The Traitor BY Tlantlani Fanai

[ngaia]

Awmawmi's POV

"Matthew,mommy bulah lo kal rawh le!" ka lama lo kal turin ka fapa Matthew chu ka ko a,thla sawmpakhat lai a lo liam ve der tawh tih hi awih a harsa a ni.

Hun kal chak zia hi,chuanin Ben-a nena kan inthen atang kum khat leh a chanve lai a liam ve der tawh bawk.

Nui heu chungin ka fapa chu a rawn riat nawk nawk a,a chunglam leh hnuailamah a ha hmai pahnih a rawn lang ve ve a,chak zet hian ka bulah chuan a rawn bawk vak phei a.

A lamah chuan ka ban ka phar a,a rawn bawkvak lai chu tawpin pawm beisei deuh hian a ban a phar ve a,a nui heuh heuh bawk a, aman min rawn pan ka duh vanga ka ban phar ka dah thla lo tih a hmuh chuan hrethiam niawm tak hian a rawn vak leh nghal zawt zawt a.

"Aw,ka naute. I ti tha lutuk!"ka chhuanzia tih lan nan a hmaiah chuan ka fawp kual sek a, Matthew-a chu a nui uar uar a.

A chang hian chhan awmloa nuih uar uar te,nuih ker ker emaw nuih rikngawt te hi a ching a,mahse pawi ka ti chuanglo.

Naute in an ka atanga thil an tihchhuah ri mawi ber a ni a,ka thinlung zawng zawng hian ka hmangaih nghal vek.

"Ugh,in pahnih khan in induat lutuk a minti damlo dawn,"U Sangtei chu a room atanga rawn chhuakin a sam chuan chhim, chhak,hmar, thlang zawng zawng a hawi vekin ka hria,zana a rawn haw tlai zia ngaihtuahin a tho hma hi mak ka ti zawk.

"Ehe,good morning,"Matthew chuan doctor lampang chu a hawi vat a,ka pawmna atang chuan tal chhuakin a aunty duat em em lamah chuan a bawkvak phei a.

A dawhtheihloh zia a lang. A bawhvah na tura lo awm chhuata puan intumtel te chu hel emaw namsawn loin a harsa a harsa in a ngil patin a vak phei peih a nih chu.

U Sangtei hming ang deuh hian a rak nawk nawk a,a ko tawp theilo a ni ber,naute in a attention pek chu ka thiannu chuan a rukin nuam a ti tih a hrethiam miau a.

'Te' tihtir kan tum thin a,mahse a thei thlawt lo, 'Ma' tih te chu a thiam ve tawh a,tawng pawh a hre ve reuh lutuk,mahse mihring hming tak hi zirtir a lo harsa a nih hi.

A lamah a kal tih a hriat chuan U Sangtei chuan a mit a chhing vang vang a,kun vatin naute chu a banah alo vuan a,Matthew a pawm chuan a rih tawh em vangin thawm engemawni hi a siam pah a.

"Aw, keipawn ka hmangaih che naupang nghal,"a tih laiin ka fapa chu a nghawngah a bei hle hle a,a lu-ah chuan a chulsak hliau hliau a, Lawmawma hnena thawn turin a rukin thla ka laksak bawk a.

Thla reivaklo liamta khan U Sangtei zawk hi Lawmawma hnenah a inpuang rawih a,induh ve ve ta chu an inkar a tha chak kher mai.

Kha thu ka hriata ka hlim dan kha, engtinmah awm lo angin awm mah se, Lawmawma nen an in text apianga U Sangtei nui chu ka hmuh hmaihlo nasa mai.

"Vawiinah Ben-a te inah i kal dawn tiraw?" A nitin in thin coffee in turin kan nufa doctor chu choka lamah a kal a,an pahnih chuan ka zui nghal a.

Plate lain breakfast tur ka siam sak chu ka chhawp a, coffee a inthlit zawh hnuah U Sangtei chu thu thlain Matthew chu a malah a thuttir a.

Naute khawih theihloh turin plate chu ka dah hla hret a, an bulah chuan thu thlain a thil ei laia a tihbuai loh nan naute chu ka laksak a.

"Aw,ka nu leh ka pa te kha heta lo kal hi an tum zawk a,mahse i hahchawlh theih nan an ina ka kal kha tha zawkin ka hria a,"ka tih chuan U Sangtei chuan artui kan chu thial pahin a lu a bu nghauh nghauh a,a thil ei tur a en reng tih a hmuh chuan ka fapa pawh chu a barh pah bawk a.

"Pawi ka ti chuanglo asin,"ti chungin a ei chhunzawm a, doctor mahni hmasiallo tak chu ka en reng a.Pawi a tilo atia mahse hahchawlh a mamawh tih ka chiang hle awm e.

A mit hnuaia a eyebag sawn a taksa neitu hi hahchawlh tir turin min ngen ni ber hian ka hria.

"Naaaa, mut i mamawh. Heta ka lo awm atang khan darkar nga aia tam i mut pawh ka la hrelo a,chuti chung chuan engtinnge U Mahmuni khan khawvelah hian mut aia duh thil dang i neilo tia a sawi theih?" University an kal laia class-a U Sangtei mutthluk ziah thin thu leh exam a pass ve mai thin thu U Mahmuni'n a sawi kha ka ngaihtuah chhuak a,pakhat ve chuan a dar a san zeuh a.

"Mihringte chu an inthlak thin alawm,"a tih chuan phunnawi miahloin a eitur chu a ei chhunzawm leh a.

Heihi chu a ngaihtuahawm takzet.

"Engpawh chu ni rawh se,vawiina i hahchawlh loh chuan Lawmawma ka hrilh ang,"ka phone-ah Lawma number chu hmetchhuakin ti ka hmuhtir a,U Sangtei chuan a thil thial lai chu tawpin a mit a chhing sak a.

"Ka hahchawl ang,a tha em? Engtikah nge i kal dawn?"A topic a thlak chuan ka nuih a, phone-a dar zat chu ka en pah a.

"Darkar khat hnuah a ni ang. Ka nu khan chhun thil eitur min siamsak a tum thu a sawi a chuvang chuan a hma deuha kan thlen a ngai dawn a. Matthew-a hi a ngai ropui sia,zanriah ei hun vel thlenga kan awm a ngaih ka ring,"an nupaa ka fapa an ngaina lutuk tih ka ngaihtuah chhuah chuan ka nui ver ver a,an fapa ka ngaihtuah hian tlemin a nuamlo deuh.

"Ben-a a awm ve dawn em?" A chungchang ka ngaihtuah lai takin U Sangtei chuan min zawt a,ka lu ka lo thing a.

"Ka hrelo. Rinfela khan kartawpah pawh office-ah a awm ziah thin a tia,a awmlo ang,"ka ti chhuak sap a,tunlai hna a thawh nasat hmel lutuk hi tlemin ka ngaihtuah ve deuh.

Rinfela pawn a ngaihtuah vangin a theih theih naah a pui ziah a, engmah ka sawi ngailo naa a mamawh lai taka a pui hi ka lawm ru ve reng.

"Thil engemawni a thlen chuan minlo call dawn nia,in pahnih hian ka lo hruai nghal ang che u,"dam deuh, thutak deuh si hian U Sangtei chian a rawn ti a,ka nuih sek a.

Min ngaihtuah mah mah a ni.

"Ka lawm e,ka nu Sangte. Mahse a ngailo. Vawiin chu lo hahdam rawh. Keimahin ka ti thei alawm,"tia ka thlamuan hnu chuan a bu nghauh nghauh a.

"I sawi ang zelin le,mommy,"naute bulah chuan a ti ngei a,a thu hriatthiam a sawi vangin Matthew chu a rawn hawi nghal vat a.

"Mama,mama,"ka mala a thutna atang chuan min en tumin a rawn dak chho vak a,ka lama a ban a rawn phar chuan a duhawm lutuk ringawt.

"Aw,ka naute duatte. Mama pawn a hmangaih lutuk che ka naute hmeltha,"naute chu pawmin ka malah ka dintir a,nui sang chungin a biang chum deuh chu ka hmaiin ka si a.

A rawn nui leh ta ker ker e,tianga malsawmna ka dawng hi ka vannei takzet a ni.
.
.
.
.
.
"Duhtak,ilo thleng elaw! Lalpa leh,in pahniha ka ngaih zia cheu hi,"ka nu chuan nui huah huah chung leh hlim hmel deuhin kawngka chu minlo hawn sak a.

"Ka nu,hei,"kan kal hmaa U Sangtei'n a siamsak eitur thenkhat a pack chu ka pe a,kan ina anlo kal hmasak zawka an nupaa min ngainat em vangin a ti a ni.

"Awi ha,ka lawm lutuk duhtak. Engmah ilo ken pawh a ngailo asin,"mak tih hmel deuhin a la a,thudik ka hrilh nghal a.

"Doctor Sangtei hnen atang ania. A tho hma a,a siam zawhah nangmahni pe tur cheu in min hrilh a,a muhil leh nghal a."

"Ka lawm zia minlo hrilhsak rawh, Awmawm. Lo lut ru,chhun thil eitur ka siam zo tawh ania,"ka pawmna atang Matthew chu a la a,ka tlawhlohna rei tawh em em inchhungah chuan ka pen lut a.

Engkim a la ngai vek,an living room-a Matthew-a thlalak an tel tih ka hmuh chuan ka nui a.

A tawng awmze neiloa nuamti taka a pi be mektu ka fapa chu ka en a, keipawn an chhungkuaina an ngainat em vang hian nuam ka ti.

"Khawiah nge ka pa hi?"chokaa zui luh pah chuan ka zawt a,ka hawi kual pawn hmuh tur reng a awmlo.

"A huanah a awm a. Alo kal vat- oh,saw alo kal e."

"Khawiah nge ka fanu leh ka tupa duatte chu?"a rawn ti lut lawng lawng a,min hmuh chuan hlim hmel deuh hian kan lamah a rawn kal a,rang tawkin a nupui kut atang Matthew-a chu a laksak nghal a.

Naute hi a ngaina leh lutuk a,chuan attention a pek zawng zawng hian Matthew-a pawh hian nuam a ti hle a ni.

"Ka pa,enge i an?"Ka mi zah tak chu reilote ka kuah zawk a,a kum tar tawh e tiloin a nuih hian a la hmeltha reng mai.

"Ka tha lutuk e. Nangpawh i that ka beisei?"Ka fapa ang chiah hian min nuih a,min zawhna vang chuan ka nui then sang a.

"Doctor bulah kan cheng a tlemte pawn damlo ila chu hetah hian ka rawn kal thei miah lo ang."

"Ava lawmawm tak. Chenpui tha tak i nei a nih chu."

"Chuan Lawmawma pawn bialnu tha deuh a nei asin. U Sangtei hi a bialnu chu a nia,"ka thil hrilh hnu chuan lawm hmel deuhin an nui dun a,an tan thu thar a ni.

"Lo thu rawh,Awmawm. Thil ei pahin kan titi dawn nia,"tia min sawmin chhun thil chu rei deuh kan ei ho a,thil thleng chi hrang hrang kan inhrilh tawn a.
Show post links
Top