TE DOY 15K BY Abbra Reo Ririni Khiangte (Pitartei) (Completed)

[ngaia]

"Lut teh ang. Tlangval awm țha duhlo thil ruk tur zawng vel ani mai thei.. " a ti leh nghut a, kan rindan inanglo lutuk chu țah khum vak mai ka chak zawk! Mahse Zothana khan Lisa hi thah ani tih a bulah a sawi ve miau loh chuan tuna a thil rawn sawi bak kha han puh tur dang a awm der mai bawk silo! Kan kalsan tawh lam chu ka hawi let leh hram a, Theihai kung hrim hrim saw a len vang leh a zar a buk țhat tawh vangin a bul vel chu a thim mup a, boruak dang ta zar leh hit er er in min ţham tel tlat tawh! In sehruh țeuhin ka hawi let a! Ka hnunglam hi a za zui uai uai reng bawk!
Inchhung kan luh hma in Zothana a rawn chhuak ve ta hlawl a! Ka tha a khur ru tih Zothana hmel pa zet ka hmuh rual chuan ka hrethiam ve ta chiah bawk! Min pan ding nghal vut a, ka ngaihtuahna ah thil ţihbaiawm zet zet a rawn lut zut zut a, tualthattu diktak chuan he in hi a la rawn thlithlai ru reng tihna ani thei mai angem?

"Bawihi..?" Ka hmaah tak a rawn ding chut a, a rawn kun hniam a, "Khai aw! Engthil nge thleng a..!" Ti hluai pahin a awmah min kuah bet ta vek a,a taksa lum vung vung ah min kuah bet vek tak ah chuan ka taksa hnunglam za uai uai kha a reh fel ve thei chiah!
A lungphu ri dat dat chu ka ngaithla ran a, ka hriat loh karin ka kut ka lo hum ruh hman hle bawk!

"Engthil nge thleng a?" A ti hluk a, kei nilo in Kc-a zawk a bia tih ka hria.
"Theihai kung hnuaiah sawn mipa pakhat a lo awm reng a,.. Man ka tum a, mahse a zuang chhuak hman.."
"Ka hrethiam e.." Zothana zawk in a ti sup a, nghet leh zual in min kuah a, ka chalah dimte in a hmui a rawn nawr leh a! Engvanga hlauhna in ka thau hi man tlat nge anih ka hrelo! Ka khur ru leh dar dar ṭhin vang chuan chil ka ha'n lem dawk a! Ka thawk erawh a sa phat thung!

"Inchhunglam ah lut ang aw.." a rawn ti zui sup a, a taksa chu a che deuh a, reilote hnuah Kc-a ke pen sawn thawm ka hre zawm zat a, ka kâ ațang boruak sa ka thawchhuak ham ham a! Mahse ka taksa chhunglam erawh vawt in a hmet kual er er thung!
"Bawihi... Hahdam hmasa rawh.." a rawn ti leh sup a. "Tinge maw khang thil kha ka hrilh che le.. Lisa chunga kut lek tu hian i chungah kut a lek dawn lo tih ring la, hlauthawng suh aw.." a hmuiin ka beng a rawn nawr a zawi sup tak takin a phun a.
"Ka hria alawm.." ka ti sep bawk.
"Umm.. hahdam rawh le, I thil hmuh nen khan ngaihbel duh suh, rukruk tum pakhat in kan chhiat tawh lai hi remchang ah rawn lak a tum ve mai anih kha.." a ti zui sup a, amah ang a taksa nghet țha neih a, kan thil hmachhawn apiang huaisen tak a tawntlang ve zo khawp a chakna leh rilru huaisen neih ve ka chak tak zet!
Reife hnuah min kuah khawmna ban chu a phelh thawl a, amah zawk pawh a thaw deuh huai mai!
"Lut ve tawh ang le. "
Ka biang ah a kut pahnih in a rawn khuap leh vang vang a! "I duh chuan inah ka drop thei tho che ania." A ti leh sup a, lu ka thing zui ve ta nghat thung!
"Ka țha tawh, thil thleng khan min țhawng deuh mai chauh alawm.. lut ang. " ka theihtawpin ka nui lui sak a! Mahse a mitmeng thim raih ah erawh ka taksa chhunglam a ţang ru țung hi a rawn hmu thiam vek thei maiin ka hria.
Inhnung lam aţang luhna kawngkhar bul kan thleng tawh a, mahse ka ngaihtuahna ah thil pakhat a rawn lang zui ta zawk a!
"Zothan.." ka darah kuah in min melh chhuk nghal run mai!
"Ih.. Nunhlimi'n a rawn call khan i nu chanchin a sawi miah lo. " ka ti sep a!
"Umm. Ka ring alawm, ani kha chu engahmah ngai duh suh.." ka dar a tuai zauh pah chuan a rawn ti sup a! Ka bu ve ta nghat a!

Kha zan a thil thleng bak kha engmah thil danglam thleng a awm tawh lo a, Zothana pawn engmah a sawi chhuak tawh lo, chu tih rualin phone a hmang tamin a lehkha chhiarna roomah inkhung deuh tlut tlut a ching a, An In lamah kan kal awllo a, Jayden school ah kan drop a, an inah kan tlang leh nghal mai ţhin! Sawi chhuak miah lo mahse Lisa thihna hi a tuar ve tho tih a lang a, mipa ani a, Keini hmeichhia in kan thil vei kan sawi zung zung ţhin ang hian mipa te hi chuan an thil vei leh rilru a an ngaihtuah te hi an sawi chhuak ve mai mai ngailo a, chu tih rual erawh in a nau thihnaa mawhphurtu erawh zawn chhuah a tum nghet bur tih a chet lak dan ațang a chiang em em lawi thung! Zico hming vawikhat pawh a lam chhuak ngailo a, keihian Lisa thihdan ka ngaihtuah chhuah chang in rang zet in Zico hming ka ngaihtuah tel ve ziah zel! Engvangin nge a hmeichhe hmangaih thattu ah chuan ka ngaih ngawt ti a ka inzawh let apiang in tunang khawvelah chuan mahni nupui te ngei pawh an that hreh tawh lo a ! Ka chung ah rawng taka a che thei anih chuan a thinthawk insum hmanlo in engemaw tak a ti hreh miah lo ang tih hi ka ngaihtuah tel ngei ngei ţhin!

Lisa thih aţang vawiin hi a karkhat tlinna chiah ani a, Anu in a tuarin a taksa in a chhiat phah nasa em em a, Zothana'n an in lamah min hruai ve ţhin a, Jayden pawh class a kal leh tawh a, kei erawh in ka thawh zawm ta lo! Nunhlimi a phusa kual in midang mit la a, Lisa sun ber ang a awm a thiam a, chutiang bawk in Zico a reh zui ta hmak thung!

"U Machhan.." phone a chhan rual chuan ka ti vat a,
"I țha em? Kan va in be khat ve?"
"Ka țha, Faith a țha maw?" Ka tih zawm zat a, Zothana te inlamah kan leng phei leh a, Lisa nu leh Nunhlimi roomah an inkhung tlat a, inleng an awm mang tawh bawk silo, Zothana leh apa lah engemaw thil pawimawh sawiin an inbia a, inhnung lamah pangpar huan awmah khan ka kal chhuak a, uluk taka enkawl tih hriat zet in engkim mai chu a vul chuk hi ani ber, pangpar bulah thir țhutthleng an dah a, boruak thar dawn pahin ka ţhu chhuak ta daih bawk!
"Hei âwmna a kai a, Tunah khawnge i awm?" A rawn ti lang lang a.
"Lisa te in lamah.." ka ti sep a, chumi rual chuan Theihai kung lian zet lam kha ka melh pah zawk a!
"Awi! Kei pawh ka leng leh hman tawh lo, Faith-i hi a pik reuh lutuk a! " a rawn ti halh a,
"A zialo reuh e, lo dam thuai thuai rawh se, Englo a nia.." ka ti sep a, ka tîm leh deuh si avang in ka tawp dat a! "Zico chanchin hriat i nei em?" Ka ti chhuak halh a, a chhan chu a bo hneh lutuk hian ka ngaih a ti țha thei lo! Ka him zuiah ka ngaih phah theih bawk silo a, kil khat aţang rawn lang thutin min beih ka hlau zual tîng bawk!
"Zico maw? A chanchin ka hriatlohna a rei tawh lutuk.. tinge?" A rawn ti halh a, tun thihna chungchangah a hmel a rawn lan miah lo te hi ngaihțhatlohna an nei ve lo hial zawk em maw ni?
"Ka zawt mai mai che.. Tun boruakah hian a rawn lan ve ka ring a.." ka ti sep a..
"Nia, a reh hmak a, Brad ka lo zawt ang, chuloah Lisa nen an inkar te chu a tawp daih tawh a lawm.." a rawn ti a.
"Maw?" Ka ti nghal haw mai!
"Umm, Lisa nen an inkawp tawh lo alawm, Lisa hian a inah a luhchilh a, mahse kar 2 vel a liamta in ka hria, Zico-a'n a chhuah tir daih tawh alawm." A rawn ti a; ka beisei loh lam daih ka dawn vang nge sawi tur pawh ka hrelo.

"Ok.. ka lawm e.." ka ti sep a, engvanga lawmthu sawi ngawt nge ka nih pawh ka hrelo!

Inchhung ka luh ve rual chuan kailawn aţang Nunhlimi leh Lisa nu an rawn inzui thla ve chiah a, Min hmuh rual chuan Lisa nu zawk chu a ke pen a tawp zui chat bawk! A țah hrep tawhna hnu mit bui lak ah chuan min huat hluah hluahna meipui a alh hluah hluah hi ani thaw thang mai.
"Chhuak rawh.." a rawn ti țhat a! Meipui in a hliau puat hi ka in tehkhin ber!
"Ka sawi chu i hria em? He inah hian vawikhat pawh rawn pen lut ve tawh suh, ka fanu kha nang hi awmlo la chuan a la dam ang.." kailawn aţang a rawn pen thla hlawk hlawk a, a hleitlingin tun a huntawn vanga sam pawr phang leh hmel hil deuh bâm te nen chuan a lan dan chu a rapawm hluah hluah hi ani tawp, ka ban bulah a rawn hmer chawt a! Hnai chet chawtah min rawn melh a, a chhan ka hrelo! A mitmeng sen ram leh rapawm zet vang chuan ka ţîm sawk thei!
"Chhuak rawh.." ti leh fak chung in kawngkhar lamah min hnuk phei ta dawr dawr a, engthil nge a chungah thleng a vawi leh khata min huat tak chiam chhan hi ka hrelo, khang ni liam ta zawng zawng ah khan he inah hian kan kal a, min be ngailo a chu vawikhat pawh tunang hian a awm ngailo! Kawngkhar aţang a nem in min nem chhuak zui ta dawrh a!

" Vincent-a in ațang thehchhuah tel kher i duh te anih loh chuan ani pawh hi lo hnaih tawh suh ang che.. Nangmah vangin ka fanu ka chan tawh a, ani nen inzawmna in neih ka phal ngai dawn lo.. kan chhungkaw hmuh theihah i rawn inlan leh anih chuan nang leh i fapa chungah khan engthil mah tih hreh ka nei dawn lo ani.. chuan.. Vincent-a in ațang chhuak bawk ang che.." a aw a ring tawh lo, mahse a thinrim lutuk vang in a khur a. " Nunhlimi leh Vincent hi ka inneih tir dawn a.." a thusawi vang chuan ka nghing dawt! " I dinhmun in hrechiang la, kalbo ang che.. Chuan tun boruak aţang hian Vincent-a'n tunge a bula awm tura a mamawh zawk tih i hriatthiam ngei ka beisei.." rapawm zet a nui sak pah in a kut min khawihna hnu chu ten hmel zet in a beng thuak thuak a!
" Aman a bansan hmasak kher che i nghak duh anih chuan i thu thu! Hmeichhe â nileng nilo la chuan nang aia Nunhlimi a mamawh zia leh a thlakhlelh zawk zia hi i hrethiam ang.. Kal tawh rawh.." sehchilh zet a ti leh sep pahin inchhungah a pen lut a; kawngkhar a pawt khar zui ta hmak a!

At hmel zet hian kawngkhar hmaah chuan ka ding reng a! A thusawi zawng zawng khan min țhawng in min hmet nâ vek!

Vawi lehkhat ah kawngkhar chu a rawn in nem hawng pawp a, bang ah kawngkhar chu a inhlap ri chawrh a, Thinrim insum zet a Zothana rawn pen chhuak pawk pawk mai chu anu in a rawn umzui ta dawr dawr a! Ngaihtuahna mumal tak pawh ka pu hlei thei lo! Inleng an awm tawh lo chu tuna thil thlengah kher kher hi chuan a lawmawm hluah hluah!

"I ţha em?" A rawn ti chhuak hrawih a!
"Vincent?" Anu in a rawn ti ve chul bawk!
Zothana chuan ka banrekah a hmer chawt a! Ka lakah a thinrim miah lo tih hremah ila a landan hi a ngainatawm chuang miah loh!
" Ka thusawi kha i hrethiam lo ami.. He hmeichhia i buaipuina lamah ka fanu ka chan tawh, nang leh zel hi chu a la hrang thei tawh lo che.. i farnu thlarau tal kha zah la ka thusawi hi zawm hram rawh.." ţap ti tih hian a rawn ţawng chhuak nawk nawk a! Ani pawh hian Lisa thih chhanah khan min puhfel der tawh!
"Nu, Lisa thihna ah khan Bawihi hian inhnamhnawihna a neilo tih hi vawi engzah nge ka sawi ngai dawn.. !" Zothana chu a ti tâwk a! Anu hmel landan a rapawm zual ta sauh bawk!
"A bum mai mai che anih hi..." Zothana rilru hneh tum in a rawn ti ta chul a! Ka nâ ve zak mai!
"Va lut tawh rawh, Bawihi hi i lawm loh chhung chu keipawn ka rawn ngaihsak reng thei biklo ang che.." a ti tawl a! Ka en nghal dawrh bawk!
"Tunah khan engthil maw i sawi kha?"
"Bawihi hi i lawmlo a, tun anga a lakah i che zui reng dawn anih chuan ka rawn ngaihsak zawm thei tawh lo ang che ka ti anih chu.." a ti chhum hmuk a, kawtzawl a Bolero a hunna lam pan chuan min kai zui nghal dawr dawr a! A thusawi kha a tih tak tak loh hram ka beisei!
.
Hneh takin min pawt dawr dawr a, ka hawi let a, a dinna ațang chesawn miah lo in anu chuan min lo en zui reng a, Zothana khan min chhan tih chu ka hria a, Mahse tuna a țawng chhuahdan khan anu saw na takin a siam thung!

"Lut rawh.." kawngkhar pawh hawn nawk pah chuan a ti sup a, chiang zet hian ka melh ta reng ringawt!
"Bawihi?" A rawn tih leh sup rual chuan beidawng zet hian thawk ka la a! Ka ţhu lut a, Zothana chuan kawngkhar a rawn nem phui leh dawt a! Motor kal hual a a pen pawk pawk chu ka melh zawk a! An inchhung aţang Nunhlimi kha a rawn chhuak ve a, Zothana nu chu a rawn kuah a! Keini pahnih chu min rawn thlir zui ve ta reng a!

Zothana rawn ţhu lut ve tur pawh chu a hawi let zawk a! Keimah vangin a nu kha khatiang in a țawngkhum tur anilo asin!