James Mallory and Harlen Irene CH-2

[Maruata jr]

Maruata jr



James Mallory and Herlin Irene

Chapter 2


LOVE STORY


Retold by : C.Laizawna


Tlem thu hma lawk ka story kal lai kha chu chawlh rih ka tum a, tuna ka ziah tur James Mallory leh Harlin Irene ah hian ka in sawrbing dawn zawk a, reqular deuh hlek a tihchhuah ka lo tum ang.
Zantin emaw Nikhat danah zel Epi 1 emaw Epi 2 zelin tihchhuah ka lo tum dawn nia...

Tan ang aw


Chapter-2



MELBOURN HARBOUR
( Melbourn lawngchawlhna )


A hmasa berin Austalia ram lawng chawlhna khawpui lo sawi ta ila.Australia khawthlang lampangah 'PERTH' khawpui chu lawngchawlhna ropui tak a ni ang bawkin chhim lampangah chuan Melbourn khawpui chu lawngchawlhna leh khawpui ropui tak a ni.Pacific tuipui kama awm a ni a.Khawvel hmun tina sumdawng te leh miten an tlawh fo thin a ni reng a. Victoria ram thil chin reng reng chu lawngchawlhna atan hian an thawn chhuak thin a, he lawngchawlhna bawk hi thil lakluhna a ni a.Chuvangin, Melbourne chu thil lakluhna hmunpui ber a ni.

A khawpui chu Eucalyptus thing te, far te, Sider te hian a hual pap mai a.Kawtthler sirah chuan tlaizawng par te hi a vul chek chuk mai a.Tuifinriat kamah chuan kuhva kung te chu sang tak takin a ding seng sung mai a.Ralkhat atanga han thlir chuan a tlein a hring nghulh mai a.Ni a han en phei chuan thingbuk chu a chhun hring dup mai a.Tuipui lah chu a dumpawl phut mai bawk a.Zanah pawh hian a mawina chu kiam chuang lova.Hmun tinah hian electric hi a paw chiai chiai mai bawk a.Lawngchawlhna hmunah phei chuan Light House(In eng ) te hi a de sut mai bawk a.October thla engin Melbourn khawpui a han chhun eng phut mai chu,mawiin a lunglenthlak em em a ni.Chutiang thla eng zanah phei chuan nula leh tlangval te chuan an thian hlui te emaw an ngai a, an tap zawih zawih fo thin a.Khawvela hlaphuah thiam ropui ber pakhat Samuel Colerodge an tih phei chuan Melbourne khawpui mawizia leh thla en mawizia te chu vawi tam tak a phuah. Melbourne hi khawvela khaw ropui ber te zinga pakhat a ni ve reng a.

Melbourne khawpui chu Prime Minister rorelna hnuaia awm an ni a.Hetih hunlaia an Prime Minister chu Robert Irish a ni a.Chu khawpuiah chuan a fate pahnih leh a nupui Lady Rose thih hnua a lakluh Lady Catherine te nen chuan an awm a.Chutianga Lal ropui ni mah se Robert Irish chuan hlimna reng reng hi a nei lo. Nimahse, roreltu ber chu nupui nei lovin a awm thei si lova, Dan a ni lo bawk a. Chuvangin, khawnbawl te chuan Lady Catherine chu Robert Irish-a nupuiah an neihsak a.Lady Catherine chu Robert Irish-a fate chungah chuan a ngilnei lo em em mai a.Chuvangin, Prime Minister chu a lungngai hle thin a.

Nimahse, a fate chuan chutiang misual chu hrawn mah se an tuar hram hram zel a. A pa an hmangaih avang chauhin Lady Catherine chu an dawm thei a ni. Hun reife chu hrehawm tuarin awm mah sela an phunin an vui ngai lova.

Prime Minister fa upa zawk chu mipa a ni a, a hming chu John Calvin-a a ni. A naupang zawk chu Harlen Irene a ni a. A tawpah phei chuan John Calvin-a Lady Catherine chu a tuar ta ngang lova, a farnu Harlen Irene chu kalsan a lo tum ta a. Lungngai tak chuan a pa Robert Irish leh a farnu duhtak chu a nuhrawn rawng tak nen Philippine Indonaah chuan a kalsan ve ta a. Mipa tan chuan tihtur niin a hre tlat a. Damchhung hrehawm taka nun ai chuan mahni nun humhim nana tlanbo chu tha a ti zawk a. Mahse, Irene erawh chu hmeichhia a ni a, a pa a khawngaih avangin hrehawm chu pawisa lovin lal in ropui tak, hrehawm takah chuan a awm hram hram zel a.

Chutiang chu Melbourne khawpui rorel dan a nih avangin Harlen Irene chuan theihtawp chhuah a tul tih a hria a.Irene nu Lady Rose Mary chu a nulat laiin nula hmeltha tak a ni a.A fanu Irene pawh hian a chhun a, nula pian nalh thlerh thlawrh a ni. Hmel sawl deuh, mitmeng mawi em em a ni bawk a. A aw te lah chu Jordan tuipui luangri ham ham ang a ni a. A sam lah chu Golden Hair an tih ang hi a ni bawk a.Tupawhin Irene mitmeng chu mawi an ti em em a ni.


Irish ho mitmeng reng reng hi a mawiin ngaihno a bei bik a. Khawvela mitmeng mawi ber te pawhin Irish ho an tluk lova.Lady Catherine chuan Irene chu a thik em em a ni. roreltu tur a ni si a. Catherine chuan a fate chu roreltu ni se a ti hle mai a.Engpawhnise, Lady Catherine chu roluahtu a ni thei lo reng reng a, a fate pawh an ni thei hek lo.

Irene chu inchhung buaipuitu ber a ni a, hun awl a nei thei lo em em a ni. A hunawlah thawnthu a chhiar thin a. Nikhat chu thawnthu a chhiar a. Inchhunga a awm laiin lawng chawlhna lampang chu a han thlir a. Lawnglian pui pui, khawi lam ami nge tih pawh hriat loh hi an lo kal ta ruau ruau mai a. A lehkhabu chu a dah a, tukverhah chuan a thlir ta reng a. An in atang chuan lawngchawlhna chu hnai tak a ni a. Chutiang taka a hmuh theih avang chuan a lawm hle a. Lawng pakhat a lokal hnai a, lawngmi te chuan an phurh te chu an thiar char char a. Chung buai nuk nuk zingah chuan lawngmi pathum vaukam lamah an lo kal a. An hmel chu a hre chiah lo naa, French mi an nih chu a hre thuai a. An zinga pakhat chu a kal hrang a, khawi lamah nge a kal dawn? A thiante erawh chu an awmna inchhawng hnuaiah, Calana Street an tihah chuan an lo kal a.


Chutih lai tak chuan Lady Catherine chu a lo kal a," Irene, lo kal rawh. Khatah enge i tih? Hnathawh tur a tam vei nen," a rawn ti hlawih hlawih a. Irene chuan s rilruin," Aw...! Ka nuhrawn hi chu a va'n sual tak em, eng hna mah thawh tur a awm si lova," tiin a mittui chu a tla zawih zawih bawk a ni.


A nuhrawn chuan," I mittui te i han tihtlak chu le, i zak na'nge?" a han ti leh nghal a,"I va zak lo em!"

Irene chuan,"E, ka tahna chhan chu ka u Calvin-a ka ngaih vang a ni," a ti a. A nuhrawn chuan, tap tap teh suh tih aruangin,"Duh leh thi...," a la sawi zawh hma chuan Irene chu a ding thuai a,"Ka nu, i va mak em em ve le! Chutiang tawngkam te chu a sawia sawi awm loh alawm mawle," a ti a, a lung a chhe em em a.


Lady Catherine chuan," Sawi awm loh a awm em ni? I zak chai law'm ni? I nutapa chu thi daih ang hmiang, nang nen hian," a ti a.


Chutiang thu chu Harlen Irene chuan a ngaithla ngam ta lova, mittui tla zawih zawih chuan a pindanah chuan a tlan lut ta a, a khum bula a nu thlalak chu dim tein a la a," Aw !!! Ka nu, min va tirethei tehlul em ! Aw...Ka nu lo tho leh la chuan hetiang em hi chuan ka awm lo tur...," a ti a. Khumah chuan a bawk thlawrh a, a tap zawih zawih a


Prime Minister fanu meuh ni mah sela mite hriat lohin Melbourne Rose par chu a inthup thei lo ang hian mite hriat lohin a awm lo thei lova, a pa chuan a kal chang te hian a awmdan chu a ngaihtuah thin a. Tui bula Maniosa par vul chuk zinga pakhat pawh chu lo ni zawk sela a duh zawk em em a. Irene-i zawng hrehawm tuar tur renga lo piang ni awm tak a ni. Lady Catherine avang chuan Phaizawl pangpar hling nei chuan a hliah ta a ni.

Mahse, Irene chuan nitin an in chhawnghnuai lam pang a FRENCH tlangval kal hrang ta kha a nun tihlimtu tur a ni tih hria sela chuan chuti em zawngin a lungngai bik lovang le ! Mahse, mihring hma lam hi engmah hriatsa theih hek loh le. Chutiang chu a ngaihtuah phak hek lo, a hmabak chhumpui chu a tawn tlang hma loh chuan hrehawm takin a la awm dawn a nih chu.



Duh tawk leh phawt ang aw...


Next epi ah chuan James Mallory leh Harlen Irene te intawn dan leh an in kar a hmangaihna duhawm tak Hmangaihna Rose par mawi tak lo chhuah dan leh Hmangaihna rinawm chu. I lo châng dawn a nia...Ka lo kir leh vat ang...


Wait for Epi 3