LET's LOVE AGAIN BY Ziki_nu (Completed)

[ngaia]

LET's LOVE AGAIN




By Ziki nu



Chapter-10



"Inleng I nei a ni maw" tia min rawn en in a then sak a, Nunpuia zawk chu en lehin a ngawi vung vung a, chhan ngaihna pawh ka hrelo.



"Ka haw dawn chiah, hei Sawmi, inleng I nei dawn anih hi, lut tawh rawh u" tiin Nunpuia chu a rawn leh hawi zawk a, keichuan Rintea ngawt ka la en thung.



"Ka lo kal hun hi a fu vaklo zawk anih ka ring, ka let zawk ange" tia inher leh mai a tum chu ka lo ko vat a, "A haw dawn chiah alawm" zawi sapa tiin ka kun ngal a, min ngaihdan a diklo sa tih ka hriat vang anih ka ring, ka awmdan chu ka fimkhur hle ringawt mai a ni.



"Ni e... Thil pawimawh ah ka kal lawk a, hei ka haw dawn chiah anih hi" Nunpuia chuan ti sawk sawkin a kal zui nghal a, Rintea a kalpelh dawn chuan a muang chang deuh tih pawh ka hria, sawi a nei a, mahse eng nge a sawi tih erawh chu ka hre pha ve tawh lo thung.



Nunpuia kal liam hnuah pawh chuan a dinna ngaiah ala ding reng a, "Lo lut la" tia tîm zeta ka sawmna chu hria ang pawhin a lang lo.

"Rinte" ka tih leh takah chuan thaw chhuak hakin a rawn pen thla a, a hmelah chuan phurna a lang lo a, peihlo chung chunga rawn leng tur hi a ang ber zawkin ka hria.



Inchhungah chuan ngawi rengin kan inzui lut a, sana ka en chuan dar 9 a lo ri teuh tawh viau mai.
"I lo kal dawn tih I sawi lawk si lo a" za lo deuha nuih sak pahin a bulah cuuan a thu thla ve a, "Nia.. A zialo khawk mai kha" a tih chuan min tawng el deuhin ka hria!



"Nunpuia anih kha, kan kawmthlang lamah khuan an awm a, inkhawm banah a lo kal lawk anih kha" ka lo ti zung zung a, ka insawifiah nghal ringawtte chu a chhan ka hre bik lo.



A lo nui suk a, "Ka hria alawm" tih zawnga min chhanna chuan min ti bangbo lek lek.
"Engmaw i hriat?" ka ti let ha a, "I bialpa kha" a tih chuan ka melh deuh hrak mai.


A thilsawi awihawm loh lutuk vang chuan ka nui chhuak hak a, a ni erawh chuan ngawi rengin min lo en ran thung a, eng emaw ka sawi hun nghak ang mai a ni.


"Nunpuia kha ka bialpa a nilo" ka tih chuan a lo nui suk a, a hmelah a awihlo hle tih a lang reng, "Ngatinge ka bialpa ni tura I ngaih tlat a, tun maia I thil hmuh vang khan ka lakah ngaihdan siam nghal miah suh" ka tih leh lai chuan "Chu chu ka duhdan alawm Malsawm" a lo ti chang bawl mai.



A awri nelawm loh zet vang chuan ka tîm leh deuh a, mahse a rilru dik tak hriat ngei ka duh avangin ka inti chak lui hram hram zawk a ni.



"Anih chuan tinge?"
Ka zawhna chu min chhang mai lo, min en vang vang a, a mitmeng atang ringawt pawh hian thil tam tak ka ngaihtuah chhuak tih a hre âwm tawp si lo.


"I chanchin ka la ngaihven reng thin Ti ila min awih angem?"
Rei tak a ngawih hnu chuan a rawn ti ve ta nge nge a, "Eng nge I sawi awmzia?" ka lo ti vat bawk.



"Malsawm.. Ka ngaihven reng thin che" a lo ti nawn leh ngat a, rinhelh rual a ni tawhlo tih ka hria.

Sawi tur ka hriat miau loh avangin ka bu nghat ringawt a, thaw chhuak hakin thutthleng nghenchhan chu a ngheng ri dawt a, a rilru a buai ve hle tih pawh hai theih a ni lo.



"Ka sawi tawh kha... I hlim chuan a tha vek" a han ti leh khawl a, ka in up bet reng thei tawh biklo.


"Rinsangzual" ka ti halh a, min rawn melh zawkin a hawi sawn leh thuai thung a.


"Ka la beisei reng thin che.. Engmah sawi lovin I reh hmak a, mahse ka nghak reng thin che Rinte.. Min haw hle ang tih ring chung khan hmuh leh che kha ka chak em em thin a, I bula hun hman kha ka la duh reng" ka ti mawlh mawlh a, ka thil sawi zet chu aw...




A hmel chu ka en ngam lo a, min en reng tih ka hriat avangin ka thinphu a rang nghal zaih zaih bawk a, ka biang te thleng chuan a sa hat hat vek mai.



"Kan tawp dan kha I theihnghilh em ni Malsawm?"

A awri ah chuan thinrim aw a lang hauhlo a, mahse a chang tha khawl khawl hle thung.


Ni e... Kan tawp dan kha theihnghilh theih a ni miau lo va, khatiang thil thlen tir tu kha keimah ka ni bawk a, ka beisei thu ka la sawi ngam chu zaktheilo min ti viau ngei ang.




Tawi te hian ka nui sak a, "Theihnghilh lo e" tih zawng chu ka chhanna a ni mai...



Kum 4 lai a liam tawh a, kan inhmuh loh chhung khan thil tam tak chu a danglam tawh ngei alawm, kan nunphung a danglam tawh a, kan thiltih leh awmna hmunte pawh.
A ni pawhin thil tam tak tawnhriat a nei tawh anga, hmeichhe dang pawh tiamin.


Ka thil ngaihtuah vang chuan thawk ka han la leh hluai a, ka âwm chhung lah chu a tawt up up mai bawk si.


"Rinte.. " ka tih chuan min chhang lo va, mahse min en reng tih ka hriat avangin "Bialnu i nei leh tawh em?" ka ti leh sap a, inchhungah chuan banga sana chek ri karh karh bak chu thawm dang a awmlo.



Min chhan mai loh vang chuan a hmel chu ka en ta nge nge a, min lo la en reng a, a mitmeng atang ringawt chuan engmah ka hrethiam lo.



"A pawi hle mai" tih zawnga min chhanna chu eng a sawi tumna nge tih hrelo mah ila ka hnual nghal rawih rawih tho mai.


Mahse...
"Tumah an la awm leh lo" a tih leh chuan ka lo thaw hak a, kan inkar chu aw...


Thil tam tak sawi tur leh sawi duh kan la nei a, mahse sawi chhuah kan hreh ve ve ni ber hian ka hria.



Keichuan a duh anih phawt chuan bul tan that leh ka duh a, ka tihsualte kha siamthat leh theih ka duh takzet.

Engtik laiin nge ka mittui chu a lo luan hman ka hrelo, ka biang huh chu rang zetin ka tuai hul tawk a, mahse ka bula thu min en rengtu chuan a hmuh hmaih hauhlo ang.



Thaw chhuak hawkin a thutna atang chuan a ding vut a, a hmai chu tuai puatin a thaw chhuak leh ham ham thin a, insûm a tum ni berin ka hria.



"Min hrilh teh Naute... Engvanga khatiang thil kha ti nge i nih?"

A thil sawi vang chuan ka melh chho kar a, min lo en ve run bawk a, ka mittui vang chuan ka hmu phe deuh a, mahse a hmel tha zet mai leh pa hrak chu ka hmu chiang em em tho.



Tunah khan 'Naute' tiin min ko chiang a ni...


Eng chen nge khatianga rei khan min koh tawh loh ang le...
Kan inhauh chang te, a laka ka lungawi loh chang leh a thin ka tih rim changte hian insûm tum zetin 'Naute' min ti thin a, mipa zaidam leh dawhthei ngang a ni bawk a, sawiselna tur kha a awm ngai hauhlo asin.



A zawhna chu ka chhan hun a ngaichang reng tih hriat takin min la en ran a, thinrim hmel min hmuh lo naa, engkim hriat fiah vek a tum tih a hmelah chuan a lang reng mai..


"Ka... Englo.. "
Sawi tan mai dan tur ka hrelo, hun rei fe kan inzui hnuah ka then chhan kha a ho lam êm a, keimah chiah ka inngaihtuah vang a ni.


"Sawi rawh, ka hau dawnlo che" a lo ti leh sup a, a chet dan chu mak ti zetin ka lo en ha bawk, ka hmaah a rawn thu hniam a, ka malchunga ka kut chu rawn vawn hnanin ka mitah tak min en a, chutiang taka chiang chuan a rawn let leh hnuah a hmel ka la hmu lo.



A mitkhur thûk lam deuh te, a mithmul buk tha zet mai leh a khabe hmul rawn to siar siar te chuan a ti lang puitling hle a, ngenngawl zeta min enna mitmeng chu hai theih a ni lo.




Ka thaw chhuak suai suai a, "Min ngaidam rawh" ka ti ringawt chu a duhkhawp loh hmel kher mai.


"Kha kha ka zawhna chhanna tur a ni lo" tiin ka mitah tak min la en ran a, "Engtinnge ka sawi ang, I laka ka pangchan thin zia chu I hre vek alawm" ka han ti leh ngawt a, chupawh chu a la duhkhawp hmel chuanglo.




"Malsawm?" chang deuh mai hian a ti leh khawl a, ka mittui rawn hnâm leh tiam tiam chu a hmu aniang thaw chhuak hawkin a ding a, a dawhtheih tawhloh hmel takset.



Keipawh chu ding ve in "Khatih lai khan ka atchilh lo chauh che a, mahse biak pawh min be hman ngai lo a, neuh neuh I sawi reng a, zanah rei deuh deuh thlengin I chhuak ziah bawk a" ka tawng tawp lam chu a lawi tial rût tawh a, ka insum hman tawhlo reng reng.



Ka tap chhuak hawk a, min rawn din hnaih rawk rawkin a âwm si chet chuan min kuah bet a, engmah a sawi lo, mahse amah nghenga min pawmbeh ringawt pawh chuan ka thla a muang hliah hliah mai a ni.


Ka tah khum nghek ringawt chu ka inthiamlo leh hnuhnawh a, inlak hran mai ka tum chuan a theih hauh loh, nghet deuhin min la pawm bet reng a, eng emaw a sawi hun chu ka nghak a ni.




"Khatianga tawpna duhawm lo zet siam lo tur khan kan intiam a ni lawm ni?" a zawhna zet chu aw...

Chhang lovin ka ngawi reng ringawt a, ka darah rawn dawmin ka lak atang chuan a inla hrang hlek a,
ka mitah tak min en chung chuan, "A chhan dang a awm em? Thudik tak min hrilh ang che" a ti leh sup a, inthen ka duh thu ka sawi khan hetiang zawhna chiah hi min zawt a, ka riat nawi vel mai mai ringawt anih kha maw....



Ka lu ka thing a, "Khatih lai khan keimah chiah ka lo inngaihtuah a, min ngaihsaklo leh I laka pawimawh lo nia ka inngaihna te khan ka rilru a kal sual tir a" ka ti sap sap a, ka hnar thip hlar vang chuan ka tawng hleithei meuh lo a ni.




"Chhunah I buai a, zanah rei deuh deuh I chhuak leh a, ka tan khan hun I nei ve ngai lo reng reng, a hminga I bialnu chauh min nih tir a, min ngaihlu lo a ni" ka tih leh lai chuan "A tawk e Naute" a lo ti sup a, mittui kar atangin a hmel chu ka en tawk tawk bawk a, a ngaihtuahna chu hriat ve ka châk a ni.



"Min haw viau em?" ka han ti leh hram a, a lu chu lo thingin "Ka haw ngai lo che ka tih kha, ka dem miahlo bawk che" a tih chuan ka mit chhingin thawk ka la vang vang a, thutthlengah chuan min nam thu in a hma ang bawk khan ka hmaah a rawn thu hniam leh a.




"Ka ngaihlu lo che angah I ngai amaw?" tia a zawhna chu tawngkama chhang lovin lu ka buk khum nghat ringawt a, "I hresual anih chu" tih zawngin min chhang thung.



"I duh leh beisei angin ka ngaihsak tawklo che tih chu ka hria alawm, mahse ka ngaihlu lo che naga I ngai chu mak ka ti khawp mai" tiin eng emaw ngaihtuah mûk hmel fe hian a ngawi zui vung vung a, han sawi leh tur pawh ka hre tawhlo.



Ka thiam lo hle tih ka inpawm a, khatih hunlai khan a ngaihsakna ka phût luatah ka tana a thil tih zawng zawngte kha ka lo theihnghilh a, a thatna lai kha ka haidersak a ni.




A phone rawn ri chuan kan boruak chu a rawn thlak danglam chiang kher mai, a kekawr ipte atanga a phawrh chhuak lai chu ka lo en ve reng a, Rinfeli hming ka hmu ngei bawk.



"Aw.. " phone a lak rual chuan a ti nghql thawr a, lehlam a mi chu a ngaihchan vang vang hnuah "Malsawmi nen kan awm" a ti leh sup a, min rawn melh zawkin phone chu a dah nghal hmiah bawk.



"Rinfeli elaw.. Eng nge a sawi?"ka lo ti ve vat a, a phone ak tha leh pah chuan "A pawimawh lo" a ti leh ringawt a, ka zawt zui duh ta biklo.




"Khapa kha I bialpa a ni lo takzet maw?" kan ngawih vang vang hnua a lo tih leh chuan lo bu sawk sawkin "Ni miahlo" ka ti a, a lo bu ve nghut mai.


"Anih chuan I insawifiah ve deuh a ngai dawn anih chu" tiin min la en ran a, "Engthil ah?" ka lo ti ve vat.


"In bazar dun a, hotel ah chaw in ei dun bawk a, nichin lawkah I in atangin a rawn chhuak bawk a" inrintawk hmel fe hian a ti charh charh a, kan chhuahdun khât tehlul nen min hmu fuh thei lutuk hi a mak ka ti.


"Thawnthu sei tak a ni" ka tih chuan a lo ner sak a, a lung tih awiloh mawlh chu ka hlauh avangin "Mahse ka sawi ang" ka han ti leh hnuhnawh a,engkim hrilh vek law law ila, a awih leh awih loh chu ama thu thu a ni tawh mai.



Riny hman loh vanga min bazar pui anih thu leh thian kan nih vang chauha hotel ah pawh zui ve ka nih thu te, kan pahnih chauh kan nih loh ziate chu ka sawi mawlh mawlh a, chumi vang ringawta ka bialpa a nih loh thute pawh ka sawi uar khawp mai.



"A ni chuan I lakah rilru dang a pu a, chumi hre reng chuan I kawm zel tho a ni lawm ni?" a lo ti leh a, engtinnge heng zawng zawng ho a hriat vek theih bik chu le....

Chhang lova ka thaw chhuak hak chu a hrethiam a ni ang a nui leh suk a, "Mahse ka rilru te chu ka hrilh tlang vek alawm" Ka tih chuan zawhna mitmengin min lo en leh nghal a, "Mi pakhat ka la theihnghilh theih loh ka neih thu ka hrilh vek" zawi te hian ka ti leh sap a, amah ka en laia ahmel landan chu aw... Ka thil sawi vanga lungawi hliah hliah hmel ka hmu niin ka hria.





"Imm ka ring ang che" a tih chuan keipawh ka nui leh var var thei tawh a, sana chu thlek zawkin "A tlai tawh hle mai, mu tawh rawh" a ti leh nghal ringawt tawh a, a thutna atanga thawh mai a tum chu "Engnge Nunpuia khan I bulah a sawi?" ka lo ti leh hlut a, nichina an inkal pelh dawnah khan eng emaw sawi chu a nei chiang a ni.



Ka bul ami chu a nui suk duh chauh a, "I hriat ve a ngai kherlo" a ti chu ka ngaihdana ni vak biklo a, "Min hrilh rawh" tia ka pawh ngang ngang hnuah pawh "Mipa leh mipa chu kan inchingfel mai ang, I tan lo buai ve kher a ngailo" a ti tlat a, dam thlapin a sawi bawk si a, thinrimna tur thil chu a ni lo turah ka ngai.



A kal tur chu kawngpui thlengin ka zui chhuak ve leh a, a awm reilo ka ti takzet. Zep leh thuo then tam tak a la awm, aheng zawng zawng hi sawichhuah vek tawh ka châk a ni. A ni oawhin ka lakah engmah zep lo se la, kan inkar hi siamthat theih dan a awm tawh lo anih pawhin ka laka a rilru put dan chu hriat ve ngei ka la duh tlat.




A kal liam hnua ka let thla leh lam chu U Mazari'n min lo koh vangin ka lut kawi leh a, la phiarin amah in a lo la meng ve reng chu niin.



"Nunpuia ami lo leng a?" a tih chuan nui chungin lu ka thing a, zawhna a ngah hmel nghal khawp mai.
Mahse Rintena chungchang chu engmah ka la hrilh duh rihlo a,nakinahk kan inkar kan tih chuan hunah chauh hrilh ka rilruk a ni.



"I u Aldrina hi eng nge I ngaihdan?" a ti chu ka hau chung hian ka lo en a, "Engti zawngin?" ka tih chuan â min tih hmel fe hian a han ner kual vel a, ka nuih a ti za tak tak.


"Zep miahlo in han sawi teh Mate..Pasal neih hun tak tak kan ni ve tawh a, Jacoba te nufa pawh ngaihtuahawm an ni tawhlo a" awmze nei fe hian a tileh a, a tawng zawih viau danah a nau hriat chu a la hlau ve rih aniang.


"Ka hre nang.. A reng reng thu ah U Aldrina nen te chuan thian chauh in ni emaw ka tia, in lo inngaizawng reng tihna maw?" ka ti chu tawng zawi aurin min lo khap nghal chuk chuk a, a rukin ka nui ka nui mai.


"Chutiangte tuna sawi hun pawh a nih loh chu, hna a nei a, tlangval fel pangngai tak a ni bawk a, amah hian nupui neih vat a duh ve tawh a" a tih laite chuan a lai deuhin ka hria.



"In induh tawnte chuan a tha a ni mai alawm, mahse induhna ringawt hi chu a tawk zolo a, inngaihsakna leh inrintawna hi a pawimawh em em bawk a" ka ti duah a, kei aia upa zawk daih mah ni se ka tawnhriat atanga hrilh ve ka duh reng reng a, a ni pawhin a hrethiam khawp mai.




Ka haw thlak hnu chuan mu turin ka inbuatsaih mawlh mawlh a, ka tawngtai laia ka phone message tone ri keuh chuan ngaihtuahna a tibuai nghal ngawt pek a, tawngtai lai êm chuan a chiloh ka ti khawp mai.



Khuma mut thlak duai pahin phone chu ka hmet êng nghal zat a, amah ngei a ni... 'Rintea'



"Muttui aw Malsawm" tih te maizawng a ni naa, 'Muttui' tia min thlah lohna rei tawh vang nge ni a, ka phurin ka hlim sarh mai a, kan inkar la sawi fel hauh lo mah ila hmun khatah, hun khatah kan awm tih ka hriatna ngawt pawh hian min ti lawm tawk em em rih a ni.







Zingah pawh hma deuhah ka tho a, tuk in chu ka alarm ka thawh khalh ve tlat, Thawhleh ni hi ka scooty tlan loh ni anih vangin taxi lak a ngai thin a, tuk dang zawng aia inpeih hma a ngai thin.



Ka insiam laiin Riny hnen atangin call ka dawng a, an chhungte thingtlang lam ami boral thu leh an kal ve tur thu te chu min rawn hrilh a, thawm a ri nak nak bawk nen rei tak pawh kan inbe lo.



Tlan loh ni anih bakah Riny a kal dawn lo tih ka hriat vang chuan ka phurlo ang reng khawp mai a, chaw pawh ka ei peih leh ta lo.


Ka in cheina chu nidang zawng aiin ka uluk a, a chhan sawi tur em em pawh ka hrelo, mahse ka in uluk hle tih erawh chu ka zep buai thei lo ang.



Ngaihtuahna chu zingkar atangin amah bawkin a luah leh nghal a, kan hmabak hre hauh lo mah ila kan thlen chinah hian ka lungawi rih em em mai a ni.










Cont...
Show post links
Top