STORYFB.COM

DARK DESIRES


CHAPTER 6



Ka harh leh chuan Dominic-a chuan min lo en leh kar tawha, tûn ṭum chu a mitmeng a dam dup mai. Dim tê hian pakhatpa min hnek na kha a chûl heuh heuha “Kha mihring kha ka thah i duh em? I duh chuan sawi rawh, thisen chhuahtu che hi ka that hreh hauh lo ania” rum deuh tak chuan a rawn ti a.




Ka lu ka thing nghal nar nar mai, khapa kha haw viau mah ila thi tur êm chuan ka duhlo. Tin, Dominic-a hian ka hmuh leh hriatah chuan tumah thah belh tawh lo sela ka duh bawk.



“Hremna chu i pêk tawh kha, thihna chuan mi a ti hrehawm ngailo, an hrehawm tawrh tur tuar tir hman lovin hahdam takin an awm hma phah zâwk. Chuvâng chuan mi that lo hian hrehawm tawrh tir dân ṭha ber chu a dam chung ngeia an natna tur thil tih hi a ni” tiin ka sawi dap dapa.




Ka dârah kuahin a ngawi vang vanga, engmah a sawi zawm tawh lêm lo. “Dom ka u leh ka ṭhiannu kha i that tak tak em ni?” ti a ka zawh rual chuan a taksa chu a ṭang nghal ṭeuh a, a hmêl dam dup pawh chu a rawn dur nghâl khap khap mai.




Ka zawhna zawh fuh loh zia a lo lang nghal renga “Lilia khatiang min zâwt tawh hauh suh, tin, i laka ka dawh theih tâk avâng hian min zuam hauh suh ang che. Ka thusawi kha a la ngai reng, ka nau i thata, i chunga ka thiltih avâng hian min dem reng reng bawk suh”tiin a tho chhuak zui ta daiha.



Ka en reng ringawt, chutia a thinrim leh ta em em chu keimah pawhin a mak ka ti. A that a nih pawhin ṭha deuhin min hrilh sela, an ruang tal hlawm ka duh thu sawi ka tum mai a sin le.



Phûr lo zet hian ka ṭhu chhuaka, keimah pawh hi ka lakah a fel a chhuah dêk dêk avânga ka lo hnaih lutuk mah mah ṭep chu ka inhau pah mawlh mawlha, ka thawmhnaw chu in bel mawlh mawlhin in hnuai lamah chuan ka chhuk thla a.



Ka ngui leh nghiai tawh mai, Dominic-a lo ṭhu rûn chu biak pawh ka tum tawh lêm bik lo. Ka nêl hlawl lo, chubâkah nichina kan awm dân avâng pawh khân ka be châk rih meuhlo, ngawi reng chuan maid ho coffee min rawn pêk chu banin pâwn lamah ka chhuahsan ta daiha.




In bula pool lian leh chen nawm hmêl zet ka hmuh chuan hleuh la châk bawk nen ka coffee chu in hlak hlakin ka pan hnaia, ka thawmhnaw chu phelh zung zungin ka nui var var bawk



Tuiah chuan zuang lûtin ka hleuh kual pap papa, ka ngaihtuahna leh taksa chau te chu an kiam nghâl duak duak mai hian ka hria a. Ka dai sawng sawng bawk, mitchhingin a zang thal zâwng chuan ka mu ara.

Ka ngaihtuahna kawmin ka ngawi reng bawk, chutah tui chu rawn ti bawrh in ka taksa chu an rawn khai kâng lawpa. Ka phu nasa bawk nên tunge min ran pawm tu ka en chu hlauhthâwn hmêl lutuka Dominic-a min lo en chu ka hmu nghal zat bawk.



Engvanga chutianga hlauthâwng hmêl pu nge a nih ang tih ka ring thiam rih meuhlo “I ṭha em Lilia? Engvangin nge khatianga i awm?” a tihchuan mak ka ti deuh deuh.



“Engtin nge ka awma? Tui ka chêng mai alawm, engtin mah ka awm lo. Ka ṭha lutuk, enga tinge i rawn zuan luh ve?” ti a ka zawh chuan a rawn thaw hrawka.



“I thi emaw ka ti mawle, khatiangin vawikhatmah chelo in tui chêng tawh hauh suh ang che. I hria em?” a rawn ti hluk hluk chu ka en tawp tawha, a thawmhnaw a la hâk vek dânah a thusawi chu dâwt a nilo tih a chiang viau bawk si.



“A nuam a lawm, a hrim hrimin mi te check hmasa ta che. Engah nge i rawn zuan luh ve tawp a, ka thawmhnaw i hmu reng awm si a” tihmakin a mi kuahna ata chu ka awmsawna. Mi tihdanah khân ka la lâwm chiah lo bawk nên ka meng rum ṭha viau mai.




“Tikhan awm mai mai rawh, i mit kha chhing tlat lo la chuan ka rawn zuang lût lo mahna le. Ka thusawi chu zâwm la a nimai, khatiang in che lo leh mitchhing rengin awm tawh suh ang che” tiin pool aṭang chuan min chhuahpui tumin a che zuia.



Ka lo ṭang nghal tlat mai, ka la chhuak duh teuhlo. “Ka chhuak duh lo, ka hleuh ṭan dâwn chauha, i duh leh nangmah kha va chhuak rawh. Keichuan ka duh rêng rêng lo aw, ka la hleuh dawn; min chhuahsan rawh” ka tihlai chuan a mitmeng rum zet chuan min ena.



“Lilia ka thin tirim hauh suh aw, chhuak tura ka tih che chuan i chhuak mai tur a ni. Tin, tûn ang ni khaw chhe hnuaiah vawikhatmah tui hleuh tawh suh i dam lo ang, min zui rawh. Min hnial hauh suh” chang beng bawnga a rawn tih leh tâkah chuan ka hnial duh ta lo.


A thinrim leh vaih chuan a ka tân thil a harsa zo leh vek dâwn tih ka hre ve reng si a, chuvang chuan a duh duh dân hian ka awm phawt zel mai tur a ni.



Ka damloh ka hlau ve tho a, damloh chuan a hrehawm bawk nên a sawi ang tak takin van lam chu chhûm dum kûk mai a in vial khâwm tup tupa, reiloteah ruah a sur dâwn tih lah ka hailo, mahse ka ngei tho tho.




Pool aṭanga kan chhuah rualin ka thawmhnw ṭhut mutna a ka dah chu banin amah chuan ka bânah a rawn kaia, in chhûng lam pan chuan min kal pui nghâl vat mai. Keipawh chutia tui aṭanga ka chhuah tâkah chuan ka khûr beuh beuha, ka vawt ti chu Dominic-a chuan min enin a ner leh sawk ṭhin.



“Ka thu zâwm la chuan khatiang khân i awm lo tur, tin helai hmun hi chhuahsan thui suh ang che. Chutilo chu i thi a nimai” tiin ka room-ah min luhpuiin amah chuan ka towel la chuan min hru hul zui mawlh mawlha, ka dawh mâwl tawp ringawt.




Ka vawt ti lah chu a reh thei mai lo lehnghal, chutia min hruk mawlh mawlh zawh chuan amah chuan ka thawmhnaw te pawh chu min phelh sakin min thlaka, ka zak bawk nên dan ka tum viau nângin a dan theih der bawk silo.



“Khumah sâwn lo in enkawl ang che, i damlo thianglo tih hi hre reng bawk la. Ka chhuak zawk dawna, ka rawn kîr leh vat ang” a tihchuan ka bu nghata, engtak chu ti leh ang maw? Tualthah tur a zawng dawn nge ni a thil dang zâwk? Chulah chu ka zâwt ngam der silo.





Khuma ka mut fel tâkah chuan ani pawh chu a inher zui vuta “I ril a ṭâm hunah lo ei mai la. Tin he in compound chhûng hi chhuahsan reng reng suh ang che, venghimtur che in ka awm dâwn lo tih hre reng ang che, i fimkhur loh chuan i nunna i chan thei tih i hre dâwn a nia” a tihchuan ka hnial lêm biklo.




Heta ṭang hian chhuah ka tum tawh lo hrim hrim, ka khawvêl chêp zet leh hrehawm taka awm tur kha chuan kîr tawh loh ka duh zâwk. Ka hmelma mah nise Dominic-a kiangah chuan ka himin hei bâka kalna tur dang ka neih loh zia hre tu chu keimah ngei ka ni.



Chhuahsan pawh ni ila kalna tur dang reng reng ka neilo, mi in luah chawpa khawsa kan ni a. Kha ina lêt leh a a neitute zahchhiah thlakna nih leh zawng ka tum tawh der lo, hetah ka nun a hrehawm lutuk ta lo bawk nên he in nuam taka engmah thawk lo a ka awm thei chu vânnei ka in ti zâwk.



Chhûnah thil chu ka ei chauha, a bâk zawng chu room-ah ka in khung leh tlawk tlawk tawh. A thusawi kha dâwt a niin ka ring lova, a chhan chu helai aṭanga ka chhuah hmasak khân ka nunna ka chân ṭêp a nih kha, Dominic-a awm lo se chuan ka thi tawh ngei bawk ang.




Zân a ni a, a rawn haw hun nghâkin ka ngai châng kara. Lo mutsan pawh ka tumlo, a chhan chu zantin deuh thaw ka bulah a mu ṭhin a, mut san hi a duh ngai miau siloa.



Chutia rei fe ka nghah hnu chuan ka room pâwn lamah chuan thâwm rawn awmin kawngka ka va hawng chu Dominic-a leh hmeichhe pakhat tu nge pawh ka hriat loh hi an lo in fâwp ngawng ngawnga, chu thil ka hmuh chuan min ti lâwm lo takzet.



A bialnu ka nih thu leh hmeichhe dang a kawp tawh dâwn lo a ni tih a sawi hnua chutiang thil a ti leh si chuan min ti thinrim takzet bawk.



A ni pawhin min rawn hmu tih hriat takin a châwl data, ka lo in hum ruh ngat ngat thung. Kawngka chu khâr hmakin ka kalh zuia, chahbi pawhin a rawn hawng tawh hauh lovang, a chhan chu a chahbi ka kawl tawh tlat.



Thinrim leh lungawi lo zet chuan khum lam bawk chu panin ka mu thla a, dâwt leh bawk min lo hrilh a nih kha. A ni hian phuba lâk nân tak tak bâk min lo ti hauh lovang, engmah sawi tawh lo chuan ka muthla a, mutthilh ka tum erawh ka muhil theilo chiang hle.



Ka in let tawn seka, Dominic-a awm dân chu ka haw em em bawk. Hmeichhe dang ka hmuh lai rengin a rawn hruai lût leh ngam a nia, a bialnu tak takah min ngaih loh zia a chiang reng mai. Phuba ka la ve ngei ngei ang.



In ngaihtuah rauh rauhin a awm loh laia chhuah rûk chu ṭha dâwna ka hriat avângin thâwm dim tak chuan kawngka lam chu ka pan leha, chhuah hlen erawh ka tum lo. Amah runluih nâna mipa dang awm pui chu ka tum ve tlat.




Kawngkhâr chu hawng ṭhem ṭhemin inhnuai lamah chuan rang zet hian ka tlân thla a “Sara, ka chhuak lawk dawn a nia. Ka rawn lêt leh vat ang, Mr Johnson-a in lo hrilh mai dawn a nia, reilote a lêng lawk dawn a ti in lo timai dâwn a nia” tiin pâwnlam chu ka pan zuia.



Tûnah chuan vêngtu te pawhin min dang tawh ngailo, Gate aṭanga chhuak chuan taxi a rawn tlân hlauh lehnghâla, lo phar vatin “Heta ṭanga bar hnai berah min hruai rawh” ka ti ta tawpa, a ni pawh a lo bu nghat mai.



Nui sakin car seat nghêng chuan ka ṭhu âwn dar dara, thui pawh tlân a ngailo. Reilote hnuah bar chu thlengin chuan man te chu ka pe sawk sawka, hei pawh Dominic-a pawisa min pêk vek a ni.



Hlim zet chuan bar chhûngah chuan lûtin ka hawi kuala, mipa chhelo deuh deuh pawh ka hmu nghal ta reng bawk “Wow mi thar maw?” mipa sam buang thang leh hmêlṭha deuh tak hian min rawn pan nghal chata, ka lo nuih nghâl var var mai.



Hmeichhe dang an awm ve nual avâng chuan a ka zâm bik lêm lo. Chupa chuan in tur min lâk pahin “Damian ka nia” tiin min nuih var vara, a in tur lak chu min rawn pe bah bawk, nui sak chung hian “Lilia” ti ve in ṭhutna lo awmah chuan ka ṭhu thla a.




Ka bulah rawn ṭhu ve in “I hmêlṭha hle mai, i rawn luh tirh aṭang khân min hip nghal zar mai a lawm” a tihchuan ka nuih leh hak haka “Nang pawh i chhelo, chuan ka lâwm e aw in tur avâng hian” ti ve in mipui lam mup mup te chu ka thlira.



Nuam an tih hmêl hlawm hle mai, kei erawh ka thinrimna hrikthlak ka tum mai chauh zâwk a, “A ho lutuk, hmeichhe hmêlṭha te chu. Duhsak hi in na bik riau zel mai a nia, tak takah heti laiah eng ti tura rawn kal nge i nih le? Nangmah ka en che hian i kal vak ngailo tih ka hre mai” mi a chîk âwm hle mai.




“Nia in ti thawveng turin ka rawn kal ve rawih a nih hi, a nuam a nge maw chu. Chu erawh ka awm rei anga a hriat mai ang, in chhûnga in khung ngawt ngawt chu a thaw pik thlâk êma ka rawn vak chhuak ve a nih hi” tiin in tur chu ka tem pah zauh zauha.




Lu a hai nghal chiai chiai mai “A nih chuan i rilru hahna chu ka lo chhâwk sak dâwn che em ni? In tur kha ka va lâk belh leh ang che” a tihchuan ka hnial lêm lo, Dominic-a chêt dân khan min ti thinrim êm a, rui barh khawpa awm ka duh.




Damiana pawh chu a rawn lêt thuaia, a in tur min lâksak chu banin ka tlâk leh papa, a nui nghal hak mai. A ûm a rawn keng phei hlauh chu a vânneih thlâk, zu chu tlâk pap papin ka rui mai theilo lehnghâl.



“Mipa huat deuh ka neia” tiin Damiana chu ka ena, a ngaihna hriat loh hmêl tak hian min lo en thung. “Mipa pakhat hmêlṭha deuh, mahsela mi sual leh luhlul tak mai a ni, zaninah pawh hmeichhe dang a rawn hruai lût leh a nih kha” tiin ka nui haka.




A ni erawhin engmah a lo sawi lo, ka thusawi chu a ngaithla tih erawh chiang takin ka hre thung. “Amah avânga helaiah pawh lo kal ka ni, ka rilru hahna te hi tih reh vek ka duh. Mahse tih reh dân ka hre der silo” tiin ka rui ṭan bawk nên ka hawi kual riai riaia.



Damiana chuan min rawn hnaih sauhin “Ka lo tihlim ang che, i duh phawt chuan. Room lamah kal ang hmiang” a rawn tihchuan ka melh zawka, a mitmeng chu a de sar sar mai. Ka han hnial dawna chutah Dominic-a ka ngaihtuah chhuak nghal, thinrimna chuan min rawn tuam leh mup mup bawk.



Engmah ka sawi tâk lohah chuan Damiana chuan min rawn fawpin ka tukkhumah a vuana, kan in fâwp nghal nghawng nghawng mai, min pawma min kal pui mai a tum lai chuan mipa aw chang leh thinrim tih hriat tak hi a rawn chhuak nghal khawla.




“Ka hmeichhia kha dahthla nghal rawh” ti tu chu tunge a nih tih ka hailo, Damiana ka fawh-na aṭang chuan awmsawnin Dominic-a lo meng rum ul chu ka en zawka, ka ner nghal sawk mai.




Damiana hmêl erawh Dominic-a a hmuh rual chuan a dang nghal vek mai “Mr Johnson nang maw? Ka tihpalh lutuk” tiin keichu min dahthla in a tlân zui nghal nal nala, mak ti lutukin ka en reng ringawt.



“Lilia alfero” ka phu nghal zawka, chutih rualin ka kâng nghal lâwp mai bawk. Pâwn lam chu min panpuia, ka rui bawk nên tâl turin tha rêng rêng ka neilo.



Car chhûngah chuan min nghat lût dawpa “Mipa dang ilo fâwp vêl a maw? Hmeichhia ka thah lohna tur che chhan han sawi teh” aw fiah kêk kâwk chuan a rawn ti a, kei erawhin ka ruih vâng nge hlauhna chhete mah ka neilo.



“Nangpawhin hmeichhe dang ka khawih tawh lovang ti chung siin i khawih a, keipawhin engah nge ka theih loh bik ang. Mipa hi ka van bîk reng reng lo aw, Dominic i duh duh a tihkual tur ka ni bik lo, dikna chanvo ka nei ve bawk. Ka mipa duhzâwng chu keimah ngeiin ka thlang ang” ka ti chu min rawn hnaih nghal ruak mai.




“Eng thu maw i sawi kha? Min chhâng hauh suh aw, Frederick tlân chhuak rawh. Inah zirtîrna pêk hlak a ngai a nih hi, hre rawh Lilia ka ta i nih hi, ka ta chauh nangmah hnaih tu apiang che chu an thi ang” a ti tawi tupa.



Chubâk engmah a sawi belh tawh lo, keipawh ka rui bawk nên ka meng ṭha hleithei tawh biklo. Mut chhuak chuan min rawn zemin meng lui thei tawh lo chuan ka muhil zui ta thuaia.



Zân laia ka harha Dominic-a ka hmuh rual chuan ka buai nghâl nak mai. A lo la thinrim hmêl em em lehnghâl, ka zu ruih a la reh lo deuh bawk nên be lo chuan hmun dang ka en sana, thawh chhuah mai ka tum lai chuan min kuai mu lehnghâl hnawk mai.



“Engvanga mipa dang fâwp nge i nih?” chu bawk chu min zâwt leha, ka chhân duh mai loh avâng chuan a thinrim leh sawt tih ka hailo, engvanga keimah chauh chu min hauh tum nge a nih?




“Nangpawhin hmeichhe dang i fâwp a, ka theilo bik em ni? Tu ta mah ka ni hleinem, ka duh duh ka fâwp ang, kan in ang chiah. Thinrim reng reng suh, bul ṭan hmasa tu zâwk i nih kha, hmeichhe dang ngaizawng tawh lo tur leh khawih tawh lo turin i intiama, mahse zaninah ngei khân ka hmuh fiah uar uar mai kha maw dâwt sawi hrât pa” tiin lehlam chu ka hawi zuia.




Tûnah hi chuan hlauhna chhete mah ka neilo, ka thin hi a rim ut ut zâwk. “Ka duh duh dâna awm tur khân i in tiam a ni lo'm ni? Tûnah i pha leh si a maw?” a rawn ti hrawk chu ka nuih haka.



“I duh duh dân chuan ka awma, a tâwpah chuan hei hi kan chan a nih tâk hi, hmeichhia kawp lovin i awm thei tak tak lo. Chu chu i zia ani, keipawhin ka duh duh ka kawp ang, ka duh thlang turin zalenna ka nei” ti hmak hmakin ka inher a.




Dik tak chuan a ngawih reng ka ring bik lova, mahse engmah chhah chhuah a tum bawk silo. Ngawi reng chuan ka in her daiha, a duhsak zâwk bulah chuan tlan kawi reng mai rawh se.


KA MUT A CHHUAK TAWH LUTUKA TI THLENG HI NIMAI AW