OBEDA BY Natasha Hrahsel (Completed)

[ngaia]

CH-10




Darthlalang hma ah ding in kan in en vang vang a,thaw hapin ka sam chu ka tuai mam nghal puat.Engvang ber nge pawh ka hre zozai tawhlo.Nizan pawh ka mu miahlo a,ka pasal nen rei ngial kan inbiak hnu ah muthilh tumin ka mit ka chhing a,mahse ka harh tulh tulh thung si!
Phone khawih miahlo in ka tlaivar zak a,ka naute ngaihtuah hle mah ilang ka rilru buai vang nge ni ka mut achhuak thei silo.


Ka mitmeng te chu a dul ruih a,tunlai tak phei chu ka cher zual ngawih ngawih bawk.Ka pasal neih hlim kha chu nise ' kalo nei ta kher kher a aw' ka ti vawng vawng mai thei a,tunah erawh ka ti phal tawhlo thung.Ka pasal hi ka lo neilo ang tih ka hlau ru ngawih ngawih tawh a,ani aia tha ka tawn leh chuan ka ring heklo.





Inhnuai ah chhukin rawng ka bawl a,Judithi leh U Jeneti chuan an eilo lehpek.Judy nen ka rawngbawl chu kan ei tlawng ringawt a,ei tui chu ahar takzet.

"U Matei,keichu tunlai hi i landan athalo ka ti e!! I damloh chuan sawi hreh suh aw,ka û awmlo mahse ka inentir pui ang che"ka chaw ei lo a ka lo khawih neuh neuh lai chuan Judy in a rawn ti hlawl a,hawi chhuak a nuih sakin "i û ka ngaih vang aniang" ka ti a,a nui leh nghal sen sen mai.






"I ngai ngawt ang,ka pa pawh a dam tha leh thuai anga arawn haw thuai mai ang.Kan unau ho hi In lamah kan awm tam hman silo a.Engmah lo ti vak duh suh aw,lo awm mai mai la keipawh tlai lamah chuan rawn haw hma ve hram hram ka lo tum tawh ang" a ti ta reuh a! Naupang rilru la paihlo ni a kan hriat laiin alo puitling ve hle tawh anih hi a!

"Judy,keimah vanga rawn haw hma angailo ania aw.I class te ilo thulh phah vaih chuan ka inthiamlo nasa dawn ania" ka ti a,tunlai tak phei chu test an neih uar lai ania,a tang ve viau bawk nen ani hi chu pun buai chi ah ka ngailo.





Kan eina vel te chu phal lo hle mah ilang a sil lui ta vek a,he nau hi chu aw ava han fel ve chiang tak ! A rilru tluangtlam lutuk te hi mi hian an hruai sual daih ang tih ahlauhawm.





An kal chhuak vek tawh bawk a tiin inchhung chu ka ti fai a,suk ngai te su in ka nu plants ho ka hru fai vek bawk.
Ka zo fel thawkhat ta maw tih ah ka nu thlaichin ho suat tur leh tifai tur chuan ka inruahman a,a zau lo bawk nen ka ti thei mai ang chu maw.
Ka taksa lam hahin kham ve deuh mahse Judithi nena inremloh phah ai chuan tiin ka nu thlai chin tawhna ho chu tihfai ka tum ta zawk ani.





Nî asa bawk nen ka hna thawh chu a sawt lo hle a,rin ai takin alo hahthlak zek bawk.
Ka thawh hnu reilo te ah ka kawng kham vangin ka chawl leh vang vang thin a,chutiang chuan vawi engemaw zat ka ti tawh.
Dinglam len ho bik chu ka ti fai ta diak a,tihian ka nu rawn haw hunah a ni'n bean emaw a duhzawng ho a chîng ve leh thung ang.




Lehlam tihfai leh ka tum lai chuan ka tai bawr a rawn na ta riau a,han din ngil ka tum te chuan ka thei ta der lo! Ka hnungzâng chhuk thla nen lam chuan a rawn na telh telh a,ka rilru ah ka naute rawn lang nghalin ka hlauthawng ta nghal ngawih ngawih.

Ka phone ka hnathawhna bul lawka ka dah chu kûn chung hian ka pan hnai a,ka phone dahna ka thlen rualin ka thu thla deuh hnawk.





Judy call mai ka tum a,ani chu class ah a awm laklawh ka ring bawk si.
Ka tih ngaihna hrelo chuan ka rilru a lo lang hmasa ber ka nu chu ka call ta tawp a,ka taibawr lah chu an na em em tawh lehnghal a!

"Aw Mate" ka nu chuan zangkhai vah hian a rawn ti a, "nu .." ti hrawihin ka thaw chhuak hak, ka thawk zawng te chuan ka na vel vek tawh nimai in ka hria.





"Mate i tha em? Na inei em ni?" A rawn ti nghal chuk chuk a, thlan in min bual huh chap tawh mai.
"Ka ..lo kal mai teh" ka ti tawl a,ka tawng hleithei lo.Ka lu rawn hai zawmin ka mit chu ka chhing ta tawp a,ka luak lah a chhuak ut ut bawk.




"Mate,lo mangang suh aw kan rawn tlân chho nghal ang" ti sawk sawkin phone chu a dah bik lo aniang ka û Sawma a auh lai te chu ka hre thei a,U Sawma lo awmve hlauh chu ka lawmin ka ngai thar ta em em ringawt bawk.


Ka nu te an rawn thlen chuan ka thutna ngaiah ka pum dawmin kalo la thu kun tlawk tlawk a,ka chau lutuk chu chet pawh ka che tha hleithei tawhlo zawk




"Awi leh Mate! Enga tinge hetah te i awm a?"min pan hnai nghal ruakin ka bul vel chu a enkual a,a hmel hmuh nuam leh dam zet nithin thinrim mitmeng chu hmu mah ilang engdang ka sawi thei hrih tawh tlatlo.

"Mate,damdawiin ah kal phawt teh ang u"U Sawma chuan a rawn ti khauh a,dim zeta min pawm kangin ka nu chu kawngkhar hnunglam hawng turin a ti nghal zat.





Motor ah kan inhlang lut a,ka na tawrh vang chuan ka thlan hluam tawh.




"Ngahnge khatiang te ilo thawh reng reng le? An thawh luih tir che chu anilo em lo maw?"ka nu chu a ân zawm hlak hlak reng.
Ka chhang theilo a,ka naute in a tawrh mawlh chu ani ka hlauh ber ni hrih.





Durtlang hospital chu ahnai ber ani bawk a kan pan nghal a,theih nise keima doctor ngei chu pan ka duh viau.

Nurse te chuan min en dik zung zungin doctor an ko nghal a,min tawng thlamuan nghal mawlh mawlh bawk.





Doctor in min en fel hnu ah ka thisen te chu an la a,naute lungphu ri a awm em tih min check sak nghal mawlh mawlh bawk.

Ward pangai ah insawn nghalin doctor chuan min melh run a,"i naupai hi a fual a,i taksa achaklo chu thuhran nise naupai ah chuan i hb hi ahniam lutuk mah mah bawk"tiin a sawi zui mawlh mawlh."Engpawh nise admit i ngai hrim hrim dawn a,doctor pan bik in neih chuan ani chu in rawn thei bawk anga,in duhthlanna ah a innghat aw.Damdawiin atanga in chhuah hnu ah pawh thla khat dawn chu bed rest ila ngai ang"a ti zui leh mawlh mawlh bawk.





Ka nu chuan ka doctor rawn hrim hrim chu tha a ti viau a,U Sawma erawhin " helai damdawiin kan pan ta sa sa,hetah awm se a doctor pawh phone in emaw kan be pawp mai dawn nia" tiin ka doctor chu phone mai a tum thung.Ka naute dinhmun atha vak silo a,min phurh chet leh kha ahuphurh niberin ka hria.


Cabin a kan insawn luh hnu ah ka nu chuan ka pa te a hrilh kual nghal zung zung a,ka damdawi tur vel U Sawma'n alo lei ve thung bawk.





"I Pasal hi ka phone dawn em?"Ka nu'n a tih chuan ka rilru abuai ta khawp a,ka pa damlo awmpui in a buai dawn nen ka damloh thu zuk hrilh ve leh zel kha ka inthlahrung ani ber.

"Kan hrilh lo mai dawn em ni?" Ka ti chu ka nu mitmeng a diklo ta nghal pang mai.






"Kan lakah hian zep inei em? I pasal hian a enkawl tha chiah che maw? Nang hi awmpui ang maiin ilo khawsa te anilo maw?"ka nu chuan a ti ta hlak hlak a, ka nuih sak ringawt."A teuhlo,ka pa damlo nen a rilru ahah ka hlau a"ka ti erawh a thaw ve ta huai.
Hmangaihna hian mipa leh hmeichhia te rilru chauh a ti â lo a,nu leh fa inkar ah pawh hian chhia leh tha hrehrang lo lekin rilru a ti â ve ruai thei.Ka nu hian min hmangaih em a,apawng atakin ka pasal leh achhungte a dem ngawt bik lo ang.Mahse ka nâ te min hmu a,a rilru pangai hmang theilo in thil nilo thleng thlengin a ngaihtuah ta ah ka ngai.







U Sawma rawn lut leh chuan ka pasal ka hrilh tawh em tih min rawn zawt ve nghal a,hrilh loh kan tum thu ka lo sawi chuan a ngaihdan a ni ve ta vaklo.
"Apa pawh damlo nise a fa ani ve tho a,hriat ve aphu alawm.Amah pawhin hetiang dinhmun a ding inih laia hrelo nih chu a duh hauhlo ang"ati ta charh charh a,ka pasal chu aphone zawm nghal hmiah bawk.





Phone chuan ka pasal chu abe mual mual a,"biak theih tawh e kan pe ange"a tih rual chuan ka lamah phone a rawn lek nghal zat bawk.





"Aw U obed" ka tih rualin "Bawihi" a rawn ti hawlh a,"i tha takzet em?"a ti zawm leh zat.





"Ka tha tawh lutuk ania,min ngaihtuah suh"ka ti ve luam nangin ka chanchin kimchang ka û khan a sawi nual tawh a,min ngaihtuah loh phah ka ring lo.

"Ka thiamloh ani,ka buaipui tha hman lo che a.Naktuk ah ka rawn haw nghal dawn nia" a ti chu ka lo hnial thuai. "Angai reng reng lo,ka pa kha la buaipui zawk rawh.Keichu ka zia ve leh mai dawn alawm"ka ti nghal mawlh mawlh.






"Ka pa chu a zia tawh lutuk alawm,treatment alak zawm leh hma in ni thum ala awm a,ka rawn chho phawt ang.Helaia ka awm reng chuan rilru nuamin ka awm thei dawn chuanglo"a rawn ti dam ta thlup.Ka thlahlel ve tawh em a,ka hnial duh ta biklo.Ka pa pawh atha tawh viau tih an rawn sawi ngun tawh bawk a,rawn kalsan ngam ah angai anih chuan ngaihtuah awm lutuk ani tawh bik kherlo ang.





Ticket cut vel a duh vangin kan inbe rei lo a,kan inbiakna kan ti tawp ta thuai.





U Sawma chu a haw thlak zawm a,zanin chu ka nu in min awmpui dawn anih hmel.U Zawni'n min rawn awmpui theih thu a rawn sawi nasa viau na a,Jordana ber ala nau ve deuhhlek nen engpawh nise zanin chu ka nu'n min awmpui hrih phawt dawn ani.






Nurse in ka drip khai lai a rawn thlak leh chiah tih in kawngkhar an rawn kik zawm a,Judy te ho an pathumin an rawn inzui lut.

"U Mate,i na viau em?"Judy chuan a rawn ti nghal mawlh mawlh.




"Ka tha deuh tawh e,inlo kal duh kher anih kha"ka lo ti ve sap a,Judithi kan melh chu a inthlahrun hmel takzet!
"Naute atha em?"alo ti ve sep a,ka bu nghut min hmuh chuan thawveng ve huai hmel apu.





Judy chu ka bulah rawn thu in min kawm nghal mawlh mawlh a,atira ka phone nghal loh vang te chuan min hau ve nak nak.
Ka nu leh Judithi te pahnih chu an lo inkawm ve thung a.Inkawm tih ah U jeneti leh ka nu deuh chu tawng ber an ni.
U Jeneti chuan ka nu chu an kawm thiam mai mai khawp a,a tawngka chhuak ah chuan mi pawh angaihtuah ve hmel takzet bawk.Ka nu rilru damna tur thu achhakchhuak thiam khawp a,a awmna lama doctor thiam deuh call te kan call mai dawn em ni? Ti ten ka nu hnenah a sawi thûl,ka nu pawhin angainat hmel ta viau mai.





"Ka û pawh lo haw turin ka tih kha,ka pa azia tawh tho a.Duhleh keini ahmeichhiate pawh kan chhukthla ve thung mai anga.U Muantei an chahthla nghal hrim hrim bawk a,ka pa pawh atha tawh nen ka û chu lo haw rawh se"Judy'n a tih ve mawlh mawlh lai chuan kalo nuih tawp.Mi hi chu angaihtuah ve mawle.


Min awmpui an tum erawh ka nu'n ahnial ta thung a,anni pawhin ka nu chu an hnial ngam chiah biklo.





Ka pasal naute an rawn kal ve ta chu ka nu hmel pawh hmuh anuam sawt khawp.Nge ni a U Jeneti tawngkam thiam lutuk khan arilru ahneh pawh ka hrelo.Fel a tih thu te chu ka bulah ala sawi siam siam bawk a! Keiin fel kalo tih loh tehlul nen.U jeneti hi chuan tawngkam tha mai pawh anilo,tawngkam rangkachak chhak chhuah a thiam hi ka tilo theilo.






Zân lamah chuan kan mu tha meuhlo,ka luak reng a,nurse te'n luak dan na in min rawn chiu tawp.Zinglam dar nga dawnah kan mu ve thei ta chauh a,ka nu pawh ka khawngaih viau mai.


Ka harh leh chuan chhun riltam hun alo ni der tawh! Ka mu thalo rei tawh bawk a,ka lo mutui ve takzet aniang.
Ka pa pawh alo awm der tawh a,heipawh keimah vangin hna ah akal lo leh ringawt tawh aniang chu.






Ka pa thiante ho in tlai lamah min rawn kan nak nak hlawm a,athen te chu ka hriat zawng pawh an ni hlawm lo.Tlai lamah Judithi te unau in kan zanriah tur min rawn pe bawk a,tukin lamah pawh an rawn dah a,min lo kaitho duhlo hi alo nia.Ka nu pawhin an unau chuan fel a ti in a fak leh ta viau.An fel bawk a,Judithi pawh mi sual anilo tih ka chiang bawk a huat enah pawh ka en hranlo khawp mai.A tawngkam thenkhatin min ti na ve deuh mahse ama ir awm chhuak ni theiin ka hrelo a,chuvang tak chuan ania huat enah ka en theihloh ni.






Ka nu'n ka chaw tur a siam mawlh mawlh lai chuan ka luak a chhuak lehpek a,ka bul a a rawn ken hnaih lai te chuan ka lo uak nghek.
A tih ngaihna hrelo chuan "i zia deuh hunah i ei mai dawn nia" a ti ta tawp.Ka chau bawk nen ka mit ka chhing zui vang vang a,ka nu pawh ka be peih ta thlawtlo.






Ka lu a min chûl hliau hliau chu ka hre thei a,ka mit ka meng peih lawk lo.



"I chau tih hre mah ila i harh hun ka nghakhlel viau ania Bawihi" tih ri ka hriat rualin ka meng nghal kawk. "U Obed!!" Ka bul ah ka pasal ka ngaih em em chu alo thu reng tawh!





"Na te ila nei em?"a ti nghal zat a,ka mittui a rawn hnam nghal tiam tiam mai!





"Bawihi,na inei em ni? Nurse ka ko ang aw"ka mittui ahmu mangang si chuan a ti nghal ruai.Akutah ka chelh vat a,mittui khap per sak a nui sakin "ka ngai tawh lutuk che a"ka ti chu a thaw ta huai.
"Min ti mangang hle tih i hria em?" Ati ve ruih a,ka khawngaih kher mai.





"I rawn thlenna a rei tawh em?"ka tih chuan "darkar hnih chu a liam tawh ang" a ti mai a,"tinge min kaihthawh vat loh" ka ti nghal hlak.

Nui dawtin "i damlo si a,i mut ve theih chhuna kaihthawh che te chu atha lo ang"ati leh ringawt.Ka ngaih zia hi ahrethiam phalo zawk in ka ring.Ka lo muthilhsan chhung darkar hnih lek pawh chu ka ui lutuk ringawt.





Ka nu chu kan awmna cabin piah lawka ahmelhriat hnaivai te tlawha a chhuah thu a sawi a,ama nu leh pa chanchin te chu min hrilh zawm nghal mawlh mawlh bawk.Muantei kha anlo chah thla nghal a,ani a awm chuan U Obeda rilru pawh anuam deuh turah ka ngai.


Ka hawikual ruala a bag ka zu hmu fuh chuan "in ila thleng lo em ni?" Tiin zawhna min siamtir nghal pang.





"Ka rawn tlang nghal,ka chanchin erawh inlam ka hrilhhre tawh e" a ti a,inthlak lo in alo la awm reng bawk.




Ka nu rawn lut in "Ka thiannu pasal saw damdawiin lamah an sawn dawn a,a dinhmun atha vaklo anih hmel!Ka thian hnaivai lutuk ania apawi emai"a rawn ti lut a,"tu i thiannu nge a Nu? Ava zialo thin ve aw"ka lo ti ve thuai.

"Kha a rawn leng lut ve ngun khawp kha kan veng lama alo kal chuan,Chanmari a pamgpar dawr nei Hunthar a awm te kha i hria ngem aw? Thantluangi Khawzawl lam chhuak kha ania,alo len lai hian i awm fuh khat khawp mai a"a tih chuan ka hriat ve thu in kalo chhâng thuai.Ka û Thanpuia te inneih pawh khan biak in a pangpar khawk tu ah a hmang tak in ka hria.





"Zui ve chu ka duh riau mai a,Mate hei inpa a awm tho a ka zui ve lawk mai dawn em ni? I pa pawh ko ilang ani pawhin angai pawimawh khawp ang.An pa dinhmun saw athat loh hmel riau,naktuk hi a daih kher angemaw? Beisei nei chuan damdawiin dang ah an insawn dawn chu ani bawk si" a ti leh nak nak a,min kalsan ahreh rualin a thiannu te zui ve chu tha a ti bawk si,a rilru abuai hmel viau.


Tawng tuma ka ân ziau lai chuan ka pasal zawkin "Kimtei chu ngaihtuah suh,ka awm tawh hi.Hawsan ka tum bik hauhlo ania,i thiannu chu rilru dam deuhin zui zawk rawh"alo ti ve thuai a,"nia,nu zui ve rawh"ka lo ti ve bawk.





Chutia kan han tih takah chuan ka nu pawh a rilru a nuam ve ta deuh aniang a thiannu zui tur chuan a inpuahchah nghal a,ka pa phone in an insawnna tur damdawiin lama lo va kal hmasa turin a chah nghal bawk.
Rei kan room ah awmlo in a chhuak zui nghal a,U Obeda a awm bawk a min kalsan pawh ahreh loh phah ve ta deuh niin ka hria.




Kan nupa rek chuan cabin ah kan awm a,nurse in vawin atana ka drip khai tur ho ka khai zawh tawh thu sawiin ka khai lai mek zo deuh thaw tawh chu a rawn phawi a,harsatna kan neih a ko nghal thuai turin min chah nghal lawm lawm bawk.




"I chau lo em ni? Mu hahdam daih la" ka ti sap a,alo thlen tirh atang ka bul ah ala thu char char a,achau viau tawhin ka ring.





"A damlo zawkin min ngaihtuah daih a!"nui suka tiin ka puan sin lai chu a hlip a,ka dul zawnah akut dah vang vangin "ka naite,i nu iva ti hah bawk ve mawle aw"a ti vawng vawng cuu ka lo nuih khum hak.

"A hre ve der dawn silo a"ka lo ti sap a,ani pawh anui ve hawk tho."alo pian hunah a sawp chau che emai kan vaw nek dawn nia"te chu ala ti ve tak na a avuak phal hi ka ringlo reng reng.




"U Obed,mu tawh rawh keipawh ka that em hi" ka ti leh a,ka ngaihtuah ve bawk em ani.Damlo enkawl reng rengin a vir buai reng mai chu ani sia.




"I bula ka awm tawh reng chung pawhin ka la ngai che ania! Ka mutsan daih che chuan ka ngai zual lutuk ang che" a ti sup a,ka lai lehpek ringawt tawh!
Zak chung chungin "min ngai ve tak tak maw?" Ka sen nasa viau in ka ring.





"Ka ngai lutuk che a hun te hi akal muang riau in ka hria a"kiai sukin a ti a, "ka tana i hlut zia hi ka hre chho telh telh dawn niin alang"ati leh sup bawk.

A ding hluai chu ka melh chho deuh hau a,"ka chau hle mai"a ti sup chu "umm va mu rawh" kalo ti thuai.
Alu a thing nghut a,"zanin atan drip khai ngai inei tawhlo bawk a i bulah hian kalo mu ve zawk ang"a tih chuan ka meng phar nasa mai.





"Bawihi,tawlh deuh la"a tih phei chuan chet ngaihna ka hre tawhlo.



"Mite an lo lut ang,bakah khum hian min dawl lo ang"ka ti chhuak nawk nawk chu anui chhuak hawk.
"Khum chuan min dawl lutuk ang,midang in min hmu pawh nise nupa kan nia lawm le" ti vahin "tawlh rawh le,ka chau ania min duat ka phu ve viau in ka inhria" a ti sup a,zanin hi enge maw a hriat lehpek ni.





A kil lamah ka tawlh phei chiah chu a rawn lawnkai ve nghal zat a,khum alian vaklo nen ani phei chu a saisir nghal hlun.
"Awmpuitu mutna ah sawn nuamsa deuhin i mu thei reng awm sia"ka ti nang nang.


"I bulah hian ka nuamsa zawk alawm, le muhil ang le"ti dam dapin ka dul chu a rawn khawih a "muttui ule" a ti nawn leh sup.



A muhil ni a ka hriat hnu ah pawh ka la meng reng a,alam hawi zawnga saisir ve zatin ahmel chauh hmel lutuk mawlh chu ka thlir reng ringawt.Ka khawngaih takzet ani,tunlai abuai lutuk hi chu.A pa tan fapa nih a tlin em em a,a nupui tan pasal nih a tlin leh em em bawk a! Hetiang mihring hi chu an vâng pharh tawh mawle.Ka vannei tak zet zet ani.






Karkhat vel damdawiin a kan awm hnu in kan chhuak ve thei ta hrâm a,kan chhuah ni chuan ka chhungte lam U Zawni te nufa ho thlengin an rawn lang kim hle.Naupai laia indim angaih zia te chu min hrilh nawn mawlh mawlh.Ka pasalin zanriah ei tura a sawmna erawh an hnial hlawm a,atuk lama hna kal ngai leh an ni deuh vek si a,duh viau mahse zan lam pawh an rawn lang thei tawhlo thung.





Ka pasal in min duat em em a,U Jeneti thlengin ka pasal awm tak vang nge ka chungah an tha hle.
Judy mawlh chuan min ngaihtuah a,a û nen pawh hun fâl min pe hman meuhlo.





"Û,zanin chu U Matei hi kan riahpui ang.Hmeichhia chuan damlo enkawl kan thiam zawk"alukham rawn pawm chung hian kan room ah rawn lutin a ti ta mai!




"Judy i room ah va phei mai mai teh"A û lahin alo ti hluk.




"I mak e a! Damdawiin atang a rawn chhuak hlim hlawl ania,enkawl ve te pawh ka duh alawm.A damdawiin awm lai lahin ka riah chhawk che i phal silo"Judy bawk chuan a ti leh nang nang a,khumah thu in an unau inhnial chu kalo nuih ru char char ringawt.

"Judy,ka nupui hi ka ngai ve tawh bawk alawm"Ka pasalin a tih chuan ka lo ip ru chawih mai.




Judy lahin "chupawh nise,damdawiin ah pawh i riahpui char char tawh kha"ala ti fan, a û hi a fiam tel deuh tawh tlatin ania ka hriat ni.




"Judy,va mu phawt teh"U Obeda tihngaihna hrelo chuan a ti hluk a,chutah Judy chu a rawn nui chhuak ta uarh uarh.Alo fiam chu anih ngei dawn hi a!
"Awi,U Matei bula riah loh pawh chu i va hlau tak.Ka phei dawn tikhan duat deuhin lo riahpui teh a"ti hluai in nui kur kur chung hian achhuak a,a û hrilhhai hmel a hmulo chu kalo uipui zawk.




"A â thin teh e" ti supin ka bulah a rawn inthawlh ve nghal a,alamah kalo tawlh hnai ve nghal sat sat.Ka pasal lakah hian ka ngampa ve sawt ta hle mai,hma kan sawn ve hret hret e.






"Damlo tawh suh aw,ka ngaihtuahna thlengin i ti buai thin ania"a ti zawi sup a, ka ngaihtuahna thil dang daihin alo luah thung.
"U Obed,min duh ve tak tak tawhin i inhria em?"ka ti chu a ngawi ren rawn a, "ka ti lang tawk lo deuh em ni? Chutiang zawhna ka dawn chu kalo inbeisei hauhlo a,ka lo insiamtha dawn nia" tiin min chhang daih.

"Aih,min duat lutuk ka beisei phak bak ai daihin.Mahse maw.."tiin ka chawl vang vang a, "sawi la" alo tih chuan "i lamah ka bet telh telh a,keichuan i nupui ka nihna ang leh ka naute pa inihna ang chauh ni lo in mipa inihna angin ka duh tawh che a,chutiang chu ka dawn let ve theihloh ka hlau.Beiseina ka ti sang duhlo chungin ka na dawn tho a" ka ti zawi raih a,heitak hi nia ka hlauh.Ka pasal lakah ka duhna hi a nasa tawh mai si a,alakah anupui ka nihna ang chauha duhna ka dawn let chuan ana tur chu keiman chauh ka ni.




"Bawihi" a ti hnim ruih a,"ka thisen i pai hma daih tawh atang khan ka duhna che a intan tawh,ka nupui inihna vang ni in ka hre heklo.Engtik lai pawha ka ngaihtuahna i luah reng te,i damloh thu ka hriat a ka che buai vek te leh i bula awm ka thlahlel lutuk te hi ka nupui inihna vang chauh anilo" a ti nghet churh a ,ka bekah a hmui nawr vang vangin "hlauthawng suh,i tan pasal tha tak leh kan fate tan pa tha tak nih ka tum dawn alawm" a ti nghet leh churh.Ka ringhlel lo a,a ti ngei dawn tih pawh ka hria.Ka pasal hi mahni thusawi sawhsawn tur khawpa rilru nghetlo ani tlatlo.





Zan chu tui takin inkuah rialin kan mu a,a awm tak vang nge ka rilru chu a zangkhai in a awmloh laia rilru hah tet tet na ang kha ka nei tawh miahlo!

Zing kan thawh chuan dar sarih alo pel duai tawh! Kan mutui thawkhat viau ani.





Inhnuai lama chhuk ka tum chuan a rem ti lawk lo! "Doctor in bedrest ngai ini a tih kha" a ti ta bur mai!
"Ka hria lawm"ka ti khauh a, "anih chuan khumah hian lo mu rawh,i eitur ka zuk la ang" a ti ta mai!




"U Obed,doctor ten bedrest an tih hian khuma mut char char an sawina ani ber hleinem.Lo nita se zung tura ka thawh te an phal dawn ami?Hahdam taka awm tura min tihna mai alawm.Mut tam chu atha tho a mahse khuma chaw ei vel kha chu angai kherlo,bakah taksa pawhin angaih lutuk lo ang"tiin ka hrilhfiah chiam a,a rilru erawh ka la hmin vaklo aniang "chaw ei khamah room ah kan chho leh nghal ang" ti supin inhnuai lama chhuk erawh min hnial ta em biklo.






Judithi te unau in rawng an lo bawl peih diam tawh a.An fakawm khawp mai tunlai nula ah chuan atho hma pawl tak chu an niang.Ka lawiluh ve tirh atang dar riat pelh thlenga mut hi an la neilo reng reng.

"Û lo koh cheu kalo tum chiah a"Judy chuan min hmuh rualin alo ti thuai a,U Jeneti leh Judithi pawhin thleng vel anlo siam mek.






"Kimkim,arsa kan lo buhchiar a,i eithei ang chu maw"U Jeneti'n a tih chuan "ei thei ang" kalo ti tha ve mai.A mizia hi chu hriatthiam ahar ngawt mai! Tun thlengin a cheng ka la man theilo.



"Û engtik nge i chhuk leh ang?"Judithi chuan a rawn ti hlawl.




"Ka chhuk tawh hrih lo ang"U Obeda pawhin alo chhang pangai ve mai bawk.





"Anih chuan ka chhuk dawn em ni? Ka nu leh pa te an mahni a awm tir rikngawt te chu" a ti zui nang nang.
"Judith,Muantei ka ko thla alawm.Kan zuk awm teuh khan awmzia a awmlo sum kan ti hek mai ani.Ka pa pawh atha tawh a,treatment ala thei thuai ang.A pawimawh ber ka nu a awm a,private nurse Muantei a awm bawk a,a tawk hrih viau.Ka pa duhdan pawh ani,a tul anih leh ka chhuk leh mai thei bawk a"U Obeda chuan a ti a,Judithi ngaihdan anih hmel vakloh





"I nupui ringawt i ngaihtuah a,ka pa ngaihtuahawm zawk i ngaihtuah leh silo.U Matei pawh athat tawh em hi,i chhuk lo anih leh ka chhuk anga ani mai"ati ta hlawk hlawk mai, "Judith,i û sawi hi a dikna chen a awm alawm.Sum insen hnem loh dan angaihtuah anih hi"U Jeneti'n alo tih zeuh chuan Judithi chuan fian athlak ri ta bawl a, "ka pa tan sum sen i ui em ni a Û" a ti ta mai!


"Judith,chutiang in i û in a sawi loh kha" kalo ti chu "lo inrawlh ve suh, ka û hian ahma zawngin damlohna thil ah sum sen a ui ngai lo" min ti zek mai!





"Judith,ngawi rawh.I puar tawh anih chuan kalsawn rawh,khatiang khan Bawihi be tawh ngai bawk suh" khauh zet hian U Oneda chuan a ti fak a,Judithi chuan mittui tling pam hian a û melhin kei chu thip zet hian mi rawn melh veleh! Kan inkar atha chho viau tawh ah kalo ngai asin mawle.

"Nupui ineih atang hian i danglam sawt lutuk,ka pa te bulah chuan ka chhuk ang.I duh leh i sum chu i nupui tan hian hmang vek rawh"a ti chiah U Obeda thawh lai ka hre hmanlo anau chu a beng thle sawk a,dan hman anilo reng reng.





"Judith"inthiamlo zet a tih zawmin anau chu amelh a,Judithi chu mittui tla zawih zawihin a tlán chhuak zui. "Û obed,iti mah mah deuh ani.Kutthlak kha aphulo asin,ka pa angaihtuah em vang anih kha"U Jeneti chuan tiin a tho zui ve nghal mai bawk.
Inthiamlo zeta athutna a thuthla hnawkin ahmai atuai puat a"enge maw ka tih kha le" a ti zawi sup sup.



"Û,azia ve leh mai ang.U Judithi hi tunlai chu azia a dang riau a,ka pa damlohna vang pawh ani maithei.Inthiamlo lutuk suh.U Mate,nangpawh ila damtha silo chaw kha ei teuh rawh,ngaihtuah vak suh aw"Judy chuan a rawn ti a,ani pawh ahmel hmuh chu anuam zan chuanglo.Chaw te chu eizawm chu khawi lamah ei chakna pawh ka nei tawhlo.










#Ka hâ nat vangin zanhnih ka rawn dahtheilo a,zan hnih awl hnu a dah ah chuan tawi ka ti viau mai.Mahse ngaihtuahna ah ala lut lo lutuk a,minlo hrethiam rih hram dawn nia.Min ngaihtuah a pvt lama min rawn ngaihven tu te ka lawm lutuk ania.Ka zia tawh lutuk ania,thil pawh ka ei thei tan tawh a,ngaihtuah ka ngai tawhlo ania aw.

Ads click hi ti hram hram ang u aw, ads kan click atang hian writer ten hlawh an lo neih ve phah thin a, story min ziahsak man lawmthu sawinan ads kan click theuh dawn nia

Show post links
Top