ALL THE WRONG PLACES 17 ONGOING

[B.laltlanhlui]

Chapter 11

Jin Starck chu Mezzanin Bathlar, White Rock Mansion ballroom Illinois a an nghah ah chuan a ding vang mai. Tuxedo dum leh hmaikawr mit chin chauh khuh a vuah bawk. A sam a khuih pial thlap a, engkim hi a felfai thlap tur a ni ringawt

Morgan Murphies poltics chhungkua Chicago a awm ten Masquerade party Matriarch kum sawmrukna party an lawm pah dawn a, Jin a te hotel hi party nan an rawn thlang a, khawpui pawn lama awm a ni a, mi zahnih chuang vel an ni dawn a ni

Mikhual, khawpuia let leh thei lo te pawh hotel ah chuan an thleng nghal thei ang

Chumi hun buatsaihtute chu mi pawimawh tak an ni a, President hmun ruak chuh chu an tum ber a ni. Jin pawhin hun ṭha bawhpelh a tum bik lo. Engkim mai chu fel takin a duang vek a, mikhual tel tur te chu mi challang tak tak te, chhungkaw hausa deuh chin an ni tlangpui. Amah ngei pawh chu sawm te zingah a tel ve

Party pawh tluang takin a kal zel a, bathlar aṭang chuan chik zetin a lo thlir a, thil kal sual thei tur a lo veng char char. A chhe zawnga an than loh nan a en pui ve zel a ngai. A bikin White Rock hotel hi a ngainat ber te zinga mi a ni

Khualchhawn te hnen aṭang call a dawng a

"Eng nge ni?"

"Ka pu, mikhual room rawn zawng an awm a, room chu book lawk vek a ni bawk si a"

"Thil tihkhawm pui tak a awm dawn tih hrilh rawh"

"Aw, sir. Mikhual zinga mi tho kha ania. Vanduaithlak tak maiin a car a chhia a, chuvanga rawn tlai a ni. Khawpui let leh na tur a nei lova, zana riahna tur a mamawh a ni awm e"

A chang chuan hetiang thil hi an tawng leh zauh ṭhin. Chutiang atan chuan riahbuk hnaivai an siam belh a, mikhual room chang lo te chu an riahtir mai zel

"Tihtur chu i hriat kha. Brooklyn riahbuk ah khan thawn phei zel mai ta che. Chutiang vanga inremna siam kan nih kha" nin hmel zetin a chhang a

"Ih, sir ka hre tho a, mahse hei hi chu i ngaih pawimawh deuh ka ring a" khualchhawn nula chuan a han ti a

"Tinge chutia ka tih ang a?"

"A chhan chu Adams Industries aṭanga lo kal ania. I unaunu pasal te company a ni sia, chuvang mawle. Brooklyn riahbuk chu ka be nghal ang e sir"

"Tu nge mikhual chu?"

"Julianne Sanders a ni e sir"

Jin chu a buai nghal vek. A marphu te chu a rawn rangin a hrawk ah chuan tang awm tlatin a hria. Tu hmeichhia mahin hetiang em em hian an la tibuai ngai lo. Kum liam taa amah a la nghawng ang tho khan a la nghawng na hle tih a inpawm thei mai lo

A ngawi reng a

"Sir?"

"Thawk a la halh a, a thu rawn sawi chhuah hi amah pawhin mak a inti lek lek zawk

"Founders Suite ah khan awm tir rawh u"

"Mahse sir, kha kha chu i room a ni si a"

"Nia, office ah ka riak mai ang. Ka bungrua kha lo thiar chhuak ula, fai takin room kha in kalsan dawn nia"

"Awle sir"

Jin chuan inbengdaih tumin thawk a la halh a, waiters hnenah whisky a lam a, kai deuh chhap a mamawh. Ngaihtuahna fim a hmang thei rih lo. Nilengin thil a kalsual mai ang tih hlau reng rengin a chawl hman lova chutah a room nuam lai ber a la kian zui ania

Engvanga riahna tur ṭha a neih loh hlauva a room kian ta mai nge a nih pawh a inhrethiam lo. Brooklyn riahbukah tinge zanlaia thawn phei a remtih loh tlat chhan pawh a inhre bik lo

Ballroom kawngka lam hmuh chakna in a khat deuh thut a, hiptu chu a nei ngei a ni

Kawrfual dum ha a a rawn lut lai chu a va hmu ta. A sam buang tak mai chu a han ṭawn sang vah a, hmaikawr lace a vuah chungin a hre nghal chat tho mai. A hmai hi tuam phui vek pawh nise a hre thei tho ang

Chuveleh khatianga a room a pek mai chhan kha a hrethiam ta

Hotel car a Brooklyn riahbuk pan tir kha a ngaingam lo. A awmna hmunah nuam taka a awm tir theih laia hmun dang pan tir kha a ngaingam ngang lo a ni. A tan chuan hmeichhe pawisawi lo, kehthei dawma a dawm kha a ni tlat

Ballroom ah a rawn lut chiah chu mipa ho mit a la nghal chat. An kawppui te nena in tur an dawm lai te chuan an melh ṭawk ṭawk a

A dum vekin inthuam mahse a vun ngo tak mai chuan a en sut sut thei. Tlereuh a inbel lem lova, inhualna party ah kha chuan Adrienne tlereuh a inbel a, a hriat theih chhan pawh Justin a'n thlan pui tura a sawm vang a ni

'Tlereuh a nei lo em ni? Nge a neih sa pawh duh khawp lovin mi dang ta a hawh zawk?'

Morgan leh Murphies te awmna lam panin a kal a, Missis Morgan birthday neitu nen chuan inhre sa ang maiin an han inkuah a. Julianne Sanders pawh chhungkaw challang tak an ni a, awm a ti viau mai. Hriat pawh a ngah ngawt ang tiin a ngaihtuah leh a

Jin chuan a ke pen tin chu chik zetin a lo en reng a, tu nge a biak tih thlengin hmuh hmaih a nei lo. Upa lam te chauh chu a bia a, mipa chuan a mit an la lo nge tumah a be lem lo

'Bialpa a nei nge tinge tumah a ngaihven loh le?'

Julianne Sanders chu inchei vut lo mahse a changkang tlat. Chuvanga mi mit la pawh a ni reng a, Jin chuan inhrethiam chiah lo mahse minute sawmthum chhung a lo en reng tawh. Inpawm duh lo mahse kum sarih liam ta ang tho khan a zunah a la uai chiang a ni

A hmangaih tirh lai ang bawk khan hmelṭha a la ti reng. Mahse a lan dan a dang deuh tawh tlat. A thutak tawh in a nui tlem tawh hle a ni. Tihtur neia zawh fel thuai duh hmel a pu

'Thil dang eng nge a duh le? Mi hausa fanu a ni a, a duh apiang engkim a nei thei awm si a'

Tlangval sang deuh nen minute nga vel an indinchilh ta. Jin a chhungril chu a kaiharh tlat mai. Amah pawh a la inhrethiam mai lo. A tih chak em em chu, chu pa hmai ballroom chhuat tihfai nana hman a ni

A tawpah chuan Julianne chu a kalsawn thei ta hram a, a hmai a khuh vek loh avangin a hmelṭha em a, a tumah chuan an hai thei lo vang

Hmeichhe room a a luh chhung chu Jin a'n a lo chhiar a, minute nga chiah a ni. Floor a pan leh laiin kha pa bawk kha a hmaah a lo ding leh a, phu deuh zawkin a thinrim hmel tawh hle a ni

Chu pa chuan a la rawn be lui zel a, Julianne chuan a nin hmel tawh takzet. Mitko a san a, chu pa chuan a kut te a leng vak vak a, an inhnial niin a lang. Kal daih a tum chu a kiu ah a lo pawt let a, a thinrim tawh nen chu pa chuan a tilui tlat mai

A inngaihtuah fim hman tawh lo. Ballroom lam a pan ve nghal. Chhan tura a tlai loh hram a beisei

A va hnaih hle tawh hnu chuan an thusawi a hre ta

"I duh apiang i nei thei dawn asin. Hna i thawh pawh a ngai lo vang"

"Ka ṭha alawm. Nang leh i pawisa hi ka mamawh lo" Julianne i'n a lo ti hmak

"I hre ringawt em ni? Han in en la, i retheih em hi. I cousin te zarah i nung ve ṭawk ṭawk a ni lawm ni?"

"Khawngaihin ka cousin te nupa hi hmer tel lo hram teh. Nang ang lo takin an zaidam in an ngilnei em em asin. Ka hrilh duh che chu e, inneih luih tir min tum lai ai khan tunah hian ka hlim daih zawk"

Jin chu a ding det a

A man ta chiah. He pa hi Julianne pasal hual hlui kha a ni tih a hre mai

"I hria em ni duhtak? I duh apiang ka pe thei che asin. Mahse Europe a kal kha i thlang zawk a ni lawm ni kha?"

Jin chuan a melh dun reng a, an kiang lawkah a awm tih an hre lo. Julianne chuan amah tibuaitu chu chiang kek kawkin a han melh a, a thaw deuh hrawih bawk. Pangngai taka awm luih a tum hram hram a, chu pa chu a rui tawh hle a ni ang. Jin pawh an hnung deuh lawkah whidkey in angin a awm der a

"Min lo hrethiam la e, Mister McAllister. I duh apiang min pek ka mamawh lo. Mahni ke in ka ding ve thei bawk. Nang ai chuan mi zawng zawng hi an ṭha fe zawk. Ka kal ang e"

"Kal ta che. Hetah hian hnathawk tura kal i ni tih ka hria alawm. I fapa mut a hun tawh a, awmpui a hnekin nang lah chuan a chawmna tur i ngaihtuah a, naupang chu ka va khawngaih tak em. A cousin te angin hma hun eng tak a nei ve dawn lo a nih kha. I fimkhur loh rah a seng dawn a ni e"

Jin chu a lehhawi lo thei lo. Lo inrawlh ve loh hram a tum a, mahse Jared chungchang a rawn sawi dan chuan a thin a khei zak. Sawp a chak takzet

Julianne heh pet a, hnuai lam melh daih chu a va hmu a, engvanga chhang let lo nge a ni tih a ngaihtuah neuh neuh

Jared chungchang a sawi dan te kha a ngei zawng tak a ni

A tawk a ti ta khawp mai

Chu pa dar ah chuan a kut a va nghat a, chu pa chuan phu zawk hian a rawn chhoh en a, Jin ai a tawi deuh a, a hmel a hmuh chuan a hre nghal mai

Patrick McAllister nen an lo inhual reng a ni maw a ti rilru a

Patrick hi tlangval hausa pawl niin political chhungkua an ni a, kum tam tak chhung chu thil an ti thei ve hle a, a ni pawh a hausa in senate dinhmun luah a tum deuh a, a hmel pawh a chhe lem lo

Julianne i'n chutiang chu a hre tho awm si a, tinge Paris a zin chu a thlan daih zawk mai le, mak a ti hle mai

"Ṭhiana eng nge i duh a?" Patrick McAllister chuan lawm loh hmel zetin mitko a rawn san a

"I in hnem deuh tawhin ka hria, Mister McAllister. Nula hi ka lo lampui ve tawh dawn em ni?"

Patrick McAllister chu a nui suk a "Tehreng mai. Eng pawh nise Miss Sanders hian a nihna ngaia a din leh theih nan tlangval hausa a melh a ngai alawm"

McAllister a chhungte chuan an rawn zawm thuai a, Julianne chu en in an inhrilhru leh sap ṭhin a, an rel tih a lang reng mai

Jin chuan Patrick McAllister chu a dem lem lo. Julianne a lo ngei deuh a nih pawhin a kawp vanga a chan reng turah a dah a, mahse hnek chu a chak viau lawi si. Mi hmuh laia tihzah kher a ngaihna a hre ve lo

"Lampui ka sawm zo chiahin ka hria, kan lo kal lawk ang e" Jin chuan Julianne chhan hun pawh nghak lovin lamtual lamah a pawt phei a

Tun ṭum chu a lo hnial bik lem lo. A mitah tak a rawn en ngam lova, mahse an lam dun reng tho

An kut a han invawn leh takah chuan Jin a thinlung na phum bo tawh kha a rawn na thar leh a, kum sarih liam taa a kalsan lai khan a nat dan chu a hre daih tawh

A chungah a la thinrim reng a, a thil tawn tir avang khan hrem a chak hle. Patrick McAllister nen pawh an danglam vak lo vang. Nimin maia thleng angin a la chiang a ni

He hmeichhia hian a kalna hmun apiangah hian mi thinlung tihnat a tum em ni?

A rawn melh chho ve ta chiah mai le. A mitmeng mawi tak mai chu thup bo theih a ni lo. Crystal ang maiin a pawl fim kak a, chutiang reng renga fiah chu a la hmu ngai lo. Tunah ngat phei chuan a mittui a tling pam a, Jin a thinlung sak tak mai pawh a nem nghal vek. A ṭanga beitir a, engkim a ṭhat leh vek tur thu hrilh a chak hle mai

'Fimkhur rawh Starck! Mi dawi ching a nih hi. I thinlung leh thlarau a tih sawm vek tawh kha'

"I pasal hual hlui chuan hmalam i pan chu a tha a va nat hmel ve" a ti zawi sup a

Julianne chuan a heh a pet a, engmah a sawi lem lo

'A inthiamlo em ni?'

"Nang lah chu i buai loh hmel si a, in nih lai pawhin a duhtu zawk che a nih ka ring"

Julianne chu a la ngawi reng tho

'He hmeichhia hian min biak a tum ve eih lo em ni?'

"I nihna ngai chelh leh i tum a tih kha eng nge a awmzia? In chhungkua chu hniam deuh ah a ngai che u em ni?"

Julianne chu a thaw halh a, a hawisawn daih. An lam dun reng tho a, a va inrawlh vang khan a lawm viau a ni maithei

'Engemaw tak ka sawitir thei ang em le?' a ti rilru a

"Ṭawng i duh loh chuan kan lam anga a ni mai lawm" a aw chu a zawi sup a, a lungawi lo tih pawh thup a tum buai lem lo. Patrick McAllister lak aṭanga kalsawn a duh vangin a hmang mai mai tih a lang tlat. Inthiktir a tum chiang mai. A chhan pawh lamtual piah deuh ah Patrick chuan a lo melh kuau mai

'Kei pawh ni ila ka thik ve em em ang'

A ngaihtuahna chu a duh leh lo

'Engvangin nge ka thik ang a? Ka duh tawh reng reng hleinem. Ka tan chuan mitthi a ni tawh' te a han ti leh vel a

Jin chuan a lamah a pawt hnai sawt a, lo hnial chu a tum bik lo. Chu hun hlu tak chu remchangah la in mit a chhing vang vang a, Julianne thinphu ri pawh a hre thei hial mai

'Nimin a thleng ang mai khan a rim leh landan pawh a la ngai reng'

Mahse a harhchhuak leh a, tuna sual taka siamtu leh a thinlung ti na tu kha amah hi a ni a, hrem a phu viau mai

Julianne chuan kal hran a tum a

"Ka lawm e" a ti chuai raih. Patrick McAllister nena a biak dan chu dang tak a ni. A mitah tak pawh a en ngam lova, a ṭha nge ṭha lo Jin chuan a hrethiam thei lo

McAllister nena an inhnial chung khan dam dapin a awm thei kha ania

'Amah ah hian engmah ka chawk tho lovem ni? Ka phu ve miah lo em ni? He hmeichhia hi bum hmang mai niin kan hun hman takte kha engah mah a ngai lo em ni?'

Jin a'n inthunun a tum hle laiin Julianne erawh pangngai takin a awm thung a, a ni in kum sarih chhung he hmeichhia hi â tak maiin a lo zawng chu a ni si a

Hmeichhe tam takin a mit lak tumin trick chi hrang hrang an hai ṭhin. Mahse an hlawhchham zel. He hmeichhia Julianne Sanders hian engmah a ti lo chungin a ngaihtuahna zawng zawng a tibuai vek thei a nih hi

"A tlai tawh si a, room ah ka let tawh ang e" a dar zawn a rawn melh a, a mit zawn a rawn melh lo hrim hrim

Jin chu a hawi kual a, mikhual tam zawk chuan an lo ṭinsan tawh a, Patrick McAllister erawh chhuahna ah a ding tlat. Mipa pahnih te nen an inbia a, Jin chuan an thusawi chu a hre ṭep. An awmna lam a rawn hawi tlat tih a hre mai

"I room thleng ka rawn thlah ang che"

Julianne chuan lu a thing a "A ngai lo vang ka...."

"I room thleng ka thlah ang che. Min hnial suh" Jin chuan a ti rum ul a

A ka a rawn ang zuau a, Jin a'n mitko a lo san a, tunah chuan a chan chu a hmu ve ṭanin a hria

A heh petin hnuai lam a melh leh daih a, a lu a rawn bu nghat a, ballroom aṭanga chhuahpui chu a chak ber tawh niin a lang. Inhnial thui a duh loh vang bak a ni lo vang"

Zawh thuai a duh a ni ang

Jin chuan a ban lo pe in ballroom an chhuahsan a, Patrick McAllister awm lohna lamah a chhuahpui daih a, a rawn thlir dan ah khan a ngaih a ṭha thei ngang lo. Tihnat tum a ang tlat

A chhan pawh hre bik lo mahse venhim a duh tlat

An hun liam tawh chu eng pawh lo nise tunah chuan a chhungkaw peng khat a ni ve tlat. Justin a cousin a ni si a

A chungah engemaw tak a thleng a nih chuan Adrienne i'n hrehawm a ti lutuk ang

Elevator ah ngawi rengin an chuang a, Jin chuan a ngaihtuahna hriat sak theih a chak ngang mai

A nuihzatthlak em em na chu hmeichhe tam zawk hian an biakin a chhang ngai lo. Mahse Julianne i ngawi reng hian a rilru a tibuai vek thei

Floor chung ber an thleng a, Jin chuan room thleng a thlah a, bellman i'n a lo nghak a, hlim deuhin a lo chhawn a, Jin chu key card pahnih pe in a kalsan a

Jin chuan Julianne hmaifang dik zet mai chu a han thlek leh ṭhin. A lo melh chhoh hun a lo nghak reng a, rei deuh a nghah hnuah an mit a intawng ta

'Tinge a hmelṭhat em em mai le?'

'Tinge Justin a cousin a lo nih kher le?'

"Khawngaihin Key card kha min pe thei em?"

Jin chuan pe in a la en reng a

"Ka lawm e" a ti sap a

'Tinge a cool em em le? Ka hmeichhe hmuh kha chu a nui duh asin'

"Chu zawng chu maw i sawi dawn?" lawm loh hmel zetin a ti hluk a

"Sawi tur engmah ka nei lo" a hawisawn daih

"Sawi tur i ngah lutuk. Sawifiah tur i ngah mai"

"Insawifiah ka ba lo" Julianne i'n a rawn ti a, rawn phur hluai ang kha a ni lo. A nin hmel em avangin Jin pawh a lungawi thei lo

"Patrick McAllister kha a ni lawm ni? I rinawmloh san kha" a rawn thinrim a beisei avangin a tilui leh ngat a

Mahse a la ngawi reng tho

"A la beidawnsan lo che a ang hle mai. Engtia rei nge in inzui? Engvanga rinawm loh san nge i nih?" Jin chuan a la zawt lui char char a

Julianne chuan thawk a la halh a, a zawhna chu chhang ta mai lovin "A tlai tawh Mister Starck. Ka room thleng min thlah avangin ka lawm e. Mahse ka luhsan phawt mai ang che"

"Jin" tiin a lo tihdik sak a

"Eng a?" A rawn dak chho vah a, a mitmeng pawl ralh mawi tak maiah chuan engmah a la lang chuang lo

'Min lo duh ve ngai lo aniang a' a ti rilru a

"Jin tiin min ko rawh" a ti nawn leh a, a ngaihtuahna chu a buai ve nak mai "A nih loh pawhin Jas tiin min ko rawh. Kan hun hman tawh te kha i hrechhuak leh mahna"

Julianne biang chu a rawn tai hlur mai

Jin pawh a insum thei tawh lo. Engtin nge engmah hre lo ang maia a awm theih le? A ni ve thung chu a puakkeh lo chauh a ni si a, theihnghilh daih a tum tehreng nen heti khawpa a la hneh em em si avang hian ama chungah ngei pawh a thinrim em em a ni

Nimin lawka kalsan ang khan a inngai leh tawh

"Ka hriatchhuah tir leh che a ngai a nih hi"

Hriattir lawk lem lo chuan a nghawng ah a chelh a, a lamah pawt hnaiin an hmui a in tawk fuh ta chat mai. Hun hi a ding deuh dawt a ni ber mai. Che chang lo hian a rim chu a hnim vang vang a

Vawikhat chiah an infawp mahse rei tak ni maiin a hria. A hmui a rawn ti che ve tlat. A rawn chhang let chiang a ni. A insumtheihna zawng zawng a hloh ta. Duhthawh deuh zawkin a han fawp thuk lehzual a, a lamah pawt hnaiin an inpawhna chu a chhiat a hlau zek zek mai

A ribbon duma a sam ṭawnna chu a han phelh a, a sam buang kawi deuh chu a tla thla suau mai. A sam a thlah hian inhmeh a ti ber zel reng a

Tu hmeichhia mahin hetiang reng reng hian an la tibuai ngai lova, mumang mai a nih a hlau em em a ni

A awma a rawn nam thut chuan a harh kawk mai

Hreh deuh chungin a thlah a, a hmel a han en vang vang a, a mitmeng pawl ral mai chu a thim deuh ruih a, a biang a tai tek bawk. Thawk a la halh a

"Khawngaihin duhtawk rawh" Julianne i'n a ti a

"Eng chu maw ka duhtawk ang? Fawh vang vang che kha maw? Min lo chhang let ve ngei chu a nih kha" a han ti let zat a

Julianne a lo en nasat deuh vang nge a biang a rawn ben lai a hre mai lo

Jin chuan pawi a ti lem lo. A ngaihtuahna ah chuan inthup tum viau mahse a la duh ve reng tih a hre nghal mai. A lo chhan let ve laia a fawhna pawh kha a la lum vang vang mai

"Khawngaihin let tawh rawh" a aw chu a thunun hram hram a "I hotel ah ngei hian security ka ko mai tur ania" tiin Julianne i'n a vau a

'Security koh a tum maw? Mai mai chuan a!'

Mahse Julianne thutak hmel chu a hmu vat

'A va huai reuh tak'

Jin chu tawlh let in a insiamṭha a, insumthei lo ngat se chu bul a ṭan tawh kha zawhpui ngei a tum hrim hrim ang

"Awle, Arabella. I thu ang chuan ni rawh se ka kal ang. Mahse room a i luh fel phawt hnuah chauh a ni ang. Tu pawhin kawngka rawn kik se, hawn miah suh ang che, i hrethiam em?"

"Engtin nge chutia min tih...." a rawn hnial let pang pang a

"I hrethiam em? Ka hotel a i awm chhung chu ka venhimna hnuaiah i awm tihna a ni" a ti hriam hrak a

"Tumahin tun ang hunah hian min tlawh lo tawp ang"

"I pasal hual hlui khan a la rawn tlawh leh maithei che a ni. Floor chung bera a rawn kal theih loh nan camera aṭang ka lo en reng ang. Nangmahin i sawm te...."

"Han sawi zo chiah teh Mister Starck. Ka kut veilam hian i biang ding lam ben a hreh miah lo ania"

"Jin zawk aw. Min ko duh lo a nih chuan bul ka ṭan tawh kha ka zo thei reng ania"

A hamhaih ve deuh tih a hmu reng. Mahse a rawn insiamṭha leh thuai a, inher hmak in Key card chuan kawngka a hawng a, engmah sawi zui lovin kawngka a khar hmak

Jin chu kawngka biang nghengin an infawh lai kha a ngaihtuah let leh a

Vawikhat infawh ringawt pawh hian a nunhlui natna a hriatchhuah tir leh thei a, Hmasial nunrawng tak a nih chhoh dan te, a thinlung mu hnu a thup bo reng tawh chu a rawn phu thar leh a ni

Kum tam tak hnua a vawikhat nan phurna thar a rawn nei leh a

Vawikhat infawh chu a tawk hauh lo

Thu a intiam a

'Ka upa tawh a, ka fing tawh bawk. Tun ṭum chu a duhdan danin min tikual tawh tur a ni lo' a ti rilru a

Mahse le

Vawi khat infawh lek chu a tawk lo nasa a ni

****

End of 11

CHHUNZAWM LEH TUR

PS: Chhiat kan tawk tlat mai a, ka rawn dah vat thei lo a nih pawhin min lo hrethiam hram mai dawn nia