TE DOY 15K BY Abbra Reo Ririni Khiangte (Pitartei) (Completed)

[ngaia]

Nu Liani'n kan inpeih tawh tih a sawi rual chuan Zothana taksa hrawl zet mai chu a che hrut a, Min hnungchhawn miau a, kan thawm an hriat rual a an hmel landan pawh a hmuh theih loh, Nunhlimi in la hrang chu a insut zui hlap hlap a, Lisa nen chuan an lo inpawh viau tak tak anih dawn kher saw!
"Apa.." Jaydena'n zawite in a au sep a, Zothana rawn inher vut chu a hmaiah tak lo ben sak sawk mai ka chak dan chu pui tak ani!

"Jay, kal ang u le.." a rawn ti sup a, Min rawn thlek deuh vang vang a, a taksa phen aţang min rawn en ve reng tu hmeichhe mitmeng ah chuan nuam tih hliah hliahna ka hmu in ka in hre ta tawp bawk!

"Dindin, engmah i ei bawk silo a, ka ngaihtuah che e mai.." Kawngkhar ah Zothana chu ka fapa pawm chung in a kal chhuak tawh, Nu Liani țawngri chu hriain a ding zui ta chut a!

" Salad ka siam sa tal saw ka pack anga car chhungah ei mai ta che.." Nu Liani vek in a rawn ti a, Lu ka thing nghat a, Kawngkhar bula chahbi bawr inkhai chu ka ban a, Zothanmawia rawn hawi let chu melh pawh ka melh peih lo hrim hrim!
" Engmah i ei lo a maw?" A rawn ti sup a, Mami zawkin Jayden chu a ban ta vat a, Nunhlimi tlangnel zet a Zothana Bolero lam pana a kal lah lah chu ka melh tel leh zauh a.

"Nizan a rawn let pawh gate pawnah sawn a lo muhil ringawt tawh.." Nu Liani'n bak hlak in a chhang let a. "Nang reng reng pawh i rawn thlah hmanlo anih pawhin call tal in a rawn let thu kha min hrilh tur i ni asin.. Tlai chaw pawh eilo in a rawn kal chhuak a, amah maiin i rawn let tir leh ringawt bawk a, tawhsual te a tawh i hlau lo ami?" Chahbi min laksak pah chuan a ti ta chiam a; " I hun tawn in a zir lo tih chu ka hria, Mahse hmeichhia zanlai tawhah mahni a khawlai dung thui lutuk a i rawn haw tir thei kha chu mak ka ti ve thlawt a che.." kawngkhar a kalh țha mawlh mawlh a; "Dindin, vui zawh velah kan let anga thil i ei dawn nia.." min biak leh chuan a aw a dam leh diai tawh, min ngaihtuah ber ang mai a min melh run tu chu en pawh en duhlo in ka kal pel a, Nunhlimi tukkhat chawei lo ringawt pawh ngaihsak hle thei tho si!


Bolero bulah kan lo nghak ţhap a, thil ngaihtuah bing hmel zet hian a rawn kal phei a, Nunhlimi chu tumah in kan biaksak lo hrim hrim, a thil duh ber keiaia Zothana ngaihsakna leh duatna pawh inchhungah ngei a dawn tawh bawk kha maw! A hmel landan ah Lisa sun viau angin lang mahse a thinlung chhung tak saw chu a nui ver ver reng ang!

Zothana'n chahbi hmang a lock a rawn hawn rual chuan Nunhlimi zawkin front kawngkhar a pawt hawng tharh a, Ka nâ tawh lo, an duhtawk in han khawsa kual vel tawh teh se!

Hnunglamah ka ţhu lut a, Zothana'n a rawn sawisello bawk a, Nunhlimi a țhu lut a, Jayden lah kan boruak hrethiam ve ang hrim in Zothana a bawhbuai zui ta miah lo a!

Motor chhunga a luh hma chuan darthlalang chhan ațang min rawn en run a, Tunah tak min ngaihsak thar chiam pawh ka ngai lo chiang e mai a!
Motor chhung boruak pawh chu a ni mup ti ila a dik ang, Nunhlimi'n Lisa a uizia a sawi zui sep sep reng a, Fel a tih zia leh a unaunu ang chiah anih zia te.. Aaaa.. a tam mai, a țawng tawp lama ţah insum hmel zet a a'n insut leh hraih ţhin phei chu va ben tak chawrh mai hi ka duh ru hial tawh!


Front darthlalang aţang Zothana chuan ka awmdan reng reng chu min rawn en zel a; tukverh ah ka dak chhuak a, A farnu boral laia rilru mak pui pui ka pu tlat hi dikin ka inhre biklo, mahse keimahah hian thunun theih siloh thil dang a awm ve tlat a, tunah tak phei hi chuan ka awmna hmun hian zir ngat se chuan ka ţap chhuak hlawp hlawp thei ang! Chutiang khawp chuan ka nâ in ka taksa chhung hi a tawt ţun mai!

Bolero a din chut rual chuan ka hawi kual thuak a, tukverh ah dak chhuak reng mahila engthil mah hmu miau hek lo î !

"Engemaw tal i eitur ka rawn la ang!" Zothana phun sup pah a kawngkhar hawnna a vuan ta vut chu ka haw tak zet!. "A ţullo, engmah ka ei chaklo.." ka ti hlak a, Nunhlimi lo ner nawng chu ka va hmu ta hram a!

"Nimin tlai aţang engmah ila eilo ani lawm ni?" A aw a nelawm bik teh chiam loh!
"Ka țha, tlan tlang rawh." Ka ti sep a, Beidawn hmel lutuk mai a a thawchhuak hawk chu ka melh zawk a! Min ngaihtuah tak tak te pawh a ang ve alawm!
Lisa te in kan thlen hma chu tumah kan ţawng tawh lo a, kawtzawl ah motor a hun theih miau loh vangin in ațanga hla angreng takah motor chu a ti ding a, A chhuk thlak hmain front glass aţang min rawn en leh hram bawk!

Kan vui zo a, Lisa nu a khawngaihthlak nangang mai! A ţap rawng rawng a, thlan chhungah kuang an thlâk thlâk dawn phei chuan a khawng ti tih a, Zothana'n a kuah bet tlat a, ka lak a hmeichhe tawhkhirh tak leh lu zo veh vawh ,min chaldelh ngawih ngawih tu kha ani tih pawh a hriat tawh loh! A fanu mal a chan a, a thinlung pawh a kehchhe tel vek ngei ang!

Thlanmual aţanga kan let dawn thleng in a la buai a, Zico hmel hmuh ka inring deuh a, mahse hmuh tur a awm lo, Rachel leh Brad te nupa an ni tawp a, amah ka hmuh chak vang hrim hrim nilo in a hmeichhe hmangaih hun hnuhnungah tal chuan a rawn lan ve ka ring kha ani a, mahse thlan chhilh hnu thleng pawhin a hmel a rawn lang ve ta miah lo!
Zothana'n a nu a buaipui vel chu ka en reng a, Car ah a ţhutluh tir a, seat belt a hren tir thlap a, apa a ţhut luh ve hnuah a nu kut chu laksak in a hmuiin a nawr a, tiang chuan reife a awm a, a hmel landan a thutak in thutiam nei hmel a pu run mai bawk!

Anu te tlan chhuah fel hnuah muangchang in kan lo nghahna lam chu a rawn pan a, Jaydena'n a ban pahnih pharin a lo ban ve vat bawk a.
"Jay inah ka drop tawh ang che u aw.." ti hlut pahin a pawm kang a, Min rawn melh a. "Ka lawm e.." zawi sup in a rawn ti zui sup bawk! Engvanga lawmthu min hrilh ringawt nge ani tih ka hriat loh rualin a aw a chauhna leh in bunruah a mamawh ngawih ngawih tih hriat zet a zuai ruih rawn lang chhuak ve khan keimah a thinrimna leh thawk ipik na zawng zawngte kha a rawn hnawt bo duak thung!

Muang ruih in Bolero chu a khalh a, Nu Liani'n Lisa chanchin a zawt zui mial mial a, Nunhlimi khan engang pawn motor chhungah khan sawi nasa mahse tumah khan kan ngaihthlak sak tak taklo tih Nu Liani rawn zawh danah chuan ka hrethiam ve ta mai bawk! Diktak chuan țawngka ringawt a thil sawi ţhinte hi hriat hran an harsa lo a, Nunhlimi khan a țawngkam ah chuan sun ber ang in a lang nameuh mai ! Mahse keichuan a chetdan ah khan a sun tak tak ka tihsak ve thei miah lo, a sun ve ngei ang mahse lemchanna a tel ka ti tlat a, ka hriatpui ve siloh Zothana nen an inkarah a awmzia kha lantir a tum ber niin ka ngai tel tlat bawk! Hei vang tak pawh hi ani ang, Thu aiin chetzia ah lantir in a fiah zawk an lo tih ţhin!

Jayden pawh mut chhuak tih hriat zet in a zawi ve ta hniang a, tih mut leh ting tang nan in a hla tawh lo a, mahse ka awmah ka kuah bet ta tho a, Nunhlimi kha chu an chhungkaw zinga mite rualin a let ve a, an chhungkua ah chuan a lo tlatlum tak tak ani ngei ang, tupawh in an be țha em em vek a, midang nuna va intahluh dan a thiam in pawimawh ber ang maiin a lang thiam a; Zothana chhungte lamin an biak ţhat hlek rualin a mitmengin kei min zawng ru nghal zel a, engtin nge khatiang khan a awm theih tih pawh ka hrelo! Nâ se min ti hi ani tawp ber mai!
In kan thlen rualin Mami'n tih mut tumin Jayden a hruai hrang a. Zothana chuan motor chahbi chu a dah ţhinna ah dahin thawk a'n la hawk a! Nu Liani pawh inthlak turin room lamah a kal zui ve ta vat a, he inah hian thisen a inzawmna neilo vek kan cheng ho a, mahse chhungkaw dangte an inngaihsak ţhin ang chiah hian kan inngaihsak kim ve vek chuan ka hria!

Room lam a chhoh ve mai ka tum chu Zothana'n ka banah a rawn hmer zui ta chawt a, ka bula alo kal hnaih lai ka hriat loh ang bawk in ka lo inring bawk silo nen ka khek chhuak țhat thei!

"Lo kal rawh, eitur ka siam ang che." Zawi sup in a rawn ti a, Ka thawchhuak ta vak ringawt!
"A ngailo, let leh i ngailo ami?" Ka ti țha ve ta mai a!
" Nakin deuh ah ka let ang, nangmah nen.." a rawn ti sup a, ka banreka vuan reng chung chuan a lamah min pawt hnai a, ka țang bik lo, dimte in a awmah min kuah bet a, a hmaiin ka nghawng a rawn nawr rual chuan a thawchhuak zui ta ham ham a! Tah chiah chuan engtiang taka chau nge anih ka hrethiam ve ta chiah bawk!
A taksa hrawlpui mai chuan min rinchhan ti tih a, a thawchhuak ham ham reng a, a hnunga chul sak ka tum rual chuan Nunhlimi nen an lo inkuah lai kha ka ngaihtuah chhuak zawk a! Ka taksa ngei pawh chu a țang khawng zui nghal lah bawk.

" Eitur chu i duhlo tak tak maw?" Hnawk țuak in a rawn phun sup a, a hmuiin ka nghawng a rawn nawr zui zat bawk!
"Hahdam i mamawh anih kha.. han mu rih rawh. " ka ti sep a, dimte in ka banrek ațang a kut a la sawn a, ka taksa ah a ban a rawn suih bet ta vek a.

"I sawi dikin ka hria; hahdam ka mamawh.." mut chhuak hluah hluah aw ri hi a ang ber!
"Han mu chho rawh." Ka ti vat a, a nui che ta dawt a! A engah khan nge nuihzat tur a lo hmuh hman bik ni!
"Nangmah nen.." a hmuiin ka nghawng a rawn nawr leh kher a! A kawr hnungah chuan ka țham sak ta chawt bawk!
" Umm, reilote kan pahnih in mu lawk ang.." a rawn ti leh sup a; awmdan tur pawh ka hre ta lo! In kan chhuahsan hma lawk kha chuan a lakah hian ka thinrim hluah hluah a; ka puakdarh thei mai ang tih hlauhawm khawp in ka taksa chhung a ipik a, tunah lem! A landan chauh hmel lutuk leh a aw ri a min thlakhlelhna lang tel ve vang ringawt in amah duat chakna ka nei leh a! Ka in hrethiam teh hrep lo e!

Room lamah kan inzui chho a, a room kawngkhar zawn kan thlen chuan ka banrek ah a man bet leh ta tlat a, ka chho melh rual chuan za lo zet hian a nui suk a!
"Ka bulah mu ve rawh ka tih kha.. Chuan saw i room saw ka kalh daih bawk ang.." ti sup pahin a kut chalin ka room hman ţhin lam chu a kawk zauh a, ka melh ta ran a! A ni erawh tilui nimiah lo in a rawn nui chhuak ta hawk a!
" Inpui lamah min mamawh dawn si a, mu vat ang.." ti leh hluai pahin kawngkhar a nem hawng a, khum bula min kaih thlen rual chuan thawk che zet in a rum chhuak ta hawk a, a pheikhawk bun lai a tlawh phelh a, a landan pawr phang ah hi chuan damlo mai tur hmel te a pu hial in ka hria!

Hnunglam aţang ka kawngah a rawn kuah bet ta hlun a, ka darah a khabe a rawn nghat zawm zat bawk, a kut a chet a, ka sam a hui kian rual chuan dimte in a hmui in ka nghawng chu a rawn nul thuak a, Ka taksa a ṭang nghal ṭung thei, Ka danglam tih a hriat pawh ka duhlo.

"Min thlah la, muhil rawh" ka ti sep a, Zothana erawh a thaw ham ham ringawt! Hetiang a nghet tak a min kuah khawm vek chang hian amah ka rinchhan zual sauh ṭhin a, Ka hriat theih chinah Zothana hi nghet taka min kuah ţhintu ka neih awmchhun a ni, a taksa lianpuiah min pawm beh tlat tawh hi chuan thlamuang huai huai hian ka inngai țhin.

"Thil sawi dun ang!" Zawi sup in a rawn phun a. A kut pakhat zawk chu ka beksam karah a zen lut a. Ka nghawng ah bawk a fawp leh, Ka taksa chu a mur sung sung thei,awlsam zet in ka hnute hmur a ṭang nghal vat bawk.
A kutphah pakhat in ka kawr chhungah a rawn zen lut leh a, ka bra hnawl tawm chho a a rawn tuai kual thuak rual chuan ka thawchhuak ta hak a, Zothana chu a nui tih hriat zet in a taksa lianpui chu a rawn che zui dawt bawk, ka tih ngaihna hrelo chuan a ban chu ka kawrchhanah ka hmer sak ta vak a, ka lungphu phu rang dawt dawt pawh chu a hre ngei ang.

"I kut hi la sawn hmasa phawt la?" ka tisep a, ka aw mumal lo lutuk avang chuan ka in sehruh zui ta vak ringawt!
"Aih! Tihian.." a bawp in min rawn khan bet zui nghal hmiah bawk! Thawchhuak lo in ka awm vang vang a, Hetianga a chet reng mai chuan ka thinrim ve na te kha engmah lo ah chang in awlsam zet in ka lungawi ringawt mai dawn sin.

"Sawi rawh.."
" Ummm.. Nizan thil thleng vang khan ka tihpalh.." a rawn ti sup a, zawite in a banrek ka hmer na tha chu ka thlah riai riai a!
" A engah chuan?" Ka ti ta kher bawk!
Thawchhuak hawk pah in a kut a la chhuak a, Ka ruak nghal huai thei! Mahse ka darah a rawn hmer a, min kherh behna bawp a ti thawl zui ta bawk!
"Helam rawn hawi la..?" A ti leh sup a, ka inher a, mi â ber pawn a chau rimtawng tih an hre thei ang! A mithnuai a val phei raih a, a hmui a lang hil deuh rap bawk!
" Tlai ațang i rawn kal tawh tih ka hrelo hrim hrim.." a ti leh sup a, a hrelo reng ang, phone ka neih miau loh vang in ka be zui tawh lo anih kha..
" In ka chhuahsan rual khan hna ah pawh ni 2 a kal tawh lo tih ka hria a, in ka pan ding nghal a, hnathawk ho an chawlh vek lai alo ni kher bawk nen.. aa.. result ah chuan mutna damdawi a ei tam lutuk niin a lang a.. " a ti sup a, a thaw zui nghal ham ham bawk!

Report a a landan chu a ring ve lo tihna em ni ta ang?

"Thil thleng khan min țhawng ve a ni tawp mai ! Ka farnu, ka kalsan tirh che a i kum aia u hret anih aţang ka enkawl tawh kha tûma dawm hlum loh leh hmuh loh in a lo zo der a... Engkim kha rilru fim tak in ka ngaihtuah thei miah lo bawk! Chiai hman ka nilo tih ka inhriat rual khan ka mit hmuh loh a a kal fel der kha ka indem a, indem tak ka ni.. nang pawh rawn biak lawk nachang che ka hre miah lo.. Hmeichhe tleirawl te khum 16 mi lek anih ațang pangchanna tur a neilo a, nang ang chiah khan ka lakah a pangchang a, nu leh pa la nei mahse an ni lak ațang khan ngaihsakna mumal a dawng ngailo a, nang in kei chiah min neih ang bawk khan ka awm ve hnu aţang chuan kei chiah kha a neih ka ni ta mai a, ka duat phah ta reng bawk! Ka farnu duat em em mai tûma dawmhlum loh a a kal ta ngawt ah khan dem tur tumah an awm lo, keimah chiah hi ka ni dem tur chu!.." harsa zet hian a rawn ti chhuak hrawih mai!
" Mahse Nunhlimi'n keimah min puh lai pawh khan engmah i sawi loh kha.." ka ti sep a. A thaw hawk a, chiang zet in ka mitah a en run bawk!
" Keipawn Goa ah ka kal ve kha ka indem alawm.." a ti zui sup a! Ka nâ zual ta kher mai!
"A ţha, engkim kha keimah vang a thleng anih kha.." ka tho chhuak tur chu rang zet in min man bet a, tal chhuah tum in ka che zui ta nawk nawk bawk!
"Duhtawk rawh..." ti țhawt chung in ka darah a man a, min thing zui nawk hi ani ber! Rum zet hian ka melh let ve ta reng a!
" I thiamlohna a awmlo ang bawk in ani thusawi kha ring nghal ngawt zel suh.." a ti hluk a! Ka va haw tak em! Amah pawh in Goa ah a kal ve vang anih thu a sawi zo chiah si!
" Min puh fai vek law law ru.." ka ti zui chiam a! Beidawn hmel zet in a thaw hawk bawk.
" Goa a kan awm hlan ani emaw Mizoram chhunga kan awmlai anih pawh in kha thil kha a thleng dawn tho.. " sehchilh zet in a rawn ti hrawih a, ka melh ta reng a! A hmel landan a hlauhawm in a in sehruh nasa ta kher mai!
"Engnge i sawi tum?"
" Chu lam chu nakinah kan la sawi dawn nia.. Mahse nizan vang khan ka tihpalh.. "
"Oh.. Zanlaiah keimah a min haw tir vang te khan maw?" Ka ti kher a.
"Aw.." hmela mai mai chu!
" Min thlah nghal rawh." Ka ti hlak a, ka dar a țhamna kut chu phelh sak ka tum a, Min hmer na zual ta sauh a! Ka ruh thleng in a na zui ngut ngut thei!
" I thu i duh lutuk vang leh min ngaihthlak ngai bawk siloh thil thleng ah he thil hi a tir chuan ka ngai ve tho! " a rawn ti sup a, ka hit khawng vek! "Ka um buai reng ngaiin i khawsa a, keimah lam reng reng inngaihtuah buai hman lo khawp a mangang in min siam a.. khami ţum pawh khan ka thusawi zawm in let lehnghal ni ila chuan he thil thleng hi ka dang thei ang tiin rilru ka pu hmasa ber!" A thusawi reng reng chuan min deng dawt dawt hi ani tawp mai!
" Chu thil chu nizan i let hma thleng pawh a ka ngaihdan ani bawk!.." chuvang tak chuan Nunhlimi min țawngkhum lai te khan a thusawi pawm zet in a lo ngawi ngul a! Hrep tak hlawm hian a!
"Chutiang zawng zawng i ring vek anih te chuan min kal tir rawh.." ka ti sep a, ka aw zawi tak chu a hre kher angem ka hrelo! Ka nà tawk bawk e!
" Mahse a chhan chu i ni silo a lawm.."
"Ha.. i thusawi zawh chiah kha i hrelo ami?" Nui lui hak pahin ka melh let ve ta ran a!

" Lisa thihchhan i nih loh ang bawk in kha ka rindan pawh kha a diķ chuang lo.. ni e.. ka rilru kha a insual buai nasa ve a.. lo ni ta zawk se tih thleng in ka hrutkual kim dap! Ka hriat tak zawng chu nang hi mawhphurtu i nilo.. Lisa kha remruatna fel tak hmanga thah ani zawk.."

Ka ip zui ta chawih mai! Vawt in min rawn țham zui ta sung sung a! Dam zet in a kut hrawl zet chu ka beksam ah a rawn zen lut a! Ka chawmawlh vek ani ber!