A SCANDALOUS MARRIAGE By MIRANDA LEE 9

[Lucyvllm]

BUNG KUA

Chumi chawlhkar tawp leh a kar dawttu hun chhung chu Natalie chuan rei hi a ti ngawih ngawih a. A hun chu hnawhkhah tum in magazine vela Wives Wanted ads chhuah tur a buaipui a, a in a tifaiin, nidang zawng aiin a chhungte a tlawh zing bawk a, sum lam a an harsatna a sutkian sak avanga an lawmna chuan a tih hlim rual rual in Mike leh a sum chu anchhia a lawh deuh reng thung.

He mihring zet hi chu mi hlauhawm tak chu a ni. A tisa chakna namen lovin a kaihthawh sak in, a nun ruak zia leh khawharthlak zia a rawn hmuh tir a ni ringawt.

Nidang ang in lehkhabu chhiar leh TV en nuam tihna a nei tawh lo in, gym a kal phurna lah a nei hek lo, mipa tumah in an duh loh taksa chu eng nge sawizawi a enkawl vak a tul na a hre tlat lo.

Wives Wanted a a hna lah chuan a rilru a luah thei hlawl lo, a sum hmuh tur ang ang a hmuh fel hun ah hna dang thawh a rilruk ta hial nghe nghe a.

A hma ang bawkin a tuk khawvar hun mawlh mai chu a ngaihtuah leh a.

Dar kua ah a rawn lam tur thu a sawi kha maw. Darkar sawmpanga aia tlem hret hun a la awm. Engvanga la rei viau a ngai nge maw a nih le?

Natalie chu a inchhung ah chuan helhhawlh nei ang maiin a tei kual sek a. Dar ruk leh a chanve ah chuan Bertollini ah pasta ei tur a kal a rilruk a, zan in zet chu eitur siam pawh a peih hlawl lo a ni.

A kal pah chuan darthlalang ah a inbih zawk a, Natalie chu a ner nang nang a. A sam chu a hrisel hmel in a tle sat a, mahse a intawn mar mah mah a ni. Mike khan a lo sawi dik a ni, a sam chu a thlah zen zen ngai lo in, a thil sawi lam hawi phei kha chuan a awm lohna a rei lutuk mah mah tawh.

Lu thing nar nar chung in kawngkhar lam pan chuan a kal a, a chhuah hma chuan a ding ta chawt a. Mamma Bertollini chuan a bialpa a lo kal ve loh chhan a lo zawh vaih chuan a nuam lo ngawt ang, a nih loh vek leh engmah lo zawt lovin, lainat takin a lo thlir leh lek phei chuan a hrehawm viau ang le.

Natale chu a rum hak a.

Mike chu va biak mai a duh ut ut a, mahse a insum thei hram zel chu a la nih hi maw.

Naktuk chu zankhat chauh in a dang tawh alawm. A tuar chhuak tur a ni ringawt!

Chuan khawi lam nge a pan tak ang? Tunge a biak ang le?

A hnathawhna hmasa a a thiante kha a la be thei tho alawm, mahse an sawmna te a lo hnar ngun tawh em avangin an rawn be ngai tawh hlawm silova. Kathy kha a thian hnaivai awmchhun a ni thin a, mahse tun ah chuan pasal neiin, fa pawh a nei tawh a, va tlawh a a hlimzia va hmuh pui chu Natalie chuan a chak hran lem lo.

Video hawhna hmun ah kal in video pahnih thum a zuk hawh mai dawn em ni ang, chuan chocolate leh wine tlem a zawng a lei nghal mai ang a, a tihchi viau ang chu.

A phone a rawn rik tak ah chuan a thin chu a phu dep dep a.

A chhungte chu an ni lo ang, Zirtawp zan ah chuan club ah an kal ziah a ni.

Mike a ni ngei ang.

Chhang tur a a let leh lai chuan, naktuk a a thil ruahman sa a rawn thulh leh dawn a ni ngei ang tiin a ngaihtuah a, a thulh a nih vaih chuan a thi thei hial ang.

Nidang a a phone lo chhan dan aia nelawm deuh hlek in, “Natalie Fairlane ka ni e,” a ti sap a.

“Natalie, Alanna ka nia. Alanna Desmond.”

Mike anih loh vanga a lunghnura chu thup tum in, “Alanna!” a ti hluai a. “Teh mial che chuan. Enge i an a?”

“Duhthusam in ka tha.”

“I thil hriatrengna chu a lo la tha zel a nih dawn kha a.”

Alanna chu a rawn nui hak hak a. A nui ri chu a ngainatawm khawp mai, a nu raih mai. Ni e, a ni te chu hmeichhe nu tak a ni miau alawm.
Keimah ang nilovin, tiin Natalie chuan a ngaihtuah zui a. Tur ang maia Mike’an min pumpelh a tum pawh hi a mak hran lo e, keipawh mipa chu ni ila, ani ang tho hian ka ti ang.

Alanna chuan, “Ti daih ila, khami ni a i rawn kal ve avang khan lawmthu pawh ka la hrilh mumal lo tak che asin,” a rawn ti a.

“Ka tihtheih ve chhun a nih kha.”

“Midang tam zawk chuan an tum kher dawn lo asin. Chuan maw, ka rawn biak nachhan che chu maw, tukin lam ah khan Mike’an min rawn bia a.”

Natalie chuan, “Oh,” a lo ti zawi sap a.

“In inneih tur chungchang min rawn hrilh a.”

“Chuti maw?” Hrilh a tum thu chu a sawi lawk ngei a, mahse hre kher lo sela a la duh zawk tho tho a ni.

“Reece nen inneihna thil vel buaipui tur in Richard leh Holly te pui tur in min duh a.”

Natalie chuana rilru natna leh telve lo ni a a inngaihna chu dah bo a tum hram hram a. Mahse inremsiamna a inneih na a ni emaw ni lo emaw, monu a nihna a bo phah chuang em ni?

“Anih chuan kan inneih na chu reilote chhung a inremsiamna mai a ni tih a sawi tel ngei ka beisei,” a ti chang fak a. “Inhmangaihna thil atthlak tak vang nilovin.”

“Aw, a sawi uar khawp mai.”

“Ka ngaihruat thei mai e,” a lo ti ro halh a. “A tir te atang khan Mike chuan hmangaihna leh inneihna chu a ngaina lo a ni tih a sawichiang nghal a ni.”

“Chutia a sawi lai chu ka mitthla thei mai. Mahse chu chu i ngaihdan ve tho em ni, Natalie? Hmangaihna leh inneih na chu i ngaina lo ve tho em ni? Ka sawi awmzia chu .... hmangaihna a awm i rin siloh chuan engvangin nge midang te intawnna tur ruahmanna i siamsak si a?

“Hmangaihna chu a awm ka ring alawm,” a ti sap a, “mahse ka hringnun a ka thil tawn te hian mipa lak ah rinna min nghah tir thei tawh lo zawk a ni.”

“Ni e, i sawi awmzia chu ka hrethiam e,” rawn tiin Alanna chuan a pasal neih hmasak tum a an boruak chhe tak chu a ngaihtuah let ni ngeiin a lang. “Chuan he inneihna hi nangma lam ah pawh sum vang chauh a ti em ni i nih? Nge ni a, a ruk takin Mike hi i lo ngaina zawk le?”


Natalie chuan a dan pangngai ang in teuh nang aw a rawn tih hun Alanna chuan a lo ngaichang ru ran a, mahse phone lehlam atang chuan channa a hmuh tak lawk silo ah chuan he inneih na ah hian en thuak a thil landan bakah hian thil inphum ru eng emaw a awm a ni ngei in a ring ta nghal a – Natalie lam ah tal chuan thil eng emaw chu a awm ngei niin alang.

“Natalie?” tiin a va tur deuh hlek a.

Chuta Natalie rawn thaw hak chuan thu tam tak a sawi a ni. Richard-a nupui Holly chuan a sawi dik niin a lang, Mike nupui neih tur a hriat atang khan hmangaihna lam vang ah a lo dah nghal hmiah a ni.

Phone a an inbiak na ah Holly chuan, “Sum vang ringawt in hmeichhe pangngai chin chuan pasal an nei ngai lo a ni,” a rawn ti a. “Natalie chu i sawi ang a hmeichhe fel a nih si chuan Mike chu a duh ve hrim hrim tihna a ni mai.”

“Amah hi i duh a ni ti raw, a ni em?” a rawn ti nawn a.

Natalie chu a thaw leh hak a. “A chhan tur awm ang ka hre hauh lo thung a nia. Ka mipa tawn tawh ah chuan a la ninawm ber hial ang.”

“Mahse a duhawm thlawt alawm.”

“Nia.”

“Anih chuan inneih na puitlin loh chungchang ah khan i duhdan a ni chiah lo ang ah ngai ta ila, ka tisual ang em?”

Natalie chuan lo hnial pawh a tum buai hran lo. “Ban phak loh thil neih tum chuan awmzia a nei tlat lo a ni, Alanna. Mike duhzawng ka ni hlawl lo a ni.”

“Engtin nge chu chu i hriat a?”

“A sawi miau alawm.”

“Khai aw, a chang hi chuan a hawihhawm lo riau thin tak asin.”

“Hawihhawm lo, mahse thudik sawi mi a ni. Chuan Alanna, Mike hian eng ang hmeichhia nge a kawp deuh ber tih min han hrilh hrim hrim teh khai.”

“Han sawi fak a har ang reng, an in ang lo thluah hlawm a. An hmel a tha hlawm in an pian a nalh hlawm tlangpui thin.”

“A nih chu ....”

Alanna chuan, “Nang pawh i pian a nalh alawm,” a rawn ti vat a.

Natalie chu a nui hak a. “Ka pian chungchang lam a ni vakin ka hre lo, keimah hrim hrim hi a ni mah zawk. Ka thil thlirdan leh ka thu ka duh lutuk te, chuan ka sam a nalh loh vang te, ka thawmhnaw inbel mawi lo lutuk avangte a ni hlawm. Ka thil lei duhzawng a that tawk loh a rin avangin kan inneih hma in thawmhnaw min leipui tur thu a sawi nghe nghe a.”

Alanna chuan, “Anihna tak ah chuan chu chu a ti thei dawn lo a ni,” a rawn ti sap a.

“Eng chu maw a tih dawn loh a?”

“Thawmhnaw leipui tur che in a hruaichhuak dawn lo che a ni. Keiman ka kalpui dawn che. Chuvang pakhat chu a nia ka rawn biak che ni. Hna a nghah lutuk a, a hman leh lo a ni.”

“Mahse hna a khaihlak thu kha a sawi si a!”

“A programme ah virus eng emaw a hmu a, chu chu a tih fel a ngai a ni, a pawi ka ti khawp mai.”

:Amah pawh in min rawn biak a, min hrilh ve tur alawm,” a lo ti hlar a.

“Dik chiah, rawn be awm tak che a ni asin. Mike nen a thawmhnaw han lei vel chu i nghakhlel tawh viau ngeiin ka ring.”

Chuzawng thu a thup mah mah a ni, Natalie chuan balloon thep ta thut ang mai ni hian a inhria a

“A mi ngaih ang em em a laktlak lo ka nih lohzia han hmuh tir kan duh deuh mawle, chapona atthlak tak a ni.”

“Chapona chu thil atthlak ah ka pawm ve hauh lo. I duh chuan i la entir thei reng alawm, in inneih ni atanga tan in. I mo kawr ha lai a hmuh hun a Mike ka hau tur chu i hmu chak ve ngeiin ka ring a ni, ni lo’m ni?”

Natalie chuan chu zawhna chu chhan mai dan tur pawh a hre lo. An inhmuh tirh atang khan Mike a duhna chu tihreh tum in a bei ngar ngar a, a sawt hlawl bawk silo. Diktak chuan tun ah hian chu a duhna avang chuan hrehawm takin a awm phah zawk a ni.

Amah duh let ve tur in Mike chu engti kawng emaw tal a a thlem thei a nih chuan – zankhat atan chauh pawh nise -chu hun tha chu bawhpelh a tum hauh lo.

“Ni e,” tiin a thaw halh a. “Mahse chu chu a thlen theih i ring reng reng em ni?”

“Bawihi, a atchilh hlum lo chauh thei ang che chu, lungngai reng reng suh. Ka duhtawka ka chei hun ah che chuan Mike chu a inthunun zo hauh lo ang. Chulo ah, mi rintlak tak atanga ka hriat dan chuan December kar khatna vel ah hi chuan hmeichhe lak ah Mike hi rei tak a lo insum hman tawh dawn a, a ni tan chuan thil thleng khat tak a nia. A tisa chakna pawh a sosang viau tawh ngei ang le.”

Natalie chu a ner sawk a. A insum zawh tawh loh avang maiin Mike chuan mutpui se a duh reng em le?

A chhanna neih chu an inneih nachhan ang maia zahpuiawm a ni.

Aw.

“I ngawih reng na kha in inneih ni a Mike tih hrehawm i duh tihna ang ah ka ngai mai ang e. Chuan naktuk zing ah kan insiam danglamna chu kan tan dawn nia. Hun kan nghah lo a nia. Dar riat leh a chanve ah chiah ka rawn lam ang che. Awi, a va han nuam dawn tak!”

Nuam. Chu thumal chu Natalie chuan a ngaihtuah chhunzawm a. Hun rei tak chung chu hun nuam tak a lo hmang tawh lo a ni. Chuan a hmeichhe nihna, a chhungril duhna chu rei tak a lo up bet tawh bawk.

Tun kum li chhung a a vawikhatna atan nung thar ta sawt a inhriatna a nei a.