CHAPTER 9
Ka inrin hman hma a min rawn kuahtu avâng chuan hamhaih zet hian u Remruata chu ka ena, a lo meng rum lutuk ka hmuh rual chuan Hmingthana chu ka namsawn ta vata “Ka rawn haw chiaha, ka ngai ṭhin lutuk che a sin. Hei hi tunge a?” tiin u Remruata chu a ena, a nilah chuan a lo melh tur khui mai.
Engvanga mengrum em em nge a nih ka hrethiam bik lo e a “Chutiang sawi ka tum lêm lo, kal ang” ti a u Remruata pan ka tum chu min lo dan leh avâng chuan lâwm lo zet chuan ka ena. Ka lo hmangaih tawh ṭhin a, a kiangah pawh ka hlim ṭhin bawk, mahsela kha thil ka hmuh aṭang kha chuan a laka lêt leh tawh lo turin thutlûkna ka siam a nihkha, chubâkah pasal ka nei tawh bawk.
“Engkim ka siamṭha leh vek ang, bul ṭan leh ang aw. A hma aia nasa in ka duat tawh ang che, min la hmangaih ve reng tih ka hria, hetianga awm hi i duh bik lo. Chuvang chuan khawngaihin hun min pe leh rawh, a hma aia hlim khân ka siam ang che” a rawn tihrual chuan u Remruata chuan a kut chu a rawn vai sawn dawrha.
“Ka nupui hi i kut hmawr pawh khân tawk tawh suh ang che naua, rawn hnai tawh hlek suh. I tawh leh rualin i kut kha ka elh tliak ang” chang fak hian a ti chhuak deuh hrawka. A bek chu a pawng ṭawlh ṭawlh a, a thinrim hle tih ka hre thei, chutianga a rawn che thut chuan keilah min ti hamhaih.
Mipa in min biak pawhin hetiang hian a awm ngai siloa, tûn ataka hetianga a awm hian mak min tih tir ve lo theilo. “Enga! Nupuia maw? Enge i sawi awmzia? Nunu pasal i nei tawh tihna maw?” hamhaih zeta min en chunga a rawn tihchuan ka bu nghata.
“Hei hi ka pasal u Remruata a nih hi i chhungte'n an hrilh lo che em ni? Kumin kumtir khân kan innei alawm, kan kal phawt ange. Khawngaihin mi zîngah kha emaw mi hmuh lohah pawh nise khatiang nunhlui avâng chuan beiseina nei tawh suh, pasal ka nei tawha. Tin, nangpawhin kumthum liam ta ah khân i duh i thlang tawh a nih kha, u Remruat kal ang” tiin inchungah chuan ka luh pui ta daiha.
Ka naute lo awm chu sarzuk kan lawh tur thu hrilhin kan chhuak lehnghala, an hmin dum tawh bawka an thlum tui viau in ka ring.
Huanah chuan lût thla in sarzuk lo hmin tuar chu ka lo zui malh malha, rilru kil khatah erawh chuan Fela thusawi kha ka ngaihtuah lo theilo. Ni e, ka la theihnghilh famkim bik lova, ngaihzâwng nei loa ka awm reng chhan a ni bawk.
Ka tleirâwl chhuah tirh aṭanga ka star tawh a ni a, min duhthu a sawi ni phei kha chuan ka hlim hle rêng a nih kha. Mahsela tûnah erawh chuan ka laka a rilru put hmang ka hrechiang tawha, kîr leh ka tum tawh lo. U Remruata nên kan inṭhen a nih pawhin a ni hnênah kher kha chuan ka kîr leh theih ka ringlo.
Tûn thleng ka hmangaihna a la reh lova, ka duhna pawh an kiam hek lo. Mahsela ngaidama ka pasal phatsan tur khawp chuan ka mawlin ka hmangaih tâwk lo te pawh a nimahna. A kiangah khan ka hlim ṭhin zia pawh ka hailo, mahsela na leh tur leh ka pasal hmuha tlâwm tak leh tenawm taka awm ka duh lo.
“Khapa kha i bialpa hlui maw?” a rawn tihchuan ka bu nghata, chutia ka lo aw mai chu a lâwm loh hmêl viau lehnghâl. “Tinge engmah i sawi ngai loh? Khapa nên khân nunhlui in lo nei reng a maw?” a rawn tih leh chuan ka thil lawh lai chu duhtawkin alamah ka inhera.
“Kan inneih hma thil leh in ina ka rawn awm hma ami tawh a nih kha, nangpawhin nunhlui chu i nei ve ang chu. Bialnu te pawh, khatiang ang chiah kha a nimai, sawi fo ka duh lo, ka nunhlui tawh a nihkha” tiin ka kalsana, hetianga min tih hi ka duh miahlo.
Hriat chhuah fo na tur neih ka duh hek lo, tûnah lah Pune aṭangin a rawn haw tih ka hre chiang tawh bawk si nên min tibuai tlat ang tih ka hlau. A mizia ka hre chianga, pasal ka neih mai avâng hian a duhtâwk mai ka ring lo bawk, u Remruata nên lah kan in pawh lêm siloa, ka lakah a lungawi lo reng bawk si.
Kan in kan thlenga ka nau pawh a rawn phei ve nghal bawka, vawiin chu a lo inhralh ṭha viau a niang a rawn phur viau lehnghâl. “Ka haw phei ve tawh ange, rawngbawl ka va puih loh chuan in lo haw tawh tho a, nangmahniin lo ti mai rawh u aw” tiin a haw zuia.
Mangṭha in ka indah fel mawlh mawlha “Let leh i tum êm lovang chu maw? I hmangaih ṭhin viau a ni âwm a, kha nangmah phulo in a ṭha a nih kha“ a rawn ti kher chu rum zet hian ka melh kha kha a.
“Enge i hriat tehhrepa? Kei hi ka hmelchhia in ka ṭha lo i tihna em ni? Ni e, i bialnu te ang chu ka nilo mai thei, mahsela an ni aia zahawm ka nih hi, i kawppui te ai fe kha chuan a lêt tam takin ka ṭha zâwk. Khatianga min sawi khum reng kha ka ngailo, i duh chuan i la ngaizawng thei alawm, enga tân mah ka ti tehhrep love” ti hlakin pindanah chuan ka luhsana.
Mi mah in ngaihtuah buai lai laia khatiang zawnga min lo perh kher khân ka thin a tirim a ni ber mai. Mâwl lutuk mai “A nihchuan kha pa nên khân in in kawp ve anga? Chutiang chu maw i duha? Pasal nei chunga bialpa neih chu a nawm dâwn khawp chu” tiin a nui deuh haka, a nuih dân lah chu a ngeiawm in min nuihsawh tih a chiang reng.
“Remruatkim ngawi hmak rawh, ni e ka hmangaih ṭhin alawm. Mahsela hmeichhe dang mutpuia min phatsan tu lakah kîr leh ka tum tawh lo, rawn sawi tawh hlek suh, engmah i hriat loh chuan sawi ve tawh suh ang che” ka ti ta tawn tawna, ka insûm thei tawh lo a ni ber mai.
Khatih laia ka natna te kha an rawn kîr leh nimaiin ka hria, mipa dang ka la lût theiloa. Min phatsan chung pawh khân amah tho kha ka la thlang fan a nihkha, mahsela tûnah erawh chuan min hmangaih lo tu leh min phu miahlo tu tâna rilru leh thinlung pêk reng kha a ṭhat loh zia ka hre tawha, na chung pawha tawrh tlang ka thlang zâwk bawk.
Ka thusawi avâng chu nge min en reng ringawta, engmah sawi duh tawh lo chuan inthlâk mawlh mawlhin inbual tur chuan ka chhuahsan ta daiha, chên dun reng chuan taksa pawh thup sen reng a nih bik loh avângin ka zak buai duh tawh lo.
Ka inbual zawha ka va luh leh lai chuan khumah ṭhu in a phone a lo khawih mial miala, min be lo chuan inthlâk ve mawlh mawlhin bualin lam chu a pan ve leha. Kan inhau nasa bawk nên keipawhin biak ka châk vak lo, Fela khân engtin nge a ngaih ang ka hrelo, a hma kha chuan inneih ve ngei te pawh kha kan tum ṭhin a.
Ka ringin alakah chuan ka pangchang em em a, keiai kum thuma upa a ni nângin ka u ngai meuhlo a, kan nih aṭang phei kha chuan a hmingpum lawlh lawlha koh te kha ka uar thei hle a nih kha. Mahsela a reia, kei min duhkhawp lovin kan khua a hnathawka rawn awm Primary zirtîrtu nên an lo chesual lai ka hmu a nih kha.
Ka mitthlaah chuan hun kal tawh chu a rawn lang zut zuta, khatiang kha thleng lo sela chuan tûnah hian kan innei tawh mahna. Mahsela Pathian remruat zâwk te pawh animahna, a ṭhat loh zia a hun takah hriattir ka ni kha ka lâwm leh hnu hnawh, a ni kha chuan inṭhen kha a duh hauh lova, mahsela min phatsan tu na na na chu vawn reng ka tum loh avângin a beidawng khân vai ram a pan ta kha a nia.
Thâwm rawn awm huk avâng chuan pindan aṭang chuan ka chhuak ta vata, chutah tlangvâl ti ila rawlthar rual rawn lût chu ka lo en haw mai. “U Remruata a awm em? Inkhelh kan rawn sâwm a nia, amahin min lo sâwm rawh u a tia, khawiah nge a awma u Nunu?” Siampuia chuan min hmuh rualin a rawn ti nghal bawrh bawrha, hêng ho nên hian engtik laiin nge an lo inhriat ni?
Mahni rual pui deuhte kawm ve âwm, a aia naufe a kâwm khâwm tih hriat reng. Chuti nilo se an rawn kal tawp lovang “A inbual a nihkha, lo ṭhu rawh u a rawn chhuak ṭep ang. Vawiin tlai chu kan buai riau a sin, a inkhel hman dawn em ni? Dâwr nghah angai bawk si” ka tih lai chuan bualin kawngkhâr chu a rawn inhawng ri rawka.
“Ka hman, i nau a inhralh ṭhat viau kha tlaiah chuan hawng tawh lo mai rawh. Zânah kan hawng mai dawn ania, ka rawn haw har lo ang kan inkhelh pui ange” tiin a sam hruk hul mawlh mawlh pah chuan pindan lam bawk chu a pan leha.
Towel a venga, a taksa dang erawh a ruak kang thung. A hmelṭha in a pian hi chu a nalh thlâwt a lawm, ka mitah mai nilo a mipa puite pawhin an thik tham khawpa pian leh hmêl nei fuh a ni, a sâng thlarha. A taksa a inkhaithli zaih mai bawk, a mitmeng rum lam mah te chuan amah a ti mawi zuala, a lu meh dân te thleng hian ka duhthusam thlap a ni.
Keichu mipa ka en chuan an hmel leh an lumeh dân a inhmeh em tih hi ka en hmasa ngei ngei ṭhin. Mipa lu meh dân mawi hian min hip ka ti lo theilo, an hmêl a ṭhat tel ngat phei hi chuan hmuh hi an nuam zual êm a sin.
A rawn chhuah leh chuan inkhelh thuamin a rawn inthuam thlapa, field kan hlat lêm lova. Ka dang lui duh ta lo, an chhuah hnu chuan rawngbawl ṭan mawp mawpin hla play chung chuan ka lâm paha, mahnia awm hi chuan hla ngaithla chunga lâm hi nuam ka ti ṭhin, rilru hah te hi a chhâwk ka ti ve tlat.
Rawng ka bâwl zo ṭep tihah kawngkhâr chu rawn inhawngin u Remruata emaw ti a ka en phei ruala Fela zâwk a lo nih avâng chuan ka ding khawng nghal awta. Eng vanga kan in thleng thlenga rawn kal nge maw anih le?
“Enge i rawn tih dawn?” tiin chawhmeh chu ka siam zuia, a rawn kal hnai tih hriat tak hian pên ri ka hre zuia. “In bia ang, i pasal hi ṭhen la ka duh. Nangmah neih tumin asin ka rawn haw ni, hetiang hian awm lo teh ang, a hma ang khân awm leh ang. In pa pawh hmeichhe dang a kawp ṭhin tih ka hria a nia, hetiang mi neih ai chuan ṭhen la keimah nên innei ang, iaina che ka la nei miahlo ania, Nunu khawngaihin bul ṭan leh ang” tiin beiseina a khat mitmeng chuan min ena.
“U Fel enge i hriat chu ka hrelo, mahsela ka pasal hi ka ring tâwk ani. Khawngaihin min rawn tibuai tawh suh, nang pawh enge i nih bik? Nangmah avânga inṭhen kan nih kha i hre lo em ni? Hetiang thil zawng zawng a thlen tawh hnuah khatiang thu kha ila sawi thei amaw? I mak hle mai, khawngaihin nunbul ka ṭan tawh min rawn tibuai tawh suh” ti a a kut min vawnna lâksak ka tum lai chuan min rawn kuau thuta.
Awmsawn ka tum pawhin ka thei der lo, nghet taka min kuahna chu phelh tumin ka bêng vak vaka, mahse a ni mipa tha chu hneh lo tak ka ni.
Thawk leh khatah ka hlatah awmin a ri nghal sawka, u Remruata thinrim tih hriat taka lo ding leh chhuata Fela tlu reng ka hmuh rual chuan ka lung a phu nghal dawt dawta. U Remruata lah chu inkhel zo tih hriat takin a thlan hlapa, a rawn thlenna a rei lo tih ka hre mai, chutianga min rawn hmu chu ka inthiamlo takzeta, Fela pawh chu ka ngei hle bawk.
Chhuata a mu reng chu a chhuih zui leh ṭawk a, khawih leh mai a tum lai chuan ka pawm bet ta tawpa, a kutthlak ana si a a khawih hlum mai ang tih ka hlau.
“U Remruat duhtâwk rawh” ka tihlai chuan ṭhenawm khawvengte an rawn lût a, an thil rawn hmuh avâng chuan an meng phâwk hlawm em em mai lehnghâl.
“Nunu enga tinge, ehe! Hmingthana elo? Enga tinge a?” an rawn ti zung zunga, “U Fela khân min tibuai deuha, kan pa rawn haw in a hmu ta sia an buai deuh anih kha” tiin u Remruata la chêt tum ut ut reng chu ka pawm bet tlata.
Hetianga a awm hi ka beisei pha lova, mahsela ka thlavang a hauhna erawh chuan ka lâwm viau thung. “U Fela hi haw pui mai teh u” tiin u Fela rawn tho chhuak mek chu ka ena, a ni lah chuan u Remruata chu a rawn cho leh hrâm a.
A ni lah chuan thlah turin min ti ve sek bawk “Pa Lian lo chhuahpui phawt teh u, khawngaihin” ka tih tâkah chuan Hmingthanfela chu an chhuahpui ta veka, mi ṭhenkhat erawh la awmin thil thlen dân chu mi an zawh reng si avâng chuan ka sawi hma loh an haw dawn lo tih ka hriat avângin thil thlen dân tlângpui chu ka sawi thuak thuaka.
U Fela nêna kan nunhlui hre vek tu an ni bawk a, thildang sawi belh tawh lo chuan an haw zui ta hrâma. U Remruata la rum nghut nghut chu enin “Insum ṭhin rawh, khatiangte chuan i khawih na mai dawn a sin. A chhungte'n thubuai an thehluh vaih chuan buaina siam hmasa nimahsela i khawih nat lutuk chuan thiamloh kan chang daih thei ania” tiin a kut chu ka en saka.
U Fela kha a hnek na thawkhat bawk aniang ama kut pawh a sen vek alawm, hmeh sakin ka hau pah mawlh mawlha. “Ila duh em ni? Engvanga ka awm loh lai khera rawn kal nge a nih? A ni bulah khân lêt leh i tum tihna em ni?” a rawn ti chu lâwm lo tak hian ka ena.
Chutianga kir tum ang maia min sawi reng chu ka lâwm vak lo “Engvangin nge ka kîr ngawt anga? Kir leh mai mai turin ka ṭhen lo, tin, pasal ka nei tawh khatianga a ni rawn lêt avâng ringawta kir ka tum lo. Sawi tawh lo la ka duh, i sawi fo hian ka tân pawh a hrehawm tih hre rawh, ka lo hmangaih ṭhin alawm. Theihnghilh a har tur zia i hrethiam kher lovang, mahsela kîr leh tur khawp erawh chuan ka hmangaihna hi a awm tawh lo pawh animahna” ka ti fak fak a.
“Tunah ila hmangaih em?” a aw chu a zâwi tawh hle a, a inthlahrun avâng nge pawh ka hrelo. Amah ka en rual chuan a mitmenga natna lang chhuak avâng chuan ka âng pama, engvanga hetianga nat hmêl taka min en nge a nih?
“U Remruat” ka ti ta hapa, engtia han chhân tur nge ka hrelo, ni e tûnah rihchuan a mah a rawn lang leha. A hmasa ber a lo nihnaah khân ka rilru ah a rawn thar leh lo theilo, mahsela thutlûkna ka lo siam tawha, sawh sawn ka tum miahlo thung.
“I sawi theilo a nih kha, a ṭha alawm” tiin min kalsan ta daiha, a awmdân chu ka en tawp ringawt. Ngatinge ka chungah khatianga a thinrim viau mai le, thikna avâng ti dawn ila min duh loh zia hrechiang tu ka ni bawk si.
Engmah sawi tawh lo chuan chaw ei chu ka siam zui ta mial miala, ngawi renga ei dunin mi pawh a melh tawh hauh lova. A hmêl tûm bûr rengah chuan enge a ngaihtuah pawh ka hre thei lo, mahsela hetianga awm reng hi a hrehawm ka ti ṭhin.
“Kan lo lêng” ka ṭhiante ho rawn lût chu ka pan hnai vata, chutah Ruthi ka hmuh tel phei chuan ka au chûl mai “Engtikah nge i rawn haw a? Enga tinge engmah min hrilh loh?“ tiin ka kuah nawk nawka, kan ṭhian ho hi panga kan ni a. Lehkha zir in an awm bo deuh veka, Dorothyi leh Ririi nên khuaah kan awm tlawng a, Amuani erawh hna a neih tawh avângin khawdangah a kal leh tawh kha a nia.
Ruthi hi vairamah lehkhazirin a awm thunga, phone aṭanga kan in bia a nih loh chuan kan in hmu khât viau bawk nên chutia an rawn haw thei chu ka lâwm takzet.
“Vawiinah khân, i ex pawh ka hmu ania aw. Taka hei hi em ni in pa chu?” tiin kan bula u Remruata lo ding ve reng chu nui sângin a chibai zuia “Kha hei hi inneih thil pêk a nih hi, ka rawn haw vat theiloa. Tûnah chuan khuaah hian ka awm ve reng tawh ang, ka kal peih tawh lo. A lum bawk si a, chubâkah ṭhiante hmu pha lo a awm reng chu a hrehawm helamah hna te zawng ve zâwk ila a ṭha ang” a ti zung zunga.
Bedsheet min pêk chu la in lawmthu te chu ka hrilha, “In awmna chu a nuam bawk em? Mizo in tam dawn bawk sia a nuam viau zâwk lo em ni? Khulama awm te chu a Mizo awm chhun in inkawm khâwm ṭhin bawk sia” ka tihchuan a nui deuh haka.
“Kawm hleihtheih pawh an nilo, party an uar bawk si a. Ka peih ve ngailoa, ṭhian pawh ka kâwm vak lo, bâkah an sawi ṭhin hi in hrelo em ni? A ṭha tam tak awm ve mah ila Mizo hmeichhia chu kan lo mak tak tak a ni, Mizoramah kan han awm lo chiaha ka kal thlâk pui te ho pawh kha tûnah chuan vai nên an in ngaizawng fur mai, an ni lah sum an nei thei sia. A duh tân chuan a nuam ang, ka rêl nilo sela kan hnam humhim nân pawh ka support ve thei tlat loa, ṭhian pawh ka neih lutuk loh phah reng a nia, a zawng zawng chu ka tiloa. Mahsela tam tak hi chu hnamdang laka in phalrai leh fa ti tla te hi an awm leh nawlh zel ania“ tiin ner sak sak hian a sawia.
A sawi chu ka lo hre ve tawh, mi hian an lo sawi chhuak ve zel si a. A lehlamah chuan Mizo nula te hi kan hnam timualpho tu chu kan niin ka hria, tûna social media a darh mêk te hi a zahthlâk takzet, hnamdang kan ngaihsân lutuk na lamah leh sum duh lutuk na avângin kan zahawmna kan hralha, hnamdang lahin midang an hnam pui vek te lakah an sawi darha.
Tûnah phei chuan Mizo hmeichhe inzuar tam zia leh rapthlâk zia an rawn sawi piap piap ngam tawha, media ah an post thûl. Hmeichhia zel hian kan hnam chu kan timualpho a nih ber hi, Ruthi sawi pawh hi ka ringhlel lêm lo, Mizo chu kan incheina a sâng bawk si a, incheina ṭha awh avâng ringawt pawha mahni inzuar duh tleirawl te thlengin an awm nuk tawha.
Chutih lai a karin a lo dawr duh zîngah mi pasal leh ram hruaitu hlun pui pui an tel leh nulh ṭhin tih an sawi rûk te pawh hi an demawm ka ti ṭhin.
“A ṭhat chu an sawi hi ka lo hre ve ṭhin a, a awm ṭhenkhat lah hian in sawifiahna tur an hre theiin an rawn in ṭan ve tum hrang bawk si a, tûnlai khawvêlah thudik aiin dâwt a lala. Thudik sawitu chuan huat rawn an hlawh zel bawk nên tumah hian zilh haua, an nun ṭha lo sawisêl sak pawh an ngam vak tawh lo a nih hi. Mi ṭha lo an nundan in hmeichhe dangte a tih mualpho em em kha miin han zilh dawn se in la piang thar fahranin an ṭhiante leh tutu te emaw chuan an lo pui duh zel hian mi awm ṭha duh lo te hi a ti huangtau zel anih hi” Dorothyi pawh chuan a lo ti ve a.
Kei erawh engmah ka sawi ve duh vaklo, u Remruata awm dân chuan ngaihtuahna a tibuai ru tlata. A nu leh pa bulah thil a nilo zawngin a lo sawi mai ang tih pawh ka hlau, a nu leh pa lahin ka lakah rinna an nghat nasa si a, an rinna tihchhiat sak tu ka nih chuan ka inthiam thei dâwn lo.
Ka ṭhiante chu an duhdân chuan an che bawrh bawrh renga, eitur an rawn ken chu siam in u Remruata chu an fiam zauh zauha. A ni pawh mipa fing tih takah an hmuh lai chuan hmêl hlim tak a chhuah, a nelawm thiam hle lehnghâl.
Hetiang hian ka bulah nuisâng reng thei sela ka ti, ka lo en leh vang vang ṭhin. Tûna ka pasal lakah hi chuan a hmêl leh pianah chuan sawisêl tur ka hre miahlo, mahsela min hua in min ngei êm êm bawk si a, ka tân chuan lo biak ve vak ṭhin pawh hi a nuam chiah lo.
Ka pasal mah nisela ka zah ru tlata, biak bawrh bawrh hi ka thinrim lai leh amahin min bia a nih loh chuan ka ngam meuhlo.
An thil rawn ken ei pah chuan kan titi a, “Thingtlang a lo nei zawkin chapcharkut pawh kan hmang ngailoa, chutah chapchar kut miss lah a hmelṭha ṭha leh no nalh nalh an thlang leh bawka. An miss thlan chhuah a te lah hlo vawikhat pawh la thlo lo, tuthlawh takngial pawh la hûm lo tur an ni fur lehnghala, hmanlaiah khân pi leh pute hian an thlang ve ngai dâwn der silo, a thu hrimah hei hei pawh hi hnam thuam an duh duh kawrah an bel leh tawh hi, chutah Chinese emaw an inti nge Chinese kut angin dragon lam te an la show thûl, hetiangte chuan Mizo kan nihna a bo tial tial anga, kan hnam thuam pawh bo in kan inṭial nuk mai dawn anih hi, keichu tûnlai ṭhangthar kan in tichangkang lutuk hi ka duh miahlo, ṭhat na nei bawk mahsela mi ram chuan an hnam rohlu, an pipute ro chu an ti ki kawi kual ve miahlo ang. An hlut dân te hi mi hmaah an lantir chur chur zâwk ania, Mizo ve chu hnamdang thil kan uar a, hnamdang design kha kan hnam thuam ngei ngei ah kan bela, sap kan ngaisang si, an ni lah hian rawn lar nân leh pawisa lâk luh nân bâk min hmang lo tih te hi hriatawm, chutih a hnekin kan lo pak huam huama, an rama kawtthlera mi kalpelh mai mai kha Pathian biakin kan be lo chauh zel ania, in enfiah hi chu kan ngai ve bawk a ni” Ruthi bawk chuan a ti leha.
A thil hmuam nên zawng zawng a ṭawng bawk nên a nuihzatthlâk zâwk. “Hmeichhia zel hi alawm, hnamdang mipa hmu ula an hmelchhia emaw ṭha emaw inlo pak huam huama, Mizo mipa neih tlâk an awm lo chuti khati de de de dei in ti leha, hnamdang in han neia, putar pui pui leh thau pui pui inneia, a changkâng chin tal te hi nei ve ula” u Remruata chuan a rawn ti ve bauha.
Ka ṭhiante chu an ner nasa mai “Teuhlo e, neih tlâk an awm lo kan ti ve leu. Keichu hnam ka hmangaiha, ka hnam a bo loh nân chuan ka hnam mipa ngei ka nei ang. Hnamdang neih lo in tih theih pui a, a nei duhlo perh rawn vak vak te hi a ṭhing, a nei duhin nei sela chutih rual erawhin hnamdang an neih chuan an pasal hnam kha ṭawm mai sela, social media a rawn ṭawng vak vak ho te hi ka ngei ania, an zak silo hnial khân an hre bawk si a. Keichu Mizo nu, Mizo ah pawh thingtlâng nu ka ni a, ka pasal tur atân mahni hnampui nilo neih ka tum mai mailo, mahni hnampui, mahni chi pui leh engkim a inmil sa neih hi ka tân a ṭha e, ka va sawi ṭha tak em” tiin Ruthi chu a nui huah huaha.
“Henu rawn haw hlim hi hnam a rawn vei thar a nih hi a” Dorothyi chuan ner nawngin a rawn ti a. “Vei ve ang chu, a tak ngeia hmu a chenchilh tu ka nih hi, ka hnampui ngei an han inzuar hi chu maw ka zakin ka rilru ana ngawih ngawih. A tak ngeia han awm tâkah chuan e hnamdang hian mutpui atân chauh an lo duha, a rûka min nuih nasat dân hi hria in hmu ve ula in zak ve tho ang, chuvang chuan khawi maw theitui hi in ṭeuh ang” tiin a inzui nghal khawlh khawlha.
“Haw tawh ang u a tlai tawh, keini chuan kan nun uluk ila pasal ṭha tak kan la nei mai ang. Hmelṭha chiah zawn tawh loh tur, tûnlaiah chuan a hmei a pa hian kan sual tawhin lerh tak tak leh nun ṭha lo tak tak an tam si a, chuvang chuan hmêlah nilo in thinlung leh rilru a pawimawh ber tawh, Nunui hi chu a vânnei a nih hi” tiin an inzui chhuak diah diaha.
Kan thil eina chu seng felin u Remruata lo awm ve reng chu ka in dah fel zawh chuan kal pelh tumin chak zet chuan ka kal a, mahsela min rawn zui ve avâng chuan ka en deuh haw mai.
Kawngka chu kalh te te in ngawi reng chuan pindan lam kan pan duna, khumah kan mut rual chuan zandang ang lo takin min rawn kuaha. Chu thil ka hriat rual chuan ka khawng deuh awt mai, a taksa lum ham ham te. A thawk zawnga ka biang vêl rawn lum leh pap ṭhin te chuan min ti khur dar dar mai.
“I ṭhiante chu an thusawi kha a dik hle mai, mi inchhiar zau leh hawi zau tak an nih dawn kha” a rawn ti a, ka chhâng lo. A chêt dân chuan ka awmdân a ti danglam hneh lutuk tlat, hetiang hian engvanga awm nge maw a nih le?