My Arrogant Husband BY Becca Lnz (Completed)

[Rebec Nunziri]

Chapter-7



Stacy Ramthansangi POV




Ka hmai ah chuan tui ni awm tak a rawn far fap fap avang chuan peih lo zetin ka meng chhuak a, chutah Mza ka hmu nghal zat, ka harh tih a hriat chuan a nui suk a, a hmeltha takzet, "Tho ve tawh la, chaw ei a hun tawh a nia" a rawn ti chhuak sup a, "Dar engzah nge?" mut la chhuak em em chunga ka tih chuan "Dar 8 a pel tawh" a sawi zawh rual rual chuan ka thu chhuak nghal hlawl a, bang a sana in tar ka en chuan mak ka ti hle, hetiang anga rei hi ka muhil ngial miah lo a sin le.




"Ka van mu rei em em" ti nuah nuah chungin ka tho chhuak a, "Nizan kan chet na avang khan I chau viau pawh a ni mahna" a rawn tih chuan amah pawh en duh lo chuan bathroom lamah ka kal nghal nal nal a, bathroom chhung a ka lut chiah tih chuan a nui hawk ri chu ka hre hman hram zui a, ka va han ngei tak, ka taksa puan a ka khuh na chu la sawn in shower ka nei zui a, ka harh deuh sawng sawng in ka hria, a sawi ang tak tak khan nizan kan chet na avang nge mawni ka sil deuh thum lehnghal, ka mut pawh a la chhuak tho mai.




Bathroom atanga ka chhuah chuan a lo awm tawh lo hlauh, thawmhnaw in bel zung zung in room atang chuan ka chhuak a, choka a ka luh chuan dawhkan a lo kil diam tawh, a bulah chuan ka thu thla ve nghal zat a, "Vawin chu i va tho har ve a" Opi chuan a lo ti zang vah a, chhang mai lovin Mza lam ka en chuan mit min lo siai zeuh a nihchu, ka ner nang a, "Tunlai chu mut ka duh hrim hrim alawm" tiin chhuanlam ka siam a, chaw kan ei lai te chuan Mza lel lul chuan chimawm zetin min rawn melh leh thin bawk nen ka chaw ei a tui em pawh ka hrelo e a.




Mza hna a kal hnu chuan engmah tih tur a awm lo bawk nen Opi chu movie en pui ah ka sawm a, a lo phur ngang mai, horror movie chu en turin kan thlang a, thil ei chung chuan kan en a, hmeichhia na na na chu kan lo hlau hma bawk nen eng emaw hlek ah kan te leh that thin a, keimah chiah phei chuan ka en ngam teuh lo, Opi reng reng pawh kan en hmaa a hlauh loh thu a sawi nasat nen kei ai mah in a hlauh hmel tawh zawk, kan en lak lawh tawh bawk nen en zawh law law chu kan duh miau sia, hlau chung chung in kan en zo ve thak kha a nia.




Mza'n min rawn bia a, a rawn haw hma theih dawn loh thu a sawi hnuah a dah lehnghal vat a, a buai viau pawh a ni maithei, keimah chauh a chaw ei ka peih loh avangin Opi hnenah chuan chaw ei ve nghal mai turin ka ti a, chaw kan ei kham hnuah reilote a thu khawmuang leh a, min haw san ta a, keimah chiah a ka awm takah chuan in chu a reh bawk si a, Mza rawn haw hun chu ka nghakhlel tawh takzet, a rawn haw tep tawh em tih zawh duh viau mahila ka va be buai mai mai ang tih ka hlau bawk si.




Dar 10 a rik hnuah pawh a la rawn haw lo, ka call ta tawp a, call lah a chhang thei bawk silo a, room ah lut in ka mut san ta tawp a, kut lum thar thar in ka pum ah a rawn kuah rual chuan ka harh zawk a, "Bawihi keimah" ka beng bul ah Mza chu a rawn phun sup a, "I rawn haw na a rei tawh em?" phak chuap chuan ka ti a, "La reilo, muhil leh rawh" ka nghawng a rawn fawp tawk chung chuan a ti leh a, keipawh chu a lamah tawlh hnai deuh in ka muhil zawm leh mai a.





Zing a ka harh chuan ka sir lam chu ka hawi vat a, Mza chu a lo la muhil tui hle, a hmel chu ka en vang vang a, ka hmangaih em chu ka hrelo mahse ka duh hle tih erawh ka hrechiang, a hmaa a mizia ang kha a pu tawh lova, tuna a mizia hi chu tu hmeichhia pawh hian an hnar theih ka ringlo, minutes 10 dawn vel ka en reng hnuah thawm dim takin ka tho chhuak a, inhnuai ah chhuk in choka ah ka lut zawm nghal.




Opi pawh reilote hnuah a rawn thleng ve nghal a, ka tho fuh bawk nen zingkar atangin ka nui reng mai, Opi pawh chuan engmah min zawt lo mahse mak tih hmel deuhin min en leh thin tih pawh ka hria, choka ah chuan Mza a rawn pen lut a, in bual fai tih hriat takin a lang thar sar bawk, ka bulah chuan rawn kal hnaiin ka biangah a rawn fawp zeuh a, nidang ah pawh a tih thin fo dan tho a nih avangin ka zak tawh lem lo, chaw te kan kan ei a, Mza chuan hna a kal dawn loh thu a sawi bawk.




Hna a kal dawn loh avang chuan ka lo lawm em em a, a chhan pawh ka zawt lem lo bawk, room ah kan awm dun char char a, karleh lama zin a ngaih dawn thu leh a bul a kal ve tura min sawm chuan ka lo phur khawp mai, in a awm reng ai chuan pawn lamah leng chhuah tumin kan in siam a, Opi hnenah chuan kan chhuah tur thu te ka sawi hnuah kan chhuak nghal, kan nupa a kan len chhuah na hmasa ber a ni bawk a, nuam thei ang ber a hun hman ka duh a ni.




Mipui awm tam na laiah kal lovin eitur te lei in hmuifang lamah chuan kan kal a, a la hma tho bawk nen haw lam pawh kan hmanhmawh teh chiam lo bawk, hmun zawl deuh lai ah chuan thu in kan in be mai mai a, "Bawihi, engtik ah nge fa kan neih ve ang?" Mza chuan a rawn ti chhuak deuh hlawl a, tui ka in lai mek a ni bawk nen ka hak a, ka khuh nghal bawrh bawrh mai, Mza'n ka hnungzang ah chuan a rawn chul a, ka la khuh bawrh bawrh tho.




Ka hrawk chu a na vek thei, ka mittui a tling pam bawk, "Mak i va ti awm ve" nui suk chungin a ti chhuak leh a, "Min zawt teh thut em alawm" ka ti sep, "Um.. ka thiam loh a nihchu, mahse kan in neih na a rei ve tawh a, thlaleh mai hi kan in neih khun khat na tling tawh dawn bawk, nau pai hi kan hun ve tawh viau ania, nimin lamah khan ka pa te inah ka kal kawi a, ka pa min zawhna chu engtik ah nge fa in neih ve ang le tih a ni a, chhan ngaihna ka hrelo hle ania" a ti leh sup sup a.





Fa neih lam hi ka lo la suangtuah ngai miahlo, nu ni tur in ka in peih em tih ka hre bawk hek lo, mahse mihringte chu in zir chawp tur kan ni a, kei aia naupang fe te pawh in fa an nei a, nu nih an zir a, a thiam chawp ve mai alawm, a then phei chu pa tello in an enkawl a, chuti chung chuan nu an nihna an hlen chhuak thei tho, keichu keimah mai ka nilo, pasal ka nei a, ka pasal hi in nghah na tlak a ni tih ka hre bawk a, chuvang chuan fa neih vat vat chu ka duh ve tho mai.




"A.. Mz, kan thu a nilo a, Pathian thu thu a nia, hun a tih hunah chuan nau ka la pai ve em em ang" ka ti sep a, a nui nghawr dat a, "Ni e, fa kan neih vat vat theih nan zanin atang hian tan kan la leh zual deuh bawk anga, kan nei ve vat mai ang" a tih chuan rum zetin ka melh a, a ni lah a lo nui suk suk duh lek chauh, "Karleh ah ka pu inah chaw ei turin kan kal dawn nia, ka zin hma in" a tih leh tak daih ah chuan "Nia.. ka pa hi chu amah chiah a ni tawh bawk sia, va tlawh pawh kha a pawi miah lovang" ka lo ti ve vat a.





Dar 3 bawr velah chuan kan haw ta chiah, in kan thlen meuh chuan khua pawh a dul ve ruih tawh mai, Opi chuan rawng a lo bawl zo vek tawh a, kan nupa in room ah lutin kan in bual dun a, bathroom chhungah chuan kan awm rei dun khawp mai, a kut a hlei bawk si, kan in vin leh hlak hlak thin a, mahse a tawp duh chuanglo, a hnuah phei chuan bangah min nar bet in min fawp ta tawn tawn a, a dang phei chu sawi belh tawh lo zawk teh ang, chau hnap in bathroom atang ka chhuak a, khum a ka mut fel rual rual chuan ka muhil zui nghal mai bawk.


..

Ka pa inah chaw ei kan tum avangin chawhnu lamah ka pa inah chuan ka kal a, ka pasal erawh hna atang a rawn tlang thung ang, ka pa in ka thlen chuan ka chawhmeh lei te chu ka dah fel zung zung a, rawng ka bawl nghal, Opi pawh a haw hma a, in ka khalh daih a, eng em a thleng lo turah ngai ang, sa ka siam a, ka pa duh dan berin ka siam bawk, bai leh tlak te ka siam leh hnuah hmarcha ka rawt leh a, chaw ei chu ka peih a ni nghal mai.




Mza pawh a rawn lang har lo kher mai, ka pa nen an in kawm lai chuan ka pa room ah lut in ka tifai a, a upa ve tawh bawk nen a theih ang ang in tifai thin mahse a tifai vek thei biklo, khum hnuai te chu ka phiat fai a, chhuat te ka nawh leh vek hnuah chaw ei ka rawt a, chaw kan ei lai te chuan ka pa chuan Mza chu a be reng a, a makpa chu a chhuan hmel takzet, Mza pawh ka fak lo theilo, ka pa zawhna te chu tha tak tak in a chhang a, a puzawn a nih na angin a zah hle tih pawh a ti lang nghal vek bawk.




Zan tlai tak thleng chuan ka pa inah ka leng a, in kan thlen meuh chuan mut a lo hun leh der tawh bawk, khua a lum bawk nen Mza chuan in bual rual a rawt a, ka lo hnial vat thung, a ni nen a kan in bual rual a nih chuan kan rei leh dawn lutuk tlat, in bual hmasa turin ka ti a, bathroom ah chuan lut duh mai lovin min en run run a, "Va kal vat rawh, a tlai tawh a nia aw, ka mut te a chhuak" ka tih leh takah chuan lungawi loh hmel deuhin a lut ve mai bawk.




A in bual lai chuan room dangah lut in ka lo in bual ve a, ka zawh hnua kan nupa room a ka luh leh chuan khumah a lo mu fel than tawh, "I duh chuan lo muhil mai rawh aw, ka sam hi kan chhem ro tir leh lawk ang" tiin hair dryer chu ka la chhuak nghal a, plug ah vuah in ka on a, ka sam chu ka chhem tir a, darthlalang ah ka in en pah vang chuan Mza rawn tho chhuak mek pawh chu ka hmu chiang hle, ka lam pan in a rawn kal a, ka hair dryer ken lai chu a rawn ban nghal zat bawk.




"Khawi keiman ka lo tihsak ang che" ti supin ka sam chu amah chuan a chhem ro tir a, thuawih deuh in ka lo in dawn hle hle thung, "I mut a va chhuak tawh awm ve" ka chhing diar diar lai chuan a ti a, "Nia.. chhuak tawh lutuk, a ro kim tep tawh em?" ka ti ve sep a, "Yess.. a zo tep, mahse i mut mai ka phal dawn lo ania" a tih leh te chuan chhang tawh lovin ka lo ham bai bai a, hair dryer chu a dah fel a, ka lo en reng thung, chutah min rawn pawm kang nawlh in khum lam chu min pan pui nghal nawl nawl a.




"Mz, ka peih rih lo aw, ka mut a chhuak lutuk" khum a min mut thlak tir rual rual chuan puan a in khuh chungin ka ti nghal vak a, "Bawihi, fa neih vat kan ngai tih i hriat kha" ka in khuh na puan rawn lak sawn tum pah a a tih chuan ka lo vuan nghet sawt, "Mahse ka mut a chhuak tawh alawm" pawr zetin ka lo ti let kha kha a, a nui chhuak ta hawk hawk a, "Awle, a nih chuan mu ang hmiang, ka lo kuah ang che" a tih takah chuan ka in khuh na puan chu ka la sawn vat a.




A phakar lutuk chu ka melh leh rawm rawm thin, "I kut hi dah tha ve mai mai rawh" ka ti hlak a, ka taksa chu a zut kual ruai a, tiang te chuan ka muhil thei tawp lovang, "Bawihi i mut a chhuah kha muhil tawh rawh" a ti sup a, a aw a nuihzat na lang chhuak chu ka hriat hmaih lo nasa, a ni hian min fiam a tum emaw ni, "Hetianga I tih reng te chuan ka muhil thei nang, tawp teh, ka mut chhuak i ti reh zo vek dawn a nia" ka tih leh hlak hlak lai chuan rawn che vut in ka chungah chuan a rawn bawk nghal run a nih chu.




"Bawihi, i mut a chhuak tawh chuang lova, ka duh kan ti hmasa phawt mai dawn nia, lungngai suh, kan zawh hnuah chuan tawng pawh tawng peih tawh lovin i muhil nghal hmak ang" tiin chet a la nghal zung zung a, lo dan hman ngaihna pawh a awm lo, bakah eng ang pawn lo hnial mah ila a duh chu a ti hlawhtling dawn tho tih leh keipawh hian ka mamawh takzet tih ka hriat avangin a chet lak lai chu ka lo pui ta vat zawk a.




Vawinah kan zin tawh dawn a, Mza sawi hmangah thingtlang in 100 vel chiah awm naah a ni dawn bawk nen phur tawh tak ka ni, a bolero in kan kal a, Aizawl atangin a hla ve ang reng bawk nen kan thlen hun tur pawh sawi lawk theih a nilo, tunah chawhma dar 11 a pel tawh a, kan chhuak dawn chiah chu a la ni sia, motor ruih ka ching bawk nen thei thur ka lei lawk nual bawk a, eitur eng eng emaw nen ka in puahchah nasa khawp mai.




Darkar thum vel chawl lova kan tlan hnuah zun ram thiar turin kan chawl a, ka luak a chhuah mai bakah ka lu a na bur mai, Mza'n thil ei a rawt takah chuan thingpui dawr ah kan chawl a, tam erawh ka ei theilo, motor lamah chuan kan let leh vat ta zawk a, thlen vat vat ka chak ber tawh, kan tlan leh hnu chuan ka muhil ta char char a, min sawi dat dat tu an awm avang chuan ka harh zawk a, "Bawihi, dawr kan hmuh fuh lai hian ei chak te I nei em?" Mza chuan a ti sup a.




"Aih.. engmah ei chak ka neilo, kan thleng tep tawh em?" ka ti ta zawk a, "Darkar hnih vel tlan a la ngai" a tih chuan ka thaw hak mai, motor ka rui nasa bawk nen ka zawi hnawk tawh mai, Mza chu motor atangin a chhuak a, a rawn let leh hnuah chuan eitur eng eng emaw a rawn lei nual tih ka hre thei, "Bawihi, heihi in rawh le, i nuam huai mai ang" a tih takah chuan ka lo ban vat a, a sawi ang tak tak in tlem chuan ka zia deuh, enge a nih ka zawh chuan thil tha deuh tiin min chhang ringawt a, ka zawt lui zel duh ta biklo.




Kan zin na tur hmun kan thlen chuan khua a thim vek tawh, Mza chuan kan thlen na turin in te tak te, man nei a luah hawh theih ang kha a lo be fel vek tawh bawk a, a nuam reuh lutuk ringawt, kan in bual fai hnuah thawmhnaw pawh dah tha tawh em em lo chuan kan muhil nghal a, a tuk lamah pawh kan chau deuh bawk nen kan tho har khawp mai, Mza chuan rawng a bawl vel a, keiin kan thawmhnaw te ka lo dah fel thung.




Chaw kan ei kham chuan Mza'n a hna lam khawih a la ngailo bawk nen khua chu kan fang kual a, a la thingtlang reuh em em a, mahse a nuam takzet bawk, khaw mi te chuan mikhual kan ni tih hria in min lo be liam liam hlawm bawk a, naupang deuh te pawh in min en duh hle hlawm a, hetiang hmun a chen hi ka chak thei lutuk, in pakhat haah hian min luh pui a, an khaw hruaitu ber in a ni tih min hrilh chuan ka bu zeuh a, thingpui te kan in a, min lo lawm thiam khawp mai.




"Kan fapa hian chawhnu lam chu kan khua hi fan pui cheu se a tha ang, school chawlh a lo ni bawk a, a remchang khawp alawm" Pu Nghaktea chuan a ti a, ka lo phur nghal sarh mai, nimin lama kan motor chuan chauh na te kha engmah a awm tawh lo ang mai a ni, in ah kan haw leh a, khaw fang turin kan in siam a, kan hman hnuah Pu Nghaktea fapa pawh chu a rawn thleng ve nghal mai bawk.




Khaw pawn lam hnaih deuh ah chuan min kal pui a, kum 14 bawr vel a ni a, a tawng duh bawrh bawrh khawp mai, Mza nen pawh chuan min nel em em a, eitur ka pai ho chu ka pe a, a lawm ngang mai, an khua hi a la thingtlang ve deuh bawk nen nep nawi vel zuar an tlem em em a, kan thil ken ho ang pawh hi hmuh tur a awm mai mai lo bawk, tlang nuam deuh ah chuan min kal pui leh a, khaw thlir na ang deuh hi a ni bawk a, an khua chu kan hmu chiang hle, a mawi em em lehnghal, thla ka la nasa bawk a, a nuam takzet.




Tlai ah chuan kan haw a, naktuk atangin Mza pawn a kal chhan ber khaw mipui te damlo te check up na te a nei dawn a, zanah chuan upa ho chu an rawn lut khawm a, kan nupa chuan min lo lawm thiam khawp a, an khua ang chiah a en tur leh mamawh te kan nei a nihchuan hriattir vat turin min chah chamchi bawk a, an khaw mipui te ka hmuh hian khaw in lungrual tak an ni dawn tih ka hre nghal thei mai.




A tuk lamah chuan Mza pawn a hna a tan ta a, lo puih theih na ka neih ve tak mial in tiin ka zui ve bawk, hming vel te ka lo ziak a, a in dawt te te in an lut a, in entir an tam ve khawp mai, karkhat lai kan cham dawn avangin an vai erawh in an rawn kal lem lo, a ni hmasa ber a ni bawk a upa lam hlir a rawn in en tir a, an khua ah hian doctor an awm lova, damlo na deuh awm pawh nise an khaw thenawm ah an kal vang vang a ngai thin.




Chawhnu lamah chuan Mza pawh a chawl ve hman ta hram a, "I chau em?" thil kan ei lai chuan ka ti sep a, "Chau love, nangmah zawk kha i chau em?" min ngaihtuah hmel zetin a ti sup a, "Teuhlo, nuam ka ti lutuk ringawt, doctor nih ve daih mai te hi ka duh" a ti a, a nui hawk a, "Pasal doctor I nei tawh alawm, nang leh zel doctor i nih ve te chuan kan buai lutuk anga sin, in hmuh na hun pawh kan nei mang lovang" a ti a, keipawh chu ka nui ve hak hak a.




"An fak hlawm khawp che a sin, hmeltha an tih thu che te an sawi nasa a nia" a tih leh chuan "An mit a fing a nihchu" ka lo tih chuan a nuih a za nasa mai, damlo check ngai te chu a check leh zung zung a, a chau viau in ka ring, amah lo doctor kal an awm bawk silo, nurse tak ngial pawh in an zui lo a, tinge amah chiah a an kal tir hi ka hrethiam lo, zan lamah ka la zawt chiang ngei ang, ka chau lo ti mahse a chau dawn tih ka hrechiang lutuk.




Inah kan haw a, a in bual chhung chuan keiin rawng ka lo bawl zung zung a, a lo chhuah leh hnuah ka chawhmeh chhuan lai chu lo vil tura tiin in bual turin bathroom ah ka lut ve nghal bawk, "Bawihi, i zo tep em, chhuah lawk ka ngai dawn a" kawr ka hak mawlh mawlh laiin Mza chuan bathroom kawngka rawn kik dat dat pah in a ti a, "Aw.. ka lo chhuak nghal a nimai" tiin kekawr chu ka ha lehnghal a.




Kan room a ka luh chuan chhuak maithei turin a lo in peih fel diam tawh, "Khawiah nge i kal dawn?" ka ti haw a, "Pu Nghaktea te inah khan ka va kal lawk ange, a nu hi a zual thut a ni awm e, naktuk lamah hian rawn kal pui an tum kha a nia, amah hi a a kal thei tawh bawk silo a, ka va kal lawk ange, ka rei lutuk lo turah ngai ang" a ti sup a, a chhuak zui nghal, Mza chu chaw ei ah ka lo nghak a, dar 7 dawn ah a rawn thleng a, chanchin ka lo zawt chiang vat.




"Rei a daih in ka ring tawh lo, a chau tawh emai, chaw te han ei ila i peih chuan kan va lang leh zuai dawn a nia" a ti sup a, ka lo hnial lem lo, chaw chu kan ei zung zung a, Pu Nghaktea te in kan va thlen chuan mi thenkhat tlawm ngai te pawh an lo pung khawm nual tawh a, an sawi dan hmangah Pu Nghaktea nu hi chu a kal mai dawn emaw na tih hnuah te hian a rawn tha leh thin a, chutiang reng reng chu a ni awm e.




Dar 10 vel ah kan haw leh a, mut hmunah te chuan kan sawi zui niap niap a, "An khua hi a nuam e, cham hlen daih theih se aw" ka ti vang vang a, "Nakinah kan kal zin leh dawn nia" a tihchuan ka lo bu nghauh nghauh a, "Tinge nangmah chiah in i kal hrim hrim a, i thawhpui te tumah an kal ve silo a, nangmah chiah chuan i hah lutuk a nihhi" ka ti a, "Bawihi, hna lam vanga kal ka ni hleinem" a tih chuan mak ti zetin ka en a.




"A nih chuan tinge hetah hian kan kal a?" ka ti leh a, "Ka pa in kal turin min ti a, chawlh ka la alawm, ka pa hian kum tin hian thingtlang khaw hrang hrang ah damlo enkawl turin min tir thin alawm" a tih leh chuan ka pa chu a hma aiin ka ngaisang zual sawt, "I hna avanga kal emaw ka lo ti mai che a sin" ka ti leh hpa ringawt a, "Ka pa hian midang hriat a duh vak lova, chuvang chuan kan chhungkua hian hetiang thil kan ti tih hi kan sawi lang ngailo" a ti leh a.




"A nihchu, ka pa hi chu a en tawn tlak ve ngawt mai" ka ti leh a, thil dang dang te kan sawi leh hnuah kan muhil ta chauh a, a tuk lamah pawh chuan kan hna ngai te chu kan thawk leh a, damlo rawn in en tir te chu an damdawi mamawh ang tur te chu ka lo pe zel a, damdawi pawh tam tham tak kan keng a, a bang pawh a la tam mai bakah ka pa hian damdawi kan ken daih loh takin tih thil thu ah min rawn pe mai tu tur a dah thlap bawk.




Vawin chu thalai lam rawn in entir an tam khawp mai, a bikin nula lam, ka pasal an melh dan ah chuan an duh tih ka hre bawk a, ka lo haw hlur mai, ka mood pawh fuh lo vaih vaih tak a ni ringawt, nula senior tawh lam tih hriat tak pakhat hi a tawp lamah a rawn in entir ve a, midangte kha chuan min hmai zah vang nge ka pasal an duhna kha an ti lang lutuk ngamlo zawk a, mahse he hmeichhia hi chu zaklo ve tak a ni.




Ka pasal chu a melh ngawih ngawih a, ka pasal erawh chuan engah vak a lo ngailo, "Zan lamah te rawn ka leng la, kan khua hi chu khaw lian lo tak ni mahse hmun tlawh tur te hi a tam a nia, ka la fan kual pui ang che" te a ti vel a, ka lo ner nang mai, "I lian in I sang tha bawk sia, I la hmeltha tel cheu bawk nen Aizawl lam hmeichhia te ah pawh i tla na viau lo maw, tleirawl te hian doctor rawn kal chhiat loh zia an sawi nasa a, ka lo awih vak lo kha a nia, mahse hei an lo sawi dik chiah a nih hi" a hmel en ang aiin a la in la no daih zui.




"Hun awl i neih hunah chuan khua hi ka la fan kual pui ang che aw" a tih leh chuan Mza chu a thaw chhuak hawk a, chunu chu en run chung hian "Ni e, min la fan kual pui dawn a nia, hei ka nupui nen hian kan rawn kal a, in khua hi fan kual a chak nasa bawk a, a remchang phian ang chu" tiin keichu min rawn en a, "M.. maw nupui maw, a ni te chu I hnuai a hnathawk a nilo a mi?" tiin keichu min rawn en ha a, ka lo melh hrak thung, zaklo lutuk mai.




"Ka hnuai a hnathawk ni lovin ka nupui a nihhi, min pui turin a rawn kal ve a, nilo keimah hian a tello a ka awm rei theih ka rin loh vangin ka rawn hruai ve a ni zawk mah" tiin keichu min rawn nui suk a, ka lo nuih let ve seih, "Nia.. khaw fan te kha i sawi a, ka phur zawng tak a ni bawk a, kan haw hma in kan nupa hian min la fan pui ngei ngei rawh aw" ka lo ti zang vah a, a zah hmel hle, "Aa.. nia, kan tum dawn nia" ti bah nawk nawk in a kalsawn nghal nal nal a.




Mza nen chuan in en in kan nui dun hawk hawk a, kan haw hnuah Mza chu fiam nan tak ka hmang a, min hnial let ngaih na a hre bawk silo chu min melh leh run run thin a, keilah chuan nuam ka lo ti zual deuh deuh bawk si, "Nangmah chiah chhuah pui che a chak hmel sia, duh leh naktuk ah chhuak dun ula inah ka lo awm hahdam ang, a nih loh pawh in tlangval chhelo deuh deuh te ka lo chhuah pui ve thung anga" khum a thu chung chuan ka tawng zat zat a.




"Thil nilo lo sawi suh, ka nupui i ni a, nang lo chu tumah chhuah pui tumna ka neilo, khanu pawh kha ka chhuah pui dawn lo, chutiang bawk nang pawn mipa dang i chhuah pui hlek lo bawk ang, tlangval chhelo te kha i sawi a, he khua mai nilo i tan hi chuan khawvel a mipa awm chhun leh chhelo ber ka nih hi, chutiang bawk in nangpawh ka tan hmeichhe awm chhun I ni bawk" a ti deuh hluk hluk a, ka lo nui kar kar thung.




"Chhelo viau turah hian i in ngai a, i upa tawh si, i tar tan tawh tih te hi i in hrelo a mi?" ka tih leh chuan ka hmaah rawn ding in min melh chhuk run a, nui chungin ka melh chho ve kar bawk, "Enga, nang hian tar min ti amaw?" lawm loh hmel lutuk hian a ti leh a, bu nghauh nghauh chungin "Aw.. kum 30 i pel va va tawh a nia, chumai nilo i che reng reng te hi i tuah tan tawh, bakah sam tuak pawh I nei tep tawh ang" ka ti leh chiah chu khumah chuan min bawh mu hnawk a.




"Ka tar leh tar loh chu kan fiah dawn em ni ang, ka phur zawng tak a ni, chuan ka che tuah nge tuah lo te pawh kan fiah nghal law law anga" chimawm zeta nui suk chungin chuan a ti a, "Aih.. ka duhlo, ka fiam mai mai che a nihkha, khawi tho rawh, ka ril a tam tawh a nia" tiin a awm ah ka nam tang tang a, thawh chu tum lo tak a ni, rawn kun hniam in ka hmui chu a rawn khar chilh nghal hmak a, chet a lak zawm nghal buan buan bawk, hetianga a chet tawh hi chuan ka hnar reng thei biklo.


Cont...

Comment leh click kha aw..