The Traitor BY Tlantlani Fanai

[ngaia]

Awmawmi's POV

"Fimkhur rawh aw,Lalawm?"tih pahin Lawmawma chuan thlai ka sil tur chu ka bulah a rawn dah a.

Kum khata vawikhat nan company field day hman a ni a,Thafela te chhungkaw resort pakhata hmangin chumi hmunah chuan infiamna lampang pawh a tih theih vek a,a changkang riah mai.

Game a tang ho tur hian department angin min then tawp a,kan vanduai a siamin,kan department a tawpna berah kan awm hlauh mai le.

Hremna atan company field day-a lo kal zawng zawng tan zanriah kan siamsak a ngai a, barbeque mai mai a ni hlauh a,a harloh vangin a tihzia kher mai,ni lo se chu ruai theh tur kan siam a ni ringawt ang a,zing atang buai a ngai tawh ang.

Eirawng han bawl vel kha pawi ka ti miah lo a, mahse Lawmawma leh Rinfela te hian min ven uluk leh lutuk na avangin car atanga ka chhuah atanga tun thleng hian engmah tihve phalsak pawh ka la nilo.

Motor khalh phalsak ka nilo a,an inel laia snacks leh thei eng eng emaw eitur a min tih bak chu engmah chawi an phallo bawk a,infiamna engah mah tel min phallo a,zanriah ei hmaa ka tih awm chhun chu ei chauh a ni.

Ka ei a.

Ka ei ringawt.

Theihpatawpa ka inlak duhawm pahin ka thiante pahnih hnenah chuan thlai sil tal min phalsak turin ka ngen a.

A tawpah chuan in vaunaah a chhuak leh ta tho . Eqngmah tihtur min pekloh chuan zanriah ka eiloh tur thua ka vau hnu chuan an phal ve ta hram a ni.

"Lallawmawm,thlai hi ka sil ringawt dawn alawm. Nge i hlauhthawn em em a?" Ka nuih vak hnu chuan Lawma chuan a hmui ti pawrhin min en a.

"I nau pai hi thla sarih lai a ni tawh a,Awm. I dul a puar lian tawh a,nimin te,nimin piah ai te khan i fimkhur a ngai asin,"ka dul chu a rawn kawk nghal a,chuveleh ka dul chu chulin ka meng kual rulh a.

"Ka hria lawm,duat. Ka lo fimkhur ngawt ang. Rinfela kha va pui rawh,mei chhem a tum urhsun ve em saw han teh,"tiin Rinfela awmna lamah Lawma chu ka nem a,mei tih alh tuma Rinfela'n thing tum ling tawh a chhem hauh hauh kan hmuh chuan kan nuih tiah tiah a.

"I sil zawh chuan minlo ko rawh. Keiman ka rawn chawi ang."

"Ngailo,a zan hmel emai."

"Aih,naute nu tur chu engmah chawitir loh tur,"a kut kuangkuahin min melhrum a,ka hmui ka tihpawrh hnu chuan ka thilsawi tum pawh ka theihnghilh phah.

"Awle."

"A tha e,kan kal tawh ange. Tuna ka kal loh chuan kan meihawl lei zawng zawng kha Lalrinfela sawn a hmang zo vek dawnin ka hria,"a tih chuan ka nui hak a,ka mitko ka san ak bawk a.

"Chutiangin eirawngbawl pawh i thiamloh kha,ka nau,"a thinrim theihna turin ka fiam zeuh a,mahse thinrim ahnekin ka tihdan chu zirin a mitko a rawn san ve ak zawk anih chu.

"Chuvang chuan alawm sawta ka thlen veleha U Sangtei call ka tum,"hmeltha deuh hian a khi sak a,a Doctor crush a video call theih nana a thiltih tum vang chuan ka lo nuih vur vur a.

"Awi ha, anih chuan kal vat rawh. I crush i hmuh theih na turah chuan ka danglo ang che,"a hnunga ben thek pahin sa rawhna lamah chuan ka nem phei a, Lawma chuan min hnialloin a pen hma ve mai bawk a.

"I zawh veleh min lo ko tur a ni tih kha hre reng rawh,"hna hahthlak thawh a phallo tih min hrilh nawn leh chuan ka lo thaw chhuak hak ringawt a.

Ka kut pharin ka bu nghauh nghauh ringawt a,basket-a thlai ho chu en phawtin tui herhhaw hnuaiah chuan ka silfai a.

Speaker a an hla play chu hlim deuhin ka sakpui rat rat a. Playlist lam buaipuitu hi tu tak ni ang maw.

Naupang deuh ho an ni ngei ang,hla tlem tlem chiah ka hria,a then hi chu a tunlai mah mah tawh.

"Puih i ngai em?"tih aw ri ka hriat chuan ka hawi vat a, Thafela a ni tih ka hmuh chuan ka mitko ka san leh ak a.

"Oh,U Thafel. Aih,a ngailo,a tlem lutuk,"ka nuih a, Thafela chuan minlo nuih letin a zunah ka uailo chauh a ni.

"Mahmuni'n a ngai lutuk che a,"tih pahin a kekawrbul ipteah a kut pahnih chu a zen than a,nichin ai khan a chhelo lehzual.

"Min ngai maw? Mahse kar hmasa lawk khan kan inhmu sia,"ka hmel ka siamchhe deuh hman a,mahse ka doctor chhelo tak ka ngaihtuah chhuah chuan ka nui leh nghal a, Thafela nui hmel ka hmuh chuan U Mahmuni a ngaihtuah ve a ni tih ka hre thei.

Hmangaihnaa khatin a ni a nuih ni.

"A vei leh lutuk che a. Inah pawh a sawi reng mai che,"a rawn kal hnai a,a nupui hmangaih tak chungchang a sawi thei chu a hlim hmel kher mai,chuan ka couple zah em emte pahnih an hlim tih ka hriat hian minti hlim bawk.

"Oh,ka chungchang a sawi chu a tha lam chauh a nih ka beisei."

"Chiang e,nangmah a fak nasat dan che hian midang a fak ka la hre ngailo."

"Keini ang te chu fakna tur kan awm ve dawn ami?" Ka ngaihtuah chuan ka nui hul hak a,ka bula a rawn din chuan ka en zawk a,a sawi angin ka thil silfai hnu chu ka pe zel a.

"Mi chak tak i nih hi,Awmawm. Khatiang thil Ben-a'n a tih hnu pawha mahnia fa enkawl tura thuthlukna i siam thei ringawt pawh hi. ka ngaisang lutuk che,"reivaklo ngawi renga kan thil tihlai kan tih hnu chuan a rawn ti chhuak a,a thusawi vang chuan lettuce ka pass dawn chuan a laihawl velah ka tawp chawt a.

"U Thafel...."

"Fakna tur che a tam lutuk,Awmawm. Nang ang mi tha lutuk a kaltir thei che hi ka la hrethiam theilo,"a ti dam diai a,a mithmul hnuaia a mit de sar sar ka hmuh chuan dawt a sawilo a ni tih ka hre thei.

"Sawi sawiin awmzia a nei tawh chuang lo a nih hi tiraw,"ka hna tih chhunzawm pah chuan ka nui sek a, rei tak hnua Ben-a hming ka hriat avang chuan ka thaw hak a.

Office-ah Lawmawma,Rinfela leh Tlanhlui te ho ka bulah an awm reng zel a,a pawimawh hle a nihloh chuan Ben-a chungchang emaw a kaihhnawih reng reng an sawi ngai lo a,tihtur a awmin min tihtir ngai lo bawk.

Engatanmah ka ngai chuanglo a,mahse min ngaihtuahna avang ringawt pawh hian ka lawm a ni.

"Ka nupui U Mahmun i tia,ani ai ka nau sia midang i koh thin dan ang hian Thafel tiin min ko ve thei reng ania,"a ti a,mimal chungchang kan sawi sia, formal deuha kan inbiak chuan boruak a ti diklo deuh chu a ni.

"Ka ti thei tak tak maw?"nui ver ver chungin a lam chu ka hawi a,a lu a lo bu a,a biangsum hian a ti langtha takzet.

"Tehreng."

"Anih chuan,tun atang chuan ka u tawh dawn lo che ania,Thafel,"tih pahin ka nui uar uar a.

"Awle?"

"Nichin kha, Ben-a chungchang vel kha. A thinlung keimahah a bet tawhlo a,a awlsam lutuk asin,"ka tihchhuah chuan ka sawi zawnga ka tawt up up tawhlo chu mak ka ti hial zawk.

"Mahse engtin nge i kal tir theih? Keichu ni ila,ka theilo ang,"a ti chhuak a,chhan dan tur ka ngaihtuah pahin ka hnar chu ka tuai zeuh a.

Heichu ka lo ngaihtuah ve nasa tawh a.

Ka thuthlukna chungchang hi thil pakhat chiahin a sawifiah thei.

"Ka chunga thil thleng ang hi midang chunga thleng turin ka phal ngai dawnlo,a chhan chu he nâ hi ka tan pawh tawrh hrehawm tak a ni a,mahse ka dinhmunah hian ding ta la,Fel,ka kaltir chhan hi i hre ngei ngei ang,"ka ti chhuak sap a,hla deuh hleka Lawmawma leh Rinfela te'n a hel deuha sa ei leh eiloh chungchang vela an inhnial niawm tak chu ka thlir a.

"Ka hmangaih tuar tir aia keimaha tuar a tha zawk tih hi maw?" Thafela chuan ka thusawi chu enge a nih a ring chhin a,ka bula ding mi fing tak mai chu ka nuih a.

A dik.

"Ni chiah e. Kaltir phal lo tlat ta ila Ben-a hian a tawrh nasat zawk i ring em? Han ngaihtuah mah la,hna avanga kan thawh tlai lek pawn kan ti theilo ania,a ti thei lo chung kumkhuaa min chenpui turin nawr tlat ta ila min huat tur zia han ngaihtuah teh. Ka mi hmangaih lutuk in min huat hi ka duh hleinem."

Ka thilsawi vang chuan Thafela chu a ngawi reng a,a mit men dan atang chuan a hrethiam a ni ngei ang.

"Buaina i neih chuan min hrilh nghal zel rawh,engpawh ni se. Mahmuni hian a ngaina em em che a,keipawn a chhan ka hria in ka hria. Ben-a nen hian innei tawhlo mah ula,amah hnaihtu leh a thiantlte ni bawk mah ila,keini hi min hlat kher a ngai tihna a nilo ania aw,"a rawn ti chhuak a,min puih a duhna vang chuan lawm deuhin ka nuih a.

"Ka lawm lutuk e aw."
Show post links
Top