CHHUNGKAW CHHEHCHHAWL NULA BY Engtea Fanai (Completed)

[ngaia]

Bung 8 Na

Hun a liam leh hret a, may thla tir lam a ni a, kar leh lawk chuan kan result a chhuak tawh dawn, ka huphurh tawh hle a, Anu leh Umami lah chuan an nghakhlel ve si, ka pass chu ka ring, mahse U hriata te college a lut tur chuan ka percentage a chhe dawn lutuk tih ka hria, kanu te ve thung chuan ka pass hrim hrim chuan lawm an tum ruh hle, ka sawi tawh kha, lehkha hi ka thiam thei lo ve a, ka chhungte pawh hi keimahah hian an beisei a sang teh chiam lo.


U hriata chuan a ho lutuk I pass hrim hrim chuan a lawmawm a ti mai a, college khata kal dun vel ai chuan thinlung hmun khat put dun a pawimawh zawk tiin min rawn fuih fiam \hin a, min hnem teh chiam lo, ka dream \hin chu U hriata bialnu nih a, U hriata nena class kal tura chhuah dun te, haw dun te, ahh khang vel zawng zawng ka mumang lam thleng a, ka hmuh \hin kha a takah thleng thei hram se ka ti a ni.


Ni a liam bek bek a, kar a liam dawn a, Pathianni zing a ni a, ruah thimpui a niang chu ka ti mai, khua chu a thim deuh khuih a, ruah a sur nasain inkhawm a theih loh mai ka ring a, kan chhung chu inkhawm tum pawh kan awm lo a niang, ruah lah chuinkhawm hun awm velah a sur nasa si a, kan Biak In awmna lah a sang si a, ruah sur hnuaia pheikhawk sang nena step thui tawk han kal kha kan peih lo tlang a ni. Pawn lam ka hawi chhuak a, a hmaa a hnah tla ka nin em em \hin, hmawng hnah te chu an lo chawrno leh vek tawh a, an mawi leh em em tawh a, tin, kan kawmthlang lamkhuang te pawhin hnah thar chhuahin an rawn chawrno leh hlep tawh a.


Nia, Hringnunah pawh hian buai lai harsatlai, miin engah mah min ngaih loh hun tawngin han awm hun lai, kan hun tawna chhiat ber lai tawng ve \hin mah ila, heng thing hnah te ang hian khang kan harsatna te khan min la \hilh san ve ang a, hnah thar duh awm zawk, nun duhawm zawk neiin kan hringnun hi ala chawr no ve leh ngei ang. Ka pa, boral hlim chhawn khan kan tan khawvel a tawp tawh ang maiin kan ngai a, engkim chu a ho vek ni mai hian ka hria, engkima min pui a, min fuihtu ka pa ka han sun kha chu ka tliak hnawp hi a ni mai a, sawifiah thiam rual lohin ka na a, ka hringnun kha a ro rep mai hian ka hria, Mahse hei tunah chuan nun pangngai tak kan nei leh tawh a, ka Pa hmun ruak chu la zau viau mahse, zawi zawiin hringnun kan chhiar thiam ve tawh a, ka U lah ka pa dam laia a ve buang kha a puitlingin engkimah min ngaihtuah a, kan chhungkaw tan a theih tawp a chhuah a, mi neih awt bik em em loin kan awm thei, a chang chuan hringnunah hian thihna te natna te, harsatna te hian min lo chher hriam \hin a nih dawn hi, tiin chu May ruah thimpui hnuaiah chuan ka ngaihtuah neuh neuh va.



Ka nu chuan Nui enge I ngaihtuah dauh dauh, lo lut teh kha ruah in a rawn theh kha I hmu reng lo emni a rawn ti a, kawngka chu ka khar a, u Mami chu chokaah chuan \huin phone a khawih melh melh a, ehe,, Nui, ka chaw \hing pho kha a rawn ti, Ninawmm e,,, awm lo ila engtin nge kan chhungkua hi kan awm ang ka tih chuan Anu leh U Mami chu an nui a, aw,, kan chhungkuaah chuan I pawimawh ber reng alawm, an rawn ti rual a, an inthurual a ni hial ang, pawna tlan chhuah pah chuan ka pawimawh bera ka thu lo ber ka ti hluk a.



U Mami chuan woofer ah chuan zai a play a, Sunday tuk hi chuan Pathian hla hi ka Nu hian a play ri riai riai \hin a, tukin chu ruah a tam bawk nen \ek a hlau a niang, a play lo ve tehh mial a, U mami chuan a play ve thung a, U mami chaw \hing pho seng chuan ka tlan lut a, U mami chuan a zai play chu a lo sak pui riai riai a, nin hmel deuh chuan chhuatah chuan ka dah a, U mami chuan ning reng reng suh, I chhun thil ei man tur a nih kha a rawn ti leh mai a, ka ning pawh ka ti bawk lo tiin chhuar lam chu ka pan leh, U mami chuan kalo sil ang, lo dah rawh a rawn ti a.


A ngai lo, thil leina min pek loh phah ang tiin ka sil a, ka tih zawh chuan room ah lutin phone ka khawi mai mai a, ka bookself a kan album ka dah chu la chhuakin u hriata chu ka naupanlai thlalak te chu ka thawn a, kan hlim pui hle a, u hriata pawhin a naupanlai te min rawn thawnin kan infiamin kan inhnial reng bawk a, U hriata chuan I naupanlaiin ka awm \hin che min ti tlat a, Mahni bialpa te awm \hin nih chu ka duh bik bawk si lo, ka \ang tlat a.


Kan inhnial fe hnu chuan min pawmna thlalak chu alo nei tak tak, ka zak lutuk, mahse a ni pawh mipa naupang ve tho a la nia, in awm ang chiah pawh kan ni lo ang, min rawn pawm a, thla lakpui ve ang mai mai kha a nih ka ring, Mahse ani chuan ka awm len inih kha min ti tlat a, kan inhnial nasa hle. Evidence a rawn neih thlap avangin ka hnial zui vak duh ta lem lo a.
Inkhawm theih loh chuan ruah chu a sur tlang ta tak tak a, ka \hiannu ramrami’n min rawn call a, enteh, Nui I rilru a hah ve em a rawn ti hlawl, keichuan engvangin maw ka lo ti nghal vat, aw karleh nilaiah kan result a chhuah dawn kha a rawn ti, a ninawm lo sawi lo tehh hriat loh duh nak laia, ka rilru hah I rawn ti zual tiin kalo chhang a, Ramrami chuan , result chhuah ni chuan kalo leng teh ang, ka \hian dang te hi chu an pass dawn chiang sa a ti kher, a thiam loh puiah min rawn ngai chu ka ngei rilru hle a, mahse a sawi dik ve bawk si, ah,, kan mil pui, kan nihna ang nihna nei ve, kan thiam ang thiam, kan thiam loh ang thiam lo ve bawk te bula awm hian kan thla alo muang ber a nih hi. Nia rawn kal rawh, mahse fail chuan fail ve ve, I rawn leng ang a, I pass bik vaih kalo ti ve bawk a.



Kan fail emaw kan Pass emaw bazarah kal ang aw, result chhuah ve leh chhungte biak theih lohin kan leng nghal daih dawn nia tiin ruahmanna kan siam a, christy pawh kalo sawm ang, Mahse christy chu a pass ang, ani chu a thiam theih em kha, chuloah an school luhna a \ha a, a rawn ti leh nghal, keichuan Mahse a awm khan a tinuam ve alawm, kalo ti ve bawk a, Bena chanchin kha I hria em a rawn ti a, enge ka hre miah lo tiin ka chhang vat a.


Aw,, Bialpa I neih hi a hria a, hmanni zanah min rawn call a, ka beidawng ka hmangaih ber ka chang lova, a rwn tia, zu a in nasa a ni awm e, An hausa reuh sia, a chhungte hian an duat bawk sia maw, pawisa a nei thei sia, zu a in nasa a ni awm e a rawn ti siam siam a, ka hmangaih ber a tih chu keimah maw ka lo ti vat, Ramrami chuan niang chu tiin a nui a.
Va biak tur a nih chu,hepa hi chu avan mawl tak, chuan a chhungte pawh chuan engtin mah an ti lo emni ka ti leh nghal a, aw,, a luhlul ve reuh em kha, an fa neih chhun a nia, an hau vak ngam teuh lo , ni dawn tak, school a kal \hat peih loh pawhin a Nu te khan attendence ah te khan an in lei tling leh mai \hin kha a nia, school kal tura a chhuak a tlanbo pawhin engtin mah an hau ngam lo a, chhuan lam a siam a piang kha an pawm sak zel, an duat sual a, an ti zuau vek a nih hi tiin ka ngaihtuah melh melh a.


Ramrami chuan hello enge I ngawih reng a rawn ti, e,, thil kalo ngaihtuah a, bena chuan min rawn call ngai lo ka ti reng a, avan mawl tak em.. mahse ka biak angai, keimah vanga chutianga mi an sual ka duh lo reng reng, ka tan a hreawm dawn lutuk, hmuh hrim hrim pawh ka duh, ka thu chu a awih theih em kha ka tih chuan Rami chuan Ni e, kalo sawi dawn nia, a block che a ni awm e a la rawn ti zui, awii,, kalo hre lo reng reng a ninawm e,, ka be duh zanah min lo call rawh se,, lo sawi rawh aw ka ti a, result chhuah ni a awm dan tur chu sawiin phone chu kan dah ta rih a.



Tlai lam chuan khua rawn eng deuhin kan in ruahin a theh nasa bawk nen, Anu chuan Nu te. A rawn ti dek dek a, ka nawt dawn ka lo ti nghal, U mami chu room a\anga rawn nuiin, I ninawm lutuk, Lal Nu, I hriat reng chuan sawi kher ngai loin ti ve mai ta che, han sawi ila, vin tawk hian ilo sawi ve a, tiin a rawn nui kur kur, ka hne ve tho alawm ka ti deuh hluk a.
Chhuat ka nawh mek lai chuan U Mami chu chokaah a rawn chhuak a, ka hua tih hi a hria a, chhuat ka nawh ve leh hian a rawn vei ngei ngei, chhuat nawhna chuan hawlh tumin ka um a, aw,, tui ka in dawn, tiin filter lam pan chuan a tlan phei, Nu Umami hi hau ve tehh ka tih chuan Anu chuan enge ni leh ta, bathroom a\ang chuan a rawn ti lar lar a, ka chhuat nawh laiin a rawn vei sek alawm ka tih chuan, Ka Nu chuan Lalrami hi amak khawp a ni, va tibuai reng suh I nawh peih miah loh kha a rawn ti a, Tui ka in dawn a, chhuat nawhnaa min hawlh a tum a nih kha tiin ka nu hnenah chuan a insawi thiam zaih, Nikhat ah vawikhat tal min tihbuai loh chuan a chaw ei a tui lo a niang.


Chhuat chu ka nawt zui mawlh mawlh a, kan kohhran \halai hruaitute an rawn lut,, awi, an pheikhawk chu a berh bawk si, leader chuan ehhe,, Dinkimi chu chhuat I nawt elo, kan rawn kal laklawh sia a rawn ti lut a, U mami chuan ah,, lolut rawh u, chhuat nawh hi chu a nuam tih zawng tak a nia, a lo ti leh hman, hawlh sawk ka chak lutuk, mak deuh chu chhuat nawh hmaa tumah rawn kal mang si lo hi, chhuat nawh ve leh hian an rawn vei sek a, ka ning \hin, mood hi an ti off vek zel.



An rawn kal chhan lah chu a ho em em leh nghal, Tunlai mami I rawn inkhawm khat em a, kan rawn tlawh che an la rawn ti zui, a ho e, chung mai mai, an hna an bang tlai a, a inkhawm hman lo a ni mai a, Kohhran group te pawh a awm a, an inbe reng awm tho sia. U Mami chuan , Nia, kan hna kan buai bakah Ruati pasal neih velah khan ka buai ve deuh alawm mawle, karleh lam a\ang chuan ka rawn active leh thei tawh ang chu a ti a, an ti ti mawlh mawlh a.



U mami chuan min rawn melh a, zawi te hian a sawi tur ka lo sawi khalh thingpui ka lo ti vat a, Nui sukin va lum rawh a rawn ti, Ka nu chu Bathroom a\ang chuan rawn chhuakin Ehe,, in va zahawm khep khup ve Nui thingpui I siam tawh em a rawn ti nghal, In ninawm ve e,, aw,, ka Nu siam mek e, ka ti chu U mami chu lehlam hawiin a nui suk a. |halai hruaitute nen chuan an titi a, an awm rei phian leh nghal a.



Zanah chuan Bena nen chuan kan inbia a, a la ruih hmel phian leh nghal, Bena enge tunlai zu i in ṭhin ani maw, a ngawi vang vang a, in lo tunge a in ṭhin lo ti a, bah deuh nuai chuan a rawn ti a, Ah.. an sawi vek, ila naupang si, tun aṭanga zu i in te chuan i future a chhe vek dawn asin ka ti leh chiah chu, future pawh ka nei tawh lo, a \awng dan a\ang chuan a rui a ni tih ka hria, enge zu I in chhan, ka tih chuan nangmah vang a rawn ti hmuk a, enge keimah vang a nih na, Zu in rawh ka ti che mi ka ti let ve hmak, ka duh che a, min duh ve lo a, ka rilru a na lawm, aw,, a ho, chutianga I duhin an duh loh che avanga zu I in zel dawn te chuan I dam chhuak zo lo ang, kan duh zawng zawng hi a neih theih loh, tin, khawvel a tawp pawh ala ni lova, Pasal ka la nei pawh a ni lova, lo la chhiat pui na tur a awm lo, ninawm \awngkam ka thiam lo si.
Bena chuan mahse tawp lo mahse ka khawvel a tawp, nang ka neih theih loh che chuan dam chhan tur ka nei tawh lo, a la rawn ti zui, aw,, nakinah e,, kei aia duh I ngah dawn lutuk, I la zak zawk ang chuvang chuan I rilru siam la, \ha takin lehkha zir la, hun \ha dang nghak rawh ka ti a, nia, ka nghak ang, nangpawh ka nghak ang che engtikah emaw kan la ni ve ngei ngei ang, a tih chuan ni rawh se, mahse zu in tawh suh, I in leh anih pawn I in chhanah min puh tawh suh,, a nuam lo, inthiam lo deuh tak chuan ka ti a,


Aw le, Mahse I nuthlawi hun thleng pawn ka nghak ang che min ti ve tlat a, ka lawm ru hle, chuti taka min duhtu an awm ve te chu a nawm chu a nuam ve reng, mahse mihring hian duh zawng te kan nei ve vek si a, tih luihna hmangain tumah hi a induh chawp ngawt theih si lo a ni, rei tak kan inbia a. ani pawh zu in tawh lo turin a intiam a, keipawhin tuna ka bialpa nen kan in \hen chuan amah chu ka ngaihzawn tur thu ka tiam ve bawk, mahse keichuan thinlung tak takin ka tiam ve lem lo. hun a rei anga. Min duh huam huam ang hian a awm reng dawn lo tih ka chiang, Naupan at induhna hi chu a mi tur a na an tih hi a dik a nih ka ring.


Ni a her leh hret a, result chhuah ni kan thleng ta, Ramrami chu rawn lengin Christy paw’n kan In ah result a nghak ve bawk, kan huphurh tlang hle a, pass ta ila kan college kalna tur te kan sawiho, mahse kan beidawng chu kan thaw leh halh \hin, kan pass loh chuan singapore ah awm daih ang u te kan tia, dar 12 ah result chu a chhuak dawn a, a hnai tulh tulh a, thin a phu dup dup tawh. Sana ban te chu a vei rang tulh tulh mai hian ka hria, ka Nu lah chuan bazar a\angin min lo call, result kha min lo hrilh vat ang che a rawn ti, U Mami’n eng sa nge I ei chak, I pass lawmna tur, hei sa dawrah ka awm a, a rawn ti, in ninawm, ka fail chuan ka tlan bo daih ang tiin ka chhang, U mami chuan kan Ui lutuk ang che, I fail chuan arsa ka rawn lei anga, I pass chuan vawksa rep ka lo hawn dawn nia tiin phone chu a dah a.



U hriata pawh chuan alo ngaichang ve reng a, mahse ani chuan I fail pawn ka hmangaih tho che a rawn ti, hepa hi chu a zei loh hmel nen hian \awngkamd dawn sawn nuam deuh hi a rawn hmang ve leh nawlh zel. Dar 12 chu a ri ta tak tak e. Thin a phu deuh dap dap tawh, ka thaw seng lo a ni ber mai, kan kawm thlang aṭang chuan ka pass ti thawm a rawn chhuak a, Ramrami nen chuan kut kan in chelh ringawt, Nu Siamtei chuan christy a rawn call, first ah i pass a nih chu a rawn ti zui, christy chu a au vak a, chhuatah a zuang tawr tawr, mahse, Ramrami nena kan awm dan a rawn hmuh chuan a inthunun leh vat a, zawi sup hian first ah ka pass ve hlauh a nih chu, inthlahrun hmel takin a rawn ti, kan lo melh rum dun bawk em a ni. enge first a pass si, fail hlau awm tak khan a awm ve vel.. ka ṭhian ṭha ber mah nise ka ngei ṭep, ka pass pawh ka inring lo asin a rawn tih chuan i lemchan kha duh tawk rawh kalo ti hmak, a inthlahrun hmel lutuk, en ve ula, in pass em em ang a tih te chuan kan huatna a ti zual hlei hlei.



Ramrami nen chuan tirawh leng daih ang, kan ti, christy chuan ka pass ka ring bik lo tak tak a lawm a la rawn ti zui, Ramrami chuan i daw ve a nih chu, kan ngawih ṭhap lai chuan ramrami'n call a dawng, A ṭhianpa hnen aṭangin a ni, i pass ve hlauh a nih chu, 2nd ah i pass a, mizo ah letter i hmu an rawn ti ve leh, yess a han ti vak a, mahse keichuan ka lo melh dur khui a, inthlahrun hmel tawkin min rawn melh, Nu,, ka pass a rawn ti zawi sup, a nih chu ka lo ti hmak.. ka ṭhiante chu tunah chuan an pass thu an hriat hma ai khan hreawm an tih hmel tawh zawk, induh leh haw tawh mai rawh u ka ti deuh hmak.



Ngawi rengin ka bulah chuan an awm reng a, minute 20 hnu velah pawh call ka dawn ve tak loah chuan ka fail a nih chu ka ring fel tawh a, ka tawt up upin ka hria, U Mami chuan min rawn call vein, engmah min rawn hrilh si lova, i fail emni a rawn ti, ka hre lo, ka lo ti bak deuh hlur a, amak en ve ta che, khawimaw i rollno lo sawi teh a tih pawh chuan ka sawi duh lo, in zirtirtute kan zawt ange i a leh lutuk a tiin phone chu a off, room a ka lut a, ka mu a, ka inlukhup daih, ka awm dan chu ka inthiam lo ru hle a, mahse, fail hlau ve awm tawk khan an awm a, an pass leh ve ve sia, ka ngei em a ni. ka khum bulah chuan ngawi rengin an rawn ṭhu a,



Minute 10 vel a liam leh hnu chuan U Hriata chuan min rawn hnem a tum a niang,min rawn call ve leh a, ka chhang mai duh lo, Christy chuan a lo chhang a, loud ah a dah a, christy aw a hre chiah chu a pass zo lo a ni maw, a rawn ti sup a, a niang tiin a lo chhang mai a, a ho lutuk, amah chu kalo bia a tih chuan a peih lo tirawh kalo ti hmak. A beng bulah khan phone dah teh a ti hram a, christy chuan ka thinrim hlau chung chungin ka beng bulah chuan phone a rawn dah, U hriata chuan i result chu eng pawh nise ka thinlungah chuan i pass, subj tinah letter i hmu, a rawn ti sur sur a, keichuan ninawm ka uang peih lo, kalo la ti hram, U Hriata chuan aw záng khai vah hian, pass lawm dan tur kan ngaihtuah a ngai a ni, a rawn ti leh, i over kalo ti hluk a, result i en ngam loh ka ring rengah.. in school ka phone a, i pass, 2nd ah i pass alawm, first i pha teuh lutuk a rawn ti, ka awih chiah bawk si lo, ka hlim bawk si, midang pawh chu an lo hawi phawk hra a, tak tak ami ka ti nghal,

en rawh.. A lutuk suh a rawn ti vin deuh hlar a, U Mami phone call a rawn kal a, U hriat kan dah lawk tiin Ka chhang nghal, Zir ṭha rawh ka tih ka tih che kha, mizo ah emaw english ah emaw hian letter han hmu la chu first i phak dawn reng hi, mark 7 vel lekin a nih hi first i phak loh a rawn ti.. ka rizai chu ka tlawh tla tawp, ka au chhuak chiam a, yesss ka ti vak.
Christy leh Ramrami chuan rum tawkin min lo melh, ka va en a, kan ngawi vek, kan kun deuh vek a, inthurual ni awm takin kan pass kan tirual a, kan in vuan a, kan ṭe teng tung a ni mai, Nu Rini a rawn chhuk nghal.


Enge enge, a rawn ti, a rawn mangan hmel lutuk, Nu Rin, kan pass kan ti chiah chu, a ni maw,, 12 chu a va awl tawh awm ve a rawn ti kher, kan ngei lek lek a ni, mahse tunah tak chuan kan thinlungah huatna ten hmun an chang tawh rih lo. Nu Rini chuan phone a hmang a, ka Nu a lo han phone, Nutei a pass a nih chu, a fail a nih ring khan i rawn zawt ngam si lova, hei an ṭe teng tung mai tiin , Ka Nu a han hrilh, Nu Rini chuan kha, lalNu i nu'n a be duh che tih pah chuan phone chu min rawn pe a, phur tawkin phone chu ka chhang, I U Mami i hrilh tawh em, i pass chuan ka rawn haw hma ang, a tih kha, i mawl thei lutuk a, en ve vat tur che alawm, hei an fate pass an lawm a, rilru mangang deuhin min awm tir rei lutuk a ti, ka Nu awm dan tur chu ka hriatthiam pui tawp,



Fanu higher pass pahnih neinu ka tih chuan, za leh chung bawk si, dawih bawk si, umm,, ṭha deuh khan lo awm la, i pass lawm nan chhuatnawhna thar ka rawn hawn ang che ala ti zui. ka va ngei tak.. phone chu a dah a. kan ṭhianho chuan kan han inkuah ṭha leh a, Nu Rini chuan phone chu hmang lehin, Pizza dawr kha a ni em, engzah man nge,, awi avan to em em, ah.. aw.. rawn dah rawh u, Zoliana Colony kha tah khan aw.. hei ka fate clss 12 an pass ve a, kan lawm sak ve ange.. Nu Rini chu kan kuah chung chung, ni dang chu nise a sahdah rim chu kan tuar thei lo ang. mahse vawiin chuan a rimtui vek tawh.


pizza man tur baka, cocola leina tur pawisa min pe a, in pass loh ka hlau lutuk a, rilru ṭawngṭaina kalo nei char char alawm.. ka han chho ange, tuideuh khan lo ei rawh u, a ti a, i ei ve dawn lo emni kan tih pawn, in pass a ka puar vek tawh a ti a, a kal nul nul, christy chuan Lal Nurin, mifelnu a va ti, Nu rini pawh a nui suk a. an in ah chuan a chho a.




Rei vak loah pizza chu an rawn deliver a, drinks chu kan han lei a, thla kan la a, kan status nasa, Kan section ah chuan pakhat chiah a fail a, chu chu Ben-a a ni, mahse ka pass avangin lawmpuina min rawn hlan a, I U ac ah pawisa kalo thun ang ala rawn ti zui, a rilru a hah ve miah lo a niang, Ramrami chuan Ben, zir zawm zel ila tum em a ti a, tum lo, ka inkhel daih dawn, ka peih tawh lo, nangni khawiah nge in kal zawm ang a rawn ti a, Ramrami chuan kan la hre bik lo, a ngaihawm dawn e, kal ho zel thei ila mawle, chutia an inbiak lai chuan naupan tet aṭanga kan sikul kal chhohna kan han chhuah san tawh tur chu ka lung a leng a, ka ṭhiante, tin, ṭhian em em lo, ka hmelhriat ṭha tak tak te ka han hmu tawh lo vang vang tur te chuan ka lung a ti leng a, class room khata kan beng chhen ho dial dial lai te, a, kan sulhnu leh hunin a la liampui tur tam tak thlir kir chuan kalo ngawi vung vung a,



christy chuan amak vung vung, ei ang u a rawn ti,phur tak chuan kan ei a, chumi ni kher kher chu boruak a inthlak thawk thawk hi a ni mai. ka hlim tak zet a ni. Bazar chhuah pawh chu kan ṭhulh a, in ah chuan rei fe kan awm ho a, Ramrami chu a chhungten haw tura an tih avangin a haw a ngai leh thut sia, christy lah a pass lawmpuitu an rawn kal ve zeuh zeuh avangin a haw a, an haw ve ve takah chuan keichu ka inngaihtuah lungpuam a, ka pa la dam ve se ka ti vawng vawng a, ka pass ni a a lawm ṭhin zia te kha ka mitthlaah a rawn thar uai uai a, college kal thei turin ka inziak pass ve tawh a ni tih te hi hria se, U Mami hi engtiang chiaha puitling nge a nih tawh tih te, kan ṭhan len chhoh dan te hi min hriat pui se, min rawn hmu ve se, tiin ka ngaihtuah a, banga kan tar ka pa thlalak chu ka be mawlh mawlh a, ka ngai tak zet a ni, lungngaih ni in awm se , min thlamuan se kan ti a, eng emaw hlawhtlinna kan chan ni ah lah la awm ve se, min lawmpui ve se kan ti leh vawng vawng ṭhin a nih hi. U Mami chu a hna a rawn bang hma a, a sawi lawk ang ngeiin Vawksa rep a rawn lei haw a, kan in a rawn lut chiah chu kalo kuah nghal a, ka mittui a parawl kiang a, U Mami lah chuan i va pass chhe tak, kei chu distinction ah ka pass asin a rawn ti kher, i over pass ringawt pawh a har nen, 2nd pawh hi a ṭhat zia i hre lo, lawm hle rawh u ka ti leh nghal.


U Mami hmelah chuan a hlim a ni tih ka hria, ka pass ring deuh ring chiah si lo khan ani pawh a awm ve char char a. U Mami chuan kan thil eina chu a rawn hmu, wow in va hausa ve pizza te in lo ei vel a ni maw a ti nghal vat, Nu rini'n min lei alawm, ka tih ve leh chuan fel in ti leh nasa awm, in han ngei vak a, eng emaw a han tihsak zeuh chu a, fel inti leh em em a, a tih chuan dik ka ti viau. ka nui ringawt.



U Mami chuan tak tak a, Nu Rini hian a hmangaih che u a nia, a fa ang tak takin a en che u, Fa an neih theih loh avang hian a fa ang mai hian angai tak tak che u a, in hlawhtlin ni te hian alo lawm ve em em a, hreawm in ti te hi hmuh hreawm a ti ve ṭhin teh a nia, a mizia hi chu kan hriat thiam ve a ngai a nia a ti siam siam a, khawinge vawiin chu Eirawng kan bawl ange tih pah chuan a inthlak a, kan hlim ve tak zet a ni.


Enge, pass lawm nan min rawn hawn ka ti leh nghal, aw.. vawksa kha kei chuan,, naa a dang hei chauh a ho e, ka tih chuan e...thleng silna kutkawr ka rawn hawn che alawm, i sawisel ngun sia tih leh a bag aṭanga rawn phawrh chu a rual, ka ning e.. hna tur a hriat ngawih ngawih ka ti nghal, u Mami chu a nui mai a.. a intifai a, a zai rat rat a, a che ve nghal sut sut, U Mami hi chuan eirawng bawl hi a peih lo ve a, mahse a tih ve chhunah chuan a uluk thei a, a tui thei, eirawng bawl chu thiam tak a ni, mahse a bawl khat ve em a, a thiam zia hi kan hre khat mai pawh a.


A Nu a rawn thleng phur tawkin ka tlan chhuak a, chhuat nawhna a rawn hawn tak tak,, hetiang chhuat nawhna hi Lei ve ang u ka tih ṭhin tho chu a nia, mahse pass lawm nana han in leisak chu a lawmawm loh ve e, Wotra spin mop an tih ang kha a nia, a hma chuan chhuatnawhna hi Pa Muanpuia min siam sak ka hmang mai ṭhin a, tunah chuan chhuat nawh chu a nuam sawt dawn, mahse pass lawm nan chuan tiang lo deuh hi ka beisei ve a ni, ka titau deuh bar bar a, Anu chuan nakinah i college kal nan kan la inseng dawn chauh tuna thil kan lei vak vak chuan college kalna tur i nei nang a la ti zui.
U Mami chuan i fel viau chuan scooty khalh i zir dawn nia a rawn ti ka lawm lutuk. class kal nan ka hmang ṭhin ang, ka ti nghal vat a, aw.. a tla chawpin kan ngaihtuah zel dawn nia a ti daih a


chutia pass lawma kan buai deuh nak nak lai chuan Apu a rawn chhuk ve hlawl a, ka pass thu a hria a, min lawmpui turin a rawn kal vang vang a, kan in luah hmasak ber neitu a ni a, A tunu ang tak takin min en a, ka pa boral hlim chhawn phei chuan min ngaihsak ṭhin hle, a chak vak tawh loh avang hian a rawn kal ngai ta lova, ka U hi chuan a la han tlawh fo ṭhin a, kei hi chuan biak dan vak ka thiam loh avang hian lo leng rawh a tih loh chuan ka leng ngai mang lo, U Hriata'n ka naupanlaia thla min lak pui, min pawm lai thla lo lak sak tu pawh kha a Pu hi an tia, U Hriata pa te nen hian khaw khat chhuak an nih avangin an inhre hle a, chuta ṭanga Nu Siamtei te leh Anu te pawh in nel chho an nia, kan in luah kan chep tak em avang khan in luah tur kan zawng a, tuna kan luah lai lo luah hmasatute kha an lo chhuak ve dawn chiah bawk nen, U Hriata te in luah he Zoliana colony hi kan zuk zawm ve ta kha a nia, a lo rei ve ta hle mai.


Kan luah luh ni aṭanga ka star em em kha tunah ka bialpa a han ni ta chu a nia, tin, Board ka huphurh em em pahnih 10 leh 12 ka pass na a ni bawk a, he in hi chu ka tan malsawmna tam tak a ni, chutih rual chuan ka pa min kalsanna in a ni thung erawh lawm a kim thei lo, mahse hringnun hi a tluang purh si lo a ni, thil ṭha a liam a, a ṭha dang a rawn thleng ve leh a, ṭhen khat chu kan tana hlu ngawih ngawih engtikah mah rawn let tawh lo turin hun hian a her liam pui ṭhin si a ni.


Ka Pu, chuan pawisa ₹500 lai mai min rawn pe a, ka lawm lutuk, Ṭawngṭaina a rawn hmang thlap bawk a, mahse a ṭhut rei peih vak loh avangin haw chhoh leh nghal mai a duh a, U Mami chuan Nui han hruai la tiin min melh zeuh a, phur tak chuan ka hruai a, an in thleng thlah ka tum erawh a ngai lo, in leng te an rawn kal ang, sawm pahnih passi te chu a hlu a nia, lawmpuitu an awm sap sap dawn a, lo zuk awm rawh a ti hlauh a, Pu ka lawm e aw, Nakinah, nidangah chaw ka la rawn ei ang ka tih chuan aw lee,, tiin an in lamah chuan min luh san a.



Ka haw lamah chuan u Hriata scooty dah lut tur nen kan inhmu zawk a, min theihnghilh der a ni maw, a ti zawi sap a, awih awm loh lutuk, ka buai nghal char char, enge min pek dawn ka tih chuan naktukah kan lei dawn nia, Bazarah kan chhuak anga, keipawh class ka chawl ang a, nangpawhin i tih tur te cancel vek la a tih chuan ka bu nghut a, ka chhuk dawn ti a, chhuk mai ka tum chu ka kutah a rawn vuan a, chocolate min rawn pek pah chuan ka lawmpui che tiin ka kut chu a vuan vang vang a, Nu Rini a rawn chhuak thut, rang lutukin kan inthlah mahse min hmu hman hrim hrim. Kan iN ah chuan ka lut thla vat vat a. Nu Rini chuan min hmu hman a niang, ring tawkin Nui a la rawn ti zui, a va chi loh tak, engtin nge ka insawi fiah ang.

Show post links
Top