TE DOY 15K BY Abbra Reo Ririni Khiangte (Pitartei) (Completed)

[ngaia]

☆TE DOY 15K☆
Chapter 29
By
Abbra Reo Ririni Khiangte(Pitartei)



Ka pen lui ta tho a!

Ka taksa chhung na hit ngut ngut avang chuan ka ke pen thleng in a sak vek! Ka awm zawnah thawk harsa khawp in min hnawh bet tlat tu a awm bawk! Ka mittui vangin ka khawhmuh a phe ruai a! Engvang in nge he hmun hi ka pan ve kher kher?

Zothana hmel ka mitthlaah a rawn lang a, Ka mak ti hmel leh na tuar hmel kha chiang tak in a hmu ang, Mahse pawi ti hmel a pu lo.. chu thil chuan min tina zual sauh a! Ka nâ lutuk hi ka â thei mai dawn in ka hria!

Ka hnunglam ah thawm a rawn awm a,Taksa lumna ka hriat rual deuh thawin rang lutuk in ka hawi let nghal vat a, Hnunglam ațang Zothana'n ka taksa khawih tuma a kut rawn lek chhuak ka hmuh rual chuan ka ban pahnih chu ka dar zawnah ka dah chho nghal zat bawk! A tawp chawt a. Mittui kar aţang ka theih ang a rum in ka melh zui ta nghek ringawt! Ka awmdan hi a dikin ka hre biklo, mahse zanin chuan chuang tak in min siam tih chiang takin ka hria!


"Engthil nge diklo a?" A rawn ti zui nghut bawk!

Nunhlimi leh a bula hmeichhe pakhat lo ding ve reng chu ka melh zawk a! Hman ațang saw hmeichhe duhthusam zawng zawng zanin hian a mit hmuh lai ngeiin a tipuitling vek! Sawnu sawn keiaia Zothana'n a ngaihsak hun leh kei min hlamchhiah hun hi a nghak reng zel a, chu thil chu zanin hian a thlen tir ta reng bawk!

"Engthil mah a thleng lo.. Ka kallohna turah ka rawn kal ve mai anih ni." Nui lui sak pahin ka ti a, a hmel zuai ruih rawn lang chang ta ţalh ţalh mai chu en in ka nui leh sak kher a, in aţang ka chhuah chhan a bulah din a, a nu leh pa rawn thlen chhoh ve hma chu lo hnem ve ka duhna rilru zawng zawng kha chu boruakah a tham ral vek tawh!

Ngawi reng in ka inher zui leh ta hmak a, mitthi in a khuang vaw ri tluk tluk leh zai ri te chu an hla tial tial a! Lo kal lo tawp tur kha ka ni asin! Chuan kha thihna a mawhphurtu ber chu keimah maw?! Ha! Takzet hlawm hian.. ka nun duhtawk a infiamnana hmang a ka pumchhung a ka fa ngei ka chanphahna hmeichhe thih chhan hi keimah maw? Tinge a duh duh hian ka chungchang hi hetianga an sawi a na ve theilo ang hial a min mawh chhiat ţhin mai le! Zothana hmelah Nunhlimi khap tumna lang chhuak miah lo te khan min tinâ a! Ka pik hluah hluah hi ani tawp mai!

Zan a rei tawh a, Aizawl pawh khawpui a len tawh ang bawk in veng dang a mitthi awm vangin vengdang a nghawng pha ve tawh lo a; mitthi awmna veng ka kalpel chiah chu boruak a reh duk a, khawvar hnaih tawh a thla engkulh leh thlifim thaw heuh heuh bak thil dang hriat tur a awm lo!

Hmeichhe à tak ang maia in aţang ka kal chhuah dawn a Zothana mal lutuk ka ngaihtuah tel te kha ka tisual lutuk hi ka inkhawngaih letling zawk! Kha hmeichhia kha zanin hian hmu lo phei ila chuan Mizoramah a awm ve tih ka hre ve leh tawp nang!
Engkim hi a țha vek mai e!

Ka tlaivar ve turah Nu Liani te chuan an lo ngai ani mai thei! Gate an lo khalh țhap a, phone ka nei bawk silo, ka tih ngaihna hrelo chu gate thir ngheng chuan ka țhu ta reng ringawt a, midang min rawn hmu tu awm phei se chuan hmeichhe dukdak lo zet zan riahchhuah hrat angah min rawn ngai ngei ang!

"Awi.. Dindin, ngati ngawt nge a?" Chhunglam aţang gate a rawn in hawng ri rak rak a, ka mutthluk lai ka hre miah lo! Chiang lo zet in mut ka'n meng a, khua a lo var uai tawh a, a khat tawk in taxi leh scooty velin min rawn tlanpel phauh phauh a.

"I tlaivar ve emaw ka ti asin.. tinge i rawn let te chuan thir hi i rawn tihrik vak mai loh a..?" A rawn ti zung zung a, ka ţhu tawm reng chu ka darah vuan in min kai tho a, ka ţhu rei tawh bawk a ka kaihza tha a inpawt tel tlat mai!

"Tinge Zothana pawn i rawn let tih phone tal pawh a rawn sawiloh..?" Ti hlak pahin ka puan bih a bal kai chu a rawn beng fai thuak thuak a! Kei erawh ka na thar leh kher mai! Engvangin nge kei kha min ngaihtuah ngawt ang! A farnu thih chhanah anih kha min ngaih tawh!

"Phone i neilo tih a hrereng si.." ti leh sep pahin ka mitah tak a rawn en a, ka ţah a chhuak nghal țeuh bawk!
"Titeh lut ang i hmai a dang vek a nia.." ka insum hman lo chuan ka kuah ta thlawp a, Nu Liani țawng lai pawh a tawp zui chawt bawk! A ringa țah hlawp hlawp ka hlau chu ka hmui ka pet fan fan a, Nizan a Nunhlimi min țawngkhum laia a thusawi pawm ve ang hrim a Zothana lo ngawingul mai ka mitthla let zawng ringawt te chuan ka na ngawih ngawih a, In lamah ka let tih a hria a, min umzui kher lo anih pawn Gate min hawnsak tur tal pawn Nu Liani te a hrilh thei a, mahse chu thil pawh chu a ti chuang lo!

"Lut phawt teh ang ." Nu Liani chuan a tisep a, ka samah dimte in a chul hliau hliau bawk!
Inchhung kan luh hnuin coffee ka duh leh duhloh min zawt a, ka in chakloh thu ka hrilh a; min biak lehna pawh ngaihsak lo in inchung lamah ka chho a, Jayden chu Mami'n a room lamah a mutpui tih min hrilh tawh a, ka hmu chak viau a chu ka awmdan vang hian mahnia awm a rilru fim tak a inngaihtuah ka mamawh in ka hria a, Zothana roomah pawh lut lo in ka room tura a tih ah khan ka lut a, Khumah ka bawk zui nghal tawp a!

Ţah ka duh tawh lo, mittui hian chakna pakhatte mah min pek belh lo!

Ngaihtuahna hman dan ber tur pawh ka hre leh silo a, Mihring hi a thil tawn a zirin rilru te thleng hian a lo chauh tel ngawih ngawih theih a, rilru ber a chauh miau chuan mihring hrisel tak ţhin pawh a âwng rawp nghal rawk rawk ţhin!

"Mamma?" Ka fapa kut tereuhte nem thep si chuan ka biang a rawn beng ve thek thek a! Ka chau ngang aniang ka lo muhil leh ringawt tawh!
"Jay, good morning." Meng lui țawk țawk pah chuan ka phun sep a, min chhang lo in ka bulah a rawn mu thla ve thek a, ka lo kuah bet zui ve vat a.

"Mamma, khawnge apa,"

"Apa chu a buai a, a kal chhuak lawk a.."

"Night time ah pawh Mamma leh apa an awm tawh lo." A ti ve pang pang a, ka sawi fo tawhin ka hria a, a biang hi a puar deuh pep a, a țawng ve pang pang tawh hi chuan a hmui sen no chek hi a che ve niap niap zel!

"Nileng in Mamma bulah i awm dawn nia.." ka ti sep a, a thaw ve halh reuh anih chu!

"Apa chu khawnge a kal a.?" A che sat sat a, a sir zawngin a rawn mu a, ka kawrchhung ah kut a zen lut rak rak a, dan pawh ka tum chuang lo!

"Jay, mitthi awmzia hi i hria em?" Ka ti a, min melh kiau ringawt!

"A pawilo, apa nau kha a thi a, khi tah vanah a kal dawn a, chuvang chuan apa kha a buai lutuk a, Jayden leh mamma kha vawiin ah a rawn hmu thei rih lo ang aw.."

" Naa.. Mamma, apa bulah chuan kan kal ve thei lo ami?"a rawn ti nui nui a, chhang lo in ka taksa ah ka kuah bet zui ta vak a, a rak ve ṭung a, kei anu pawh min lawm loh lai hian ani hruai chung in kal ngat phei ila chuan... ka ngaihtuahna zet chu a!

Chawhma zawng chu kan nufa in roomah kan awm a, Zothana tablet dahna Jayden-a'n a hriat miau vang in a la a, khumah țhu chung in games a khel char char a, ka tho harh peih lo lutuk chu mak ka ti ru kher mai!

"Dindin, engemaw tal ei la..?" Nu Liani room a rawn lut ve chuan a rawn ti lang lang a.

" Nakin deuh ah.." nui lui pahin ka en a, a ner zui nawng a.

"Ruang vuinaah kan kal ve ang chu ka ti a.."
" Jayden nen inah kan lo awm ang.." ka ti vat a! A thawchhuak zui hliai a!

"Jayden, u Mami bulah lo zuk chhuk lawk la.." Nu Liani chuan a rawn tih zawm daih a, Jayden chuan kan pahnih chuan min en dun ve ha a!

"Tablet nen khan chhuak thla mai rawh." A ti leh a, Phur zet in khum ațang a let thla ve thak a, a chappal pawh bun lo in tablet keng chung chuan a tlan chhuak zui ta vat a.

"Nizan ah engthil nge thleng a?" Khumah a rawn ţhu thla a, keipawh ţhu chhuak in khum lu lamah lukham ka dah thuah a, thatchhe zet in ka ngheng zui zat a!

"Ka zawh che chu?"
"Engmah a thleng lo..!"
"Ka awih i ring ami? Hmeichhia ni mahla chhan awmlo in i ţap ngawt lo ang, he ina i rawn luh hnu ngeiah pawh thil tam tak i chungah a thleng leh tawh, mahse vawikhat pawh i țap chhin tawh em? I chhel tawk tih ka hria a, hmeichhe chhel tak hi chhan țha tak vang lo chuan a ţap ngawt lo ang. " a ti ta duah a, a mitah ka en zawk a, chhanna țha ka pek hma chu min zawt char char dawn tih a lang reng!

" Lisa thihchhan hi ka nih i ring ve em?" Ka sawi lai la lâ te chuan ka taksa chhunglam hi a nâ ngawih ngawih!

" Engvang ngawt chuan nge i nih ang.. tunge sawi a..?" Nelawm loh zet hian a ti hlak a! Ka nui tawi halh thung!

"Zothana khan Goa ah min zui ve lo se chuan Lisa hi a venghim thei dawn asin.. chutiang chiah chuan amah pawhin a ngai.." ka mittui rawn luang thla pap chu insut hraih pahin ka kawrban in ka hru tawk a! Zan thim chhah mup hnuaia Zothana hmel landan tak ngul leh Nunhlimi thusawi a pawm ve hmiah tih hriat zet a ngawi ngul lai kha ka hmu let zel a, ka nâ hi ani tawp mai!

"Chutiang in a ngai teuh lo, Zothana a kiangah a awm emaw, awmlo emaw pawh nise thihna kha a chunga thleng tur anih chuan a thleng dawn hrim hrim.." ka rilru natzia hria in hriatnuam zet hian a rawn ti a, ka kut a rawn hum vang vang bawk!

"Tirawh, thil ei la, vuinaah tal kan lang ve dawn nia, Zothana pawn a mamawh ang che.." a ti leh a. ' keihi min mamawh lo lutuk!' Ti a au chhuah nghek mai ka chak tak zet! Nizan te khan 'tinge ka kal ve duh kher?' tih anih kha min zawh!

"Ka rawn kal ve dawn lo.." ka ti hlah a, min mamawh ve lo tu te nunah in tahluh phet ka tum ngailo!

"Chutiang ngawt tur anilo, thil hriatsual palh vang mai mai a a tan a ni pawimawh lutuk leh damchhung a hriatreng tur hunah hian i awm lo anih chuan nakinah i inthiam thei lo zawk ang. " a ti leh a, ka rilru buaizia leh ipik zia hi hmu se chuan min turlui tawp lo ang mawle.

Kawtzawl lamah motor thawm a rawn awm a! Nu Liani chu khum ațang a tho chhuak vat a , ka room hman tukverh aţang hian kawtzawl lam a hmuh theih vek vang in tukverh lam chu a pan a.

"Zothana a rawn let anih khu.. inti harh la a rualin kan kal ve dawn nia. " a rawn ti a, awmze neilo lutuk a au chhuah nghek mai ka chak tak zet!

Nu Liani a kal chhuak a, kailawn ah ke pen thawm a rawn awm a, ka lungphu hi a rang zui nghal dawt dawt bawk! A chhan ka hrelo, ka nat lutuk vang nge ni anga thil dang vang zawk!

Nu Liani nen an inbe kawi leh ani mai thei! A reh zawk a, mahse reilote hnuah ke pen bawk chu a rawn hnai leh a, ka sa ham ham reng a, min rawn hmuh ve hma a tukverh ațanga zuanthlak daih mai te ka duh rum rum tawh! Nizan thil thleng vang khan ka nâ a; ka zak tak zet bawk!

Minute khat dawn chu thawm a reh a, ka thawchhuak tawh pawhin ka hrelo! A farnu thih chhan ka nih zia min hrilh hre tura rawn let leh ani thei a ngem?

Ka mutna room kawngkhar a rawn rik rak rual chuan ka hawi ta dawrh a! A rawn innem zau a . Zothana hmel tak ngul leh mit sen rum mai ka hmuh rual chuan ka in sehruh zui ta nghek a!
A rawn luh hma in duhthawh zet in thawk a la a, a rawn pen lut a; kawngkhar a pawh phui leh rual chuan engkim hi a reh zui duk mai!

"Insiam la, vuinaah tal i rawn kal ve ang chu!." A ti sup a, a aw rikdan a dik biklo, a chau ve hluah hluah tho tih ka hria a, mahse a țawngkam ah khan huat tur ka lo hmu tho! 'Vuinaah tal' nizan khan ka kal ve lo em ni?"

"Min mamawh ve kher ami?" Ka ti sep a. A rum nghut a, a hmel landan chauh hmel lutuk chu ka khawngaih ve tho! Mahse nizan thil thleng vang khan ka lungawi ngawt thei biklo!

"Bawihi, inhnial rih lo teh ang, ka nu leh pa an rawn thleng tawh a, vui hma in nang leh Jayden hruai turin kan rawn kal zawk anih hi.." a ti hlut a, 'kan' tu a sawina nge ni leh ta ang!

"Nizan thil thleng ah kha chuan kan tel ve kha i duh in ka lo ring lo ve ringawt a." Ka ti hlak a, zinglam dar 2 ah keimaha ka haw min ngaihtuahna a nei zui lo hrim hrim te kha ka haw hluau hluah!

"In hnial rihlo ang ka tih kha a chiang viau in ka hria, insiam rawh dar 2 ah vuina hun ani dawn.. " ti vut pah in kawngkhar lam a pan a, ka huat zia mai chu a! Nizan ah ka kal ve kher țul a tilo a, tunah lem thu min pe in a duh ang ang a min rawn kawhkual leh a tum a!
"Nunhlimi nen khan kal ula ti nia.."

"Zodinpui!" A rawn ti tâwk a! A aw lian leh ring lutuk vang chuan ka thawk hi a tawp mai dawn in ka hria!

"I duhtawk thei tawh em? Nawmchenna lam nilo in thihna lam anih hi kan sawi.." ti leh țhawt chungin a ban hrawlpui mai chu a vai vut a, " Ka chau rih ania.. min nek lui zawng in awm tum lo hram rawh.." a ti leh sup bawk! thu dang engmah chhakchhuah a tum tawh lo tih hriat zet in a hmui a chip zui ta hmuk a! Ka kawchhung lam chu a sa bulh bulh thei mai!

A kal chhuak vut chu rum zet hian ka melh zui ta hram a! Ka kal ve kher dawn em tih pawh ka la chiang chuang lo! Diktak chuan nizan thil thleng ațang khan rilru fim tak leh ngil tak ka pu thei thlawt lo a, boruak reng reng hi a hahthlak in a rit ngawih ngawih!

Ka thuamhnaw a roomah a sawn phei tir vek vangin a roomah ka lut lo thei lo, shower a nei mek tih hriat zet in washroom lamah thawm a awm sar sar a! A farnu a chan a , engang a mipa pa leh rilru puitling tan pawh thihna meuh hi chu dawnsawn a harsa ang tih ka hria! Hnem ve te ka duh a, mahse ka lak ațang a inkharkhip tlat a, chau ngawih ngawih a hmuh te kha hrehawm ka ti ve asin.. mahse hmeichhe dang a bulah an din miau vang leh he thihnaa mawhphurtu ang hrim a min puh hrep hnu kha chuan hlat ve mai loh chu ka tan kawngdang a awm miau lo!


Ka thuamhnaw mamawh tur ang ang chu closet ațang ka la chhuak a, Mihring inkarah hian inhriatthiam lohna pakhat lek a awm tawh chuan inngai leh inthlahlel em em te inkar hi a hrang hlawk thei a, tuna Zothana nen kan awmdan hi a ni chiah bawk! Goa ah khan rawn kal ve turin ka phut chhin miah lo asin, aman a duhthu in min zui a, khami hun kha a lak ațang hlatak a kalbo tura ka rilru ka siam lai ani a, Mahse min umzui a, chu tih laiin he chhiatna hi a thleng a, chu thil a an mawhpuh chu keihi ka ni leh daih a, Zothana hi hmangaihlo ka ni reng reng lo, mahse Goa a kal ve tura nawrlui tu pawh ka ni chuang lo! Chung thil chu a hre ve vek a, Nizan khan ka awm nawmna tur talin thu kamkhat lek sawi chhuak nise tunang tak hian ka nâ lo anga, a bulah zel ka awm bawk ang! Mahse chu te lek pawh chu ati reng reng hleinem!

Ka mamawh ang ang keng chung in room lamah bawk ka lut a, inhnuai lam reh deuh ţhiap ah khan Nu Liani pawh insiam turin a room lamah a awm ve anih ka ring ringawt.
Rawng dum hlang vek ka inbel a, room aţang ka kal chhuah rualin Zothana pawh a room ațang a rawn chhuak ve chiah a, a sam a la hnawm hlap a, casual pants dum hlap a ha a, denim shirt mawlmang zet si a ha leh tawp a, min hmuh ve rual chuan a thawchhuak huai a!
Ka kalpel a, kailawn ka rah țan tirh rualin ka hnung maiah a rawn kal ve vut tih a taksa lumna ka feel rualin ka hre thuai a, ka ţang nghal ţung mai.
"Nunhlimi a rawn tel ve ania.." a rawn ti sup a, step ka rap leh tur chu ka tawp zui ta chawt a! Ka awmdan ka tehkhin thiam dan ber chu tui luanglai hneh zet a lo khuap chat hmawk ang mai hian ka taksa a thisen luang lai hi an ding chawt!
Engtin mah ka chhang lo, ka kawchhung lam thleng in na thei zawng zawng chu an na kim vek!

Inhnuai lam kan thlenthlak rualin choka lam ațang Nunhlimi chu hmai bui deuh lakin a rawn kal chhuak a, thip zet hian min rawn melh zui ta nghek bawk!
"Kan kal thei ami?" Zothana a en dan leh min endan chu dang tak ani! A ţap hrep tawh tih midang hriat loh hlau ang hrim in a kut in a biang chu a khawih zui leh ta kher a!
"Nu Liani te kha an rawn kal ve dawn a, i ei puar thei maw?" Zothana chuan dam thlup in a ti zui sup a, ka kawchhung lam rawn ni bulh bulh vang chuan ka luak bawrh thei mai dawn in ka hria, kut hum ruh țeuh chung in Mami room lam ka pan zui ta hlawk hlawk a!
Kawngkhar nem hawng in thawk ka la zui kawk a, Ka taksa hi a sa huam huam bawk!
"Mamma, apa in min hruai ve dawn sin.."
"Ok.. i inpeih tawh chuan kal ang. " ka ti sep a, Mami'n a lo thlak vek tawh vang in ka kut ah a rawn chelh ve vat a, Nu Liani pawh a room aţang rawn chhuak in Jayden a rawn au zui lang lang a, choka lama mihring pahnih te kha ngaihtuah zui pawh ka duh tawh lo!

Kan nufa in kan inzui chhuak a, Sitting room a ka thil hmuh vang chuan ka tawp chawt a, Nunhlimi kha a ţap ani mai thei, Zothana'n a darah a kuah bet a, Nunhlimi'n Zothana kawr hnunglamah a țham bet tlat bawk! Natna ah pawh a kal thei tawh lo, ka â mup a, ka puakdarh thei mai dawnin ka hria!