ringlo, tûna a nungchang hi vawi tam tak ka lo hmu tawha. Awlsam taka a thlâk chu ka ring bik lo, engvanga a nu leh pa runluiha hetianga awm thlang tlat nge a nih ang le. Ka hriat dânah pawh sawrkar hna ṭha tak te pawh thawk thei tur anih laiin hetianga awm mai mai hi a thiang chu a ni sia le.
A hmaiah chuan chûl sakin a sam pir deuh sâng chu ka ṭhâm neuh neuha. “Hetianga sual ve hi i inhmeh lo a sin, tlangvâl hmelṭha leh pian thiam tak i ni a, i nun hi ṭha takin hmang la chuan mite awh rawn i ni mai tur. Engvanga hetianga awm nge i nih le? Hetiang mi i nih ngai loh thu an sawi renga, hetiang mite hian dâwt an sawi zâwk em ni ang?” tiin ka phun sep sepa.
Ka ṭawng chu hrelo tih hriat tak hian a thaw sek sek reuha, a duhawm hliah hliah bawk. Thinrim ve theilo leh lungawi ve ngailo hmêl pawh a pu lova, amah hi a inring tâwkin a chak hmel hliah hliah bawk.
Ka kut laksawn mai ka tum lai chuan rawn hmer chatin hlauthâwng taka ka en lai chuan in let sut sutin ka awm lohna lam chu a hawi ta daiha, ka thaw deuh huai mai.
A rawn harh vaih chuan tûna a hmêl hmuhnawm tak hi hmuh tur a awm leh tawh dâwn siloa, chu chu a tâwp mai ka hlau a ni.
Ka tih tur hrelo chuan ig ah lutin reels ka enkuala, chutah tûnlai an uar êm êm scoop an ti nge mawni chu en leh mai maiin ṭhenkhat inthlau tak tak, a man zât in ang rau rau ah pawh inthlau lutuk chu ka hmu nuala, pakhat Starlit inti nge mawni chu a tlêm bik ve tiin ka va comment peka, ka comment chiah tihah min rawn hnial nghâl chu sawiloh a ac dang leh a ṭhiante nge mawni an rawn in punkhawm emaw tih turin ka comment zawng zawng an rawn hnial hman vek nia.
Sumdâwng rau rau pawh hi ṭawng thei deuh, midang rilru tê ti leh daih hlawk tum hi an lo tam a nih dâwn hi. Han hnial tak tak ila in la milar fahran hian an ṭhiante emaw an kid te zâwk nge an rawn lang nghala, mi tlêma chhe deuha comment pawh hi a ngam tawh loh a nih hi, mi hnial châk zek zek leh inla incheina nei ṭha leh midang hnuai chhiah chîng deuh hi an awm leh ṭhin.
(lo va zawng kher su, in hmu hma dâwn lutuk)
Sumdâwng te pawh hian eiruk tum ran hian thil kan ti a, midang mawilo deuha be hmasa siin hnial lêt ila min puh lêt hlauha. An buaithlâk a nih hi, hnial duh tawh lo chuan chhuahsanin Youtube lam chu ka en ta daiha, mi hnial hi ka peih ve loa. Inhnial vak ai chuan ngam leh ngam, cho leh cho chu insual mai tur tih hi ka ngaihdan a ni ṭhin.
Ka duh loh thilah chuan tumah ka hlau lova, ka dik lohna ah erawh chuan ka tlâwm hreh heklo. Khatiang mi comment chhe em em pawh nilo chhâng peih chu dawr tlâkah ka ngai lo hmak bawk.
Rilru tê? Hah rilru te zâwk hi chu an hriat ṭhin a ni, comment chhe deuh apiang hnial rawn zel kha chu a dawihzep thlâk mah mahin ka hria. Buaina tawh hleka ṭhiante pun nghal zel mi hi chu mi huaisen tak an ni ngai heklo, mi huaisen leh dik chu amah in a ding ngam turah ka ngai.
U Remruata chu a rawn in let sut suta, ka malah chuan rawn khanin min kuah bet zuia. Ka che ngam tawh bawk silo chu a hrehawm ngei mai, ka phone en tur pawh a ti buai zo vek, ka lukham bulah chuan dah tawpin a lam hawi zâwng chuan ka inher a.
A hmelṭha tak chu enin ka khawih leh ṭhin, ka pasal hi keipawhin phu ka intilova. Amah pawhin chu chu angaihdan a nih ka ring, kei thingtlang nula zir sâng lo, vun ngo leh no nalh nei ve lo. A kut nêm thap ti a sawi tur pawh neilo hnathawh nasat avânga thap hruap chu tu mipa in nge min hmu mawi ang ni?
“Kei min neih i duh lo viau pawh hi ka hrethiam lutuk che a nia aw. Ni e keichu i bialnu te ang khân ka vun te a nêm ve loa, ka no ve hek lo. Vun ngo tak ka nei ve loa, pian mawi tak pawh ka nei chuanglo, mi hausa fanu ka la nilo cheua, in awmpui mai mai nei i ni a, i tân chuan hriatthiam a har ang tiraw? Chuvang tiraw heti em em a min huata min duhloh? U Remruat i tân chuan hmeichhe mawina neilo mai ka nih hi” tiin mittui tling pamin ka ena.
Ka thusawi hreloa a muhil chu ka lâwm a ni, chuti nilo se chuan ka inpuang mualpho mai âwm si a.
REMRUATA POV....TI LAWK ANG AW A LANG MAI MAI TAWH DAWN LO ANIA.
Ka nupui phun sep sep leh ka hmai khawih reng tu chu harh reng mah ila ka harh tih hriattir ka tum hauhlo, a thusawi chuan engtin emaw tak min ti danglam ve bawk.
Ni e a duh chunga min nei a ni bik lo a, mahsela ka nu leh pa a vang hrim hrim pawh hian biak ṭhat ka tum ngailo. A vun leh hmêl, a pian hi ka hmusit ngai hauhlo, a rûka ka zaha ka ngaihsan zâwk zia hi a hre lo tih ka hria, min ngaihsak zia ka hriat khân ka inthiamlo bawk.
Ka hliam a hmuh apianga a hmêla hlauhthâwnna leh min ngaihtuahna hmuh te kha nuam ka ti ru tlata. Zaninah pawh an khaw tlangvâl ṭhianho nêna insual kan nih thu hrilh ka tum hauhlo, ka tibuai hmasa hauh lova, ka haw tur kha min lo tibuai ngawt kha a nia. Tunge an nih sawi tûr lahin an hming ka hre miau si lova, chubâkah Nunui nula sawi kher pawh ka tum lo.
A hlauthâwng lehzual anga, thil a nilo zawngin a kal ang tih ka hlaua. Tih hlauhthâwn reng ka tum biklo, a tluk loh ti a a sawi ṭhin hmeichhia te hian engkawngah mah an tluk loh zâwk zia hrilh châk viau mah ila tûnah chuan amahah hian ka rilru a la bet tâwk miau siloa, ka nu leh pa avâng hrim hrim pawh hian chutiang thil chu awm tir ka tum lo bur bawk.