ALL THE WRONG PLACES 17 ONGOING

[B.laltlanhlui]

Chapter 10

Julianne chuan chu pa sang pian dik thlarh in a lam pana a rawn pen lai chuan che chang lo hian a lo en reng a

A thinphu te chu rawn tawp in thawk nachang pawh a hre lo hial mai

Kawngka a den dawt thlengin a tawlh let a, Jin lah chuan a rawn hnaih telh telh. A rim pawh chu hrechiang tawh tak a ni

A mitah tak pawh a en ngam lo. A pa hnenah nau a pai thu a hrilh lai ai khan tunah hian a ṭi daih zawk

Jin chuan a rawn kual khung a, a rawn chhuk en lai chuan a thaw deuh hrawih mai

"Hello...Arabella"

Julianne chuan a hming lem pek ngei a han hriat leh chuan mit a chhing vang vang a, a mitah tak a han en ve ta

"I insawi ang i ni bik lo!" dam deuhin a han ti let a

"Eng nge ka insawi ang ka nih lohna?"

"Jas Mathieu i ni lo"

Chiang deuhin a rawn melh a, thim tham ah pawh chuan a mitmeng chu thinur em avangin a alh pup thei

"Jas Mathieu chu ka ni alawm. J-A-S tih kha ka hming lamtawi a ni. Mathieu tih lai kha ka nu hming aṭanga ka lak ania. Jas Mathieu tiin hming ka sign ṭhin bawk. Ka chhungte leh ka ṭhian hnai tak te chuan ka hming hman hi an hre vek alawm"

"Mahse i hming diktak a ni chuang hleinem"

"Ka artist hming a nih kha. Ka nu leh ka unaupa pawhin lehkhabu an chhuah dawnin Amanda Seville leh Jamila McBride an inti ang tho kha a ni mai" Thawk la halh in mitko a san a "Arabella Adams ve thung chu hming lem diktak a ni"

Hnuai lam a melh tlat a, a mitah tak pawh a en ngam lo. A hma kha chuan hmangaihna nen a lo en let ṭhin a, tunah erawh thinurna berhbu tawng baw tur ang mai a ni

"Eng nge i duh a?"

Jared a chungchang a zawh lo hram theih nan rilru ṭawngṭaina a nei char char. Hrilh a la inpeih lo. Jared pawhin la hre lo se a duh. Adrienne te nena an inkara khi siam a duh lo

Jin chu a ngawi reng a, a ṭawng hun a nghahna lamah a thin a phu dep dep. A din ngai rengin a la ding bawk si a, Julianne chuan a thin phu ri te pawh a hre riai ruai mai

A tawpah chuan a han dak chho leh a, tukverh aṭanga eng rawn lut chuan a hmaifang ṭha tak mai chu chiang zetin a rawn chhun a, a ngaihtuah tur awm ang erawh a hriat theih miah loh

"Tihpalh Paris ah khan ka zalenna tawp ber hmang turin ka kal a" a ti chuai raih a

"A nih chuan hming lem hrilh a, i zuna mipa uai tir chu i lawmman dawn ah i ngai a ni maw?"

"Zuna uai tir maw? A tir aṭang khan nang pawhin i hming diktak min hrilh bik hleinem"

"I lo bo daih tih ka hriat laia ka buai zia kha i hre thiam pha lo zawk ang"

"Paris aṭanga ka let hnua ka thil tawn zozai pawh i hre bik tawp nang" a awki a sang ve khawp mai

'Engtin nge ama chungchang ringawt anga chhuah a tum theih. A ni ai ka tuar hnem fe zawk'

"I sawi dik alawm. I chungah eng nge thleng ka hre lo. Khawiah nge i kal tih leh engvanga ka zawn hmuh theih lohna tura biru nge i nih tih pawh ka hre lo. Thil chhui thiam bik ka rawih pawhin i awmna min hrilh thei lo. Khawmual hrang hrang ka zawn pawhin ka hmu thei lo che, chu pawh ka hming hriat dik loh vang vekin"

A thu hriat zawh chiah avang chuan mak ti lutuk in a meng zau kawk a, thudik ngei a ni em tih hriat tumin a mitah tak a han en leh a, party naa an inhmuh leh lai ang chiah khan a thinrim leh tawh hle mai

"Min zawng maw?"

Jin chuan mit a chhing vang vang a, a rawn men leh chuan a mitmeng a cool raih tawh

"Kum nga chhung tal tawp Arabella" a ti thawp sut a "Europe leh US a detective ṭha ber te ka ruai a, i hnu tal an hmuh theih ka beisei a, mahse an hmu zo lo che, i awmna chin an hriat loh laiin ka unaunu te chhung zingah i lo tel reng si a...

"A tuk maiah khan Jin Starck, Starck Corp rochuntu ka nih thu hrilh che ka tum a, ka hming diktak lo zawk ka hman chhan chu harsa ve deuh anga ka insawi chung khan min duh thei tho ang em tih ka hriat duh vang a ni"

"Tak tak em ni? Min hrilh i tum tak tak maw?"

"Aw" a ti nghal "A tukah khan Paris ah ka kianga awm tura chelh che ka tum a, i la inpeih loh pawhin nghah che ka inhuam thu leh a ṭul chuan i rilru i siam fel hma chu US leh Paris zin tawn sek pawh ka tih loh tur thu thlengin" a lu a thing a "Mshse ka harh chuan i lo awm tawh lo. Eng nge ka tihsual ka hre bawk si lo"

Julianne inthiamlo lutuk chu a mittui a rawn tla a

"Tihpalh kan inhmuh lai khan ka thil tum ah i tel ve lova" a ti zawi sap a "Khatih lai khan pasal hual ka nei a, ka hrilh thei lo che alawm. US ka let veleh a innei tur kan ni a"

Jin chu a tawlh hnung dawrh a, hriatthiam loh hmel deuhin a en a "Tunah chuan ka man ta e. I hming lem tih loh dawt engzat nge min hrilh? I pasal hual i kawp tihna a ni maw? I lo lerh hle mai a, chuvanga tlanchhia i nih chiah dawn chu"

"Chutiang chu a ni lo"

Jin chuan a lu a thing a "I chhelo tih i inhria. Mipa i tawn fuh apiang inneih hmaa nawmchen pui i tum tih a chiang reng mai. I zunah an uai dawn tih i hriat sa vang a nih chu" A aw chu a ring telh telh. Inchhunga mi zawng zawng an harh mai ang tih Julianne i'n a hlau zek zek

Jin chuan Paris ah pasal hual nei chunga Julianne nen hun an lo hman dun vang khan a tha a na tlat. Thinrim zetin mitko a san a "Paris a i tawp hmain khawi hmun hmun te nge i tlawh a, nuam i chen nasat lutuk vang em ni i pasal hualin i fapa nena a kalsan che?"

Julianne chuan a thu hriat zawh chiah chu awih harsa a ti lutuk. Mu kual nasa lutuk angin a ngai tihna ania. Kha mi zan khan a virgin na a hawn sak tih te a hre lo em maw ni?

Engtin nge Jared kha Patrick McAllister fapa anga a ngaih theih zawk?

A inrin hma chuan Jin a hmaiah a beng pawp a, lo inven pawh a tum lo, a dawh deuh tawp mai

"Ka tihbuai na zawng zawng ah khan ngaihdam ka dil e Mister Starck. I sum sen ral zawng zawng pawh ka rul leh vek ang che. Mahse ka fapa rmaw ka chhungkua te hi i ṭawngkhum ka remti lo. Room aṭang hian chhuak nghal rawh khawngaihin"

Kawngka aṭang ngeia a chhuah theih nan a lo tawlh kiang a

Jin chuan thawk a la halh a, he khawvela hmeichhe rinawm lo ber hmu ang maiin a en a, Julianne pawhin a rilru a tihnat sak avangin a inthiam thei lo. Mahse a thil tawn tak te ngaihtuah chuan mi lerh tak emaw mi bum hmang anga ngaih chu a duh bik lo

"Chhuak rawh!" a ti nawn leh ngat a

Hming lem chu a hrilh ngei alawm. Mahse a ni pawh a bang bik lo. Ngaihdam a dil tawh chungin a rilru a la tihnat sak tho a nih hi

Jin chuan kawngka biang a chelh a, Julianne ṭah chhuak lutuk chu a la insum ve ngar ngar

A chhuah hma chiahin zawi sup hian "Hmeichhe pakhat zunah hian nasa taka ka uai theih ka ring ngai lo. Mahse ka tawn che khan ka thinlung zawng zawng ka pe che a...i tan erawh nawmchenna mai ka ni si a, a pawi khawp mai"

Room aṭanga a chhuah chuan kawngka a khar bur a, Julianne chuan a kalh thlap hnuah nasa mangkhengin a ṭap chhuak hawm hawm a, chhuatah a ṭhu hnawk bawk

Na a tih ai mahin a hlauhna chu a nasa fe zawk. Kum sarih liam ta ah khan thil a lo tisual a, a chhungten an hnawtchhuakin a fapa chu amah in a enkawl chho a, Jin nena an hun hman dun kha a la theihnghilh lovin chakna thar pe tu a ni zawk ṭhin

Chu a beiseina chhe te chu Jin hi a ni. An inhmuh leh hun tur a thlir reng ṭhin a, chumi hun a lo thlen chuan a thiltih chhan a hriatthiam a, a ngaihdam theih chuan Jared nen an vaiin an awm ho te a lo ring ṭhin

Mahse Jared chungchang a ni emaw inrinhlelh nachang pawh a hre miah lo. Jared hi a fapa a nih a ring lo mai ni lovin a nawmchenna hmuna mi dang laka a hrin a ring zawk a nih chu

Julianne chuan a mittui a dang thei thlawt lo. A mipa hmangaih nen inzawmna an neih leh lam ai mahin nu a nihna a hlen zo lo hle in a inhria a ni

***

Jin Starck pawh Julianne kawngka nghengin chhuatah a ṭhu hnawk a, room chhunga ṭap thawm pawh a hre vek. Chemte a chhun ang mai hian a na ve zawk zawk mai

Kawngka chu va hawn leh a, a awm nghen tir a hnem mawlh mai chu a chak a, engkim a ṭhat leh vek tur thu hrilh te chu a chak hle a ni

Mahse chu chu engtin nge a tih theih ang? Kum tam tak chhung thinrimna nasa tak a lo pai reng tawh a, he hmeichhia hian a thinlung chu hmun sang tam tak ah a tihkeh sawm sak a ni

Paris a an intawn lai a hrechhuak a, bottle lei tuma dawr nghaktu nen an inbiak buai em em laia a va inrawlh kha

A rawn hawi chho a, a hmel a hmuh chiah khan a mitmeng pawl ral tliang tak mai, mithmul sei tak, biang tai tek, heh sen vam ham fawh chakawm zet mai zunah khan a uai nghal ti tih der mai

Lawmthu a hrilh laia a nuih sen sen khan vanram hmu ang hialin a inngai a, a hmangaih nghal tih a inhria. A inveng ve nasa ṭhin in mi in an bum loh nan hmangaihnaa tluk loh hi a tum bur ṭhin

Bottle hralh tur ni lo kha a duh em avangin dawr nghaktu hnenah engzat pawh chhiar se lei sak mai a tum thu a hrilh a, chu nu chuan tu nge a nih a lo hre tlat. Euro sang nga leh Starck Corp ten an chhungkuaa kar tluana chawlh hmanna tur tum sak vek turin a phut a, bottle a duh zia a hriat avang khan a remti nghal thlap

A rilru put hnang kha dik vek mahse hming lem a hrilh tlat. Zan hun hman pui a kalsan leh a tum lam ai mah chuan rethei tak anga a insawi chunga amah a rawn hmangaih theih a beisei vang a ni

A nuih tir bawrh bawrh in a duh hun apiangah chona a paltlang tir bawk. Engpawh a sawi mai zelin thup lem a nei lo. A nihna anga a lan tawp na kha a duh em em chhan pawh a ni

Cafe changkang vak lo ah a hruaiin fast food ei tura a chhuahpui mai mai pawhin a nui reng thei a, a hmeichhe kawp ṭhin te nen chuan danglam tak a ni

A chenna hmuna a hruai pawh khan a lawm thiam em em a, studio a ni zawk mah. A in diktak erawh a lian in khum sawm vel chu a awm ang. In enkawltu leh tifaitu a nei a, car pawh sawm chuang a hung fur mai

A studio ah hi chuan a sam thei ang berin a dah fel ât a, a mamawh tawk chauh a chhawp a, a nihna theihnghilh mai loh nan leh chapo taka awm loh a thlang zawk ṭhin

Chuvangin a changkang vut lova, a nuam tawk em em a ni. Khum a lai takah a hung a, Tv leh ṭhutthleng dup nuam tak a awm leh chauh. A lemziahna vel pawh a awm deuh ṭhup mai

Studio a a luhpui laia a hmel hmuhnawm zia te, a hlim hmel pawh a tihder loh zia a hriat. Khatiang hmuna chen pawh a iai loh a nih chuan a tana hmeichhe dik tak tih a chiang reng mai

Hmeichhia mutpui a duh vanga kha hmuna hruai kha a ni lo. Hmangaih leh duat taka thinlung taka inzawm a duh vang zawka mutpui a ni. A taksa khawilai pawh kha duat takin a chul sak hliau hliau a nih kha

An infawh te khan an inpawh lehzual sawtin a hria. A vawikhatna atan kumkhuaa chen dun pui atana a thlan ngei chu a hmu ta

Mahse a ni chuan a lo kalsan daih si

Kum nga chhung a zawng reng a, hnuchhui lama ṭha ber ber te thlengin a ruai vek. Lemziak leh hming lem chauh chu a neihchhun a ni mai. Kum hnih hnuah hnuchhui thiam te pawhin an thawhpui duh tawh lova, a beiseina pawh a chuai zo ta

Kum hnih liam ta ah khan theihnghilh tumin hna a thawk nasa a, hmeichhia pawh a mutpui kual zut a, tumah hmangaih a tum tawh lo. Midang hmangaih leh tur pawhin thinlung a nei tawh tlat lo. A ni khan a kalsan rualin a thinlung pawh a ruksak nghal daih a ni

Hnathawhna ah pawh a hlawhtling chho reng a, sumdawnna kha a enkawl ṭha in a pa leh pu pawh a khum daih a ni. Ram pum ah pawh pahnihna an ni thei hial a, pakhatna a nih theih dan tur chu Bernard hotel an neih chiahin a ni

Mahse Bernard te hian tihdan hran an lo nei ve a, chhungkua ah chauh neitu nihna an chhawm zel dawn a ni. An company a neih theih dan tur chu Vanessa a nei chauhin a ni ang

Chu erawh a harsa lem lo. Vanessa nen hian ni, ni lo ang renga awm an ni tho a. Hmangaih a nei tawh dawn chuang lova, nupui lo nei pawh nise amah phurna pe tu tur a tawng tawh dawn lo

A thil tum chu Starck Corp a chung bera hlan kai a ni tawp. Justin leh a pa anga hmangaihna hmachhuan a ni ve tawh lo. Kum hnih chhungin chu chu a zirchhuak

A tumruh em em a, Vanessa lahin neih a lo inhuam bawk nen. Engkim chu a awlsam vek. A hualnu zungbun tur pawh a en peih lo

Tichuan le, kum tam tak a hmeichhe zawn ngei mai chu a hmu ta. Tuna a nihna nunrawng taka siamchhuaktu ngei kha a ni

A chhan pawh a hre chuang lo. A chhungrila a thup bo tawh a rawn kai chhuak leh tlat. A thil lo tum lawk Vanessa Bernard inhualpuia sawm pawh a kaltlang pui leh ta lo

Julianne inhnit hrawih ri a hriat chuan bang ngheng in a ding reng a, a thinlung a tih nem sak leh vek

Tu hmeichhia vang mah hian a ṭap ngai lova mahse kum sarih hnuah amah vang bawkin a mittui a rawn luang leh tlat

Kumkhuain a ta turah ngaiin a bula awm reng tur emaw a lo ti a, inneih a sawm thlengin a hnial lo mawle

A tuk zingah pawh khan a nihna diktak hrilh a, engvanga khatia ti mai nge a nih chhan te hrilh vek a tum a, a hmangaih thu thlengin. Paris ah cheng hlen ve mai tura sawm te kha a tum mawle. Hna a duh pawhin a zawn sak anga, hotel enkawl thleng pawh khan zawnsak a inhuam vek. A kianga a awm dawn phawt chuan engpawh thawk sela a ṭan tlat anga, zan hun an hmang dun leh ṭhin anga nupui ah hial neih kha a tum a

Mahse zing a thawh chuan a lo awm tawh lo. Engmah hnutchhiah a nei lo. Ngaihdam dilna lehkha tih mai loh chu

Khawpui chhung ah a zawng a, hotel aṭang a lo chhuak tawh bawk. Thlawhna chhuak tur pawh a check vek. Engmah a hmu chuang lo

Kum tam tak chhung a zawng a, Europe pawh a dap chhuak vek. States lam thlengin a entir leh vek. Arabella Adams tih chu an hmu ṭeuh a, mahse a zawn ber an ni lo

A ṭhian ṭha ber thi ang maiin a sun reng a, chumi hnu chuan a thinlung kawngka a khar hmak

An chhungkaw peng pakhat a lo ni reng a, a ni lahin a hre der si lo. Justin a te chhungkaw inhmuhkhawm leh party na ah hian a hmu ngai miah si lova, Gian a phirpui pawh an sawi lang ve ṭhin a, Arabella Adams kum tam tak chhung a lo zawn kha a ni ang tih reng a ngaihtuah pha lo

Tunah chuan a hrethiam ta

Paris a an intawn lai khan pasal hual a lo nei reng tawh. A zahpui a ni chiang mai. Chuvanga tlanbo pawh chu a ni reng ang

Jin hian hmeichhe chi hnih huat deuh a nei a, a pakhatna chu rosum duh em em te an ni a, pakhat leh chu mi kawp ching te an ni. Mi thinlung infiam nan an hmang a, an tihkeh sawm sak vek ṭhin. Rin ngam an ni lo

A khawvel zawng zawng pek pawh a hreh loh laiin ani chuan a pasal neih hma nawmchenna tur a lo zawng reng chu a ni awm si a, mawl a inti takzet

****

End of 10

CHHUNZAWM LEH TUR