NATHAN SEASON-3 (Episode-3) SCYTHIAN KNIFE Part-3 (by : Aaron Malsawmdawngzuala)

Hnuchhuina lampang chi ho
Aaron Dustin
Posts: 214
Joined: March 14th, 2018, 10:15 am

NATHAN SEASON-3 (Episode-3) SCYTHIAN KNIFE Part-3 (by : Aaron Malsawmdawngzuala)

Unread post by Aaron Dustin » June 3rd, 2020, 8:27 pm

NATHAN SEASON-3 (Episode-3)

SCYTHIAN KNIFE (Pt-3)

Written by : Aaron Malsawmdawngzuala

**********

Zanlai dar 12 a ri a, Margareth-i pawh an inkawtah chuan a lo vei kual chhen mai a, a mu thei ngang lo a ni. Chutih lai chuan Nathana ke-a a rawn haw mek chu a hmu fuh hlauh mai a, Margareth-i chuan, "Nathan, ilo haw tawh maw? Ka lo nghak char char che a." a ti a. Nathana chuan, "Eng atan nge minlo nghah a?" tiin a zawt a. Margareth-i chuan, "Tluangtei'n Investigator hnena i kal thu min hrilh a, lo leng lut ta che. Thingpui te kan in anga, titi lawk teh ang." inthlahrung deuh tak chuan a ti a. Nathana chuan, "Awle a tha alawm, lut ang hmiang." a ti a, an lut ta a. Thingpui chu an indun a, Nathana chuan, "Amosa chu a thi a, a chhan erawh hriat ala nilo. Mahse a lan dan chuan a thih chhan chu kha chemte vang kha a ni, chemte hmanga thah nilovin, chemte vang zawk a ni." a ti a. Margareth-i chuan, "Anih chuan ka nau Ropuia kha tualthattu anilo tih i ring ve tho animaw?" a ti a. Nathana chuan, "Margareth, hriatthiam tum hram teh. Proof engmah kan la neilo a, engmah thuchiang ala awm lo." a ti a. Margareth-i chuan, "Chutiang lam nilovin, nangmah hrim hrim hian a mimal takin Ropuia kha tualthattu a nih i ring bik lo tiraw?" tiin a zawt leh a. Nathana chuan, "Hnuchhui hi ka hna ani a, ka rin leh rinloh chu a pawimawh lo." a ti a. Chutih lai chuan inchung lamah chuan thawm a rawn awm a, Margareth-i chuan hlauh hmel tak hian, "I hre ve em?" a ti a. Nathana chuan, "Engchu maw?" a lo ti hu mai. Margareth-i chuan, "Thawm kha..inchung lamah." a ti a. Nathana chuan, "Engmah ka hre ve lo." a lo ti a. Margareth-i chuan hlauthawng tak hian, "Ka nu thattu kha ani ngei ngei ang, Nathan..ka hlau ania." a ti nghal chel chul mai a. Nathana chuan, "Lo awm rawh..ka han en ange." a ti a. Margareth-i chuan, "A ngailo, kal lo ang. Alo vit ve mai ang che, kal suh." tiin Nathana banah chuan a pawt a. Nathana chuan, "Lungngai suh..ka han en ange. Engtin mah ka awm lo ang, hlau reng reng suh." a ti a. Margareth-i chuan, "Awle, mahse fimkhur rawh aw.." a ti a, Nathana chu a han chho ta a. Reilote hnuah chuan a lo chhuk leh a, "Engmah a nilo, sava vel mai mai an niang, hlauthawng suh. Ka haw phawt ange, nangpawh mu tawh rawh." a ti a. Mahse Margareth-i chuan Nathana kut chu a vuan tlat a, "Keimah chauhin ka awm sia, ka hlau alawm. Khawngaihin min riahpui rawh, Nathan..keimah chauh chuan ka awm ngam lo." a ti a. Nathana chuan, "Ngawiteh, a chi loh. Ka haw zawk ange, tumah an awmlo, hlau suh." ati a. Margareth-i chuan, "Aih, min kalsan suh. Ka room ah ilo mu ve anga, engmah a thleng dawn chuang hleinem, keimah chauh chuan ka hlau a ni." a ti tlat mai si a. Nathana chuan, "Awle, anih chuan sitting room Sofa ah hian ka mu mai ange, i room ah em chuan ka lo mulo mai ang." a ti a. Margareth-i chuan lawm tak hian, "Awle, ka lawm ngawt ang. Blanket leh lukham ka lo la ange, tikhan lo awm rawh." a ti a.

Tluangtei te inah chuan Pi Hriati chu hman hmawh em em hian a va luta, a luh rual rual chuan, "Tluangte...Tluangte, min pui rawh." a rawn ti lut nghal chiam chiam mai a. Rinawma chuan, "Ehe, enge ni ta?" a lo ti a. Pi Hriati chuan, "Ka fanu, Sangtei saw...darkar 1 chuang bathroom ah a awm tawh. Ka bia a, min chhang thei silo. Khawngaihin min pui hram teh u, ka hlauthawng a ni." a rawn ti lawm lawm a. Rinawma leh Tluangtei te pawh chu Pi Hriati te inlamah chuan an tlan phei ve ta nghal a, reiloteah chuan an thleng thuai a. Bathroom ah chuan Sangtei chu alo la inkalh khum reng a, Rinawma chuan, "Sangte...Sangte..ka tawng i hria em?" tiin a han au vak vak a, mahse Sangtei chuan a chhang lo. Tluangtei chuan, "Nu Hriat, enge awmzia?" a ti a. Pi Hriati chuan, "Ka thianloh a ni, ka thiamloh vek a ni." tiin a tap hawm hawm a. Rinawma chuan kawngka chu a han chhui hawng thuai mai a, Sangtei chu bath-tub bulah a lo let reng mai. A kut chu a lo zai thi vak mai hi a lo ni a, a kut lehlamah chuan blade thisen kai nuai mai a lo hum bawk a. Rang takin Sangtei chu Rinawma chuan a pawm tho vat a, khum lam a panpui nghal a. Minute 10 vel hnuah chuan Sangrei pawh chu a tha ve leh ta mai a, a lo inzai thuk lutuk lo a, a pawichin a lo zai hman lo bawk. Rinawma chuan, "Pi Hriat, Ambulance koh vat angai ang, anih loh pawhin damdawiina tlanchhoh pui vat chi a ni." ati a. Mahse Pi Hriati chuan, "Aih, a theihloh...ambulance chu kan ko thei lo ang." a ti tlat mai a. Rinawma chuan, "Engvangin maw?" a ti hu mai. Pi Hriati erawh chuan a chhang tawh lo, chu veleh Sangtei chu a rawn harh a. Tluangtei chuan, "Sangte, ilo harh tawh maw? I tha em?" a ti a. Sangtei chuan rum em em hian a nu chu a melh a, "Tinge min chhan a? Tinge thlamuang taka min thih tir mai loh? Ka hua che ka nu..ka hua che." tiin a tap nghal zawih zawih mai a. Pi Hriati pawh chuan a awm a dawm leh vawng vawng mai a, a rilru a hah hmel kher mai. Tluangtei chuan, "Sangte, enge awmzia? Tinge hetia i awm a?" tiin a zawt a, Sangtei chuan, "Engmah ka sawi peih rih lo." a lo ti hmuk mai a.

*************

Nathana pawh chu Margareth-i te inah chuan a riak ve ta mai bawk a, a muhil dawn tep tihah chuan pen thawm a hre tlat mai. A tho vat a, hnunglam a hawi chu MArgareth-i alo ni a. Margareth-i chu Nathana bulah chuan ava thu a, "Ka ti harh che em?" inthlahrung tak chuan ava ti a. Nathana chuan, "Aih, ti harh love, ka la muhil lo hrim hrim a." a ti a. Margareth-i chuan, "Englo ania, ka mu theilo a." a ti a. Nathana chuan, "Ngatinge i mut theihloh a?" tiin a zawt leh a. Nathana bulah chuan a tawlh phei hret hret a, hnai takah hian Nathana chu a en a, "Ihh...tukverh a rawn ri a, mahse engmah ka hmu silo a. Ka hlau deuh a, ibulah ka lo kal tawp." tiin a phun sap a, beisei nei tih hriat tak chuan Nathana chu a en ngawih ngawih mai. Nathana lah chuan, "Tinge khatia i phun sep sep kher a?" tiin a zawt leh a. Margareth-i chuan a chhang tawh lo, Nathana chu a fawh a tum ta mai a. Nathana chuan rang zet hian Margareth-i chu a namsawn vat a, "Enge maw i tih le?" a ti vin tuar a. Margareth-i chuan inthiamloh hmel tak hian, "Tihpalh Nathan, mahse ka insum zo lo a ni." a ti a. Nathana chu a tho a, "Enge awmzia?" a ti a. Margareth-i chuan, "Ka duh che a ni...ka duh lutuk che." a ti leh ringawt a. Nathana chuan, "A pawi khawp mai, nupui ka nei tawh a, fa pawh pathum lai ka nei tawh a ni." a ti a. Margareth-i chu rilru nat hmel tak hian a kun a, "Min ngaidam rawh." a ti a. Nathana chu a inthiamlo leh deuh a, MArgareth-i bulah chuan a va thu leh a, "A pawilo, enteh..ka tihpalh aw, ka vin vak kher che a. I mut theihloh chuan ka titi pui mai ang che, sawi duh te i nei em?" a han ti dam diai a. Margareth-i chuan, "Ih..englo, ka nu kha ka hmangaih miahlo amaw ka ti a. Mahse a thih takah chuan ka ngai ve ta khawp mai, tuman an hmangaih lo a ni ber mai. Kei leh Ropuia leh Julie..leh Ropuia fapa Sangsanga pawhin. A sual ve em a, mi kahwngaihna a nei bawk silo nen, a awm ve tho mai." a ti a. Nathana chuan, "I thiamloh a ni hleinem, thil thelng tur ve reng angah ngai la, theihnghilh rawh." a lo ti a. Margareth-i chuan, "Ropuia nen hian amah vang hian hrehawm tam tak kan tuar a ni, tha ber nih hi a duh a...kan hlim hlawl lo a ni." a ti a. Nathana chuan, "Sawi tawh suh, engkim a tha leh vek mai ang..hahdam rawh." a ti a. Margareth-i chuan, "Police te chuan hmuhchhuah an nei tawh em, evidence te a awm em?" ati a. Nathana chu a nui suk a, "Clue an hmu tawh em i tihna em ni?" a ti a. Margareth-i chuan zah hmel tak hian, "E aw..clue mawle, an hmu tawh em? Chemte pawh chu anla hmulo a mi?" a ti a. NAthana chu a thaw hak a, "Kan zawng mek a nih hi, kan hmu thuai ang." ati a. Margareth-i chuan, "Kan va mu leh tawh ange aw...chuan nichina thil thleng vang khan tihpalh aw.." a ti a. Nathana chuan, "Awle, apawilove..." a han ti a. Margareth-i chuan nui chung hian, "Tuma hnenah sawi chhuak suh ang che..\i nupui tan i rinawm a, ka ngaisang khawp mai che...muttui le." tiin room lamah a luhsan leh ta a.

Pi Hriati chuan a awm dawm vawng vawng pah chuan damdawi a lo hmawm mawlh mawlh a, Rinawma chuan va panhnaiin, "Pi Hriat, i tha maw? Ambulance chu kan call tawh mai dawn em ni?" a ti a. Pi Hriati chuan, Aih a ngailo, ka tha e. Arrhythmia natna hi ka nei thin a, ka naupan lai atanga ka neih tawh a ni a. Ka tha leh mai ang, lungngai suh." a ti a. Rinawma chuan, "Sangtei hian ahmain intihhlum a lo tum tawh thin i ti tiraw?" a ti a. Pi Hriati chuan, "Aw..tum thin e. Enteh, Ambulance call lo ang ka tihna chhan chu maw, kan call a nih chuan Doctor chuan a chhan min zawt anga. Inthah a tum thu kan hrilh anih chuan psychiatrist panpui a ngai anga, Mental Health Clinic ah an dah anga. Sangtei hi Mental Heath Clinic ah hian a awm ve tawh thin alawm, inthah a tum hmasak ber tum khan...amah tak hi chu hmeichhe hrisel tha pangngai tak a ni. Mahse, afapa, afapa vang hian.." a tih lai chuan Rinawma chuan, "Enga, fapa a? Enge awmzia, tu fapa maw?" a lo ti vat a. Pi Hriati chuan, "Ka tupa mawle, Sangtei fapa. A piantirh atang hian rualbanlohna a nei nghal a, autism natna a vei a. A awmzia chu maw...tawng nachang a hrelo a, a tawng tha hleitheilo bawk. A lu te hi bangah a tauh tir vak vak zel bawk a, a thil duh hi hriat a har thin khawp mai. Manganna hlir a nimai kan inchhung ve hi chu..a hrehawm asin." a ti a, a inhnit feih feih a. Rinawma chuan, "A hrehawm khawp ang." a lo ti a. Pi Hriati chuan, "Heng hrehawmna zawng zawng te hi Sangtei chuan amahin atuar vek a, atan tiin a thawk hram hram a, a theih ang tawkin pawisa a khawl ve bawk thin ani." a ti a. Rinawma chuan, "Tunge naupang hringtu pa chu ni a?" tiin a zawt a. Pi Hriati chuan, "Mi tenawm tak a ni, Sangtei rai lai hian midang a neihsan daih a. Sangtei chuan naute chu ti tla mai lova paitlang a tum ta a, mahse hei..." a sawi zawm theilo, a tap zawih zawih mai a. Rinawma chuan Pi Hriati chu kuahin, "Insum rawh, khawngaihin.." tiin a hnem a. Pi Hriati chuan tap chung hian, "Phai lama thawn thla mai turin doctor te chuan min hrilh a, mahse pawisa kan nei silo a ni." a ti a. Rinawma chuan, "Anih leh khawnge tunah i tupa chu a awm?" a ti a. Chutih lai chuan Tluangtei chu a lo kal a, Rinawma chuan, "Sangtei chu enge a an?" tiin a lo zawt vat a. Tluangtei chuan, "A tha tawh e...Nu Hriat, ambulance chu kan call ngei angai ang. Anih loh chuan a hliam saw a pun anga, thihna hial athlen thei a ni." a ti a. Pi Hriati pawh chuan, "Ni e...ka hrethiam e." a lo ti a. Rinawma chuan, "Anih chuan kan haw phawt ange." ati a, an hawsan ta a.

Khua a var ta, Rinawma leh Tluangtei pawh chu an mulo zankhua thak tihna a ni. Thingpui an in a, Tluangtei chuan, "U Rin, Sangtei chu a tha leh ang tiraw..ka ngaihtuah takzet a ni." a ti a. Rinawma chuan, "Atha leh mai ang, a fapa chu khawnge maw a awm ang le? Pi Hriati kha ka zawt hman ta miahlo a, ka ngaihtuah khawp mai." a ti a. Chutih lai chuan Nathana chu a lo haw a, Rinawma chuan, "Ehe..Sir, khawnge i awm daih a? Nizanah khawnge i riah a? Khawlaiah i mu em ni?" a lo ti a. Nathana chuan, "Margareth-i te inah ka riak a, amahin a riak ngamlo a. Sofa ah ka mu a, ani roomah a mu thung a." a ti a. Rinawma chuan nui put put chung hian, "I hnem tha thei maw?" a lo ti zauh a. Nathana chuan rum zet hian Rinawma chu a melh a, "Ngawi hmak mai teh." tih pah chuan a chhuak leh ta daih a. Tluangtei chuan, "U Nathan, chawhmeh a hmin tep ania, khawnge i kal leh dawn?" tiin a au zui lawm lawm a, mahse Nathana chuan a chhang lo. Rinawma chuan, "Tluangte, Margareth-i saw eng ang mizia nge?" tiin a zawt a. Tluangtei chuan, "A fel lutuk, mi fel tak a ni. Ka awmtirh pawh khan min pui char char a, engkim min tihsak vek alawm. Chuan a nau Ropuia saw a ngaihtuah em em a, mi puitling tak a ni. Mahse, tinge min zawh kher a? I ringhlel em ni?" a ti a. Rinawma chuan, "La ringhlel chiah lo." a ti a. Tluangtei chuan rum zet hian Rinawma chu a melh a, "U Rin, enge i hriat a? Margareth-i chu i ringhlel amaw?" a ti a. Rinawma chuan, "Nathana hi ka ngaihtuah a lawm." a ti a. Tluangtei chuan, "Enge i ngaihtuah vak a? Mi puitling pangngai tak a ni a, nupui pawh a nei tawh a, fa pawh a nei tawh a, enge i ngaihtuah vak a?" a ti a. Rinawma chuan, "Chuvang renga...ka duh aiin Margareth-i saw a ngaihsak mah mah a ni. Nizanah pawh Margareth-i'n an inah riak turin alo sawm vel a, beisei a nei ani." a ti a. Tluangtei chuan, "Enge i sawi tum ber chu ni a?" a lo ti hmuk a. Rinawma chuan, "Margareth-i sawn Nathana hi a beisei a ni, hman tangkai a tum a ni. Ka mi rin zawng a ni hlawl lo, Nathana pawh hi a lo thlemthlu mai ang tih ka hlau a ni. Amah saw hmeichhe chhelo tak a ni bawk nen, a hmelthatna leh a mawina hmang sawn Nathana hi alo thlem vel ang tih ka hlau a ni, Sanvi ka ngaihtuah vang a nih chu." a ti a. Tluangtei chuan, "Chutiang mi a nilo, Margareth-i te chu hmeichhe fel tak a ni. Ni e, anu chu a lo lerhin a lo sual pawh a nithei e, mahse ani saw chu hmeichhe fel tak a ni. U Nathana pawh chutiang khawpa mi rinawmloh a ni lo, duhtawk rawh." vin lek lek chuan a ti a. Rinawma chuan, "Awle a nih chu." a ti hmuk a. Tluangtei chu ala thinrim laklawh tlat, "I duh duh ringhlel ngawt suh, Margareth-i kher kher hi chu ka ring ve tawk, chutiang mi anilo." tiin a ang leh bawrh bawrh a. Rinawma chuan, "Aw ka hria e...a tawk e." a lo ti leh hmuk a. Vin zet hian Tluangtei chuan, "Tunge a nih i hre chianglo a ni, chutiang khawpa rilru tenawm pawh a pu lo bawk." a ti leh khur khur mai a. Rinawma chuan, "Awle awle...Margareth-i chu mi fel tak ani..a tawk em?" a ti ve ta vak mai a. Thinrim tak hian Tluangtei chu a tho thut a, a chhuak ta daih mai.

Pi Hriati chuan Sangtei muhil lai chu a en ngawih ngawih a, a phone chu laksakin a bialpa hlui Erica chu a phone ta a. "Hello, Eric..minla hria em? Sangtei nu ka nia...enteh, kan inah ilo kal thei angem? Sangtei hian a mamawh che a ni...phone atang chuan ka sawi theilo, lo kal rawh aw...awle...ka lawm ngawt ang." a ti a, phone chu a dah ta a. Erica pawh chu a lo thleng a, Sangtei pawh chu a lo harh tawh a. Sangtei chuan rum zet hian Erica chu a en a, "Tun chiah ka zawt leh ang che...engvanga lo kal nge i nih?" a ti khur khur mai a. Erica chuan, "Ka hmu duh che a, in office ah ka kal a. Mahse in Managerin a damlo a ti che a, tichuan ka lo kal anih hi." a ti a. Sangtei chuan, "Ilo kal a, min hmu tawh bawk a, haw tawh rawh." a ti hmuk a. Pi Hriati chu lo pheiin, "Eric, thingpui in ta che.." a tih lai chuan Sangtei chuan, "Nu...hepa hi haw tir rawh." a ti vin tuar a. Erica lah chuan ngaipawimawhlo zet hian inchhung vel chu a en kual a, Pi Hriati chuan, "Khai..Sangte..khatin an awm ngailo." tiin a lo khap vat a. Sangtei chuan thinrim tak hian, "Kal vek rawh u, ka mamawhlo che u, tumah ka mamawh lo." a ti vin hlur mai. Pi Sangtei chuan, "Sangte, khatin awm suh, a mawilo emai." a ti a. Erica chuan naupan lemziak niawm tak paper hi a hmu fuh a, Pi Hriati chuan, "Aw..Eric, kha kha alo la awm animaw? Kan thenawmah hian naupang pakhat a awm a, a rawn leng thin a. Tihian lem a rawn ziak vak zel a..." a tih lai chuan Sangtei chuan, "Duhtawk rawh ka nu, dawt sawi angailo. Eric, kha kha ka fapa lemziah te an nih kha." a ti ta mai a. Pi Hriati chuan rum zet hian Sangtei chu a melh a, choka lamah a phei ta daih a. Erica chu Sangtei bulah chuan a va thu a, "Fapa i nei amaw?" a ti a. Sangtei chuan, "Nei e, kum kua ani tawh. A hming chu Sammy-a a ni a, mi anglo, rilru lama rualbanlo leh mi a ani. Chuvang chuan nang nena bul tan that hi a rem tawhlo, ka duh tawhlo bawk." a ti vin vak vak a. Erica chuan zaidam tak hian, "Chuvang chuan min hmu duhlo amaw? Chuvang chauh chu em ni bul ka tan that theihloh nachhan?" a ti a, mahse Sangtei chuan a chhang lo. Erica bawk chuan, "Khawimaw i ban chu ka lo en chhin...ala na em?" tia a ban a va vawn chuan Sangtei chuan Erica chu alo nam sawn a, "Kal bo rawh." a lo ti vin hlur mai.

*************

Nathana leh Rinawma te pawh chu pawn ah chhuakin an titi dun a, Rinawma chuan ahma zan lama an thil tawn vel te chu NAthana a hrilh a, "Darkar tlemte pawn tlai ila chu Sangtei kha kan chan hman ngei anga, kuang dang siamtir leh angai ngei ang. Sangtei saw amak reuh khawp mai, a hmel en chuan pangngai ve fu si, mi a ang maiin a che a ni." a ti a. Nathana chuan, "Tupawh mai hi mi mak tak an ni vek alawm, Rinawm..he thingtlang khua a mi te hi an vai mai hian mi danglam tak leh dangdai tak vek an ni. Mawitea te, Robert-a te leh a nupui Sarah-i te pawh kha...Mawitea lah khan a room ah khan mihring lu ruhro niawm tak tak a hung fer fur bawk a, mi mak vek an nih hi." a ti a. Rinawma chuan, "Margareth-i hi a danglam ta ber anih hi..i tan phei chuan a chiang ngawt ang chu tiraw?" a han ti deuh kher a. Nathana chuan, "Enga? Ka rinhlelh deuh angai i tihna em ni?" tiin a zawt a. Rinawma chuan, "Hmanlai detective thawnthu ang deuh khan...misual chu a tawpah chuan kan rinhlelh ber te an lo ni leh nge nge thin. A dik em?" tiin a zawt a. NAthana chuan, "Rinawm, enge maw sawi i tum le?" a ti hu mai a. Rinawma chuan, "Sir, Margareth-i hi restorer hna thawk ani tih min hrilh kha, anih chuan Margareth-i saw chemte kawl tu ber a nih ka ring tlat a ni." a ti a. Nathana chu a nui suk a, "Rinawm, Icon Restorer leh Jewellery Restorer te hi an in anglo, midang hlak an ni." a ti a. Chutih lai chuan ui bauh vak vak ri hi an hria a, ui bauhna lam anva pan a. Ahmaa an lo kalna thin, Amosa kal ziahna building hlui lamah chuan ui chu a tlan phei zel a. A hmun anva thlen chuan Duhsaka, chhuata lo let reng mai chu an hmu ta a. Nathana chuan a han enchiang a, "A thi tawh." a ti ringawt a. Rinawma chuan, "Investigator te ka'n phone ange." a ti a. Minute 20 vel hnuah chuan Henry-a te pawh chu an lo thleng ta a, ruang vel chu an enfiah nghal a. Henry-a chuan, "Tualthattu hi mi professional tak a ni ngei ang, a thahdan en hian..plan mumal tak neia that a ni, thisen pawh tlemte bak a chhuak lo." a ti a. Nathana chuan, "Ka rin dan chuan a lung-ah tak a vit a nih ka ring, chawp leh chilh a thi nghal tawp thei turin. A nak ruh (ribs) parukna leh pasarihna inkar ah tak a vit aniang." a lo ti a. Henry-a chuan, "Engtin nge i hriat theih?" a lo ti a. Nathana chuan, "Ka hmu fo alawm, Police exam i neih lai vel te khan hnuchhuina lam hi kan lo khawih hrep tawh alawm." a ti ve deuh ngat a. Henry-a chuan, "Anakruk parukna leh pasarihna inkar ah chiah chiah maw? Chutiang te chu keipawhin ka hre ve tho, jail chhunga mitang hote inthah dan tlangpui a ni, sap ram jail ah." a han ti veleh vel a. Rinawma chuan, "Rang tak leh awlsam taka inthah dan tha ber a ni...mahni chemte siamchawp an hmang tlangpui thin bawk." a lo ti ve bawk a. Ruang chu post-mortem turin constable ho chuan an phur phei ta a, Station lamah chuan Henry-a pawh chu a let ve leh ta a. Report chu a han en a, Henry-a chuan a chhiar mual mual a, "A hliam chu chemte lehlam hraim ve ve (double-edge knife) hmanga vih a ni a, 54-55 mm a zau a ni. Tin vawikhat chiah vih a ni a, a nakruk parukna leh pasarihna inkara vih a ni. Tin, a hliam ah hian dust particles zingah rangkachak them hmuh a ni bawk..Ummmm, DCP Nathana khan dawt a sawilo a, chuan Pi Muani thihdan nen a in ang chiah bawk. A awmzia chu tualthattu hi Pi Muani thattu tho kha ani anga, chuan a chemte hman pawh angai tho tihna a nimaw?" a ti nuah nuah a.

(TO BE CONTINUE)

[Tualthattu hi tunge ni ang? Ropuia, Mawitea nge Margareth-i zawk? Comment lamah tu ber nge in rin inlo sawi dawnnia aw...]
Last edited by Aaron Dustin on June 12th, 2020, 1:22 pm, edited 1 time in total.



Link:
BBcode:
HTML:
Hide post links
Show post links

MISS BUTTERFLY
Posts: 3
Joined: December 29th, 2019, 10:58 pm

Unread post by MISS BUTTERFLY » June 3rd, 2020, 8:45 pm

Mawitea😂😂

Link:
BBcode:
HTML:
Hide post links
Show post links

Malsawmhlupuii
Posts: 1
Joined: May 16th, 2020, 7:58 pm

Unread post by Malsawmhlupuii » June 3rd, 2020, 9:46 pm

MISS BUTTERFLY wrote:
> Mawitea😂😂
Margaret

Link:
BBcode:
HTML:
Hide post links
Show post links

Aaron Dustin
Posts: 214
Joined: March 14th, 2018, 10:15 am

Unread post by Aaron Dustin » June 3rd, 2020, 10:12 pm

FB lamah zawk rawn comment ula 🤣🤣🤣

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)