CHAPTER 10
“Khapa kha inṭhen ta ila i nei angem?” tiin ka dul chu a chûl a, ka dâr vêlah chuan a hmuiin a chuk zauh zauh bawk. Ka khura, ka thaw leh deuh hak ṭhin, a chêt dân hian engmah min sawi tir theilo, ka danglam mêk zel a nih hi.
“Min chhâng la, khapa kha nge ṭha a kei?” a rawn ti leha, a chêt dân chu a ṭhulh chuang lo. Chu chuan min tidanglam tih a mah pawh hian a hre chiang lutuk tlat “Chu....chutiang a awmlo, i...lo...lan hma pawhin ka ṭhen tawh alawm” ka ti bah deuh niai a, hetianga a awm reng chuan ka tum loh deuhin ka awmpui ang tih ka hlau.
Ka laka a rilru put hmang ka hre chiang bawk nên in phal mai mai ka tumlo. Mahsela tûn anga a chêt reng chuan mi hrisêl ṭha leh mihring ni ve ta na fam chu châkna a awm lo theiloa, ka duh loh dân deuha awm ka hlau takzet.
“Khapa kha i la hmangaiha, mahsela i kîr leh chu ka phal tawh hauh lo ang. Ka nupui i nih hi, chu chu tumahin an thlâk danglam theilo ang” tiin a nui hul haka, a kut hlei lutuk chu chelh beh tumin ka man chata, mahsela amah zâwk chuan lo hum betin a kut pakhat chuan ka kut pahnih chu a chelh bet ta tlata.
A kut pakhat erawh ka taksa ah chuan a vah kualtir a, ka ip deuh chawih chawih mai. Hetiang lam ah hian tawnhriat ka la neiloa, engtia han awm tur nge pawh ka hre chuang lo, ka sa pup pupa ka ngaihtuahna a buai map bawk.
Min kuai herin ka hmuiah chuan a rawn fâwp a, tûn ṭum chu chhân let phût tih hriat tak hian a hmui leh lei chu a ti che kuala, ka insûm thei tawh biklo ka thiam ang ang chuan ka chhâng lêt ve a, hetianga danglam hian ka la awm ngailo. Hepa bulah hi chuan engmah hi tih tawh a awm theiloa, amah nên chuan a hmasa ber zel ani.
Fela nên kan inzui lai khân kan infâwp ve ṭhin a, mahsela la upa lo leh tawnhriat la nei tlêm chu engtia awm tur nge ka hrethiam phaloa, a duh ang khân ka chhâng lêt thei ngai hek lo. Tin, ka thianghlimna hi ka pasal neih hma chu ka vawng ang tih ka lo intiam ṭhin a, tûn thlengin ka la vawng nung bawk.
“U Remruat” tiin a âwmah chuan ka nam deuha, awmsawnin ka mitah chuan chiang tak hian a rawn ena. Tûna min en dân chu ka duhloh ber ani, hetiang chuan alakah ka luangliam tak tak mai ang, ka laka a thusawi hre reng chung chuan kei hian ka enga mah ka hlân theilo, nakinah min ṭhen leh thuai dawna, kei chu min kalsan vat dâwn chuvang chuan ka fimkhur angai a ni.
A hmai chu a thlan deuh dapa, tûnah tak hi chuan a awmdân chu a sexy ngawih ngawiha, mi a hip zar mai bawk. A shirt dum hak a taksa phuar ṭang tu chhana a pian nalh zia chu hai chi lah a ni heklo, a taksa lumna chuan min ur ham hama, a kap lama min do rûn tu pawh chu ka hriat hmaih heklo.
Mahsela hetiang tur hian ka la in peihlo, min duh em pawh ka hreloa. Ka pasal pawh nimahsela kan inneihna ah khân mutdun leh hetiang lam zawnga awm lo turin kan intiam dûn a nih kha, mahsela hetianga a awm hian keimah ngei pawh min ṭhawng lo theilo.
“Tinge? I hlauthâwng em ni? Khapa kha ka nih loh vâng em ni?” a rawn ti tham deuh chhaka. A aw zâwi lam leh dam dap si chuan engtin emaw tak hian chhûng lamah min fana, tûnah hi chuan mipa nelawm leh zaidam tak hmêl a pu a, a ngainatawm hliah hliah bawk.
“Chutiang a nilo, u Fela chungchang chu kan sawi chian viau tawh kha. Tinge a ni pawh chu i sawi renga? Pasal ka nei tawha, tin ka kalsan tawh bawk ka kalsan tawh lakah kîr mai mai ka tumlo” ka ti nawn leh ngata.
“A chhan chu a ni bula i lêt kha ka phallo, a hnaih che pawh ka phal heklo. Ka nupui i nih hi, ka âng chhûnga tlu lût tawh hi hnawmhnawk pakhat avânga buai ka duh lo, khapa kha hnaih tawh lo la animai. Mi ṭha a nih loh kha ka awm loh laia kan ina a rawn kal pawh kha ka duhlo” tiin ka sam ka biang zartu chu a hui kiang paha.
A chetdan zawi leh dam raih si avâng chuan chêt sawn pawh ka tum lêm lo, hetiang hian a vawikhat awmna a ni a. Dawn sawn nuam ka ti tlat a, ka awmsawn phal teuhlo, “Ka duh vanga hruai lût ka ni hleinem, amahin a rawn lût ringawt a nih kha. I hnênah pawh vawitam ka sawi tawh, ka bialpa hlui a ni ngei e, mahsela ka duh tawh lo. Kir leh ka tum tawh lo ka ti tawha, ka kîr tawh lo bawk ang” a mita en chung chuan ka sawi chhuak dap dapa.
“Hnaih tawh hauh suh, ka nupui i nih chhûng chuan tu mipa mah hnaih suh, ka duhlo. Ka nupui nihna hian engkim a huam tela, mipa dang i kawp a nih vaih chuan ka lâwm lo khawp ang” a rawn ti leha, engah nge maw chutianga mipa kawp mai mai tur chuan min ngaih ziah le?
“Chutiang tur chuan em ni min ngaiha? Nang mah ang in ka lerh ve lo aw, pasal ka neia uire mai mai ka tum lo. Engpawh thlengin inṭhen leh dâwn pawh ni ila kan inneih chhûng chuan tu mipa mah kawp ka tum lo, nangmah zawk a nihkha nuthlawi lo zuia khua a an sawi hat tûra awm ni” tiin ka ner sawka.
Ka thusawi avâng chuan thaw hakin “Thingtlang chu fel viau mah ula in ṭawng thei ve deuh chu ani, hriatchian loh ngaihdan siama vawrh darh in hmang dâwn tlat. Hoteah mualpho a awl dâwn a nih hi a, khatiang nuthlawi zu heh lutuk kha ka duh i ring em ni? Hmeichhe zu heh lutuk ka duhlo” a tihlai chuan ka lo nui haka.
“A nihchuan i bialnu kei min neih chhan kha i duh lo tihna em ni? I kawp tho kha, keimah avânga inṭhen ah min puha, ka chungah i lâwm lo bawk. I nu leh pa in min neih luih tir che avângin a ni lo'm ni hetianga ka chunga i awm? Khanu vâng vek kha a nia, i ṭhen duh loh avângin hetianga kan awm angaih phah hi” ka ti chu ka kâ a rawn hup chata.
“Khatiang kha kan sawi tawh lo thei angem? Tûnah chuan ka sawi peih rihlo, khatianga ka chêt i duhlo a nih pawhin Maria chungchâng kha chu sawi tawh suh. Hmeichhe ṭha tak a ni a sin, ka nu leh pa ngaih ang ngawt kha a nilo, hmeichhe inzuar chu a ni ngei e, mahsela a nun zawng zawng in hriat ve loh chuan sawisêl ve ngawt suh” a tih tâkah chuan ka lâwm lo lehnghâl ringawt tawha.
Kei hi hmeichhe sual tak niin min inngaih tir bawk, chubâkah a thlavang a hauhna chuan hetianga awm tur kan nilo tih pawh a tichiang viau bawk. Lo mutpui ringawt ila min hmusit ngawih ngawih dâwn tihna a nia, keiin ka bialpa hlui ka hmuh theihloh laiin a ni chuan a bialnu thlavang hauhin a be thei bawk ang maw?
“A nihchuan keipawh ka nun dânah rawn in rawlh bik suh, inṭhen leh tur tho kan ni a, hetianga awm pawh hi a ngailo. Tu emaw hmun ruak luah tu mai mai nih chu ka duh biklo ania, chuvang chuan awmsawn tawh rawh, engmah sawia tih dun ka duh bik lo, ka bialpa hlui ka biak leh biak loh pawh ka thu a ni. I nuna ka inrawlh dâwn loh ang bawkin nangpawh inrawlh bik suh” tiin ka namsawn a.
Khum hmawr lam chu panin puan chu ka sin ṭha sauh sauha, ama lam pawh en tawh lo in ka mit ka chhing zui hmak bawk. Hetianga awm a duh anihte chuan keipawhin ka thiam lutuk alawm, ka duhdâna a awm theilo a nihchuan keipawh a duhdana ka awmna tur ka hre bik lo.
“I nunah buai la, keipawh ka nunah ka buai bawk ang. Chuti chuan kan in rem thei ber ang“ tiin ka ngawi zui ta daiha, engmah a rawn sawi tawh lova, keipawhin ka sawi tawh bik lo.
Zîngah chuan tho in rawng ka bâwl zui leh sawk sawka, ni pawh a dân ngai tê in exer ala leh tawha, hrisêl lo chi pawh anilo. Zu chu in ve bawk mahsela a in ngun hauh lova, tûnlai phei chu a in lo hrim hrim zâwk. A nu leh pa runluih nân khân a in mai mai a nih ka ring, zu duh tak tak te chu nikhat lek in lo a an awm pawhin an talbuai ania.
U Remruata erawh chu a danglam hlak thung, a ngawl a vei hauh lo tih ka hre chiang bawk. A rawn haw chu lo bia in Vawk chaw pe tur chuan ka ti a, a phun nghal hluk hluk mai. Tlai lamah chuan ka naute kan rin theih dâwn avângin lo feh pawhin ka ngaihtuah lutuk dâwn lo va, zîng lamah erawh hi chuan ka ngei avâng hrim hrim pawh hian pêk tir zel ka tum.
“Ei rawngbawl i thiamloa, hnathawh i thiam hek lo. I tih theih chhun i tih kha lawm takin zuk ti mai mai teh a, mahni thawh âwm tâwk kan tih hi chuan phun nawi loh tur. Kal zung zung mai teh“ tiin ka siamsa chu ka pe a, ṭin te khat a la kham tâwk miau avângin a chaw pawh chhum ngun a ngai lova, kan vânneih phah viau mai.
“Ninawm lutuk, Vawk vulh mai mai turin lehkha ka zir lo” ti a a phun chhuak bul bul chu enin “Vawk vulh i duh loh chuan ṭha taka awma hnate zawn ve mai tur che alawm, tikhan Vawk pu nih kha i inhmeh tâwk chiah” ka tih rual chuan rawn inherin rum mang tara hian min rawn ena.
Min khawih châk hmêl zek zek hian ka hria, min sawi nek a châk ta ve ang. Mahsela engmah sawi bik lo chuan inhnuai lam panin a inkhai thla ṭuih ṭuiha, tûnah tak hi chuan thingtlâng pa tak tak te pawh a ang.
Nui deuh sakin “I sual bawka, ka sual ka chhuah ve a nih kha. Tikhan awm zêl rawh” tiin ka nui deuh saka, faifuk rat rat chung chuan inchhungah chuan lûtin rawng chu ka bâwl zawm mawlh mawlha.
“Ti per tawh suh ka pe dawn che, mâwl a. Nang zâwng Vawk, ka vaw hlum dâwn che mawni Vawk mâwl lutuk, ka vaw hlum tak tak ang che. Eng ang vawk nge maw i nih le?” reilotea Vawk hau ri leh ṭawngkam chhe pui pui chhak chhuak tu avâng chuan ka nui haka, a lo hap per khum a ni ngei ang.
Ka chawhmeh siam a hmin tâkah chuan suan zung zungin pâwn lamah chuan ka chhuaka, ka nau pawh dawr nghâk turin a rawn kal leh der tawha. Hlawh tlêm tlêm kan pe ve ang che kan tih aṭang khân a phûr êm êm a, keini tân chuan malsâwmna a ni ringawt.
Dâwr chahbi chu pe in thil pawimawh chu ka hrilh mawlh mawlha, dawr vêng ṭha tur leh mi thil en en uluk tur chuan ka chah mawlh mawlh bawk. Tûn ang laiah dawr rawk hmang an tam bawk nên ka fimkhur a ni ber mai.
A kal liam hnu lawkah ka pasal chu inhnuai aṭangin a rawn chho a, ka hmu chiah chu ka nui deuh haka. Ka nui ri hria chuan rawn hawi chhuakin rum zet chuan min ena, a shirt hma lamah chuan Vawk chaw a lo kai nuaiha, a hmai vel pawh chu a bal vek bawk nên nuih loh theih pawh a nilo, a va han inhmeh tak.
Remruatkima pian angah lo ngai tawp ru
“Min nuih miah suh” a rawn ti tawi taka, min rawn pan phei pahin a thawmhnaw a Vawk chaw kai nuaih mai chu a ena, a ner leh sawk sawk ṭhin. “Tenawm lutuk, Vawk mâwl tak a ni, a chaw ka pe dawn reng a, ka dah thlâk hma hma in lo hap zâwt zawt mai. Talh daih tur a nih khu” a tihchuan ka lo nui leh haka.
“Chutiang te chuan ei tham pawh ala awm nâng, a têt êm khu nangmah pawhin ei atâna vulh chu a khawngaihthlak i ti a ni lo'm ni? Lût phawt ang“ ti a kal ka tum lai chuan min rawn ko ri ka hriat avâng chuan ka ding leh riha, Hmingthanfela bawk a ni.
Tûn chu a hmêl a pângngai thlap tawha, a rawn nui sâng reng bawk. “Nimin avâng khân thupha chawi ka duha, kan in be lawk dawn em ni?” a rawn tih avâng chuan u Remruata chu ka melh zawka, a ni erawh alo mengrum leh nasa tawh mai. U Fela a hmuh apiang hian hetiang hmêl hi a pu ve ziah, zanlama a thusawi ka hriatreng avâng chuan ka ngei ve bawk nên u Fela chu ka nuih sâng a.
“Enge i sawi duha?“ ti a ka chhân rual chuan phur tak mai hian “A falin in be lawk ila, nimin ang kha chuan ka che tawh hauh lovang, tûnah chuan pasal i nei tih ka pawm tawh alawm” a tihchuan ka bu nghata, misual anilo tih ka hria a Remruatkima min tihdan ka ngei bawk nên runluih ve pawh ka duh hrim hrim.
“Lo kal la sawtah deuh sâwn kan inbe dâwn em ni? U Remruat in chhungah lo va lût la, chaw ei ka peih tawha i duh leh min lo nghâk lo in lo insiam la lo ei mai rawh aw” ti a u Fela kalpui mai ka tum chu ka kutah chuan a rawn vuan bet tlata.
“Hepa hi hnaih tawh suh ka tih che kha, engvanga la biak hrâm tum nge i nih?” tiin ka chungah lâwm lo tih hriat tak hian min ena, a awmdân ṭhin hi ka ngai thei ṭhin lo. Hetianga min ti bik fo hi ka lâwm lo ve tak zet “Ka nun ania rawn in rawlh lo teh, a thusawi pawh i hriat chian kha kan rei dâwn lo” tiin a kut chu ka dahthlak saka.
“Kal ang” tiin kan in piah deuhah chuan ka va dinga, u Remruata erawh chu chak zet hian inchhûng lamah chuan a lût ta daiha. A duh duh in lo awm vêl mai mai teh se, a bialnu mah thlah theilo in ka chungah thuneih te a tum vela, a duh ang hian ka awm bik tawp lovang.
“I sawi duh chu sawi vat la, nimina i chêt dân erawh kha chu ka lâwm hauh lo ania. Nangmah avângin khaw mipuiin min sawi leh tawh lehnghala, khatiang khân rawn che tawh lo la ka duh, pasal ka nei tawha. Khawngaihin khatiang lam hawi zâwng chuan min ti tawh lo la ka lâwm khawp ang” tiin ka sira rawn ding chu ka melh zawka.
“Ka hria a lawm, kha avânga ngaihdam dil tum che a lo kal ka nia. Ka ti nawn leh tawh lovang, min ngai dam dâwn ania, mahsela hmân ang khân ka la duhin ka la hmangaih reng che a. Chutih rual erawh chuan i duhdân zah sak che in ka tibuai lo ang che, ka nupui i ni thei lo ta rau rau chu i ṭhian tal ka ni thei angem?” a rawn ti a.
Rang zeta a mah ka en chu a lo thu tak rana, a thusawi chu a fiamthu hauh lo tih ka hria. Ka rilru a tibuai map mai, ṭhian nih duh tak tak a sawi nge a nih anga, beisei dang a neih avânga ṭhian nih a duh zâwk ang tihchu ka ngaihtuaha, ka thluakah chuan thildang dang a rawn lût zung zung bawk.
“I ngaihtuahna kha ka hria, mahsela ka chhungte'n min hau a, tin keimah pawh khatianga mi nupui ka lo bia leh ka lo khawih kha thil ṭha lo leh zahawm loh tâwp khâwk a ni tih ka hria a, i hmelma nih ai chuan i ṭhian tal nih ka duh ani. Khawngaihin min ngaidam la, ṭhian tal kan ni thei angem? I lungngaihna leh manganna chhâwk tur tal pawha la awm ve ka duh a ni“ a rawn ti leh dap dapa.
Ni e, chutiang a duh miau chuan min tih buai tawh loh phawt ahnu ka tân pawh kan lo in hre rei ve tawh bawk nên a ṭhian anga awm chu ka pawi ti bik lo.
“Aw le ṭhian chu kan ni thei ang, ṭhian anga awm chu keipawhin ka duh alawm“ tiin ka nuih ta var vara, a ni pawh ka thusawi avâng chuan thaw huai in min nuih lêt a, “Ka lawm e, in pa pawh a ṭhat kha, a chanchin ka lo hria a. I tân pawh khatiang mi hausa fapa leh lehkhathiam bawk si, hmelṭha leh zêl chu an duhawm zâwk ngei ang, ka haw phawt ange ṭhian anga kan awm dâwn tâkah chuan ka thawveng huai mai” tiin nui chungin a kalsawn zuia.
Keipawh thaw huaiin rilru thawveng tak chuan in lam pan chuan ka kal zuia, in chhûng ka lût chu ka pasal chu ka hmaah lo dingin kawngkhâr nghêng rawk chuan min nawr beta, a rawn chêt dân teh thut chuan min ṭhawng bawk nên ka âng phuau chuan ka en reng ringawt.
“Khapa kha i la duh tiraw? Enge in sawi? Kei hi min ṭhen a a ni bula kal kha i tum em ni? Engvanga la hmu ṭang ṭang nge i nih a, ila kalsan thei tak tak lo a nimaw?” a rawn ri nghal mawlh mawlha, engvanga ngaihtuahna ṭha lo pui pui nei nge maw a nih le.
“Nang ang ka nilo ka tih tawh kha, tin i bialnu pawh i ṭhen thei bikloa enge ka bialpa hlui biak mai mai pawh chu i duh loha? A ni nên te chuan ṭhian anga awm a sin kan tum ni. Nang ang lo takin a ni chuan ka rilru pawh a hrethiam bawk, nang chuan mi hmuhsita mawilo tak taka biak bâk i thiam lo. Chaw ei ang engmah ka sawi peih tawhlo” tiin kal mai ka tum chu min la vawn beh tlat avâng chuan ka mitmei chuan min thlah turin ka ti a.
Min thlah mai duh siloh avâng chuan tâl chhuah tumin chêt ka la zuia, chuveleh rawn kûn hniam thutin ka hmuiah chuan a rawn fâwp buan buana, min fawh dân chu a na in thinrim chunga min fâwp a ang ber mai.
Ka thaw theilo hial bawk nên a âwmah chuan ka nam dat data, mahsela a duhthawh sauh zel bawk nên ka seh ta tawpa. A awm sawn rang ngei mai, ka ngei lutuk chuan a hmaiah ben tum chuan ka kut ka phar zuau tihah ka la lêt leh ta zâwka.
“I duh duh hunah min fâwp tawh suh ang che i hria em? I nupui chu ka nimai thei, mahsela nizânah i rilru i sawi chian tawh viau kha, nang hnaih loh che hi ka tân chuan himna a ni. I rilru a hmeichhe dang awm reng chunga min fawh kha i inthlahrung ve miah nange, i bialnu khân hria in hmu phei sela chuan a ṭhen vang vang ang che. Min tawk tawh hlek suh“ tiin ka kalsawn zuia.
Thinrim ti tau sawk sawk chung chuan chaw ei chu ka siam mawlh mawlha, kan in be leh tawh lova, a ni pawhin engmah a sawi buai tawh hauh lo bawk.
REMRUATA POV...
Ka hmaa min melh duh hauh lova chaw ei hmawk hmawk a thinrim avânga in seh ruh ṭun chunga chaw bar mawlh mawlh chu ka en leh zeuh ṭhin. Ka chunga a lâwm lo viau pawh hi ka dem hauhlo, keimah ngei pawh hian ka rilru hi ka hrethiam tawh bik lo.
Maria-i kha ka duh viau emaw ka ti a, mahsela engvanga ka nupui hi mipa dang tân phal tlat lo leh ṭhian anga a kawm pawh phal miah lo nge ka nih pawh ka inhrethiam tawh bik lo, engvanga mipa dang in an hnaih apianga keimahah thikna awm ve ziah nge ka hre hek lo.
Ka duh ti dawn ila Maria-i ka duh zia ka hai bawk silo, mahsela he ka nupui khawpui nulate anga vun ngo leh no nalh tak nei ve lêm lo, vun enkawlna inhnawih ngai bawk silo hian ka rilru a luah tlat bawk si.
Keilo mipa dang bula a nui ka hmu thei hauh lova, ka hnaih duh chuang silo. Kei hi a tâna pasal ṭha lo ber chu ka ni thei mai angem tih te ka ngaihtuah a, engvanga khapa a hnaih kha phallo em em nge ka nih pawh ka hre hek lo.
A vun mamin no ve kher lo mahsela duhtawkin zahna nei miahlo vin hna a thawk bawrh bawrha. Hmeichhe tam tak ang chu nise in la no takin an pilh hlek pawha an au ṭhin ang khân a au a au ngei ang, mahsela hliam a neih pawhin ngawi rengin a enkawl mai ang. Chutiang bawk chuan keimah pawh min en kawl bawk, a fehna ang leh a hnathawh ang hi Aizawl a kan ṭhian hmeichhia te khân thawk ve sela an tlin hauh lo ang, khati chung khân hmusit deuh khân an lo ṭawng khum ṭhin a, tûnah erawh an thawh ang rau rau ah chuan an tluk loh zia leh an in taimak hleih zia ka hre chiang ta viau mai.
Ka lo hmusit ṭhinte kha ka inthiam lo viau bawk, a theih tâwk a a chhûngte a enkawlna hi ka ngaisang bawk. A mah ang hi ka lo kawp ṭhin hmeichhia te khân ti ve dâwn sela an mizia nên pawh an tlin dâwn lo tih ka hre chiang viau mai.
“Insiam vat ila kal ang“ tiin thleng sil mawlh mawlh chung chuan a rawn ti a “Aw le ka nu“ ka lo ti chu rawn hawi lêtin ngeiawm min tih hmêl tak hian min rawn ena, keipawhin engvanga khatianga ti kha nge maw ka nih ka inhrethiam biklo.
Ka kâ aṭang a rawn chhuak ringawt ni berin ka hria, he nu hian ka zia zawng zawng a thlâk mêk anih hi. A bulah ka awm rei tulh tulha, ka zia ka thlâk tam tial tial tih hi ka inhai biklo.
“Kal ang ka zo” tiin roomah chuan lûtin a inthlak a ni ngei ang a reh vang vanga, ka nupui a ni tho a tiin ka va lût ve chu thawmhnaw a lo la ha hman lo nên a lo au tuar mai. Keipawh ka ding chawta, ka thil hmuh avâng chuan ka kâ ho mai, a taksa lang lo lai chu a lo no nalhin a var phaka, a pian lah chu a mawi phian lehnghâl.
“Chhuak vat rawh, ka inthlâk tih i hre reng a ni lo'm ni? Engvanga khatianga rawn lût nge i nih? Chhuak vat rawh” tiin puan chuan a intuama, keipawh chu harh chhuak zawkin ka chhuak leha.
Ka aw ka thian kharh kharh bawk, khatianga a lo awm ka ring lo lutuk bawk nên ka thil hmuh lah chu ka mitthla ah a châm reng mai lehnghala. A taksa mawi zet kha a lo thup tlat ṭhin a, tûnah chuan ka ngaih ang mai mai a nih loh zia leh a pâwnlam ang ngawt a nih loh chuan ka hre chiang leh zual.
Hmeichhe nalh tak a lo inphûm ru renga, a inthlak zo rawn chhuak chuan min rawn nek sawka. Pâwnah a Em nên chuan a chhuak nghal nal nal bawk, nui sukin keipawh chu ka inthlâk zung zunga.
Ka chhuah leh lai chuan nimin lama a sarzuk lawh kha a lo ei mawlh mawlha, a ei dân chu a tui hmêl êm avâng chuan ka va lâk saka, ka ei rual chuan ka ner nghal nawng mai. A thur lutuk tlat, ka paih rual chuan “Khatiang tur te chuan rawn ei ve loh mai tur a lawm, ka neih tlêm sa nên rawn ei ve tawh hauh suh“ tiin hmalam pan chuan a kal nghal nal nala, a hnungah chuan muangchanga zuiin ka nui deuh saka.