LET's LOVE AGAIN BY Ziki_nu (Completed)

[ngaia]

LET's LOVE AGAIN



By Ziki nu

Chapter-7



Dawr atanga kan chhuah rual chuan thawk ka la zui hawk a, ka beisei aia hma in a hmel kha ka hmu si a, awmdan pawh ka thiam meuhlo chu a nih kha.
A landan engkim kha chiang takin ka la hre thei a, a nghawng dinglama khuavang thleng khan ka hmuh hmaihlo reng reng.



"I tha maw?" tia ka dar a rawn dawm rual chuan ka lo phu zawk a, ka bul ami in hriatthiam loh hmel fe a min lo en reng ka hmuh chuan nuam ka ti lo.




"Aw.. Tihtur dang i nei tawh lo tiraw?" ka tih chuan a lo bu nghut a, "Haw nghal mai ila, ka chau deuh tawh" tawi tea nuih chung hian a ti leh a, ka thil lei ho te chu min khaisak vekin a bike dahna lam kan pan leh a, rilru erawh a nuamlo ru rauh rauh reng tho.



A rawn luh kawi ve avangin thingpui te ka lum a, thian neih chuan thil ngaihtuah ngut ngutna hun a awm loh avangin a zia phian zawk a, Nunpuia chuan dawr chhunga ka awmdan kha a hriatthiam loh hram ka beisei laiin,
"Khapa kha i hmelhriat em ni?" a lo ti ve khauh a, "Tu maw?" ban charha ka lo tih chuan nui sukin "Dawr chhung ami kha, I en vung vung chhan kha thildang a awm em?" a lo ti leh a, ka mitah tak min en ran bawk.



"A... Chutiangin ka en vung vung tih pawh ka lo hrelo" ka ti a, ka tawng ban lutuk chu a chhan pawh ka hrelo, ka dang a awk titih ringawt mai.



"Imm ka ngaihbel mai mai anih dawn chu, ka haw ve phawt anga, ka lo bia ang che" tiin a thutna atang chuan a tho pah vut a, dan tumna pawh ka nei lo.



A kal liam hnu chuan ka thil lei te chu ka rem fel ve mawlh mawlh a, ngaihtuahna hman ngut ngut ka duh loh avangin tihtur chu ka dap kual a ni ber.



Tlai lamah ka inbual hman ve chauh a, phone ka en miah lo bawk. U Mazari'n a maian bai min lo suah hlauh bawk nen eirawngbawl pawh a hautak lo lehpek khawp mai a, ka ril a tam deuh tawh avangin chaw pawh ka ei hma viau mai.



Thim hlima phone ka en chuan Rinfeli hnen atangin message ka lo dawng leh reng tawh a, 'Vawiinah Rintea nen in inhmu em ni? A sawi a' message ka chhiar rual chuan ka thaw chhuak halh a, ka lungphu a rang leh nghal ringawt tawh bawk.



'Imm hmu thuak mai' tih zawngin ka chhang a, pasal a nei tawh bawk nen a buai deuh nge ka message chu a en lawk lo.



Dar 8 velah min lo chhang leh ta chauh a, thlalak pakhat hi rawn thawnin ka en chuan a thim deuh a, pindan chhung chu a ni ngei mai a, computer hmaa mipa ruangâm lo lang chu a chianglo hle na in ka hrethiam em em tho.
A hnuaiah chuan message thui deuh mai hi a lo hnutchhiat bawk a, 'A lo thlen hlimah khan i chanchin min zawt nghal a, ngaihzawng i la neih leh miahloh thute leh zirtirtu i nih tawh thute ka hrilh ve a, a lawmpui hmel lutuk che' a rawn ti a, a chanchin zawk chu a ni hriatchian ka chak chu.




'Amah a damtha reng reng em?' tiin sawi thui hlau deuh chung hian ka zawt hram a, ka nghah vang vang hnuah pawh ka thiannu chu a reh tak tlat avangin a mu tawh a nih ka ring a, a hmuh hun huna min lo chhan erawh ka la beisei viau thung.






Nunpuia a rawn leng lo a, keipawh dar 9 a rik chuan khumah ka mu fel der tawh. Zingah thawh hma a ngaih dawn avangin alarm ka set sa thlap a, mahse mutthilh mai chu a har khawp mai.



Ngaihtuahnaah chuan mi pakhat chiah a awm leh tawh a, amah kha a ni.
Ka tleirawl lai nun kha amah nen ka hmang liam a, nun nawmna tam tak ka tem ve chhan chu amah chauh kha a ni. Ka ngaihzawng mai ni satliah lovin ka thiantha tak a ni tel reng thin a, mal taka ka awm lai pawh khan a ni chu ka kiangah a awm tlat thin a nih kha.


Mahse kan dinhmun inthlauhna kha kan hrethiam har mah mah a, a zalenna a duh ang taka a hman theih lai khan keichu ka mawhphurhna te khan min delh chau fo thin. A nihna takah chuan khang mawhphurhna te khan mihrangah min siam a, kan hmahun kan ngaihtuah kim tawklohna khan kan inkarah khi a siam tan a, a hunlaia kan paltlang tur thil harsa te kha paltlang zo lovin kan beidawng a ni.
Ni lo.. A ni kha dem ve tur ka nilo, beidawnsantu zawk chu keimah ka ni a, tawpna hlimawm loh tak kan neih chhan chu keimah ka ni.




Engtik laiin nge ka mutthilh ka hrelo, ka alarm ri chu meng mang lo hian ka off a, school kan tan ni tur tih ka la hriat ve reng avangin phurlo deuh chuan kan tho chhuak ve nghal bawk.



Insiam pahin ka nu ka bia a, hmanni deuh atang khan a hrisellna a that lutuk loh avangin inentir turin lo zin se ka duh a, in lamah vawk pahnih lai a vulh avangin ka u te enkawl tur ringawta han dah chu a hreh si a, pakhat zawk an tihral hun hunah lo zin a tum chauh a ni âwm e.





Ka nu nen kan inbiak zawh chuan Riny call in ka hman tawh thu ka hrilh a, a ni pawh chu a hritlang a reh hleithei lo a, a aw te chu a chhang nasa ang reng khawp mai.
"Ka kal peih pawhka ringlo, Aruata kha chu ka hrilh tho a, mahse lo sawi nawn leh hrim hrim rawh, a ni chu a rintlak loh emai" a rawn ti a, a nawmloh hmel si a, sawm luih chi pawh a nilo ang.




Phur lo deuh in ka chhuak a, Riny a kalloh hi chuan a nuam vaklo, thawhpui dangte an fel lutuk rual hian ka kaam rual an awm vaklo a, Aruata a ni leh deuh tawp mai.



School tan ni hmasa ber a nih avangin lehkha kan la zir mumallo a, mood fuh zanlo chunga han kal pawh hian naupangho zingah chuan a nuih loh theih thinloh a, nun hi an tihlim ve riau zel.




"Miss Sawmi chu semi final a nei zo tawh bawk a, a final ve tep tawh anga" tiin kan senior Sir Zautea chuan min lo fiam hlut a, a ngaihna hrelo deuha ka hawi ha lai chuan "Ni ngawt mai, mahni in a awm rei tawh bawka final ve vat chu a ngai alawm" Miss Juliet-in a lo ti ve bawk a, engnge maw an hriat hlawm ni.




"Pasal neih maw?" nui chunga ka lo tih chuan an lo khi tha hlawm a, "Sir Aruata khan a sawi vek alawm, Footballer nupui nih te chu a nuam ang chu, hmun hrang hrangah te in zin kual anga" Miss Juliet-i bawk chuan a lo ti leh a, ka hlauh ang ngei ngeiin Aruata chuan a lo sawi darh pek a nih dawn hi.



"A uang mai mai anih chu, engmah a awmlo" ti mah ila nui pat pat chungin min chhaih zel tho a, a sawi chhuaktu ber lah chu chhun chawlh laiin a haw daih tawh si a, ka hmuh leh hunah chuan a chaklo viau ang.



Haw lamah Rdi te ka tlawh kawi a, an inneih hnu khan ka la len luh leh tak loh avangin nuam ka ti chiahlo a, an in ka lut chiah chu a lo ri nghal hlut mai.



"Tunah school in tan leh tawh si a, in chawlh chhungte kha chuan lo len fo tur che alawm" tiin min lo chhuahchhal nghal pang a, ka buai ve zia te ka sawi chuan a awih loh hmel nasa mai.



"Mahni chauhin i awm a, buaina tur i neilo lutuk" tiin thingpui a lum nghal a, inkhawm zan a nih vang erawh chuan ka hmanhmawh ru riau tho.



Hmannia Rintea nen kan inhmuh dante chu ka hrilh ve a, kan inngaihzawn hunlai kha Rdi nena kan Inkawm tam vanglai tak anih vangin Riny ngawt ai chuan kan chanchin min hriatpui tam zawk a, chuvanga sawipui pawh ka ni.



"Rinfeli khan a lo haw tih kha chu a sawi ngei a, mahse chuti takin ka lo ngaihven lemlo a, nangpawh hian hmalam pan tawh la chu ka duh khawp mai" a tih chuan ka lo thaw chhuak halh a, ngaihtuahna hi a buai leh riau thin.



Hmalam pan ka duhna leh duhlohna hi a inzat vel in ka ring, hmasawn chu ka duh a, mahse damchhunga a tel ve hauhlohna nun han hman tawp chu ka la huphurh em em si a ni.
Kan inkar chu kan titawp tawh ngei a, mahse ka thinlung atang hian ka dahbo thei tlatlo a ni.



"A rilru hi ka hre chak ber a, hre ngat ila chuan awmdan tur te pawh ka thiam deuh ang" ka lo ti hap a, a chanchin sawi hi chuan thawk a sak talh thin.



"A lo biak che i ring em?" tih pahin thingpui no min rawn pe a, ka lo ban ve vat bawk.

"Ka hrelo, Rinfeli hnenah chuan kan inhmuh thu chu a lo sawi ve ngei a, min ngaihven tawh lem lo anih pawhin min la theihnghilh biklo chu a ni phawt mai" tiin za lo deuh hian ka nui a, ka thiannu pawh chu a rilru a buai hmel ve viau tho.



"Nghak rih la, in inbiak theih velah a rilru i zawt tawp mai dawn nia, chu chu a tha ber ang, nangma tan pawh thutlukna siam a awlsam anga" a tih chuan ka lo bu ve nghat a, kan awmdan chu la inthen lo, inhau thinrim ringawt te pawh kan ang dawn dawn mai.
Ka la duh ngei mai a, mahse min ngaihdam theih ka ringlo a ni.




Rdi te in atanga ka haw chuan khua a tlai leh duai tawh a, thalai inkhawm zan anih vangin ka hmanhmawh ang reng khawp mai.



In ka thlen chuan inbualfai sawk sawkin ka insiam nghal a, dar rik rualin U Mazari'n min lo ko nghal lauh bawk.


Thusawi tur in kan Bialtu Pastor an sawm avangin zan dang zawng aiin inkhawm a rei a, chaw ka ei loh vangin ka pum chu a ri leh rak rak thin bawk.



Inkhawm kan ban rualin Nunpuia'n min rawn pan nghal vat a, "Zanin chu ka lo leng lo mai ang aw, kan thianpa birthday kan lawm dawn a" a rawn ti a, ka lo aw ve mai bawk.



Kan haw lamah U Mazari chuan "A lo len hmanloh tur thute pawh a hrilh thlap thlap tawh che a ni maw" tiin min chhaih leh zauh thin a, ka nui tawi tak ringawt thin.



Ka riltam em avangin chaw ka ei leh hnuhnawh a, ka phone lah chu chhan awm lovin ka en sek a, min lo biak hun ka nghak ringawt chu a chhan ka hrelo takzet, ka phone number pawh a nei tawh dawn hauh silo.



Muhil thei lovin rei fe chu ka inlet sek a, zing lamah chauh ka muhil ta in ka hria. Tukdang ang bawkin thawh ka hai leh a, Jacoba'n min lo kaitho hlauh lo sela chuan school pawh ka tlai der ang.


Riny a lo la kal peihlo cheu a, school ka thlen rualin Aruata chu ka chhuahchhal ringawl ringawt bawk.



"Inngaizawng pawh kan niloa midang zingah lo sawi vak vak tawh suh" ka tih laiin "In la inngaizawng dawn tho alawm" a lo ti duh lek a,a ngeiawm thin ngawt mai hepa hi chu.


"I hre ringawt ami? Midangho bulah lo sawi tawh lo la a ni mai" ka ti leh a, "I thu lo" tih pahin min kalpel hmak a, a ni pawh vawiin chu a mood a fuh vaklo a nih hmel khawp mai.




Kartluanin school ah hun kan hmang a, ka hun tawn chu a inang pût ni mai hian ka hria. Zirtawp ni tlaiah chuan Riny ka tlawh kawi ve a, khumah puan chhah deuh sin hian a lo mu hlun a, a landan chu en mai pawhin a khawngaihthlak reuh khawp mai.



"I la dam thei meuh nange?" ka tih chuan lo thu chhuak ve thuaiin "Khawsik tak hi chu nizan atang khan ka nei tawhlo a, mahse ka la pik lutuk" a ti a, a aw atang pawhin a pik hle tih a hai theihloh.



Ka thil leisak ho chu a khum bul dawhkanah chuan ka dah hlawm a, "Karleh atang chuan ka lo kal ve thei tawh ang, chawlh reng chu a nuam biklo a" a lo ti ve leh sap sap a, rei ang reng deuh kan inkawm hnuah ka haw ve ta chauh a, chaw ei tur in min chelh an tum viau naa ka hnial ve tlat.




Inrinni chu kartluana insuk tur ka khawl avangin ka insu nual a, Nunpuia'n tlai lama chaw ei chhuak tura min sawmna pawh chu ka la chhang lo.
A sawina chu a rei tawh viau a, an thianpa fanu birthday lawmnaa kalpuiah min sawm a ni.
Ka hnial viau chung pawhin min tilui ve tlat a, a tihngaihna tak pawh ka hre tawh lo.



Thingpui ina ka thut chawlh lai chuan ka phone a rawn ri a, pindanah tlanlut in phone ka en rual chuan Nunpuia hming ka hmu nghal a, ka chhang hreh viau naa han chhanloh ngawt chu a tihchi in ka hre bawk si lo a, rei deuh tak ka ring tir hnuah ka chhang ve ta nge nge.



"Thian kan nih chuan min kalpui rawh aw" ka lak rual chuan a lo ti nghal tawl a, ka hnial a hlauh hmel ngang mai.


"Ringawt a che" tiin za lo deuh hian ka nui chhuak hak a, "Ka ti tak tak, ka inkhelh pui thinte an nia, nupui an nei fur tawh hlawm bawk nen, mahni chauha ka kal chuan min nuihzat dawn lutuk alawm, kan inngaizawng tihna pawh a ni chuanglo a, ka thiannu ang tal pawhin" a ti leh reuh a, a tawngkam chu a naupangchhia ka ti tak tak.



"Hmeichhe dang sawm tur i hre thlawtlo a ni maw?" ka tih chuan a thaw chhuak hawk ri ka hre zui a, ka sawi fuh chiahlo em mawni ka ti leh deuh.



"Anih chuan i bialnu angin min sawi kher suh ang che" ka ti leh sap a, thawm chu ri zui tawk tawkin rei vaklo hnuah "Aw le boss" a ti hlut a, a phur hmel ngang mai.



"Dar 4 velah ka lo sawm ang che" tiin kan inbiakna chu kan titawp a, tunah chawhnu dar 1 a pel tawh a, kar lovah dar 4 chu a ri leh mai in ka ring.




Zing lama ka chawhmeh ho chu ka ei tawh dawn loh avangin U Mazari te ka pe vek a, ka kalna tur chu zep tum ve viau mah ila Nunpuia zawkin a lo hrilh leh vek tawh a, U Mazari hi a râwn thin a ni ber ang chu.
"Tikhan thiantha in ni mai a, chaw ei ho ringawtte chu a pawi hleinem" engmah pawh ka sawi hma in U Mazari chuan a lo ti vat a, amah ber hian min sawm turin a ti anih te ka ring rum rum tawh.



Ka intihfai zawh chuan ka insiam nghal a, thuamhnaw hak turah ka buai nghal der mai.
Inchei lutuka kal bik ka hlau si a, thing deuha lan lah ka duh bik der bawk si lo, Nunpuia chu han zawh mai ka tum deuh a, ka thulh leh thin.


A tawpah kawrfual sendal, sin te tea rose par awm hi ka inbel a, khua a vawt lemlo bawka tiin kawrlum pawh ka ha duhlo. Ka sam chu a hmawr ka herh kir ve deuh a, vawthlep bunin bag ka ak a, ka hman chu a ni der mai.


A sawi hunah tak Nunpuia chu a rawn thleng a, a dum vek inbelin present bawm ni âwm tak hi a rawn khai tel bawk a, a bul ka thlen ruala "Thilpek tur ka lei ve miahlo" ka tih chuan lo kiai sukin "Ka ken chuan i keng angah ngai rawh" a lo ti sup a, kan chaw eina tur hotel lam panin khaw pawn lamah kan tlan chhuak nghal bawk.




Kan kalna chu khaw daia hmun reh ang reng deuh mai hi a ni a, a building chu sak thar hlim tih hriat takin a la lang thar vûk a,lut chhuak pawh an la tam hmelloh khawp mai.




Kan luh hma in ka bul ami chuan a phone a hmet mual mual a, Tu emaw biak a tum ni ngei tur a ni. "Kan lo thleng chiah" tiin a phone chu a ngaithla ran a, "Aw le" tih bak thildang a sawi tawh lo.



"An thleng vek tawh anih chu, kan lut ve nghal mai dawn em ni?" tia min râwn pahin a phone chu a kekawr ipte ah a thun lut a, ka lo bu nghat ringawt chu min nuih sukin "Nuam i ti dawn chiang ania" a ti leh a, ka nuih ve ta ringawt.



A hnungah ka zui ve dat dat reng a, pindan chung lama kan chhoh laite chuan nuam tih loh na ka la nei reng tho, a hmun hi a rehin a zahawm ru riau bawk si a, ka ngainat zawng a ni ve lo.




Dawhkan lian ang reng deuh mai kiltu te lam chu kan pan zel a, "Saw kan tlangval neih chhun pawh a rawn thlen saw" lo titu chu hmel patling deuh tawh mai leh sek tung mai hi a ni a, hmuihmul tlemte a nei bawk.



"Tlangval ber si hi i tlai ber ziah a" a bul chiaha thu hmeichhe pakhat hian a lo ti ve bawk a, keichu min lo thlek ve nghal vat bawk.



"Tlangval ka ni rei tawh lo mai thei ania" ti ve vatin ka bul ami chuan ka thutna tur chu min lo pawh chhuahsak thuai a, a thiante hi chu an lo nui dar dar mai.



Naupang pawh an awm ve nual a,hmeichhe naupang samkir duhawm deuh mai hi nu te ve lam hian a pawm a, thil ei tur tumin an buai khawp mai.


Nunpuia chuan min hmelhriattir zung zung a, nutling leh patling rual kara han awm ve chu a zamawm ve deuh a, mahse upa lutuk an la ni biklo tih erawh an hmelah a la hriat hle thung.



An zinga upa ber kan thlen hlima min lo be Tu kha U Remsiama a ni a, a bul ami kha a nupui Janis-i a ni bawk a, an fanu birthday lawm tura kal kan ni.


Nunpuia sawi ang tak takin a thiante chuan kawppui an nei vek tawh a, fa la nei lo erawh pahnih an la awm a, naupangho chu kan awmna ep chiahah phone enin an awm far a, an nu leh pate chu an tibuailo khawp mai.




"In ril a ram tawh em Sawmi? In duh hun hunah a ei theih reng ania" Janis-i chuan min rawn en chung hian a lo ti var a, "Tam lo e, in tih hun hun a ni mai" ka lo ti ve vat bawk.



Eng eng emaw sawiin an titi bawrh bawrh hlawm a, keichu min vengthawm lem lo a ni ang an zinga hmeichhe hmeltha ve ber chuan "Tha-i nen khan in inbe leh ta miahlo em ni?" tiin ka bul ami chu a lo zawt khauh a, midangin mitmeia an lo khap chu ka hmu ru vek tho.
Kan inkarah thildang a awm lemloh avangin engah vak ka ngai chuanglo a, chu tih rualin Nunpuia chhan hun chu ka ngaichang ve ran tho.




"La inbia ni ila Malsawmi hi ka rawn hruai i ring em ni?" bul ang reng deuh hian a lo ti hmuk a, hmeichhia pawh chuan a zawt zui lo.



Reilo te ah kan zanriah eitur chu hnathawk hoin an rawn buaipui a, a tuihmel hawm viau na in ka ei tamlo khawp mai.


Ka hmelhriat tha te an awmve lem lo bawk nen nuam ka ti vaklo a, hun chu kal muang ka ti ang reng viau.



Naupang birthday cake an cut zawhah chuan an kaldarh suau a, mipa ho pawh thlanglam bathlarah an inzui chhuak dial hlawm a, ka tibuai duh lemlo.



Keimahin kil khata thutna ruakah chuan ka thu a, phone ah thil ho mai mai en in ka thaw chhuak leh halh thin a, chu tih lai chuan kan piah deuh atanga hmeichhe tawng ri in "Amak e... Tha-i nen kha chuan an inthen hlen theih ka ring miahlo asin le, a hmeichhia sawn a kherh nasa a nih i ring ve em?" a tih chu ka hre pha a, a hmel hmu thei chiahlo mah ila chaw ei laia Tha-i hming rawn sawi chhuaktu tho kha a ni tih ka hria.


Pakhat lah chuan "A chiang reng alawm, Nunpuia te chu chet la hmasa chi a nilo a, hmeichhia zawk sawn a kherh nasa tih a hriat reng" a lo ti ve bawk a, ka nuih an tiza zawk khawp mai.
Ka ngaihzawn lohzia chu Nunpuia'n a hrechiang ber a, an ni thusawi mai mai chu mên ah thlak ka tum lo.



Sana ka en chuan dar 7 a lo ri va va tawh a, haw mai pawh pawi ka tih tawhloh laiin ka kalpui pa lah chu thlang lamah a la tawm bo ve tlat a, an thawm chu a tha ham ham thin khawp mai.


"I ei puar maw Sawmi?" tiin Janis-i chu a fanu pawm chung hian ka bulah a rawn thu ve a, "Ka puar lutuk" ka lo ti ve vat chu min chhang let tawh lem lo.




Naute chu hnute pe in a phone a en zui daih a, min biak loh chuan han biak hmasak luam dan tur ka hre bik lo.



Rei vak lo hnuah thlanglam atang chuan mipa ho chu an rawn lut tak tak a, an rim rawn put luh chu ka hîp lut nghal kawk bawk.



A hnung berah Nunpuia chu a rawn lut a, a rui hle tih chu a hmel ka en ringawt pawhin ka hre thei.

Ka lam pan chuan a rawn kal pai chhat chhat a, a awmdan chu ka lawmlo hle ringawt mai a ni. A bialnu ni lo mah ila thian kan ni a, helai hmuna m8n hruaitu hi a ni bawk a, a rui nawi bera a tang ringawt chu atthlak ka tiin ka thinrim tun mai.



"A va in hnem âwm ve a" kan awmna piah deuh atangin nichina kan chanchin sawitu hmeichhiate khan an lo ti ve a, chhan en ah pawh ka en lo.



"Tihpalh" pakhat lah chuan a lo ti nghut a, a bu lûk lûk bawk si a, lawmlo viau mah ila ka chhawm haw lo thei lo ang.




A jacket pawm lai chu laksakin "Ka zui tawh miahlo ang che" ka ti ram hmak a, ka tawng ring lemlo a midang chuan an hre ve kherlo ang.





U Remsiama chuan ro a rel zung zung a, mipa thenkhat pawh chu an rui ve tho, mahse ka thianpa anga rui chhia chu tumah an awmlo.



An chhungkua bakah kei leh Nunpuia chu an motor in min thlah dawn a, a bike erawh an thianpa pakhatin a khalh haw sak dawn a ni.




U Remsiama chuan Nunpuia chu a zakdawhah kaihkuahin kailawnah a chhukpui a, a hnung chiahah a helmet leh jacket te kengin ka zui ve bawk a, kan chhuah dawna ka mi tawh vang chuan ka ding chiang ngang mai.



"Rinsangzual" ka inrin hma in ka ti chhuak hluai a, tun ang huna a hmel hmuh ka inrin loh lutuk vang vek a ni. Min rawn hmuhna hmun leh kan awmdan zet lah chu aw....





Cont.....
Show post links
Top