CHAPTER 8
Kan nupa chuan lo lamah chuan kan inzui ve hnak hnaka, a kal muang em em mai lehnghâl. Khaw mipui min rawn lehpel ho chuan kan feh ve dâwn em ni tihchu min rawn zâwt deuh zêla, chûngte chu ningin a phun pui leh hluk ṭhin a, a peihlo chunga hruai ka ni bawk nên ka khap duh lêm lo.
Ka nu leh pa te erawh kan hmaah an kala, u Remruata hian an bula kal a duh vak lo tih ka hriat avânga a hnunga kalpui hi ka ni. Ngawi reng leh lungawi loh hmêl taka hma lama kal pa chu a phu zawka, a hmêl zawng zawng siam chhe chung chuan a rawn tlân lêt a, ka hnungah a rawn biru chu keiin a ngaihna hrelo zet chuan ka ena.
“Enge ni ta? Enga tinge?” ti a hmalam ka en chu Chawngkawr kawngsir ah chuan a lo in kual a, a lu a lo tun ar ar mai. A la lian lutuk loa, a awr a ti phêk bawk nên a leh nuihzatthlâk phian mai, “Tikhan lo awm rawh aw” tiin kawngsira thing chu thliakin rûl chu pan ka tuma.
“A chuk ang che i mâwl em ni? Rawn lêt teh, Vannunhlu khatiang infiamna chi a ni miahlo ania. A tlân hun nghâk ang” a rawn ti pawh chu ngai pawimawh lo in ka pan hmawk hmawka. Rûl hi chu ka hmuh apiang thah hi ka duh, a heti lai Mizoram a kâra lo humhalh tlat te hi a ṭangkai lêm lo, thah sên loh an awm ṭeuh.
Mihring a chuh chuan a pawi daih zâwk tih hi ka ngaihdan a ni a, bâkah Pathianin Eden huan aṭangin hmeichhia leh rul thlah te chu indo tura min tih vâng nge rul hi chu hlauh chu sawiloh ka hmuhna apianga thah mai zel ka duh ṭhin.
Min lo tin ar ar tu chu a lu ah chuan ka hlap ta pawpa, a invial nghal ngawl ngawl chu ka hlap nawn leha, a lu a pher vek tâkah chuan a mei lam aṭang chuan khaiin kawng thlang lamah chuan ka paih thla a. Chutiang ka tih lai pawh chuan u Remruata thung chuan ṭih hmêl tak hian min lo ena, mak a tih hmêl hle bawk.
“An man ang che aw, rûl thah hi an rem ti vak lo ania“ a rawn ti chu “A nihchuan a humhalh tute hian rûl chuk avânga damdawiina awm te, mitthi chhûngte hi ral in ṭanpui zel sela kan ziah dâwn ania. An pung chak lutuk, a dam pakhat hian no tam tak a nei thei, tui an ngah lutuk, hetiang avâng mai maia in man tih sek hi a, humhalh tur dang an hrelo em ni, rûl species danglam zawn reng leh humhalh reng ai chuan a rem teuh zâwk hi humhalh rawh se, mi ram chuan thil ropui leh ṭangkai hmuh chhuah an tuma, Mizoram chuan rûl chiah an buaipui an tih hi” ka ti duaha.
“A dang a awm tawh lo ang tiraw?” a rawn ti leh daih chu ka bu ta nghata “Awm tawh loh hi, kal ang. Mipa ve si khatiang te han hlauh” tiin ka nuih deuh hak chu a duh vak lo nge a rawn hnai ruaka “Min nuih hauh suh aw, hlauh zawng a inang hleinem. Bâkah ramhnuai hi ka ngaina lo, in khua phei chu sa hlauhawm deuh deuh te pawh an awm ang. Hetiang a feh reng te chu ka peih teuhlo“ a tihchuan ka nuih leh ta tawpa.
Ramhnuai a ngainat loh zia chu keipawh hian ka hmu chiang ta viau mai. Ruahsur dâwn anga a hriat avânga a nundan danglam erawh kha chu ka ngaihtuahna aṭang hian a bo leh thei tawhin ka ringlo, a chhan chu min ti danglam pha leh ta tlat si a.
Rei vak lo kan kal leh hnuah a rawn au leh tuar avâng chuan ka phu leh zawka, awiham! Lungphu ṭha lo min neih tir takngial dâwn, “Enge i au char chara?” ti a ka hnaih chu a kawr bânah pangang a lo awm leh chu niin hei zet erawh ka la ngam bik ṭhak lo. Pangang leh changpat hian ka ti an tiza tlat zela, ka hmuh thut phei chuan ka au ve lo thei ṭhin lo.
“La thla vat ta che nusalṭha i nih kha. La vat rawh, kha a rawn khâp sâng zêl ania, ka dâr a thleng dâwn Lalnunpui hmanhmawh rawh” a rawn ti leh vak chu hmawlh tê bawk chu la in ka pir thla a, huiham. A mipa zâwk chhan ngai reng mai.
“I thinchhe si, thildang i hmuh pawhin au tawh suh ang che. Mipa i nih kha, pa tak te in awm ve la, khatiang chuan a buaithlâk emai lungphu ṭha lo te min neih tir zo ang, mâwl lutuk mipa chuan hlauhawm te chu in tâwn hmasa tur ania” ka tih lai chuan a kut a rawn thing vuta.
“Khatiang kha sawi ve lo mai teh a, hmeichhia hi buaina hlir in nih hi. Hnam phatsan tu, hnamdang laka Mizo ti hmingchhe tu, kha hnamdang driver mai mai pawh mutpui duh an awm avângin tûnah pawh kan mualpho mêk chu a nih hi, incheina sâng in intih hmuha. In thawh chhuah nên in mil lo khawpa in lâk changkân in duh luatah in taksa ngei inzuara, tûnah chuan hnamdangin mi an nuih sawh mek a nih hi, hnamdang neih leh kawp te hi intih theih nân in la hmang zuia, hnam ralna tur hnar in nih hi, chuvang chuan hmeichhia hi chu awm ve lo mah ula a pawilo, buaina in nih hi buaina ral lian” min ti chu lâwm lo zet hian ka ena.
A bulah ka awm renga, khatianga min hmer tel ve kha ka duh miahlo. “Hmeichhe dang ang ka nilo, i hrechiang ber khatiangin min ti ve miah suh aw, i hmeichhe kawp ṭhin ang kha ka ni ve lo; ka thianghlim zia hi ka fiah ngam khawp mai. Hna thianghlim thawk peihlo, mahni taksa zawrh phêt tum ang kha chuan min ngai hauh suh, min hrechiang in inah ka awma min hrechiang ber lo em ni? Khatianga intih kha ka duh miahlo” ka ti ngheka.
Kan feh dûn chu kan inhnial kawngtluan hi a ni ringawt, lo thlen dâwnah chuan ka nu leh pa chuan min lo nghâka, keini erawh kan in be leh tawh rih lo. Kan inbiak apiang kan inhauh loh leh thinrim ṭeuhin kan awm ziaha. Heti em em a kan inngeih loh chhan hi in duhna leh hmangaihna awm miahloa kan inneih vâng kha a nimahna.
Kan lo tur a hlat lêm loh avângin kan thleng thuaia “Hei hi ania kumin kan thlawhhma tur, in duh leh helam a hnai zâwk hi innei dâwn ania. I pa in ri a lo kham anga, zau lutuk in duh bawk siloa saw lai kawr chin zâwk sawn kan ti dawn nge? In enkawl ṭhat chuan kumina in ei khawp chu in thlo chhuak thei mai ang” ka nu chuan a ti barh barha.
U Remruata ka en chu a peih loh hmêl ngawih ngawih mai, kangvar lam chu ner nawi hian a ena. A hmêl a pe kawi viau mai, hetiang em em a lo neih hlau hi ka la hmu lo, a lehlamah chuan Aizawlah khân a naupan têt aṭangin nun nuam takin a awm ṭhin bawk nên a tân chuan hetiang hnathawh chu a peih awm loh rêng ang chu.
“Kal ang le, thlai chi kan thlâk nghal chuan fanghma vêl pawh kan thar hma dâwna kan tân vek a nih hi” tiin hma chu ka hruaia, min rawn zui ve mai bawka. Ka nu leh pa erawh kan pên san ta thunga, ka thlai chi ken ve ho chu a ṭhat na tura ka rinna laiah chuan ka tuh pheuh pheuh a.
Ka hnunga tlu leh khut khut ṭhin chu a hmuh loh lamah ka nuih leh ṭhin. Chapal a bun bawk nên kangvar phei chu tawlh a awl si a, a lum lo chu a vânneihthlâk zâwk.
“Aiah ana lutuk” ti a a rawn au ṭhat avâng chuan alam chu ka hawia, a lo tlu leh tawh nge a kut chu a dawma a ner sawk sawk mai. Hnaih vatin a bulah chuan ka ṭhu thla a “Engtin nge i awm? I ṭha em? Khawi maw ka lo en” tiin a kut chu ka lâksak a, ka en chiah chu a kut phah chu a lo kaka, a thi nghâl ser ser mai.
A thûk lo hlauh chu a vânneihthlâk, ka rawmawl la tihbalh loh chu phawrhin ka tuamsak mawlh mawlha. “Fimkhur tawh rawh aw, i rahna tur en ngun la perhtê te i rap palh hlauh a nge. A hlauhawm ania, kangvarah feh chuan fimkhur tur, ana viau em? I duh leh vaua lung hnuai daihlim ah sâwn lo va châwl rawh. Kan chaw fun kha lo va keng phei la aw” ti a kal mai ka tum chu min chelh bet tlata.
“Ka lo pui zâwk ang che, hmeichhia i nih kha. A tihdan tur min hrilh la ka hre em em ang khawi tuthlawh kha min lo pe la” tiin a rawn ding chhuaka. A awmdan danglam leh thut avâng chuan ka en reng ringawt, ka hrethiam thei ngai dâwn lo a nih hi.
A mizia ṭha lam ka hmuh hi a ngainatawma, a mizia chhe lam erawh ka tân chuan a rapthlâk mah mah ṭhin. Englai pawha a mizia ṭha lam hi hmuh ka châk ṭhin, tuthlawh min lâk sak tâkah chuan nui ta sakin ka zuia, thlai chi thlâk na lai tur ka kawh chu lâi ve zêlin keiin a chi chu ka lo thlâk ve bawka.
Nuam a ti ta phian nge a hmêl pawh hmuh a nuam sâwt khawp mai, thlawh laia laiking lo tlân vêl te chu vawmin a nui ve ta hawk hawka.
Chhûn chaw fak a hun dâwn tâkah chuan vaua kham hnuai lam chu ka panpui ta vata. Ni a sa bawk nên a ni phei chu a hmai vel mipa e tilo in a sen deuh hlara, a hmuhnawm phian mai. A hmai lah chu kâng bâng thing vêl a khawihna ah a dum pheuh pheuh a, ka nuih leh ṭhin chu a nilahin ngaihṭhat loh hmêl takin min en bawka.
Vau kham pang pûk deuh reuh ah chuan kan châwl dûn a, “Tinge i nuih i nuiha? I â deuh em ni?” a rawn ti chu lu thin khumin “I hmai kha i hmuhnawm êm a, khatiang khân ka la hmu ngai miahlo che” ka ti chu a phone phawrhin a in en zuia.
“Nangpawh a balh ve tho kha, min nuih reng reng suh“ a tihchuan ka nui leh hak tho. Keichu a bal dâwn tih ka in hre sa a, a ni meuh englai pawha fresh var reng chutia hmai bâl em ema a awm hmuh chu a dangdai ve êm bawk a ni.
“Taka Tenu, i kum zât tak tak hi ka la hre miahlo.” a rawn ti hlawla, a la hrelo tak ang. Min zâwt in min ngaihsak ngai hek lo le “Kum 22, nang teh” ka tihchuan min en deuh vung vunga, “I puitling hle mai, i kum ngaihtuah chuan i rilru a puitling hle mai” a tihchuan ka bu ringawta.
“Kum 29 chu ka nih ve tawh hi, hetianga awm mai mai tur chu ka nilo nân“ a tihchuan a thusawi chu hriatzawm châk hmêl deuhin ka ena “I tihsual ni miahlo in eng emaw tâwk palhin mite thi ta sela, i chhungte'n nangmah dem si che sela engtin nge i tih ang? Nangmah inthiamloh sa nên i chhûngte dem hlawh kawp ta la” a tihchuan chhân mai ngaihna ka hrelo.
A thusawi chu ka rin loh lam daih a ni, chutiang thil chu a tâwk em ni ang tihchu ka ngaihtuah neuh neuha. “A châng chuan kan tihsual nimiahlohah kan tawrh a ngaih châng a awm alawm, mahsela hun a reia thudik chu a rawn lang chhuak mai zel a nia. Kan tihsual ni loah mahni indem duh miahloh tur, kan rilru kan ti hrehawm mai maia, tumahin min ti dam dâwn lo. Chuvang chuan keimahni hian a dam zâwng a kan in ngaihtuah ve te pawh a ṭul fo a nia” tiin chaw fun chu ka ṭhet pah mawlh mawlha.
Ka thusawi chu angaihtuah zui nge lo lam chu hawiin a ṭhu ngawi ta vang vanga.
“Ti rawh chaw hi ei phawt ang, kan thlâk zawh veleh kan haw nghal mai dawn ania, haw hma loh chuan in lamah rawngbâwltu tur an awm siloa. Ei vat ang” ka tih tâkah chuan a inngaihtuahna ata chu rawn harh chhuak ang mai hian a phu deuh zawka, min chhâng lêm lo chuan chaw chu a bar zawm ve mai bawka.
A nunah hian eng harsatna chiah nge a tawh tihchu ka hriatpui hauh lova, mahsela harsatna namai lo tak a nih ka ring thung. Mipa sual tak a nilo tih ka hria a, hetianga holam taka a awmna hian chhan eng emaw tu hriatpui loh, tumah hrilh na tur neiloa mahnia ngawih ral mai duh mi a ni in ka hre ber.
Ka hriatloh lamah hian eng harsatna nge a lo tawh anga, engtiang chiaha beidawnna leh lungngaihna lo tâwk tawh ang maw. Engtikah emaw chuan ala sawi chhuah ve ngei erawh ka beisei, tûnah chuan a tân engmah ka ni phaloa. A nunah hmun ka chang pha heklo, a nupui nimah ila kan inneih chhan kan hrechiang dûn a, atân pawh rilru pawh taka biak ka har tur zia ka hai hek lo.
“Chaw ei ava tui duh ve“ a rawn tih avâng chuan ka nui deuh haka “Ramhnuaiah chuan eng pawh hi a tui a lawm, ina kan eia tui vak lo pawh hi ramah hian hnathawh zawhah han ei chiah ila a tui bik ṭhin a nia, chawhnu chu nang thlai chi tlêm hi lo thlâk leh la, cha pahnih vêl kan siam loh chuan maian tuhna tur kan nei lo hlauh ange, keiin mang ka lo khawh dâwn ania” ka tihchuan a aw ve mai bawka.
Mangkhawh tur a tam lova, lo a kan ṭhat avângin a zawna zawn angai ang tih tur ang vêl in thing a kâng ral deuh veka. Cha pawh pahnih vêl bâk a siam theihin ka ring lo, ni ala sa bawk nên thawh pui leh nghal chu ka duh loh avângin ka phone ka en sana.
A ni erawh Chempui kan ken chuan thing suih zumin a uluk em em lehnghala. Eng atân tak ti ang maw ti chung chuan ka en ru zauh zauh a, “I kut te i sât” ka sawi zo hman lo, a thel tel leh ta tak taka. Pasal zeilo leh che chhe ve thei tak chu aniin ka hria, hnaih vatin ka en saka, a thel na lo hlauha.
Pan tê tak tak hian a thela, thi pawh a thi ṭha meuhlo “Nangmah vâng rawn sawi kher kha a ngai em ni?“ a rawn ti chu ka hmui ka ti kawi deuh nawka, sawilo pawh ni ila a ni engmah thiam neilo hian a thel tho tho ang.
“Ka sawi zawh hman loh kha a, ka sawi zawh hma in i thel tawh. Thil i tih apiangin i in ti na ve ziah, i hmai lah a bal bawk” tiin hnial dân tur ka hrelo chuam a hmai hmun hrang hranga dum pheuh pheuh chu ka sawi ta ringawta.
“I hmai kha a fai bikin i ngai em ni? A balha a balh zia kha in en teh” a rawn ti ve zata, mi hnial lêt dân tur lah hi a vân ngai lo rêng rêng. “I ninawm inhnial ka peihlo, fimkhur tawh ang che” tiin a chem hman lai chu ka lâk saka “Nang chuan i mamawh lo ang, thlai chi la awm chhun kha lei khuar deuh lai i hmuh chuan lo tuh tawp rawh, an ṭha duh bik ania, ka kal tawh ange” ti a thawh chhuah san ka tum lai chuan ka biangah rawn dawmin ka hmuiah chuan a rawn fâwp zauha.
Ka lungphu a ti rang leh vek tawh, tinge min duh chuang miah siloa hetianga ka laka a awm fo mai le? Kan infawh dân lah chu a rem teh ṭeuh lo, ka ṭhingṭhi bawk nên ka khup te hi ana tawh lutuk tlat, awmsawn vatin ka hmui chu ka tuai zauha.
“Ka....kal dawn..” ti bah deuh nakin rang zet chuan ka kalsan zuia, min en zui reng tih pawh ka hria. Khatianga a che leh thut ṭhin khân a laka rilru put dân tur thiam a har ka ti ṭhin, min hmangaih chu sawi loh duhna ang tak ngial pawh kha ka lakah a lantîr ngai lo ania.
Kan inneihna a la reilo bawk nên mahsela nupa kan nihna angah khatiang a ti erawh kha chu ka haw lêm lo. Mahsela ka rilru hi a tibuai ṭhin a, a laka rilru put dân tur ka hrethiam ṭhin lo, ṭha takin awm ila chu ka duh reng, mahsela ka sawi tawh angin amah hi a inthlâk kual reng bawk si a a laka beiseina lo neih san vak kha ka duh lo.
Thing kâng bâng awm ang ang chu khawh khâwmin ka dah khâwm zela, ka in hal meuh chuan ani pawh a tuh zo tawh a nimahna ka che vêl chu min lo en renga. A en uluk viau mai, kei erawhin a mi fawh lai ringawt kha ka ngaihtuah leh tawha, min duh a ang ka ti ṭhin a, mahsela chutiang chu a sawi ngai bawk siloa.
A hnuah min haw ber âwm angin a awm leh ṭhin bawk nên a ni hi chuan ka rilru a tibuai hneh ve ngawt mai, “Haw ang hmiang, ti hian amahin a lo thi mai ang ka nute kan au lawk ange kan haw tur kan hrilh loh chuan” tiin ka nute chu ka au zui lâng lâng a, an ni pawhin an rawn haw har loh tur thu sawiin kan hawsan zuia.
“Hetiang hian kumtin kumtluanin in feh ṭhin tihna em ni?” kal pah chuan a rawn ti a, a ṭawng dân ah a chau ṭan tih ka hre reng. Din pui zeuh zeuhin thlifim chu ka inchhem tir leh ṭhin a “Nimai e, a châng chuan kilometer 6 dâwn te ke hian kan kal ṭhin mawle, lo a hlat tak tak chuan a ṭhen chuan kumtluanin an riah chilha, kar tâwpah hna a ṭul chuan an rawn haw chauha, chutihlo ah chuan ramah an riak char char zel, kan ei hmuh nân chuan a ngai miau si a, sawrkar hna hian min daih loa, mitin hian ei kan hmuh nân chuan kan thawh ve vek a ngai miau si a” ka tihchuan a bu nghat nghat a.
“Hetiang anga thui hi ke in ka kal ngailoa, naktukah chuan kawngpui thleng tal kha bike keng tawh ila a ṭha ang. Hetiang chuan ka rawl vek mai dawn a sin, i tân pawh a chauh thlâk ang, hetianga nitina ke a feh tur chuan ka tlin teuhlo mai, ka nu leh pa hian hetiang hmun hrehawm a awm tur hian min duh chu a ni sia” a ti bul bula.
“I duh loh chuan ṭha deuhin a awm theih alawm, i nu leh pa thu te âwih ve la. Zu leh party vêl ringawt buaipui lo khân ṭha tak te in awm ve la, nu leh pa tân chuan fate hma hun kan ngaihtuah a, kan fate kan hmangaih avângin an ṭhatna tur chuan engpawh kan ti mai ṭhin alawm. Nangpawh ṭha deuha i awm chuan hetiang rengin an awm tir bik nâng che” ka ti sapa.
Pa Muana te pawh mi ṭha lo an niloa, u Remruata an hmangaih zia leh an unau ah rau rau pawh an hmangaih bik zia ka hria a. Hetianga awm lo hian ṭha deuhin awm sela chu keimah nên pawh kan inneih kher ka ring lo, an fapa ṭhat an duh luatah leh hmeichhe inzuar a neih an hlauh avânga kei nên pawha min inneih tir chauh an nia, chutiang hlau lo nisela chuan engtin nge kei ang thingtlâng nula hi an mo ah min pawm tehlul ang ni.
“Chutiang chuan awm pawh ni ila an lâwm chuang lo ang, an tân chuan fapa buaina thlentu bâk loh ka ni ngai hleinem, an mualphona leh hrehawmna thlen tu ah bâk loh min ngâi ngai lo. An tân chuan fapa sual tak chiah ka ni, an duh duh huna ṭawngkam chhia an hman khumna mai mai” tiin a rawn nui hul haka.
A nui ri ah chuan natna a tel tlat hian ka hria “I hresual aniang, in inah kumhnih chhûng ka awm chhûng khân i nu leh pa hian an hmangaih zia che ka hmuhpui vek a sin, an ngaihtuah em em bawk che. I vah bo apiang leh i rawn haw loh zân ah te an buai theih zia ka hmu fo a sin, nu leh pa ai bâka min hmangaihtu hi an awm lo ania, khawvêlah i nu leh pa aia hmangaihtu tur che zawng la i hmu hauh lo vang, chuvang chuan nu leh pa thu hi kan awih ve angai fo ania“ ka ti dap dapa.
A pawm kher angem ka hrelo, mahsela hetianga a nu leh pa in an hmangaih lo ang tlata a inhriatna hi bo sela ka duh. Nu Ahlimi lah hian a ngaihtuah zia leh a rawn haw loh apianga a ngaihtuah lutuk avânga tlaivar châng a ngah zia ka hmu ve veka, an awmpui ka nihna angin an chhûngkaw nun zawng zawng ka hriatpui hauh lova, mahsela a tam zâwk erawh ka hmu ve vek thung.
“Engmah i hriat loh chuan i tân chuan an ṭha ngei ang le, ka tân erawh chutiang a ni velo. Zu leh ka ṭhiante hian ani hlimna min pe zâwk chu ni, chhûngkua a hlim loh chuan khawlaiah hlimna tur kan zawng mai ṭhin, inchhungkhura hlim loh miau chuan khawvêl thilah tal kan tlân mai ang chu” tiin a nui leh haka.
A ngaihdan chu ka hriatthiampui rualin a ṭhat lohna a tam ka ti ve tlat “Mahse khawvel hlimna kan zawn khân damchhung a daih chuang silo alawm, zu leh ruihhlo te hian kan khawih theih chhûng chu min tihlimin kan hria a, mahsela lang lo ruama a hnathawh nasat zia hi i hre lo em ni? Nun tawina, midangte hnuaichhiah na leh ngaih diklohna bâk a thlen ngailo, hetianga khawvêla hlimna zawng apiang te hian a tawpah natna leh inchhirna bâk an hmu chhuak chuang lo ania, i tlai hma hian insiamṭhat tum zâwk rawh” tiin ka ṭhut chawlh puia.
A awmdân chu ka en reng a, ka thusawi kha a ngai hua angem ka hrelo. Mahsela a nu leh pa in ka laka an beisei thil kha tih hlawhtlin ngei ka duh, kan inṭhen dâwn a nih pawhin a hma a a nun ang ngawt kha chu nei tawh lo se ka ti takzet bawk.
“Sarzuk kan lo keng lo ani, ka nute khân an nei a sin le. Haw pahin ka lo haw teh ang ka ei châk” tiin keimah chuan ka in bia a, “I ngaihtuah tlai emai, chubâkah hetiang ramhnuaia chawlh rei hi ka duh vaklo. A la ngaw ṭha ropui si a, hetiang hmun hi ka ngaina lo“ tiin a hawi kual ruaia, a awmdanah chuan a ti mai mai lo tih pawh ka hria.
“Hlauh tur a awm hleinem, mihring nitin an kala eng hlauhawm mah an rawn hnai ngam lo ang. Mahni pawhin kan feh fo alawm, eng thil hlauhawm nge awm sela i tiha? Kal lamah pawh engmah kan tawh loh kha, mahsela i chauh loh chuan kal leh ila a nimai a lawm” tiin hma chu ka hruai leh zuia.
A ngaih a ngam chiahlo nge ka hnung tê ah tak tak chuan a rawn kal ve a.
Kan in be tawh lova, kan pahnih chuan ngawi reng hian kan kal mawp mawpa.
Khaw chhûng kan lût a, ka nute in lamah pêngin a ni pawhin min rawn zui ve zela, kan in kan thleng ṭêp tihah chuan “Nunu” tih aw ri rawn chhuak avâng chuan ka ding data. Ka lungphu a rang dat dat bawk, kha aw min ko tu aw kha ka hai hauhlo.
Rang zet chuan ka inhera, amah ngei ani. Kum tam tak ka lo nghaha, amah lo mipa dang la lût theiloa ka awmna ngei mipa kha, ka hmaah ngei a ni a rawn din ni.
DAMA AWM CHUAN ZANTIN TLÊM TE TE PAWHIN DAH KAN TUM TAWH DAWN ANIA