TE DOY 15K BY Abbra Reo Ririni Khiangte (Pitartei) (Completed)

[ngaia]

Lengpui ațang kan tlan let lam chuan Zothana'n bolero a khalh a, driver khan kalna tur a neih vang in a cousin in bike in a lo nghak ve reng alo nia, Kawngtluan in 70's hunlai hla kan play a, Jayden chuan thiam mang hlei lo hian a lo zawm ve lang lang reng bawk, Zothana nuih a lo za țhin sia. Nu Liani leh Mami hnunglam a țhu te pawh chu Jayden avang chuan an rawn nui leh hawk zel a.

A kekawr ipte aţang phone a la chhuak lai chu ka lo melh ve reng a, speed ti hniam pah chuan eng emaw hi a hmet zui mual mual a.
"Min lo pe la.. ka lo ti ang. " ka tih rual chuan min en vut a; Hma lam melh pah chuan steering a herh leh zawk a.
"Aa.. Lisa hian tun thleng in min la rawn call back lo a... " a ti sup a,
"Khawi ka lo call ang.." awlsam zet a ka tih rual chuan thawk la deuh hawk pahin a phone chu min rawn pe a. Lisa number ah chuan ka call zawm ta zat a.
A ring a chu a chhang thei lo.
A chhan loh vang chuan phone screen chu ka en zawk a, Zothana'n nimin piah ațang a call tumna chu call log ah chuan a lo awm tuar a, darkar tin deuh thaw in a call tih ka hre bawk.
Ka call nawn leh a, a chhang thei chuang lo a. Zothana ka han en chuan min rawn en ve chiah a.
"A chhang thei lo.." A kâ ațang a rawn thawchhuak zui hawk a.
"A pawi lo, call tawh rih suh, Jay hi a mut chhuak in ka hria." A tih zawm ta daih bawk, ka malchung a ka fapa lo țhu ngawi ve ran chu ka buaipui zawm ve ta mai bawk a.
"Jay, hetah ka lo pawm dawn che mi?" Mami'n a rawn tih ve chuan Jayden chuan lu a thing ve nghat reuh a, Flight ah khan vawikhat pawh a muhil lo a, Kolkatta airport ah khan a tlan kual chul reng bawk a, a chau ve hle anih ka ring!
"Mamma bulah muhil mai rawh se. " Zothana chuan a sam ah rawn tuai sak zauh pah chuan a ti a. Jayden pawn a ruk te in ka kawrchhungah a kut a zen lut ve rak rak a, a pangchan ve deuh hi chuan hnute khawiha muthilh kher hi a tum ţhin.

Khawpui chhuahsan zawnga motor rawn tlan vuk vuk an awm vang chuan Zothana chuan fimkhur leh zual hian a khalh a, bolero hma lama phone ka dahsak tak chu a khat tawkin a melh leh zawk zel bawk! A ngaihtuahna a buai hmelin a rilru ah vei lian tak a nei tih chu amah hrechiang tu tan chuan a hai theih tawh thlawt loh! A taksa hrawlpui che awk khawp a a thawchhuak chu ka mit sirin ka melh reng a , ka lo hah ve vek thei!
A tawp a tawpah chuan phone chu ka ban leh a, Zothana min rawn melh zawkna chu hrelo derin Lisa chu ka call nawn leh ngat ngat a, Heti taka Zothana awmdan danglam vang tal pawh hian ka hmeichhe huat ber ka call hi a sual in ka hrelo! Chuloah keini nufa min buaipuiin hun a khawhral a, Lisa chungah engemaw thleng palh ta se Zothana hi a inthiam lo dawn lutuk.
Rangvamual kan tlan luh thleng pawh in call a chhang thei lo a, ka call nawn rual apiang chuan Zothana chuan min rawn en ve zel a! A tawpah phei chuan thawk la ri hawk pahin steering chu a chum zui ta deuh pawp a!
Ka phu chiam zui!

"Kan țha em?"
"Bawihi.. Home 2 tia ka save kha call leh rawh." A rawn ti chhuak hrawih! Engvang ber nge ka hrelo, a aw ah khan in control a tum viau tih ka hria a, mahse a veng zo chuang lo.
Home 2 ti a a save chu ka call zawm ta zat a, chhangtu an awm chuang lo!
"Ok.. Inah ka drop che u ang a, Lisa ngaihven turin ka chhuak nghal mai ang.." min en zawk a, min râwn nilo in a thil tum min hrilh zawk ani mah.
"Aw le.." ka ti sep a, Nu Liani leh Mami chu an muthlu a, Zothana thawk lak buai ru em em mai chuan ka awm ati nuam thei hauh lo mai!

Khawchhung kan tlan lut a, traffic a lo indawt zut a, Motor tam zawk lah hi hunna tur nei mumal silo in an khalh chhuak ve sek a, mi dawr kawt ah kawngpui chep tak dal zawng a hung ta hmiah lah an awm nual! Hengho hi kan ram țhanmawhbawk pakhat chu an va ni chiang ve tak!

Gate kan tlan lut a, Mami leh Nu Liani chuan kan bungrua an khai lut a, a tam thamlo a, keini nufa leh Zothana phei chuan kan nei vak lo hrim hrim.

Driver side aţang a chhuk vut chu ka en zui reng a, Jayden a muthilh miau vangin ka chetpui zung zung theilo.
"A chau ve hle anih dawn ni.." kan țhutna lam a rawn pawh hawn rual chuan a ti sup a, kei erawh in a hmel landan dang hlawk leh vei run nei tih hriat zet a thim khap mai chu ka en uluk hle thung!
"Lisa chu..." ka ti sep a, Jayden pawm hran mai a tum chu a tawp chut a.
"I ngaihtuah viau ami?" Ka ti a, engmah thikna leh huatna rilru ka pu tawh lo. Min chhan hma chuan thawk a'n la leh deuh hawk phawt a! Shirt maroon a ha a, cotton kelawr ha leh in Jordan pheikhawk a bun thung!
"Call hi a chhang lo mai mai ngailo a.. ka kalsan dawn țum phei kha chuan a rilru a buai lutuk bawk si.." chal chuar tap chung in lu a thing zui nghut a.
"Jayden hi khumah mu vat rawh se." A theihtawp in a rawn nui lui suk a, Jayden chu a la hrang a, Ka chhuk ve rual cuan inchhunglam a pan pui ta pawk pawk a, Zothana meuh a buai ruk tawh chuan thil thleng engemaw tak a awm hrim hrim ang!

Inchung ka thleng chho ve chiah tih ah a room ațang a rawn chhuak ve hlawl a. Ka hawi â hu thei!
"In nufa thuamhnaw zawng zawng ka roomah hian ka sawn phei tir vek tawh." A ti vut a, "Khumah ka mut a; Nang pawh lo va hahdam rawh, ka rawn let leh vat ang.." a ti leh sup a. Min pan hnaiin ka biangah a kut pahnih in a rawn dawm a. "I landan hi a ţha bik miah lo ania." A ha var nalh zet lang in a nui suk a.
"Ka lo kal ve i duh em?" Ka ti a. Ka hmui ah a rawn fawp zeuh a.
"Jayden lo awmpui zawk rawh.. a harh hunah a zawng palh ang che."
"Ok.. Chanchin rawn sawi vat rawh aw.."ka ti a, bu nghut pahin a in la hrang a.
"I phone tur ka rawn lei haw dawn nia.."

Kailawna a pen thla pawk pawk chu ka dinna ngaia ding reng chung chuan ka en zui ta reng a, Kawt ațang motor tlanchhuak thawm ka hriat hnuah chiah room ah ka lut ve a, Ka nui nghal hak bawk!
Zothana khum zau zet ah Jayden chu a lo muhil ve ngat a, ka room ai daih in a zau a, bang pakhat hlawk chu closet a tan siam ani a, a chhunga thil awm reng reng chu rawng uk khap leh a pindan neitupa nen a inchawih zet in engkim chu a lian tham em em vek!

"Zothana chu a chhuak lehnghal mai elaw?" Ka inthlak zawh hnu vekah inhnuai ah ka chhuk a, Nu Liani chuan coffee tur tui a lo chhuang mek a.
"Umm.. Lisa a ngaihven dawn anih kha.."
"Kan Lisa pawh hian a u hi chu a tibuai hneh ve a nia.. khawi lai party naah emaw chatthla se Zothana vek in a buaipui a.. " a ti zui ta barh barh a.
Stool sang ah ka țhu kai a, Zothana kal chhuah aţang minute 20 dawn a liam tawh a, home phone ah tal a rawn call ka ring a, mahse tun thleng in a la reh hmiah thung!

"Nu Lian, Zothana chhungten he in a sak hi an hria em?" Ka ti sep a, chumi pah chuan inchhung zau nuam zet leh bungrua engpawh changkang si leh hmuh hahdam tak si chu ka enkual pah thuak a! Hetiang in a rukin a sak theih ka ring lo hrim hrim.
"Ka hre miah lo.. Aaa.. An hria ang, Lisa pawh țum hnih thum vel chu a rawn riak ve tawh alawm.." a ti a, ka hma dawhkan ah chuan coffee la khu vat vat hi a rawn hung zawm zat a.
"Zanin tlai chu awlsam deuh in ei kan siam dawn nia. " ti hliai pahin fridge chu a hawng kual sawk sawk a!

Coffee chu ka in hlek a, nizan ka mu țha hman bawk silo a, ka chau ru reuh tak zet!

Minute 10 dang a ral leh hnuah in a phone chu a rawn ri ta thut a, Rang zet in choka ațang chuan ka kal chhuak vat a.

"Hello.."

A reh deuh vang vang a, rawn call tu number digital screen lian vaklo a rawn lang chu ka en zawk a! Zothana number ngei ani! Line chiang lo anih ring in ka nghak deuh ta reng a.

"Hello.."

"Bawihi..?" Midang nen an inbe leh lawk ani mai thei! Thawk a rawn la zui hak a.
"Lisa chu a awm tawh lo.." teh tawp mai a!

Ka hrawk a ro nghal vek a! Min țhawng hi ani tawp mai!
"Engtin..?"
"A ruang postmortem turin hospital ah kan phur phei chiah a.. Aaa.. A la chiang biklo.." a rawn ti hap a, ka hriat sual emaw ka ti hial zawk! A chhan chu kha hmeichhia kha ka hua in tih chhiat vek ka duh ţhin ngei a, mahse thi tur ang chuan ka lo la dah chhin ngailo.

"A va mak ve.."

"Umm.. Chanchin hrilh in ka rawn be leh ang che.." a ti sup a. Engmah sawilo mahse amah pawh chu a shock ve tawk hle tih a aw ri a hnualna ri tel ve ah chuan mi â ber pawhin an hrethiam ang.

Zothana nen kan inbe zo chu couch ah ka ţhu thla hnawk a, ka ngaihtuahna a vak thui ta kher mai! Thah nge anih ang.. Vanduai vang hrim hrim! Postmortem tur a an phur anih chuan thih dan pangngai anilo chiangsa bal a!

Zothana bulah khan an awmna hospital tal lo zawt ila ni tur!

Thah lo nita se tu thil tih nge ni ta ang! Zico! Zico chu engvanga ngaihtuah tel tlat nge ka nih ka hre lo! Lisa chu a hmeichhe hmangaih leh keimah aia a thlan zawk ani a, a that ngawt thei lo hrim hrim ! Chuan amah chu Goa ah a awm ve daih kha..!

"Engnge chanchin.." Nu Liani aw sin leh tliang zet vang chuan ka phu ta chiam ringawt a! Ka hawi chhuah chuan ka bul maiah alo ding reng tawh.
"Ih.. A.. Lisa kha a thi.."
"Maw?" A ti țhat! Couch ah a rawn ţhu thla ve vat a. "Han sawichiang deuh teh."
"Zothana'n a rawn sawi a.. Tunah postmortem turin a ruang an phur phei tawh.."
"Karei! Hmeichhe khawngaihthlak.." a ti halh a. "A va pawi tak em! Kan nunna ah hian kan thu der mai silo a.." a ti chhuak halh a . Sawi ve ber tur pawh ka hre lo

Ka pasal nen min bum in ka nun an ti chhe vek a, ka pum chhunga ka fa ngei a result lem siam vangin ka chan bawk a! A remruatna fing vervek tak vangin kei leh Zico kan intawng a, chuan.. Amah nen inzawmna kan neih tawh loh hnu thleng pawh in ka nunah buaina a la rawn thlen ta ţalh a! Ka nun zawng zawng tichhe vek tu chu keiin hremna ka pek ngailo in tunah khawvel a ta a chhuak ta a, Lawm ngawih ngawih zawk tur ka ni asin! Mahse ka lawm miah lo.

Ni e... Ka nun kha an tan chuan hmanrua lek nimahse thihna meuh in a den hi chu a dan a dang a, a tawp ani tawp mai! Kawng chhuk leh chho zawh kar thlak hnu a, kham birh zet lo awm ta thut ang mai hian a tawp in a hrilhhai thlak a! Lisa pawh thi turin ka lo dah chhin ngai miah lo!

Min beilet turin a huaisen a, tlawm taka min siam tur khan a huaisen tawk em em a, dawt sawi kualin thiamchan a tum ve lo ringawt pawh kha mihring pakhat anih ve na a nia, a thil tihsual kha a pawm thlap a, Zico nen engkim an ruahman lawk ani tih pawh a pha chhin miahlo. Lehlam tak chuan hetiang mi te hi an awh awm a, mahni thil tih ngei pawh pawm ngam leh silo a dawt a phat kual tum a, mihran hran hnena an chan chhiatna lai sawi kuala midang khawngaihna hlawh tum te nun hi a tenawm a, mi dawihzep, mi diklo, mi dik ang a lan tum leh mi chunga an thil va tihsual pawm duhlo, an va beih tena an beihlet ve ruala phatna tur dawt lo sawi kual ţhin te nun ai daihin a nun kha a awhawm a, ani kha chuan ka chunga a thil tihsual a pawm thlap! Tu emaw ang lo tak in! Chuvang tal pawn tun ang a tawp mai tur hi anilo asin.

Room lamah ka tlan lut sawk sawk a, Jayden a la muhil a, ka thuamhnaw hak ka thlak a; cotton kawrdum bantluan ka inbel a, Puan dum hlang tawp ka bih a, flat dum ka inthlawh leh sawk sawk a, ka clutch lian ve angreng tak ah mamawh ka khung khawm a, An hospital pan ka hrelo a chu an inlam ah tal ka lo va awm ve thei ang, Tunah phei chuan Zothana nu leh pa te Mumbai lamah an awm daih a, tukin zing vek khan Goa ațang Mumbai lam pan in an thlawk chhuak ve nghal a, anni lo thlen hma chu Zothana koah engkim a tla vek dawn a, a rilru buai ve zet tur te nen phei chuan a bulah ka din ve ngei ngei angai!

"Mam, Jayden lo harh hun chuan țha deuh in lo hrilhfiah mai rawh aw.."
"Aw le.. " a ti vat a. Roomah a lut tur chu a ban ah ka man leh chawt a!
"Tumah inah hian lo luhtir suh u aw.. kei leh Zothana rawn let chu in hre em em ang, keini kan nih loh chuan kawng lo hawng lo ang che u. " ka ti sep a. A chhan chu hmanni ah pawh Zico hi gate pawnah ka hmu tawh a, tunah hian Goa ah nge a awm pawh ka hrelo, he inah hian a lo kal mai ang tih ka hlau ru tlat!

Mami a buk nghat takah chuan kailawnah ka chhukthla sawk sawk a, Gate pawnah taxi ka chang a; Khua a thim țan tawh vangin taxi a awm mai bawk silo. Ka nghah vang vang hnuah taxi ruak ka hmu fuh ta hlauh a! Ka thaw huai thei!

An in lam ka pan lai te chuan ka thaw leh dep dep ţhin a, a chhan chu ka hmelhriat satliah nilo ka nun tichhe vek tu ani a, ka lan ve ngawt hi a dik em tih te ka ngaihtuah kual leh thûl!
Ka ngaihtuah buai chhung in an in kawt ah kan ding der mai! Vengchhung YMA in an in an lo thian a; an zi nuai nuai hi a ni ber mai, tumah hriat a lawi ka nei bawk silo, a ruang an la rawn phur let lo a, kil khatah ka ding ngawi ta reng a!
Mizo kan vanneihna hi chu YMA leh NGO ang ten kan ding a, Chhiat țhatna ah kan in mal tlat tir ngailo a, kan in ţawiawm liam liam ţhin te hi Mizo nun ti nuam tu ani tak zet bawk.

"Aw.. Dindin..?" Ka hnunglam ațang ka aw hriat țhan zet in min auh tak ah chuan ka thaw huai a.
"U Machhan."
"I rawn kal ve e law.. tinge tah khan i din reng a.." a rawn ti zung zung a, Faith-i a pawm lo a; a pum a puar ve lah tawh bawk.
"Aa.. Zothana te ka nghak mawle.." ka ti a, an inah hian vawikhat pawh ka la kal chhin lo a, tlangnel tak a awm chu thil harsa tak ani!
"Ka hrethiam e.. Thil thleng hi a mak teh thut e.." a ti sep. "A boralna a lo rei tawh ani awm e." A ti leh a.. ka meng nghal kawk mai!

"An sawi dan chuan a khumah mut kawr nen a lo khawng vek tawh, ni 2 emaw chu ani tawh ang.." a ti a.. ka hmul thi a ding nghal sung sung thei mai!
"A va mak.." ro zetin ka ti chhuak thei țawk! "Zothana khan call a tum reng ţhin a.. a mak e.." ka ti leh tawp, ka sawi tur hriat chhun ani miau tlat!

"Brada'n a sawi a.. Zothana inthiam lo hmel lutuk kha hmuh hrehawm a ti ngiang mai! " a ti a.. Ka thawk hi a tawp mai dawnin ka hria.
"Aa.. tinge maw thil ţullo zet ka sawi le.. Brad pawh hospital ah a kal ve a, an rawn let ţep tawh.." a ti zawm ta vat vat a! Mahse ka rilru ah erawh mahni inthiamlohna ka nei lian ta hle thung. Zothana khan Goa ah min zui lo se chuan Lisa hi a venghim thei anga.. Chutiang chiah chuan tunah hian Zothana pawhin a ngaihtuah ve mek mai thei!

An rawn thlen chuan an chhungkhat hnai tak tak ho in ruang chu inchhungah an zawn lut a; Zothana hmel zuai ruih mai chu mipui kar ațang ka va hmu a, Goa ah kan nufa min zawng in a talbuai hrep a, zan a mu mang ngailo bawk, an chhungkaw sumdawnna a enkawl tel vek bawk a! Tunah hetiang thil hi a hmachhawn leh ta si a! A chau hluah hluah ngawt ang!

U Machhani chuan ruang zawn lut tu te chu a zui vat a, keipawh mipui ni deuh nuai nuai karah chuan Zothana lam chu ka pan ve ta vat a, mahse a bula hmeichhe ding ve ka hmuh rual chuan ka pen tawp nghal chawt a!
Nunhlimi chu ţap hrep tawh tih hriat takin a mit a sen ţan a, chu mai pawh nilo in Zothana darah a kuah a, Nunhlimi chuan Zothana dar ah si chuan a hmai a nawr tel tlat bawk a! Ka thin chhung hi ana nghal ngut ngut ringawt! Engtinnge an ni pahnih!

Nilo.. Ngaihtuahna țhalo putna hman pawh anilo! An lam pan leh mai ka tum a, ka thei der lo! An rawn inkuah phei lai chu mi à ang mai hian ka lo en reng a, tun a a landan ah tak saw chuan kei nilo in Nunhlimi saw a bula awm tur diktak pawh ani zawkin ka hria!
Kei chu a farnu hmelma ka ni a, Nunhlimi chu an chhungkaw zinga tlatlum tak! An natna te an inhnem tawn thei dawn a! Ka ngaihtuahna vang chuan ka na zual ta sauh mai!

Ka harh chhuak zawk a! Midang karah chuan ka tawlh lut nghal vat a, min kalpelin in chhunglam ah an inzui lut a, thikna rilru put hun chu ani miah lo! Mahse ka awm chhung hi ana ngawih ngawih thung!

Inchhungah pawh lut ve ta lo chuan pawnah ka țhu ve ta reng a, tlaivar turin țhalai an rawn kal sap sap a, Zothana leh Nunhlimi te ngawt ka ngaihtuah a, ka chunga Lisa thiltih zawng zawng a hre vek a, ka tuar phah zia pawh a hria a, Lisa a sunna chu ka bulah a sawi chhuak ngai dawn lo a; Nunhlimi a mamawhna a zual sauh bawk ang! Chu ka ngaihtuahna vang chuan ka thaw hlei thei dawn lo.. Thihna a thlen laia thikna rilru ka lo pu tlat mai chu țullo ka ti ve tho, mahse ka rilru hi ka thunun thei bik ngawt lo!

Ka bula țhu nu in phone a hmet eng chu ka en ve zawk a. Zinglam dar 2 a ni der tawh! Tumah hriat ka neih ve miau loh vangin intiharh pah a kal chhuahpui mai tur ka nei bawk silo, Zothana lah ruangkil in a awm daih anga! Ka kal ve tih pawh a hre kher lo ang!

Reilo te boruak dang hip turin ka kalsawn ta lawk a; kawtzawl a țhutthleng an remloh lai ah chuan ding in thawk ka la ham ham a, Inchhung lamah erawh an zai thawm a țha hle thung!

Kawngkhar lam ka inher let chiah tih ah Zothana leh Nunhlimi rawn inzui chhuak chu ka hmu leh a, Ka bul velah biruk mai na tur a awm tawh bawk silo. Zothana chuan min rawn hmu nghal tih hriat zet in ka lam a rawn pan zui nghal zat a! Nunhlimi pawhin a rawn zui a! Engtinnge he hmeichhia hi Mizoram a rawn thlen chhoh ve hman ka hrelo!

"Bawihi..?" Ka hma ah a rawn din run rual chuan za lo zet hian ka nui a, "I rawn kal kher duh a..!" Ka nâ nghal ngawih ngawih mai! Kallo tura min duh laiin Nunhlimi chu a kiangah awm turin a duh thung! Ka lo rinlawk ang chiah.. ka bulah Lisa a sunna thu pakhatmah pawh a inbun ruak ve miah lo ang!

"Let leh ka lo tum chiah.." ka ti ve ta ngawt a! Zothana taksa si chet in Nunhlimi a rawn ding ve ta hmiah a, a țap hrep tih a hriat in a mit a sen ram bawk.

" Ka kal tawh mai ang.. va lut leh ru.." pangngai taka lan tumin ka ti hliai a, A nau hmelma chu min mamawh ve tawp lo ang!
" Lisa boralna ah hian dem tur ber chu nang hi i ni tih i hria em?" Nunhlimi zawkin a rawn ti sep a, a aw ri chu a zawi! A mitmeng ling hlar chu ka melh let ve ran a.
"Goa ah khan atthlak zetin rawn kal lo ula chuan Zothana hian a farnu hi a venghim thei ang, mahse nang hian ila hrang a, Buaipui tu neilo in ni 2 chhung ngawt a ruang kha inchhungah hian a awm tawh asin.." a rawn ti leh tan tan a! Ka in sehruh ta țeuh bawk! A bula Zothana ding ngawi ngul mai chu ka melh zawk a! Ka nâ zual ta sauh bawk! A ngawi ngul a, Nunhlimi thusawi zawng zawng kha a pawm ve vek anih ka ring nghet ta hmiah bawk!
"... engvang in nge i rawn kal ngam ve zawk a.." ngeiawm lutuk in a nui hak a, chumi pah chuan chau awmang fahran hian Zothana taksa chu a ngheng zui ta hnawk a! Zothana buaipui let dan ah chuan natna tur bak pakhatmah ka hmulo! Tlan sawn san nal nal ka chak hluah hluah!

Muangchang in ka inher a, he laiah hian an ni pahnih inngaihsak lai hmu tura kal ka ni reng reng lo! Anmahni ka hnungchhawn rual chuan ka mittui a luang thla pap a! Zothana pawn Lisa thih chhan ah mawhphurtu lian ber ah min ngai tih lah a chiang reng! Nunhlimi chu duat tak in a buaipui zawm zat a! Kei chu ka kal ve duh kher ah te anih kha a buai bik !

"Ding rawh.. " Ka thinlung nghawr nghing vek thei aw zawi sup vang chuan ka ding dat a! Ka hawi let lo a, min panhnai lo tih ka taksa hian a hre zawm vat a! A awmzia chu Nunhlimi a la kuah tihna!

"I rawn kal tawh a, awm ve rih rawh, tunah haw na tur taxi remchang a awm miah lo bawk ang.." a rawn ti chhum vut a! Ka lungphu hi a che dawt dawt a, chu thil chu natna in a rawn hmet hit zui ngawt ngawt a! An bulah hian ka awm ve zel ang maw?

( STORY hi a tam tawh dawn lo a, a tawp lek lek tawh, chapter engzat ah nge a tawp ang tih ka sawi fak thei lo a, mahse kar tluan hi a daih tawh kher lo ang.. #Team TEDOY15K click click)