STORYFB.COM

KA LALPA





CHAPTER 9






“Miriam en teh saw?" Zovi rawn phun sa sa avâng chuan ka hawi chhuaka, kawngka lam ka en chuan Lalthanpuia bawk. Rawn kal tawh lo tur khân ka ti si a, engvanga dâwrah chuan rawn kal zêl nge maw anih le, tûn ṭum phei chu hmeichhe rualin an rawn hmu tih hriat takin thil lei chhuanlamin an in sik nawk nawk hlawm lehnghâl.







“Enge i rawn tih dâwn? Rawn kal tawh suh ka tih kha" ka tihchuan “Thil ka lei dâwn, i customer te vin hluk hluk suh, customer dangte i ûm tlân mai ang" a va han ngeiawm tak, mahse a sawi dik tho bawk si. Amah rawn zui lût tu hmeichhe ho chuan min rawn en dûn reng bawk nen ka insûm ta zawka.







“Enge in duh? Lo en rawh u, thawmhnaw kan nei nalh teh ania" tiin dawr chhûngah chuan ka kal kual puia, thawmhnaw duh em em vang pawh nilo in Lalthanpuia avânga rawn lût an nih hmêl mah zawk. Rapthlâk hian, a thinchhiatzia hria se an tlânchhe nal nal tur hi a nia, a hmelṭha ver vawr lutuk leh a thinchhe leh si lai hi a inhmeh thlawt lo.







Mahsela tûn angah hmelṭha si biak nuam lutuk chu an lerh duh bawk sia, “I inhmeh hle mai, thiam ilo ngah a nih hi" midang kan bula an awm hnai loh avangin thawmhnaw hliahah chuan ka hnungah rawn dingin hnunglam aṭang chuan min rawn kuaha.





Ka darah khabe rawn nghatin ka dul chu a chûl riak riaka, hepa hi nau ka la pai reng tih a hre ru nge mawni? Mahse ka awih chiahlo “Min thlah teh, midang an awm ve reng saw. Chubâkah i bialnu pawh ka nilo; min khawih ziah suh, ka ning" tiin ka awmsawna, midang bulah chuan ka phei daih bawk.





Tleirawl rual rawn lût ho pawhin min dawr ṭheuhin an chhuak zui ta diaka, Lalthanpuia erawh kan bul ṭhutthlengah chuan bawp khawkherh awt in a ṭhu a, haw tum hmel pawh a pu lo “A nghâk dâwn che ania'ng, awi a phone a en phei saw chuan a pa tawp, a mitmeng ringawt pawh saw a pa hliah hliah mai, i vannei e. Keichu min bem ve vaih se chuan ka yes rang viau ang" Hlimhlimi bawk.






He nu hi chu a naupang chhia ṭhin ania, a lehlamah chuan nuih lam lam a tiza. Thil thup ṭit ṭet a thiam velo a, a sawi chhuak phawng phawng zel, engmah sawi lem lo chuan ka phone ah mi ka be mawlh mawlha “In haw thei tawh ang, vawiin chu bâng hma rawh u" Tluangpuia rawn lût in a tihchuan kan tho nghal phak phaka.






Lalthanpuia min rawn zui ka rin avâng chuan chak zetin ka tlanchhuak a, a nilah min rawn ûm tak tak mai. Tlan chak sauhin kawng kân ka tum lai tak chuan ka hnunglam aṭangin min rawn chawi kâng lawpa, motor kawngpui lo lamah chuan min dah hmak bawk.








Ka hah lutuk chuan engmah ka sawi thei mailo, ka thaw hawm hawm mai “I tlân vak duh ka tireng a ni, min tlânsan theih i ring em ni? I in awmna ka hre duh, engvanga lo insawn nge i nih? I ṭhiannu khân a hria tih ka hre reng, min hrilh nghal rawh" a tihchuan ka hmui chu ka ner sawka.








“I hriat a ngailo tihna a nih chu, hre turin duh che ila ka luah tirhah ka hrilh tawh ang che. Min rawn tibuai reng lovin kha hmeichhia i duh em em bulah khân awm rawh" kalsan ka tuma, min pawm nawlhin kan tlân tawhna lamah chuan min lêt pui nul nulha.








Dawr kawta a car dahah chuan min nam lût nghal rawk mai, mi a dim lo lutuk chuan min ti thinrim ṭun mai. Car a hual chhûng chuan ka lo chhuak lui veleh ngata, chuveleh rawn lêt phei lehin a hma ang bawk chuan min nam lût a, a kalh nghal hmak bawk.







Be duh miah lovin ka kut chu ka kuangkuah hmaka, a rawn ṭhut luh ruala car chu tinung in a tlân chhuah tira, “I in awmna chu" a rawn tihleh chuan ning lutuk hian ka ena “Vanah a awm, i hmuh phâk a nilo" a rum nghuta “Ka inah ka hruai haw che anga a nimai" a rawn tih tâkah chuan ka hlauthâwng bawk nen ka in awmna chu thinrim zet chuan ka hrilha, a nui nghal suk mai.









“Fahrah ka nih mai avâng hian min zuam hauh suh aw, i duh duh dân chuan min ti thei dâwn bik miah lo a nia, ka inrawlh lohna tûrah ka in rawlh avangin hetiang hian ka awm phah a nih hi, min ngaihtuah ngai miahlo tiraw? Nang chuan min mutpui chiah i duh?" ka tih pang pang lai chuan “I hriatsual a nih chu, hre reng rawh kei hian i fahrah nihmai avangin ka iai lo che" tiin ka in kan thlen thu ka lo sawi avâng chuan a ding zuia.






Engmah sawi tawh lêm lovin ka chhuaka, ka hawng nghal rak rak bawk. “Hetah hian maw ilo awma? Engvanga insawn kher nge maw i nih le?" tiin min zui luta, ka in chhûng chu a enkual dun dun a, ka room-a ka luh chuan min rawn zui lût ve zela.








“Chhuak rawh, mi room-ah an phalna la lovin lût ringawt suh" tiin ka nam chhuak dawna, ka kut chu lo man betin amah chu min kuah tira. A âwmah chuan min kuah beiin a lungphu chu min ngaihthlâk tîr a “Chiang tak khân ngaithla rawh, enge a sawi" tisupin a ngawi zui daiha.







Engmah pawh ka hrelo e a “Engmah ka hrelo, lung ṭawng thei i hre tawh em ni? Lung chu a phu alâwm, a ṭawng theilo a phut ngai rengin a phu" ka lo tileh chu min rawn fâwp ṭawkin min kuah nghet salha.







    “I ṭawng thei lutuk hi puan ṭhui khâwl ang zet zet hi i nia, mahsela a pawilo, kei ka thinchhia i ti sia, nang tal ṭawng thei rawh. Thinchhia leh ṭawngthei thei chu kan in mil ber" a tihchuan ka ner nung mai “I daw kha a nihchu, nang nena inhmeh pawh ka duhlo, min thlah rawh. Ka taksa chiah i duh" ka hmuiah chuan a rawn hup leh chata.









“Shh.....chutiangin ka ngai ziah lo che, i taksa chauh duh anga min ngai chu ka thiam loh ani e. Ka tawh hmasak ber aṭang che khân i lakah ka insûm theilo a ni, hmeichhe dang lakah pawh khatiang khân ka awm ngailo, nilo mipa lerh tak ka niin i hria em?" a rawn ti khauha, ka lu ka thing nawk nawk mai.





Ni e, hmeichhia a kawp âwm kha kum thum chhûng a hnêna ka thawh khân ka hrelo, a bialnu hlui vâng kha a nih ka ring tawp.




“Mira min ring rawh. Ka duh takzet che, i taksa chiah ka duhlo, hmeichhia hi an taksa chauh duh ila chuan mutpui tur ka hmu hnem lutuk, i hria ang. Ka sum duh vang ringawt pawh khân ka bulah an rawn kal ṭhin, tûnlai hmeichhia chu an lo mak hle tih ka hre thar bawk, mahse i ruih laia ka khuma ilo mut aṭang khân min ti danglam veka, ka mutpui zui hial che a nih kha. Ka bialnu hlui tihlohah chuan ka hnaih leh hmasak ber i ni, ka mutpui fo chhan che chu i lakah ka insûm theihloh vang a ni" tiin min chhânga.





Ka en reng ringawt, sawi mai tur ka hrelo. Mahse a bialnu hlui kha chu ka la thik tho tho “Mira, i taksa chauh ka duhlo i engkim hi ka duh che" tiin ka kut chu la in a fawp zauha, ka hmai vel chu a chûl dan dan bawk.




“Kaa....ka ring lo che. Kan inneihna pawh i ṭhulh a, min ngaipawimawh ve tak tak lo, engmah ngaihtuah ka duh tawhlo. Ka thianghlimna ka hlan che avângin i lakah nem takin ka awma, hmuhsit awm pawh ka ni ang, keichuan mipa avânga nat ka duhlo, ka mal lutuk. Hetiang thil hi ka ngaihven duh tawh lo, chhûngkua ka nei lova, hmangaih neia nakin maia nat leh ai chuan mipa hi hnaih loh law law ka duh" tiin rilru buai zet chuan ka phun chhuaka.






“Ka tihnat che i ring amaw? Engvang chuan maw? Inneihna ka ṭhulh chhan kha chu ka hrilh tawh che kha; hun min pe ve rawh. I fahrah nihna avângin ka iai in ka hmusit ngai lo che, ka ta nila min fiah ve rawh" tiin ka lamah a rawn kûn hniama, ka lo en kar thung.





Ka hmuiah chuan nidanga min fawh dân lo ang takin dim te hian min rawn fâwp a, a hmui chu muangchanga chêt tîrin mi a tidanglam hneh takzet. A mi fawhna chu a rilin ka ngaihtuahna a buai nghâl map mai, mahsela ka ka luhlul ve tlat. Ka chhâng lêt duh ṭhak lo.





“Mira, min ring rawh. Chance in pe tawn ang, kan pahnih hian bul ṭan ve ang, ka tina ngai lovang che" tiin thutak zet hian min ena, ka chhânna a nghâk tih ka hria. Chhan mai dân tûr ka hrelo, ka chân phal chiah angem tih lah ka hre heklo, ka ngaihtuahna a ti buai ve map mai.





“Khawngaihin ka bialnu ni rawh" a aw thum chhar chuan a rawn ti leha “Aw le, mahse min nawr lui ngai suh. Tin, i bialnu hlui kha i hnaih tur a nilo, ka mizia zawng zawng i hria, hetiang hi i pawm thei dâwn a nih loh chuan engmah tih dun loh ka duh zâwk" tiin aw chu ka pawh ve ta nge nge a.





Ka nau tihtlâk loh thu erawh la hrilh mai ka tum lo, a la lang lo bawka, a rilru fiaha eng ang chiah nge a nih fiah hmasak phawt ka duh. Chumi hma chuan ka thiam dân dânin ka thup ve mai ang chu, ka chhânna avanga a hmêl êng sâwt sâwt pawh ka hmuh hmaihlo.





Nui vur vurin min chawi nawlha, a nui ri nghal hawk hawk mai “Ka lawm e, ka duh lutuk che" tisupin khumah chuan min ṭhut thlak puia “Te, zanin chu nangmahin rawngbawl la, i rawngbawl ka ei chhin châk" ka tihchuan a meng deuh aka, a thiam ka ring ve tawp.





“I duh chiah ang maw? I ei châk phawt te chuan tirawh le min lo pui la" tiin a kawr chung chu phelhin a kamiz ban kilhna chu a hmet phelha, a thlep chho turin min rawn mitmei nghal zauh bawk.




Engmah sawi lem lo in ka lo thleh chhoh saka, inzui chhuakin choka lamah kan pheia “Le, zanin chu a changtupa hian fel kan zir ange" an ti ngeia, a phur lutuk chuan min ti nui ve sak sak mai. “Vawksa hi han chhûm hluah phawt ila, Mira ei tur i va lei hnem ve" tiin min rawn en ha a.





“Ka bazar reng hman hleinem, bâkah khatiang kha a ṭha daih zawk. Haw tlai pawhin kan che nghal zung zung thei a, tikhan ngawi reng khân siam mai teh" tiin a bulah dingin a thil tih vêl chu ka enkuala, a che chu a zei riau. A bâwl ṭhin a ni ngei ang.




“Hmanhmawh la ka ril a ṭam tawh ania" ka lo tileh chu “Ka hmanhmawh reng, sa te hi a hmin phawt angai, ngawi hle hle khân lo awm rawh. I thi hman êm lovang" a rawn ti leh hluk tawh, a thinchhe lutuk hi a thinte hi entir ila a ṭha ang.





“A nih tak chu, i zaidam zir chhûng chu a va reilo ve, zaidam zira thei rei lo ber of the world ti che ila a ṭha ang" a thaw haka, a insum tum si mi ngei bawk si hmel chuan ka nuih a tiza. Ka nui var vara, “A dik i ti, ka hre vek le khawimaw purun kha ka lo chan ang, anṭam kha vawksa ah khân thlak tel rawh aw" tiin ka chet pui ta zung zunga.




ZAWMNA..





“Bul ṭan chu i duh tak tak em?" a rawn tileh khauha “Ka hrelo le, ka en chhin phawt ang che chu, tûnah chuan ka duh lohna zawngah min nawr lui miah suh ang che" tisapin ka hawi kuala.



Hmangaihna ah hian nêp in tih theih pawh a nilo, hmangaih tak tak neih chuan an lakah a thinrim rei theih hauh loh. Nem loh theihloh leh kan dawhtheihna tifiah zual tura Pathianin min tawn tîr a niin ka hria, tumahin an ngaihzâwngte nena an inkârah hian in sawisêl nghal ngawt hi a fuh lo tih keimah aṭang hian ka hrechiang.





Hmeichhia chuan duh leh hmangaih kan neih tawh chuan an lakah kan thinrim reng thei ngailo, a nikhat thil thu a in ngaidam te pawh an awm laia kei heti chen ka pehhêl chunga min ûmzui tu hian min duh lo bur chu a nih ka ring lo.





Kan mi ngaihpawimawh loh leh duh loh chu kan ûmzui reng peihlo, a bikin mipa ah. An duh loh chuan an be lo maia, engmah sawi lovin an inthiar fihlim mai ṭhin. Ni e, a fa ka paia, alakah mipa dang bula ka tih loh zawng zawng ka pe; ni e, Lalthanpuia hi ka hmangaih tawh ni berin ka hria.




Alakah nem duh lo in kha chen ṭawngkam na tak takin ka ṭawng khuma, mahsela min bânsan duh hauh lo thung. Ka fiah ve chhin ang chu, chuta ka tawrh leh keima tihsual a nimaia, midangin min rawn tawrh pui dâwn lova. Ka nep ti an awm a nih chuan nêp thei dinhmuna ding turin hmangaih tak tak an la neilo tihna a nimai.





Thla chuang ka pehhêl chung pawha min hel ṭang ṭang tu hi engtin nge hmangaih tho si chuan ka huat reng theih bîk ang. A harsatna zawng zawng ka hriatpui bik lova, kan inneih a ṭhulh chhan pawh kha ka fiah ngat anih kha, ni e hmun hran hranah bank an dina, itsiktu leh haw tu an neilo theilo.




Hmeichhia chuan kan tawn a nih loh chuan mi awmdân kan va sawisel nghâl ngawta, pasalte hi kan nei veka. Pasal zu in mi nei pawhin engvângin nge an kalsan mai loh? A chhan chu a pasal a hmangaih leh engkim hre chunga lo nei kha a ni miaua, a ni lo in nghahna tur dang a nei tawhlo, kârah fa an awm tawh phei chuan tumah hi kan luhlul reng thei ngailo tihchu kan hre chiang viau ang.





Keipawh ka nau pai hian chu chu min ngaihtuah tîr ve bawk, thinrim hlek apianga inṭhen cho ar reng pawh hi a ṭha ber lo bawk. Hmeichhia chuan pasal neih tawh phei chuan kan chhungte bula lêt leh mah ila a hma kan ang tawh ngailo,  hei chen ka luhlul khum tawha, a rilru fiah nân chuan chance chu ka pe ve ang chu.




Heti a nih avâng hian a lakah ka nem duai duai tihna a nilova, mi tu pawhin chance an dil chuan pêk chu an phu a lawm, kan tihsual apiangah thiamloh chang tur ni ila. Pathian hian min dam tîr reng duh tawp nang, a ni chuan vawitam kan tisual chung pawhin min ngaidam a lawm le.





“Le! Ka peih e, chuan enge chên dun lam te hi" tiin ka bulah chuan a rawn ṭhu hnaia “Hun ṭha ka pêk mai che avângin ka ngaidam vek che a ni miah lo ania, chen dun maw? Nupa kan la nilo, tin inneih dâwn pawhin chiang taka in ngaihtuah duna chumi hnua inneih chauh ka duh, i tihsual siamṭhatna hun ka siam che a, a hma anga holam lutuka awm kha ka duh tawhlo" ka ti ve ta hmaka.





A thaw hawk mai “Luhlul si, mahni thu duh bawk si. Hetiang te chuan in ngaizawng lo nên kan in ang reng, a hma kha ai khân ka ngaihsak ang che. Tin, ka bulah rawn thawk leh la ka duh, khapa bula awm reng tur khan ka duh hauh lo che a nia, a melh dan che kha ka duhlo" chiang fek fawka min rawn enin a rawn ti a.





Enge Tluangpuia pawh chu a lo ngaih theih loh ve viau ni “Ka ṭhian a nia, tin i bula thawh ka duh tawh kher lo. Tuna ka hna leh ka dinhmunah hian ka hlim, ka sawi tawh kha, ka en dâwn che a, ka rin loh tura i awm a nih chuan bul ṭanpui ka tumna che hi ka sut ang, a hma ang mai maia awm ka duh tawh lo ka tih kha" tiin chaw chu ka ei nghal mawlh mawlha.




“Ka hria" tih zawng sawiin a ni pawh chuan chaw chu a bar nghal tawn tawna, a chaw heh dân lah chu pui tak a ni. Ka en tawp mai, a chaw bar pah chuan a tum bur zuia, a hre ngailo rawn lût se an biak ngam pawh ka ring lo, tinge mawni a tih tauh reng mai le.





Chaw eikham chuan ngawi rengin tv kan en duna, ka bulah ṭhu in nin hmêl zet hian tv chu a en ve reng tho, keiin hmuhnawm tizetin ka ena, “Ninawm khitiang lo khi en tur a awm lo em ni? Khitiang a nêp emai, mipa pawh anilo" a tihchuan ka melh ngheka.




“Khi khi mipa dik tak zia a nih zawk khi, a hmeichhia a ngaihsakin a zahthiama, khitiang khi tawng ve ila chuan ka chhuah hauh lovang, nang chu i nilo chiang lutuk hi maw ka sawi peih lo zawk" tiin ka nui haka, a lâwm loh hmel teh e.  Chutia ka film ena changtupa a tluk loh thu ka sawi chu a lungawi lo hle tih a lang reng, engah nge a sawisel tehreng ni.





“A zah pawh a nih loh saw, a hlauh tlawn a nihsaw, sawtiang mi duh reng reng suh. Nupui te ngam lo mipa chuan a châwm pawh an châwm zolova,   an nupui te châwm an ni duh chawk" sawi tur lah hi a hre thei si, khawi aṭangin nge maw mi hnialna tur hi a lo zir ṭhin dawn ni.





“A nihtak chu a, ka duh tho tho ka châwm lâwp lâwp mai ang chu" ka lo tileh chu “A nihchuan ka aiah bank ah sawn i thawk tawh ang, kei inah ka lo awm anga, kan fate ka lo enkawl ang" a tihchuan ka nui haka “Ka duh leu, sawtiang ka thiam lo, sap ṭawng takngial pawh ka thiam loh hi, kan tlachhe rawk rawk mai ang" tiin ka ham bai baia.




“Haw tawh rawh, ka mu duh tawh. Hetiang chuan min men tîr hrep dâwn a sin" tiin ka tho chhuak dâwna alamah chuan min pawt hnai nghal vat mai. A mal chungah chuan amah hmachhawn zâwngin min ṭhut tira “Bawihi, kan inru mai dâwn em ni?" thutak zeta a rawn tihchuan mak ti zet hian ka en ha a, a hma anga uang hmel kha a pu tawh hauh lo.





“Dan hnihna a inneih kha i ti emaw ka tia? In rûk maw?" tisapin a kawr âwmah chuan ka ṭham sak neuh neuha, chutia in rûk a rawn ti thut chu mak ka ti deuh. Amah a nilo emaw ka ti hial, mahse a ni ngei bawk si, a hmêl chu a hma ang lo takin a ngui riau hian ka hre bawk.




“Nghak rih ang ka tih kha, i mi duh tak tak leh tak tak loh pawh ka hrelo va, pasal ka nei dâwn a nih chuan min hmangaihtu ngei ni thei sela ka duh, chutilo zawng fate neia inṭhen leh mai tur chuan ka duh ve lo, keimah ka fahrah tawha. Ka fate chuan nu leh pa ngei nei sela ka duh" ka biangah chuan a rawn vuana, ka mit ka lo chhing vang vanga.




Ka hmui vêl chu rawn tuaiin ka nghâwng lamah chuan a zût thla a, ka thaw hak mai. Ka pum chu rawn khawihin “Kan naute kha i ti tla tak tak em ni?" rilru nat hmel taka a rawn tihchuan thudik hrilh mai ka duha, mahsela mi nawr leh tut tut emaw a thinrim leh vak emaw ka hlau tho bawk si.





Engmah sawi ta lo chuan ka kûn chal ringawt, ka awmdân chu hmu in thawk a la a “A pawilo a nia, i rilru ka tibuai dâwn em a ni. Fa neih hun hi ka nghâkhlel ve ṭhina, chutih rual erawhin hmeichhe narân mai mai laka neih erawh ka tumlo. Hmeichhe inchei uar lutuk leh taksa vawng leh em em te hian min hip ve lo, a chhan chu chutiang mi chuan an pasalte phatsan an hmang deuh ṭhina" tiin a nui saka.





“An taksa a mawi pauh leh mipa mit an la a, nu ni tawh mahse an in chei reng chuan an pasalte tân pawh a ngaihṭhat thlak loh, ka patea nupui hian min ngaizawng ṭhina" a tihchuan mak ka ti lutuk chu ka meng deuh kawka, a thusawi chu ka rin loh lam daih a ni.




“Engtin maw? I patea nupui maw?" ka tihchuan a bu nghata “A ni pawh a in chei fai hliau hliau peiha, mi in an fak na ber a ni. Mahse a ruka ka patea phatsan kha a hmanga, Mizoram ka rawn lêt a min hmuh aṭang khân mi a duat thei em ema, ka patea nupui a nihna avânga min duat emaw tiin keipawhin ka ngaina, mahsela ka lakah rilru dang a lo pu renga" tiin za lo zet chuan a ṭhen saka.





A hmelah chuan hrehawm tihna ka hmu thei “A fâl a min awmpui tumin chhuanlam a siama, ka lo hrethiam mai lo. Ka patea lah khân mi a duat êm avâng khan rinhlelhna a nei lo, an inah ka awm lâwk a, a chhuak fo ṭhin bawk nen a nupui awmdân chu a hre ngai reng reng lo, ka inbual laiah rawn lûtin mutpui turin min ti a" ka ngaihtuah loh lutuk daih a sawi avâng chuan ka kâ ho mai.




Chutiang thil a tawng ang tih lam reng reng ka ngaihtuah phalo, ka mak ti hmêl chu min nuih sakin ka luah chuan a rawn chûl zauha, ka lo en kar ringawt. A thil sawi chhuah chuan a ngaihtuahna a luah thar leh tih hai rual a nilo, a kut chu chelhin ka chûl sak ringawta.





“Chuan engtin nge? Chutiang chuan i chungah a che ngam a maw?" engtin nge pasal phatsan duhna rilru a put theih zâwk? Khawvel pawh hi a lo mak ani, mi ropui leh hlawhtling tak anga lang te pawh hian harsatna nasa tak an lo tâwk ve leh ṭhin zawng a nih hi.




“Um patea hi a zinchhuak ngun ve a, a nupui mamawh a pe tâwk lo ve deuh pawh a ni'ang; mahse nupa an nih tawh chuan an uire tur a nilo tih hi ka ngaihdan a ni ṭhin, khatia mutpui tura min rawn sâwm hnu kha chuan ka hmuh dan pawh a dang veka, ka duh loh thu hrilhin ka kalsana, mahse a la beidawng duh hauh lo" tiin a thaw hrawka.




Lo biak buai ka duh loh avangin ka ngawi reng ringawt “Min umzuiin thlêm chitinin min thlêm a, ka tân khân a hrehawm, Patean a ring êm êm a, khatianga ka chunga rilru a pu mai kha ka tenin mak ka ti bawk, ka hnial reng tâkah chuan min tilui ngam ta biklo, kha mi hnu khân an bulah pawh awm lovin ka chhuahsan zuia" tiin min rawn en leha.




A mal chunga ka ṭhu bawk nen ka insiam rem sat sat mai “I patea chu i hrilh lovem ni? Chutiang chu hrilh mai ta che?" ka tihchuan a nui suka “Ka theilo a lawm, a hmangaih lutuka min awih kher lovang, bakah an fate an la te ve si a ka khawngaih a ni. Kha mi hnu kha chuan a ni pawh a inthlahrung nge mi pawh a be ngam tawh lo, khata ṭang khan hmeichhia ka hmuh dan leh ka ngaihdân a dang zova" tiin a nui leh haka.





“Hmeichhia hi ngaihzâwng tûr ang pawhin ka nei duh mai mai ngailo, i hriat angin Remi kha ka hnaih hmasak ber a ni a, mahsela a ni nên pawh kan inzui reilo, engmah sawi lovin a kal bova, hnaih leh tumna pawh ka nei tawhlo. Nang ka tawn che aṭang hian hmeichhe dang hrim hrim hnaih ka nei tawhlo" tiin ka kut chu a la a.





“Thinrim tawh suh aw, thlêm i harsa si thlakhat chhûng zet min haw thei ania, Pathian thu pawhin i thinurna niin tlâk pui suh se a tihkha thinrim reng loh tur" a rawn ti ve ngei a, a va han inhmeh lo chiang tak. Pathian thu a vawikhat sawina a ni, Bible chu a chhiar ve ṭhin tho a lo nih dâwn hi.




“Tunah pawh ka la ngaidam chuang lo che, mahse hun ka pe thung ang che ka tih kha, ka lawm lohna tur thil ti tawh lo la ka thinrim lo a nimai" tiin haw tur chuan ka tur leha, a ni pawh phur lo zet chuan a chhuak hnu hnu mai.




A tlân liam thleng chuan thlirin ka lût zuia.



MUTTUI U.