THE SICILIAN (Book I &II) By Mario Puzo (Completed)

[Loma hmar]

Chapter 4a

He September, 1943-ah hian Sicily mipuite chu a ruka sumdawnna avangin an nung tawk tawk a ni ber. Mipui ration lah chu indo atang khan khauh taka ken kawh a la ni reng a, loneitute chuan an tharchhuahte chu sawrkar kudamah a man bituk awm sa - lehkha pawisa hlu lo tak - in an chhung lut a, chungte chu sawrkarin mipuite hnenah man tlawm zawka hralhin a sem ang a, mipuite chuan an nun khawchhuahna tawk ei tur an nei mai tur hi a ni a. A takah thung chuan loneitute chuan an thil tharchhuahte chu a theih anga tam an thukru thin. A chhan chu sawrkar kudama an chhun luh ang ang chu Don Croce Malo leh a thuhnuaia awm Mayorte chuan Black Market-a hralh turin an hauh tlat thin vang a ni. Mipuite chuan black market-a thil an lei a ngaih phah a, dam khawchhuak ve tur chuan a ruka sumdawn phal lohna dan an bawhchhiat a tul tlat a ni. Man chhuah an nih chuan jail-ah an tang mai thin. Democracy sawrkar rome-a lo ding ta chu eng nge a thatna ni ta ang? mipuite chuan riltam chungin vote a thlak thei a, chuzawng chu a ni mai.

Turi Guilianno leh Aspanu Pisciotta te chuan rilru zangkhai tak chungin chu dan chu an bawhchhe mek a ni. Heng thil zawng zawng hi Pisciotta ruahman vek a ni a; loneitu pakhat nen inberemin, cheese tawlailir phur khat chu thingtlang atangin montelepre-a black market dealer hnena tawlhruk tur a ni. An hlawh atan chuan vawk bawp pali leh sa thithun kho khat a ni a, chu chuan Guilianno-a farnu te inhualna ropui taka lawmna a daih zan dawn a ni. He mi ti tur hian dan pahnih an bawh chhe dawn a- Black Marketa sumdawn leh Italy ram bial khat atanga bial hmun danga bungraw tawlh ruk te chu. Black Marketa sumdawnna chu thuneitu tan pawh dan hleihtheih a ni lo va, sicily ram khawi hmunah pawh jail an nei vek a nih ngawt loh chuan. Mahse bungraw tawlhruk chua dang daih a ni, national Police, carabinieri te chuan thingtlang lam thleng pawhin an fang reng a, roadblock te siamin kawktu/enthlatu an ruai bawk a. Don Croce Malo-a bungraw phur, American Army truck rual erawh an khawih thei bik lo, special military pass an nei thlap a ni. Mahse loneitu tenau te leh thingtlang mi rethei riltam tak tak ho chu tam tak an man thei thung.

Farm thlen nan chuan darkar li lai hun an hmang a. Guilianno leh Pisciotta chuan Cheese leh bungraw dangte chu Sabengtung chungah chuan an hlang a. Bungraw thup nan chuan a chungah hnim leh mau tangte an dah a, chu chuan ranchaw, thingtlang mi tamtakin an kawl thin angin a lang thei dawn a ni. Chutianga bum an tumna chu tawk hlein an hria a, naupangin a nu leh pa laka a rohlu a thuhruk ang maiin; tlangah kawng ruk a awm tih an hriat avang te pawh chuan an ringtawk hle mai bawk a.

In lam pana an chhuah leh chuan, Guilianno chuan hma lama Carabinieri an awm leh awm loh en thlithlai tur chuan Pisciotta chu a tir a, hlauhawm a awma inhrilhhriatna tura faifuk dan tur an ruahman thlap bawk a. Sabengtung chuan bungrua chu phunnawi hauh lo leh buaipui ngai loin a phur zel a- chumi atan chuan a lawmman a lo la lawk tawh reng a. Engmah buaina tawk lovin muangchangin darkar hnih lai chu tlangchhip lam panin an kal ta a. Guilianno chuan an hnung lam mel thum vela hla a mi, an kawng zawh lai rawn zawh mek, sakawr chunga chuang mipakhatin Thlahpawlh sabengtung paruk a rawn khalh mek chu a hmu ta a. Black Marketah chuan kawng ruk chu midangin an hre ve a nih chuan, police ten hriain an lo chang thei tlat a ni. Chuvangin palh a awm thuah, Pisciotta chuan a hma feah a lo va en thlithlai a ni.

Darkar khat hnuah chuan Aspanu chu a va um phak a, lung lian tak chungah a lo thu a, khuh bawrh bawrh chungin sikret a lo zu a. a hmel a dawldang hle mai, mei zu tur a ni lo asin mawle. Guilianno chu a bulah chuan a thu chawl ve a. Naupan lai ata tawh an inzawmna a nghehna chhan em em chu a tu amah hian engti kawng zawng maha inthuhneh an tum ngai lo hi a ni, chuvangin Turi pawh chuan engmah a sawi lo. A tawpah chuan Pisciotta chuan sikret chu a paih a, an kal tan leh ta a, Guilianno chuan sabengtung chu a kai a, a hnungah Pisciotta chuan a zui bawk a.

An kalna kawng chuan a changin kawngpui leh thingtlang khaw tereuh te te a kal tlang thin a, a chang chuan hmanlaia greek ho tui dahkhawlna, milim ka atanga tui chik chhuak tur tur awm te leh Norman Castle, kum za liam ta a chu kawng atanga rawn runtute danna tur atana an siam te pawh an paltlang bawk. Guilianno chuan kal pahin Sicily ram chanchin leh ama hma lam hun turte chu a ngaihtuah veng veng a.

Ramngaw tereuhte, thing din thulhna hmun an lut ta a, hetiang ramngaw hi sicily-ah chuan a tlem tawh hle, Lung lian pui pui te leh Marble laih chhuahna hmun chauh chu a thang emaw tih mai tur a ni. Tlang letliam an thlen hunah chuan Montelepre panin an chhuk vang vang thei tawh ang a, National Police, Carabinieri ho veivak lakah an fimkhur pawh a tul sawt ang. Quattro Moline, kawng pali intawh khawmna chu an thleng ta a, he tah hian fimkhur a ngai hle. Guilianno chuan sabengtung chu pawt dingin Aspanu pawh ding rih turin a ti a. Ngawi rengin an ding vang vang a, thawm danglam hriat tur a awm lo, rannung te tak te te thla zap ri mam mam mai lo chu. Chu lai hmun chu him taka kal pelin ramngawah chuan an pil bo ta thuai a, Guilianno chuan a ngaihtuahna a kawm leh ta veng veng a.

Thing ho chu a lo ding khat ta thut a, hmunfai lai, lungte thil hmun, mau tereuhte te leh hnim awm pheuh pheuhna hmunah an lut ta a, tlai lam ni chu a tla lek lek tawh a, chu lungchang chiin a bawh tlang pangah chuan dul ruaiin a lang a. helai hmun fai lai pelhah hi chuan kawng chu inthlep kual sei takin Montelepre panin a chhuk a ni. Guilianno chu a ngaihtuahna atang chuan a lo harh chhuak thut a. nawhalh nawh tek anga eng de zawk hi a mitsir chuan a hmu ta thut a. Sabengtung chu pawt dingin Aspanu pawh chu a kutin a chelh ding a.

Pen sawmthum vel leka hlaa thingbuk atang chuan hmelhriat loh mi pathum hi an lo chhuak a, Guilianno chuan an sipai lukhum dum khawng tak te, an form dum a dara a vara inbel te chu a hmuh hmaih lo. Beidawnna leh man an nih avanga zahthlak a tihna chuan a rawn tuam nghal hlup hlup a. mi pathumte chu hmalam panin, silai hman inpeih atin an lo phei vat a. An zinga pahnihte chu an la naupan hmelin an hmai chu a tai hlar a, an lukhum chu nuihzatthlak takin an tukkhum lamah an dah lei bar bawk a. An machine pistol an han tin vel danah an phurin thahnem an ngaih hmel hle.

A laia rawn kal Carabinieri chu midang lakah chuan a upat hmel deuh a, rifle a keng bawk a. a hmai chu a chik hrup a, a ser do bawk a. A lukhum chu a kun takin, a mit chhin lo tawkin a khum a, a kawrnghawngah chuan sergeant chhinchhiahna a inbel bawk a. Guilianno-an eng de zawk a hmuh kha chu pa rifle ken Niin a chhun det a ni. Chu pa chuan za lo zeta nuih chungin rifle chuan Guilianno awm zawnah a tin ngar a. Chu nuihzatna chuan Guilianno-a beidawnna chu thinrimnaah a thlak tir chiang hle.

Sergeant rifle keng pa chu lo kal hnaiin, guard pahnihte chuan a sir ve veah chuan an rawn zui bawk a. tunah chuan Guilianno chu a inring ta hle, Carabinieri naupangtak pahnih, machine Pistol kengte chu hlauhawm turah a ngai vak lo, chumite chuan fimkhur lo takin sabengtung chu an pan a, an mitangte chu an ngaihsak lutuk lem lo. Guilianno leh Pisciotta chu sabengtung bul atang chuan kal hlat tirin, pakhat chuan a silai chu akin an thil phurh thup nana an dah chu a han hlip a, bungrua vel a hmuh chuan a faifuk raih a. Aspanu-an a hnaih ruk hriau hriau pawh chu a lo hmu lo, mahse sergeant chuan lo hmu rengin, “Nang, hmuihmul nei pa kha, awm sawn vat rawh,” a rawn ti a, Pisciotta chu Turi-a bulah chuan a tawlh phei leh ta a.

Sergeant chuan a rawn hnaih hret a, Guilianno chuan uluk zetin a en reng a, a hmai chik hrup chuan a tih lan chauh hmel hle, mahse a mit chu a de sawr thung a, “A tha e, tlangvalte u, cheese tha tak a nih hi mawle, Kan barrack-ah Maraconi nen a tui viau dawn hi. He mi in lakna loneitupa hming chu min hrilh ula, in sabengtung nen ka kal tir ang che u,” a ti a.

An chhang lo va, chu pa chuan a han nghak deuh a, an la chhang chuang lo. A tawpah chuan Guilianno chuan, “Lire sangkhat ka nei a ni, min kal tir a nih chuan,” a ti a.
“Chu I pawisa chuan I mawngek I hru dawn nia!” Sergeant chuan tiin, “In ID han phawrh teh u le, a mumal lo viau a nih chuan ka ek tir ang che u nga, in mawng ek hruk nan ka hmang leh bawk ang.” A ti a.
Chu tawngkam chaltlai tak, chu uniform dum-a inthuam pain a chungtlakna chuan Guilianno thinurna a chawk tho chiang hle. Chu mi rual chuan a inman tir ngai dawn lo tih leh an chhungkaw ei tur a ruk tir ngai lovang tih a inhre chiang hle bawk.