STORYFB.COM

Mate, i pu adamṭha vaklo aniang, chanchinte ngaihven vela, i nu lah buai a inti thei si a" Kan chaw ei lain kapa'n ati a, " Nia, keipawh school banah kalo peng kawi ve ang " U Hlua pawn ati ve thuai a, " Tlawh te chu ka duh ve alawm, I nau nupui hian min millo viau lo sela chuan kal pawh ka kal zing ve deuh bawk ang. Rozuali sualthiam zia hrelo hian kapa te chungah thil thleng eng emaw hlek awmse min thiamlo nghal ringawt zel a " Kanu chuan a chaw ei lai ṭhulh meuhin ati hlawih hlawih a, " Zuali zia chu i hrechianga, chutin alo hmumawh ngawt ngai lovang che, awm chilh tur pawh i nilo a, reilote hreawm tuar chu thil har anilo, kapa te tlawh hi i hreh ve deuh hrim hrim " Kapa pawh chu a lungawi tawh vaklo tih ahriata kanu chuan hnial tawhlo se kati takzet.

" In fate hma ah inhau reng zel suh u, in buaina chu in nupa room ah chingfel ula, in fate hmaah chuan zahawm takin awm ṭhin rawh u " Mampuia'n thawh pahin ati hmaka, tumah kan ṭawng tawhlo; Mampuia thusawi kha ka ngaihdan ani a, huaisen deuh ila chuan keipawn ka sawichhuak ve ang. hetia an fate leh an fa mo hmaa thamlo taka an inṭawng khum bawih bawih zelte hi amawilo tih leh an fate lakah an inti zahawmlo tih te hi an hrelo phalo ani.

Kapa leh U Hlua kham hnuah kanu chu aphun hlak hlak a, " Ka fa hrin ngeite pawh hian min zah tawhlo, min vin khur khur a, min ṭawngkhum fek fek a, eng atan mah min ngai tawhlo chu anih ber hi, i pa nise athil tih tawh ngaihtuah lek lovin engkimah min mawhpuh a, athiltih avanga a farnu leh Rozuali'n min mil lohzia te hi ahrelo der tlat zel a. min hmu peihlo em em tute hmaa in lan sek hi katan pawh anuamlo " ati hlak hlak a, chaw pawh a ei tak taklo; Kanu hi ademawm vek biklo a, kapa thil tihsual tihluih nimiah silo khan kan vai mai hian minla nghawng vek ani, Thil thleng kha apawi tih hian a apawizia asawifiah zolo a, Chhungkaw kual ro ro ah kan chhungkua hi kan hrang ta bik a, kapa pawh a unaute lakah inthlahrung rengrenga awmin, keini nise kapu te leh midang hrim hrim lakah kan ngampa sarh thei tawhlo a. Ahranpa in min hua pawh anilo, kapu te phei hi chuan min ngai ve ṭhin a, min lo call in 'Lo leng rawh' te pawh anlo tive ṭhin a. Mahse, leng ve bawk mahila anuam kati ngai tlat silo a, hreawm leh inthlahrung taka kani hmachhawn reng ai chuan len loh mai ṭha tiin Kapu te pawh ka tlawh ngai talo ani.


Chaw kan eikham a, U Nguri anawm loh deuh avangin U Faki'n thleng min sil chhawk ve mial a, chhungkaw boruak nuamlo karah ahlimawm angreng. Mampuia pawh a chaw eikham kha room ah atawm ngar ngara, alo chhuah leh chuan school kal turin alo inpeih fel thlap tawh, " U ka kal ania ' tiin a chhuak nulh a " Pawisa i nei ami? tiffin i pai duh em" Ti a ka um chhuah chuan " Angailo, Tiffin kapai apiangin ka ṭhiante'n min chhaih ziah a " ati nui nuia. "Apawi ami, i puar tho te chuan " Nui vur vur paha ka tih let chuan min ner khum nang a " Ka ṭhiante'n 'U Kimi nautelian chi ' minti vek tawh alawm, tiffin chu ka pai duh tawhlo, pawisa pawh kala nei nimina min pek kha ka hmanglo a" Ati zung zung a, aṭhianpa Hluzuala'n alo koh tak avangin min bye leh zeuhin akal a.

' Au, tiffin ka pai duh, min siamsak rawh ' ti a min ngen laite kha ala rei loh nen, ka buai chung chung khan tiffin ka siamsak hun nghakin min zui kual ve det det a, chaw hmeh pai tur pawh anei mumallo ngailo a, mahse chaw leh alu fry nen chauh pawn lawm takin tiffin nen school akal ṭhin kha ania, hun hi alo kal chak khawp mai. Tunah te chuan 'Tiffin ka pai duh tawhlo ka zak' ati mauh tawh a, a inti tlangval tawh si, alian tawh si, apiantirh aṭangin kanu hriselloh zarah keiman ka buaipui veka, inti tlangval tawh viau mahse, keimah tak pawh hian kala naupangchhe cheibawl tlat zela, alo lian ta lutuk hi amak kala tireng.


" Pa vawiin chu hna i thawk dawnlo ami? " Sitting room ah hahdam zetin kapa chu alo ṭhu a, " Aw, Pi Pari te khan vawiin chu chawl ang u anti a " ati dam diai a, " Ava tihzia ve, tunlai chu i thawkrim lutuk a, i taksa a chhe lutuk alawm, vawiin chu mu hahdam mai mai rawh " Tiin ka nuih var vara kapa pawh nui ve hakin " Ka fanu in hahdam tura min duhte chuan kan hahdam mai aniang chu " ati sup a, ahlim ve hmel tak tak. Kapa nui hmel chu ka thlir a, Zu Ngawlvei mai mah nise kan tan chuan ahlu a katan hian a hlu zual bikin ka hre ṭhin; Zu a ruih loh chuan a zakzum em em a, rualpawl erawh nuam ati ve ṭhin mahse, pawi akhawih hnuah khan ahma a amah kha apha tawhlo a, a inthlahrung in aṭhiante pawh a kawm vak tawh ngailo. Zu in hi anuam ati pawh anilo a, a nghei theilo pawh ani chuanglo, harhfima awmreng hi angamlo zawk niin ka hria.

" Kan pahnih in kapu te in ah chuan kan kal dawn mi? " Ka tih chuan ka lam alo hawi tih ka hria a, ahmel landan tur ka hriatchian avangin ka en ve duhlo thung a, " Hahdam turin min duh emaw katia " Ati a, a aw chu a zuai deuh raih thei, " Duh e, lo hahdam rawh kapu pawh angaihtuahawm lovang, kum upa lam hi chuan neuh neuh hi an ngah tawh hrim hrim a" ti duahin kanuih sang a, kapu te in a kal hi ahreh tlata kapi te pawn an ngaih ve ṭhin nen akal duh ngailo.

Room ah lut in Kapu te in a kal tur chuan ka insiam a; insiam han tih ah kekawr pangngai deuh hlek ka ha a, tshirt chungah kawr chung bantluan ha lehin ka sam ka ṭawn a, ka hmaiah sun block ka hnawih mawlh mawlh laiin U Faki thlengsil zo pawh alo lut ve a. " Inpa alo leng " na zeta min melh pahin ati hmuk a, nichinah a mood a pangngai nen tunah erawh ṭap hrep tur hmel hi a pu leh tawh a. " Tumaw lokal" athilsawi hrethiam vaklo a ka tih chuan min melh kawk a, thinrim a chak hmel lutuk, a awmdan chu ka hrethiamlo a, ka zawhna lah chhan harsa aniin ka hre bawk silo.

" Chhuak la i hre maiang ninawm " Ti hlarin a khumah amu tau daih a, " Iva mak tak " Ti ve hlakin khuma ka phone chu ka ban a, room kawngka ka pawh hawn rualin mipa ṭawng thum bul bul ka hre nghala, ka ner nghal nak. "Ee..hei Matei pawh alo chhuak alawm, Ka fate hi chuan room hi an ngaina lutuk a, abuaithlak asin " Tiin anui huah huah a, U Mafela pawh inla pa zetin a nuih ve suk suk hi, keichuan melh pawh ka melh ṭha duhlo a, reng rengah damdawiin a awmtur anih laiin engvangin nge kan in ah alo ṭhut luau le.


" Eng nge ilo tih dawn " Kati a, ka sawi zawh rualin apawi kati nghal vawng vawng, " Mate" kapa pawn alo ti nghut a, ka biakdan kha amawilo ve em bawk ani, " A pawilo, ka hrethiam alawm kapu " Dam thlapa atih chuan lungawi lo deuhin ka melh vak a, Remruatfela chuan min nuih vel mai mai anihchu! Kan in aṭang hian ka hnawtchhuak law law dawn mawni; Kar liamta khan hna thilah azin a, in ngaihzawnna thu chu sawi chiah lo mahila kan inbe nasa ve tawh a, a chungchang engkim atihtur thlengin min hrilh ve ṭhin a, a zin hlan pawh chuan ka khuahar ve viau bawk. A zin chhung hian kan inbe char chara, kan inbiak apiang in 'Kalo hawn hunah chuan afal a inhmuh ka duh, thilsawi pui che katum reng laiin zin angai leh thut sia, hun ka khawhral rei tawh ' alo ti ngei ngei a, eng nge min sawipui atum fakau pawh ka hrelo e a.

Nizanah Angaihi nena Apuii te in kal kal chuan thilmak deuh kan hmu a, Nizanah chuan Apuii te sitting room ah Vawiin a lo hawng tur anga insawi Remruatfela hi alo ṭhu luau anih chu! Biak pawh ka be lo a, Apuii lahin a ṭhut hnaih ropui si, thinrim ṭun in ka hawng a, Angaihi lahin min hnem ahnek in 'Biak pawh be tawh suh, tun aṭangin dawt ahrilh che ania, mipa rinawmlo anihkha, eng atan mah angailo che anihkha' ati char chara, ka sawi bak pawh hi asawi nual mai. Ka ṭhiannu berin min relpui char char a, keilah lungawi loh sa nen ka lungawi lo zual a, a msg leh call pawh engmah ka chhang duhlo hrim hrim.


" Kapu te inah ka kal dawn " Zah pawh ka zah buai peihlo a, nizan thil thleng khan ka lung ala ti awi zanlo ani, a bialnu kani lo a, ka bialpa pawh ani chuanglo; Mahse, thik thu nei thei tur khawpin kan in be nasa a, tuna ka lungawi lo hi thil diklo leh awmlo lutuk aniin ka hrelo. " Ava mak ṭhin e aw, I Pu te chu tlaiah pawh i tlawh thei tho alawm, thingpui te va lum rawh " Kapa'n min melh khui chungin ati a, thawpui kala vak ringawt. " Thingpui chu ka in lovang, chhuahna tur i neih chuan kan chhuak rual dawn mi? " Tiin mitmeng dam leh ril zet hian min melh kalh a, rei ka melh let ve duhlo thung, hetianga amitmeng mawi zet ka melh reng chuan ka lungawi lohna te kha areh leh vek ang tih ka hlau ani, ka thinrim areh loh nan nizan thil thleng te chu ka ngaihtuah lui ngar ngara, ka awmdan chu anaupangchhia ti viau mahila in siamrem ka tum chuanglo.

Kapa a awm vereng si a, hnial reng chu nuamlo tiin " Aṭha alawm" kati sep a, alo din vut rual chuan kawngkapui lam ka pansan a, kapa a be thawm chu hre mahila pawnah ka chhuah nghal avangin eng nge asawi ka hrelo.

" I thinrimna chu ni in tlak pui suh se tih anihkha " Kalsan vawk vawk ka tum laia athu lo sawi avang chuan ding chawtin ka in her sawk a, ani lah chuan akut kuangkuah at chung hian hahdam zetin min lo en renga, chhut fawk ka van chak tak. " Vanduaithlak takin ni tlak hnuah ani tlat" Ram hmarha ka tih chuan anui chhuak hawka, "Nizan khan i nunrawn zia ka hre thar, dam reng chungin kathi ani hawt alawm, minti hreawm khawp mai " Uang zet in ati vela, min thamlo ni berin ka hria.


" Hmela " Ti chang fakin ka inher a, ka kalsawn hma chuan ka kutah alo chelh leh hman hram a, engtik laiin nge ka bul alo thlen hman ka hrelo a, a thawm pawh ka hre miahlo lehnghal. " Ka thlah ang che " Ka kuta a chelhna chu thlahin ka darah alo vuan a, hneh zetin alamah min hnuk hnai hret bawk. " Khawlai anih hi " Hawikual ruai paha ka tih chuan ka hmai zawnah alo kiai suk a, min awm hnaih lutuk chu ka thaw theilo lek lek ani. Tha khur der derin a awm ah ka nam a, nam na hramlo mahila a inla hrang ve tho a, min din hlat hret hnuah chuan am deuhin thawk kala a, hetiang em em a ka talbuai hi U Mafela vang ngawr ngawr ani pawn ka hrelo a, kan awmdan kha midangin min hmuh ka hlauh em vang ani pakhat.

" Kati hlauthawng che emni? Ka bula i awm hian ṭang ṭung ṭhinlo la, hahdam tum hram hram rawh " a tikual leh vela, hepa hi azak hlawl lo. " Minti buai rei lutuk a " ka tih chuan " Min hnial lovin minlo zui rawh, luhlul chhuah lo la, kan reilo animai" atih chuan inhnial reng ka peih tawh loh avangin ka bu ve nghat a, ka hniallo tih ahriat rual chuan a mitmeng ah phurna alang chawpchilh a, hmuh hreawm tak zawng anilo.

Kalsawn hlekin Theihai kung hnuai a Bullet dum tle hlarh in hunna lam chu apan a, ka awmna ngai ah chuan ding khawng lah in kalo thlir reng a, Bullet chu amah nen chuan a inrem kalo ti ngang mai; Hriatna a zau lemlo a, bike te hi hmu ve nual mahila ahming hi ka hre thei hlawl lo a, Bullet hi chu analh ka tih avangin ahming hi ka chhinchhiah ve a, adang ho hi chu ka en liam vel mai mai zel.

" Lo chuang rawh le, nizanah in kalo thlenpui ve chiah a, chuang hmasa ber turin ka duh che sia, tumah pawh kala chuantir phallo " Ti thum chhakin amit min siai zeuh a, lai zeta ka lei ka chhuah zeuh chuan " Lai hma sia'h " ati sup a, ka biang a sen tan tan mai. " Ka chuang zei lo ania aw " inthlahrung taka tiin ahnungah chuan ka chuang a, "Engtin pawn awm la ka khalh vek thei, min ring tawp rawh ka tlukpui dawnlo che a mahse, thil pakhat min tihsak turin ka duh che " atih chuan " Eng nge ni " rang deuh hian kalo ti vat a, "I tlak loh nan ka kawngah nghet deuhin kuah la, atheih phei chuan ka hnungah khan bei thlap mahla apawilo" ati a, a uang tih ka hrethiam ve vek, ngei zeta a darah hmersak vak pahin " Ṭawng duah suh " kati hlaka, anui mai mai lehnghal.

A tlan chhuah dawn chuan ' Min kuah la ' ati leh hrama, tlak ka hlau ve tho bawk nen tim daiin a kawngah chuan ka chelh veta a, ka chelh dan chu alawm leh ngang lo ani mahna " Ka dawlh dawn che pawh ni hleilo " Ti hlukin ka kut chu a pawt a, hmalam ah min suih beh tir hmiah a, ka kut a adul khauh ṭung mai ka tawh rual chuan ip chawih in " I Duhkhirh emai aw " Kati hlar tawha hetianga min tih sek chuan 'Ka peih leh lo' tiin ka chhuk leh daih duh ang.

Sawi nawi tawh lo in ṭha tete chuan atlanchhuak a, ka mawng a za nghal vekin kahria, Two wheeler ah hian ka chuang khat a, ka chuan zei loh bakah ka hlau tlat zel. Accident ta ila kan insawh na dawn bik lutuk hian ka hria a, atheih hram chuan chuan loh ka duh. Bike hi neilo pawh kan nilo a, U Hlua hian anei a ka dawih lutuk hi min phur ṭha peih meuhlo, kei lahin apawi ka ti der silo a, U Faki ve thung chuan akhalh thiam lek lek tawha kan in anglo ṭhin asin.


Mi Kawngkal kan tlanpel te chuan min en duh riau in ka hria a, ka hawichhuak ṭha ngamlo hrim hrim, hawichhuak ṭha ngamlo a ka awm vel chu U Mafela chuan side glass aṭangin minlo en reng tih ka hmu a, ka en ve tih ahriat rual chuan mawi zeta minlo nuih in hmui phun hian eng emaw hi asawi a eng nge asawi tih erawh ka hrelo.


" Anite " Ti a ring deuha min au tu an awm avang chuan ka hawi chhuak vat a, U Mafela pawh chuan alo hre ve nge atlan muang deuh a, Ka hawikual thuak hnuah kan tlanpelh tur chiah dawr aṭanga ka vahte lo chhuak chu ka hmu vata, Minlo au tu kha Mathewa niin ka hrereng ani, Nuih var varin ka ban ka vai zeuh a. tlan pah kan ni bawk nen thildang sawi chiamna hun ani silo a, Bawihtei te chu kan tlansan a, mak deuh ka awm anuamlo nghak vek thei mawle.

Kapu te in pawh kan thleng har lo a, aremlai a bike atih din chuan ka chhuk vat a, " Ilo kal ve dawn ami? " Let mai lo a alo chhuk ve chu bangbo deuhin ka zawt hu a, " Ka kal ve pawh chu iva hlauh hmel ve " Hmel dur khupa atih chuan kalu ka thing nawk nawk a " Hna ah kal i ngaih ka ringa chuvang zawk alawm, keimah vangin i buai lutuk ang tih ka hlau a " Ka tih sawk sawk chuan ahmel pawh hmuh anuam veleh ta deuh a, " Minti buailo aṭha em? " Mitmeng dam thlapa min melh kalh chungin ati fiah kak a, ṭawngka pawha chhang lovin kalu chu k bu nghat nghata, chu veleh min nuih vur vurin " Anih lut ang " ati zang vaha aphur hmel kher mai.


In chhunga U Mafela nen kan inzui lut chu minlo en ṭhap a, kapu damloh vang nimaw in chhungah chuan Papuia te nupa bakah inleng anlo awm nual bawka " Teh hlawl che u chuan " Kani chuan alo ti hluai a, chutia kan lut hlawl chu mak anti ve deuh aniang min enreng hlawma. keimah chiah chuan kal ila mak anti vaklo ang U Mafela atel ve khera mak pawh ti se a awm lutuk; Sawichhuah laiin kan peng leh lawk ang e, Kapa te unau hi pali annia, Kapa hi upa ber dawttu ani a, Kapa leh Papuia hian in hrang changin Patea'n in pui a luah thung a, Kani hian khaw ṭhenawmah pasal anei ve a, fa pali anneih hnuah a pasal chu boral a, apasal ber a awm tak loh ah chuan kani pawh alo let leh a, tihian inpui ah ka patea te chhungkua bakah kapi leh pu te nen an awm khawm ani.


" Mamte, inva reh thei ve, i pu pawh avui viau ania " Ti hluta Kapi in abula ṭhu tura min tih chuan ka pan hnai thuai a, Kapi bula ka ṭhut rual chuan ka bulah U Mafela pawh alo ṭhu ve nghal khup mai, "Mafel hna i kal nange " Papuia'n atih chuan "Nia, Vawiin chu ka chawl anih hi, kapu chu engtia damlo nge anih reng reng" Atih zawm ve duah a. Patea'n a chhanna chu ngaihven zawm lovin kapi lam chu ka hawi a " Kan buai ve lutuk a" Kati a, kapi chuan min ngai aniang ka kut chu chelhin a chul hliau hliau a.

" I pa adamṭha em? " Lawi lek lek hian ati a, " Umm Damṭha e, ngaihtuah suh, nangmah te i damṭha meuh maw" Kati daih a, kapa chungchang chu zawhna min zawt vaklo se ka duh ani, chhan dan tur ka thiam loh bakah boruak hi a rit ru riau zel a, " Keitak hi chu ka damṭha viau a mahse, tar lamah chuan damṭha inti mahila neuh neuh hi kan neilo theilo a " Ati niah niah a, kapi chu ka en ṭhin a, ka khawngaih tlat. Ka patea ten an duat tih chu hre tho mahila keimah ngeiin duat ve ka chak a, in awm chilha an titi ngaihthlak te pawh a chakawm kati.

" I pu chu room ah amu a, angaih ve ṭhin che u nen inlo lang khat sia, va hmu rawh " Ati sep a, ka kut chu ala thlah chuanglo, " A muhil lo ami? " ka tih chuan alu athing a, "Lo kalpui kha i neiin ka hre sia " atih chuan Ka bula ṭhu U Mafela chuan kapi thusawi chu alo hria aniang "Keimah hi kania, Kimi ṭhianpa Remruatfela " Alo ti zung zunga, sawi tur reng hre lovin ka ang pham ringawt. " Animaw iva fel em em ve" Tiin kapi chu anui var var a, uluk deuhin U Mafela chu athlek pah vang vang bawk.

" U Mafel, room ah kapu ka hmu lawk dawn asin lokal vela" Ka kalpui ani si a, engmah hrilh hrelo a luhsan chu anuam kati lo deuh ani. Ani pawn min hnial biklo a, ka din ruala lo ding ve in kapi ho chuan an room ah kan inzui lut hlawm a. Kapu chu an khumah alo ṭhu mu a, amit chu chhing vek mahse, akut atih chet zeuh zeuh avangin a muhillo tih ka hria, YT ah news alo ngaithla aniang hmeichhe aw nalh deuh alo ṭawng zaih zaih bawk a, " Ṭhiana, hei Mamtei te alo leng ania " Kapi'n atih chuan alo meng vat a, " Lokal ru, minlo tlawh khat hlemai a " Ati ban charh a, Kapu chu ahma zawng aiin ka hmu cher zawk, a landan chuan min ti na ru veng veng alawm le.

" Pu Na inei em? Kan buai ve sia duh ang in kanlo lang tam theilo a, azialo tak tak ani " Kati zung zunga, a sir ah chuan ṭhu in akut chu ka vawnsak pah a, Na aneih loh thu zawi tete a asawi lai chuan " Mafel, hetah hian lo ṭhu rawh" tiin Kapi pawn Khum bulah U Mafela ṭhutna tur Chair alo hung ve bawk a, " I ṭhianpa chu kava hmu ngailo ve " Thlek vung vung paha kapu'n atih chuan " Doctor thar kha anih hi, thar ti ila alo awmna arei leh tawh a, ke a lokal ngai lovin amah hian minlo hruai a afel lutuk" Nui sanga tiin U Mafela chu ka en pah zeuh a, uluk deuha minlo en kur avang chuan ka lei chhuah zeuhin kapu bawk chu ka melh leh nghal daih a.

" Sangkima fapa kha maw " Kapu in atih chuan ka lu kabu nghat a, " I va fel ve a, khawi lo in chibai teh ang " tiin akut chu a phar kang vat a, U Mafela pawn a ṭhutna aṭanga ding meuhin kapu kut chu a vuan let a. " Ka chak tawhlo lutuk a, Kawtlaia tei chhuah pawh ka tlin tawhlo anih hi, Kan hriatna te hi a zim sawt lutuk a, Inpa te kan hria a nangni phei chu kan mikhual en tawh mai che u alawm " Muang ban charh in ati leh a, kapu hi chu aṭawng muang chi ani ve hrim hrim a, hmanhmawh deuh chang phei chuan forward maite hi achakawm ṭhin. U Mafela pawn ṭha deuh in alo chhanglet ve zel a, Kum upa lam kawm pawh athiam phian anih hi, Kapu thusawi te chu belhchhah tur ahre phian a, Rambuai lai vel chanchin te an sawi kai hnuah erawh sawibelh tur hrelo in zawhna azawt mawlh mawlh thunga, azawhna te chu kapu lahin chhan nuam ati si keichu awm velo ka ang tawh.


An pahnih titi ka ngaihthlak lai chuan Ka phone alo ri a, Kapu te thusawi kalo ngaithla tui bawk nen ka phu zawk a, U Mafela alo la nui hawk zui, Rum deuha ka melh chuan amit ko alo ti che ralh a, ka ner khum vak ringawt. ka kekawr ip te aṭangin ka phone chu ka phawrh a, Call chu chhangin " Aw Umam" katih rual chuan Naupang ṭap ri ka hre nghala, Zawt kherlo mahila Mathewa ani tih pawh ka hria.

" Kapu te in ah ikal ami? " Thaw hawkin U Mama chuan alo ti a, " Aw kal e, tinge? Bawihtei te dawr kal pawh kan hmu alawm " Kati zung zung a, " Chu chu ania, Duata hi in a anlo haw hnuah ala ṭap char char " Alo tih chuan " Tinge" insum hman lovin kati hluai a, kapu te titi lai pawh an tawp nghal chawt. Ka kut vai zeuhin titi zawm tur chuan kati a, kapu chu aṭawng chhunzawm mai laiin U Mafela chuan min en kur thung a, an awm lohna lam ka hawi phah ringawt. " Alo ṭap hawnga, a chhan ka zawh in 'Ani in bike ah min chuansan, ati a aṭap bang duhlo a, i lo haw lamah lo peng la aṭha ang " Ka hlauhthawn hman nen achhan ka han hria chu ka nuih aza viau a, " Baby Mathewa hi chu aw, awle kalo haw lamah chuan kalo peng dawn nia, ka leng reilo ang " Ka ti thuai a, Uama'n ' I ni in kalo leng ang atih tawh chu, bang tawh rawh, i ṭap rei peih lutuk ' ati ri chu ka ngaithla a, thildang sawi ka tum leh lai chuan call chu a off a, Mathewa ṭap rei lutuk chuan ka nuih atih zat rualin ka khwngaih reuh lutuk.

" Tunge lo bia che " An lama ka inher leh rualin U Mafela'n minlo zawt nghal vat a, " U Mama ania, Kan tlansan kha Mathewa alungawi lo aniang, ala ṭap char char alo ti a, kan inbiak lai pawh khan ala ṭap a, bike a ka chuansan kha arilru ana aniang " tiin kanui hak hak a, " Ava zialo ve, kava hruai dawn mi? " Atih chuan " Aaa..angailo ang kan let lamah ka peng kawi zawk maiang " Ka tih chuan a chek hluk a, " Awm anglo lutuk, tunah aṭap a nakinah tihsan te chu " Ati hmuk a, ka rin aiin angai serious daih mai. Hruai mai chu apawi ka tih loh avangin ka hnial ṭang ṭang duhlo a, inthlahrun erawh ana viau.

" An in awmna pawh i hria ami? " Ka tih chuan " Hre maiang, an in tak hrelo mahila an awmna lai vel ka hre tho a " Ati awlsam et a, aman apeih phawt chuan hruai mahse apawi ka tilo, Mathewa phei chu aluhlul sia, U Mama lah a zaidam vak silo a, aṭah reng chuan U Mama'n a hrem leh maiang tih ka hlau ani.

Mathewa hruai tura U Mafela akal hnuah Kapu chuan "Eng nge in sawi hlut a, ka beng hian a chhui fuh theilo, I ṭhianpa lah achhuak daih bawk si " ati a, U Mafela chhuah chhan te ka sawi hnuah abu ve nghat nghata, engmah min zawh zawm tawhlo. Sawi tur hria leh ṭawng hlut chi kani silo a, kapu pawh chu han biak vak dantur pawh ka hrelo, amah lahin ṭawng atum bik lo bawk nen, areh tlawk tlawk mai ani.

" Ipa adamṭha em?" A aw thian kharhin ati a, " Damṭha e, a taksa mamawh tawkin hna athawk vereng a, in sawiselna aneilo " katih chuan " Kan lak aṭang hian inla hrang tawh suh u, tumah hian kan engrang lo che u tih hi hria ula ka duh ani. Mitthi tawh chu kan ko let thei tawhlo a, chuvang chuan ala damte tal hi chu in rem takin awm ang u, I pa pawh kan ngai a, i ni pawn ahaw reng renglo ania " Ati dap dap a, a hrawk a za deuh nge a ṭawng zawh rual chuan akhuh nghal bawrh bawrh a.

" Pu, chutiangin kan inla hrang hleinem, kan khawsak aharsa ve a, Mampuia lah a zirna senso ahautak chho ṭan a, nitin hna kan thawk ve hlawma hunawl hi kan nei khat ve em ani " Kati a, " Ka rilru hi a kap reng a, hei hian minti chaklo zual anih hi, ka damlai hian ka fate leh tute hi inrem takin leh tumah inla hrang bik awmlo hian awmkhawm thei ila ka duh a, ka beisei tlat ṭhin " Rilru nat hmel zetin ati zuai raih a, a thusawi leh ahmel landan chuan ka mittui ati hnai kuar mai.


" Kapa pawh kalo sawipui dawn nia " Kati ta sep a, Tar lamah rilru nuamlo reng renga a awm hi ka khawngaih ani, tunang kum ah te chuan hahdam taka awm tur annih tawh laiin a hahdam hleitheilo chu ani si a, theih se hahdam taka awm tir ka chak.

Kapu thusawi uluk deuha ka ngaihthlak lai chuan Pawn lamah bike ri atawp duk a, U Mafela te annih ka ring tawh, ka rin ang ngeiin Mathewa ṭawng lang lang ri ka hre nghala, " Pu, Mathewa te anlo thleng tawh anih chu, ka va chhuak lawk ang e aw " A thusawi laklawh loh lai takin kati zung zunga, " Ka hmu ve duh alawm " lawmloh hmel deuha atih chuan " A awmhlei sia atihbuai che ka hlau alawm mawle, nang berin i hmuh duh te chuan kava ko ang e " Zang vaha ka tih mek laiin U Mafela chu Mathewa pawm chungin room ah alo pen lut mek a.

" Ani chu sual si, min kalsan daih a " Mathewa'n min hmuh chuan ati nui nui a, ahmui chu ati pawrh nasa bawksi aduhawm tih hian a sawifiah zo thlawtlo, U Mafela pawn Mathewa awmdan chu anuih pui hawka " Baby, i rit tawhsi lo chhuk la, Apu hi lo kawm rawh le " Tiin ka nuih var vara Mathewa erawh ahmui ala kawh ṭha vu vu khawp mai. "Apu ka lit(Rit) lo tilaw(tiraw) " U Mafela chu a melh kiau a, a hnarah a khawihsak neuh neuh lehnghal. " Rit teh nang aw, apu hi ka chak alawm " Ti hlut tu chu ka en a ka nuih tawp, Naupang chhawnchhaih pawh kei aiin athiam daih zawk.


Mathewa chu Kapu bulah kan awmpui a, Apu biak dantur te chu U Mafela'n ahrilh zela, Mathewa lah chuan thu awih deuhin ati vezel bawk nen kapu pawh atihlim viau a, akhat tawkin ati nui leh hak hak ṭhin. Mathewa'n awmna ngaia awm reng apeih loh avangin, Room ah chuan rei awm tawh lovin kan inzui chhuak thuai a, " Thingpui lo pek che u ka tum chiah a, hetah inmai rawh u " Kani in alo tih chuan "Aw apawi hleinem " Kati vat a, ṭhutna ruak ah chuan ṭhuthmun kan rem ve nghal bawk.


" I pa hna athawk ami? " Patea'n atih chuan " Aih, vawiin chu an chawl a, in ah a awm " Kati a, bu nghat nghatin U Mafela chu a be ta daih a, Thingpui kan in pah chuan Nutei chuan zawhna min zawt nuala, a zawhna ṭhenkhat chu ka chhan peih loh chi anni. " I nu lah hian thil thar anei thei sia, tunlai chu ipa hian inhlawhna anei ṭha emni? Faki lah mipa nen zan ah an chhuak lai an hmu zing lutuk, i u te emaw inu leh pa in ahrelo emni? " tih angreng te anni a, U Mafela a awm vereng bawksi a, azawhna min zawh dan aṭang chuan min tih zah atum ve hrim hrim anih ka ring; Nutei hi misual tak tih tur nilo mahse, arilru hi chu aṭhalo ve a, pawnlamah ṭha luam si hian belhchian adawl lo a, anun alem si ka ngaina theilo.

" Kimi, kar thar chu chaw eikhawm kanti ania aw, ipa te kha lo hrilh la, in chhungin lokal ang che u, Mafela nangpawh lo tel ve rawh aw " Kani in atih chuan ka bu nghata a " I phal te chuan " U Mafela pawn ati ve a, kani chu a rik zawm hlut mai. Papuia chuan Kapu awmdan vel chu sawiin 'Eng nge ei tir ila ṭha ang le, A khuh nasa si a, khuh damdawi eitir lahin amah ataksa achak silo a, a rui zel bawk si, eng nge ei se ṭha ang le " ati a, " Ruih theih loh chi a awm alawm, Damdawiin Canteen ah a awm ang " Ti sup in damdawi hmingte chu ahrilh a, ka chhungte pawh an lawm thiam khawl mai.

Mathewa chu naupang tih takah pawm beh reng theih ani silo a, thawm a dimlo ṭan khawp mai, Room a kapi lutin kapu amutthilh thu asawi bawk nen hawn ka rawt vat a, min ui der ve viau nain kan tilui a, " Mate, ipa chu zanah lo leng teh se aw, uanua thil sawi ho loh na pawh arei tawh " Patea'n atih chuan Papuia pawn ao belhchhah vata " Aw le, kalo hrilh ang " ti let in U Mafela leh Mathewa inoawm chhuak chu ka zui a.

" I ning em? " Ka tih chuan " Eng chu " Ti sup in min thlek vut a, " Kapu te in hi anuam iti lo em? aaa..ka sawithiamlo nuam i tih loh ka hlau a " kati nawi niai a, " I awmna chu katan ahreawm thei tak tak lovang" A mitko min kan khum leh zeuh pahin ati a, ka ner khum nang nang ringawt, a inla zei lutuk chuan nuih te pawh ati za lek lek zawk alawm.


Cont..

Zan khat danah zel kalo dah tawh dawn aw..zantin chu abuaithlak ve deuh tlat.. ni khata chapter1 ziak ṭhin khan ni2 ah chapter1 ka ziak zo ṭawka, chhunah ka type hman hlawl silo a, min hriatthiam angai ani.
Show post links
Top