Lalrindiki POV
"A tlai tawh sia, kal tawh mai rawh" ngawi reng a kan din takah chuan ka ti a, "Awlsam tak in min haw tur i tum amaw?" a thusawi awmzia hrelo lutuk chuan ka en a, chutah nui chungin ka hmui ah chuan a rawn fawp a nihchu, ka thin chu a phu nghal dup dup a, chhan pawh chhang let lo chuan a tih ang ang in ka lo awm tawp, a in lak hran hnu pawh chuan ka la meng phawk reng, vawikhat kan in fawh na a nih vang nge ka zak em em lehnghal.
"I vawikhat na a nilo tih ka hria a nia, mahse ka rin aiin i zeilo" a tih leh lek phei chuan ka zak zual hle, sawi chu a sawi dik ngei, U Ruatpuia nen hun rei tak chhung kan in kawp a, eng eng emaw chu kan tih ve thin, mahse U Hruaia hi chu a dang bik tlat, U Ruatpuia lakah kha chuan zah leh zam em em na ka nei ngailo, mahse U Hruaia hi chu a bula ka awm ringawt pawh in ka zam em em mai chu a ni sia.
"Min chhang let ve tawh rawh aw" chhan pawh ka chhang let hma chuan ka hmui ah a rawn fawp leh a, ka thiam ang ang chuan ka lo chhang let ve vat, a duhthawh zual sauh bawk, rei erawh min fawp lo thung, pawn ah kan awm a, zanlai ni tawh mahse miin min hmu thut thei tlat, engmah sawi lovin min en reng avang chuan ka lai chhe leh hle tawh, kan din na lai hi thim mahse kan hmel chu chiang vak lovin kan in hmu thei a "Enge min en reng a?" ka ti ta tawp bawk.
"I hmeltha lutuk a" an ti ngawt a, "Ih ka lut tawh dawn" ka kalsawn vat lo a nihchuan laih lutuk avangin ka tlu tawp thei tak tak in ka ring, ka kut a a la chelh tlat avang chuan ka kalsawn bik chuang lem hlei lova, "Zawh tur min nei tiraw?" ka rilru hre awm tak chuan a rawn ti leh a, ka zawt angem tih ah ka rilru a in sual buai a, zawt tawp ila tha ka ti ta zawk, a nih min chuan ka dinhmun hi a lai kual vel vek dawn tlat.
"Ti hian enge kan nih?" ka tih chuan a nui ri chu ka hre zawm zat a, "Enge kan nih a I hriat?" ka zawh na chu zawh na bawk in min chhang ka ti mai, "Englo, heti hian kan in ngaizawng tih a nge, ka rilru put hmang chu i hre tawh a, mahse.." sawi tur hre lo lutuk chuan ka ngawi ta daih a, "Sawi zo law law la?" tiin mit ko chu a san ak a, "I sual em mai, ka thusawi awmzia chu i hrethiam ve vek tih ka hria a nia, min chhang tha mai la, i bialnu ni tura min duh loh chuan sawi tlang law law rawh" ka ti ta hmak a.
"Hun rei tak chhung ka bialnu i nih theih nan ka bei a, ka nghak bawk che, engvangin nge ka bialnu i nih chu ka duh lovang, tih angah chuan ka bialnu i ni a, kei I bialpa, a chiang em?" ka thinlung chu lawm avangin a phu leh dup dup tawh, ka nui nghal var var "Mipa dang i hnaih vak ka duh lo a nia, chin tawk a awm tih hria la" naupang ang mai in min hrilh chuan ka lawm teh chiam lo, "Ka hria, mipa ka hnaih vak ngai i hria em ni?" lawm lo zet chuan ka ti a.
"Hre lo e" a ti leh mai a, "Keipawh ka thikthu a chhia a nia, a hmaa ka thil tawn te min hriatpui tu i nihkha, ka thikthu a chhe viau a, ho te te ah ka thinrim a nih pawn min dawh theih viau a ngai ang, nangchu i upa tawh a, min hriatthiam ka ring, U Ruatpuia kha ka ring em em a, hmeichhe dang lakah ka ringhlel ngailo, mahse tunah chuan a danglam tawh, tlang takin ka hrilh che a nih chu" ka ti duah a, bul kan tan chauh a, buai na neuh neuh laka in ven lawk nan tiin engkim chu ka hrilh fai ta vek a.
"Hmeichhe dang lakah ka phatsan ngai lovang che " thawveng sawt tur ka nih laiin ka chhungril chu a tawt nghal up thung a, a chhan chu kha thu kha U Ruatpuia pawn a sawi fo a, mahse enge theng kha, a thutiam te theihnghilh in hmeichhe dang min pansan tho a nia, ka awmdan danglam chu U Hruaia chuan a lo man thiam nghal vat a, a awm ah chuan min kuah bet nghal vang vang.
"I tan mipa tha ber ka nilo maithei, i rilru nat na tur thil ka ti ngai lovang tih ka tiam theilo che, mihring ve tho ka ni a, mahse ka theihtawp ka chhuah ang" a tih chuan ka ngaihtuah na chu ka kawm melh melh a, mipa dang chuan thu an tiam a, rei erawh a daih ngailo, a ni chuan engmah min tiam lo mahse a thusawi chu ka ring nghet hnuah thung, ka hmel atang chuan ka ngaihtuah na tur awm ang a hria a ni mahna "Min rin na hi ti chhe lo turin ka theihtawp ka chhuah ang" tiin a phun leh sup a.
A tlai tawh em avang chuan in thlaleh tak chungin kan in mangtha a, ka mut hmun ah te chuan ka nui leh thin, nichin a ka awmdan nen kha chuan in ang lo tak a ni bawk, muthilh pawh ka muhil theilo, ka ngaihtuah na ah chuan U Hruaia nen kan awmdan leh kan in biak na te kha ka ngaihtuah let a, tunah chuan in kawp tak tak kan ni tawh a, a bialnu ka nih tawh thu leh ka bialpa a nih thu a sawi lai te ka ngaihtuah let leh phei chuan ka lai thar em em ringawt.
Chaw kan ei a, ka chhungte chuan ka awmdan danglam chu an lo hriat hmaih lo nasa, "Mami chu hmuh tha hmu ang mai, enge i nuih leh vur vur thin a?" U Sawmi'n a rawn tih chuan "Chutiang engmah a awm lo, nidang a ka awmdan ang reng in alawm ka awm" ka lo ti vat thung, "Kan hrechiang che aw, hetiang tak a i hlim hmel hi hmuh a khat tawh lutuk, U Ruatpuia nen in in then hnu po hei kha chuan" U Rdi thung chuan a lo ti leh phawr phawr a.
"Rd a hun lo" U Sawmi'n a lo ti leh vat, U Rdi pawh chu tawng sual a in tih hmel hle, engah mah ka ngai tawh lo tih hria se chuan an in khap buai lo tawp ang, "A ho lutuk khatiang thil hlui, U Ruatpuia nen kan in kar chu a tawp na a rei tawh em mai, engah mah ka ngailo" zang vah chuan ka lo ti a, "A dik chiah, khatiang mipa rinawm loh lutuk kha" U Sawmi chuan an rawn ti leh lawk a, U Rdi a khap zo chiah a mahse U Ruatpuia hi chu an la haw tlang a ni.
"Chaw ei lai in khapa chungchang kha sawi suh u, chaw ei a tui lo zo dawn" U Mama chuan a lo ti ve khauh a, U Mama hian engmah sawi lang ngailo mahse U Ruatpuia'n min tihdan chungchang ah khan a la lawm lo hle tih ka hre ru kar a, a hma kha chuan an in kawm ve nasa thin hle a nia, tunah erawh biak chu sawi loh U Mama hian biak tak ngial pawh a tum ngailo, pawh ka ti hran lo khawp mai.
Dawr ah te chuan nidang ang lo tak in ka nui sang reng a, U Masiami te pawn mak min tih hmel takin min rawn en leh thin tih pawh ka hria, engmah min zawh loh avang chuan U Hruaia nen kan chanchin ka hrilh duh lem lova, Amuani bulah erawh ka sawi tawh thung, a ni pawh a phur ve khawp mai, chhun ah chuan U Hruaia'n min rawn call a, ka chhang nghal vat, "I buai em?" a aw ka ngaithla rual chuan nizan a thil thleng kha ka ngaihtuah chhuak a, ka lai leh pek hle.
"Buai lo e, nang dawr ah i awm a mi?" ka nui var var a, "Aw bungrua a rawn thleng a, kan buai tih khawp mai, i haw hman hunah min rawn hrilh dawn nia, ka lo lam ang che" midang chu nise ka hnial leh ngei ang, mahse tunah chuan ka bialpa a ni tawh a, min rawn lam dawn thu a sa i rual chuan ban vat vat ka chak hle tawh, kan in biak zawh chuan U Masiami te thut na lam ka va hawi a, Dingi nen min lo en kar tih ka hmuh rual chuan ka in siamtha nghal vat.
"Nangi i awmdan a van dang ve, thil lawmawm deuh hriat i nei em ni, vawin chu i nuih vur vur reng a" ka awmdan ah hian ka ti lang lutuk pawh a ni mahna, "Chutiang engmah a awm lo, ka tho fuh a" ka lo ti nghal vat a, customer an rawn luh takah chuan zawhna dang min zawt tawh bik lo, ka chhungte hnenah engmah ka la sawi lo bawk nen ka chhungte hriat hma chu tumah hrilh ka tum lem lova, Amuani chu ka thiantha em em a ni bawk a, tunah rih chuan Amuani hriat hi ka duhtawk rih viau bawk.
Dar kan khar hma deuh chuan U Hruaia hnenah message in kan in khar tep tawh thu chu ka va thawn a, a lo kal nghal tur thu in min rawn chhang let ve nghal, U Hruaia chu a rawn thleng fuh chat chat khawp mai, "U Hruaia'n a rawn lam dawn vang che hian nimaw in khar kha i lo chak em em ni?" Dingi'n a tih chuan "A nilo" ka chhang rang mah mah, "Min va han chhang rang em em ve, ka thusawi kha a dik tihna a nimaw?" henu han nghal dan em em hi aw.
"I hneawm, U Masiami Dingi hi hruai haw vat vat teh" U Masiami bulah chuan kan tu ta ngawt a, "Nia nia, kan ti buai rei mai mai ang cheu kan kal ange" Dingi bawk chuan a ti leh, han sawi leh mai tur ka hriat loh avang chuan an kalsawn lai chu ka en ta reng ringawt, "Lo chuang la" U Hruaia'n a rawn tih takah chuan a lam chu ka hawi vat a, min lo en ve reng mai, lai deuh tak chung chuan a bike ah chuan ka chuang a.
"I ril a tam em, thil kan ei dawn em ni?" motor a tam bawk nen a rawn au deuh ti tih a, "Tam hran lo, chaw ei a hnai mai dawn sia, ei loh pawh pawi ka tilo" tiin ka lo chhang let a, mahse amah zawk a riltam thut thei tih ka ngaihtuah leh hnuhnawh, vawin khan an buai thu te kha a sawi sia, thil a la ei lo pawh a ni maithei, "Nangmah zawk i ril a tam em, a tam chuan thil ei pawh chu pawi ka ti hran chuang lo a nia" kan ti leh a.
"Tam hran lo e, i riltam ka rin vang mawle" a rawn tih leh takah chuan engmah ka sawi tawh lo, kan in kan thlen hma tak tak chuan ka din tir ta daih a, mak a tih hmel hle, "Ngatinge kan la thleng silo a" a sir a ka va din rual chuan a lo ti a, "Saw lai saw a ni tawh tho a, ke in ka kal mai ang" chal ti chuar deuh chung chuan min en a, "Enge?" ka tih haw chuan "Ngatinge midang in kan in kar an hriat hlau ang mai a i awm?" a aw ah chuan a lawm hmel teh chiam loh.
"Chutiang lam a nilo, ka chhungte bulah engmah ka la sawi lo a, hetianga min hriat chhuah hi ka duh loh vang a nia, keimah ni ngeiin tha tak in sawi ila ka duh vang zawk a nia, kan in thleng min thlah la chuan midang in min hmu anga tun angah chuan engkim ah fimkhur a ngai tawh si a, thenawm ten ka chhungte hnenah thil nilo lo an lo sawi ka duh loh vang zawk a nia" ka thusawi chu hrethiam se ti zetin ka en kar a.
Engmah a sa i tak lovah chuan nuam ka ti ta chiah lo, "Ih ka zah pui vang che a nilo a nia aw, sawi na hun ka la neilo lutuk a" ka ti lehnghal zat a, "Ka hrethiam alawm, i sawi chu a dik e, zanin ah ka rawn leng anga, kan sawi dawn nia" a tih chuan "Maw, zaninah maw?" ka tawng ring ka ti leh deuh si chuan ka hmui ka hup vat a, a hma mah mah deuh chu a ni, "Aw.. zaninah" a ti leh hmiah a, "I tih dan dan a nimai" ka ti ta sep a, ka zam viau thung.
"Dawr lamah in buai awm bawk sia, let leh tawh mai rawh" ka tih leh takah chuan min hnial buai lovin a let a, keipawh kan in lam chu ka pan, in ka thlen hma tak tak chuan dawt ah ka kal kawi a, thei thur eng eng emaw chu ka lei a, ka period leh tep tawh a, thei thur ka ei chak riau, in chhung a ka luh chuan midang ang lo takin U Mama chu thutthleng ah thu a tv a en chu ka hmu nghal a, "U Mam I lo va haw hma ve" a bulah chuan ka thu thla nghal.
"Vawin chu chawhma bak hna ka thawk lova, i chau em, dawr lamah te in buai viau lo maw?" lu ka thing a, "Tunlai tak chu kan buai loh lai a ni, kan in hralh theilo lutuk a, a hreawm zawk, customer an awm loh phei chuan tihtur a awmlo ve bawk sia" tiin duhdan zet chuan ka thu der der a, "In hralh reng theih a ni hleinem, nakin ah in la in hralh chur chur mai ang" ka u chuan a lo ti leh a, ni e, in hralh reng theih ni miau hek lo le.
"U Masiami pawn a tia, kan awm hahdam tih a nimai a tia lawm" ka tih chuan U Mama'n min rawn en zeuh tih pawh ka hai lo, "U Mam, U Masiami hi i duh ve tho bawk sia, hma lak te hi i tum miah lo tihna nge?" diktak chuan ka u hian engmah sawi leh tih a la neih loh avang hian keimah zawk hi ka rilru a hah tawh, "Engtia hma lak nge maw i tih ni?" ka thusawi awmzia a hrechiang lutuk tih ka hai der silo a.
"I hriat reng kha, U Masiami ai tha chu i hmu tawh dawn lo a nia, hma i lak vat loh chuan i chan ropui a nimai" tiin pindan ah chuan ka lut ta daih a, in thlak hmasa ta lo chuan phone kan khawih leh phawt a, U Hruaia message a lo awm leh reng tawh, dawr a thlen tawh thu leh zan ah chuan dar 7 vel ah a lo kal tur thu a lo sawi na a ni a, a rawn leng tur chu phur viau mahila ka chhungte hnen a kan in kar sawi chu ka zam em em bawk si.
"Nanghi enge i hriat a, zing atang tawh I awmdan hi a mak lutuk, tunah pawh i mawng a hawlh tu awm ang mai i tei sek ni" U Rdi chuan a lo ti leh tawh a, "Ka awmdan engkim sawisel i tum hrim hrim a nihkha, tv kha en mai mai teh" ti hlak in kawngka lam chu ka en leh thin a, dar 7 chu a ti hnai dawn mai, kawngka kik ri a rawn awm takah chuan U Hruaia bak a nih ka ring lo, kawngka chu ka va hawng a, a lo ni ngei bawk.
"Hruaia chu lo leng rawh, tunlai i rawn leng khat si a, in duh kan lo ti viau che a sin" ka nu chuan a lo ti nghal a, "Dawr ka siam that ve chauh si a, buai a na deuh a tun ni" tih leh U Hruaia chu thut a rual a, "Tak tak in a dawt han siam chu thil namai a ni lovang, eng lam nge i tih a?" keipawh ka la hre miah lo, "Motor parts vel zawrh ka tum ve a, workshop nen tih kawp ka tum a, enge a an dawn ni" U Hruaia chuan a lo ti leh vat a, "E a tha khawp alawm, tun angah chuan mi tupawh mai hian motor kan nei thup tawh mai bawk sia" ka nu chuan a lo phur pui thiam ve hle.
"Khawiah nge Mama hi a awm, hmuh tur a va awm lo ve zanin hi?" ka u a hmuh mai loh avang chuan a ti leh a, "Khawiah nge maw a kal ni, a chhuah lai awm ka hre silo a, in hre hlawm em?" tiin kan unau thum chuan min rawn en a, "Aw thenawm ah ka va leng lut lawk ange a tihkha, a lo let tep tawh ang" U Sawmi'n a ti vat a, a flim hmuhnawm tih em em mai a chhuak bawk nen tv lam bawk chu a melh lehnghal.
"Thingpui ka va lum ange" tiin ka tho a, gas ah tui ka chhuang chiah tih chuan U Mama a rawn lut a, "Thingpui i siam dawn a mi, ka duh ve a nia" an rawn ti nghal zat a, "Thingpui siam hi chuan awm lo pawh nila ka siam kep ziah che" ka lo tih chuan a nui mai a, "Hruaia chu i rawn kal dawn tih ka hre silo a, thenawm ah ka va leng lawk a, i lo thlen na a rei tawh em?" a tih zawm lehnghal zat a, "La rei lo, nula i rim emaw ka lo ti zawk a" U Mama chhaih pah chuan U Hruaia'n a lo ti ve bawk a.
"Kha rim tur pawh a hriat tawp loh kha, a upa tawh si a, engtik ah nge mo ka neih ve dawn ni, hmeichhe lam lah hi a ngaihsak lo bawk si a" ka nu chuan a lo ti mawlh mawlh a, "I hmanhmawh a nihkha ka ni, nakin ah mo tha deuh ka la pe dawn che alawm, hmanhmawh vak a ngailo" ka u lah chuan ngaihsam zetin a lo ti leh mai bawk si, thingpui ka siam zo chiah bawk a, ka chawi chhuak nghal.
"Kum hi a ral zung zung tawh a nia, nakin ah tih reng hi thil tha ber leh tih chi a nilo, in duh duh hunah nupui pasal in nei thei dawn ngawt lo tih hria ula, Hruaia nangpawh ka hrilh che a nihchu, tlangval nuam ka ti e tih vang ringawt a nupui neih hmanhmawh loh te hi thil tha a nilo a nia, in dinhmun en in nupui chawm thei tur ve ve in ni tawh a, chuvang chuan ka sawi hi ngun takin ngaituah ang che u" ka nu chuan U Mama te thian dun chu a zilh ta malh malh a.
U Hruaia chu ka va melh leh zeuh zel a, min lo en ve chiah thin bawk nen lai tak in ka hawi sawn leh vat thin thung, ka nu lah chu a la tawng tui hmel si, bialnu nei tur ten a fuih thul, U Hruaia bialnu ka nih thu a hriat hunah engtin tak awm ang maw, "Nu Hming keichuan bialnu ka nei reng a nia" U Hruaia a ti ta khauh a, ka in ring hman lo, tlang taka a sawi nghal mai ka ring lo a sin mawle, phawk zet in ka en reng bawk a min en let duh tawh miah lo lehnghal.
"Enga bialnu i nei amaw, I va che rang bik ve, tunge i bialnu chu ni a?" U mama lah chuan phur zetin a lo zawh a, ka kut chu ka lo hun ngawt ngawt a, hawi pawh ka hawi chhuak ngam lo, U Hruaia sawi hun chu ka lo nghak tawp a nimai, ka chhungte kan chuan U Hruaia sawi hun an lo nghak ve reng bawk a, U Sawmi pawn a thil ei lai chawl meuh in U Hruaia chu a en kar bawk nen U Hruaia bialnu ka nih thu an hriat hunah mak an ti dawn lutuk tih ka chiang.
"Arini hi" a sawi dan teh tawp avang chuan amah chu ka en nghal vat a, ka chhungte mit keimah ah a fu thup tih ka hriat rual erawh in hnuai lam ka bih leh vat thung, "Maw ka nau hi maw?" tiin U Rdi chuan min rawn kawk vu bawk a, "Aw" Pakhat kan chuan a lo ti leh hmiah bawk a, "A va mak ve mawle, engmah kan lo la hre ve hauh silo a" U Mama pawh chuan a ti a, a aw ah pawh chuan mak a tih zia a lang chiang ngang mai.
"Sawi na hun vak a la awm lo, nizan ah khan ka bialnu a ni chauh a" ka zak lutuk chu khuk ral chem chem mai ka duh, "Ka hrethiam e, chuvang a nimaw tukin ah pawh khan i lo nuih leh vur vur thin ni, i va in zep thei ve a" U Rdi'n min rawn nek pah chuan a ti a, "Ka in zep pawh a nilo, in hriat vat hi" ka tawng zawi hle, "Min thawng hle mai a, nangni pahnih ber kher chu ngaihtuah pawh ka lo la ngaihtuah chhin ngailo" U Sawmi pawh chuan a lo ti ve bawk a.
"A lo thleng va tawp a nimai keipawh ka in ring hman bik chuang lo" ka tih leh takah chuan ka chhungte chu za zet hian an nui a, U Hruaia pawh a bang bik lo, an awmdan atang chuan U Hruaia nen kan in zui chu dem tilo ang pawn an awm lova, U Mama tak pawh chu a lawm hmel viau zawk in ka hria, chu chuan min ti thawveng sawt bawk, U Hruaia nen kan chanchin te an han hriat hnu chuan min chhaih leh zeuh thin a, ka zak thei hle.
Dar 9 rik dawn ah ka chhungte chu pindan ah an lut ta vek a, "I bulah ka thu ve thei ta alawm, kha i hmai a sen vek a nia" U Hruaia'n a tih chuan ka biang chu ka khawih zeuh a, "Nangmah vang vek a nih hi" ka lo ti nghal pang a, "Enge keimah vang a nihna I u te vang zawk kha a nilo em ni?" a tih leh chuan "Khatiang anga hmaah khan i sawi ka ring lo alawm, mahse ka chhungten an hre ta bawk a, ka thaw huai mai" ka ti leh sep.
U Hruaia chu rei a leng tawh lo, "Makpa interview hmasak na ber a ni bawk a, leng rei vak chi a nilo, ka va haw ange" a hmel ka en a, a chau tih sawi lo mahse ka hrethiam nghal vek, ka dang buai duh ta lem lova, pawn thleng chuan ka thlah a, "Naktuk dawr a i kal dawn ah min rawn hrilh dawn a nia, kan thlah ang che" a tih chuan "A ngai kher hleinem, i buai awm sia, bus pawn ka kal thei tho a" ka lo tih ve pawn "Ka bialnu thlah nan te chuan hun ka nei alawm" a ti hmiah a, bialnu tih thumal a lam rik apiang hian keimah ah eng emaw tak che dawt a awm thin ka ti mai.
A kal hma tak tak chan ka hmui ah a chuk leh zeuh a, nui var var chungin ka en liam kha, thawm dim takin kawngka chu ka kalh a, ka in her chiah chu U Sawmi leh U Rdi te chuan min lo en kar mai, ka hnu thut bawk nen ka phu zawk bawk, "In va mawl dun tak e aw, min ti phu alawm" tih pah in ka awm chu ka dawm vang vang a, "I in zep thei a nih mai chu, kan bulah engmah i sawi duh lo vel a" U Sawmi chuan a lo ti a.
(Post hi like a la tlem khawp mai a, min la like sak lo te khan min han like sak ve leh ula aw)
"Kan in zep lova in hriat vek tawh reng kha" ka tih leh pawh chuan zawhna ngah dun hmel zet hian min en a, "In in ngaihzawn thu te chu hre tawh mahila engtik tak nge hetiang dinhmun in thlen theih tih te pawh engmah I la sawi hleinem, U Hruaia hi kan inah a rawn chuang kai ngun bawk sia, U Mama rawn kawm tura rawn leng emaw kan tih lai te khan nangmah vang zawk in a rawn leng chu a ni awm sia" U Rdi'n a lo ti ve thung a.
"Khatiang te chu hriatthiam ve mai awm cheu alawm" engkim an hre tawh bawk a zah buai vek ka tum lo, "I in ti thei vel e, mahse ka lawmpui tawp che U Hruaia phei chu a fel bawk si, engtinge i lo kherh thluk theih zawk ni?" Keimah zawk in hma ka la hmasa emaw an ti a nih hi, "Ka kherh thlu lul lo, amah zawk in alawm tan la hmasa" ka lo ti vat a, "Ka nau hi i lo luck a nih hi, i u ten kawp pui kan la neih loh laiin nihchuan kan veng a tlangval fel em em mai bialpa i nei bik a nia, ka nau mah nula i thik awm rum rum mai alawm" U Sawmi'n a lo tih leh chuan in ti thei zet hian ka lo en a.
Dam chuan hun a lo kal ve zung zung a, U Hruaia nen kan in zui na pawh thla a liam leh tawh, kum tawp kan hnaih tawh bawk nen buai a na ve duh mawp mawp hle, dawr lamah pawh kan buai thin viau mai, U Hruaia pawh a dawr hawn thar nen a buai thin bawk a kan in ah pawh a rawn leng lut khat khawp mai, mahse pawi ka tilo, bialpa hman deuh neuh ai chuan bialpa buai deuh neih hi kei ka duhdan a ni hlauh thung miau a ni.
U Hruaia nen kan chungchang chu midang te pawn an hre nual tawh bawk a, kan in zui lang em em pawh a nilo, mahse vengchhung ah CCTV kal thei an tam bawk a, thu a thang darh hma hle, thenkhat in in hmeh min tih thu an sawi laiin thenkhat erawh chuan min sel bawk a, mahse pawi tihna kan nei hran lo, khawvel a kan cham chhung hi chuan fak na leh sel na te chu kan dawn tur a ni miau si a.
Chutih rual erawh in kan kohhran ah hian keimah ang rual vel thian pathum te erawh hi chu ka ti thei thak lo thung a, midangte chuan a ruk in kan chanchin an sawi a, midang ka atanga ka hriat bak hriat na dang ka nei bik lo, mahse an ni pathum te erawh chuan ka hriat lai kher te hian U Hruaia nen kan chanchin hi sawi nuam an ti emaw tih mai tur a ni, an zing a pakhat chu U Ruatpuia cousin a ni nghe nghe.
A U nen kan in then dan te kha engmah a hriat hmaih hauh lovang tih ka chiang, chhungkhat an ni miau a, mahse chuti chung a a u nen kan in then na pawh hun rei a tak hmaa mipa dang ka kawp leh mai chu min dem zawk hlauh thung a, chuvanga ngaithei lo em em pawh chu ka ni, buai na siam ka duh loh vang chauh a in sum hram hram ka ni a, engtik ah emaw chuan puah chhuah hun ka nei lovang tih ka sawi theilo, mihring ka ni a, dawhtheih chin ka nei ve tho si a.
U Ruatpuia lah chu enge a hriat ni U Hruaia nen kan in zui tih a hriat hnu hian min rawn hnaih ka ti dawn nge dawr ah te rawn kal a ching a, be tha ngailo mahila min hmuh fuh chuan min be ngej ngei zel, biak in ah te hian min biak a chung thar riau a, kan hun kal tawh te kha tupawn an hria ti ila ka sawi sual lovang, tunah lah kawp pui dang kan nei ve ve tawh bawk nen midang sawi zui theih a awm hi nuam ka tilo a, duh pawh ka duh lo.
Zan khat chu dawr ah ka kal a, ka let leh lam chuan U Ruatpuia nen kan in tawk leh hlawl a kal pelh mai ka tum chuan ka ban ah a rawn vuan a, kal zui theih pawh a ni lo, "Dawr ah I kal em ni?" Dawr atanga ka chhuak lai a hmu ve vek a, chutiang in zawh chu tul ka ti lem lo hle, "Um thil ka lei a" ka ti ve mai a, "In be lawk ang hmiang?" A tih leh rual erawh in "Ka hman lo, thil tih tur ka la nei" rang zetin ka lo ti thung a.
"Reilo te chauh a ni ang" a tih leh pawh chuan ka hnial tlat, "I danglam ta hle mai" min en vang vang kan chuan a ti a, "Mihring te chu kan danglam thin alawm, kan nundan ngai reng in kan nung thei silo a" ka ti a, "Nang hian keihi min theihnghilh tak tak tawh em ni, khang kum chhung.." a thusawi zawn tur chu lo pawt chat in "Ka theihnghilh lo che, engtinge ka theihnghilh theih che anga, hun rei tak chhung kan lo in hre tawh a, awlsam taka theihnghilh chi i ni hleinem" ka lo tih khalh leh zung zung a.
"Bul kan tan tha leh thei angem?" A thusawi chu ka hresual emaw ka ti zawk hial, "Kun tamtak chhung kan lo in zui tawh a, min theihnghilh ka ring lo reng a ni, nang nen hian bul tan that leh ka duh" ka nui ta hak a, "U Ruatpui ka thusawi awmzia kha i hrethiam chiah lo niin ka hria, ka theihnghilh lo che ka tih avang khan ka la duh reng che tihna a nilo a nia, i hriat angin tunah chuan kawp pui hran kan nei ve ve tawh a, bul tan leh chu thik theih loh tawp a ni, duh pawh ka duh lo bawk" ka ti hmak a.
"Min theihnghilh loh thu i sawi a nilawm ni, a awmzia chu nang hian min la duh tihna a ni mai lovem ni?" Lu ka thing a, "Nilo e, keichuan hmelhriat pangngai ang bak in hriat che ka duh tawh lo, hetiang hian vawikhat mah awm tawh suh, mite hian kan hun kal tawh an hre ve vek a, an sawi zui reng tura awm a duh lo a nia, nang nen a kan in kar tawp na chu a rei tawh a, nang nen a bul tan leh lam chu ka damchhung zawng hian ka duh leh tawh lo bawk ang, tuna ka nun hman dan ah hian ka lungawi a, ka hmin viau bawk" chiang tak chuan ka ti a, ka kalsawn nghal.
Thinrim na chuan ka chhungril a luah khat a, engtinge khatiang thu kha a la sawi ngam zawk ni, min zahna chhete mah a neih loh zia ka chiang leh zual a, a ni nen kan in kar a tawp avang khan ka vanneih zia ka hre thar leh awn awn bawk, bialnu a neih reng laiin bul tan pui ah min sawm a nia, mipa rinawm lo laklawh hi chuan an nundan an sim mai mai thei tawh lo ti a miten an sawi thin hi a lo dik ngei a nih dawn hi.
In chhung a ka luh hma chuan ka ban ah vuan a min pawt her tu an awm rual chuan au khum vak mai ka tum a, a chhan pawh U Ruatpuia bak a nih ka rin min avangin, mahse ka mi hmuh avang chuan ka tawp leh nghal chawt a, U Ruatpuia ka hmachhawn dawn emaw ka tih laiin U Hruaia zawk ka hmuh avang chuan ka lawm hle, mitmeng fiah tak mai chuan min en a, "In rawn leng dawn tih engmah min hrilh silo a" ka ti vat a, "I va thinrim hmel ve, tu in nge lo ti lungawi lo che a?" Tiin a rawn kun hniam a.
"Chutiang engmah a awm lo, lut ila" ka tih takah chuan a bu nghut a, in chhung lamah chuan kan in zui lut nghal. U Hruaia ka chhungten an hmuh chuan an lo be bawr nghal vat a, thingpui ka lum chhung in ka u nen a dawr hawn chungchang an sawi dun a, dawr hawng tan tir ni mahse dawr tu an nei tam ve thin hle a, rin phak bak in miten an hre chak bawk, U Hruaia chu a mizia a dang riau in ka hria, ngaihtuah nei tih hriat takin kan pahnih chauh a kan awm hnu pawn a ngawi reng a.
"Enge i ngaihtuah?" Ka ti ta tawp, "Ruatpuia nen in in be lai kha ka hmu cheu a" a tih sup chuan a ngaihtuah tur awm ang chu ka hrethiam nghal mai bawk, "Thil pawimawh kan sawi lo w nia, eng ang pawn ko in zui nasa tawh mahila a ni hnen a let leh tum na kha ka nei tawh lo" ka lo ti vat a, a lungawi lovang tih erawh ka hlau ru viau, "Ka hria alawm, ka ring bawk che" a ni ang mipa tha lutuk hi kei hian ka phu chiah em tih ka ngaihtuah fo thin.
Cont ...
Comment leh click kha aw, min han tih sak leh hram hram ula hmeltha ho
