STORYFB.COM

KA LALPA




CHAPTER 7



“Va ha chhin teh maw" mo kawr an rawn ken lam pan chuan ka phei zuia, Dodoi lah a lo phur nasa mai. Hetianga mi innei tur engtin nge a lo phur pui theih ni? Mahse a leh lamah chuan Thanpuia dinhmun nen ka nun nawmna tur min ngaihtuah pui zia ka hria a, a hlim chu mak ka ti em em lo.




Ka kawr tur chu a nalh viau mai, a ban chu lace veka siamin a tle sep sepa, a hnuailam chu a puk laih bawk. Inthlâkna roomah chuan lûtin ka ha a, ka chhuah leh chuan ka ṭhiannu chu a lo au chûl mai.




Thanpuia pawh chuan mawi tih hmêl tak chuan min lo ena, ka lam rawn panin ka biangah chuan a rawn fawpa “I inhmeh lutuk tlat" a tihchuan ka nui seih mai, “Tak tak maw? Mahse ka zâm riau" tiin a kutah chuan ka chelh saka, a pate an rawn thleng tawh bawk nên kan in hmu tawh nângin min be lutuk lêm lova, min duh chiah lo a nih ka ring deuh.






“Naktuk maiah ka nupui i ni tawh dâwna, ka nghâkhlel tawh hle a ni" tiin darthlalangah chuan min in enpuia, phur viau mahila keimahah hian thil ṭhalo tak a thleng dawn ang tlat hian ka hria, enge a nih ang. Nge ka ngaih ruatna mai mai zawk ni ang?





“Kan inthlak tawh mai dâwn em ni?" ti a ka zawh lai chuan a phone a rawn ri a “Enga?" tiin keichu min rawn ena, ngaihṭha lo zetin ka lo en chu thaw hawk hian “Ka rawn kal ang, aw le?" tiin phone chu a daha “Enge i tih dâwn?" ti a enin ka hnaih deuha.




“Inneihna hi kan tih tâwp a ngai rih a ni, ka kal phawt ange nakinah ka rawn bia ang che" tiin a kal mai a tuma, chutia inneihna ṭhulh a ngaih thu a sawi chuan min ti hamhaih takzet “Enga timaw? Engah nge inneihna chu kan tih tâwp angaih?" a bânah chuan ka vuan beta, chutia a danglam ta vek chuan min ti hamhaih letling.






“Nakinah ka hrilh ang che, tûnah chuan chhungkua-ah buaina a awm riha, nidangah kan ti mai dawn ania, ka kal phawt ange" tiin a tlân chhuak zuia. Engmah pawh zawh chian hman a ni tawhlo, Dodoi nên chuan kan enliam ta tawpa.





“Kal tîr phawt mai rawh, nakinah pangngai deuhin in la in be zâwk dâwn ania, tûnah chuan a hmanhmawh a nih kha" rawn ti ve in inthlâk tur chuan min tizuia, engmah pawh ka sawi tawh lo. Inneih hun a nghahhleh zia a sawi renga, chutia a tâwp leh si chuan min ti hamhaih takzet.





Thawk la ham hamin ka inthlaka, engthil nge khatiang khawpa ti danglam tura thleng ni ang? Tu in nge rawn bia ang? Inneihna ṭhulh phah hial ngai khawpa buaina chu eng thil tak ni ang maw, engmah sawi tawh lo chuan inthlakin ka ṭhiannu nên chuan kan in zui chhuak hnak hnaka.






Boruak a hlimawm hman tehlul nên engtak chu thleng ang maw. Ka in kan thlen chuan Dodoi pawh chuan a ngaihṭhat vak loh thu chu a sawi ve siam siama, Thanpuia lahin min rawn be tawh rih lo. Chanchin engmah ka la hre lo chu ania, a thil tih chu hriat ka châk takzet.




“Ka chau riau, kan mu phawt ange. Nang pawh i nu ten an lo ngaihtuah tawh ang che haw phawt rawh, kan mu ange" tiin ka ṭhiannu pawh chu ka tîr haw zuia, ka phone chu dahin mutthilh tum chuan ka in let ka in leta.




Engvanga inneihna ṭhulh duh hial nge a nih, chutah min ngaihsak miah lo in a chhuak zui daih lehnghâl.




Zâna phone ka khawihin post pakhat ka hmuh chuan ka in pet ruh fana, henu avâng hian maw min lo kalsana? A bialnu hlui tih an post an thu an sawi dân aṭang chuan ka hre thei, damdawiinah a awm amaw? Huh, a awmbo an ti si a, engtik laiin nge a rawn lêt ni.





A bulah chuan Lalthanpuia chu a chhûngte nen an ṭhu ṭhapa, an ṭhiannu post aṭangin a ni ka hmuh ni. Thinrim tak chuan phone chu dahin ka mit chu ka hupa, tûnah chuan neih pawh ka tum tawh lo, min lo bum lek a ni. A bialnu a rawn lêt meuh chuan kei leh a fa chu min thlauhthla nghal hmak chu a nih hi.






In ngaihtuah thinrim zêlin naute te chu tihtlâk hial te ka ngaihtuaha, mahse a ni pawisawi lo tihnat ka duh lo. Ka enkawl anga, a pa erawh a hre ngai lovang. Min chhuhsak tum teh se, a thei ngai lovang, ka naute chiah a ni tawh bawk ang. Kha nu phiangsen avâng khan kan inneihna a ṭhulh hial a ni si a, tenawm hiana, engtin nge ka lo rin theih zâwk ni.





A tâwp a tâwpah chuan thutlukna siamin a bula thawh pawh ka tum tawh lo, hna eng emaw zawna keimah in enkawl mai ka ngai a ni. A ni tello pawhin kha chen ka dam tawh a lawm, ka awm thei em em ang, he ka fa hi chu a piang ngei anga. Mahse a ni chuan hmuh pawh a phu lo.





Awm bo hialte chu ka ngaihtuaha, chutilo chu thil a ti thei si a. Awlsam taka ka fa hi min lâksak mai ka hlau a ni, reife ka in ngaihtuah hnuah ṭawngṭaiin ka zâng huaiin ka hria, tui zet chuan ka muhil zawma.




Ka kawngka rawn ri dawt dawt avâng chuan peih lo zeta tho chhuakin ka pan pheia “Tunge?" ka tihruala min rawn chhâng tu avâng chuan ka kawngka hawn tum chu ka tâwp nghal chata, tûnah a la rawn kal amaw? Enge a rawn tih dâwn? Engmah hrelo turah min ngai a ni ngei ang.





Zak lo lutuk, ka be ṭha tawh awm lo emai. A chhûngte duhpui ngei chu nei rawh se “Haw rawh ka hmu peih tawh lo che" tihmakin ka ṭhutthlêngah chuan ka ṭhu thla a, a ni lah chu a rawn che na sauh mai.




“Rawn hawng teh, in biak kan ngai ania, engvanga thinrim ringawt nge i nih? Inneihna ka ṭhulh vâng kha em ni?" a rawn tih phei chuan thinrim tawh tak ka ni “Lalthanpui zahna châng hre rawh, min rawn hmuh tum tawh suh. Naute pawh hi i rawn ngaihven a ngai lovang, i hmangaih a rawn kîr meuh chuan i fa pawh i hrechang tawh lo ania" tiin ka nui hak haka.





A reh deuh vung vung mai “A che suala ka ngaihven mai a nihkha, in be teh ang. Kan innei dâwn lo ka tih loh kha, khatiangin thinrim vak lo teh, kawngka hi rawn hawng rawh, ka chhûngte tân a pawimawh a, chuvângin a nih kha inneihna pawh ka ṭhulh" a tihchuan ka nui leh hak ringawt.





“Nei rawh, nang nena buaina neih reng pawh ka peihlo. Tihpalh thilthu in kan mu duna, ka vanduaina belhchhah turin nau ka lo pai khanglanga; mahse min ngaihtuah suh keimah pawhin ka enkawl thei, ka mamawh chiam lo che" ti hmakin ka ngawi zui ta daiha, kawngka hawng tura min tihna pawh chu ka hrelo der hmak bawk.





A duh duh dânin awm rawh se, a rilru a hriatrenga, a tan ka pawimawh ve tak tak lo tih pawh ka hria. Min neih a duh chhan pawh a fa ka pai vâng chauh ani, tenawm hiana.



“A ṭha e, nidangah ka rawn kal leh ang. In biak ngei kan ngai tih hria ang che, kan fa kha fahrah turin ka phal hauh lo tih i hriat kha" a tihchuan ka thaw hak mai. “Zahna te i nei ve ngai a nih chuan min rawn tibuai tawh suh, tin i fa hi ka pai reng dâwn lo tih hre bawk la. Ka ti tla ang hria ang che, chuan buaina tur kan nei lo a nimai, i duh duha tihkual theihah min ngai a, ka ni hauh lo ania" chiang fekfawka ka tih leh chuan kawngka chu a rawn chhir leh ṭhuai a.





Ka lâwm lo takzet “Ti tla reng reng suh ang che, i hria em Lalrosang, nau ti tla hauh suh ang che" tihrawkin kawngka chu a rawn sawi leh dawt dawta, ka nui ro hak ringawt.




“I thu lo, kha i bialnu kha va pai tîr rawh, amah avâng chauha min mutpui i ni lo'm ni? A ni awm se min mitpui kher nâng, haw rawh. I enga mah hi ka hre duh tawh lo, ka hua che a huatin ka haw hluah hluah che" ti tawn tawnin kawngka lamah chuan ka tui um chu ka vawm phei ṭhuaia.





Amah zawkin min neih a tuma, a bialnu hlui damloh avang ringawta a ṭhulh leh chuan min ti thinrim takzeta, a duh duha tih kawi theihah min ngai zawk emaw ni. A duh duh dân in ka awm hauh lovang, tûn aṭang chuan a lakah ka nem mai mai tawh dâwn bik lo.




“In bia ang ka tih chu, a ni kha ka tân engmah a ni tawh lo" bleh bleh bleh, “I daw zêp zuap kha a nih chu, i dawt sawi ka ngaithla peih tawh lo, i dawt sawi tûr ngaihtuah nan i lu lian deuh kha a na ve tawh êm? Ka hnêna dawt sawi tur i ngaihtuah ngat ngat zêl awm sia, i thluak te kha a buai nuaih ang chu. Engpawh chu nise kal bo teh, i duh duha min tih kawi tum tawh suh, ka nunah thu i neilo" tihmakin ka au khum leha.





“Kal bo zung zung rawh, Police ka phone kher ngai suh se. Thanlerh, dawt a tam pauh leh hliam a pung ṭhin, ka laka dawt i sawi reng khân ka huatna tur che i sawi hnem tih in hria la, min rawn be tawh miah suh. Engmah sawi pui che ka peih tawh lo, ka in bula i awm ringawt pawh hian ka luak i tichhuak" ka ṭawngtam in ti viau mah ila a phu tâwk chiah a ni.





“Thudik hrelo in khatiangin sawi ngawt suh. Kan innei ngei ngei dawn tih hre rawh" ka nui chhuak leh uar uara, min ngei ve ang chu aw. “I damchhunga i theih loh tur a nih chu, keichuan neih che ka tum tawh lo. Bialnu hluite avânga inneihna pawh ṭhulh duh i nia, ka pasal ni tur pawhin ka duh tawh lo che" a bâk engmah sawi ka tum tawh lo.





A ni pawh a beidawng ta nge “Naktukah ka lo kal leh ang? A nih loh pawhin hna kal naah kan in hmu dâwn ania" tiin a thâwm chu a reh zui vang vanga, huh. Ka hmu âwm hleilo, a duh leh a bialnu kha nei rawh se, a bulah pawh ka thawk tawh bawk lovang.





Ka ṭhiannu chu bia in inluah tur min lo zawnpui tûrin ka ti a, ka in luah pawh ka sawn hmak ang. A ni nêna engmah tih dun ka duh tawh lo, lo innei hman phei ila chuan uiresan hial pawh ka tâwk thei chu ania. Mizorama thil thleng atân chuan a rapthlâk mah mah, nilo a over thlak mah mah. Mahse enge a rapthlâk tho alâwm, thil thleng theilo pawh hi a lo awm lo anih hi.





Nge ni a, ṭhenkhat ang hian ka reels ve zuk zuk dawn nge mawni. An ni pawh media ah an lam zawl zawla, Sunday ah Biak inah upa te leh Pastor te hmuha hmeichhe ṭha deuh piangthar, nunnem, mi fel angin an awm leh than thiama. Ka thiam ve angem phei chu ka hrelo, live hmanga sum lâk luh ve mai te hi a chi angem, huis.




Nau hial pai tawh mah ila khatianga lemchan nun kha chu nei leh lo mai ang. Keichu ka sual ang ang hian ka lang tlang rawng mai tur a ni, ig live vela lar duh avanga mahni taksa tih lan vak vak ai chuan tihian ka awm mai ang chu. An ni anga Biak ina piangthar, khawvêla hur leh si nih ai chuan tihian ka mualpho lâwp lâwp mai ang chu, mihring bum thei mah ila ka Pathian ka bum thei miau silo.





Tûn lai khawvel lemchang nun lutuk a nun ai chuan ka nihna dik tak leh sualna ang ang hian ka lang mai ang chu.




A tûk lamah pawh hna ka kal miau loh avângin ka in luahah a rawn kal leha, ka va han ning tak. “Haw rawh, in biak ka duh tawh lo ka tih kha, kha chen ilo ngaihzâwn tawh chu i ngaihtuah lo theilo tih ka hria a lawm, ih maw? Min ngaihtuah reng reng suh, keimah in hei chen ka awm tawh hi, tumah ka mamawh teh chiam lo. Min rawn hmuh tum tawh lo hrâm teh, ka inchhirna tur thil tih ka tumlo" tiin ṭha tak chuan ka lo bia a.






A ni erawhin ka hriatsual a la ti ve ngar ngar thung “I chhûngte pawhin an duhpui che tih ka hre vek alâwm, min hmuh pui lai pawhin keichuan an ṭawngkam mawi pawh ka dawng lo. Tûnah chuan a fiahna chiang takin ka hmu tawha, mi in ngaizawng kârah lo inrawlh ka duh tawhlo, kal la. Min rawn ngaihtuah reng reng suh, ka ṭha lutuk, i fa pawh a awm tawhlo. Ka nuam lo viau ania" tiin ka chhânga.





“Nilo, nilo ala awm tih ka hria, dawt min hrilh hauh suh. Ka fa chu a la awm" tiin min rawn pan ruaka, ka lo tawlh hnung dat thung. “Tukinah khân ka lakbo tir tawh, a pa berin hmeichhe dang a duh miau chuan a tân a ṭha zawk. Tin, nu leh pa kar nilova ṭhang lian turin ka fa kha ka phal reng reng lo, kal rawh. A awm tawh lo" a hmêlah chuan natna a rawn langa, ka hmuhsual zâwk emaw ni?





Ka dulah chuan rawn khawihin a mitmeng chu a buai naka, a la awm tih hrilh mai ka duh ut uta. Mahse, nizânah ngei pawh kha nu bulah khân a let tih ka hria, engmah sawi pui ka duh tawhlo “Hetiang em em hian em ni ilo nunrawng" a rawn ti ro haka. A hmêlah chuan rapthlâk min tih hmêl takzet.





“Aw..pasal neilova fa neih ka duh hleinem, tikhan kan inkar chu a tawp, a telloa i awm theihloh nu nên ngei khân chhungkua chu in din dawn ania" tihmakin ka awmsawna, a hmelah chuan na hmel leh thinrim hmel a in pawlh nawk mai.






“A ṭha e, hmeichhe rapthlâk lutuk. I duh ang ngei chuan kan inkar chu tâwp rawh se" tiin a chhuak zui ta daiha. Kha kha a ni, a tân chuan engmah ka ni tak tak lo, a tân chuan ka naute chiah kha a pawimawha, keichu min duh ve tak tak lo. Ka taksa chiah a lawm a duh, keichuan ka thinlung zawng zawngin ka duh a sin.






Ka mittui chu nuai nak nakin ka dul chu ka chûl a “I pa chu i awm loh thu ka hrilha, a ṭul leh i nu hian ka kalbo pui daih mai ang che aw. I pa khân a duh lo che a ni miah lo ania, mahse i nu hi min hmangaih miau silo, ka tello a a hnêna awm turin ka phal bik lo che a ni. Min ngaidam rawh aw, pa i nei dâwn silo" ti sap sapin ka mittui chu ka hru a.




Nichina ka thawvenna te kha an bo leh vek tawh. Hmeichhe dang bulah khati khân a kala, a lo kîr tawh dâwn lo tih pawh ka hria, a thusawi kha ngaihthlak duh viau mahila midang thusawite, a chhûngte min en dân zawng zawng nen innei tehreng pawh ni ila ka fa a pian hunah min laksakin min ṭhen ang tih ka hrechiang.





Chuvang chuan hetia ka tih tâwp mai hi a ngai a ni, ka inchhir tur a nilo tiin ka infuih sauh sauh a. Tûnah chuan ka ṭhianpa emaw ka biak mai angai ang, ka fa enkawl tur chuan hna ka mamawh miau bawk si.




Phur lo zet chuan ka bungrua chu ka rem fela, Dodoin inluah tur a lo hmuh leh ka insawn chhuak phawt ang, hetah ka awm reng theilo. A chhan chu a beidawn mai ka rin loh vang a ni, thinrim takin chhuak mahse a rawn kîr leh ngei ang.




“Ka u i lo ṭhen chu i ti ṭha e, kan monu ni tur hi chuan chhungkaw zahawm tak nei kan duh rêng a ni" message chu ka ena, ka number save loh nimahse Thanpuia nau a ni tih ka hre nghal. “A ṭhat nasat chu, hlim deuhin an awm ka beisei, i sawi dik e. Nang ni ang mi hausa chapo, chhûngte thawhchhuaha nun nuam em em tân chuan keini ang chu kan ṭha reng nang" ka ti ve saka.





“Taka, pasal i neih tawh kha. Mawng lem te kha vuah vak suh, nge ni a i pasal i lerh san zeuh zeuh zâwk nge. In pa lah kha a sum i duh vâng zawk a ni tih a hriat, a tar tawh ropui si" ka tileh chu a rawn thinrim nasa mai. Mahnitea nui hak hakin ka block zui daiha.




Lalthanpuia pawh chu ka block hmak bawk, tikhan an chhûngkaw min hmuh dân dik tak chu ka hre tawh alâwm. Min lo duh lo hle tih lah a chiang reng, chuvang chuan Lalthanpuia hi ka hnaih leh tawh tur anilo, ka fa erawh ka hring ngei ang, ka neih chhun ani dâwna, ka theih tâwka enkawl ṭhat ka tum bawk ang.




Kha zân khan lo rui kher kher lo ila chuan hetianga dinhmun chhia hian ka awm lo tur, ka in tal âwk zo va. Engpawh chu nise thil a nih tur ang ang a ni tawha, ka tihsual chu ka tuar mai tur a ni, engmah buaipui tur leh rilru hahna tur ka nei hlei nem. Chhûngte lah ka nei heklo, tu mithmai mah vên tur ka nei hleinem.




Keimahin hringnun ka pal hnem tawh a, ka tuar thei em em ang. Ni e, an ni ang chhûngkaw hung leh hausa tan chuan kei ang mi chu kan hniam em a ni.





Mittui hru fap fap chuan hla chu ka ngaithla a, a hmuhah kha chuan na miah lo angin awm mah ila ka thinlung kha a rum vawng vawnga. Khanu kuta chelh chunga a muhil hmêl ka hmuh phei kha chuan ka lung ana vawng vawng a nih kha.




“Ka naute nang leh kei chiah kan ni dawna, pawi i tilo ang tiraw? I nu hian nu leh pa ka nei lova, nang tal chuan nu i la nei dâwn alâwm tiraw? Lungngai miah suh ka venghim zêl ang che" tiin ka phun sap sapa.




Facebooka thu pakhat naute pumchhunga mi thusawi ang maia an sawi tir ka chhiar fuh phei kha chuan tihtlâk ka tum lo bur, kha thuziah kha chuan ka mittui a titla thei hial mai. (A TAK TAK AW, A GROUP HMING ERAWH KA SAWI LO ANG)




Kan fa kan pum chhûnga mi ngei, kan lungngaihna leh hlimna min ṭawmpuia, kan rilru hahna zawng zawng lo hre ve vek tu hi keichuan tihtlâk ka duh ve lo, rawn ṭhanlena ka lungngaihna rawn chhâwk zângkhai duh ve ngawih ngawih angah ka ngaia, ka titla theilo. Ka thisen zawmpui ngei a ni si a.






Apa nen enkawl dun thei dâwn lo mah ila mi pawhin an ti thei alâwm, ka thei ve em em ang. Tûnah chuan hna ṭha tak ka zawn phawt angai a ni, Thanpuia bulah ka thawk thei tawh lovang, amahin min lo duh pawh nise a chhungte'n min hmuh dan ka hre tawha, hnaih ka tum tawh lo bur. Lo hnaih lui ta tehreng pawh ni ila kan hlim dun ka ring lo.





In tih harh tumin ka vâk chhuaka, rin loh lutukin kha nu nên khân ka la hmu dun zui. An hlim hmêl em em lehnghâl, ka bulah khatiang khawpin a rawn sawia, mahse a bulah bawk a nih saw a lo awm leh tawh, hmu lo ang mai chuan dawr pakhatah chuan lûtin ei tur chu ka lam malh malha.





“I hlim bawk maw?" ka hnunga rawn ding chunga min rawn be tu chu ka hailo; mahsela hrelo ang mai chuan ka thil leina chu pe in ka chhuak zui daiha.



“Min be duh lo in awm vel suh" ka bana rawn man chuan mi kâr pawh sawi lovin a lamah min pawt dawrha, a bialnu pawh a rawn thlen leh tawh hi.



“I hlim zâwk em? Wow in lêng dûn vel a nia, a nuam maw? Hmangaih berte nen a lên chu anuam a lawm tiraw? Oh! Ka lawm pui lutuk che u, mangṭha phawt le" ti a kal ka tum chu min la man bet tlata, ka thinrim takzet tawh. Hmuh duh miah lo laia a rawn lang sek te hi ka ning.




“Min thlah rawh, Lalthanpui ka dawhtheihna fiah hauh suh aw" tiin ka au ve ta ṭhat a, kawng kal ho chuan min en haw haw hlawm mai. A pawi tih loh a hnu keipawhin engah nge pawi ka tih vak bik ang ni, theih phei se a hmaiah tak hian a nia hneksawk ka duh ni.





“Engvanga hna rawn kal miah lo nge i nih? I duh duh huna chawlh theihah ngai hauh suh" za lo tak chuan ka nui leh haka, ka hrilh chiang viau sia “I la hrechiang lo em ni? Lo ngaithla rawh, K.A. B.A.NG" ka spell koh koh a. A kut chu ka thehthla pah bawk.



“Tikhan i hrechiang rawh em? Nang nena inzawmna neih hi ka duh tawhlo,ka luak i ti chhuak ka tih kha. I duh duh danin awm tawh rawh, nilo i awm reng tawh zâwk a lawm. I thil tihah ka buai peih love, nang nen chuan thil hote vâng chiahin a nih kha kan inkawp bye bye" tiin ka kalsan zui hlawk hlawka.




Ka na hmêl hi hmuh tir ka tum teuhlo, chaklo tak anga lan ka duhlo. Min ngaih nep theih turin ka awm dâwn lo hi a ni tawp, kha nu pawh kha damlo dam rang ber record pêk chi a nih kha. Nimin lamah kha chuan a thi dâwn emaw tih theih tur khawpin damlo khumaha a mu mar awt a nih kha.




Zaktheilo pahnih, ka mood an ti chhe leh vek. Haw leh mai ka châk loh avangin min enkawl seiliantu ka awmna ṭhin home-ah chuan ka kala, naupang ho chuan min lo pan nghal sap sap mai.



Kar khatah vawi khat tal ka tlawh ṭhina, mi an ngaina hle bawk. Naupang fel leh duhawm tak an ni a, engtin nge an mahni hringtu nu ngei te hian an kalsan theih le ka ti ṭhin. Mi tam takin fa neih châk si nei theiloa beidawng em em a an awm laiin ; ṭhenkhat te erawhin khawlaiah leh bawlhhlawh bâwm ah te thi tûrin kan kalsan duh ania.




Keimahni ser nung reh thei lo kan insiam mai mai a ni. Kan pai tlang a nih chuan enkawl chhunzawm pawh kan ngam tur a ni ngaia, thla 9 chhûng kan puma lo awm tawh kan thlauhthla leh mai ṭhinte hi in ngaihtuah chian hle kan ngai a ni.



“Ilo kal a nimaw?" ka nu ang maia ka en chu rawn kalin min kuaha,ka lo kuah lêt vat bawk. A ni hi awmlo se tûn dinhmun hi ka thleng in ka ringlo, ama min enkawlna liau liau a ni.




Chutia min kuah tâkah chuan ring taka ṭah khum hawm hawm mai ka châk,a rem teh ṭeuh silo. “Nu hrilh tûr che ka neia, i thurâwn la tûrin ka lo kal a ni" tiin amah chu ka ena.




Ka sawi awmzia hria in midang awm lohna chu min panpui zuia, a bulah hi chuan thuruk ka nei ngai lo va, tûn pawh hi Thanpuia nen kan boruak vêl nen ka kan har mah mah zawka, ka rilru a hah bawk nen ka pan lo theilo. A ni chuan min hnem dân tur pawh a hre ngei ang.




“Sawi ta che ka lo ngaithla ange" a tih tâkah chuan engkim chu a bul aṭangin ka sawia, ka in sut leh pah ṭhin. A ni erawhin dawhthei takin min lo ngaithla thung.


LIKE LEH COMMENT ṬANG HRAM HRAM ANG AW